رواية وضاقت الأرض بي الفصل التاسع 9 - بقلم لبنى الموسوي

في دجى الليل تسير باحثةً عن أمل، تحاول الهروب منهم، أولئك الذين لا يعرفون من الحياة شيئًا غير الشرف. عن أي شرف أحدثكم؟ شرف البنت الذي إذا تهاوى تهاوت معه بأيديهم، وإن سقط أسقطوها أرضًا قائلين: كقطرة حر كانت على الجبين محيناها. أولئك الذين لا يعرفون من الدين سوى "المرأة عورة"، المرأة التي أنجبتهم، وربتهم، وجعلتهم رجالًا قالوا عنها مجرد متاع يهون علينا تعب السنين.

لا يا عزيزي، عقل الرجل هو العورة، فكره المتخلف هو العورة، وعار على أمة العرب أن يكون بينهم أصناف من الذكور كـ مثلكم. -رحت رفعت الخط، صحت: ألووو. اجاني صوت غريب ومشوش. -شلونك يا حلوة، أكيد ما عرفتيني بس أنا أعرفك كلش زين. -منووو!!! -أنتِ غسق مو؟ -منوووو أنتَ؟!! -أعصابك حبيبتي، مو قتلك متعرفيني بس أنا أعرفك عدل. أبوك مسلم، أخوانك زمان ويوسف وسيف العار. وأنتِ طالبة جامعية مرحلة ثانية قانون بس الله يرحمك حاليًا.

سديت الخط بخوف، منو هذا وشلون عرف عني كل هالشي والأهم من هذا شلون حصل رقم الأرضي!!! رجع دق مرة ثانية، لح كلش بالاتصال، لا أقدر أفصل الأرضي خاف الدكتورة تتصل ويظل بالها، ولا أقدر أتركه يدق ويقعد الجهال. رفعت الخط: -نعم شتررررريد؟ -هههههه، شبيك عصبية ممبين عليك كل هالأعصاب؟ صفنت ويا روحي، معقولة هذا دكتور مؤيد؟!!! بس المشكلة مداميز إذا كان هو لو لا لأن صوته مو كلش واضح. -ها شو سكتي؟ -دكتور مؤيد؟؟

-هههههه، لا شاطرة والله خوش تحللين أستاذة غسق. -أنتَ لو لااااا؟ -وتتوقعين الدكتور فارغ يلعب ويا وحدة مثلك؟ -باوع راح أسد الخط، أتمنى متتصل مرة ثانية وإلا أنطي خبر للدكتورة وتشتكي عليك. -ميخالف ما أتصل بس شرط. -لا يربي فوكاها يتشرط! -تسمعين لو لا؟ -احكي. -أتصل بيك من تكونين وحدك وتجاوبيني. -الله كريم روح يلا. -ما جاوبتي يعني؟ -كتلك الله كريم.

-مجبورة تردين حبيبتي، حتى لا أفضح قصتك يم الناس الحاويك ببيتهم ومأمنين بيك وهم ميدرون شنو من مصيبة وراك، ولا يعرفون حجم الخطر الحطوا نفسهم بي بسبب قعدتك يمهم. سديت الخط بوجهها، يربي يعني أنا ناقصني قهر، منو هذاااا وشجابه عليه بهالساعة القشرررة. بقيت بالصالة ما قدرت أصعد فوق، طول الليل ما اجاني نوم، منا أفكر بكلام هذا الغريب ومنا خايفة من بقائي أنا والجهال وحدنا بهيج بيت جبير.

بالسابعة رحت قعدت الجهال، ريقتهم وجهزت كل شي واجه الخط عليهم، راحوا لدوامهم الجبير بالمدرسة والباقين روضة وحضانة. بديت ألملم بالبيت، قريب التسعة سمعت الباب انفتح. جريت حجابي على راسي ورحت للشباك شفت الدكتورة دتدخل سيارتها بالممر. شوية وطبت تلقيتها من الباب: -الله يساعدك دكتورة. -هلا حبيبتي، شلونكم خو مصار شي بغيابي؟ -لا الحمد لله كل شي تمام. -الجهال راحوا لدوامهم؟ -اي.

