رواية نوارس مهاجره الفصل الثاني والأربعون 42 - بقلم zeanab_almusawi

السلام عليكم
اليوم نهاية الاسبوع عدنا ..
وفي متابعين  بامريكا ..و  اوربا
لازم ندللهم
فراح انشر بارتين

لعيون كل متابعي رحلة النوارس الي اقتربت على النهايه

✨🌟⭐️✨🌟⭐️✨🌟⭐️

#نوارس_مهاجره38
#زينب_الموسوي
الجزء الثاني
ايه

باليوم الخامس
بدا الورم بوجهي يخف ..عيوني انفتحت
باقي الم ظهري والكدمات الي بيه
كدرت انزل الدرج.. وادخل المطبخ الصبح.. اساعد الحجيه
لان بيت اخوها ديجوون علينا من ديالى يسلمون علينا

: صباح الخير   خالتي شتحبين اسوي غدى للخطار

كانت گاعده  امام  ميز الطعام اخضر بلاستك  ردت عليه وهيه تباوعني  بتفحص

. صباح النور   سدي  باب المطبخ.  و اگعدي   احجي  وياج
مدام  صرتي  زينه

نظرتها  كانت   حاده  وتحمل زعل  وعتاب

: حاضر.  خالتي   شصاير

سديت   الباب  وگعدت  اسمعها

: ادري  مو   من  حقي  اتدخل بحياتكم  انتي  وطلال لان انتم خطار 
بس  هذا ابني  واكثر واحد  دللته
...  گوليلي شنو المشكله بينكم

: ماكو  مشكله  اني  غرت  من رفقه  وهو  تعصب لان طلعت ومصعدت  السياره

: لا  مو  هذا السبب 
قبلها  شفتكم  وعرفت اكو شي باعدكم عن بعض انتي طول النهار  بالمطبخ  ويايه..  فتحت كنتورج  ماعندج  دشداشه  نوم وحده
وهو ولايوم  الصبح سبح  ونزل شعره  مبلل
يسبح العصر  وبالحمام الجوى
ابني  مكسور من يباوعلج.

: شنو يعني مافتهمت
دنگت وهيه تخزرني

: لا افتهمتي  والدليل  ردج  مستحيه  وخايفه
يوم  الي ضربج  كانت  ثيابج مشگكه
وهو بلا بنطلون 
معناها  يريد يجبرج على شي ممطاوعته
ليش ؟  شنو  متحبيه. ؟ابني بيه شي معاجبج ؟

: لا خاله  والله  كل  هذا موصحيح
اني  احبه ل طلال  وهو  يحبني
بس  هو  عصبي 

ركزت بعيني  ... تدور على الحقيقه .. واني بعدت نظري وحاولت اگوم
لزمتني من ايدي وگالت( اگعدي واسمعيني )

بلعت ريگي 

: تفضلي  خالتي

: شوفي  بنيتي. الزواج  اكثر  مصايبه   تتحملها  المره
ومهما  كانت المشاكل  بينكم لمن يريدج  مترفضيه
الرجال صعبه عليه يتحمل مرته ترفض

: واذا  هيه  تحملت  الرفض  منه  لحد كرهت  نفسها

: مدام  باقيه  وياه  زوجه     تتحمل
واذا  متگدر   على التحمل  اتركه
وكل واحد  يشوف  طريقه  ليش باقيه  وياه

صحيح حجيي  لو لا

: صحيح 

: يشهد الله اني احجي لمصلحتكم
اثنينكم  ممرتاحين  بهالزواج
ولو تحبون بعض 
ولاتنسين طلال الي شافه بالسجن مو قليله  كافي سنينه الضاعت 
ضرب ..واهانه..  والله يعلم بعد اشاف اكيد حجالج

: بلي حجالي الله يعينه

: هذا معناها  اختارج  انتي يشكيلج  لا اني.. ولا ابوه.. ولا اخوانه..  شكالهم  المفروض تقديرين  وتتحملين

: شسووي گوليلي. والله داس كرامتي  الف مره.  وتحملت

: وراح تنداسين اكثر كل ماترفضيه
بنتي  انتم كرامتكم  وحده 
اذا  نفكر بالكرامه مراح تلگين  وحده باقيه عد رجلها

سكتت منتظره جوابي

: انشاالله خالتي  اكون مثل متريدين.

