رواية وضاقت الأرض بي الفصل الخامس 5 - بقلم لبنى الموسوي

#وضاقت_الأرض_بي

للكاتبة #لبنى_الموسوي

بسم الله الراحمن الرحيم
( وَإِذَا الْمَوْءُودَةُ سُئِلَتْ * بِأيّ ذَنْبٍ قُتلَتْ )
صدق الله العلي العظيم

كـ حمامة بيضاء
اقف على شرفة المنزل
اشاهد جسدي الصغير وهو يحترق

يتسابق بـ المهِ هنا وهناك
يلوذ بالفرار من نيران حقدهم الدفين
طالباً المساعدة

هيا انجدوني
يا ملجئي حين تضيق بي الأرض
ويا عزوتي وسندي حيث لا سند لي غيركم

امي لا تبكي
ابي سامحك الله
اختي وصديقتي صبراً

اخوتي
إولم تعلموا معنى الحديث النبوي الشريف
لـ زوال الدنيا أهون على الله عز وجل من سفك دم مسلم بغير حق

من منكم يطفئ ناري
انا اتألم
هل لكم ان تريحوني من هذا العذاب
لا يوجد من يستجيب

حسناً سـ أرحل
سامحكم الله وعفى عنكم
ولكن هيهات ان يسقط من رقابكم دين الأمانة التي سلبتموها من غير وجه حق

وداعاً
لي الشهادة ولكم الدنيا بخزيها وعارها
والملتقى يوم الحساب

رفعت راسي حتى اگوم
شال رضا الجداحة من الكاونتر
جدحها بحركة سريعة وشمرها على شجن گبل گبت النار بيها من فوگ ليجوة

سحب السچينة من ظهرها وصاح بمحمد
- طلعهم بسرررررررعة

ركضنا عليها اني واختها گبل منعنه محمد
صرت اصرخ بكل حسي اريدهم بس يهدوني عسى ما احترگ وياها المهم احاول اساعدها

مؤمل ميقدني وعيني على شجن
اباوع عليها روحها تفرفح من الألم مثل الطير المذبوح

تفتر بالمطبخ وتصيح من كل گلبها
اخوانها واگفين حاجز بينة وبينها حتى يمنعونة نساعدها

ماكو ثواني وتكومت بالگاع
تمرغل بروحها المسحونة من لهيب نيرانهم الحقيرة عسى ولعل تخمد وترتاح من ألمها الفضيع

عيوني صارت على رضا
ديتحرك منا ومنا مثل اليخطط الشي
باوعتله فتح الفرن الغازي وشمر السچينة بالداخل وراها طلعونة من المطبخ بالقوة

هنا مهيمن تهستر
حتى كفر صار يكفر من غير الفشار المو طبيعي عليهم وعلى سيف

صاح بي محمد
- كافي لك اسكت عار وانغسل
واحذرك تحچي لأن ساعتها انت أول واحد راح يروح بيها

عيوني غوشت من الدموع
اباوع الدنيا انخبصت بالبيت والصياح ترس المكان

أنهار تملخ بخدودها وشعرها
مرت عمي متكومة بالگاع لا حس ولا نفس بس من الهوسة محد منتبه عليها

طلع رضا من المطبخ وسد الباب
ثواني وصدر صوت قوي يشبه صوت الأنفجار

اندگ الجرس سريع
العالم يصيحون برة بيتكم ديحترگ اكو احد جوة لو نكسر الباب

باوع رضا علينة اني وانهار وگال
- اذا حچيتن حرف واحد من الي صار
مصيرچن يصير مثل شجن اذا مو اتعس وهاي اني حذرتچن

ركضت انهار لغرفتها
لبست حجاب وجابت الصاية ذبتها على مرت عمي

دخلوا العالم مخبوصين
ولد عمي هنا صار واحدهم مثل الثعلب الماكر
مسوي روحة مذهول وگلبة على اخته الدتشتغل وطگ عليها الطباخ

محمد.. اختي جوه يااا نااااااس ساعدوووونه

- جيبوا بطانية بسرعة

رضا.. هاي هاي جبتها

مؤمل.. النار قوية شلون راح تطبون

- هسه ندبرها

انفتحت باب المطبخ عبارة عن نار بنار
ركضوا ولد المنطقة للشارع منهم رجع بـ ايده رمل ومنهم سطل ماي

