رواية وضاقت الأرض بي الفصل الحادي والستون 61 - بقلم لبنى الموسوي

#وضاقت_الأرض_بي

للكاتبة #لبنى_الموسوي

توهم مخلصين الأكل اندگ الباب حيل
گام صهيب يشوف منو
شوي وسمعنا صوت اربع أطلاقات نارية وحدة ورى الثانية گبل الولد گمزوا من مكانهم

صرخت شمس من يمها
كلهم ركضولها بخوف حامل مو زين عليها الهبطة گبل عمة حطت شكر بحلگها

بعدني اباوع عليهم بقلق
رجع الرمي تكرر مرة ثانية تسودنت بمكاني
ما اعرف احير بوجعي لو بشمس
لو اخاف على صهيب الما اعرف شجاي يصير ويا برة

شمس.. ما ادري شصار بية من سمعت صوت الرمي
لأول مرة گلبي هيچ يصير ضعيف بحيث حسيتة راد يوگف من الخوف

فجأة رجع الرمي تكرر
نغزني صدري بشكل ما ادري ليش حسيت صخر بي شي

گمت ع السريع اركض
وصلت يم الباب واسمع الولد كلها تصيح بأسمة من الرعب الحسيت بي طلعت حافية

بداية الباب اكو درج وبي نزلة
اصلاً نسيتة
حتى ما باوعت للگاع ركضت بكل سرعتي ما احس إلا وگعت على راسي

غسق.. من ركضت شمس رحت وراها
اباوع عليها تمشي بلا وعي خصوصاً من سمعت اسم صخر على لسان اخوتة

ما باوعت الطريقها
الدرج عالي ركضت دتنزل عبالك دتنتحر ما داست ع الباية لا رجلها راحت بالهوى

وگعت وگعة كل عمري ما انساها
بحيث من شدتها گلت شمس ماتت خلاص
لأن المسافة عالية والضربة صارت على راسها عدل

نزلت اركض اني هم چان وگعت إلا شوية
شلتها ماكو فاقدة الوعي
داحرها انتبهت على ملابسها مدمرات دم صحت بكل صوتي عمممممة

- شمس گومي فدوووة گومي

صبيحة.. يا ياااا راحت الفرخة يرررربي

غسق.. عمة ساعديها
فدووة ساعديها هم وگعت على راسها وهم دتنزززف

رؤى.. يربي هساع عمامي كلياتهم برة ياهو اليجينا

امل.. ولچن شني نسوي
اسمعن صياحهم شعلوة بس لا واحد من عدهم انطگ

غسق.. نجييييبة ابنچ وووووين
اي ولد دزنة يصيح واحد من الزلم البنية راح تمووت

امل.. يمة محمد
اطلع صيح الجدك ابوك اي واحد من عمامك بالعجل

راح ابنها يركض
شوية وطب إلياس دشداشتة كلها دم
من شافتة مرتة بـ هالمنظر گبل ركضت علي شمالك إلياس شني هالدم هذا

- صوبوا صخر ولد الحرام

الحجية هيلة.. صخااام بوجهك حميد وليدي ولكم شمااالة

غسق.. عزززة بعيني ان شاء الله عززززة

ثناء.. إلياس عفية مرتة وگعت وحامل ساعدها

من الخبصة مچان منتبه على شمس
بس حچت ثناء
باوع للگاع وركض عليها هاي شصابها ولكم وگعت لو شني

غسق.. اي اي
وگعت على راسها وگعة قوية ودتنزف هم فدوووووة تصرررف

حچيتها واني اناشغ
گبل شالها بحضنة وصاح بكل صوتة
وحدة من عدچن تلبس وتجي وياية بالعجججججل

غسق.. اني اني اجي

ركضت جوة سحبت عباية من الزاوية وطلعت
الشارع متروس زلم
بس ولا واحد من الولد موجودين حتى الشيخ مختفي

باوعت داير مدايري وين اروح هسه
فجأة سيارة دگت هورن بشكل قوي درت وجهي هذا إلياس گبل اشرلي تعالي

