رواية وضاقت الأرض بي الفصل الحادي والثمانون 81 - بقلم لبنى الموسوي

#وضاقت_الأرض_بي

للكاتبة #لبنى_الموسوي

گمت أركض اكيد هو منو غيرة يذكرني بـ هالوقت
فتحتها چانت الرسائل بالواتس اب
انصدمت هاي أمل دازتلي صور ثواني وحملن نايمة بغرفتي وعلى فراشي
بسيت نوم لونة احمر وصخر غافي بصفها بالملابس الداخلية وايده محاوطة خاصرتها

كل شي بـ هاللحظات توقف
حتى دگات گلبي ما صرت احس بيها بعد
وجع مو طبيعي سيطر على كل شبر وخلية بـ جسمي من راسي لحد اصابع رجلية

ركزت زين هاي نايمة يعني اكو واحد ديصورهم
عيوني صارت على ايدة
محاوطة بطنها مثل ما چان يحاوطني تماماً وغافي بعمق على وجهه نومتة المعتادة هاي

بعدني اركز بالصور انحذفن ؟!!
شمرت الموبايل بالگاع وگعدت على الطبلة
الأوجاع بدت تسيطر علية احس بـ روحي راح اجيب

اهدي شمس اهدي
اي واذا تقرب منها عادي هي هم مرتة
وانتِ ما زعلتي ولا طلعتي من ذاك البيت بنص الليل إلا لأنچ تعرفين هاليوم راح يجي

اي عادي عادي
واذا اخذها تظل مرتة مثل ما اني مرتة
اي مرتة والله مرتة
كافي حبابة اهدي ترى محد يفيدچ اذا لا سامح الله صار شي عليچ لو على أطفالچ

اختنگت اريد اتنفس بعد ما اگدر
دگ جهازي
باوعت للگاع هي گاعد تتصل شلتة جاوبتها وما ادري ليش رديت

حطيتة على اذني سمعتها تبچي
سكتت
شوية وگالت شمس والله موش آنه هاي حتى تنوعي للتصوير شلون مخربط

شمس ردي بس خلني افهمنچ شي
شمس وياي
احچي حبابة وحگ ربچ هاي بتي مريم الحقيرة
عبن جهازي عدها
چانت سهرانة ويا خالتها ومثل ما تعرفين الجهاز دوم يمها حتى تعرف بي اكثر مني

- شتريدين أمل

- والله ما صار شي بيني وبين صخر
كل الموضوع هو حرارتة مرتفعة كلش وظليتني جارة خاطر اسويلة كمادات وعبن تعبت غفيت

- هه بملابس النوم تسويلة كمادات

- چنت بحجرتي وماخذة راحتي
تالي لبست عباتي ومشيت اتطمن اعلي
عاد من شفتة تعبان ويهذي
ظليتني جارة احاول انزلة الحرارة ليروح يصيبة شي لا سامح الله ومامش بشر يمة

اترجاچ لا تحچين شي
والله يطلگني وانتِ تعرفين اهلي ما يخافون الله
لا راح يرحموني ولا آنه الاتحمل فراگ فروخي تظلين أم وتحسين بية اترجاچ شمس

بس حچتها سديت الخط بوجها
باوعت للساعة بعده الفجر حتى ما اگدر اتصرف
طلعت للصالة رجعت اتصلت
انطيتها حظر وشمرت الموباايل ع التخم وگعدت يمة

ظاهرياً احاول اقوي نفسي
بس من الداخل
رب العالمين وحده اليعلم شنو الصاير بحالتي بمثل هاللحظات الصعبة

صح الوقت متأخر بس ما اگدر اسكت اكثر
مو علمود شي
بس علمود انطي الروحي القوة واحافظ على اطفالي لأن لو اظل هيچ همَ مراح يظلون
وساعتها اخسرهم حالهم حال كل الحبيتهم وما داموا الية

اخذت الجهاز اتصلت بريحان
مكالمتين وماكو
بالثالثة يلا ردت بصوت ناعس اسفة گعدتچ من النوم بس ما عندي غيرچ والله

- لا خية فدوتچ بس خير خوبن ما بيچ شي
- راح اموت ريحان
- اسم الله خية اسم الله انطري فرد لحظة بس اشعل الضوة واردنلچ

