رواية نوارس مهاجره الفصل الثالث والأربعون 43 - بقلم zeanab_almusawi

هذي البارتات  ماقبل الاخيره
لاتنسوون التصويت
#نوارس_مهاجره39
#زينب_الموسوي

ايه
في ليلة اتصلت ملاك بيه وخبرتني بوضع امي الصحي منهار

: شوكت ترجعين لج اخاف ماما تروح من ادينا واني لوحدي

: الله لايگولها ملاك اهدي وحاجيني الاطباء شنو گالوا

: الاطباء گالوا السكر مرتفع نتيجه لقهر او صدمه وصار يومين لاتاكل ولاتشرب ومتدري بالي حواليها

: الله يساعدها
باعي هسه راح ادور على حجز قريب واقرب السفر هو باقي تلث ايام

: الله يخليج قربيه وتعالي ويايه خايفه ايه

: الله كريم. اروح احجز
وانتي اتصلي بيه كل ساعه طمنيني

: ان شاء الله

سديت التلفون
طلال نايم هو العلاج الي ياخذه يخليه ينام بلا ميحس
گعدته

. طلال ماما مريضه وبالمستشفى وخطره كلش تگدر تقدم السفر

: مااعتقد تلگين اقرب من تلث ايام
انطيني اللاب واشوف

بحث عن موعد مافي اقرب من موعدنا
حتى لو نريد نحجز جديد الموعد الاقرب اسبوع

: ماكو غير ننتظر وان شاء الله ميصير شي
انتي بس لاتقلقين زايد

: من قهرها على بنت روان راح تموت على شوفتها

: من نرجع ان شاء الله
اروح على اهله يعني ميصير حتى ميقبل نشوفها
فوگ غلطه انوب ياخذ بنتها

: فدوه لعينك طلال حاول تشوف حل
حتى لو بس نشوفها اتنازل عن القضيه بالوصايه بس نشوفها بتلفون بزياره ميصير هالظلم هذا

: اني اگول نعرض عليه والدتج تشهد لصالحه مقابل يخليكم تشوفوها

: عرضنا عليه مقبل
اني لو اعرف وصيتها وين ارتاحيت

: ايه انتي تگولين هيه متعرف تكتب قوي فاكيد وصيتها مسجله صوت وصوره والي بعمرها متعلقين بالموبايلات

: فدوه لعمرك شلون فكرت هيج اكيد والله
تلفونها اكيد. ايامها الاخيره كانت تصور هوايه

: وتلفونها وين ؟

: تلفونها ويه اغراضها كلها مع رعد

باوع عليه مستغرب كلامي

؛ ايه تذكري زين شنو عند رعد
هوه اني واثق جريناه من الغرفه جر. مااخذ اغراض ولا اي شي من الغرفه .. الي بقى بالغرفه
الممرضات فقط

: متاكد من حجيك هذا

گعد بالسرير وهو يذكرني

: ايه عيدي الموقف بخيالج
ماتت وهيه بحضنه
سحبته اني منها
وانتي وامج تصرخن ..وتهزن بالسرير .. اخذنها الممرضات وراحن. ..وهو راح بعدها استلمها جثه... تتصورين يرجع على اغراض

: اي صحيح داتذكر. بس وين التلفون والاغراض

: اسالي الدكتوره والممرضات
اكيد يعرفون منو اخذه

: اخاف شمروه بالزبل

: مستحيل اهنا قانون عدهم الكاميرات والتلفونات يسلموها ل اهل المريض يعرفون بيها ذكريات ويخافون من اهل المريض يقيمون دعوه عليها

: اتصل بملاك واخليها تدوره

: خابريها واكدي عليها لا تگول ل امج شي اخاف ننطيها امل وبعدين تنصدم
لان احنا ممتاكدين الوصيه بالتلفون

اتصلت بملاك بنفس اللحظه

: ملاك تلفون روان طلال يكول اكيد الوصيه بيه
ويگول رعد مااخذه

: يجوز صدوك حجيه لكن مااعرف وينه مشفته

: حاولي تسالين ماما بصوره غير مباشره حتى متنطيها امل تتذكرين من اخذوها لصالة الولاده احنا غيرنا ملابسها
مكان وياها تلفون

: لكن ماما. گالت اخذه رعد

: ملاك التلفون لازم نلگاه
حاولي تسالين الدكتوره لحد ارجع

: اوووف لو يطلع هالحجي صحيح ونقدم الوصيه للمحكمه

: غير نعرف اول رعد وين عايش
الله ياخذه وساعه السوده الي شفناه بيها

ظليت انتظر الليل كله تتصل ملاك وتگلي لگيت التلفون مااتصلت

مااتحملت انتظر. الليل خلص واني سهرانه طلال نام واني بقيت
على امل تتصل
طلع الصبح واني انتظر
اتصلت بيها جاوبتني

: سالت الممرضات.. ميعرفون بيه .. والدكتوره باجازه اخذت موعد من عيادتها من تجي اسالها
ولو الحادث صارله سنه وست اشهر منو يتذكر

: اوووف يالقهر خلي اوصل
واني اعرف شاسوي والله لا حتى بالصحف اكتب واخلي مناشدات

گعد طلال على صوتي

: ها لگيتوا التلفون

: لا

: لعد ماعدنا غير اهله نحاول نتصل بيهم نسافر اكيد عدهم اتصال بيه وابلغهم خالتي تشهد وياه. وانتي تتنازلين عن القضيه ونتفق على تربية الطفله. بينكم
خليها عليها.. وكافي تفكرين ومنهاره

: اعذرني طلال والله مسمار بگلبي الي سواه بينا

بالايام الثلاثه الباقيه طلال واهله ساندوني.. وحاولوا يخففون عني ويدعون النا نشوف نوارس

اليوم الاخير تجمعوا اخوانه واخواته بالبيت
وكل واحد منهم ينطينا ذكرى
الي ينطي صور اله ول اطفاله
الي ينطينا. تحف اثار من العراق ..
وبعضهم كتب.. دينيه.. وادعيه

الجنط انملت
خالتي حتى البهارات الي بيتهم انطتنياها
التحف والورد الي بغرفتي
كلها جمعتها

