رواية وعصفت بنا الاقدار الفصل السابع وسبعون 77 - بقلم Rozaya1122

وعصفت بنا الاقدار... البارت الثالث والسبعون
للكاتبه زهراء ( روزايه)...

الما يترس
شليله أحضان لا يعشگ
الما يعرف يلاوي الروج ليش يخاطر ويغرگ
المفارگ
ولف مهموم
بس يرتاح إذا حس بابهم يـندگ
الصوره البيها ذكره تعاندك مرات
من تشگها... ماا تنشگ
.....

عقيق...التفتت عليهه عونهه حمر وهزت راسهه
بأسى ركضت عمه عليهه حضنتهه وكعت بالكاع
كمت اصيح اجت فجر تركض ذبينه عليهه مي
ونضرب بخدهه انتبهت بس شافتنه ضمت راسهه
بحضن فجر

ام جراح.. هو مو ابني بس والله بابنتي مايستاهلج الله اخذ منج طفلين لان يدري بي مايستاهل حته يصير اب وهاي كدامج انه عبالج فرحت لا ادعي اخاف من دعائي والده  بس ادعي الله يصبرج ويعوضج الاحسن

لبابه.. ليش سوه بيه هيج بشنو قصرت ؟
ام جراح.. ماقصرتي والسويتي والتحملتي هاي تربيتج
الاصيله امج ساهره علمتج على الاخلاق بس ابني النكر
المعروف يابنيتي يروحلج فدوه جراح هاي دموعج غاليه
عليه ولو اكول يستاهل اعذره بس وحق الله مايستاهل
دمعه منج

هواي نسوان تزوجوا عليهن وكسروهن والي تحملت وسكتت والي ماعدهه سند وماكدرت تحجي عيب على كل زلمه يستغل مرته لو مقصره لو بيج لوله وعيب نكول حگه بس شبيج جنج ورد مايملي عينه بس الكح.....

لبابه..اذا تحبوني خلصوني منه لاتخلوني بأسمه
مااريد حته ينذكر كدامي عقيق خابري السبع يجي
يطلكني. محد يحس بيه ناري ماتبرد بس من اطلك

عقيق... هسه اخابره لاتبجين عفتهه وكمت خابرت
علي جاوبني عنده شغل بس كتله لبابه تريدك
كال هسه شويه واجي ظلينه مخليهه وصافنين

ساعه اواكثر يله اجه بس شافته بجت وعبالك شافت
ابوهه كامت من مكانهه وركضت بدون وعي تريد
تحضنه بس خله اديه كدامهه ولزمهه من اكتافهه
يله انتبهت على نفسهه..

لبابه.. الله عليك طلگني مااريد لاحقوق ولا شي
بس خلصني مااكدر اظل يوم بعد
السبع.. اكعدي بويه وهدي حالج ليش هيج
خومااجه وشفتي

ام جراح.. لا يالسبع مااجه بس دزلنه خبر هديه
مروه حامل وخالهه كايل افضحهم بكل العشيره
واكلهم ضحك على بتنه خاف اله نيه يطلك هو خطبهه
واتزوج بشهود وهسه يريد يعوفهه

السبع.. صحيح الحجي قوي بس هاي الحقيقه
هي تودد اله هو ركض وراهه المهم هو تزوجهه
برضاته محد حط سيف على راسه وكاله تعال اخذهه
يتحمل نتيجه غلطه موتالي عمرنه تتطلخ سمعتنه من وراه ويكولون ضحكوا على بنات الناس

ام جراح.. بس هي استغفر الله من ذنبهه هم ركضت
وراه ماسمعتوا شكال
السبع.. خلينه ساكتين وكل التركض وراه لازم يتزوجهه
موهاي وياه احنه هواي ضعيفات نفس وماعدهن اهل
ويدورن فلوس اشكال انشوف ويعرضن نفسهن هم ركضنه وراهن لو تزوجناهن

هذا ضرغام الي كلنه ذميناه يشوف نسوان بكد شعر
راسه ومادنت نفسه هم يكدر بحجه مرته مريضه وهو يريد ولد والخلفه عزيزه عدنه ويروح يتزوج محد يكدر
يكله لا لان حقه بس ماسواهه وانه شاهد على ضرغام
شكد نسوان تركض وراه وماينطي مجال وجراح شسوه
جابهه على لبابه الصوتهه ماينسمع...