-خوش لعد، رايحة أسبح وراها أنام شوية، إذا اجى مؤيد قعديني. -صار. عافتني وراحت تسبح، للـ 11 سمعت صوت الباب عرفت الدكتور اجى. بقيت واقفة بمكاني أريد أشوفه يحكي شي من يدخل علمود أعرف هو المتصل لو لا. طب باوعلي ونزع حذاءه: -الله يساعدك. -الله يسلمك، اجت جنان لو بعدها؟ -اي اجت من زمان وهسه نايمة. -زين لعد، استكان جاي بلا زحمة عليك راسي كلش يوجعني. -اي صار.

عفته ورحت للمطبخ، يربي شو هذا عادي ممبين عليه هو المتصل حتى أسلوبه وياي جامد. خليت الجاي على النار ووقفت يمه انتظره يتهدر. عشر دقايق وصبيته، كنت مسوية كيك من البارحة، جهزتله ماعون وأخذته للصالة. كان مركي راسه على ظهر التخم ومغمض. صحت: دكتور الجاي. باوعلي وقال: حطيه يمك وروحي قعدي جنان. عفته على الميز ورحت لغرفتهم، ظليت أقعد بيها وبالقوة يلا قعدت لأن تعبانة. قامت تغسل وأنا رحت للمطبخ أصب لها جاي ويا رجلها.

مر اليوم عادي، ما بين على الدكتور شي وحتى كان متغير مو مثل كل يوم بحيث ما طلب مني أي شي مثل عادته، قلت يجوز تعبان من السفر وماله خلق. لليل قاعدين هو ومرته على التلفزيون، وأنا متكتف بزاوية من زوايا الصالة ألعب ويا الجهال حتى ليسوون هوسة. دق الأرضي. قام هو رفع الخط، صاح: ألووو ألووو رد يا حشرررة! سد التلفون بعصبية، حكت الدكتورة: منو جاوبها؟ ما أدري. ورجع قعد بصفها.

بقيت صافنة ويا روحي، معناها صدق مو هو المتصل، لعد هذا منو يا إلهي راح أتخبل شلون عرفني وعرف عنواني ورقم الأرضي. خمس دقايق ورجع الرقم يتصل، قام الدكتور رفع الخط هم ما ردوا، ظل يغلط ويسب، أخير شي ركع السماعة بعصبية وفلت الواير من الأرضي. جنان: منو هذا؟ مؤيد: وأنا شعرفني؟ باوع عليه بخزرة وقال بنبرة كلها شك: أنتِ منطية الرقم لأحد من معارفك لو شنو؟ -لا والله ما انطيت الرقم لأحد. -لعد هذا منو اللي يتصل وميحكي؟

وشمعنى هسه صارت هالحالة سنين صار لنا بهالبيت ما فد مرة اتصل رقم وما رد. -مؤيد شبيك، البنية ما عندها أحد كل أهلها بالخارج لمن تنطي يعني؟ -والله ما انطيته لأحد ولا حتى أعرف رقم الأرضي شنو. -لتحلفين حبيبتي مصدقيق، قومي خذي الجهال لغرفهم خلي ينامون وراهم دوام. قمت والدمعة بطرف عيني، ما أعرف أضوج من شكه بيّ لو أخاف من هذا المجهول اللي ما أعرف منو هو وشجابه عليه.

أيام مرت والوضع مثل ما هو، من أكون وحدي يتصل ما أرد أصلًا، ومن الدكتور موجود هو اللي يرفع عليه الخط وهم ميحكي كالعادة بحيث قال: راح أشتكي عليهم أريد أعرف منو هذولة وشعدهم يتصلون باستمرار. فد يوم الظهر دق الأرضي، كان الدكتور هستوه ديريد يروح لغرفته، باوعلي بخزرة ورفع الخط. -ألووو، اي منو أنتِ؟ ها أهلًا وسهلًا هاي موجودة. مد السماعة من بعيد، صفنت بوجهه، قال: شبيك تعالي مكالمة لك. -منو؟ -هناء بنت الحجية.