: خالتي مابقى مجال

؛ اكو مجال.
يايمه هذي اغراض غرفتج قابل اتركيها

: تريدين الصدك بهذي الغرفه عشت احلى الايام

؛ والله لو تنشال اخليج تاخذيها بس خليها كل متجين تعيشين ذكرياتج بيها

: ان شاء الله
وطلال مقرر بس نوصل يقدم فيزا الج انتي والحجي

: اني هالشغله متردده منها. لكن الحجي يگول نروح ونرجع يعني مااترك العراق نهائيا وطلال يگول الصيف عدنا وبالشتى اهنا

: اي والله الصيف بامريكا يجنن ولو قصير

: يمه بعد مااوصيج على طلال شوفي هالايام الي تصالحتوا بيها شلون نفسيته مرتاحه

: خالتي طلال مو بس رجلي والله النفس الي اتتفسه لا توصيني عليه منو عندي غيره
هوه وبس

: الله يسعدكم. ويرزقكم الذريه الصالحه

: امين
بعد بقى شي اخليه بالجنط لو اسدها

: لا هاي هيه
يله ننزل نتعشى ونسهر سوا لحد موعد طيارتكم

: يله خالتي

البيت بكل ركن فيه حديث توصيات. ..وامنيات
بكل زاويه نظرة محبه من شخص من عائلته حتى رفقه عيونها تدمع على سفرنا

: شنو القصه رفقه قابل رايحين نستشهد
لو عبالج بعد مااجي واشوفج
وبعدين التلفونات موجوده ونتخابر ونحجي كاميرا شبيج
گلبج رقيق

: تعودت عليكم والله شاهد حبيتج مثل اختي وحتى ابني تعلق بيكم

: ياعمري واني تعلقت بيج اكثر
بس خليني افرغ من قضية الوصايه
احاول بكل الطرق اجيبج ويه خالتي

: صدك تحجين ياريت والله اني اهنا محد اليه
الله يخليج حتى لو تجيبني خدامه عندج

: شنو هالحجي وبعدين بامريكا لا تتصورين عندي خدم
وداعتج اركض من الصبح لليل
من تجيين تعرفين

: لعد شلون تجيبني

: باعي هيه مو اكيد لان قوانين الهجره صارت صعبه
الا اذا فرصة زواج او خطوبه

: عادي اقبل بس ابني ويايه

: وخلي ابالج الي ياخذج لا راح يكون مليونير ولا شاب ولا حلو
واحتمال كبير لو ارمل لو مطلگ

: فد مره گولي لو يريد يموت

: يجوز مو بعيده
ههههه
داتشاقى وياج ترى النصيب بيد الله والي كاتبه يصير
وكوني واثقه بكل الاحوال ماتخلى عنج وعن ابنج وحتى طلال راح اخليه يسووي جرد باصدقائه. لحد نشولف رجل

: الله يرضى عليج وعليه

: يله خلينا نقدم العشى
ونكمل السوالف

والسوالف تبعتها ضحكات
وسهر كلنا في نفس الصاله
وحتى الاطفال ميقبلون ينامون
الي يغسل عيونه والي يفرك بيهن حتى مينام

عائلتهم افرادها كلهم قريبين من بعض
وبسطاء. ويحبون الناس لذلك حسيت بالالفه وياهم
ومن صار الوقت نطلع حسيت ودعت اعزاء واهل مو فقط اعيال

اللحظات الاخيره مليانه قبل وعناق. ودمعات تسقط منا
بلا منحس
طلال عانق امه وابوه سوا واني اصورهم
وامه وصته بيه
( دير بالك على مرتك اذا تريد رضاي عليك )
: بعيني يمه
انتي ديري بالج على الحجي وعلى صحتج

واتجه ل ابوه
: يابه اشوفك بخير وادعيلنا

: محروسين بالنبي واهل بيته
ان شاء الله نتشاوف

رحت على اخواته بوستهم
وهنه يدعن.،. اليه بالولد
واخوانه سلموا عليه
واخذوا الجنط لسيارته اخوه

وطلعنا اني وطلال تتبعنا قطرات طاسة المي
صعدنا السياره

وفتحت كاميرتي اصور بغداد اول ساعات الفجر ..
وهيه خاليه من الناس.. الا ماندر
من الباعه.. والبسطيات
الشوارع تسدها.. الحواجز
وبعض الجنود يمسكون سلاحهم استعدادا للواجب
بغداد رغم جروحها يبقى وجها صبوح ..
والي يغادرها يحس غادر بوابة الجنه ..
بغداد عاصمة الالم.. والحب
والحياة ..والوجوه الطيبه

وصلنا المطار
نزلنا وبعدين الجنط
وگف طلال واخوه حد بعض تحاضنوا
وطبطبوا على ضهر بعض

: في امان الله
حرك اخوه السياره وابتعد
اقتربوا منا شباب يصعدون الجنط للعربه

ودفعوها
ومشينا اني وطلال ايده خلف كتفي
خطواتنا تگول (بالاخير احنا الي صفينا سوا ونكمل سوا )
صعدنا الطياره ودعنا العراق
ونشرت صوره النا شكرت بيها عائلتي الكبيره
احبابي اهل زوجي

بالطائره تفكيري تركز حول ماما وصحتها
وكيف اخذ بنت روان وماما تشوفها وترتاح
وطلال حديثه كان عن مستقبلنا اهناك
عرفت متصل بديلر حتى يشتري محطه بانزين وقاعه رياضيه

: اشو مگتلي

: انتي مشغوله بقصة الطفله وماحبيت احملج هم اكثر وتفكير وقلق
: اي والله متتصور شگد قلقه على ماما.