: مثل  ميريد  رجلج 
اني  حجيت  لان  اعرف  ابني يحبج
واني هم احبج.  ..امسحي الدموع  وفكري  بكلامي بلا متزعلين  ولاتشيلين  من عندي

: حاشى خالتي الله يدري  شگد احبكم انتي  والحجي  اتمنى ابقى  يمكم  على طول

. انشاالله تبقوون  رايحين  جايين  علينا
وگومي  ساعديني  عمج  مكيف على طبخج

: ارتاحي انتي. وخلي كلشي عليه

: لعد اروح  اگعد رفقه
تجي  تساعدج 

تركتني بالمطبخ وراحت تگعد رفقه

اتصور  خالتي تدري بوضعنا

ساعات اشتغل وافكر بحجيها
واقنع نفسي.

خلي.  تكون  تضحية  جديده تنضاف للتضحيات الي ملت صفحتي مع طلال
يمكن  هالمره يتغير  يمكن فعلا رايدني
صفنات طولت. والوقت مشى

انملى البيت ناس
بيت خاله  رضا.. واولاده شباب اثنين  ..طه وياسين
وزوجته  ..وزوجات.. اولاده
تعرفت  عليهم  للمره  الاولى
ودخلت  جميع  الاختبارات والمقارنات ..
النسائيه  ومااعرف نجحت بيها لو لا
ام طه ( مرة خاله ) كان تعليقها
حبابه. بس طلال اطول منها

: ليش وين اكو  وحده تصير بطوله  كلهم على ابوهم.
طلعوا

؛ هم صدك  .. اگلج
هيه  نفسها الي خطبتيها  اله قبل لينسجن  مو

: نفسها ...ظلت متنايه ..گلبها علمها ... والله جمعهم  سوى

: وليش لابسه اسود ؟

:اختها ماتت
باوعتني خالتي  وكملت

: الليله تنزعه ان شاء الله

وغيرها من الاحاديث  الي استمرت لحد اخر ماعون اكل قدمته

مشفت  طلال الا وقت  التقديم
من ديشيل المواعين سال عليه
( شلون صرتي ) ؟

: زينه الحمد لله
وانت اخذت  العلاج

؛ لا مااريده يدوخ

: براحتك ان شاء الله  يعجبك
الاكل اني طبخته
: عاشت ايدج  ايوته

ادور على اي موضوع اثبت للموجودين  ان احنا. كبل سعيد

بعد الغدى..  عجبهم عصير رمان
بيت خاله عدهم اشجار   رمان
وجايبن معاهم
واجتمعنا كلنا. نشتغل بالرمان
وبعد العصير طلعوا الرياجيل
يتونسون ..
وياهم طلال ..

واني نفس الافكار  عندي
مثل  الي  عنده  امتحان  صعب  وينتظر شوكت يجي الامتحان ويخلص  هيج كان شعوري
ومن الحيره الي اني بيها
كل  شويه رفقه تسالني  شبيج
بعدج  وجعانه

: لا مابيه شي. بس  المطبخ حار
ومن الصبح لحد الان  احنا اهنا

: اي  وج  عيني. حتى ابني ماعرفت  وين صار

: دروحي شوفيه ليطلع للشارع  ويه الاطفال

: لا الحجيه عينها عليه
اگلج  ولو  فضول
طلال ليش ضربج ؟

: لان مقبلت اصعد بالسياره وياه  هو ميحب  العناد  واني عنوديه

: ها اني اتصورت من ورايه تصورتي  بينا  شي

: لا حبيبتي  لاسامح الله طلال يگول عليج اخيتي
واني اعرف رجلي امريكيات مو بعينه. اصلا  ميشوف غيري

: اني حيل خفت منه من شفته ضاربج حتى بقيت مااحجي وياه  يروح يسگطني

: هههههه اي هو ميتفاهم ديري بالج منه  ..من تشوفيه اخذي ابنج  وفوتي للغرفه 
واذا تقفليها  بعد احسن

ظلينا واگفين بالمطبخ لحد العشره
بالليل نظفنا وسدينا المطبخ
خبرت خالتي( راح اصعد لغرفتي اذا تحتاجين شي دگي عليه الموبايل )

. لا روحي ارتاحي. البنات موجودات وهنه مو خطار

دا. اصعد  نبهتني
(انزعي الاسود لاتنامين بيه )

صعدت ركض بلا  مااجاوب اكيد راح تراقبني
كنت . تعبانه ملابسي  بيها ريحة انواع  الطبخ والبهارات
فتحت  الكنتور  ابحث عن شي مناسب
ملابسي  القديمه معلگه  مستحيل تجي عليه بعد هذي السنين
في دشداشه عجبتني  قصيره
وممكن  تناسبني 
من ضمن الاغراض الموجوده بالكنتور 
نشرة اضويه للزينه ..
اخذتها  خليتها  بالكهرباء اشوفها  تشتغل ..
اشتغلت  عجبني  ضوها
شلتها خليتها على راس السرير ..