متحملت بچيت
سحبت الكلينس امسح بدموعي شيوگفهن بعد
شوية وگالت شني الصار احچي
سمعتني ابچي سكتت ظليت على هـ الحالة اكثر من خمس دقايق
مو ابچي لا اشهگ من گلبي لحد ما نفسي انگطع

- شمس مو زين اعليچ
الفرخ راح يتأذة حاولي تهدين خاطر افهم السالفة شني لو اگومن هساع واگولن الصخر

- لا لا لتحچيلة حبابة
هسه راح اگولچ كل شي بس بالأول جاوبيني
هو وين ؟!!
شو من البارحة ماكو لا بالنت ولا اتصل وسأل عني مثل عادتة

- چا خية غير مريض شحالة وانتِ مالچ خبر
- مريض ؟!!
- اي مريض اصلاً طايح بالفراش مايدري بالدنيا شني الجاي يصير

- شوفي ريحان
أمل هسه سوت شي هدم كل البنينا اني وصخر بهل سنين الراحت
لذلك اترجاچ اترجاچ تحچيلي كل التعرفي من تمرض ولليوم

- شني العملتة ولچ
- مو گتلچ اني راح احچيلچ كل شي
بس عفية أول جاوبي وريحي گلبي ترى راح امووت

- شكلها مصخمة الدنيا هـ المتخاف ربها
بس راح احچي
خاطر لا تصدگين بيها وتظلمين اخوي وياچ هو مالة ذنب بعمايلها وحگ ربچ

- يلا احچي

- امس رد من دوامة مثل البارود
صاير اعصاب وما يتحاچة وفوگاتها لا اكل ولا شرب ولا حتى طلع
ظل بحجرتة لليل عاد هنا امي خافت اعلي
دزتني خاطر اتفگدة
ولمن دشيت الحجرتكم لگيتة متمدد ووجهه غادي دم

تقربت منة صخر تسمعني ما رد
حطيت ايدي اعلة گصتة غادية نار من الحرارة
ومدري شيهذي ويا رويحتة
بس من تقربت من حلگة سمعت اسمچ من بين كلامة

طلعت گلت لأمي سمعتني أمل
ما احس إلا ركضت الحجرتكم گبلي مشيت وراها شو هاي ماخذة راحتها و واگفة تقيس بحرارتة

گلتلها اطلعي آنه اتصرف
ما رضت
گالت آنه حرمتة واحگ منچ بمداراتة
انتِ اطلعي منانة ولا تخافين اعلي آنه يمة ما اعوفنة

ما تحملت صلافتها
ادريها حبت تستغل هـ الحالة الي هو بيها
بس لأن اخوي تعبان
وما يدري شني الجاي يصير يمة وإلا مستحيل تدش الحجرتكم وصخر صاحي

مشيت بلغت عمة صبيحة
اجت عاركتها وطلعتها بالغصب من الحجرة
عبن تعرفين مامش بشر يگدر اعلة عمة بـهالدار حتى هالحية

ظليتني طول اليوم يمة
تعبان كلش ورغم حبيب اجة وضربة ابرة بس ماا فاد كل شي ويا وظلة اعلة نفس نومتة

تدرين عليش ؟!!
عبن روحة التعبانة موش جسمة
والي تتعب روحة ما تنفع وياكل دويات العالم يحرمة اخوي

ها شو ساكتة
احچي شعملت أمل وياچ لا تخليها بگلبچ خية موزين

- لحظة هسه احچيلچ

حچيتها وشمرت الموبايل
رحت غسلت احس براسي راح ينفجر من الحرارة
شوية هدأت ورجعتلها
رفعت الجهاز بعدها وياية بس گالت الو نزلت دموعي

- بسچ من البچي واحچيلي عاد
- اي راح احچي

سولفتلها كل شي صار
وكل كلمة حچيتها چانت تنغرس بگلبي مثل السكين قبل لا تطلع من لساني

منا لما خلصت نفسي انگطع
من البچي حتى باكيت الكلينس خلص
اما ريحان
چانت مثل الصنم تسمعني بدون متنطق كلمة وحده

- ها شو ساكتة
- ما اعرف بس مصدمة كلش من كلامچ

بس خية ابد صخر ما يسويها
وحتى لون نگول ضعف وراد يسويها مو اعلة فراشچ شمس

قابل هو مثل الحمار العندي
خاطر ينزع ثوب رجولتة بسبب شهواتة
ويدنس اطهر مكان يجمع بين المتزوجين بالحلال لا لا اخوي موش هيچ

بعدين هو مريض
وربچ مريض للتسعة بالغصب شربتة التشريب
حتى ما بي يرفع راسة من الفراش لون يضربون يمة چيلة همينة ما يحس

- نايم بالملابس الداخلية ريحان والدنيا شتا ؟!!