دخلوا اهلي بهلأثناء حتى امي وياهم
ركض ابوية على عمي مفزوع شصار سالم شلون احترگ بيتكم

سالم.. الطباخ انفجر على شجن

يوسف.. لا اله إلا الله
شلون صار هالشي وشحال شجن هسه

مازن.. احچي عمي

باوع عمو على سيف وگال
- بالموت شجن بالموت

عافهم سيف وركض للمطبخ
اما باقي المنافقين واگفين يتفرجون منتظرين نتيجة فعلهم تتم حتى يرتاحون

انسحنت روحي من القهر
اريد اصرخ بعالي صوتي وگدام كل الناس
اريد اصيح هذولة الوحوش هم حرگوها بس للأسف ما اگدر

صوتي ضعيف
منو ممكن يسمعني واذا لگيت واحد سمع صوتي هل يا ترى راح يصدگني

طفوا جزء من النار وطبوا يركضون
شوية وطلعوا لافين شجن بالبطانية وسيف شايلها باوعت علي بحقد

الله لا يوفقك سيف
الله يطلع حوبة هاي المظلومة بيك وياخذ حقها من بين عيونك الصلفة

انخبصوا اخوانها
رضا واگف يبچي بدموع التماسيح ومؤمل يگولة لتخاف راح تعيش ان شاء الله

صوت الأسعاف صار قريب
توهم طبوا للبيت اجت الاطفاء وراهم

البيت بعده ديحترگ
غاز ونار وبانزين والمطبخ بظهرة صايرة حديقة گبل الزرع لگف النار

اجوا المسعفين
شالوا شجن ومرت عمي وطبوا اهل الأطفاء طلعونة من البيت حتى يخمدون النار

مسلم.. ام مازن اخذني بنتچ وانهار وروحن للبيت

غسق.. بابا الله يخليك خلي اجي وياك

مسلم.. تنجبين لا تشوفين مني شي ممتوقعته
وما ناسي حسابچ وياية بعدين اراويچ شلون تطلعين من البيت بدون علمنة

غيداء.. امشي يمة
نروح ندعيلهم احسن من وگفتنه هنا

رجعنا للبيت وانهار اجت ويانة
اول ما دخلت للصالة باوعت داير مدايري

صرخت
اي صرخت
صرخت بصوت يعادل وجع گلبي بهاي اللحظات

ركضت امي علية
- اسم الله بنيتي شبيج

- ولچ يمة حرگووووووووهااااا
بهاي عيني شفت رضا دار عليها البانزين وحرگهاااا

يمة گبال عيوني احترگت
يوم ما شفتيها شلون گامت تلوب بروحها من الوجع

وچ ماما تروح وتجي منا ومنا
تريد واحد شريييييف،، واحد يمة بس واحد ما لگت

تدرين لييييش
لأن ما بيهم شريف كلهم ××××××

شلون جاوبيني شلون
گلبهم ما اذاهم وهم يحرگون دمهم ولحمهم
ما هزهم ضميرهم الـ ××× من سمعوها تصيح ساعدوووني وتستنجد بيهم

الزاد التسمموا وياها على سفرة وحدة ما غزر
صوتها من چانت طفلة وتصيح اسمهائهم بـ لسان مكسر ما رن بـ اذنهم وحرك مشاعرهم ولو شوية

هسه هذولة اخواني الچلاب
شگد مأذيني شگد يمدون ايدهم علية ويستهزئون بيه ع الطالعة والنازلة

بس والله ما اتمنالهم الشر
ولا اگدر اشوفهم يتأذون گدامي واوگف اتفرج

لعد اخوانها شلون گدروا
شلون تحملوا يشوفونها تحترگ گدامهم وبـين ايدهم وميحركون ساكن

ولچ يمة اااااااخ
اخ بس لو شايفتها شلون تتوسل بيهم حتى يطفوها

تلوب يمة تلوب
النار تاكل بيها وكلهم يتفرجون حتى امهم الوگعت بالگاع ما اهتموا الها

