رواية وضاقت الأرض بي الفصل العشرون 20 - بقلم لبنى الموسوي

#وضاقت_الأرض_بي

للكاتبة #لبنى_الموسوي

- اسمعيني يبت الناس
اذا موافقة تصيرين شمس تشع بدنياي آنه انطيچ وعد راح اصيرنلچ گمرة تنور عتمة حياتچ

باوعتلة متفاجأة
كل شي خطر ببالي اول ما راد يحچي وياية
بس هذا الموضوع الوحيد الما توقعتة ولا يمكن چنت اتوقعة حتى لو رجع بية الزمن

يعني اني وين وصخر وين !!
اي نعم اعرفة واعرف اهلة ناس والنعم منهم
بس فرق شاسع بين عيشتي وعيشتة وما اتصور راح اگدر اتأقلم ويا ولا بأي شكل من الاشكال

درت وجها عنة ساكتة
ما ادري شلون ارد ولا اعرف شنو المفروض يكون جوابي بعد الأمل الي شفتة بعيونة والطريقة الي طلبني بيها

- راح تظلين ساكتة

- صخر باوع
اني مو قصدي انتقص...

- بسچ لا تكملين
ما اريدن اسمع كلام يغث فكري عدل گبل لا تردين

حچاها وگام من يمي
طلع قصاصة من جيبة وسحب القلم كتب رقمة وانطانيا

- يمتة ما احتاجيتي شي راح تلگيني جارچ
ولون فكرتي عدل وقررتي بعگل آنه موجود وعرضي هو هو ما يتغير ولا ينسحب

- انت وين رايح ؟؟

- الحبيب

- اي نروح سوة لعد

- يلا امشينا

تمشيت ويا واحنة ساكتين
حسيت ضاج وحتى اللهفة الچانت بعيونة طفت بعد ما وصلة جوابي بس والله صعبة

ما اگدر اظلمة وياية واني ادري مراح نرتاح بحياتنا
الفرق بيناتنا عظيم لأن ميجمعنا شي
لا مدينة ولا اهل ولا عادات ولا حتى عقلية

وصلنة الحبيب چان واگف وكأنو دينتظرنا
حسيت علي يباوع الصخر معقولة يدري جاي حتى يتقدملي لأن نظراتة مو طبيعية

صخر.. يلا امشوا خاطر تستلمون نتيجتكم

حبيب.. ما تجي ويانة ؟!!

صخر.. لا ناطركم هنانة

تمشيت قبل حبيب وهو ظل يحچي ويا اخو
شوية وحسيتة صار بصفي گال شلونچ جاوبتة برحمة الله وانت ؟؟

- آنه زين المهم انتِ

- لا ينشغل بالك وياية بعدني عايشة ما متت

- وافقي اعلة صخر شمس
اخوي فرصة تجي مرة بالعمر وما تتعوض
مو لأنة اخوي بس لأنة صخر وهذا الشي كافي اقلها تخلصين من طلابة عمامچ وطمعهم

- وانت شعرفك !!

- مع الأسف اعليچ والله
آنه وياچ عشنة سنين مثل الاخوان وتالي من توگعين بهيچي طلابة تسكتين وما تحچيلي

- مو قصدي والله
بس يعني شتريد تسوي وهم عمامي

- وأن چانوا عمامچ
المفروض منچ تحچين خاطر اساندچ بهيچي ظرف چا الخوان المن ينرادون

- والنعم منك وادري بيك متقصر

- يلا امشينا نستلم النتيجة
وارجع واعيد فكري عدل ولا تضيعين الفرصة من ايدينچ

باوعتلة وسكتت
چان يبتسم بوجهي ويمشي قبلي
رحت ورى استلمنا النتيجة والحمد لله كالعادة ناجحين وبامتياز

رجعنا الصخر
چان گاعد يدخن وضارب صفنة ع الحديقة بحيث حتى ما حس علينة إلا لما وصلنة يمة

صخر.. ها بشروا

حبيب.. الحمد لله خوية ناجحين

صخر.. سباع والله

حچاها وسحب النتيجة من حبيب
باوع الدرجاتة وابتسم چان يجر حبيب نتيجتي وينطيها الة رفع راسة علية وگال مبروك

شمس.. شكراً الله يبارك بيك

صخر.. من يمتة ما زايرة گبور اهلچ

شمس.. ما رحت ابد

صخر.. ليش ؟!!