- شمالچ خية مو گتلچ مريض
من عشيتة وانطيتة العلاج گال اختنگت عينيني انزع ملابسي

نزع البلوز وظل بس بالجامة
الظاهر من طلعت من يمة نزعها هي همينة وهاي ما صدگت تستغل الوضع الشافتة بي

اوگفي هي موش اتصلت ترجف وتبچي
معناتها وحدة من الأثنين
يا هي سوت هالملعوب خاطر تأزم الوضع بيناتكم
واتصلت بس حتى لا تحچين الصخر
عبنها تدري بـ هالشي طلاگها الراح يتم موش زواجها

يا اختها الحقيرة ورى هالملعوب
هي حشت براس مريم
خاطر تصور وتدزهن ليچ عبن آنه ادري علاقة خواتها بمريم كلش قوية

- ما ادري ريحان ما ادري
- وشني العمل هساع فوگاتها الزلمة مريض

- راح اسكت
ما اريد تكبر المشكلة وهي مالها حل
من الأساس صخر زعلان لأن طلعت من البيت بدون موافقتة

واني هم تعبت
ماكو شي يربطني بأخوچ بعد اليوم
بس خلي يعوفني بحالي هو وأمل حتى ارتاح واشيل التفكير بيهم من بالي

حامل يا بشر ومحد يحس
لو صار شي الحملي منو راح يفيدني هو لو مرت اخو لو منو بالضبط

كافي تعبت والله تعبت
لا اريدة بعد ولا اريد اسمع أي خبر عنهم
خلي يسوي الي يحلالة يتزوجها يتزوج غيرها حياتة وهو حر بيها بس لحد يگولي

حچيتها وسديت الخط اناشغ
رجعت اتصلت
سويتة صامت ورگعتة بالبلازما حيل انكسر هو وياها بوقت واحد

گمت ع السريع
طفيت كل الكاميرات ما اريدة بعد يشوفني
ما اريد اسمع عنة ولا يسمع عني
ما اريد كل شي ما اريد بس يعوووووفوني بحااااالي

رحت للباب سديتها من جوة حتى ميفتحها بالمفتاح
رجعت الغرفتي تمددت حاضنة نفسي
وجع وجع بكل مكان وجع
بس كل هذا يهون يم الوجع الگاعد احسة ينخر بنص گلبي مثل نخر البسمار بالخشب

حاولت اهدي نفسي
هالأرواح الي ببطني مالهم ذنب بكل شي ديصير
امانة ولازم احافظ عليها
كلها شهرين مو اكثر ويشرفون ان شاء الله بالسلامة حرامات اضيع تعبي بسبب أمل وغيرها

ظليت اردد بأيات الذكر ودموعي تجري
ما ادري شلون غفيت
للظهر گعدت حتى موعد علاجي فات گمت ع السريع سويت حليب بارد وبسكت

اكلتة ع الواگف واخذت العلاج
باوعت للساعة راح تصير الثلاثة رحت للحمام غسلت وتوضيت ووگفت اصلي

ريحان.. ردت احچي سدت شمس الخط
رديت اتصلت رفضتني كررت الاتصال طلع مغلق ؟!!