ام جراح.. راح يموتني من يوم يومه شالع كلبي
السبع.. خابري خلي يجي اني مااريد حته اسمع صوته
وكليله يجي يطلك وهو الممنون يطلك بكرامته
احسن ما اخليهه تخلعه كدام جماعته

عقيق.. صار عصبي حته ام جراح سكتت راح للبيت
واني رحت وراه يبدل واني صافنه مااعرف شحجي
اخر شي كتله احتمال يجيب مروه هنا اذا طلك لبابه

السبع.. خلي يجيبهه عسما يسكن جهنم انه اخذهه
واطلع ضحك علينه قبل لا يدك هالدكه حجيت وياه
جراح ديربالك على لبابه خاف اسوي عمليه واموت
ترى ماعدهه بس انت دكلي صدره انه وانه وتالي هو
متزوج ويضحك عليهه

عقيق.. انت عصبي وضغطك هسه يرتفع منو يفيدني
جراح جمره الوضع متأزم مناك لبابه وانت منا على كيفك
ترى كلنه معتمدين عليك ونستمد قوه منك ..

السبع.. تغديتي؟؟
عقيق.. ااي وانت؟
السبع.. اي معزوم جنت راسي يوجعني
تعاي انام اشويه
عقيق.. خلي اقفل الباب واجي

قفلت ورحت نمت بصفه غمض عيونه وكال
تعبت ياعقيق جراح ربه وياي وجنت ادافعله بروحي
ومن انفقد ليالي واني ادعي وكلبي محروك كلهم
احبهم واذا صابهم مكروه من يمي اتأذه

بس سوايته هاي مااعرف شلون تنغفر صدكي
راح يروح لياسين وراح يجيب ابو جاسم وهسه
يحير شيسوي بس حته يرجعهه والمشكله مايستاهلهه

من ليله العرس من دريت بحالته نصحته يعوفهه
بس ظل متمسك وبالاحرى مو متمسك هي لبابه
قدمتله عطاء ماينتهي وتمسكت بي ساعدته بهواي
وخلته يوكف على رجليه بعد ماجان النومه حسره
عليه ينام هو وكاعد وبنفسه يعترف يكول لوما لبابه
جان حته دوامي خسرته

وتالي شقدملهه انقهر عليهن حيل اشوف اختي بيهن
لو اختي موجوده وواحد يسوي بيهه هيج واشوفهه
مظلومه احط طلقه براسه الله اله حكمه بيهه
من اخذهه هي هاي المصيبه وكلبي مشتعل نار

عقيق.. وانت شنو بيدك فهمني هي تريد تطلك
وهو متمسك انت العليك توكف بجانبهه يطلك
ويسكت متريده هي كوه..

السبع.. فركيلي راسي
عقيق.. حضنته وظليت افرك براسه لحدماغفه
حاولت انام بس ظليت بفراشي افكر محد بهاي
الدنيا مرتاح

بلحظه تخيلت حياتي بدون السبع شيصير بيه
يمكن يذبوني بالشارع ومااعرف منين الوحوش
تجيني...

رانيا.. لاتخبصني اوكف
ضرغام.. راح اصعد بالسياره اذا دكيت هورن وماطلعتي
اعوفج واروح ومسويهه قبل...

رانيا.. اخذ الجهال بس اقفل الباب طلع واني اركض
انريد انروح للبصره مره صعد بالسياره ويدك
هورن واني ادور على تليفوني وطلعت لكيته ماكو
الحارس كالي الباشا يكول تقفل الباب عليهه

بوقتهه رجعت خابرته يصيح يكلي شنو تاخرتي
واخذ الجهال وراح وعافني الطم جنت متحلفه
بي اذا رجع العب لعب بس طبوا جايبيلي وياهم
كيك وحلويات ونسيت الزعله..

