رواية نصف شهر عسل الفصل الثامن والعشرون 28 - بقلم غزل الحجامية

ترى موزينه صحتنا

كون اخبارنا تهمكم

تعودنا اعلى ..ريحتكم

طبعكم ..دمكم اليلعب!

ومنقشمر العين بناس

بيهم شبه من عدكم

..
غزل الحجامية

..

الحجيه يمه شتحجي وياهم مودكول قافلين كلش يعني مايمشون بحجيك واذا هنه ثنينهن صايرات عليك

منير يعني شسوي يايمه

الحجيه اندري يايمه هذا هم حض ريحانه من تزوجت لحد هسه كل يوميه سالفه صايرتلها

منير ريحانه شعليها يايمه ترة اني الي راح ابتلي بزهرة

الحجيه يمه انته كدها اكعد وي رجل عمتك واحجي عدل واحجي وي البنات بلكي يفضنها السالفه

منير يمه الحجي قافل كلش يكول حاسبك ابني وانته تلعب ابنتي واذا جنت رايدها ليش فصخت خطوبتك منها وخليت الناس تحجي

الحجيه شني يمه اول واحد يفصخ خطوبته انته مابيها شي

منير هو هذا تفكيرة بعد شسوي اني

الحجيه والله مادري يايمه كوم ارتاح انته وانشاء الله خير يمه السالفه ماتخلص هيج

منير شرتاح يمه شرتاح وروح اخوي تعبت كلش منهم كل يوميه سالفه صايرة واني اثول رايح الهم حتى اهديهم انوب السالفه نكلبت عليه صدك جذب

الحجيه حضكم يايمه ضحكم شنحجي شنكول الحمدالله والشكر

ريحانه بقيت بالمطبخ مانصدمت من القرار مالت منير وجنت اعرف راح يزوج زهرة وماضجت بس الي ضوجني انو راح اكابل وجهة

واذا على منير اني منير مامتعبرته رجلي ابد ولو مالي ابطني وخالتي  اطلك منه ومابقه يمه لحضه وحده

حضرت الغده لخالتي واخذت العلاج ورحتلهم

منير نايم ومخلي ايده على راسه ومغمض خليت الاكل يم خالتي

ريحانه يله خاله خلينه نتغده سوة

الحجيه يله يمه بس نطيني العلاج ترة اليوم اني موزينه كلش

ريحانه من الهبطه مابيج شي ان شاء الله خير

الحجيه ان شاء الله يمه وين منير

ريحانه هيانه نايم بالكاع

الحجيه دكومي رجلج يمه خلي يتغده ويصعد يرتاح

ريحانه ميخالف

نزلت من الجربايه ونطيتها العلاج وخليت بيدها الخاشوكه حتى تاكل ونزلت اكعد بمنير

ريحانه منير اصبلك غده حتى تصعد ترتاح

منير لا ماشتهي

ريحانه دكوم اكل شي وجهك اصفر

منير  ماشتهي ريحانه

ريحانه بكيفك احضرلك الحمام زين

منير لا شويه واصعد اني اسبح

ريحانه براحتك

كمت كعدت يم الحجيه واكلت وياها واحنه ناكل صعد منير فوك بقيت اكل وي الحجيه

الحجيه يمه انتي اشو مامنج ردة فعل ماضجتي ماغرتي

ريحانه على شنو خاله

الحجيه يمه رجلج يمكن يتزوج هل اسبوع وانتي ساكته مامنج حجايه

ريحانه .خاله انتي تدرين بيه اني ومنير ماصرنه مرة ورجال ابد واني كاعده علمودج وعلمود

ابني الي ابطني منير ماحسسني اني مرتخ بيوم يعني عادي حتى اذا يزوج

الحجيه. يمه يجوز انتي كارهته امنير هسه بس اذكري حجيي يايمه اذا ازوج منير تكرهين
نفسج ماتكرهين منير لانو انتي بعدج اصغيرة وشتوفين شريكه بزوجج ماتتحملين

ريحانه . لا خاله عادي اني من اعتبره رجلي يله اضوج وماتحمل خلي الله يهني ويحفضه النه

الحجيه .يمه مادري شكلج بس الله يستر ويتهدي السالفه بدون زواج

ريحانه . والله بعد مادري

كملنه غده شلت الصينيه وكلت لخالتي تنام شويه واني كمت نضفت المطبخ وصعدت ملابس منير بالحمام اخذتهن اغسلهن

وطبيت للغرفه منير نايم وحاضن المخدة غطيته وطفيت التلفزيون ونزلت خليت الملابس بالغساله واخذت حليب ورحت بالحديقه ارتاح شويه وبقيت احجي وي ابني