تدرين شسوه رضا الكلب
فجر الطباخ حتى يگول طگ عليها ويطمطم عملتة
واخير شي هددنا اني وانهار اخاف نحچي للعالم عن جريمتهم النگسة

احچي وامي صافنة بوجهي
صرت ادگ على راسي احاول استوعب الصار ماكو
أما انهار شمرت نفسها بالگاع وگامت تصرخ بوجع بدون متحچي كلمة وحدة

ساعات مرت واحنه مفجوعين
امي گابلت القرأن وگعدت اباوع عليها تقرا وعيونها تمطر بالدموع

تعبت كلش
منظر شجن وهي تحترگ انحفر بگلبي بحيث حسيت روحي دتطلع بمكان روحها

يا دوب گدرت اصلي
بقيت بالصالة اسمع امي دتقرا القرأن بصوت متموج بسبب خنگة صدرها وعيوني مثل الشلال

بالتسعه ونص طب ابوية واخواني ورى
ركضنا عليهم مفزوعين وداخلي يدعي رب العالمين تكون شجن عايشة

غيداء.. ها مسلم بشر

مسلم.. شبشر متگوليلي
شجن عايشة بس حالتها خطرة ومرت اخوية انشلت شلل نصفي وذيچ وينها نايمة بالمستشفى

- عزة العزاني ان شاء الله
ومنو لعد ظل يمهم بالمستشفى اذا هيچ الوضع

- سالم وولده موجودين
وخالات شجن هم بس سمعن بالحادث اجن بنفس اللحظة

غسق.. هذا مو حادث بابا هاي جريمة

مسلم.. شدتحچين غسق

- مثل مسمعت
بسبب ابنك الواگف بصفك اخوانها حرگوها وحتى يتسترون على عملتهم گالوا حادث

بس حچيتها طفر ابوية جرني من زندي
- منيلچ هذا الحچي

- نسيت اني چنت يمهم

- اسمعي لچ صلفة
طلعتچ من البيت بدون علمنه راح احاسبچ عليها
اما سالفة شجن اياني واياچ اسمعچ تحچين بيها حتى لو ويا خيالچ تسمعييييين

- شنو يعني ؟!!
راح تسكتون الهم مثل ما سكتوا السيف وتضيعون دم هالمظلومة بسهولة

- معلينة
بيناتهم يتجازون وما طول بتهم لبستهم العار فهذا اقل شي يسووا حتى يغسلون عارها

- ههههه
زين وعار ابنك شوكت تغسلة لعد لو حلال علي وحرام عليها

بس حچيتها ضربني راشدي
باوعت على سيف وابتسمت گبل نزل راسة مني

- ها خوية ندمان
اي اكيد ندمان بس متگدر تحچي لأن ساعتها تفضح روحك ويخرب انتقامك من بيت عمك الشرفااااء

مسلم.. لچ صلفة منين اجاچ هذا اللساااااان

- منننننننكم
من ظلمكم وحقدكم ومشاكلكم المتتتتتخلص

گبل جرني من شعري
ظل يكفخ بيه ويغلط وامي تتوسل بي حتى يعوفني
اخير شي شمرني ع الدرج

گمت من مكاني
اشرت لأنهار وصعدت الغرفتي اول ما طبيت اجت وراية

انهار.. غسق

- نعم

- لتحچين شي كافي

- شلون يعني
تردين انتِ هم تسكتين وتعوفيهن حق اختچ يضيع

- الحچي ميفيد
انتِ تعرفين احنه مو گدهم
هذولة شياطين ومستعدين كل شي يسوون مقابل سمعتهم وشرفهم

- ليش هم عدهم شرف من الأساس

- المهم اسكتي
راح يأذوچ اذا ظليتي بهاي العقلية وحتى مستقبلچ يضيعوا

- وشجن

- الله ياخذ حقها
لتتصورين رب العالمين يقبل بالظلم
وكل انسان راح يلاگي نتيجة افعالة بيوم من الأيام ان الله يمهل ولا يهمل