رحت اركض صعدت ورى يم شمس
رفعت راسها
ردت اخلي بحضني حسيت ايدي انترست دم

باوعت عليها ارجف
- إليااااس راسها دينزف ددددم فدوووة ااااستعجل

- خوية بس لا تدوهنيني انطري ااانطري

ما اعرف على شنو ديدور
صار عصبي رگع الستيرن وصاح هساع وكتك اااانت

التفت علية فجأة
- تلفونچ وياچ لو ما جايبتة

ارتبكت گتلة لا مجايبتة
رجع يدور ويستغفر اخر شي طلع الموبايل من بين الكشنات واگع وما حاس علي

اتصل على إسحاق
- ها ميزان بشرني خوية وصلتوا للمستشفى لالة

اي الحمد لله
آنه ماخذ حرمتة للمستشفى عبن طاحت اعلة راسها

غسق.. خوية اريد احچي ويا عفية

إلياس.. انطر إسحاق حرمتك تريدك

حچاها وانطاني الموبايل
بس سمعت صوتة رجعت ابچي إسحاق شبي صخرر

- تصاوب بوية بس ان شاء الله هينة

- ومرتة هم وگعت من الدرج
وگعتها قوية إسحاق ادعيلها تگوم بالسلامة وميصير الها شي

- ناوليني إلياس بالعجل

بس حچاها مديت الموبايل تفضل
اخذة من ايدي ها خوية
اي اكيدن لا تاكل هم بس اروحنلك فدوة ظل وياي اعلة اتصال دايماً خاطر تطمني اعلة اخيك

ان شاء الله تامر امر
سد الخط وظل يسوق بكل سرعتة لحد ما وصلنا للمستشفى

نزل يركض جاب سدية واجة هو والممرضات
اخذوها من حضني ع السريع اباوع ملابسي انترست دم لعد شگد نزفت المسكينة

دخلنا وراها
اني طبيت يم باب الصالة وإلياس ظل ينتظر برة

سندت نفسي ع الحايط ابچي
خطية شلون حظ عليهم هذولة الأثنين
صخر دوم يتصوب لو ينضرب وهي كلما تحبل شهر شهرين وتخسر طفلها

يااا رب ان شاء الله هالمرة متخسرة
ويا رب راسها ما بي شي وتگوم بألف سلامة
ولمن تفتح عينها وتسألني على رجلها عندي خبر منة حتى اطمنها بي

ظليت يم الباب ألوب
رايحين جايين محد بيهم يحچي كلمة تريحني
مرت اكثر من ساعة طلعت الممرضة اشرتلي رحتلها ركض

- ها عفية بشرية

- وچ عيني هاي شمسوين بيها
ياهو الطاگها هيچ هم راسها مفتوح وهم النزف ما جاي يوگف ابد

- وگعت من الدرج والله وگعت
بس عفية شسويتوا طمنيني الله يطمن گلبچ دنيا واخرة

- خيطوا راسها خطية وداروا الها بطل دم

وهسه منتظرين الدكتورة النسائية
تجي تكشف على حملها ولو ما اظن يعيش على هذا النزف الفضيع

- لا عفية لا تگوووليها
زين فدوة راسها خو ما بي شي شافوا لو گبل خيطوا

- لا مابي الحمد لله
لأن النزف طلع ليبرة لو ما نازفة چان صار عدها نزف داخلي على هالوگعة

- يربي هسه اني بيمن احير
براسها لو بحملها لو برجلها الما اعرف شصاير بي

انتبهت عليها صافنة علية
مسحت دموعي وگلتلها انتظري هسه اجيچ لتروحين

طلعت اركض إلياس يفتر رايح جاي بقلق
بس شافني اجة بـ أتجاهي ع السريع ها خوية شني الوضع يمكم

- الطفل ممبين وضعة بس راسها خيطوا
إلياس فدوة اريد فلوس انطيهن للمرضة حتى تهتم بيها لأن....

بعدني ممكملة كلامي قاطعني
بسچ خيتي
طلع محفظتة مدري شگد انطاني
گتلة هواي گالة لا تعترضين ودشي ليها لا تخلينها الوحيدها

رجعت ركض كل شوية اريد اوگع
لگيت الممرضة بعدها بمكانها شلت عشر ألاف انطيتها

- هاچ بس اهتمي بيها
والچ علية مثلهن بس تگوم بالسلامة والله العظيم

- لا حبيبتي رجعهين هذا واجبنا

- ميخالف اخذيهن دفع بلاء
بس ادعيلها فدوة دعوة الغريب مستجابة

- الله يگومها الكم بالسلامة

حچتها ورجعت للصالة
نص ساعة وطلعت وجها ميبشر بخير لحد ما وصلت يمي اني لساني وگع من الأستغفار