صعدت بالسياره والجهال وامي وره ادنيت
علي كتله ماتاخرت مو ؟؟ رفعلي حاجبه ونصه
نفسه بمستواي وكال عيب امج هنا لا اطبك السياره
بالطريق..

ام رانيا.. يمه شبيهه السياره عاطله
ضرغام.. لاخاله مابيهه شي بس يمكن حمت
ومحتاجه تبريد
ام رانيا.. بردهه لاتعطل رانيا جابت بطل مي
خاف ماعندك
ضرغام.. هي حمت من بطل رانيا ...

رانيا.. طكيتهه ضحكه ماتحملت امي صاير سمعهه ثكيل
وتسمع كلمه وتسال عليهه غيرت الموضوع لان ظل
يداهر بامي والقصد عليه

رانيا.. احنه رايحين شنسوي؟؟
ضرغام.. نطلكهم ونزوجهم مروه بحكم انتي
خالة العروس
رانيا.. لا اداهر بيه تعرفني موقفي شنو

ضرغام.. السبع كايله طلك حدك لباجر اخذهه
واروح للمحكمه وهو متخبل يدري السبع يسويهه
وهو شغله احوال مدنيه وجنسيه اغلب ضباط
المحكمه يعرفوا اذا عرفوا بسوايته مايظله صيت

رانيا.. السبع متحلف بي؟
ضرغام.. السبع عنده كلمه وحده اذا كالهه ينفذهه
لو مو اخو ومدام كاله حدك لباجر اعرفي اذا جراح
ماطلك اليوم باجر السبع من الصبح بالمحكمه

رانيا.. والله هسه حته مانعرف ننصح افضل تطلك
ماارتاحت وياه ومروه حامل يعني حته اذا طلك
مروه اكو طفل يربطهم وهالحجي ميصرف للبابه

صدك انت مو ماتحجي ؟؟
ضرغام.. اصلا حضرته بس خابرني صديقه
وصح جراح طايح حظه ومصخم ومن زغره يكربس
روحه ومايعرف يطلع واذا عفته وحده يم السبع
ياكله ومايبرد

رانيا.. وصلنه للبصره مكسرين طبيت قبلهم
تلكتني فجر سالتهه عن لبابه كالت نايمه
سلمت عليهم ورحنه لبيتنه بدلت للجهال وغسلتلهم
وفرشتلهم ونامو تعبانين وماما راحت يم لبابه..

رانيا.. ضرغام احضرلك الحمام
ضرغام.. على شنو؟
رانيا.. ترى هستوك تصيح تعبان هسه على شنو
واني صايره تراب وكل واهس ماعندي
ضرغام.. دومهه افكارج منحرفه وطالعه عن الطريق

رانيا.. تقنعني نيتك سليمه
ضرغام.. سليمه وروح ابوج مابيه اشيل ايدي
وورانه طلابه
رانيا.. والله يستاهل كلشي يصير بي بس تفاجأت
بيهه شلون ضربته سجينه همزين مااجت بكلبه

ضرغام.. عمي انتن نسوان لو غضب منو يكدرلجن
الزلم ماتامن على روحهه بعد
رانيا.. لعد ادكون الدكه وتريدون نسكت ...

ضرغام.. اول البارحه بالخفاره جابو وحده كاتله
رجلهه بشيش الكباب وتحجي مترهيه دكول
كتلته واذا مامات هم اكتله لان طلع متزوج جارتهه...

رانيا.. حيل لو اني اكتله خلاص
ضرغام.. اي ام حلك لو انتي والله اجبن منج ماشفت
رانيا.. اني جبانه؟؟ شلون بله
ضرغام.. اذكرج من انحبستي بالسطح
وتعلسين تمر يابس ..