كلبي يكلي ولد كلهم يكلولي بيج ابنيه بس اني كلبي يكلي ولد احساسي يكول ولد والاحساس مايخيب مالت الام طلعت تليفوني من صدري وخابرت على شذى

بقيت احجي وياها وسولفتلها على لي صار

شذى .وانتي المن منتضرة اذا صدك وسواها وتزوجها تعاي لا تبقين

ريحانه .وين يمعودة والي ابطني اشلون وخالتي اشلون

شذى .شنو قابل اول وحده تطلك وهيه حامل

ريحانه لج حتى حرام الطلاك اذا جنت حامل

شذى خاب عوفي هاي السوالف الحدمن تبقين منتضرة  وانتي شجابرج على هيج وضع

ريحانه والله لو ماخالتي اطلك منه وابني عادي قابل اني راح احرمه من ابو

شذى لعد شبيج ياعيني ريحانه بعدج اصغيرة اخلصي من وقت احسلج

ريحانه لا شذى خالتي خطيه والله لو شايفتها مريضه كلش بلكوة تكوم واني مو سولفتلج على بتها اشلونها وياها يعني بتها واني عليها خطيه

شذى هو من هاي الناحيه صدك خطيه تكسبين بيها اجر بس يعني تنقذيها وانتي تموتين

ريحانه لا يمعزدة تهون وداعتج المهم ماكو اخابر عن اسد علي

شذى لا ان شاء الله هذا الشهر مثل مكال بابا

ريحانه ان شاء الله تدرين مشتاقتله وفاكدته هواي

شذى البارحه اليل كله نحجي سوة اني ويا وسلفتله على حسين كال بس اطلع اموته بيدي وسولفتله عليج كال بس اطلك اطلكها

ريحانه هههههه حامي علينه

شذى ولج حتى اني كتله ها خويه شبيك ناس اطلكها وناس تكلتلها حير بروحك

ريحانه ولج هو هذا اسد شكد جان يبين خبيث وحقود بس هو كلبه اصفه من المي

شذى هو هيج بس منطي انطباع على نفسه انو خو عصبي وخبيث

ريحانه الله يطلعه بالسلامه يارب

واني احجي وي شذى الباب ندك والدنيا مغرب كلت منو هذا

ريحانه. شذى خلي اروح الباب يندك

شذى. الله وياج عيني

سدته منها وكمت لباب

ريحانه منو

مريم اني ريحانه افتحي

ريحانه فتحت الباب شفتها مريم وشايله ابنها بيدها وشكلها جايه بدون مايدري احد

مريم اشونج ولج شخبارج

ريحانه الحمدالله بخير ياعمري انتي شلونج تعاي فوتي

مريم لا يمعودة كتلهم رايحه للاسواق اسمعي ريحانه ترة هاي السالفه كلها تمثيل اطياف وزهرة سونها عليج انتي ومنير

ريحانه اشلون يعني

مريم زهرة اخر فترة شدت وي اطياف واطياف ملت كلش عاد زهرة كلتلها زوجيني منيير وافتك منج وماخلي احد يحجي وياج نص كلمه واتصيرين انتي الكل بالكل

ريحانه شنو هل حجي مريم اشبيج اطياف اخته لمنير ممعقوله هيج تسوي

مريم لا تسوي وتسوي اكثر اصلا هيه ماصدكت زهرة هيج كلتلها وهنه سون هذا الفلم وهيه شردت زهرة وخلتها تجيكم حتى يدرون بيها الولد يمكم ومن يحجون يصدكون

ريحانه انتي صدك تحجين مجاي تدخل عقلي هاي البنيه شبيها معقوله وي امها موزينه وي اخوها همين

مريم اي ريحانه انتي ديري بالج ترة اليوم سمعتهن يحجن يريدن يخلصن منج ديري بالج لا يذبن عليج مصيبه

ريحانه يمعودة مصيبه شنو اشو كاعده وساكته بالبيت بس يم خالتي الباب ماطلعه

مريم حتى لو اني لو ماحبيتج من البدايه وادري بيج فقيرة وذني حيات مجان اجيتج وكتللج انتي ديري بالج

ريحانه بعد كلبي تسلمين والله ماعرف شجازيج بس اني مايهمني اصلا كلت لمنير عادي اتزوجها اني ومنير عمرنه ماصرنه رجال ومرته واني لو مالي ابطني وخالتي اطفر من زمان واطلك منه بس ذوله كاسرين ضهري