تسودنت ويا نفسي
البت حامل والوحيدها وفوگاتها منهارة
بس لا تعمل بروحها شي تندم اعلي تالي عبنها ماجاي تحس هساعة

ظليت الوب رايحة رادة
عليمن ادگن والمن احچي المصيبة صخر كلش تعبان حتى ما بي يسافر وهو بـ هالوضعية

للفجر وآنه متربطة ما اعرف شلون اتصرف
صليت الفجر وكفيت السجادة
اجة ببالي امشي الحجرة صخر اخافن يعتاز شي وما عندي خبر

فتحت الباب نايم الوحيدة
همزين عاد الصلفة حست اعلة نفسها وطلعت منا
تقربت منة حطيت ايدي اعلة گصتة
لساعة حاااار لا فادت بي كمادات لا علاج لا ابر شلون تالي ويا

ندستة بچتفة صخر خوية گوم
صخر صخر تسمعني گوم عفية لا تظلك هيچ
خل حبيب لو أي واحد من اخوتك ياخذك للمستشفى

ابد ولا چنة يسمعني
صحت بخوف صخر فدوووة فتح عيووونك
على صوتي تحرك شوي
جريت نفس براحة وحمدت ربي وشكرتة بدال المرة ألف

باوعت علي ما بي حتى يفتح عيونة
- صخر لازم تگوم
شمس محتاجتك كلش الله اليعلم بحالها شني الجاي يصير هساع

بس سمع بـ أسمها باوعلي
بالگوة گال شمالها وسكت تعبان مابي يحچي
اضطريت اسولفلة
في سبيل لا يعاند ويعالج روحة
خاطر يمشي البغداد ويشوف حل لـهالمصيبة الوگعتة بيها أمل

من التعب مابي حتى ينصدم
اشر على جهازة ناولتة اتصل بيها ورفع الحاكية طلع مغلق باوع للموبايل
گال الكاميرات يااا وما كمل كلامة گتلة وهساع شني العمل خوية

- إسحاق
- اصيحنة ليك لو شني بالضبط

اشر براسة اي
گبل صعدت دگيت الباب فتحها بسرعة لأن چان گاعد للصلاة

يدري بصخر مريض
بس گتلة نزل يركض طب لغرفتة اشرلي صخر اطلع عفتهم ورجعت للصالة

شوي وطلع ملبسة وساندة على جسمة
گتلة اصيحن واحد يعينك اشرلي لا وطلع للسبعة يلا ردوا بس نيمة بفراشة صاحني

- ها خوية خير
- عندة التهاب حاد بالأمعاء
وهذا العلاج مأشر اعلي ضروري تلتزمين بـ أوقاتة

- صار من عيوني
- تسلم عيونچ طالع آنه اوصي حبيب اعلي وامشي البغداد

حچاها وطلع من الغرفة
شوي واجة حبيب اتصل اخذ اجازة من الدوام وگال روحي ارتاحي آنه ظال يمة

شمس.. خلصت صلاة اريد ألم السجادة ما اگدر
تمددت بالگاع بمكاني
اندگت الباب مااهتميت ولا صحت منو شوية واجاني صوت إسحاق گال خوية هاي آنه

لزمت بالميز وگمت
إسحاق والشيخ بالتحديد
الهم مكانة كلش كبيرة عندي مستحيل اگدر اتجاهل وجودهم

لبست حجابي فتحت الباب والصورة مغوشة گدامي
باوعت علي سلم
داجاوبة ما احس الا تكومت من طولي بالگاع
فتحت عيوني
نايمة بفراشي وهو گاعد بصفي ياخذلي الضغط گتلة شصار ابتسم

- ضغطچ شني اليصير يعني

حچاها وطلع من يمي
رجع مسويلي عصير استحيت منة كلش
عدلت گعدتي وباوعتلة
شنو السالفة خوية مو هيچ اني المفروض اضيفك

- يا ضيافة هاي
انتِ لون چنتي صاحية چان حاسبتچ مثل ما احاسب ريحان بس الببطنچ شفعولچ عندي

- عرفت
- اكيدن اعرف ومو بس هاي كل شي

باوعتلة وسكتت
- يصح الحرمة تطلع بلاية شور زلمتها

جاوبيني يصح هالشي
اميمتچ الله يرحمها سوتها گبل ويا ابوچ
ما معقول حياة بكبرها ما فرد يوم منعها من الطلعة

لون اخوي غلط مرة انتِ غلطتي ألف
وبفعلتچ هاي
خسرتي كل حگ چان ليچ وراح تدفعين ثمن غلطتچ غالي يا خيتي كلش غالي

- اي ميخالف اني غلطت
هو رجال مو خلي يطلگني شعندة متمسك بية
اني ما افيدة اني مو خووش فضوها وطلگوني عااااد

- گومي گومي
الظاهر فيوزاتچ ضاربة والحچي وياچ عبث هالساع

- وين ؟!!