رانيا.. غير اخاف يكتلوني اكلك هسه شنو نصيحتك
للجراح؟؟
ضرغام.. اذا يحبهه ومتمسك بيهه مايطلكهه
رانيا.. لعد انت شو طلكتني
ضرغام.. وين طلكتج غير جنت عصبي

رانيا.. انت شكد ملعب
ضرغام.. كومي سدي الباب وطفي الضوه وصيري
حبابه وتعالي نامي موتظلين تفترين فوك راسي
رانيا.. مانعسانه
ضرغام.. تنامين غصبا عليج راح تظلين طاك وطكه
بالمواعين واطلعيهه زقوم مونومه

رانيا.. ضحكت لا والله راح اروح اشوف البنات نام
انت ارتاح والجهال نايمين بغرفتهم انطيته بوسه
بالهوه وطلعت سمعته حجاله حجايه شكبرهه

رحت للبيت الجبير لكيت لبابه كاعده بوستهه
كالتلي تعالي اريد احجي وياج رحت وياهه للغرفه
كعدت تهز برجلهه كالت خلي ضرغام يحجي علي يطلكني
بدون مشاكل مااريد اشتكي علي ياخذني السبع
باجر وموحلوه كدام جماعته وهو اعلى منهم

رانيا.. بعده كلبج حنين
لبابه.. مامتعلمه اعامل بالمثل وانتقم هو وربه
بس ادري بي يحب شغله حيل ودائما يثنون علي
واذا انمس شغله وشكم واحد يضوج منه اذا كاموا يحجون مرته اشتكت علي وطلكته ترجع حالته النفسيه

رانيا.. خليهه ترجع مو تحملتيهه انتي خلي تتحملهه
مروه
لبابه.. رانيا ماما الله يرحمه جانت دكول من نحقد الله
مايوفقنه ولاحته ياخذ حوبتنه نترك كلشي بيد الله
وهو يشوف ويسمع ويرتب كلشي بمكانه

رانيا.. قرارج نهائي خلي نحجي بصراحه مااعتقد تطلك
مروه ويجوز يجيبهه هنا..
لبابه.. لايطلكهه مايهمني اذا جايهه اجي يمكم لو اروح يم السبع ويخلي سياج بيناتنه

رانيا.. صافنه عليهه شحجي اكو شغلات تشيب الراس
ماادري صدك لوجذب مروه الهدايا طلعتهن اشكال عود
هو جايبهن وشوفتني رسالته من ضربتهه وكتلهه مايحبج
كاتبلهه راحتي يمج ...

وره العشه جنت اغسل بالمواعين واسمع ضرغام
يكول للسبع انجلط وخليني اكتل جراح وطبكم طوب
اثنينكم موتو وخلصوني واهد يهد على الثاني فضحتونه

السبع... سد حلكك انت شوف السانه شطوله اطلكهه
وغصبا على راسك خليك رجال وعندك كرامه واطلكهه
وانت الممنون ماطلكهه وعلي وروح ابوي اسويك فرجه
كدام ربعك باجر عبالك اسكتلك

جراح.. طلاك مااطلك شتريد سوي هذيج المحكمه
وروحلهه خليني احجي وياهه السبع لاتصير شوكه
خاصره

ضرغام.. فضحتونه بنص الليل اكعدوا جوه والغوا
هسه تسمع الناس شنكول دفعهم ليجوه اني ركضت
من الهول اسمعهم صوتهم يروح ويجي بس صوت
السبع عالي وعصبي..

نص ساعه واندك الباب ياسين ووياه اثنين عرفت ابو جاسم رجل عمتهم طبوا واجت ام جراح لابسه عباتهه وطبت سلمت عليهم كايم جراح يريد يسلم عليهه دافعته
وكايلتله ماعليك سلام...

اجن البنات يمي ونحوص انريد نسمع لزكنه اذانه
على الحايط كلمه نسمعهه وكلمه لااا بس اسمع ياسين
كال شجاك السبع اهده بروح ابوك

انت جراح الحل شنو بنت عمك ماترجعلك على ضره
ولازم اطلك هذيج وكول طلكتهه خالهه واحد خسيس مايخلينه سكه بالمنطقه والمصيبه شنو البت حامل

جراح... اي اطلكهه والطفل ماعلي يظل يمهه واذا تزوجت
اخذه بس طلاك لبابه مااطلك
ضرغام.. اذا هيج متمسك بيهه شكو تزوجت

جراح.. لاتشعلهه انت خلي دكلي شروطهه لبابه
وانفذهن بس طلاك ماطلكهه جان يحجي
ودكول امه ايده مثل الرعاش بيهه ترعش حته مايكدر
يثبتهه وعبالك اليوم طلع من الخطف...