- ها بشري

- كشفت عليها الدكتورة
الطفل بالسونار ما بي نبض ظل السونار الداخلي هو الأمل الأخير الها ادعيلها

- لا يررربي
شهرين صارلها الفرحة ما سايعتها بحملها اذا صارلة شي تتخبل

- الحمد لله على كل حال
ادعيلها وخلي الباقي على رب العالمين هو ارحم بيها مني ومنچ

- ونعم بالله ونعم بالله

رجعت للصالة واني گلبي يلوب
شوية وطلعت
گالت للأسف الطفل ميت حتى بالسونار الداخلي

ما گدرت الزم نفسي
بچيت وكأن قطعة من روحي راحت حتى الممرضة ظلت صافنة علية

ما ادري شنو السبب
يمكن لأن شمس وهناء وريحان
صارن بالنسبة الية اهل واكثر بحيث اليوجعهن يوجعني قبلهن

شوية وطبيت وياها
چانت شمس بين الصاحية والفاقدة صح مغمضة بس تون بوضوح

لزمت ايدها وبست راسها مرتين
وگعت دمعتي على حاجبها فتحت عيونها باوعتلي

- غسق ؟!!

- يعمري انتِ
الحمد لله على سلامتچ گلبي وگف من الخوف عليچ

- شجابني لهنا

- ارتاحي هسه بعدين نسولف

گبل حطت ايدها على بطنها
- ابني ابني صارلة شي اااحچي غسق فدووة ااحچي

- گولي يا الله

- لااااااااااا
عفية لتگولين ابني راااح اموت والله امووووت

رادت تگوم وجعها راسها
صرخت بصوت عالي بعدها تبچي باوعتلي
صخر اي صح صخر چانوا ديصيحون بأسمة بي شي اااحچي

- لا مابي لتخافين

- ووينة اريدة جيبي لهنا

گبل بچيت
هي هم خبصت الدنيا بالصياح
متعرف تبچي على ابنها لو تصرخ على رجلها لو من وجع الخياط التارس راسها

المستشفى كلها التمت على صوتها
بالگوة اجت الدكتورة ضربتها ابرة هدتها بيها شوية ورجعت الممرضة بيدها العلاج

- هذا كتبولچ علي اوقاتة
بس هاي النوعية للأسف ممتوفرة هنا
لازم تجيبوا الها من برة وتاخذ من عندة حباية اول متطلع منا

اذا نزل الطفل خير على خير
ما نزل لليل تاخذ الثانية
اقصى حد الباچر الصبح بعدها لازم تراجع المستشفى اذا ما طرحت

- اووي يعني بعدة الطفل ما نازل

- لا مو گتلچ ميت ببطنها

حچتها وراحت
من البچي حتى ما اگدر اتحرك من مكاني
ما اعرف هالنزف القوي سببه الهبطة لو الوگعة القوية لو اثنينهن التمن بوقت واحد

جريت نفس ومسحت دموعي
تحركي غسق مو وكت ضعف البنية محتاجتچ يمها كافي بچي

طلعت برة إلياس ديحچي بالتلفون
تقربت منة گال اي بوية تامر
عرفتة ديحچي ويا الشيخ انتظرتة يخلص بس سد الخط التفت علية

- ها خوية بشري

- الطفل مات ببطنها

- لا اله إلا الله

- عفية ابو مريم
هذا العلاج لازم تجيبة هسه لأن ممتوفر بالمستشفى

- اي من عيوني
بس انتن شلون عادي تظلن الوحيدچن

- اي عادي شكو علينة خوية

بس حچيتها راح
شوية ورجع اخذت العلاج منة وطبيت
لگيت شمس صاحية والدموع تجري بلا صوت تقربت منها عصرت ايدها حيل

- قوي نفسچ شمس القوية
ما عرفتچ هيچ طول عمري اشوفچ اقوى وحدة بينة شجاچ هسه

باوعتلي بدون متجاوب
مسحت دموعها وگومتها فتحت الحباية شربتهيا بلا ما اگولها هاي شنو حتى لتتأذة اكثر

اول ساعتين ماكو شي صار
مرات تنام ومرات تفز تبچي وتصرخ بكل صوتها لحد ما يجن الممرضات يهدأنها