: هسه نوصل وتشوفيها
وترتاحين

: اهم شي متنسى وعدك اليه بخصوص نوارس

: ماانسى او وياج لحد نلگاها

رحلة العوده كانت متعبه ولساعات طويله وانتظار بالمطارات.
اكثر شي متعب هو الجلوس في نفس المكان لساعات بدون حركه
وخلصت الساعات وصلنا لمطار ديترويت
الاحساس بالعوده لمكان اصبح مألوف
احساس مريح رغم الحاجه لفتره الى ان تتعود على اختلاف الوقت
واختلاف الجو

: هاي شنو البرد شهر الرابع واحنا بعدنا ثلج

:: هذي مشيگان. بردها ميرحم وحرها يحرگ

: دتعالي الزمي بايدي اخاف توگعين بهالثلج. حذائج عالي

: واني شمدريني ثلج عبالي خلص وصار صيف

: الظاهر هذي اخر الثلج

مشينا بغاية الحذر
اخذنا سيارتنا من البارك بالمطار
وطلعنا للبيت
الشوارع بيضه وليل واكثر المحلات معزله

: طلال اروح للمستشفى اشوف ماما

: بسيطه بس خلي اسوق بطيء دتشوفين الطرق بيضه

: على راحتك

ساق بطيء وبصعوبه بسبب الثلج الي ينزل
لحد وصلنا اني دمي ناشف من الخوف

: انزلي انتي بين ماابرك السياره

: اوكي. لاتتاخر

دفعت بوابه المستشفى الي مكتوب عليها ادفع
وبالاستعلامات سالت الموظفه عن ماما طلبت اسمها وشافته بالكمبيوتر.. وجاوبتني
الطابق الثاني
رحت على المصعد مشغول ويتاخر
صعدت بخوف ولهفة على السلالم
خايفه اشوفها اسوء مما اتصور
خايفه اشوف دموعها. الي طول عمري اشوفها تنزل قلق علينا
وحركة علينا

وصلت لغرفتها باوعت من الزجاج نايمه وملاك نايمه يمها

فتحت الباب بهدوء ودخلت وحجيت بصوت ناصي

: ملاك. اني اهنا
اگعدي روحي لبيتج

فزت وگامت حضنتني رغم بطنها جبيره من الحمل

: حمد الله على سلامتج
مشتاقتلج ولج وين رحتي وعفتيني لوحدي بهالحال

: اشش على كيفج وطمنيني ماما شلونها

: مثل متشوفين. متقبل تاكل والادويه غيروها مرتين
حتى يسيطرون على السكر والضغط

دخل طلال وسلم عل ملاك

: شلونج ام حسن سلامتها الحجيه.

: ربي يسلمك هلا بيكم

: باعي ملاك انتي روحي للبيت هم حامل وهم ابنج محتاجج واني ابات يم ماما مشتاقتلها

: لا مااگدر اعوفها انتي روحي ارتاحي جايه من سفر

: ملاك الله يخليج اسمعي الكلام وخلي طلال يوصلج للبيت
يم رجلج وابنج

بعد عدة محاولات اقتنعت تروح لان زوجها وابنها بيتنا بايتين
طلعوا وبقيت يم ماما
اقتربت منها بست ايديها وراسها
تحسرت وفزت من برودة وجهي
وشافتني حايطتها باديه

: ايه شوكت اجيتي رجلج وين

: هسه وصلت طلال وصلني وبعدين اخذ ملاك للبيت

: همزين اجيتي اشوفج قبل لا اموت

: اسم الله عليج وحواليج
اصلا صايره حلوه. وجهج ابيض
اني ادري ليش مطلعت عليج

: هسه وگته شقاج

: اي وكته. تدرين كوني اني الوسطانيه يعني مثل الزايده بالعائله لازم تنطيني من وقتج
وتخليني احجيلج عن رحلتي السعيده

؛ اي شي يقهر لتحجيه اني مناقصه

: ماكو اي قهر. اصلا كلها سعاده. وهنى وعيالي حبابين
وحبوني وحبيتهم
تريدين احجيلج تفاصيل اكثر بشرط تاكلين

: وهسه منين تجيبن اكل

: انزل للكفتريا اجيب فاكهة.
وشويه عصير طبيعي واجي
انتظريني مو تنامين

دخلت الكفتريا. تقريبا فارغه
لان وقت متاخر
في فاكهه مغلفه. وماي
اخذتهم ودفعت الفلوس
ورجعت لماما
وبديت اوكلها واسولفلها عن رحلتي
وسالتني ماحبلتي جاوبتها لا
وحجيتلها عن طلال أوعده يسافر يسال اهل رعد عنه ويحاول نتفاهم وياه
انولد عدها امل جديد
وبدى عندي النعاس احجي واتثاوب
سحبت الكرسي يمها وگعدت وراسي بحضنها ونمنا

للصبح گعدت مكسره على صوت الدكتور امريكي يگول

الدكتور هلو

: هلو. دكتور

تفحص الاجهزه. وفحص ماما
والنتيجه گال

: في تحسن لو اكلت وجبتين اليوم وماارتفع السكر عندها
ممكن تترك المستشفى

: سمعتي ماما. حبيبتي انتي بس اكلي
والله من باجر اسوي حمله
على صديقات روان ومعلماتها
وحتى الممرضات لحد الكى التلفون او وصيتها واقدمها للمحكمه

: بس اريد اشوف بتها واشيلها بين اديه واضمها لصدري
وج موت روان هلگ روحي وافراك بتها جاويني بنار

ماما الله يخليج لتبجين مو زين عليج

حاولت كل جهدي اخفف عنها حتى ليصعد سكرها

والعصر
اجى علينا طلال واثق وحجوا وياها
وعدناها كلنا نشوف طريقه نوصل بيها لرعد

وفعلا بعد خروج ماما بدينا اني وملاك بحملة البحث الي مليانه بخيبات الامل والدموع
تركنا ابيوتنا اثنينا وكرسنا وقتنا للبحث

وفي واحد من ايام البحث هيه طلعت من الصبح تسال الدكتوره .. واهالي صديقاتها القديمات..
وعلى ادارة المدرسه يمكن يعرفون عنوان رعد او تلفونه
واني توجهت للمستشفى اسال اذا في سجل يسجلون بيه
اغراض الموتى
واتاكد المن سلموها

سالت الاداره جاوبتني موظفه

؛ في سجل فقط للاشياء الي تبقى بدون مافي شخص يستلمها

: ممكن تدققين وتشوفين اذا اغراضها مو جوده بالسجل

دققت .. عدة مرات وهزت راسها
: للاسف مافي اسمها

: يعني في شخص استلمها
: اكيد في

احتاريت منو يكون هذا الشخص

بهذي الاثناء گلت اسال الممرضات يمكن يتذكرون

شفت وحده منهم كانت موجوده.. وقت وفاتها
اتذكر بوقتها بجت وهيه تحاول تاخذها من ادينا
تحركت باتجاها وكلي امل الگى عدها الجواب
لاحظت اسمها مكتوب على الزي ( اميلي )