يمكن يفتهم .. اذا  شافها
واذا  ماافتهم   امه  تشوفها  وتسكت

طلعت  للحمام   ..اخذت  شاور
ورجعت للغرفه.. گدام المرايه
اتفقد  وجهي  وشعري
شنو  الي  تغيير  بيه ؟
يمكن  الحزن  رسم  لوحه
اسى  على  ملامحي
اجرب  المساحيق   تساعدني باستعاده  الاحساس  بالجمال

مستغرقه  بتفكيري  ومحاولاتي اضهار  ملامح الجمال عندي
دخل  طلال بيده  ضرف زغير

نظرته  بيها ارتياح مجرد  شاف النشره  الملابس  متغيره عن كل مره

: شنو الي يضحك
متت  من الحر  طول اليوم بالمطبخ . بدلت  البيجاما  شصار يعني

: هو  اني  حاجي.
ترى بيت خالي باقيين بعد يومين

: هلا   بيهم  واني  شعليه

: يعني  راح  تحتاجين  فد دشداشتين  مثل  هذي

: اخذ من خالتي

تمدد على السرير  ( يبوووو هم راح ينام )  خلى ايده جوى راسه والظرف بالايد  الثانيه
وكمل يناقشني بالدشداشه

: امي متلبس هيج
بس يجوز تنطيج دشداشة بيبتي الماتت  لحد الان محتفظه بيها

:ليش بيبيتك جانت تلبس مدلع وقصير

: لا  بس الدشداشه صارلها قرن عند امي فاكيد هسه  انهرت ومبقى بيها غير  نصها مثل دشداشتج هاي 

: اوكي  باجر. اخذها  منها
شنو هذا بايدك

: شي يخصج تعالي اخذيه

: يخصني! شنو ؟

رحت  گعدت  يمه على سريرنا

فتح  الظرف

: تلفونج الكسرته  صلحته ..والصور موجوده

: صدوك  والله  شلون  اتصلح 
مو گالوا  ميتصلح

: تعرفين  بامريكا  ماعدهم تصليح  كله استبدال.. هو سياره تعطل  الماسحات يذبوها
عرفت  بالعراق يصلحوه جبته ويايه 
ممكن  تعتبريه  دليل حبي باقي الج  
كتله( شكرا )

:
فتحت التلفون شفت  صور روان
مررت  اصابعي على وجهها افتقدها ..
وماعندي غير دموع تتزل على الشاشه.. تطفي اشتياقي الها

: اذا راح  تبجين  اخذه للتلفون

باعي هذي الصوره الج  شگد حلوه من تضحكين

: اي والله جنت حلوه

: ومازلتي حلوه

: مااحس نفسي حلوه  والدكتور من شلع سني حسيت كبرت  اكثر

: هو سن عقل  معناها عقلتي مو كبرتي

طلال 

اثار  الي تحملته ايه. طول السنين
حسيته بكلمتها ( كبرت )
جزء  كبير من شفائي كان على حساب نفسي.. وايه
وصار  وقتي  انتشلها  من احساس  اليأس

:گومي  ويايه
اخذتها   گبال المرايه وگفتها  واني خلفها

: دتشوفين الي بالمرايا   منو ؟
هذي حبيبتي  ..ومرتي.. والنفس الي عايش بيه.. واحلى مراه بالعالم... باعي زين  شوفي عيونها ..
كلها تدمع  وحتى دمعها مغري ..
مثل ضفتين نهر  يدعو  للحب
باعي شفايفها  تضم نبيذ معتق ميسكر فقط.. وانما يصيب بالجنون
شعرها  ليل  ممدود 
كل  ساعاته سهر  عشاگ
عنقها وسيله للوصول لجسد
تتذوق  مالذ وطاب
ايوته  انتي  بعيني احلى البنات

نزلت  عينها  واني ادير  جسمها عليه
اقتربت منها  غمضت عيونها
عرفت اريد ابوسها حاولت تدفعني 
لكن وين تگدر  تدفعني