يمكن الهبطة مأثرة عليها
ومنا خطية خسرت ابنها ورجلها بالمستشفى هم الله يساعدها شتتحمل وبشنو تصبر نفسها

بعد ساعتين چانت نايمة فزت تصيح
تقربت منها عبالي هم رجعت الحالة اجتها
بس من لزمت بطنها وظلت تصرخ عرفت الطفل راح يوگع

شمس.. وجع ياكل بروحي اكل احتاريت شلون اتخلص منة
مگاعد اعرف شنو سببة لأن الحالة الأني بيها حالياً مستحيل تسمحلي افكر بعقل

بعدني لازمة بطني واتلوى
سمعت الممرضة گالت الغسق ها اجتها الطلوگة رفعت راسي صافنة بوجهن ودموعي تجري بحرگة

- مات ببطني يعني ما طرحت ؟!!

- شمس فدوة لتسوين بروحچ هيچ

- ااااااحچي غسق
ماااااات ببطني موووووو

ظليت اصرخ من وجع گلبي قبل بطني
ساعة واني الوب اوجاع متنوصف تشبه الموت فجأة زادت بشكل فضيع

لزمت ايد غسق وصرخت
صرخة طالعة من اعماق گلبي المهزوم
تعبر عن كم القهر الاجتاح كل جوارحي بهاللحظات الصعبة

نازعت هالألم بكل ما بية
بقيت اقاوم واضعف وارجع اقاوم واضعف
لحد ما انتزعت روحي مني و وگع ابني گدام عيني

بعدت نظري عنة وصرخت
- غسق خليهم يشيلوا ما اريد اشوفة فدوووة

حچيتها وشهگت بقوة
گبل اجت الممرضة اخذتة من گدامي وركضت عسل علية غسلتلي ورجعتني للسرير

مغمضة عيني وبس الأفكار السلبية براسي
سمعت حس الدكتورة يمي فتحت لگيتها دتحچي ويا غسق شوية واخذتلي سونار

- ها دكتورة بشري

- لا الحمد لله رحمها نظيف
اكو مخلفات بسيطة بس توگع ان شاء الله خلال هذا الأسبوع اما الطفل نازل بالكامل

- زين دكتورة شوكت نگدر نطلع

- هم خيطوا راسها مو

- اي نعم

- خليهم يجون يفحصون الخياط
اذا يشوفون كل شي تمام ساعتها تگدرون تطلعون

- مشكورة دكتورة

بس حچيتها گامت
اني هماتين رحت للممرضة لأن هي الوحيدة التگدر تساعدني

بلغتها بكلام الدكتورة
شوية واجت دكتورة ثانية كشفت عليها وگالت ماكو شي ان شاء الله تگدرون تطلعون

عدلتلها الحجاب وعيوني تتنقل عليها
مثل الصنم متتحرك ابد إلا اني احركها حتى رجلها ما سألت عنة بعد

حچيت ويا الممرضة
جابتلي كرسي متحرك وساعدتني اگعدها علي
بالگوة قبلت تاخذ مني العشرة وتستاهلها والله لأن هواي تعبت ويانة اليوم

طلعت برة إلياس واگف يدخن
بس شافنة طفى الجكارة واجة ع السريع اخذها مني

- الحمد لله اعلة السلامة خوية

ما جاوبتة
باوعلي گبل هزيتله راسي بالصبر
حتى يفتهم نفسيتها تعبانة ومو بحالة تسمحلها تنتبه وتجامل

وصلنا للسيارة فتح الباب وقرب الكرسي عليها
- تگدرين تصعدين لو تحتاجين اعيننچ

اشرتلة اني اساعدها
سندتها وبعد الكرسي منها بالگوة گدرت تصعد مالها طاقة حتى توگف على رجلها

حرك السيارة مشينا مسافة وهي مغمضة
راسها على حضني حسيت ايدي تبللت من دموعها مسحت على وجها بقهر

بس لمستها گبل فتحت
- صخر وين
التفتت على إلياس صخر شصاير ويا عفية جاوبني

- ماكو شي خوية
توني داگ اعليهم شالوا الچيلة من جسمة وصحى الحمد لله

- شنو شلون تصوب

غسق.. حچتها وگامت تناشغ
باوعت على إلياس بالمرايا واشرت على حلگي حتى يسكت هو هم هز راسة افتهم