: ايميلي صباح الخير

: صباح النور تفضلي اگدر اساعدج

؛ تتذكرين من سنه ونص بنت صغيره ماتت بعد ولادتها بالسرطان

واني احاول اطلع الصور بتلفوني

: هذي يمكن تتذكريها

ردت بالم
: اتذكرها بلا صوره الطفله المسكينه
انتي اختها اتذكر كنتي معاها

: نعم اني وعندي سوال
من اخذتيها ملگيتي تلفونها
جدا مهم ومتوقفه عليه امور مصيريه

: نعم وجدته على الارض سقط من سريرها بعد ماانتوا طلعتوا
استبدلنا الشراشف وجدته

تمنيت احضنها من گالت وبكل امل سالتها

: وين التلفون ؟

:اخذته واتصلت بعدة ارقام موجوده بتلفونها مجاوبتوا

: اتصلتي بينا شوكت

.ايميلي بنفس اليوم ومن تلفوني اخفت افزعكم اذا اتصل بيكم من هاتفها
وبعدها .سلمته

: سلمتيه لمنو اتذكري ؟

: شاب بعمرها وجدت رقمه بتلفونها. ..هو الوحيد الي جاوب
اتصلت بعدة اسماء ما جاوبوا

: يمكن كنا مشغولين بالصدمه
المهم تتذكرين مواصفات الشاب

: شاب عربي. اسمر مااتذكر اسمه الي مخزنته
اخذ التلفون وشكرني وراح

: اشكرك جدا
صاحت ورايه: عرفتيه الشاب

:اعتقد عرفته

مو بس عرفته انما تاكدت منه ..تحسين
وخبى التلفون عنده لان اهله منعوه يتدخل ويسوي مشاكل
ياخوفي يكون سلمه لرعد
او شمره وتخلص منه

واني اغادر المستشفى اجاني اتصال من ملاك الي راحت تسال الدكتوره جي عن التلفون او الوصيه
جاوبته وبعده توجهت للبيت
تجمعت كل صعوبات حياتي امامي

مرض ماما ... والوصيه الي ضاعت مع نوارس .. وطلال
الي الادويه لاعبه بحاله وصراعه بين رغبته اليه .. واللام
ترجعه لنفس الزمن الاسود بحياته

وصلت للبيت
وجدت دفتر ها الي بيه مذكراتها
بيد ملاك

:وين لگيتي الدفتر هذا

: تاركتهم عند مروه الدكتوره بلغتني .. وهذي اغاني بصوتها ل نوارس

: سوده عليه حبيبتي روان
ومروه ليش مگالت

: اهلها ميقبلون تتدخل
وج من شفتها تذكرت روان
سوده عليه لو عايشه هسه تخرجت من الاعداديه

: اوووف ياربي
الليله راح تخلص بجي وقهر

فتحنا الدفتر سرد الذكريات صعوبتها ومواجهت الماضي كانت اشبه بالموت واني اشوف ملاك

فتحت الصفحه الاولى لفت انتباهي خطها الضعيف
وتعبيرها بالعربي والانگليزي تعبير بسيط
ضميت الدفتر لصدري
وبجيت واخذتني الرجفه
واني اتصفح الدفتر تصورتها بكل حرف بكل جمله
عبالك سمعت صوتها وتخيلتها طفله زغيره نايمه بالمهد واني وملاك نتناوب على هزها حتى تنام
ذكرياتها عادتني ل ايام زمان وتذكرت مع ملاك قصتنا والي شفناه بحياتنا
وكانها تريد كل وحده تقص قصتها
ومع كل ورقه نقراها تجدد عدنا احداث مرت بينا. ملاك تذكرت بيتنا ابغداد.. وتخرجها وگعدتها بلا عمل.. وثامر وعلاقتها بيه ..
وعلاء الي وصلتنا اخبار عن قتله بلبنان ... وعمي الي حاليا بالسجن بقضايا تزوير
واني تذكرت كليتي.. وحبي ل طلال.. وخطوبتي ..
وموت بابا ..
لحد يومنا هذا
ساعات.. وساعات ..جلسنا نتذكر
وبكل ذكرى.. الم ..وحسره

نبهتني ملاك على اهم سطر كاتبته. بالقصه

: لاحظتني شكاتبه اهنا

: لاحظت. كاتبه
( لاتحملون رعد الذنب
واذا تحبوني خلصوه من السجن )

: شگد حبته لعد توصي بيه وخايفه عليه وهيه تموت

: ملاك حسيت من كلامها المكتوب هيه متكرهنا ولا محملتنا المسووليه

: ايه احنا ماغلطنا خوفنا من الحياة اهنا خلانه نقيدها
الخوف هذا طبيعي عند اي اهل
وهيه كانت مراهقه ومشايفه بحياتها شي ومشت ورا نداء گلبها

: لو بس موافقين على زواجها مكانت تركت امريكا وهملت صحتها

: ميفيد الندم
الي يفيد هسه نعوض بنتها باي وسيله

: طلال اليوم سافر على كليفورنيا اخذ العنوان من واثق
ان شاء الله يحصل خبر
ونسيت اگلج
تعرفين التلفون منو ماخذه

: لاتگلليلي رعد اموت والله

: الممرضه منطيته لتحسين بعد مادكت علينا كلنا ممجاوبين

: وساكت كل هاي الفتره
بسيطه اني اله

: اسمعي ملاك. هذي الشغله متجي بالتهديد
عدنا رياجيل تتفاهم مع ابوه
والممرضه تشهد التلفون عنده
ولاتحجين شي ل ماما

:حجيج صدوك ، اني اتصل ب واثق واخليه يروح على اهل تحسين ونحجي وياه

: ادعي يكون التلفون بعده عنده وبيه الوصيه

الكلمات الي كاتبتها وقعها عليه
تركني طول اليوم
اتحرك جسد بلا روح
تقهر ان راحت من ادينا
وبقت مجرد ذكرى بحياتنا
واليقهر اكثر نظرات ماما الي تترقب خبر من عدنا
خبر يرجع حفيدتها لحضنها

طلعت برى البيت اگص الثيل في مقدمة البيت
مجرد. عمل يبعدني عن التفكير
بجملها الي انغرست بعقلي
ونزلت دموعي

دگ تلفوني الي خالته بجيبي
طلعته وجاوبت

: الووو طلال بشر
: شگلج. مجموعه كلاب مابگلبهم رحمه

: شنو يعني

: اخوانه كلهم نكروا يعرفون مكانه
وطليقته متعرف
اصدقائه مقبلوا ينطوني رقمه خوفا من المشاكل