رفعتها  باديه   حتى تصير بمستواي
ابد مشالت عينها 

اول قبله مسروقه منها ..
وهيه تدفعني
القبله الثانيه...  على جبينها للاعتذار
الثالثه ..على عنقها قبله رغبه وشوق
القبله الي بعدها على شفاها ..موقد نار   سرت في كل شراييني ..
الي بعدها كنا في سرير
اضمها  لصدري  واحاول اراضيها  بتوسلات  واعتذارات وكلمات  تخطا طريقها للاذن.. فتطبع على الشفاه 
مااطيب شذاها ومااحلى قبلها

( مددت يدي نحوها بهدوء .. تعززت .. تحسرت  من عنادها  رغم احتياجها
ضممت جسدها  الغض ..ادرك  كنت فارسه  بكل احلامها

احتضنتها بقوه..  كاني اخشى ان افقدها ..
ان تهرب ..
كاني وجدتها للتو

تخلت عن عنادها..ومالت بجسدها نحوي ...  وافترشت صدري
لايخفي وجهها الخوف تفوقت عليه رغبه

ناديتها..
كفى حزنا ..   دعي قلبينا تستريح
عز عليه ان ينبض قلبك الما مني
دعيه لغزوي.. ورحبي باحتلالي بسعاده
ليلة مرت  هانئه.. صاخبه  ... حالمه
تركنا الكلام  والحديت صار للجسد
عن شوق.. ينادي  شوق
وحب ..يفضح  حب
وعشق.. يشكو  لعشق

عن  حاجة روح.. لروح 
وكف  غفى .. بقبضة كف
عن نفس  توحد  ..
عن اضلع  زلزلها حنين كاد يفنيها
عن قلب اعلنت نبضاته استعاده الحياة
ليلة  هجرنا النوم 
واعادت  الحبيب لحبيبه

ايه
ياليلة ..طالت انتظارها
ليلة كنت فيها ورده 
هجرها المطر   ٠٠٠٠٠ ليكون رجلي مطري

ليلة... تجردت فيها من ثياب خجلي...  وعنادي. ..وحزني

ليلة  غطائي فيها يداه
وملجأي ..  احضانه

مثل كل قصصي.. واحلامي
مثل توقعاتي. وخيالي
كلها دارت حوله فكان بطلها ومحورها

اه يارجل   لا املك ذكرى ..
لا احلام.. لا ماضي ..
الا وانت فيها

وكأن  امي ارضعتني حبك
وكانها حين علمتني صلاتي الخمسه
وصيامي.. وقيامي
علمتني حبك فرض ..وواجب
لا دعاء لي الا وابتدى باسمك وانتهى باسمك

تعمدت حبك  صدقني
احببتك مع سبق الاصرار
وحين سقط قلبي فيك
لم  التقطه 
تركته يمارس عشقه لك  كما يشاء
في حياتي مرت سنين ..كبرت ..وتغييرت
ولم  اعد  ماكنت
لكني  ماتركت  حبك يوم

بنهاية ليلتنا  التزمت الصمت وانتظرته  هو  يحجي ابالي اسئله
لازم يجاوبها
انتظرت وانتظرت  محجى
باوعت عليه  كامش راسه ويضغط عليه

: راسك يوجعك اجيبلك العلاج

: لا ميحتاج يمكن من السهر ليضل بالج

: عندي سؤال. ولازم تجاوبه

: اسالي

: ليش هسه. جنت تگول  الذكريات  تمنعك  وكرهت هالوضع  شنو الي تغيير

: اكون صريح وياج. ايوته
لايمكن انسى الي مر عليه
لكن احبج... وجودج خلاني
احاول  ... والله يخليج
حتى لو حسيتي   بيه مو وياج مثل متريدين  ... اتحملي ومع الوقت  اكيد اتغير

: صدگني  الليله مثل ماحلمت

: جذابه  .. الله يذبح بالنار

:  هههه
اگول بعد شي 

. گولي

: طلال اني احبك هوايه اكثر متتصور

: يعني  شگد  هوايه

: يعني  لو  باقي  عمرك  كله  ممتقربلي  ابقى  احبك ومااتركك

: ادري  ومتاكد  من هالشي
انتي  اختاريتي تبقين  وحجيتلج الوضع
وبقيتي  وهذا الي رجعلي حياتي
وحنيني ل اهلي ولنفسي والج