ياسين.. نسأل لبابه اذا كالت اطلك لبي كلامهه
وانطيهه حريتهه موكل مره تتقبل الضره عاشت
مدلله ماتتقبل تنذل على ايدك
جراح.. لاتسألوهه لان هم راح دكول اطلك
عوفوني انه وياهه انطوهه مجال تصير زينه

السبع.. انت لو غبي لو تستغبي لو اني الصرت
ماانفذ كلمتي من جاي احاجيك واكلك اطلكهه
بصفتي ولي امرهه وماخذ القرار منهه جراح خلي
خيط الوصل بيناتنه اطلكهه وشوف حياتك

جراح.. كتلك مااطلك سكتو السبع مااطلك
دكول امه كام على حيله اوردته مبينه وجهه
احمر ايده يلزمهه بايده الثانيه وماتوكف كاموا يصيحون
الرجال لاينجلط ويسكتون بالسبع ...

اخذه ضرغام وطلع بره يكح مثل المختنك ركضنه نباوع من الشباك انگلب وحش شال المغسله كسرهه خلاهه قطع مشمره السياره مالته بالطرمه شال مال المغسله
القاعده وضرب بيهن السياره..

يريد يلزمه مايكدر طلع ياسين يركض بس يريدون
يسيطرون على حالته وعبالك جني وركبه من يكولون
مريض نفسي مااصدك لان متعودين علي هادىء
بس الشفته فضيع صوته شعلوه وبنص الليل ضرب
ضرغام بوكس وماكدرله...

لبابه.. اطلعي كليلهم عوفو لحد يحاجي هو وحده يهدء
عقيق.. عززه راح يموت شوفوا ايده شلون ترعش يمه
اسم الله ليش هيج
لبابه.. رانيا اطلعي عليج الله كليلهم لحد يحاجي
من يحاجوا يزود...

رانيا.. فتحت الباب وصحت ام جراح كتلهه عوفوا
طبت وهي تبجي يوم واحد يازينب ماارتاحيتي
لامن اجه الولد ولا من كبر اذا هيج تحبهه ليش دكيت
هاي الدكه..

كعدنه يمهه وهي تبجي لبابه كعدت على الدرج وعينهه
على الباب تعرف حالته والبره بس صوت الزلم
موطبيعي ابداسمع ياسين يكله ليش تزوجت اذا هيج
متمسك بيهه يكلهم ماادري ...

هدء شويه بس ايده ابد ماوكفت رادو ياخذوا
للمستشفى وماقبل رجعوا كعدوا بالااستقبال
وياسين يتوسل بالسبع حته يسكت عنه ورفض نهائي
يطلك ملو وراحوا..

ظل وحده بالااستقبال واجو ضرغام والسبع للصاله صاحو
لبابه كالولهه شفتي بعينج شنو الحل ؟؟
لبابه..اطلك مااظل على ذمته حته اذا طلكهه ولو يكلي
اسجل العمارات باسمج مااظل وياه ..

السبع.. موشفتي شسوه؟؟  تروحين وياي باجر
للمحكمه نشتكي ؟؟
لبابه.. اااي
السبع.. هاهي الصبح اخذج وشيصير خلي يصير
يله عقيق امشينه لبيتنه..