: وتالي طلال ماما اذا عرفت
تنجن

: شاسوي. مابيدي شي
سمعني ابجي

ليش تبجين

: اليوم صديقتها سلمت. مذكرتها النا.
وهسه روحي ممروده. من القريته
اتمنى ترجع لو ثواني.
بس اطمئن عليها وهاي هيه

: ايه كافي تعذبون نفسكم بيها خلوها ترتاح بگبرها

: شلون ترتاح وبتها.راحت من ادينا طلال انت جنت موجود من وصت انت شاهد

: اي والله اتذكر والي سواه رعد حرام وجرم

: فدوه طلال حاول مره ثانيه ويه اخوانه الله يخليك لخاطري

: راح احاول باجر قبل مااروح للمطار. اتصل باخوه الجبير

: الله يخليك اليه
وين تبات الليله

: راح اشوف فندق وانام لان كلش نعسان

: واخذ العلاج. واكل قبل لتنام

: ان شاء الله

انهيت المكالمه وانتبهت على اديه بردت من الثلج
دخلت اتدفى.
ملاك عند ماما تنطيها العلاج وتتوسل بيها تاكل
ردت اهرب من اسئلتهن عن الي سواه طلال مفاد

: ها يمه ايه طلال مااتصل

اتصل ماما وديحاول مع اخوان رعد وان شاء الله خير

وملاك طمنتها
: واثق راح للجامع ياخذ الشيخ ويرحون لبيت ابو تحسين
فد ساعه ويرجعلنا الخبر

: ديله ياماما اكلي. مو احسن متتمرضين وترجعين للمستشفى وبهذلته

استجابت لتوسلاتنا واكلت واخذت علاج
واني وملاك بگلوبنا نار مناطرين جية واثق وعيونا على الباب
حتى ابنها حسن نسيناه بلا اكل لحد بجى
اخذته للمطبخ حتى اوكله

انفتحت الباب الرئيسيه ودخل
واثق ملاك وگفت
واني وراها
اشر النا بأيده يعني على كيفكم
ميريد ماما تهبط سلم على ماما

: شلونج حجيه

؛ الحمد لله ها يمه شسويتوا
نصه يمها وگعد

: حجيه الموبايل حصلته من الولد

انفجرنا بالبجي اثينا وهو يطلع الموبايل ينطيه ل ماما

: حجيه انتي لا تشوفيه تاذين نفسج

وانتم يابنات اشحنوه واخذوه للبيسمنت

: اريد اشوفها اريد اسمعها

: حجيه احنا شفناه متحملنا
بيه فديوات مسجلتها لبتها نوارس
تحاجيها.. وتوصيها
وتحسين شايف الفديوات عارف ..ياذيكم
محتفظ بيه.، وخوفا من ابوه ممسلمه الكم وممسلمه لرعد لان ميعرف عنوانه

خفت اساله عن الوصيه وملاك الي سالته
: وبيه الوصيه

: بيه وصيه ل ايه.. وصيه ل للحجيه ..
وصيه لرعد

: واني واثق . مذاكرتني ممحملتني الي صار

: ذاكرتج. وتگلج ماما ملاك

سمعت الكلمه رگعت على رجليها وتبجي بعلو الصوت.
وتحولت لصاله. لغرفه النواح ونحيب
وزداد البجي بعد ماشحنا التلفون.. وشاهدنا الفديوات

الفديو الاول. اول منتشر السرطان بجسمها

(روان : هلووو. بنتي حبيبتي
حبيت اصورلج الفديو هذا حتى تعرفيني ومتنسيني
اني امج.
سامحيني مراح اكون موجوده حتى ارعاج
لاتخافين عندج خالات اثنين راح يتعبن عليج ويدللنج
ايه حبابه وماما ملاك هيه الي ربتني
اسمعي كلامهم )

الفديو الثاني باين عليها المرض
وتعبانه
موجه ل ماما

(روان
شلونج ماما.
سامحيني على دموعج وعذابج بعد مااموت ادري راح تتعذبين هوايه على فراگي اعرف گلبج حنين بس ماما المرض تعبني واريد ارتاح منه حتى لو بالموت
واريد اوصيج بنتي
لاتتخلين عنها. ابد وربيها انتي وايه
واوصيكم تحبوها مثل متحبوني
ولاتدخلون مشاكل ويه رعد
لخاطري ماما

لاتاذين نفسج عليه دتشوفيني اني ماخايفه من الموت راح ارتاح
بس افكر ابنتي ماما فدوه لا تركيها )

الفديو الثالث موجه اليه قبل موتها بيوم واحد

(روان
هلووو ايه
حبيبتي اوصيج ابنتي انتي تربينها امانه عندج حتى لو يصير عندج اطفال لاتركيها
والله مااسامحج اذا تركتيها
وحتى لو رعد ميقبل. گوليله هاي وصيتي بالصوت والصوره
ورعد ابوها. يعني مسوول عنها
وانتي مسووله عن تربيتها
اذا تحبيني تنفذين الوصيه
وماما ملاك اطلب منها تسامحني
وتنسى كرهها ل رعد. وتعتبره واحد من العائله لخاطر بنتي
الوداع ماما
ماما ملاك
ايه
الوداع بنتي نوارس
الوداع حبيبي رعد

مابقى دمع. ولا حيل على الصراخ بعد مشفنا الفديو
مااتذكر حجينا ولا نظرنا بوجوه بعض
ماما حاضنه التلفون وتبجي
وملاك يمها واني على رجليها
اذا وحده سكتت من البجي تبجي الثانيه
انفاسنا نگطعت وعيونه مجرحه
طول الليل مثل الي انازع الموت
نبرة صوتها طفولي ويرجف من الخوف مرعوبه من الموت وابتسامتها مجروحه
اويلي تلك الليل فوگ ظلمتها ازدادت سواد.. ومدت ساعاتها
مثل ثعبان يبث سمه و بعيونه وگلوبنا
شلون خلص الليل مااعرف

طلع الصبح
بثمانيه اول ضوى
گعدت ملاك تحضر جنطتها
وحاجات ابنها وهيه مرتبكه.. مره توگع منها الاغراض ..مره تدور حجابها
نهضت من مكاني