شمس.. محد يقبل ياخذني

صخر.. تمشين نزورهم هساع

باوعتلة بفرحة
- ياريت والله گلبي متلهف عليهم

صخر.. ناوليني رقم خالتچ خاطر انطيها خبر بروحتنا

شمس.. خو اني اتصل

صخر.. لا آنه احسن

رديت الرقم واحس نفسي طايرة
معقولة راح ازورهم وروحي راح تعانق ارواحهم البريئة الراحت بلا ذنب

انطا صخر اتصال شوية وردت خالتي
- السلام عليكم
شلونچ ام مرتضى وياچ صخر ولد الشيخ ضاري

بالمهلي رحم الله والديچ
لا تخافين بس اريدن استأذن منچ خاطر اخذ شمس تزور اهلها وللعلم حبيب ويانة

ببطن عيني لا توصين حريص
هاي جاري تردينها
ماشي تتدللين وياچ هي

انطاني الجهاز واخذ حبيب بعدوا مسافة
- ها خالة

- ها يمة
صدگ تردين تروحين ويا الشباب تزورين اهلچ

- اي لو سمحتيلي طبعاً

- خالة اخاف عليچ
يعني شگد ما چانوا خوش ناس يظلون غربة والغريب مالة امان بـ هالوكت

- الغربة الدتحچين عنهم
بالنسبة الي احسن من كل اقاربي مع احترامي الچ طبعاً

لتخافين هذولة ولد الشيخ ضاري
وبعدين نسيتي بابا الله يرحمة اول ما دخلت للكلية اختار حبيب من دون الكل علمود يوصي علية بس لأن عندة ثقة بي

- اي ادري بس...

- لتعرضين خالة فدوة
ما عندي غير حل اريد ازور اهلي راح اموت واني مزايرتهم وعمامي الهيبة ملتهين يتعاركون على ورثي محد بيهم گال هالمسكينة تحتاج اهلها ولازم نوديها

- زين يمة لعد ظلي اتصلي بية
مراح ارتاح إلا من اشوفچ واگفة گبالي لتخلين بالي يظل وياچ كافي علية قهر اهلچ

- تتدللين خالة
شو لعد ما سألتي على نتيجتي

- ميحتاج اسأل ادري سباعية ومينخاف عليچ

- احبچ

- واني اموت عليچ يروح خالتچ

سديت الخط منها وتمشيت الصخر
چان داير ظهرة ويسولف ويا حبيب بس صحتة التفت الي ع السريع

- شكراً
ولو خلصنا رصيدك

- فدواتكم يمعودة
هساع شني نمشي لالة

- اي طبعاً

وصلنا للنجف بعد طريق مليان تعب ولهفة
اول ما طبينة للوادي سمعت حبيب سأل صخر حافظ الطريق لو نسيت رد علي لا طبعاً شلون انسى

مشينا مسافة طويلة يلا وصلنة لمقبرة بيت جدي
اني ادري المقبرة جوة بالسرداب لأن اكثر من مرة جاية ويا اهلي نزور قبر جدو وبيبي بس ولا گدرت احفظ الطريق لأن الوادي هوسة وكلش چبير

فتح صخر الباب وطب قبلنة
اول ما نزلت انعصر گلبي وبچيت
قبل شهر هم يشتمون الهوى واليوم نايمين جوة التراب وتاركيني بـ هالدنيا وحدي

اول قبر چان الأبوية
لزمت صورتة بـ ايدي وصرت اناشغ من البچي
ليش عفتني ورحت والله الدنيا ولتني من بعد عينك