مريم لا تحجين هيج لا تخليهن يشردنج عذبيهن ولا تخليهن يعذبنج

ريحانه يصير خير ان شاء الله

مريم يله حبيبه محتاجه شي

ريحانه سلامتك ياروحي

مريم يله مع سلامه

ريحانه الله وياج

سدت الباب وراها ورجعت كعدت اول مكعدت دكت شذى

جاوبتها

ريحانه الوو

فارس الو ها بابا اشلونج

ريحانه هله بعد بيتي الحمدالله انته اشلونك شخبارك

فارس الحمدالله بخير شنو هذا الي سمعته يابه صدك يريد يزوج عليج

ريحانه منو كلك شذى

فارس اي هيه وشنو ردتيها مادكلي لحد يوم العرس شني بويه شبيج قابل انتي بيج شي حتى تخلينه يزوج عليج وشنو هذا الفلم الي مسوينه انتي مصدكه بي

ريحانه بابا انته ماتعرف كلشي اني ومنير علاقتنه مو تمام واني لو ماخالتي والي ابطني اطلك منه من زمان

فارس اني جايج اليوم اتحضري اخذج

ريحانه لا يابه اناه فاهم الموضوع غلط اني بخير الحمدالله بس ادعيلي واني كم يوم واجيكم

فارس بابا ريحانه ترة اني بعدني بالحياة موجود لا تخلين احد يغصبج على شي  انتي مرايدته

ريحانه الله يطول بعمرك يابه بس صدكني ماكو شي

فارس براحتج بابا انتي بعد اعرف بمصلحتج ديري بالج على نفسج

ريحانه ان شاء الله

فارس يله مع سلامه بويه

ريحانه الله وياك

سديته منه بابا وابتسمت اووف يايابه ثاري السر يجر الف سر ورا سر واحد ضميته اني واسد علي وجاي ادفع الثمن هسه

شلت العصير والتليفون وكمت شفت منير يفرك بعيونه واكف ورايه

مهتميت مشيت كبل

منير صبيلي جاي وحضريلي الحمام

ريحانه الحمام جاهز

رحت للمطبخ خليت الجاي الى النار ونصيته وهو طب يسبح رحت يم خالتي كعدتها وجبتلها مي وبقيت كاعده يمها

بعدين كمت طفيت الجاي وبقيت واكفه يمه بالمطبخ لحد ماطلع منير صبيتله طب للمطبخ اخذه وصعد فوك يبدل

اني بقيت كاعده يم الحجيه

هو بدل ونزل

منير هاي يمه اني رايح

الحجيه الله وياك يمه احجي بهداوة وي عمك ولد عمتك وكلشي بالتفاهم

منير اي يمه ان شاء الله

طلع منير واني جنت ادري ماكو شي راح ينحل بالتفاهم  لانو متفقات النسوان وللنسوان من يتفقن بعد محد يكدر يحلها

واطياف وزهرة اثنينهن حيايه واني فاهيه النسوان اشلون يحجن واشلون يخططن واني لحد هسه مجاي اعرف شسوي وي منير

وعود طفل ابطني يعني اني لو باقيه 100 سنه مافكر بالتفكير الي فكرته اطياف وزهرة واشاون هيج يسوون

ويوكعن منير بالسالفه جان لازم رب العالمين يذكر بكتابه الكريم انو بعض النساء كيدهن عظيم مو كلهن هيه اني فاهيه

الي يشوفني يكول جذب هاي الايه مذكورة ع هيج نسوان

ساعتين مرت تقريبا واني والحجيه نسولف طب منير واطياف

واطياف شكلها فرحانه عرفت الي ابالها صار

اطياف ها يمه اشلونج

الحجيه هله هله بام المصايب شجايبتلنه انوب هسه

اطياف يا يمه شبيج هو اني شمسويه البنيه خطيبته وهو رايدها وهيه رايدته

الحجيه اسكتي لا بارك الله بيج من جبتج لهسه ماسويتي شي بي خير

اطياف انوب اني الي صرت مابيه خير مشكورة يمه شني شمسويه اني اني الي كلت لابنج يموت لو اني الي كلت لجنتج تلحكه وابنج هذا هو رايدها للبنيه شعليه اني

الحجيه هو الرايدها هو الرايدها ياطياف يابنت بطني لو انتي طبختيها انتي والحيه الثانيه

اطياف يايمه صدك تحجين اني هيج اسوي اسم الله يمه شكو غير اخوي اذا ماريدله الخير عسا الله يعميني

الحجيه والله يايمه تاليتج كلش صعب اوف يابنت بطني

منير ماكو داعي لهيج حجي يمه الي صار صار

الحجيه شصار يمه شكلولك قتنعو

منير عكب باجر اخذها اعقدلها ومن نرجع نسوي حفله بسيطه وعقد سيد

الحجيه اصخام بوجهك يامنير رحت تحلها صخمتها

منير اني شكو يايمه همه قافلين واستحيت من الحجي يكلي امنت بيك يابويه وكتلي افصخ وفصخت وتاليتك تفتر وراها