رحت بسرعة أخذت السماعة، باوعلي وراح لغرفته، باوعت للرقم: أرضي منين دتتصل؟ -ألووو. -ها غسق شلونك؟ -هلو هناء، بخير أنتو شلونكم؟ -الحمد لله. -منين دتتصلين؟ -أمي خبصت أبوي، إلا تشد أرضي أريد أتصل على بناتك بالبصرة وهي كذب علمودك لأن تعبت كل يوم والثاني رايحة جاية عليك. -ههههه، فدوة لقلبها خالة. -هاي وينها تريد تحكي وياك؟ -اي جيبيها. -ها حبوبة شلونك؟ -هلا خالة، بخير أسأل عنك أنتِ شلونك؟

-تسأل عنك جنة عدن ييمه، عساك مرتاحة إن شاء الله يم الوادم. -اي خالة مرتاحة الحمد لله. -الحمد لله، احكي يمه رايدة شغيلة منا منا؟ -اي ولو أزحمك. -لا يا حبوبة أنتِ بحسبة هنيوة ربي يشهد علي. -رحم الله والديكم خالة، بس بالي يم أمي أريد أعرف شخبارها راح أموت. -حقك ييمه، باچر من صباحيات ربك أشبخ لحوشكم أتفقدها وميكون خاطرك إلا طيب. -أعرف تعبتك وياي هواي. -بسك من هالحكي، كتلك أنتِ بحسبة بنيتي ومامش أم تتعب من ضناها.

-وأنتِ هم صرتيلي أم الله شاهد. -هذا رقمنا، عود سجلي يمك خافن تعتازيني بشغيلة. -اي ماشي، سلمي على هناء وعمو هواي. -يوصل، وأنتِ هم سلميلنا على أهل الحوش. -يوصل خالة. سديت الخط ورحت لغرفة الجهال، جبت ورقة وقلم كتبت رقمهم ورجعت الأرضي لمكانه. رجعت باوعت عليه، خلي أشوف الأرقام اللي تتصل بلكت أتوصل لشي.

قعدت على التخم وخليت الأرضي بحضني، ظليت أقلب بي كل رقم شكل مو رقم واحد، تقريبًا أربع أو خمس أرقام واحد بيهن أرضي والباقي موبايل. منو هذا أموت وأعرف، وليش ظل ساكت كل هالفترة مو قال إذا مجاوبتيني أفضحك يم الدكتورة ورجلها وهاي أنا مداجاوبه من يومها بس ما سوى شي. ثاني يوم الضحويات، داشغل بالبيت وحدي اندق الجرس، لبست حجابي وطلعت صحت: منو؟ اجى صوت خالة أم هناء ركضت فتحت لها الباب أكيد جايبتلي خبر عن أمي. -السلام عليكم.

-عليكم السلام خالة، شبيك ليش وجهك أحمر هالشكل؟ -تعبانة فرد نوب يمه، افسحيلي الدرب خن أجر النفس شوية. -اي خالة تفضلي. طبتها للصالة قعدتها ورحت أجيب ماي، قلبي يلعب شكلها جايبة خبر مو زين ولهالسبب تعبانة وحايرة شلون تفتح وياي الموضوع. انطيتها الماي وقعدت بصفها، بس شربت سألتها: خالة صار شي ببيتنا الله عليك؟ -اي، بس خليك سباعية بنيتي كل احنا على هذا الطريق. -أبوية صار له شي لو أخواني؟ -لا لا كلهم بخير. -وأمي؟

-رحت تفقدتها، ما أريدن تطيحين عليه خليك قوية. -احكي خالة فدوة احكي. -أميمتك تنازلت عن عمرها لك ومشت يم الكريم. -شنو يعني!!! -الله يرحمها برحمته الواسعة، هم السابقون ونحن اللاحقون لو مو اليوم باچر. هي قالت هيج لو أنا انهاريت، أريد أستوعب كلامها ماكو، شنو يعني أمي ماتت؟!! زين ليش؟! شوكت؟! شلون؟! هي مو تدري ما عندي غيرها بهالدنيا شلون قدرت تعوفني وتروح؟

كانت خالة أم هناء فوق راسي واقفة، تحاول تهدئ بي بس ولا كأني أسمعها نار ومشتعلة بصدري ويامن يطفيها. عفتها وصعدت لغرفتي أركض، سديت الباب وصرت أصرخ بكل صوتي صرخات طالعة من أعماق وجع قلبي. ماكو أحد بالبيت، طلعي قهرك غسق طلعي ولتسكتين كافيك من السكوت اللي ما جابلك بس القهر وأوجاعه. باوعت للمرايا: منو هاي؟!! هاي مو اني! كل شي بيه متغير، شكلي، ملامحي، طولي، حتى روحي ما عادت نفسها القديمة. لچ يمه، وين رحتي؟

ليش رحتي وعفتيني وحدي بهالدنيا، والمن عفتيننني؟ ارجعي الله يخليچ ارجعي. ارجعي خلي أحضنچ قبل لا ترحين. ارجعي خلي أملي ريتي بعطرچ الطيب حتى أقدر أعيش على ريحتچ العمر كله. ارجعي ماما، اني بحاجتچ. شلون ترحين قبل لا أشبع عيوني بشوفة عيونچ؟ شلون ترحين وتظل شوفتچ حسرة بقلبي المتلوع عليچ؟ شصار بيچ ومتي؟ شقد تعذبتي بفراقي اللي ما تحملتي، وعفتيني بين الوحوش ورحتي بدون ما تفكرين؟ بقيت أصرخ لحد ما صوتي اختفى.