- يم خالتچ مالچ گعدة هنا بعد
خاطر تخلصين من صخر موش هو هذا التردي لو آنه غلطان

- والشقة ؟!!
- ترد الأصحابها عگب ما اصفيها آنه

بس حچاها ذبيت العصير من ايدي وگمت
فتحت الكنتور صاحني
التفتت علي گال لاتتعبين رويحتچ آنه اجيبن كل شي اليمچ اتركيهن خيتي

- هااا يعني الأستاذ قرر وحسم الموضوع من يمة

- هههههه
تراچ سودنتيني مو هالساعچ جاي تصيحين
خل يطلگ وطلگوني منة عليش بعد ضجتي لون هو هذا التردي انتِ

- لا ما ضجت
بعد احسن هيچ ما اتعب نفسي ويا
كلمن يروح بطريقة
الظاهر هـ الزواج من أول چان غلطة للطرفين وهسه راح نصححها

- ناطرچ برة لا تطولين

حچاها وطلع من الغرفة
بس غيرت ملابسي ورحت ورى چان يباوع للبلازما وموبايلي بـ ايدة

- هاي انتِ همينة طلعتي مسودنة
- حالي حال غيري نظل بشر وتحكمنا الأعصاب

- ساعتين وجهزي نفسچ اخذچ للدكتورة
- ان شاء الله

ضم الموبايل بجيبة وطلع
رحت ورى
صعدني بالسيارة وراح دگ الباب على ابو وسيم ظلوا يحچون بالعشر دقايق

وصلنا البيت خالتي دگيت الباب
بس فتحتها راح لأن لازمة عدة ميصير يشوفها
طبيت باوعتلي مستغربة
ظلينا وحدة صافنة بوجه الثانية اخر شي ما تحملت حضنتها وصرت اناشغ

ما حچت أي شي
خلتني ابچي لحد ما ارتاحيت شوية ودخلتني للصالة
گعدتني وراحت
جابتلي فواكة وظلت تگشر وتوكلني لحد ما نفسي لعبت

- كافي خالة شبعت والله
- اكلي يمة ما ظال بوجهچ لون حرام جهالچ خطية

باوعتلها وبچيت گبل حضنتني
- سولفي حبيبتي شنو المضوجچ وليش إسحاق وياچ مو صخر

گمت غسلت ورجعت حچيتلها كل شي
كالعادة بدت تلومني قبل لتلوم صخر مو بس لأن اني غلطانة لا لأن هي تحبة كلش

ظلت على هالحالة فوگ الساعة
لزمت راسي كافي خالة ارحميني البية كافيني والله
هناك واندگ الجرس

طلعت صحت منو اجاني صوت إسحاق
رجعت الخالتي اني رايحة ويا إسحاق للدكتورة ارجع ونكمل عود بس كافي تحچين علية

عفتها تغمني وطلعت
صعدت ويا وصلني للدكتورة گبل طبيت لأن حاجزلي

وضع الاطفال تمام
بس الخلل يمي عندي تقلصات قوية وهبوط بالضغط وفقر دم حتى هي تفاجأت من وضعي

كتبتلي علاج وظلت توصيني
گالت وضعچ ما بي مجال للطبيعي لازم عملية لذلك ضروري تعالجين دمچ وإلا متعديها سلامات

طلعت من يمها إسحاق ماكو ؟!!
المشكلة ماعندي موبايل حتى اتصل علي
ظليت انتظرة بالعيادة اكثر من نص ساعة يلا اجاني

- هاي وين صرت
- بشري شلون وضعچ انتِ والجهال
- الحمد لله بخير

- چا يلا امشينا
حچاها وطلع من العيادة

صعدت للسيارة تحركنا ساكتين
وصلني للباب
انطاني علاگة گال هاي الچ استغربت بس ما ناقشتة اخذتها وگتلة شكراً

طبيت تلگتني خالتي
ظلت تسأل نص ساعة يلا عافتني
توضيت وصليت گاعد اشيل السجادة صارت العلاگة بوجهي رحت اشوف شنو بيها

مشتريلي لفتين مشاوي
فيتامينات لازم اخذهن كل يوم جايبلي مال شهرين ليگدام وبالنهاية علبة مال موبايل لأن موبايلي انكسر

رجعتهن بالعلاگة وتمددت
حطيت المخدة على راسي ما اريد افكر بشي
مدري شلون نمت حسيت على خالتي تگعدني للعشى

غسق.. سولفتلي ريحان شصار ويا شمس
كلش انقهرت
معقولة البشر يگدر يتجرد من أنسانيتة الـ هالدرجة مثل أمل؟!!