: تدري خالتي منتبه عليك من تگعد الصبح متسبح ههههه

: لا بداعتي. شلون

: هيه اليوم بالمطبخ  الصبح
گالت هو ميسبح  وانتي  ماعندج ملابس نوم

:  : حيل وياج  تستاهلين
هههه بس امي طلعت شارلوك هولمز

: والله اضرب منه

: اصلا باجر الصبح كل ساعه ادخل اسبح

: هههه  لحد تقتنع

: هيه تقتنع واحنا نعوض العمر الفاتنا

؛ مفاتنا شي حبيبي مدام سويه

: اگول هذي النشره شنو 
اثاري انتي وامي مخططات واني الزوج ساعه اتوسل

: لا والله بالصدفه  لگيتها. وخليتها 

كل شويه يضغط على راسه

:خلي افركلك راسك 

اخذته لحضني واصابعي تدور على راسه  وجبينه

: لو تشوف دكتور اهنا يمكن احسن

؛ لاتكبرين المساله خلينا اليوم بسعاده

: والله طلال انت سعيد ويايه

: تريدين احلف. والله سعيد حبيبتي
گوليلي. اذا نريد نحتفل بعيد زواجنا. ياتاريخ نختار

: يومين. هنه اسعد يومين بحياتي

: الي  هنه

: اول يوم  شفتك  ..واليوم  الي عرفت  بيه  عايش
متتصور  الحياة الي  عشتها بدونك
اصلا حرام  اسميها  حياة
وجع  مينحجي  ولاينكتب  بس احس بيه
يوجع  لحد اتمنى  الموت  والله
والله  يمكن  رب  العالمين رجعنا  من  هالگد ما دعيته.
اموت

: اني  من عرفت انتي  بمشيگان. گلبي  اهتز من مكانه
وسالت  نفسي  ليش ؟
شنو  المقصود  من  وجودنا بنفس  البلد ؟
ومن  عشنا  سوا  عرفت ربنا مرادني  اخسر  اكثر  من الخسرته
خلاج  انتي  حتى  يعوضني

: يارب دخيلك  متنعاد  هذي الايام  ونفترق
: يارب

نام  بين اديه. وبقيت  بعده اخاف احرك راسه  يفز
تاملته  وعلى لساني كلمه احتفظت  بيها  لحد غفى همست  بيها  باذنه
( السعاده انت ) 
غفى جفني وعرفت معنى النوم الهانيء،،   وعلى وجهي ابتسامه  محت كل العناء  من حياتي
ومابقى غير صورة رجل  طلبته
من ربي بدعائي اكثر ماطلبت العافيه..  او الامان ..او الفرح

النوم اخذنه لحد الساعه ١٢
الظهر
فزيت من مكاني واني اشوف الساعه

: طلال  اگعد لخاطر الله

: شكو شصاير

: الساعه ١٢ الظهر 
هسه  الخطار  شيگولون عنا

: والله  عبالي البيت  احترگ
شبيج  هيج  خايفه  اليوم  جمعه والناس  تتاخر

: اني نازله  وانت براحتك

بدلت  بثواني ونزلت راسا على المطبخ

تفحصتني العيون كلها .. او اني اتصورت  هالشي
. واخفيت  ارتباكي. بجمله

؛ اعتذر   خالتي راحت عليه نومه

ابتسمت  وجاوبتني

: طلال  وينه  اشو  منزل

: بعده نايم  فد شويه واگعده

:  روحي. اخذي ريوگه للغرفه وتريكي انتي وياه
وعلى كيفج لاتستعجلين  البنات ممقصرات بشي

حرجتني بالزايد وسالتها  ام طه

: ليش شنو عرسان هيه وطلال

: لا بس جانوا متزاعلين والظاهر تصالحوا

وبدت  تعليقاتهم. وضحكهم وذكرياتهم  مع  الزواج
واني  احضر الريوگ  بسرعه اريد انهزم  من الموقف

فاجأتني خالتي  بشي ممتوقعته

؛ العصر  عدنا مولد
ناذرته من اشوف طلال  ... وانتي حتى تذبين الاسود
وازفكم  للغرفه