شقد بچيت، وبعد بيه بچي مال ألف سنة لقدام. سحبت حجابي ونزلت. صارت خالة أم هناء بوجهي قاعدة على التخم وحاطة شيلتها على عيونها تبچي. -شوكت ماتت؟ -ها يا حبوبة شلون صرتي؟ -شوكت ماتت خالة؟ -بسچ عاد، ارحمي رويحتچ الصغيرة. -فدوة أروح لچ جاوبيني. -من أسبوع. -وليش ماتت؟ -طاحت منهم، ومن أخذوها للمشفى قالوا قلبها كف عن النبض. -يعني سكت قلبها بسببي؟ ماتت من حسرتها عليه وحركتها على ضيمي مو؟

-قولي يا الله يمه. الحرمة هذا يومها وكل إحنا على نفس الطريق. لا تكدرين روحچ هيچي، خطية أميمتچ تراها تحس وما تهجع بترابها ولا ترتاح. -منو بلغچ بالخبر خالة؟ -وحيد من إخوانچ. -وصفي لي شكله. -أبيضاني وصغير، ها وعيونه زرق ورق. -سيف الكلب! الله ينتقم منه إن شاء الله، كل الصار والراح يصير هو السبب بيه مو غيره. -بسچ يمه لا تطيحين علينا، شلون أردّن للحوش وهذا حالچ؟ -روحي خالة ما بيه شي ليظل بالچ.

-لا والله فلا أرد، أنطر الدكتورة هنا وآخذنچ وأمشي. -لا وين، خليني هنا ما أريد أزحمكم وياي. -بسچ عاد، ليمتى أظلّن أعيد وأزيد إنتِ مثل هنيوة. رحت حضنتها وبچيت. عافتني براحتي وأني هم ما قصرت بالبچي بحيث صدري انتهى. للظهر اجت الدكتورة. استأذنت منها خالة وقالت لها أمها ماتت بالخارج. والمرة هم ما قالت شي، انطتني أسبوع إجازة، لميت ملابسي وطلعت ويا أم هناء. وصلنا لبيتهم، فتحت الباب ودخلتني.

صارت هناء بوجهي دتكنس بالممر، بس شافتني ركضت حضنتني، الظاهر خالة ما انطتها خبر بموت أمي. بقيت يمهم أسبوع كامل. چانو بالنسبة لي أهل وأكثر. ما فديوم سمعوني كلمة مو حلوة، وحتى عمو أبو هناء اللي چان ما متقبل وجودي ببيته صار يروح ويجي يسأل عني، شلونها وشلون صارت. طول هلأيام انعزلت عن الكل. لزمت القرآن وقابلت السجادة أصلي وأقرأ لروح أمي، على الأقل ترتاح بقبرها بعد العذاب اللي شافته ويا أبويه وإخواني.

خلصت إجازتي وصار لازم أرجع على الشغل. أخذتني خالة أم هناء من الصبح، دقت الباب، طلع دكتور مؤيد، سلمت عليه وراحت. ردت أطب، سمعته صاحني. درت وجهي باوعت له، چان يقول: البقية بحياتچ إن شاء الله. -البقاء لله. -صدق بالخارج ماتت؟ -إي. -الله يرحمها برحمته الواسعة. -ويرحم أمواتك. حچيتها وطبيت. چانت الدكتورة تبدل لأطفالها، بس شافتني قامت بوستني وصارت تواسي بيه. مرت الأيام بتعب.

صرت أحس حمل الدنيا كله على ظهري من يوم ما ماتت شجن لحد موت أمي. تغيرت غسق وتغير كل شي بيها. مو ذيچ الضعيفة اللي ما عندها شخصية، ولا ذيچ اللي تخاف من ظلها إذا لمحتها وراها. حتى شكلي تغير. بديت أضعف أكثر وأذبل يوم عن يوم أكثر وأكثر. أما الأكل اللي چان كل شي بالنسبة لي صرت ما أذكره إلا وقت الحاجة حتى أقدر أبقى واقفة على طولي وأعيش نفسي. مشت الأيام وصار على موت أمي أربعين يوم.