ارجع الله يخليك ارجع
عوف كل شي چنت تسوي شغك نشاطك المدني الدنيا الناس بس المهم تظل ويانة وميغتالوك ولد الحرام

بقيت احچي ويا وابچي بالخمس دقايق
وراها رحت القبر امي حضنتة واني اشتم بي
كل هالدنيا بچفة وغيابچ ماما بچفة ثانية والله البنية تموت بدون امها والله

ساعة مرت وروحي حاضنة روحهم
فصلت عن العالم وما ظل شي غير اني وهم وبس

رفعت راسي بعد ما بندت من البچي
صرت اودعهم بچف ايدي واحد بعد الثاني
ابوية امي اخواني الكسروني بروحتهم وخيتي الوحيدة المستحيل تبرد نار گلبي على مصابها

درت وجهي لگيت بس صخر واگف وعيونة دم
مسحت دموعي وصعدت نزل هو قرالهم الفاتحة ورجعلي

- ما گدرت اعوفنچ واطلع
عبن ما يصح تظلين الوحيدچ بـ هالمچان

- زين سويت

- شلونچ هساع ارتاحيتي ان شاء الله

- الحمد لله

- الحمد لله
امشينا نطلع منا كافيچ هالحد

هزيت راسي وطلعت
بس شافني حبيب دخل جوة يمكن قرالهم الفاتحة دقايق وطلع

مشينا مسافة لحد ما وصلنة الأهل الدهينة
تذكرت بابا كلما نجي لهنا واجب يشتريلنا منهم لأن دهينة اهل النجف متجي مثلها دهينة

فجأة صخر گال انطروا هنا
باوعت علي عافنة وراح الواحد منهم اشترى علاگتين كبار كل وحدها بيها كيلوين اذا مو اكثر

اجة باتجاهي انطاني وحدة منهن
رجعت ليورة لا شكراً ما اريد اصلاً ما اشتهي

صخر.. الزمي لا تكدرين خاطري منچ
واتمناچ تاكلين عدل خاطر يرد الدم الوجهچ شوي

شمس.. بس والله...

صخر.. لا تبسبسين الزمي عاد

شمس.. شكراً

صخر.. ولو واجبنا هذا

حبيب.. عودن انطي الخالتچ وياچ
موش تاكليها الوحيدچ وتخلين المرة تتنوع الحلگچ

شمس.. هههههه

حبيب.. واخيراً ضحكتي
عيشي خوية عيشي الحياة مستمرة
اذا اليوم هم باچر احنة وما يدوم بالتالي غير وجه الكريم

شمس.. انا لله وانا اليه راجعون

صخر.. شني رايكم نتغدة تراني جعت كلش

شمس.. لا والله ما اشتهي بس تعبت خلينة نرجع

صخر.. باينتچ بخيلة وما تريدين تعزمينة

شمس.. لا والله مو قصدي
تتدللون اختاروا المكان وغداكم علية

ما حچة شي
بالبداية رحنة زرنا الأمام علي عليه السلام وصلينا قريب الساعة يلا طلعنة من الحضرة

وراها اخذنة صخر للمطعم
هم طلبوا تمن ومن هالسوالف بس اني نزلي صخر مشاوي علمود فقر الدم العندي

خلصنة الأكل گمت غسلت ورجعت لگيتهم ينتظروني
فتحت جنطتي طلعت الفلوس حتى ادفع الحساب ما احس إلا صخر دفعهن من ايدي تطشرن ع الميز

شمس.. هاي ليش ؟!!