من شافتة ما جاوب سكتت
بس دموعها ما وگفت ولا لحظة لحد ما وصلنا للبيت

تلگونا من الباب وحال الضيم حالهم
شاورت عمة صبيحة خليهم يسكتون عفية لأن شمس تعبانة هم خيطوا راسها وهم ابنها خسرتة

بس حچيتها بعدتهم عن الطريق
اخذناها اني وثناء للغرفة بس مددناها ع الچرباية عفتهم وطلعت للصالة تلگتني عمة

- شلون خسرت الفرخ ولچ

- وگعت عمة ما شفتيها
ومنا اكلتلها هبطة من هاي التمام الله يساعدها

- ياربي شني هاليوم الأگشر ما ناوي يعدي اعلة خير

- شنو شصار ما عرفتوا

- لالة يمة
كل شي ما عرفنة غير صخر تصوب عليش واليمتة وشلون محد يدري

- إلياس وين خلي نسألة هو الوحيد الراح يجاوبنا

- ما دش وياچ ما اعرف الوين مشى

- لعد خلي اصعد ابدل واجيكم

حچيتها وركضت الغرفتي
سبحت شلون مچان لأن ريحة الدم لعبت نفسي
ونزلت بدون تنشيف يا دوب لحگت اخلي الحجاب على راسي

بعدني بالدرج طبوا الولد وصخر بـ ايدهم
اباوع علي حالتة اتعس من مرتة بمليون مرة خطية لعد شگد نازف

ما ودوا الغرفتة اخذوا للمضيف
رحت وراهم حالي حال الكل شفتهم دينوموا بس وجوههم متتفسر

شوية وگام الشيخ من يمهم
طلع برة بعدة بأول الممر
چان اكو تحفية چبيرة دفرها برجلة وگعت تطشرت على كبر الگاع

على صوتها طلعوا الولد يركضون
فجأة التفت عليهم وصاح بكل صوتة
ما اريدن اسمع اي نفسس من اااي ااادمي بـ هالدااار فاهمين

إسحاق.. تامر بوية بس هدي حالك

إلياس.. صبرك إسحاق
شني يعني بوية عليش تريدنا نسكت
ما تنوعت العملتهم العايبة بحگ صهيب وكملوها ويا صخر

الشيخ ضاري.. اخووووك الغلطاااان
موش غلطان وبس لا والله
الغلط راكبة من جدمة لراسة فمالكم حگ تتنفسوون بعد

صهيب.. بشني غلطاااان هاااا گلي بشني

وحگ نحر الحسين
لون ما ندمتهم اعلة الچيلة الزرعوها ببطن اخوي ما اطلع آنه صهيب بس خلهم ينطرون اعلية

الشيخ ضاري.. لساعة يحچي
لكم لساعة الة عيييين ويحچي جاي تتنوعون لو لااااا

إسحاق.. شلون تاليتها وياك صهيييب

صهيب.. صهيييب صهيبيب صهيييب
بسكم لعبتوها الروحي
لون بيكم حظ لا تسكتون عن دم ابنكم او اعلة الأقل لا تمنعوني اخذ حگة منهم

الشيخ ضاري.. تاخذونة من وجهي بالعجل
لو ما يصير خييييير الليلة وحگ رب السماوات

بس حچاها الشيخ سحبة حنظل برة
هو وبالحديقة نسمع صوتة يصيح ويغلط عليمن ما ادري بحيث صوتة ترس البيت

اباوع للشيخ يروح ويجي بالصالة
إلياس ساند راسة ع البوفية وإسحاق گاعد ع القنفة ويهز رجلة بتوتر

شوية وگمز الشيخ من يمي اخترعت
راد يطلع گام إسحاق ع السريع وگف بطريقة يحاول يمنعة

- بوية هدي عوفك منة خلة يولي

- لكككك شهددددي
اسمع اسمع ما خلة چلمة ما حچاها عينة عين الـ×××

إلياس.. حگة بوية حگة
ما سمعت الحچي الشمروا اعلي ياهو بينا يتحمل هالشي

الشيخ ضاري.. اااانت لا تتدخل
اريدن ادمي بيكم ماكووو كلكم عوووج وراح تظلون عوووج لاخر عمركم