نومت الجهال بالليل وسويت نفس الشي اللي سويته بأربعين شجن. خلصت الليل بالصلاة والقرآن لها. للفجر غفيت على السجادة، حلمت بأمي دتكعديني بنفس هاي الغرفة. فتحت عيوني شفتها كبالي مبتسمة. كمزت من مكاني حضنتها حيل: ماما هاي إنتِ؟ -شلونچ يمه مرتاحة؟ -لا ماما، محتاجتچ ليش عفتيني؟ -صيري قوية. أني ما قدرت أعيش بدونچ بس إنتِ تكدرين. وأهم شي ديري بالچ على نفسچ من الذيابة الداير مدايرچ. -منو يعني؟!! -فتحي عينچ وإنتِ تعرفين منو.

فجأة اختفت من كدامي. فزيت مرعوبة، شتقصد من هالكلام؟ ما أتصور أبويه وإخواني لأن مستحيل أرجع لهم بعد ما راحت هي وأعلنوا خبر وفاتي. بقى كلامها يرن بإذني. مر أسبوع والثاني، بالثالث اجت الدكتورة بالليل، چنت دا أنوم أطفالها، طبت للغرفة. جنان: غسق حبيبتي. -نعم دكتورة. -باچر عندي ندوة ببغداد واحتمال أبات. -وإحنا شلون؟ -عادي مثل هذيج المرة. مؤيد راح يسافر وياي وإنتِ والجهال تبقون وحدكم.

قفلي البيبان زين، ورقمي يمچ، شيصير اتصلي عليه حتى لو بوقت متأخر. -توصلين بالسلامة. -الله يسلمچ. وهاچ هذا راتب الشهر اللي فات ويا الإكرامية اللي وعدتچ بيها. -مشكورة دكتورة. -تدللين. حچتها وطلعت من الغرفة. باوعت للفلوس، منطتني 600 ألف، يعني الزيادة 100 ألف. نومت الجهال وصعدت فوك. ضميت الفلوس ويا فلوسي القديمة وصرت أفكر. شسوي بيهن؟ وشلون أستثمرهن حتى يفيدني إذا صار شي وخسرت شغلي هنا لا سمح الله؟ هسه عندي مليون ومية.

خلي يصيرن فد 4 ملايين وأشتري بيهن بتوت ذهب مثل ما أمي چانت تعلمني. بس تذكرتها بچيت. چانت تشتغل وتجمع علمود تأمن مستقبلي. تخاف أصير مثلها وتدري أبويه وإخواني ما بيهم خير لا إلها ولا إلي. ومثل كل يوم نمت ودموعي على خدي. الصبح فزيت على صوت الباب، قمت لبست الحجاب وفتحتها على السريع، چانت الدكتورة. -صباح الخير. آسفة دكتورة ما أدري شلون راحت عليّ النومة وما حسيت على المنبه.

-صباح النور. لا حبيبتي بعد وقت بس لازم أطلع هسه لذلك كعدتچ. -إي ماشي هسه نازلة. -ما أوصيچ على الجهال بعد. -بعيوني لتوصين حريص. ابتسمت بوجهي وراحت. باوعت للساعة بعدها ستة ونص. طلعت غسلت وجهي ونزلت، لقيتها هي وزوجها رايحين ومحد بالبيت غير الأطفال. جهزت الريوك وكعدت الأطفال. ريكتهم وطلعوا للدوام، بقيت أشتغل بالبيت للظهر، دق الأرضي. باوعت رقم بيت خالة أم هناء. -ألوو. هناء.. ها غسوقة شلونچ؟

-هلا بهناوي، بخير الحمد لله وأنتِ؟ -الحمد لله، أمي جاي تسأل عنچ، مدري شبيها من الصبح تلوب اتصلي ما اتصلي. -حبيبتي خالة، گوليلها اني بخير ليظل بالها يمي. -سمعتي يوم غسق بخير؟ سمعتها گالت جيبي خن أحچي وياها. -ها حبوبة شلونچ؟ -هلا خالة، بخير أسأل عنكم، أنتِ شلونچ؟ -تسأل عنچ جنة عدن، شنهي ما شنهي حاچيني بيچ علة؟ -لا والله خالة كل شي ما بية، ليش تسألين؟