باوعتلها بدون ما اجاوب
بقينا نبچي بيومها للصبح ماكو شي يبرد گلبنة غير الدموع

يومين واني منايمة
كلما تشكل عيني من التعب افز على كابوس شجن وهي تحترگ گبالي وتصرخ ساعدوني

الأخبار مثل ما هي
كل يوم ابوية واخواني يرحون للمستشفى من العصر لليل علمود گدام العالم واگفين ويا بيت عمهم وهم بالحقيقية مجرمين حالها حال اهل شجن

باليوم الثالث واگفة اجهز بالغدة
اني وامي وانهار منشتهي العسل بس هم ياكلون عادي ولا كأن صاير شي

سمعت ابوية يحچي ويا مازن
من كلامة فهمت شجن البارحة حست وسألت على امها بس عرفت هالشي ركضت على امي

- ماما

- ها بنيتي

- حبابة قنعي بابا
بلكت يقبل نروح للمستشفى علمود نشوف عمتي وشجن

انهار.. اي عمة فدوة
اني هم اريد اشوفهم راح اموت

- وشلون يقتنع بلا

- ماما ذبيها براس انهار
گوليلة خطية تريد تشوفها امها
واحنه هم لازم نروح الهم شيگولون اهل جنان علينة ما زرنا اختهم وبت اختهم وهم بالمستشفى

- دصبي الغدة خل ياكل وراها احچي ويا

رحت ع السريع
صبيت الغدة وظليت احسب الدقايق انتظرهم يخلصون

ربع ساعة وصاحتني امي
شلت السفرة ويا انهار وحطيت الچاي ع النار شوية واجاني الفرج

- ها ماما بشري

- بالگوة اقتنع
علمود انهار وعلمود اهل مرت عمچ وإلا شيقنعة بروحتنا

- المهم اقتنع
بيش ساعة نروح ما گال

- بلأربعة ونص
جهزوا روحكم مو تخلوا يصيح ليروح يبطل ومياخذنة

- بلأربعة تلگينة جاهزات

اخذت انهار وصعدت الغرفتي
عيوني ع الساعة والصراع اشتغل بين دگات گلبي وميل الساعة ياهو اليتحرك اسرع من الثاني

طلعت روحنا علما صارت الاربعة
بس لبسنة الصاية ولفينة الحجاب شلون مچان ونزلنة جوة ننتظر ابوية واخواني حتى يخلصون

وصلنه للمستشفى قريب الخمسة
گلبي صار يدگ سريع اريد اشوفها وخايفة بنفس اللحظة

گال ابوية ميصير تطبون الها سوة
انهار وامي راحن يشوفن مرت عمي ويا مازن واني وابوية واخواني رحنا الشجن

اول ما وصلت صاروا اخوانها بوجهي
باوعتلهم بحقد واگفين يعدون الدقايق الخبر موتها بس وين تروحون من عقاب رب العالمين

رضا.. شجاب غسق لهنا

مسلم.. جبت مرت عمك وانهار هم حتى يشوفوهم

- ليش جبتهم عمي
مو تدري الزيارة هنا ممنوعة

- وحدة بعد وحدة يدخلن ميأثر ان شاء الله

- زين لعد
خل اطب اگول لخالتي حتى تطلع وتدخل غسق مكانها

- يلا روح

بقيت انتظر على اعصابي
ما أعرف ليش تأخر
خمس دقايق يلا طلع هو وخالتة سلمت عليها ولبستني وراها دخلت وحدي

باوعت عليها ونزلت دموعي
جسمي كله صاير ينفض واني اشوفها ملفلفة من فوگ ليجوة وتون من الألم

تقربت منها صاحية
باوعتلي وابتسمت يعني عرفتني
بچيت بصوت عالي ونزلت گبالها گعدت على ركباتي

- شجو تسمعيني

- موجوعة

- سودة علية
ياريت لو اگدر اشيل عنچ ولو جزء من هذا الوجع والله مچان قصرت

بس راح تگومين
اي ان شاء الله راح تگومين لأن غسق مالها غيرچ وميهون عليچ تعوفيها وحدها