: ها ملاك. رايحه للمزرعه

: بعد مااتحمل. اهنا وماما اخذها ويايه لازم ننهزم
اخاف على ماما لاتموت من القهر

؛ واني شاسوي گوليلي

: والله ماادري من البارحه افكر كيف نوصل هذي الفديوات لرعد
ياناس هذي وصيتها گلبها على بنتها.
گلبي راح ينفجر
هسه تلگيه تزوج والطفله بالضيم
حضنت ابنها وگعدت تبجي

: البجي ميجيب نتيجه
روحي للمزرعه وصفي بالج
واني هم افكر بحل

. اسفه ايه. حتى مااسالتج على علاقتج ويه طلال شلون صارت

الحمد لله بخير. لاتشيلين هم اني وطلال مدام نحب بعض الامور تمشي

؛ الله يسعدكم. وتشطري وصيري حامل
الطفل راح ينسيه امور صعبه مر بيها وينشغل بيه

: كلشي بيد الله

بعد الريوك ماما مقبلت تروح ويه ملاك قررت تبقى

ا : ابقى اهنا المستشفى اقرب عليه

: لعد اني اروح واثق عنده شغل بالمزرعه ميگدر يتاخر

: روحوا يمه ولاتهلكين نفسج بالشغل وديري بالج على حسن

طلعوا للمزرعه وظلت ماما ويايه
اتصل طلال عرفت صاعد الطياره وممحصل اي جواب من اهل رعد

واني اتصلت بشغلي حتى امدد الاجازه مقبل المدير
رديت عليه( اني مبطله صحة ماما اهم من الشغل )
ولان اعرف طلال معارض شغلي

خلصت فترة الظهر ارتب البيت
مهمل صار مده متروك
دخلت لغرفة ماما غيرت افراشها
وبدلت ثيابها. وطلبت مني القران
انطيتهياه وتركت الباب مفتوح
حتى اشوفها
رتبت ميز التلفزيون والصور الي عليه
اخذت صورة بابا
وصورة روان مسحتهم من الغبار ورجعتهم لمكانها
واني منهمكه بالشغل والتنظيف ..
وصل طلال
تعبان وبعينه خيبة امل
مجرد دخوله البيت انطاني شعور بالقوه وكان الدنيا گلها واگفه ويايه

: هلووو طلال هلا بجيتك

: هلو ايوته
شخباركم . الحجيه شلون صارت

: ماما هستوه نامت
لاتسمع صوتك. وتگعد وتسالك وتبدي المإسي من جديد

: والله مااعرف شلون لزمت نفسي ومافلشت راس اخوه فاضل
واحد حقير. ذرة انسانيه ماعنده

: طلال. شگد مااوصفلك قساوة ليلة البارحه مااگدر اوصلك
ياربي شنو الحل.

: شوفي ايه هذي الفديوات لازم توصل للمحكمه
ويعرفون وصيتها. ويصدر حكم حتى لو غيابيي لصالحكم
واكيد بيوم يلزموه وترجع نوارس

: اوكي باجر اروح واخبر المحاميه

: اني اروح انام تعبان الطياره كسرتني

راد ينزل بالبيسمنت

: حبيبي ادخل نام بغرفتي
اخذت سرير ملاك القديم
مع سريري صار واسع ومريح

: زين والله خططتي

: مؤقت حبيبي لحد نشتري بيت

: انشالله باجر عندي موعد مع الديلر
واشتريلج احسن بيت بديربون

: مدام بيتك انت. وبيه انت موجود. يصير جنه مو بيت
فوت نام وارتاح. واني بس يكمل الغدى اگعدك

دخل للغرفه وتاكدت نايم
اخذت جنطته فتحتها وطلعت الملابس

العصر من اجتمعنا على الغدى
اتفقت وياه ينطي ل ماما امل
الي سالته عن اخوان رعد

: التقيت باخوانه. وطلعوا همه ميعرفون هو وين
وعدوني من يحصلون رقمه ينطوني خبر

وظلينا بنقاش
: يعني وين راح. قابل ترك امريكا

مااعتقد صعب يعبر المطارات. او حدود بدون ميعرفوه

طلال فكر ان عبر الحدود
: يگدر يعبر للمكسيك مع التهريب

الله لايگولها ان شاء الله يطلع اهنا. ويلزموه وبتبهذل

ماما ماقبلت على كلمتي الاخيره ونبهتني

: لاتنسين وصية روان
وصت نعامله واحد من العائله

: ياماما اذا هوه تصرفات كلها غلط شلون تريدنا نعتبره واحد منا

: كلام الحجيه صحيح مدام وصية روان لازم نطبقها

عدى النهار اني وطلال نصبر ماما
ونفكر بطريقه توصلنا اله
وماادري ليش حسيت طلال مشغول بمساله ثانيه
وبالليل وبغرفتنا. واني انطيه العلاج توضح الامر

: هذا العلاج حبيبي

: شنو قصتج ويه العلاج تريدين بس تنوميني شنو
مشتاقيتلي

: احنا اتفقنا. على راحتك. وبدون ضغط
واني بامرك باي وقت

: صدوك ايوته ممتضايقه من وضعي وياج ... والله مقدر طولة بالج عليه
واني فهمتج الي ديصير ويايه اكون وياج وبالي تعرفين وين

: وعيونك ممتضايقه .. وصدگني فتره وتتعود عليه
وتنسى
ديله اخذ الادويه

: لا . خلي العلاج
وتعالي داحجي وياج بموضوع مهم

تحول الحديث الى جد وقريت على وجهه مسحة حيره وخشيه

: خير حبيبي خوفتني
: مااريدج تخافين اريدج قويه
وتسمعيني للاخير

في محاكمه لجندي امريكي اسمه سيفتز شارلس غرينر
( الاسم حقيقي ) عن فضيحة ابو غريب. ومعترف اعترافات خطيره وراح تشمل ضباط كبار ومنهم جيرالد

: يمهل ولايهمل. اجتي ساعه الحساب .. وانت ليش خايف

: خايف ينذكر اسمي الحقيقي
ويجيبون موضوع المصارعه واهلي توصلهم الاخبار

تكور بحضني. مثل الطفل
وهو يشكي ارقه ... وقلقه

: ايه ميبقالي اي كرامه اذا اهلي عرفوا
يمكن اموت

بذلت جهدي في محاوله تهدأته

: حبيبي مثل هيج محاكمات
تصير سريه لان تسيء للجيش الامريكي وتعتبر اسرار امنيه

. : ايه اني متابع المحاكمه صار كم يوم. عن طريق المواقع الي تنقل اخبار مقتضبه
متتصورين من اسمع شهادته شنو احساسي
يعتريني خشيه من ان انعرف وبنفس الوقت اريد العداله تتحقق ... مو بس اليه
لكل الي انظلموا اهناك