الحجيه يايمه الحجي اتخبل يدري بيك تسوي هيج سوالف

منير يمه حجي نسوان بعد وهمه تدرين بيهم اشلون يصدونه شسوي بعد الهم

الحجيه وشنو تعقد عليها لا يمه اولديك ابطن مريتك ومريتك شحلاتها وصغيرة وبعدكم كلشي مشايفين وتروح تزوج ليش يايمه شناقصك

ريحانه مناقصه شي حجيه والله محلل اربعه وهو راح ياخذ الثانيه مابيها شي عادي شايف كل الخير منير

اطياف هاي النسوان العاقله

ريحانه مو عاقله بس نفتهم وان شاء الله بحق ابو فاضل يرزقج بوحده ثانيه تشاركج سعد حتى ترتاحين منه شوه وهم تصيرين من النسوان العاقله

اطياف يمه برد شرج شبيه اني ويزوج عليه عورة حوله

الحجيه وريحانه شبيها اشو مشايفتها واحسها دكول للكمر كوم واني اكعد بمكانك

ريحانه عوفيها حجيه حجي نسوان ومو كل مره مره

اطياف المهم يمه اني وزهرة باجر نروح نشتري نيشان وذهب الها كدام الناس عيب شيكولون منريد نبين انو هيه تزوجت لهذا السبب هيه بنيه خطيه

الحجيه انوب تشتريلها ذهب ونيشان هل ساقطه هاي تشتريلها طاعون ان شاء الله

منير بعد صارت يمه شسوي اني

الحجيه شسوي يمه شسوي الحيايه ورتبنها بعد ماتنحل

اطياف دكوم يامنير جيبلي الفلوس خلي اروح جهالي يتباجون

منير وين المفتاح يمه

الحجيه هذا يمه هذا

طلعت المفتاح ونطته اله فتح الكومدي وطلع فلوس حسب هواي منتبهت عليهم شكد واطياف تباوع

اطياف مو تنسه اخيتك ملابس اليه ولجهالي

منير ادري فاتح سبيل حتى السبيل مو هيج

اطياف ياخويه شعدنه غيرك

طلع فلوس ونطاهن الهاة

منير هاي مليونين ونص وهاي 200 الج

اطياف مليونين خويه شنجيب بيهن الذهب النيشان

منير هذا الي عندي كلها ادبر روحها بيهن

اطياف ماشي خويه واذا حتاجينه شي نكمل من عدنه يله اني اروح مع سلامه

اباوعلها اخذته الفلوس تحسب بيهن وتمشي اشلون المشايفه هزيت ايدي وبقيت كاعده

منير باوعلي وكعد يم الحجيه

الحجيه يمه شورطت نفسك مدكلي

منير يمه متورط من فتحت الباب لزهرة وخليتها اطبلي وهيه بهيج حاله طابخينها صح ابوها يكلي اذا الحجي مو صح شعندك طببتها بيتك نص اليل

الحجيه اوف يايمه شمسوي بدنيتك وهيج الدنيا تلعب عليك

بقه ساكت اني كمت رحت للمطبخ صدك ماضجت بوقتها يعني عاديه جانت عندي عادي حتى اذا يزوج وشنو يعني

مهتميت وضجت عبالك مو زوجي

وكفت ع السينك وطب منير

منير اي عيني ست ريحانه غردي

ريحانه شنو

منير غردي يزوج عادي والعباس يرزقج بوحده تشاركج بسعد وبعد وبعد احجي

ريحانه محجيت شي غلط اني شكو بيها تريد تزوج ازوج محد يوكف بطريقك

منير يعني ماتضوجين

ريحانه لا ع شنو اضوج عادي ازوج

منير بس اعتقد اني زوجج يعني حتى اذا جانت علاقتنه مو تمام لازم تكونين شويه بيج غيره عليه تغارين تنقهرين اشو انتي ممهتمه

ريحانه اي شكو بيها احنه من البدايه متفقين ع هيج شي يعني لا انته معتبرني مرتك ولا اني معتبرتك رجلي

منير والي ابطنج شنو اذا ممعتبرج مرتي

...

بنات والله اني معليه يعني جاي احلف معقوله ماتصدكن اني انشر الي ادزه اليه والنبي هاي القصه كلش تعبتني والبطله ضروفها اكثر يعني شسوي اني فهمني شجاي ادزلي اجمع بالحجي واكتب وانشر بس هيه تفتح قليل شسوي اني بهل حاله

والبارحه باليل لكيتها دازتلي هذا الحجي نشرته اليوم والنبي لو مدازه هذا الحجي جان مسحت القصه لانو طولت وانتن تدرن بيه عشرين يوم ماطول بالقصه انشرها بسرعه

اتمنى يعجبجن صح قصير بس هو هذا الي كدرت عليه اعتقد

تحياتي

غزل الحجامية