صخر.. رجعي فلوسچ للجنطة فشلة بحگنا والله

شمس.. بس احنة اتفقنا العزيمة علية ميصير

حبيب.. جاي نتشاقى وياچ خاطر نغير جو من كل عگلچ تصدگين

شمس.. بس والله..
قاطعني صخر بنترة

صخر.. بس عاد لا تتعبين نفسچ وتتعبينة وياچ
والله حلوة هاي عجايب اخر وكت الزلم گاعدة والنسوان تدفع عيب اعلة الشوارب اذا هيچي تاليها

باوعتلة وسكتت
هم صح هم ولد شيوخ وين يقبلون المرة تدفع چان لازم اعرف بيهم ديتشاقون من أول

رجعنا البغداد وصلوني يم سيارتي
ظلوا يمشون وراية لحد ما وصلت لبيت خالتي
لزمت بيهم يطبون بس گالوا تأخر الوقت يادوب نوصل قبل لا يليل الليل

دخلت للبيت چانت خالتي بالصالة تروح وتجي
بس شافتني اجت تركض وصاحت ليش تأخرتي مو گلبي وگف من الخوف

- خالة مو كل شوية تتصلين بية شنو السالفة

- اي صح بس هم خفت

بست راسها وانطيتها الدهينة
- هاچ هاي من صخر ألف عافية

- لعد وانتِ

- عود عزليلي شوية منها

- لا مو شوية هواية
اكلي متشوفين روحچ شصايرة راح تموتين

- اي تتدللين بس خليني ارتاح هسه

بستها ورحت الغرفتي
بقيت للمغرب نايمة ولو بـ ايدي فلا اگعد حتى اخلص من الواقع الينتظرني

اجت خالتي طبت للغرفة
شغلت الضوة وگالت گومي موزين تنامين المغرب
گمت بملل غسلت وتوضيت وبعد الصلاة ساعدتها شوية بشغل البيت

طول هالوقت واني افكر
شلون ينحل الموضوع ويا عمامي واني ادري الطمع عاميهم ولا يمكن يخلوني بحالي

المشكلة حتى مكان ما عندي
اروح يم عمي الچبير يريد يزوجني الفرات ارجع للثاني قافل على تيسير ورجل خالتي ساكت على اعصابة على ساعة توصل بي يطردني من بيتة ويرتاح

واگفة انظف بالكاونتر حتى التهي شوية دگ جهازي
باوعت عمي احسان ديتصل ما جاوبتة بس من لح بالاتصال اضطريت ارد علي

- نعم

- جاي اخذچ وما اريد اسمع اي اعتراض

- واني ما اريد اجي وياك شلون يعني

- مو بكيفچ لچ
عمامچ موجودين وگاعدة يم الغرب وين صايرة

- بس اني مگاعدة يم الغرب گاعدة يم خالتچ

- ورجلها مو غريب

سكتت چان يگول جهزي روحچ بسرعة
سديت الخط مخنوگة ما عندي غير اتصل على عمي توفيق ع الأقل يجي يتعارك ويا مثل ذيچ المرة والگالي حجة اسكتهم بيها

دگيت علي رد بسرعة
طلبت منة يجي وبقيت ابچي علمود اشد اعصابة اكثر حتى يگدر يوگف بوجه اخو

ويا ما طب رجلي خالتي اندگ الجرس
طلع يشوف منو شوية واجة گال عمچ احسان بالباب
طلبت من خالتي تحاول تخلي رجلها يدخلة حتى نكسب وقت بين ما يجي عمو توفيق

وفعلاً بس طب اندگ الجرس مرة ثانية
دقيقة وطب عمو توفيق يرعد وبلش يتعارك ويا اخو لأن جاي ياخذني من ورى ظهرة

صارت مشكلة اكبر من المرة الفاتت
اكتفيت بالسكوت وظليت واگفة اتفرج عليهم
هذا يصيح تجي وياية وذاك يجاوبة لا وياية مو بكيفك

وبعد ساعة من الصياح والمشاكل
صرخت بكل صوتي ما اجي ويا اي واحد بيكم تسمعوووون

ظلوا صافنين علية بصدمة
راد عمو احسان يسحبني ركض عمو توفيق منعة وهم رجعوا تلازموا بيناتهم