: طلال حبيبي لااتابع المحاكمه وانساها
وعيش تفاصيل جديده
شوف الاحداث صار كم سنه
وربك خلاها تطلع حتى ينصر المظلوم .
اعرف معاناتك كبيره
شفت صور وافلام وقريت عن الي صار بمواقع الكترونيه
واعرف لحد هاي اللحظه تكون ويايه لكن عقلك بعده اهناك ويتذكر
كل الي اريده تترك كلشي ورا ضهرك ولا اتابع اشغل نفسك بتأسيس حياتنا اهنا
وبمعامله اهلك ورفقه المسكينه

: اشو صارت مسكينه هسه

: اي والله ياطلال مسكينه شنو ذنبها اذا اهلها مزوجيها مرتين على مزاجهم والتالي من طلگت ميريدوها
: گلبج حنين .. ولاتخافين قدمت المعامله يجوون زياره
واخويه علي قدم فيزا رجال اعمال من تركيا

: ها بعد شتريد عشيرتك كلها راح تجي اهنا. واحد يسحب الثاني ونلتم اهنا ... ياعيني لاتسعى للماضي ... ابني حياة جديده وانشغل بيها

: ان شاء الله

: يله لعد راويني هالضحكه الحلوه الي تزيح عني اهموم الدنيا

ضحك وهو يعلق
: على طاري ضحكتي الحلوه شوكت تفرحيني
وتكولين حامل

: شنو القصه ترى صارلنا شهريين ونص من تزوجنا اصبر والله كريم

: الله كريم

طلال
انشغلت ارتب بيهم حياتي ب ديربون
وابني مستقبلنا اهنا... تعاقدت على محطة بانزين.. وبديت العمل فيها مع عمال اثنين
واجلت فكرة شراء بيت. لان البيت الي عايشين بيه فارغ
وفكرنا نستغل الفلوس بعمل ثاني الي هو قاعة جم اشتريتها قديمه وتحتاج ترميم واعمار وشغلت وقتي باتمامها
مراجعتي للدكتور مستمره واستبدل العلاج مرتين
متابعتي للمحاكمه مستمره اتابعها عن طريق المواقع الالكترونيه لان مافي نقل تلفزيوني كونها. قضية امن تتعلق بالجيش الامريكي واسراره
تسربت اسماء مهمه ورتب كبيره كمتهمين
ومن ضمنهم جيرالد.

احساسي بالغبطه للخبر
زال عني الكثير من الهموم واعادلي جزء من كرامتي المهدوره
فاخيرا صرخاتنا وتوسلاتنا ودمائنا ودموعنا وصلت وحطمت الزنازين الي مازلنا نعاني ضيقها ..وحلكتها داخل انفسنا

وبكل خبر اسمعه ابلغ ايه فيه
حتى تشاركني فرحتي

وبنفس اليوم عرفت سبب اخر يخليني اعيش حياتي واتمسك بيها
وب زوجتي الي عادتني للحياة

طلعوا البنات للرحلة بحث ثانيه عن الوصيه العصر عن طريق
بنت امريكيه عدها منظمه للبحث عن الاشخاص المفقودين
اني رحت لشغلي
مع العمال.. والصباغين
بعد نص ساعه اتصلت ملاك بيه
شفت الرقم استغربت معقوله خلص موعدهم ويريدوني ارجع الهم

: خير. ام حسن

: متجي تاخذ مرتك واني خليني لحد يجي واثق ياخذني

: ليش شبيها ايه

: الظاهر حامل دايخه وتلعب نفسها

: ايه حامل. صدك تحجين

: دتعال اخذها. وخليها تحلل

سديت التلفون واخذت مفتاح السياره من على الميز
وبلغت العمال
( مراح ارجع سدوا الابواب والمفتاح جيبوه للبيت )
صعدت سيارتي ودي اسابق باقي السيارات. اريد اتاكد
اريد سبب اخر للفرح للحياة
الطريق الي ياخذ عشر دقايق
بيه وصلت باحلامي للحظه الي اشيل طفلي بين اديه واتخيل شكله واسمع صوت بكائه
وكانما من اوصل راح الگاه بين ادين ايه واحجيله قصة حبنا
الي كتبتها امه بدموع واه وصبر
وصلت للباب البنايه اتصلت برقم ايه حتى تطلع.
بعد دقيقتين طلعت من الباب
فتحت باب السياره
ودي اشيلها من الگاع وهي تمشي باتجاهي مبتسمه. وتباوعني

: صدك ايه انتي حامل

: والله حسب لجنة الخبيرات من النسوان الموجودات جوى فاني حامل

: يارب يطلع صدك
زين شلون نتاكد

: هذي ال (cvs محل لبيع الادويه والعقاقير والمكياج )
انزل جيب تحليل.

: اوكي دقايق انزل اجيب التحليل انتي ابقي اهنا
لاتعبين وتنزلين

: ههههه على كيفك. ويه نفسك ترى الفرحه مبينه عليك
وراح تخليني ابدي بالدلال
والله لايراويك دلال الحوامل

: ليش الله لايراوينياه
انشالله يراوينياه مره واثنين وتلاثه

: ههههه دروح. يله انتظرك

دخلت للمحل ودورت على القسم الي بيه الادويه
باوع. على الادويه واحد واحد
لگيت التحليل في اكثر من خمس انواع
منو بيهم الافضل
شنو هالاحراج
اتصلت بيها

: في خمس انواع منو اجيب

: واني شمدريني. اسال الي يشتغلون

: لا شنو اسال. راح اجيبهم كلهم

: تريد تضحك الكاشيره عليك شراح تگول عنده خمس نسوان وكلهن حوامل
جيب اي واحد وخلص

: اوكي. راح اجيب واحد
اختاريت واحد ورحت دفعت فلوسه
حركت السياره. ساكت.. خايف على فرحتي تتلاشى.. لو سالت او حجيت.. وايه تضحك عليه
لحد وصلنا البيت
الحجيه مثل كل مره ادخل البيت الگاها تصلي. لبنتها واحيانا تبجي