: خالتي ماكو داعي للزفه

: هاي امنيه  عندي  من زمان
اخوانه شفت زفتهم هوه لا
وبعدين انتي منين خايفه

: لا خالتي مخايفه بس 

ادور عذر ماكو تذكرت

: ماعندي ملابس كلها اسود

باوعتني وهيه  ممقتنعه بعذري

: اني اجيبلج بدله بيضه  على ذوقي

سكتت واني

اخذ الريوك  ومشيت بسرعه
وصلت الغرفه 

: طلال اگعد. جبت الريوك
وبعدها  انزل جوى  وبعد لاتصعد
متت  من الاحراج

دتسمعني يله اگعد
طلال.. طلال ..
متجاوب شبيك ؟
رحت يمه اباوع  ميتنفس
: طلال. لاتخوفني شبيك.
هزيته حيل ميتحرك
صرخت  طلال
سد حلگي وهو يضحك

: اف. وگعت گلبي  شجاك
نزلت دموعي  وهو يضحك

: ههههه خفتي صدك

: لاتحجي ويايه  گلبي راد يوگف ليش هيج

: دتشاقى شبيج  هاي صدك هبطتي  ودتبجين 

: ذكرتني بايام سوده مرت عليه

: حبيبتي  ان شاء الله  ماكو ايام سوده
ولاتزعلين  ردت اشوف غلاي عندج

: اتمنى عندي القدره وخليك تشوف نفسك بعيني وتعرف غلاك
: غلاج  اگبر. وداعتج

: حلوه  كلمة  وداعتج .منك

: لاتاگلين الريوگ كله
اخذ شاور  وارجع
اندار وهو يطلع
: شيلي النشره فضحتينا
جاوبته

( ما )

دخل للحمام استغليت الفرصه
وكتبت رساله ل ملاك بالاخبار العاجله
انطيتها العناوين  وفهمتها بعدين  التفاصيل

وهيه ردت عليه بسمايل

على الريوگ خبرته عن المولد

؛ ادري امي من البارحه گالتلي

: وليش مگلت. على الاقل ننتظر لليوم.

:هو  انتي انطيتيني مجال  معلگه نشره. ونازعه الاسود

: يابذات  سنتين ونص وممنطيتك  مجال
: تدرين كم مره  لبستي البدله البيضه اليه.

: تلث مرات ادري يعني بعد مره
ويسقط حقك بالزواج  من الرابعه

: اليوم اخلي امي تزفني مرتين
حتى يسقط حقي نهائيا

: ياريت حتى اطمئن من رفقه وبنات خالك  الي يلمعن
ماادري  شلون عافنك اليه

: لج اني عايفهن  ...
: شنسويلك  بعد هذا ذوقك
عايف الكيك  ومجلب بالكعك

: وين اكو  احلى من الكعك  ...
عاجبني  ... واموت عليه

طول حديث العرسان بينا
لحد خالتي نادت طلال

نزل هوه  واني بعده

وانشغلت  مع البنات
سوالف. وتحضير الاكل.. وترتيب
وعيون ام طلال تراقبني
عرفت  تريد تسالني عن شي
لحد شافتني اراقب طلال من الزجاج وهو يلعب الاطفال ويضحك  وياهم من كل گلبه

: اليوم طلال ضحكته  من الگلب ويتشاقى ويوزع على الاطفال حلويات  ونساتل

. اشو اني منطاني

: طالبي بحقج 

: والله راح اطلع صدوك واطلب حقي

فتحت باب المطبخ. وطلعت يمه
بيده طفل شايله.. والثاني دياخذه يشتريله
ومن شافني وگف

: محتاجه شي ايوته

: شفتك دتوزع. گلت اجي يمكن يشملني التوزيع

: بعد الغدى اخذج ونطلع
واطلبي الي تريديه

: طلبت الي اريده من زمان انت ومااريد غيرك

: تدرين اني شاريد

: اني اكيد

: وطفل انتي امه

: غاية المنى  والاحلام

: اني  هوايه  احب الاطفال تدرين  لو لا
بس  انتي  احبج  اكثر

: ان شاء الله  نخلف دستة اطفال

السوالف وياه الها.. طعم الراحه
وكلشي بعيني اليوم احلى 

العصر  نسوان الجوارين وصلوا
وقارئة المولد.
صعدت لغرفتي مصار عندي  وقت اخذ شاور   واني خاله مكياج من الصبح
لبست الفستان الابيض
وفتحت شعري  ...