اخير شي راحوا
بس عمو احسان قبل لا يطلع هددني
يومين ويجي ياخذني بدون اتصال وصاح رجال اليگدر يمنعني ساعتها

ما اهتميت الكلامة
اعرف عمو توفيق مراح يسكت الة
خليهم هيچ يتمالخون بيناتهم لحد ما اشوف وين تصفى بالاخير

طبعاً هذا چان حد تفكيري
بس للاسف الي صار خربط كل موازيني لمن طلب رجل خالتي اطلع من بيتهم

- شوفي عمي
اني رجال چبير وصحتي على گدي
يعني مو حمل المشاكل فـ ياريت من يجون عمامچ بعد يومين ترحيهن وياهم

باوعتلة والدمعة بطرف عيني
حالي صار هنا مثل الغريق الچان مچلب بگشاية وفجأة سحبوها من ايدة وگالولة يلا روح اغرگ

عفتهم ورجعت الغرفتي
الدنيا من تحارب شخص تذب روحها ويا لحد ما تنهي للأخير

شگد اني قوية
وابوية چان دوم يگول شمس بت ابوها وماكو بشر بالدنيا يگدر يكسرها بس هنا حسيت بروحي صدگ انكسرت

دفنت راسي بالمخدة وصرت ابچي من گلبي
يا الهي شنو حكمتك لمن اخذت كل اهلي وعفتني وحيدة شيصير لو ماخذني وياهم ومخلصني من هالعيشة

بهاي الاثناء طبت علية خالتي
شافتني ابچي ركضت سحبتني الحضنها وهي تگول اسم الله عليچ يمة اسم الله حبيبتي

- خالة والله تعبت
حچيتها وشهگت بالبچي

- سودة علية بنيتي
معليچ بكلام رجلي اذا طلعتي من هذا البيت اطلع قبلچ والله العظيم

- لا خالة شنو هالحچي
تردين تخربين بيتچ بعد هالعمر بسببي

- بيتي يخرب ولا اتخلى عنچ وانتِ مالچ غيري بهالدنيا

- ميخالف اول وتالي تنحل سالفتي لتفكرين بية

- شلون ما افكر !!
ولچ الليل ما اگدر انامة واني احاول الگالچ حل يخلصچ من هالعالم الماترحم

- خالة اليوم صار وياية شي ورايدة اسولف الچ

- خير ان شاء الله

- صخر ابن الشيخ ضاري طلب ايدي للزواج

- والله صدگ تحچين ؟!!

- اي شبيچ شو فرحتي

- يا شلون ترديني ما افرح
هاي معجزة من رب العالمين دزها الچ وانتِ گاعدة هنا تبچين

- شلون يعني ؟!
خالة افهم من كلامچ تردين اوافق علي !!

- خو ما رفضتي يمعزاية

- لا ردت ارفض بس هو ما سمحلي وگال فكري زين

- اي رحمتك يارب
لچ لتصيرين ثولة وين تلگين فرصة مثل هاي بعد

- يعني انتِ تشوفين صخر فرصة !!
شنو نسيتي الفوارق البيني وبينة شلون اوافق بس فهميني

- وشنو هالفوارق بلا
هو ابن ريف وانتِ بت مدينة ؟؟
هو ابن شيخ وانتِ بت دكتور ؟؟
هو عندة اهل يسدون عين الشمس وانتِ وحيدة ؟؟

غير هذني اكو بعد
شوفي لتصفنين اريدچ تناقشيني واليوم يا اقنعچ يا تقنعيني ما بيها مجال

- لا ماكو هو اني خايفة من بيئتة

- عوفچ من بيئتة
هو شخصياً عندچ اعتراض علي

- لا
صخر يظل ابن شيوخ يعني مستحيل احصل شخص بأخلاقة وادبة

- مو بس اخلاقة
نسيتي هو شبعان وعينة متروسة لأن ابن عز
يعني مستحيل يطمع بيچ مثل غيرة وهاي اهم نقطة