رانيا.. راحوا واحنه هم رحنه ماما ماقبلت تجي
كالت اظل هنا وعفت الجهال يمهه طبيت للبيت
نزعت حجابي وضرغام يباوع بالمرايه ويتلمس
عينه هاا توجعك؟؟

ضرغام.. لا بس تحرگني مخبل موصاحي
رانيا.. كلكم مخابيل ادكون الدكه وتكومون تصيحون
ضرغام.. جاهل ومجلب بخرخاشه لزكتي ساعه
السوده

رانيا.. احلف ماعندك شي؟
ضرغام.. شعندي
رانيا.. خاف وحده مطلقه ارمله طلبت منك انسانيه
ضرغام.. ضحك والله هواي بس شسوي كمت اخاف
رانيا.. انت تخاف؟؟

ضرغام.. ااي غير مااتحمل افراكج كمت اسمع اغاني
حزينه واكعد على الشط مثل المراهق
رانيا.. انت بالمراهقه هم حبيت؟؟
ضرغام.. شوفي اني كل مراحل عمري حاب بيهن

رانيا.. هنيالي ومكيف بله حبيتمن؟؟
ضرغام.. احنه ماجنه هنا بغير قريه يم اهل
ابوي وعندي بنت عم بعمري وحبيتهه بس هي مستغلتني
يطلعونه نشتغل وتخليني اشتغل شغلهه واني مكيف

رانيا.. وليش ماتزوجتهه؟؟ من يومك فازوع
ضرغام.. اصلا جان عمري 15 حته شوارب ماعندي
واجيت لكيت المشيه مالتهه كالو منطيهه
لذاك الصوب..

رانيا.. وشسويت؟؟
ضرغام.. كلشي ماسويت كمت ابوك جكاير من عمي
وادخن وزفوهه ورا شهر واني واكف على الشارع
اشوف زفتهه والله ايام مدري شجنت احس

ذاك اليوم من رحت لبيت عمي لگيتهه ابنهه متزوج وعدهه جنه بس شافتني ضحكت ورجلهه ميت وصايره
بيبي واني بعدني اركض وره رانيا تدلل عليه..

رانيا.. شمسويتلك انت جبتهه لنفسك
ضرغام.. بويه تبت التوبه حرام عليج والله جاي
تعذبين بيه مسويه جدول واواقات ولازم ماازل
عنهن صدك جذب زلم بالمركز ترجف مني وانتي
تتموعين عليه ...

رانيا.. دتعال انام احسن مااتذكر اقبال
واكعد انوح يمك
ضرغام ..هسه ولا عنهه منا منا!!
رانيا ... ابد ولا شويه تعبانه من الطريق
ضرغام.. امري لله وتاليتهه ادك الدكه مثل جراح

لبابه.. ماعندي كل احساس ولا مشاعر انسانه ميته
من الداخل بس من شفت حالته هزني بقايا الحنين
اعرفه حالته النفسيه ترجع جان الطبيب شكد يوصي
بي يكله ديربالك تنفعل تنتكس حالتك وترجع لنقطه
الصفر..

اتگلب بفراشي اريد انام مااكدر كمت للمطبخ شربت مي
ضوه الاستقبال مفتوح فجر كالت صعد فوك فتحت الباب
فارغ بس على التخم التشيرت مالته مديت ايدي
اريد الزمه عفته باوعت للباب اشوف بقع دم مثل ماواحد
نازف تبعت الاثر لحدماوصلت للدرج مال الطابق الثاني..

هو مره كالي من افقد مااحس بروحي ولاحته
اعرف منو اني والداير مدايري ظلت عيني
على الدرج كلبي يجرني اروحله وروحي المكسوره
تكلي نسيتي كسرتج؟؟

رجعت لفراشي وماغمضت عيني لحد الفجر بجيت
هواي واحتاجيت ماما اشكيلهه خليت راسي على المخده ونمت واشوف ماما بالحلم خدهه نصه اسود وبي اثر
وعينهه الثانيه مدمعه ركضت عليهه اكلهه منو سوه بيج هيج دكلي جراح...

اسال بيهه ليش ضربج هيج؟؟ وهي دكلي حيل اذاني
يايمه وحته ابوج ذاك وتأشر علي هم خده اسود
بنتي اذاني جراح بس هالكلمات الكالتلهن وفزيت
مرعوبه..

لهنا اذيتك وصلت حته الميته حست استغفرت
وكمت عقيق جايه دكول السبع دزني بدلي حته تروحين
سألت عمه كالت جراح للدوام بدلت وهستوني اريد
اطلع اجه ضرغام كال جراح خابر لاتروح راح يطلگ

اصريت يعوف دوامه وهسه يطلگني ل11 جابو
الشيخ وصاحوني طبيت واني مدنكه رمه يمين الطلاك
وكال باوعلهه صديت علي بس شتت نظري حته مااتذكر
شكله شلون جان...