يعني عجيب والله راح تخبلني
هي اقرب وحدة الشمس وعلاقتهن چانت كلش حلوة
تدري شگد تحب صخر
وهم تدري بصخر شگد يحبها وشاهدة على هالشي

شلون تغيرت فجأة هيچ
وليش دتسعى حتى تخرب حياتهم وعلاقتهم الحلوة وهي تدري بحمل شمس شگد صعب

گمت من ريحان رحت الغرفتها
دگيت الباب صاحت تفضل طبيت لگيتها دتظفر بشعر بتها تفاجأت من شافتني

- نحچي شوية
- گومي ماما مريم روحي العمتچ

بس سدت الباب باوعتلي
- خير غسق
- شبيچ أمل شغيرچ هيچ وليش دتأذين شمس

- ليش آنه شني سويت
- تدرين تحديداً البارحة ترى ماكو شي ينضم

- مرتة وحگي
بأي صفة جاية تحاسبيني والله عجيييب

- حق شنو عيني حق شنو
الرجال ما رايدچ هي گوة خلي عندچ كرامة شوية

- ارد واگلنلچ لا تتدخلين بشي ما يعنيچ
- يجيچ يوم يجيچ أمل

حچيتها وطلعت من الغرفة
الكلام وياها ميفيد يأما هي هيچ من أول واحنه چنة مخدوعين بيها يأما اكو واحد ديعبي براسها

ريحان.. يومين وصخر ما يتحرك من مكانة
يادوب بس ياخذ العلاج وينام حتى الصلاة ما يگدر يصليها

لليل رد إسحاق
ظلوا بالغرفة يحچون الوحيدهم
من طلع من يمة
رحت لگيت صخر گاعد بفراشة وهاي اول نوبة يگعد بيها

تقربت منة
- خوية شتهيس اكو شي يوجعك
- اريدن العلاج مال عند الحاجة معدتي جاي تأذيني

انطيتة العلاج ربع ساعة وگام
باوعت علي طب للحمام توضى و وگف يصلي
رحت سويت الة عشى ورديت وهو يصلي يمكن جاي يقضي العلي

كمل حطيتة گدامة
اكل لگمتين وبعد الصينية عنة
توسلت بي يكمل ما قبل عافني وطلع يمشي بهدوء

رحت ورى شفتة طب بغرفة أمل
وديت الصينية وظليت اباوع للغرفة عشر دقايق فتح الباب وطلع كاضها من زندها

دفعها علية وگال اخذيها للمضيف
مشيت وياها آنه خايفة ازود منها شكلة رغم المرض يخوف كلش

طبينا للمضيف باوعتلي خايفة
- شمالة اخوچ
- انتِ اعرف والله عليش جاية تسأليني بعد

دارت وجها عني تدردم
ثواني انفتح الباب وطب ابوي ويا صخر
ما طلعت
گلت لون طلبوا مني اطلع راح اطلع ولون سكتوا بعد احسن اردن اتنوع شلون راح يتصرفون وياها

مامش واحد اهتم الوجودي
گعد صخر اعلة الديوان مابي حتى يوگف
وظل يسولف لأبوي كل شي صار مثل ما حچيتلة آنه

امل.. آنه توسلت بيها ما تحچيلك
مع الأسف والله طلعت بلاية ضمير وگلتلها الشغلة ما مقصودة كلة من مريم

صخر.. احذرچ تحچين اعليها احذرچ أمل احذررررچ

ألف نوبة گايلچ حجرتها ما تعتبيها
ألف نوبة گتلچ مالچ غرض بي اعتبريني محرم اعليچ حالي من حال اخووووتي