راد إلياس يحچي اشرلة إسحاق حتى يسكت
ظل الجو متوتر بشكل
صهيب يتعارك ويا نفسة وحنظل يمة يحاول يهدي بي

والشيخ خلصها يمشي ويرزل بيهم
اما صخر بالمضيف متمدد وحالتة بس الله اليعلم بيها

نريد نعرف شصاير ماكو
عمة صبيحة المحد يوگف بوجها
من شافت حالة الشيخ واعصابة الطافرة بعيونة ما گدرت تتجرأ وتسأل واكتفت بالسكوت

حتى ما تعشوا
يا دوب سوينالهم چاي شربوا وكلمن راح الغرفتة

رحت اشوف شمس
لگيتها گاعدة وايدها على وجها تبچي بحرگة
تقربت منها حضنتها شبيچ حبيبتي راسچ يوجعچ لو بطنچ

- صخر وين شبيهم يصيحون فهميني

- والله ما ادري شبيهم بس السالفة وراها صهيب هذا الگدرت اعرفة

- وصخر

- موجود بالمضيف

- اكو احد يمة

- اي صهيب نايم هناك

- اخذيني الة عفية وقبل لا تسأليني اي اگدر امشي

ما حچيت شي
لبستها حجابها وسندتها بالگوة وصلنا للمضيف

دگيت الباب بهدوء وطبيت
لگيت صخر نايم وصهيب گاعد بعيد عنة
يجر بهالدخان وماكو بس شافنة گدامة طفى الجگارة وگام

- هناء بيها شي

- لا لا بس شمس اجت تريد تشوف رجلها

- اي خوية تفضلي

حچاها وفات من يمنة طلع من المضيف
عفت شمس وطلعت ورى لگيتة گاعد بالصالة ويدخن انقهرت علي واني ما اعرف السبب

فتت من يمة ردت اروح باوعتلة
- خوية كافي تدخن مو زين عليك الخاطر هناء على الأقل

هز راسة وطفى الجگارة
ردت اروح للمطبخ سمعتة فتح الباب وطلع للحديقة يا رب كون تعدي هالمشكلة على خير

شمس.. تقربت من صخر نايم
من وجع گلبي بعد ما احس لا بـ بطني ولا بالخياط التارس راسي

گعدت يمة لمست وجهه بـ أطراف اصابيعي
گبل فز باوعت علي وبچيت
راد يحضني لزم الخياط گبل عطت اااخ صخر انتبه راسي

- اسف بوية نسيت

- عرفت مو

- اي إلياس گالالي

بس حچاها شهگت
گام عدل گعدتة بالگوة واخذني الحضني عصرني بي حيل

- آنه بخير وعافية والفرح راح ليچ فدوة
بسچ لا تسوين برويحتچ هيچي كافي اعليچ وجع راسچ

- لشوكت صخر
حاچيني لشوكت وليش اني وانت حظنة نحس هيچ

ليش من دون الكل الفرحة متدوم النة
ليش انت يوميا متصوب
وليش اني كل حمل اطرحة اريد جواب يريحني لأن راح اموت

- استغفري ربچ بالعجل
تنوعي الغيرچ مثل هناء واحمدي ربچ واشكري اعلة النعمة العندچ ألف نوبة

- الحمد لله والشكر
اني اجيت اشوفك واروح ما اريد اتعبك اكثر يلا نام علمود ترتاح

- بوية بمعزتي عندچ قوي حالچ شوي
ما اريدن المح هالضعف بعيونچ نوبة الأخرى كل شي صار ويصير بي صالح النة صدگيني

ما حچيت شي
بست خدة وگمت داروح صاحني
التفتت علي گال اخذي علاجچ ونامي عدل الخاطري

هزيت براسي اي وطلعت
بالگوة تمشيت وصلت النص الصالة فقدت توازني ووگعت على صوت الوگعة طلعت غسق من المطبخ تركض

- الله الله شجاچ

بس حچتها بچيت
سندتني الغرفتي نومتني بالفراش وانطتني علاجي

رادت تطلع صحتلها
- لتعوفيني وحدي حبابة

- لا حبيبتي ما اعوفچ
هو اني بس ردت اصعد ابلغ إسحاق وارجع يمچ

حچيتها وطلعت من الغرفة
صعدت فوگ لگيت إسحاق گاعد ع اللابتوب
مدري شديسوي من گد ما مركز حتى ما حس علية من طبيت