طلعت مختنكه مااريد احد يواسيني كلشي
مااريد اريد ابقه وحدي ومرت 3 ايام حابسه روحي
بالغرفه ساعه اعيد بذكرياته واكلب بصورنه وساعه
اتذكر كسرته..

اجه موعد المحكمه وهنا وكفنه كدام القاضي وهو يتوسل
بيه لبابه شتريدين اسوي بس اتراجعي بقرارج
حته القاضي كال بابا انطي فرصه زوجج يحبج
هزيت راسي بعيون مليانه دموع وكتله مااريده طلگني منه

حزت بنفسه الحجايه يمكن وهو يرمي يمين
الطلاك وتحررت منه شرعآ وقانونا ورجعت خالية
الوفاض ماجنيت من حبي وعشرتي لجراح غير
كلب مكسور ...

من عمري 15 وهسه 24 رجعت مكسوره خاطر
وگلب ينزف محد يكدر يداوي لابيوم ولا بسنه
ولا راح يبرد ويرجع مثل قبل...

ماشفته بعد ولاحته سمعنه صوته ضرغام ورانيا
رجعوا واني كملت العظه و بده الدوام وانحضر اسمع من امه لسه سالفه مروه خالهه يوميه رايح لشيخ وجراح
يريد يطلك وياسين متعارك وياه وكايله ادفع ثمن
غلطتك وطالع بيهه ولد مصيره شنو ماشفت رانيا شصار بيهه على ولدهه..

اروح للدوام وارجع ماعندي غير صديقه وحده
حته ضحكه مااضحك بس اضحك اتذكر كسرته
لو جان يكلي اروح فدوه لهالضحكه  ..

اباوع لفجر الصارت اضعف مني اكلهه قليل
ومرات اشوف صوره اواب بتليفونهه
لو اشوفهه من تصعد على السطح وتنزل عيونهه
حمر ...

المصيبه بيوم الي اجت ام اواب وكالت البارحه
تخربط ياسين من وره ابنه خابرنه. راح يتزوج
وحده هناك علمود الجنسيه وهم طبيبه وياه
وخله ياسين يلطم على راسه ...

جانت فجر بالمطبح اسمع بس طكه الماعون
كمت واشوف عيونهه تجري ودكول هم كسر
ثاني هيج مكتوب علينه بنات ساهره وعافتني
وركضت ليبره...

فجر اقوى مني بهواي ماحجت لاحد عن مشاعرهه
تبجي وحدهه وتشتاق وتحن بالبسكون حته عقيق ماتحجيلهه ومن نذكر موضوع اواب دكوم وتعوفنه
ماتسمعه ...

وظلينه على هذا الحال تقريبا 5 اشهر وجراح ماشايفته
بيوم منهن رجعنه من الدوام وجان عيد ميلاد عقيق
اشترينه الهه هدايا وماتدري كلنه نسوي مفاجئه الهه

هي من ترجع تنام ومن يجي السبع المغرب يله يكعدهه
احنه من رجعنه كمنه انسوي كيك اني وفجر
وعمتي كاعده تسبح بالمطبخ اندك الباب هي رجليهه
ماتساعدهه كامت فجر تفتحه

اباوع من باب المطبخ وجان اطب سهاد ومروه
والجنط كومه ومروه بطنهه لخشمهه صافنه
عليهن وام جراح ازيد مني وسهاد دكلهه جراح
دزلنه سياره واجينه وين غرفته بنتي طفلهه نازل
ولازم ترتاح...

عفتهن وطبيت جوه نار واشتعلت بصدري
ادك على كلبي انت موكلت ياكلبي بعد مااهتم
واقوي بروحي بس ماجاي اكدر واني اسمع صوت عمتي
تخابر ودكله اصعدهن بغرفه لبابه ؟!؟؟

.
.
.
يتبببببببع ....... متابعه شيقه