وبعد الولد مثقف
خريج هندسة نفط مو جاهل علمود تخافين على مستقبلچ ويا

وشكلة هم مرتب
احسن من شباب هالوكت المخربطين الما تميزي اذا چان مرة لو رجال من خلقتة المگلوبة

- صح خالة بس والله مداقتنع
شيوديني للبصرة وشلون اعيش ويا عائلة چبيرة اخاف ما اگدر اتأقلم وياهم

- ليش يمة بالعكس
يعوضونچ عن وحدتچ ويصيرولچ اهل
وحسب ما سمعت من امچ هم خوش ناس يعني مينخاف منهم

مع ذالك اذا هالگد خايفة
اطلبي منة يغزلچ حتى ترتاحين من هالنقطة

- لا ما اگدر
هسه شيگول علية من اولها تريد تفرقني عن اهلي

- لعد اسكتي
اذا لا هيچ قابلة ولا هيچ قابلة حيرتيني والله

- تعبت يربي تعبت
حچيتها وضربت على راسي حيل

- يمة جاوبيني
فرات الأرعن المامخلي حرام ما مسوي ؟
لو تيسير الما يريدچ ؟
لو صخر ابن الاصول !!
منو انسب واحد بيناتهم تگدرين تأمنين على نفسچ ويا

- رغم كل شي طبعاً صخر احسنهم

- لعد خلاص
وافقي علي لأن ما عندچ غير هالخيارات يا هو يا فرات يا تيسير

وافقي يمة وروحي للبصرة
يجوز تلگين هناك الأمان الخسرتي ببغداد ويا ناس يخافون الله بيچ ومينهشون لحمچ بطمعهم

- زين خالة هو ليش خطبني
احنة ما متشاوفين غير كم مرة بالجامعة من چان يجي ويا اخو

شلون هيچ فجأة يخطبني
معقولة عرف بالقصة وحب يساعدني ؟!!

- يجوز انعجب بيچ عادي
ويمكن حبيب اخو حاچي الة هواي عنچ لحد ما دخلچ براسة واحتمال صدگ عرف القصة وحب يساعدچ

- يجوز

- انتِ وحبيب خو ما...

- لا خالة لا
شنو السالفة حبيب مثل اخوية وهو هم معتبرني اختة

بعدين هو بنفسة اليوم طلب مني اوافق على صخر
اصلاً لو حبيب الطلبني مو صخر مستحيل اوافق لأن معتبرتة مثل اركان وكيان الله يرحمهم

- اي اذا هيچ نعمة

- هسه شسوي گوليلي

- ردي موافقتچ الة
خلي يجيب اهلة ويستعجل هم شيوخ وعمامچ مراح يكونو گدهم

كافي اخوهم القاضي
وربچ إلا يخليهم يتراجفون بس يطب عتبة بابهم وعود ساعتها خلي يفيد طمعهم

- راح اتوضى واصلي ركعتين الوجه لله اول
اذا گلبي برد وارتاحيت اتصل بس اذا ظليت هيچ خايفة ومخنوگة مستحيل اقبل

- زين تسوين يمة ماكو احسن من رب العالمين

حچتها وعافتني وطلعت
اني هم گمت توضيت وصليت بس شنو انهاريت ع السجادة ابچي واترجى رب العالمين يخلصني من هالحيرة ويرشدني للطريق الصحيح

بعد نص ساعة گمت من السجادة
سبحان الله فجأة هدأت حتى نفسي انفتح بالوقت الچنت گوة اسحب الهوى الصدري

رحت جبت جنطتي
طلعت رقم صخر وصفنت علي
يا رب كون ما اندم على قراري هذا بيوم من الأيام

دگيت الرقم وانطيت اتصال
خلصت المكالمة وهو ما راد اني هم گلت احسن هيچ هيچ اني مترددة

بعدني ما حطيت الموبايل ع الميز رجع دگ
باوعت للجهاز وكلي ارجف خوف مو طبيعي من المجهول والأهم خوفي من الحاضر

فتحت الخط بس ما حچيت
صاح الو نعم تفضلوا
جاوبت صخر مو

- اي نعم ياهي وياي ؟؟

- اني شمس

- هلا والله
شكيت انتِ من صوتچ لكت حبيت اتأكد

- صخر اني موافقة

بس حچيتها سكت
اني هم سكتت شوية وگال عودن شعجب غيرتي رايج بالعجل ؟!