- إسحاق
إسحاااق اني راح انام يم شمس تريد مني شي

- لا بوية اخذي راحتچ

عفتة ونزلت
ردت ارجع الشمس تذكرت هناء
مديت راسي من الشباك صهيب بعدة گاعد بالحديقة طبيت عليها لگيتها تبچي

- اليوم شجاچن ويا البچي
بلا ذيچ طارحة وراسها مفتوح انتِ شبيچ

- شلون صارت شمس

- زينة ليظل بالچ وياها المهم انتِ شبيچ

- ما ادري
ما شفتي شصار اكيد اكو مصيبة جاية بالدرب

- وانتِ گاعدة تبچين مقدماً
هزيت ايدي بـ استهزاء گومي حبيبتي گومي
تعالي وياية الغرفة شمس احسن ما تظلين هنا وحدچ وتخلصيها بچي

- صهيب وينة ؟!!

- نايم يم صخر خطية مو مال يعوفة وحدة

بس حچيتها گامت اخذتها ورحنا الغرفة شمس
فرشنا بالگاع
وظليت اسولف وياهن حتى يلتهن شوية لحد ما نامن

ثاني يوم الجو بالبيت مليان شحنات كهربائية
الحجية وعمة صبيحة روحهن بخشمهن الظاهر عرفن شنو الموضوع

والولد والشيخ ما طلعوا بيومها
اما البنات
كلهن مريضات ظليت رايحة جاية من وحدة الوحدة لأن بس اني وثناء بيهن صاحيات

للظهر محد قبل يتغدة
نص ساعة واجة ايوب واخوانة ما اعرف شعجب

سلمت عليهم ورحت للمطبخ
سويتلهم چاي وكعك يسندون طولهم بي ديشربون اندگت الباب

گبل الشيخ صاح فوتن للداخل
كلنا تجمعنا بالمطبخ
نباوع من فتحة الباب البيت انترس زلم اشكال الوان حتى اكو شيوخ من ضمنهم

بس طبوا للمضيف ركضن عمة والحجية وراهم
رادت هناء تلحگهم لزمتها خالة نجمة وين ولچ خلچ بمچانچ

- اتركيني يمة
لازم اعرف الشر الجاي يهدد رجلي شنو هو

حاولت تمنعها ما گدرت
ظلت خالة نجمة تلوب بمكانها حسيت عليها تريد تلحگها بس بسبب الحجية متگدر
بست راسها وابتسمت

- اني وياها خالة لتخافين عليها

- الله يلبسچ ثوب العافية دايماً بنيتي

- رحم الله والديچ
حچيتها وطلعت اركض لگيت هناء واگفة يم الحجية وعمة وحاطات اذنهن ع الباب

تقربت منها ردت احچي گبل سكتتني
- اششش ولچ
خل نسمع شجاي يحچون

حطيت اذني وياهن صوتهم كلش عالي
من الصياح مگاعد نفتهم شي
بالأخير واحد منهم گال صلوا على محمد شجاكم

صلوا كلهم بصوت واحد
رجع نفسة حچة الظاهر چبيرهم بوية خلونة نتفاهم بالمعروف الطلايب متسوي چارة

الشيخ ضاري.. واحنة ما رايدين الطلايب يبو جاسم

- چا اسمع من ابو البت
وتالي عودن آنه اتدخل واحلنها ان شاء الله

- خلة يتفضل نسمعة

- شيخنا انت رجال مؤمن وتخاف ربك
واكيد الما ترضى على عرضك ما ترضى على عرض العالم

- بلاية شك كمل اسمعنك

- ابنك تجاوز كل الحدود
الله وكيلك لا خلة اخلاق لا تربية لا دين طلع من ثوبة كلش

يعني عينك عينك وگبال كل العالم
يتردد على بنتي بنصاص الليالي حتى يرضي شيطانة بس لأن شافها مطلقة وصيدة سهلة لأمثالة

احنة عالم نخاف الله
ومثل ما ابنكم غلط بتنة هم غلطت
وهي اعترفت النة ابنكم معاشرها بزواج مؤقت وصار الوقت حتى يعلن زواجة منها لأن اعراض الناس مو لعبة عدكم يشيخ ضاري....

يتبع

لتنسووون ⭐⭐⭐⭐⭐⭐
كل الحب ❤🥀