-ما اعرف بس كوبست بيچ، چن گاعدة على تلة عالية وتنوحين حيل، لا بية أصعدلچ ولا أنتِ النازلة حتى أعرف اليوجعچ شني وارتاح. -خير إن شاء الله، ليظل بالچ، الحمد لله أموري تمام ومرتاحة بشغلي. -عساچ بنيتي مرتاحة. -رحم الله والديچ خالة، أگول عندي فلوس أريدچ تضميهن عندچ إذا ما تصير زحمة. -زحمة شني، جيبيهن ولترطنين زايد ولچ. -هههههه، خوش لعد من تفرغين تعالي لهنا. -چا من عين باچر تلگيني مزروعة بحذاچ. -كل الهلا بيچ حبيبتي.

-وبيچ أكثر بنيتي. سلمت عليها وسديت الخط. ما أنكر كلامها خوفني بس حاولت أبعده عن راسي حتى لا أخلي الخوف يسيطر علية وأني وحدي بالبيت. صار الليل، نومت الجهال وقفلت البوب. مثل المرة الفاتت قررت أنام بالصالة مو مال أصعد فوگ وأعوف الجهال وحدهم. فرشت الفراش بالگاع وشغلت التلفزيون. صعدت صوته حتى يصير نفس بالبيت وتمددت گباله أقلب بالقنوات بين ما أنعس وأنام. توها شكلت عيني دگ الأرضي. فزيت مرعوبة منو هذا اليتصل بمثل هيچ وقت.

باوعت الساعة فوگ الوحدة، گمت رفعت الخط أخاف الدكتورة ويظل بالها إذا ما أرد. -ألوو. -ها يا حلوة شلونچ؟ -أنت منو متحچي وتفضني؟ -ليش مچنتي تردين على اتصالاتي؟ -وأنت منو حتى أرد عليك، راح أسد الخط ودير بالك تتصل مرة ثانية. ترى دكتور مؤيد أخذ أرقامك حتى يعرف منو، وإذا گدر يوصل إلك راح تورط روحك بمشاكل إلها أول مالها تالي. -ههههه، حبيبتي الـ گلبها علية. داجاوبه ما أحس إلا إيد لمست رگبتي.

درت وجهي مخروعة چان أنصدم بدكتور مؤيد. من الصدمة انشليت بمكاني حتى ما أگدر أتحرك بعد. -هههههه، شنو هالشعر الحلو صبغ لو طبيعي؟ -باوعت للسماعة وباوعتله مصدومة. هز راسه بضحكة وگال: أي هذا أني وأعرف عنچ هواااااي. -شتريد مني؟ حچيتها بصوت مكسر والعبرة بصدري. -أريدچ. وهذا راح يكون ثمن سكوتي عنچ، مو بس گبال جنان لا حتى گبال أهلچ الگاعدين يدورون عليچ حالياً.

-الله يخليك لا، كافي خلي عندچ ذرة رجولة وغيرة، ليش تستغل وحدة ضعيفة علمود ساعة شيطان تتندم عليها بعدين؟ -آني أحب ساعات الشيطان كلش وما أتندم لتخافين. حچاها وتقرب علية حط راسه يم رگبتي. دفعته حيل وسحبت الحجاب على راسي صار التخم حاجز بيني وبينه. -سلميني نفسچ أحسن، أنتِ تعرفين شيصير بيچ لو عرفوا أهلچ بوجودچ هنا؟ -دكتور أترجاك وبچيت. -گولي مؤيد. -دكتور. -گتلچ گولي مؤيد. -مؤيد. -عيونه.

-عوفني بداعة جهالك، أني مو مال هالسوالف. -هههههه، لعد ليش شردتي من أهلچ وأعلنوا موتچ إذا مو مال هالسوالف؟ -ظلم والله ظلم. -أي عادي، كلچن تسون العملة وراها تحچن نفس الحچي. -وروح أمي المالحگت أشبع منها أني مظلومة. -كافي تبيعين شرفيات براسي، هسه راح أتأكد أنتِ مظلومة لو لا لمن أتقرب منچ وأشوفچ بت بيت لو بت شارع. حچاها وهجم علية. ردت أركض ما لحگت، لزمني من طرف التيشيرت انشگ بـ إيده وعثرت على وجهي. ذب نفسه علية يضحك.