نزلت .. تلگتني رفقه  وبنات خاله يهلهلن
وخالتي اشرتلي
ان طلال موجود بغرفتها

دخلتني. رفقه لغرفتها
وخلتلي مكياج
احمر  واني اتعقد من الاحمر
بس ماحجيت لان خالتي تراقب

وبعدها اخذوني يم النسوان
مواليد ومدح  وذكر للنبي واهل البيت بصوت  نسوي   جميل
ودعوه. والانتخاء  بشهامة اهل بيت النبوه  وكرمهم

الجو  والذكر .. رفع من  الانكسار داخلي
وحسيت بالامان والفرح  وبالشفاء الروحي

طلعت النسوان الغريبه
صاحوا   طلال  من غرفة والدته
طلع يضحك  لابس قاط اسود
واخواته حوله يهلهلن

دنگت ..، وهو ياخذ ايدي
ونصعد
واخواته يعلقن على خجلي

( اشو ايه خجلانه من صدوك )
مااتذكر  الدرج كيف خلص
ودخلنا الغرفه

وسدت الباب واني وياه نضحك

جمعت  لهفتي وشوگي النهار كله
وحبستها لحد اخذني  بين اديه

واختصر كل الي بداخلي
وداخله بكلمه ( اشتاقيتلج )

استغنينا عن . الكلام ماعاد ينفع 
العيون  افصحت اكثر
والشفاه تعبيرها ابلغ
والايادي اوجزت ما كان مكتوم

الجدران شهدت  ماكان
واضنها ذابت  معنا
وتراقصت فرحا بنا

نستحلف الوقت ان لايمضي
ان لانتعب
ان لا نغمض عين 
ان نبقى نضم الفرح
ونودع الاسى

طلال

(كل هذي السنين  اعتبرت نفسي خارج اسوار الحياة
عايش حتى اموت
وماافكر  بحل
اتهربت من حياتي من حبيبتي
ومن اهلي
اتصورت ايه  تهرب اول اسبوع او
اول شهر او سنه
تهرب مع العرك.. والمشاكل والاهانات
تهرب مع تقدم العمر بينا  والزمن يسحب منها الشباب
تهرب من تعرف الصار بيه وتبحث عن رجل  تدفن معاه حبي.. وتعيش مثل باقي خلق الله
وعكس كل افتراضاتي ..وتوقعاتي
رفضت الانهزام
وعندما تكون مرفوض من كل العالم حتى نفسك رافضتك 
وفجاءه شخص من الماضي يمد ايده الك ويحاول بكل طاقته ينتشلك من ضياعك ويهديك الحياه
اكيد تكون حظيت برحمه الاهيه 
هذا كان دور ايه بحياتي
قرارها البقاء اعطاني الشجاعه
واعاد اليه الاحساس بالحب والامان  والحياة بما تحمل من سعاده وحزن
وبليلة عرس ماخططنا الها
عشت الي ظنيت عمري مراح اعيشه
ظنيت مراح اكون حبيب.. وزوج.، ورجل )

بعد مغادرة بيت خالي
اخذت امي وابويه وايه
نزور العتبات
وهيه دعت رفقه تروح ويانا
الي كفت مضايقاتها ل ايه
واصبحن  صديقات

هذي الرحلة بمثابه رحله تطهير للنفس
ومنحنا فرصه  لبدايه  جديده
النهار نخلصه  نزور
رحنا  لكل مكان خطر على بالنا
واخذنا  صور لكل دقيقه ولكل ضحكه 
وباليل  نكون عاشقين  زاهدين بكل  شي الا العشق
وفي كل ليله  نقترب اكثر من بعض

بغرفتنا بالفندق  رجعت ايه من التسوق وهيه تعبانه 

: كل هذا تسوق واني منتظر هنا

: اسفه حبيبي تاخرت 
موبيدي والله  كل مااشوف شي حلو  اشتريه

: اشتريتي الي وصيتج عليه

: اشتريت تحب تشوفه

: اكيد. اريد اشوفه

: دقيقتين ابدل واشوفه

راحت تبدل
في بالي صورة الها قديمه كانت تلبس فستان وردي دائما احلم بيها وصيتها تشتري فستان وردي
ابالي اعيش كل احلامي من جديد وياها

طلعت لابسته.، فستان قصير
مجسم من اعلى  وعريض من تحت الخصر 
بلا ردان 
افترت بيه مرتين امامي