الشيخ ضاري.. انطر وليدي انطر

حچاها و وگف گبال أمل باوعلها بعصبية
- انتِ وتاليها وياچ ؟!!
احچيلي وتاليها تراچ حيرتيني حتى مابية افكر بعد

اجيت العندچ وحچينا
گتلچ تردين زلمة رديتي آنه ما يحلالي غير إلياس

وعمة عيني لون صرت حرمة الغيرة
عشت لي وراح اموتن لي هو وبس ما مش زلمة يملك حگ بية غيرة
حچيتي هيچ لوووو لالةةةةة

وآنه فرحت الحچيچ هاذ
ولون هلچ چانوا اوادم وروح وليدي الغالي چان عفت الفروخ ليچ تربينهم وآنه مغمض

بس حميد عدووووي
هو انتِ وما رحمچ بصغرچ تردينة يرحم احفااااادي

ردت اگعدچ بدار الوحيدچ يمنا وگف بوجهي
والله احنه عرب وماعدنة حرمة تگعد الوحيدها حتى لون چانوا احفادها بطولها

وعذرتة بهاي
صعبة تگعدين الوحيدچ وانتِ ارملة لون متزوجة بيها مجال شوي

رديت وخيرتچ حياتچ لو الفروخ
گلتي فروخي
وحتى نحل الطلابة توصلنا آنه وياچ للزواج هذا

ردت ازوجنچ الحنظل رفضتي
حبيب همينة رفضتي والله شني ما اريدن هالزواجة تتم واريدن واحد يظل يتنوع لية مثل اختة

وانتِ اختاريتي صخررررر
انتِ گلتي هو يحب حرمتة ومكتفي بيها ما راح يجي اليوم اليفكر بية مرة الةةةة

گلتي لو ما گلتي لا تسوووودنيني
ما ظلمناچ
بزرتنا ما نأمن اعليهم عد جدچ حميد وانتِ ماردتي غير زواج اعلة الورق
يعني الأختيار الأول والأخير چان ليچ موش الغيرچ

هساع صرنا موخوش
هساع صار اليسوي خير يتجازة بالشر
هي هاي جزاتي عبن صرت وياچ ادمي وعاملتچ بما يرضي الله وعبادة

گوة آنه قنعت صخر
بالغصب موش بمزاجة رضى بيچ اعلة أساس انتِ ما تريدين منة غير ااااسمة وبسسسسس

شنهي الغيرچ
عليش جاي تطالبي بحگ هو موش الچ من الأساس
عليش تسعين خاطر تخربين حياتة
وهذيچ المسيچينة شني الشين العملتة وياچ وجاية تأذينها هيچ

- عمي والله هاي مريم
اكيدن ما راح اسويها واخرب اعلة روحي انت زلمة ذكي واحسبها بالعقل

چانت تحچي ويا اختي
هذيچ من عارفة آنة يم صخر ونايمة گايلتلها صوري ودزي الشمس خاطر تشوفهم

حتى روح اسألها لون ما تصدگني
وهاي مريم همينة اخذها اعلة جنب واسألها ولون آنه غلطانة مستعدة الأي حكم منكم

صخر.. هالحچي نگعي واشربي ماية
آنه گلت ما تعتبين للحجرة يعني ما تعتبيها لا تظلين تتحججين بمرضي
ما طلبت منچ اهتمام اختي مكفية وموفية

- والله ظل بالي يمك
واجيت لگيتك تهذي وحرارتك كلش مرتفعة فظليتني يمك لحد ما غفيت

الشيخ ضاري.. عگب كل شي صار اسمعي الآتي
چلمة وما تصير ثنتين
من اليوم مالچ بعد مچان بـ هذا البيت
يطلگچ صخر والفروخ فروخنا ما تاخذينهم وياچ
اتركيهم هنا وامشي شوفي حياتي
الله ومحمد وعلي وياچ يابة ردي الحميد خلة يكمل الچان يعملة بيچ بالصغر لهنا وآنه صرت بريء من ذنبچ اليوم الدين......

يتبع

بنات تابعوا صديقتنا Zoza_hadi
راح تنزللكم قصص قصيرة الكاتبات مبدعات بعد كم يوم تخص المسابقة السويتها قبل فترة الهم

لتنسوون ⭐⭐⭐⭐⭐⭐
كل الحب ❤🥀