-گولي أني هم أريدك ليش تسوين هلأفلام الهندية؟ -أترجاك عوفني عوووووفني. -تعالي للغرفة، ليگعدون الجهال على صوتچ الحلو وغمزلي. شهگت حيل. -بروح كل عزيز وغالي عليك لتأذيني دكتور. -لا حبيبتي ما أأذيچ صدگي. صار يجر بية وأني أسحب نفسي منه. داتخيل شلون يعتدي علية مثل ما سووها الحيوانات القبلة وروحي تطلع من الوجع. وصلني الباب غرفته لزمت بالحايط.

يسحب بية وأني أتمسك أكثر ما عندي غير دموع عيني وصوتي اليتوسل بي علمود يرحم بحالي ويترك الباقي من شرفي حتى أگدر أعيش بي. ما گدرت أقاوم أكثر. إيدي تعبت وعيوني غوشت من الدموع. سحبني للغرفة وسد الباب صار وراها ينزع بقميصه وكل جسمي يرجف خوف. باوعت على رجلي. لازم تقوين روحچ غسق حتى تطلعين منا بسلامة. أمچ وصتچ تديرين بالچ على نفسچ ولازم تنفذين وصيتها حتى تنام مرتاحة. تقربت منه باوعلي وفتح إيده يضحك.

رفعت رجلي ضربته المنطقة الحساسة بكل قوتي. نزل بالگاع متوجع گبل طلعت من الغرفة صعدت فوگ وقفلت الباب علية. خمس دقايق وأجه يدگ بالباب. ما خلة شي ما سوا لحد الفجر وهو يحاول. ساعة يتوسل ساعة يهدد ويتوعد لحد ما صار الفجر تعب عافني ونزل. بقيت گاعدة وأدعي بداخلي. كل شوية أتخيل يكسر الباب ويطب بس مستحيل يسويها هم الجهال نايمين وهم ينفضح گدام مرته. مدري شلون صار الصبح. سمعت الباب انفتح خفت أنزل لا يطلع هو.

شوية وصار صوت دكتورة جنان بـ أذني تصيح غسق وينچ. ذبيت حجابي على راسي ونزلت أركض. -ها دكتورة الحمد لله على سلامتچ. -الله يسلمچ، شوكت أجه دكتور مؤيد؟! -ليش هو أجه ما أدري چنت نايمة. -ماشي، گعدي الجهال علمود يرحون لدوامهم. -دكتورة لحظة. دارت علية. -نعم. -أني مضطرة أعوفكم، ما قصرتي وياية رحم الله والديچ. بس بعد وفاة أمي بيت جدي رادوني يمهم، والبارحة اتصلوا بخالة أم هناء وبلغوها راح يجون ياخذوني من بيتها.

-لااااا، والله تعودت أني والجهال عليچ مو خوش خبر. -وأني تعودت عليكم بس شسوي مجبورة. -على راحتچ حبيبتي، وأي شي تحتاجين أني موجودة اعتبريني مثل أختچ. -متقصرين، راح أريگ الجهال وأروح بعد ما يطلعون لدوامهم. -ما عدنه حساب مو؟ -لا متصافين. -ماشي الله يسهلچ. -أجمعين. عفتها ورحت أركض. گعدت الجهال ريگتهم وعيني ع الطريق. يمكن نايم ماله صوت لازم أطلع من البيت قبل لا يگعد الحقير. صعدت الغرفتي أركض.

لميت ملابسي وأخذت الفلوس ونزلت. چانت توها طالعة من الحمام رحت أسلم عليها. -دكتورة أني رايحة. -البيت أم هناء موو؟ -أي. -سلمي عليهم. -يوصل إن شاء الله. درت وجهي ورجلي گالت الله. بس وصلت للباب صرت أمشي بركضة. أريد أوصل لبيت أم هناء بسلامة قبل لا يگعد أبليس ويخرب علية. وبعد ما انگطع نفسي وصلت أخيراً. دگيت الباب حيل طلعت خالة بس شفتها شمرت روحي بحضنها أبچي بحرگة. -يا يا شمالچ يمة؟ ما گدرت أجاوبها.