: ان شاء الله نفس الي ابالك

: جمع مؤنث فاتن

تفاجات بالكلمه

: بعدك مناسي الكلمه

: شلون انساها هذا احساسي بيج

: حتى هسه من كبرت

: كبرتي  مااشوفج كبرتي
كنتي.. ورد قداح..  نمى  او ورد ..
وصار  فاكهة  ناضجه 

: ماعندي  حجي اگوله الك

: اتركي الحجي  وتعالي ويايه

لقائنا في كل مره يكون الشوق اكبر
والحلو بايه ان ابد متخفي مشاعرها. تحجيلي وتوصف كل احساسها
وهالشي زاد ثقتي بنفسي

وحتى الغيره عليه  حبيته ومرات اتعمد اثيرها

: ايوته انتي شايفه حسابي
باسم مستر تي

: هلووو  ياب طلعلك حساب واني  ماادري  بيه
اريد  اشوفه  هسه

فتحت التلفون وشافته
انطعن  وجهها  الوان شاشه التلفزيون  من ينقطع  البث
وهيه تقرا تعليقات البنات على مبارياتي

: هذي البنيه متستحي تتغزل بيك علني

: امريكيه  هيه والمستحى شنو
بس اني مراد عليها

: لا خطيه مراد بس لايك وگلب جماله

: ترى تعليقها قديم

: امسح  التعليق  لو ازعل منك
ولاتضيف  بنات  كلهم  احضرهم
والافضل  خلي الحساب عندي اني  اتصرف

: شتسووين يعني

: هذي الصور الك كلها تنمسح  مااريد وحده غيري تشوفك

: هنه ديشوفن الصور. وانتي الحقيقه

: لاتقشمرني  بهالحجي
امسح  الصور   وبنات بعد ماكو

: سدي للحساب بعد مااريده ولا اريد هالذكريات

: لعد ليش خليتني اشوفه

: احبج من تغارين عليه
ترى انتي من ايام الكليه جنتي تغارين

: من عمايلك غير بس اندار الگاك ويه وحده

: اني  اشو مااتذكر
ايه : احسن لاتتذكر. تذكرني اني وبس

: واني اگدر انساج  وانتي ماليه   حياتي مو بس عيوني

: لو اعرف جيتنا للعراق  ترجعك اليه وتحس بيه اجيت من زمان

: ها يعني عجبتج السفره هنا حبيتيها

: حبيتها  واكثر شي حبيته  اهلك  امك وابوك حبابين كلش ياريت ابقى يمهم

: لا همه راح يجوون يمنا

. صدوك تحجي شلون

: داقنعهم  يجوون سياحه وبعدين  اسويلهم اقامه
امي متعلقه بيه هوايه.
وايضا اخاف عليهم يكبرون ومحد يداريهم

: والله احسن شي فكرت بيه
واحنا هم تخف علينا الغربه

: ورفقه وابنها يبقوون بهذا البيت

: خطيه رفقه .. البارحه حجتلي عن زوجها. الاول وعيالها  هوايه معذبيها

: الله يعوضها 

بعد عودتنا من الزياره رجعنا لبغداد وبقت على سفرنا ست ايام
الم الصداع ملازمني واحيانا  ينغشي على نظري
وتارك العلاج بسبب مفعوله المنوم
وايه حست بالهشي

: شنو هذا الي بايدج

: علاجك  ولازم تشربه 

: اذا اخذه يخليني نايم ودايخ. وحرام عليه اعوفج

: شنو هالحجي طلال انت مريض قابل اني مااشوفك

اني اريدك  تنام  وترتاح.
واذا  متشربه  انت  اشربه اني واظل نايمه

اخذت العلاج اول مابدى مفعوله
تمددت بفراشي
جتي يمي خلت راسها قريب من راسي  واخذت ايدي حولها
منظرها اوحالي كاني بالنسبه الها  مرسى امان 
وكانها  اعطت  لوجودي معنى سبب للاستمرار بالحياة
وكانها تگلي ( ماعندي غيرك )
مديت  ايدي  لموبايلي وصورت  وضعنا اثنينا  ردت اتذكر هاللحظه  للابد
كل ما تعصف بيه الذكريات
اتذكر في انسانه  عايشه  بحمايتي  ومحتاجتني
ولايمكن اخذلها

: ايوته شوفي الصوره  شگد حلوه انتي

: لاتحاول نام انت مريض  تصبح على خير

:    تصبحين على خير

ايه
السعاده في حياة بعض البشر تجي جية خطار
سرعان ما يشد رحاله .. ويروح
اني وحده من هاي الناس