- ماكو سبب
فكرت هواي وشفتك فرصة متتعوض بس طبعاً اني هم ما اتعوض حتى لتنغر

- هههههه
چا بوية آنه گايل غير هذا
اكيدن ما تتعوضين وإلا ما اختارچ دون عن كل البنيات

- رحم الله والديك

- ورحم الله هلچ
زين چا انطريني يومين زمان لبين ما يرجع إسحاق من بغداد واتصل اعليچ

- صخر عمامي...

- اعرف شمس
لا تشيلين هم طول ما انتِ شاريتني ما ابيعچ لو اعلة گص الرگبة

اصبري اعلية يومين موش اكثر
عبن ما بية اتحرك بلاية إسحاق بس يوصل للبصرة
ثاني يوم تلگينة مزروعين بداركم

- ماشي انتظرك

- محتاجة شي گبل لا اروحن

- لا سلامتك
وشكراً على كل شي سويتة وياية اليوم

- لا تشكريني اعلة شي نابع من گلبي
يلا بوية اخذي راحتچ

- الله وياك

سديت الخط منة مرتاحة نوعاً ما
ذبيت كل شي ورى رب العالمين وحاشا لله ان يخيب ظن عبدة بي

غسق.. مرت 3 إيام هادئة
باليوم الرابع اتصل إسحاق بريحان وگالها باچر من الصبح جاي للبصرة

لليل صعدت نظفت الغرفة وبدلت الچراچف
حتى من يجي هو الصبح كل شي يكون جاهز وينام على راحتة

ثاني يوم فزيت على صوت الباب
فتحت عيني لگيت إسحاق ديطب للغرفة جريت الروب لبستة وگمت ع السريع

- الحمد لله على سلامتك

- الله يسلمچ
جهزيلي الملابس اريدن اسبح

- اي من عيوني

جهزت ملابسة ونزلت للمطبخ
سويتلة ريوگ وصعدت چان هستوة طالع من الحمام بس تريگ طفى الضوة ونام

للعصر چنت وياهم بالصالة حسيت اكو شي غريب
صخر وحبيب گاعدين يم إسحاق يتوشوشون بصوت ناصي وراها گاموا للمضيف

بلليل تعشوا وگعدوا يتعللون
فجأة الشيخ گال صخر ناوي يتزوج جهزوا ارواحتكم

الكل انصدم بـ هالقرار المفاجئ
صاحت الحجية وياهي هاي الولدك حاط عينة اعليها
جاوبها بت دكتور احمد الله يرحمة

- شني خلصن النسوان يعني

صخر.. يمة الله يخليچ
البت ما بيها عيب لا تبلشيلنا بسالفة صفح

- انت اعرف اني شلي غرض

الشيخ ضاري.. جهزوا ارواحتكم
باچر ماشين لبغداد زلم ونسوان خاطر نطلبها من عمامها

الحجية هيلة.. شني سالفتكم عليش هالعجلة
حتى تراب اهلها لساعة ما نشف

الشيخ ضاري.. البت ولد عمها رايدينها
يظل ابنچ ينطر اربعين اهلها علما تروح من ايدة

الحجية هيلة.. وياهي تريد اخذها وياي من اروحن

الشيخ ضاري.. اختي سكينة وريحان وغسق

نجيبة.. چا وآنه عمي
تدز الصغار وتعوفنة صايرة دايرة

الشيخ ضاري.. من احچي حچاية مامش بشر يتجرأ يجادلني اعليها سااااامعة

بس صرخ بيها سكتت
كلهم ضاجوا لأن يردون يجون ويانة
واني هم استغربت قرارة بروحتي بالتحديد ويا ريحان من دون باقي البنات