طببتني للبيت وأخذت الغراض من إيدي. راحت گعدت هناء سوت الريوگ وبقت مگابلتني تريدني أسكت حتى تفتهم السالفة ماكو. أخير شي صاحت بية. -بسچ عاد هيدي خن أفهم علتچ شني. -خالة الحقير راد يسوي مثلهم، راد يعتدي علية مقابل سكوته عن حقيقتي. -أنة بنتچ يفخرية، هذا ياهو ولچ وغوشتيني. سولفتلها كل شي صار بالحرف الواحد. بس كملت گامت تلبس بعبايتها جريتها من إيدها وأني أتوسل. -لا خالة الله يخليچ لا.

-لا تكضيني ولچ، خلني أروح أربي الهل ابن الحرام. -خالة يعرف عني كل شي، أنتِ تتخيلين لو يسويها عناد ويروح لأهلي شنو حيكون مصيري؟ أبسط شي ما عندي غيركم، ومؤيد الحقير يعرف هالشي وهيچ راح يوصلون الي بكل سهولة ويذبحوني. صفنت علية وأني أمسح بدموعي. أخير شي شمرت عباتها وگعدت على طرف التخم تفرك براسها وتفكر بالمجهول. گعدت گبالها وهناء سحبت راسي الحضنها. بقينا بحالة صمت وبس شهگتي تنسمع من بين الهدوء الچان مخيم ع المكان.

رفعت راسها باوعتلي وگالت. -ضاگت بيچ أرض الحلة يبنيتي لازم تهجريها. هذا الـ... ميهيد إذا ميسويلة كولبة شگدها. طول ما أنتي هنانه ميهجع ويظل يدگ برجله حتى يخلص منچ گبل لا تخربين حياته. -وين أروح خالة؟ وبچيت. -من أول فكرت بيها، بس كل ضني ترتاحين بشغلچ هنانه، مچنت أعرف يطلع كل هذا من هالناقص. -شنو هي الفكرتي بيها؟ -أخذچ لأهلي بالبصرة، تنزلين دخيلة عد شيخ عشيرتنه والدخيل عدنه أهم من أهل الحوش. باوعتلها وسكتت.

ما عندي كلام أگوله وين ما تصير خلها تصير. هي ظلت ع الغربة. شو أني بيها وبلياها عايشة غريبة وعد غرب بس لازم أطلع من الحلة ما طول سري صار عد مؤيد الكلب. بقت تسولفلي عن أهلها طول اليوم. لليل سمعتها تحچي ويا عمو أبو هناء چان معترض على روحتها بشدة بس ما أعرف شلون قنعته بلأخير. گعدت الفجر صليت وجهزت ملابسي. لگيت هناء تحضر بالريوگ لليل وهي تتوسل بأمها حتى تجي بس ما اقتنعت على أبو شلون تعوفين أبوچ وحده. -صباح الخير.

-صباح النور، يلا تعالي نتريگ ما ظل وكت لازم نطلع. -ليش اقتنعت أمچ تجين ويانة؟ -حتى رجلها حبيتها يلا وافقت. -هههههه، يلا عاد همزين تجين ونس بالطريق. -تعالي نتريگ بعدين نسولف. طلعنه من البيت للكراج. وصلنه لهناك أجرت خالة أم هناء تكسي علمود لنتبهذل وانطلقنه بالسفر. باوعت لمخرج الحلة ونزلت دموعي. مدينتي الما تخيلت بيوم من الأيام راح أفارگها ولو ساعة هسه أني على أعتابها أودعها للأبد. الطريق طويل وميقبل يخلص.

أم هناء گضتها دگ سوالف ويا أبو التكسي عن أيام زمان وهناء تكرز حب وتشرحلي عن البصرة أما أني رايحة بغير عالم. أفكر بمستقبلي المجهول. شراح أشوف هناك أكثر من الشفته هنا؟ وشلون راح أگدر أعيش بمكان مو مكاني ويم ناس مو ناسي؟ وصلنه للبصرة بعد طريق متعب. نزلنه يم مكان غريب متروس زلم عرفت من هناء هذا مضيف الشيخ. صاحت خالة ذبن على وجوهچن ييمة. رفعت الشال غطيت وجهي وأني مستغربة.

تقدمت خالة وأحنه وراها گالت للولد الواگف بالباب أخذلي طريچ أريدن أشوفن الشيخ. طب الولد سمعت صوته. گال شيخنا حرمة بالباب تنشد عليك. رد علي. -ما گالت ياهي وشنهي نشدتها؟ دفعت الباب وطبت. -بت مريدي يشيخ ضاري. هو وهيبته. وگعدته بشموخ وسط المضيف. ما گدر إلا ما يطفر من مكانه أول ما شافها گباله....