دخلنا سالت ليش راجعين

: ماما شويه تمرضت ودخت

: صدوك ولج بلكي حامل

: ماادري هسه اتاكد

: ياربي يفرحكم بطفل

دخلت ايه للحمام واني رايح جاي انتظر يم الباب

: طلال يمه اگعد لعد بالولاده شتسووي

مارديت عليها گعدت على كرسي قريب
وبعدين وگفت دگيت الباب

: ايه بلا خباثه اطلعي

: ها شبيك متگلي
فتحت الباب. باوعت بعيونها تضحك

: حامل يله صدگت

: الحمد لله الف الحمد لله

ضحكت بصوت عالي وراحت ل امها الي فاتحه اديها تحضنها

: هذا شبيه ممصدك

: حقه راح يصيرلكم تلث سنوات من تزوجتوا

: بركة دعائكم حجيه انتي وامي

: لاتنسوون اسمه ايوب

: حجيه اخويه اسمه ايوب

: وشكو بيها اخوك وابنك ايوب
هو ايوب وانت ابو ايوب

: هاي هيه على حجايتج

سبقتني ايه تبشر امي وهيه تركض

: لاتركضين يمعوده

الوقت بالعراق كان تقريبا بالوحده بالليل
جاوبت امي اتصال ايه كاميرا

: سوده عليه حجيه گعدتج من النوم. بس لان اريد افرحج

: خير يمه الله يفرحج

: هسه حللت وطلعت حامل
وردت ابشرج

: صدك بشرتيني مبروك يمه
الله يتمللج بالخير
وج الدمعه وگعت من عيني
ديري بالج من الحركه ومن الدرج

: صار خالتي هذا طلال يريد يحجي وياج

اخذت التلفون وسمعت صوت بجي امي جبرتني ابجي وهيه تدعي النا بكلمات. خاشعه

: ياربي بحق محمد واله
يخضر دارك. واشوف ولدك وبناتك شايلين اسمك

: يمه كافي تبجين.اتصلنا بيج حتى تفرحين

: والله فرحتي ماتنوصف يايمه وهذي دموع الشكر ل ربنا سبحانه وتعالى
الي مارد دعائي الكم

انهيت المكالمه الفرحه اكبر مني
السرور محى جروح كثيره
وسمحت لنفسي الاستغراق بالحلم الجميل
وانصت لتوصيات ام ملاك ل ايه
كيف تحافظ على الحمل

سالت ايه اذا تحب شي او على بالها اكله معينه
وهيه ماقصرت ذكرت ست انواع
بحجة يطلع اثر بابنك اذا متجيب
وانصاعيت ل اوامرها . بطاعه تامه
واخذت سيارتي افتر بالاسواق
لتلبية الطلبات واردد كلمة ( الحمد لله)

ايه

ايام تمضي. وايام تخلص
تتواصل حياتنا رغم الغصه بداخلي كل مااتذكر روان
ونفس الغصه اشوفها عند ماما
وهيه تصلي يوميه وتدعي وتبجي
واحيانا تعاتبني لان تماهلت عن البحث
والي اذاني اكثر هو حلم ل ماما في ليلة
صحت مخيم عليها الحزن
وتصيح الفجر
فزيت من نومي وتركت سريري وطلال وياي
وقبلي دخل لغرفتها وفتح الضوى

: خير حجيه شصاير
كانت تبجي وبطريقه هستريه وياس تام

: ماما فدوه لعينج شبيج
انتي مريضه لاتسووين هيج بنفسج
احجي فدوه

بالقرب من سريرها. گوب مي
اخذته حاولت اشربها مقبلت تشرب
اخذته بايدي وغسلت وجهها

: طلال ساعدني نخليها بالسرير

اني وياه. اخذنها من اديها وحاولنا نهديها وهيه بسريرها
گعدت يمها وطلال فتح الشباك
لان التدفئه كانت عاليه

اخذت ايدها وبوستها

؛ ماما شنو بيج احجيلي

بدات تبجي بصوت مخنوك

: ابوج اجاني بالحلم يعاتبني على نوارس
گتله شبيدي عليها
ماجاوبني

: صدوك شبيدنا. وشنو الي ماسويناه.

: حجيه انتي ارتاحي هسه والصبح. نشوف حل

: صار سنه وسبع اشهر
تكولون نشوف حل. يايمه والله
لو اموت احسن اليه
من هالحال. هيه ماتت طفله وبتها ماادري بيها وين
ربي ارحم بيه واخذني يمها يارب

واسترسلت بالدعاء والبكاء واني وطلال نردد نفس الكلام عليها
اصبري ...
ونشوف حل ..

بقت ساعه ونص على هذا الحال
لحد وضعت راسها على الوساده.. ونامت
تركت سريرها. ويايه طلال طفينا الضوى
وطلعنا. گعدنا بالصاله امام المدفاءه ...
نفكر سوى يمكن نوصل لحل وتنتهي هالمعانات

: شتكولين اذا نروح لمدير المدرسه واسال عنه بصفة صديق وبهذي الحاله حتى لو ميعرف عنوانه ورقمه اكيد يعرف اصدقائه

: واثق راح للمدير وشرحله الوضع واتضح ماعنده اي معلومات عنه
الي ينهزم من محكمه ينهزم بلا اثر
: طيب نعبر اني وياج لكندا. ونسال العرب بالمحلات
بمعارض السيارات

جملته وصلتني كانما. تنبيه لحقيقه غافلتها
اطرقت براسي وغمضت عيني احاول اجمع. افكاري

: ها. ايه اشو عبالك اتذكرتي شي

: اتذكرت شي مهم بالمذكرات من قريته مافكرت بيه من كثر البجي والحزن

: دحجي شنو

: خلي اتاكد اول. مااريد ابني امل ليگدام
تعال ويايه

نهضنا من مكانا متوجهه لغرفة روان
صعدنا الدرج وتوجهت لدرج ضامه المذكرات فيه
فتحته وطلعت المذكرات
وگعدت بالارض اگلب الاوراق ب سرعه
اريد اوصل للسطور
عيوني تقرا سطر وتعبر سطر

لحد وصلت لجمله كاتبتها

( وصلني تحسين لكندا لبيت اخت رعد اسمها ام زهراء )
قريتها لرعد بصوت عالي

: يعني تعتقدين موجود عند ام زهراء

و