صعدت فوگ نومت ود ورجعت الغرفتي
شوية وطب إسحاق وراية بالعادة من يكون موجود انام بملابس البيت بس اغيرهن علمود ريحة الطبخ

چنت توني طالعة من الحمام
راح تمدد ع الچرباية اني هم نشفت شعري وطفيت الضوة وتمددت بصفة

درت ظهري علي وگتلة تصبح على خير
ما احس إلا سحبني الحضنة من الصدمة جمدت بمكاني خايفة

ثبت راسة على راسي وصار يلعب بشعري
سحبني الجسمة حيل وايدة الثانية تنزل وتصعد على بطني بهدوء لدرجة صرت ما احس بدگات گلبي بعد

ما عرفت افسر الديصير
لا بية اظل بحضنة ولا بية ارفضة واني ادري بنفسي كلش زين مو گد إسحاق وعصبيتة

بقيت شادة على روحي ومغمضة حيل
فجأة باس رگبتي بهدوء وگال تصبحين على خير
ما رديت علي

عبالي راح يبعد شو هذا ظل حاضني
غفيت وگعدت واني بحضنة بس فتحت عيني فز گبل

- صباح الخير

- هلا بوية صباح النور
گومي جهزي نفسچ خاطر نتحرك

- ما عندي شي بس انزل اسوي ريوگ

عفتة ونزلت جوة جهزت الريوگ ويا البنات
وراها حضرت روحي وبدلت الود رغم چنت شايلتها هم شلون راح تتحمل كل هالمسافة بس ما عندي غير حل ما أمن اعوفها يم احد

اخذتها هي والغراض ونزلت
چان إسحاق واگف بالدرج بس شافها بـ ايدي گال عليش ما تركتيها يم نسوان عمومتها جاوبتة لا اخذها احسن

طلعنة كلمن بسيارتة
الحجية وعمة سكينة ويا الشيخ وريحان صعدت بسيارة صخر هي وحبيب واني ويا إسحاق وباقي الولد بسياراتهم

الطريق طويل وود صارت حلاوة من التعب
شايلتة وادگ على ظهرها بس هي مستمرة تبچي اخير شي وگف إسحاق السيارة وسحبها مني

حطها بحضنه وساق
احس بي ممسيطر بس عاند ميقبل يرجعها وهي هم كيفت ع الستيرن وبطلت بچي

وصلنة لبيت عم البنية حسب ما فهمت
طبوا الزلم للأستقبال واحنة گعدنة بالصالة شوية واجت البنية

چانت شايلة شعرها ليفوگ ولابسة اسود
حتى قطرة مكياج ما حاطة ورغم هي حلوة بس التعب مبين على ملامحها

سلمت علينة وگعدت بصف خالتها
شوية والحجية گالت يمة الله يرحم هلچ بواسع رحمتة بس ما يصح تلبسين اسود والعالم جاية تطلب يدچ

ردت خالتها
اي والله اني هم گلتلها بس عاندت
اخر شي سكتتهم البنية من گالت الهم بالعقد اذبة ان شاء الله

بقوا يحچون بالتفاصيل واني وريحان صافنين عليها
الانكسار ذاك وينة واضح بعيونها وحقها لأن جربت قبلها شنو يصير بالبنية من تفقد اهلها

شوية وجابولنة كيك وببسي
اكلت شويونة لأن خالتها شكلتني الذمة وراها عفتهم وگمت مسافة حتى اذب ود من حضني نامت

فوگ الساعة تقريباً
گاعدين يسولفون بالحاضر والغايب منسمع إلا صوت واحد يصرخ وكأنو روحة دتطلع بالضبط نفس الصرخات السمعتهن من شجن يوم الاحترگت
ركزت بي زين لا يربي هذا چنة صوت صخر !!!!....

يتبع

لتنسوون ⭐⭐⭐⭐⭐