انتِ اختي وصديقتي الوحيدة
اترجاچ لتعوفيني وترحين والله اضيع بدونچ

- راح البس البدلة البيضة السيف

بس حچتها شهگت بحرگة
سودة علية مو بوعيها وإلا مچان جابت سيرة هالنذل على لسانها

- قوي نفسچ شجن اترجاچ قوي نفسچ

باوعتلي وصارت تون من الألم
دخل رضا على صوتها
- يلا كافي طلعي خليها ترتاح

- تؤ تؤ
باوع دموعي شلون نزلت من حنيتك الماكو منها

- لچ سمعيني صلافة ما اريد
وديري بالچ تفكرين مجرد تفكير تلعبين ويانة والله ساعتها ما ارحمچ

باوعت الشجن نظرة اخيرة وطلعت
ياريتني ما اجيت لأن شوفتها بهاي الحالة زيدت النار بية بدل متهديها

رحت ويا ابوية
شفت مرت عمي وچان حالها يبچي الكافر هم بتها احترگت گدام عيونها وهم انحرمت من السؤال عنها ع الأقل بعد ما انشلت ووگعت بالفراش

رجعنا للبيت بالسبعة بس انهار ظلت ويا خالاتها
صليت وگعدت اقرا قرأن منظر شجن وهي بالمستشفى مديقبل يروح من بالي

لثمانية ونص سمعت ابوية اجه
استغربت مو بالعادة يومية تعبر التسعة يلا يطبون للبيت

طلعت اركض
چان واگف يم باب الصالة ووجها ميتفسر
گبل خليت ايدي على گلبي لا ياربي كل شي ولا تفجعني بيها

غيداء.. شبيكم احچوا صاير شي

مسلم.. شجن انطتكم عمرها

بس گال هيچ وگعت بمكاني
صرت ابچي بحرگة موتها مثل الضربة القاضية بالنسبة الي

مالي غيرها هي وامي بالدنيا
حتى من اضوج من اهلي چنت بمجرد اروح اشكيلها يخف عني كل حمل

ما اگدر اوصف حالتي بمثل هيچ يوم
ولا اكو كلمة بـ هالوجود تعبر عن كم القهر العشته بذاك الوقت

انعزلت بغرفتي ابچي
روحي طلعت من جسمي وراحت حضنت روحها مثل ما چنة طول العمر جسدين بروح وحدة

بقت الجثة بيومها بالمستشفى
ثاني يوم من الصبح رحت ويا امي لبيت عمي لأن گالوا راح يجيبون جنازتها حتى نودعها

وصلنة هناك چانت مرت عمي متمددة بالصالة
حالتها تصعب ع الكافر فوگ مرضها وعجزها اخذ الموت بتها بـ ابشع طريقة

نص ساعة وجابوا الشهيدة
طلعت للممر اركض حافية ودموعي تجري

شفت الرياجيل دينزلون جنازتها من السيارة
بس خلوها بالگاع ركضن خالتها وانهار شمرن نفسهن عليها

تقرب منها وگوة اشوف طريقي من الدموع
لزمت طرف الجنازة ورفعت الغطى بـ ايدي الثانية چان وجها من جهتي

مديت ايدي اتلمس ملامحها المحروگة
ها شجو تالي سويتها ورحتي

لچ ليش رحتي
مو تدرين ما عندي اخت غيرچ بـ هالدنيا

تعرفين بية ضعيفة وانتِ مصدر قوتي
شلون انطاچ گلبچ ترحين وتعوفيني تايهة من بعدچ

گومي فدوة
خلي نكمل الجامعة سوة
خليچ وياية تدرين شلون كلهم يتنمرون علية وماكو غيرچ يوگف بوجههم وياخذلي حقي

من اول يوم تعبت شجن
من اول يوم صرت افكر اذا اضوج او احد يقهرني منو راح يسمعني ويخفف عني

بس ميخالف
خليني متعذبة المهم انتِ ترتاحين
بالعافية عليچ رحتي شهيدة والله ينتقم من كلمن ظلمچ ووصلچ للتابوت هذا

احچي وياها وفاقدة من البچي
حسيت عليهم رفعوا التابوت بسرعة گمت على حيلي

هذا هو رايحة شجن
رايحة يا صديقة طفولتي واختي الوحيدة
رايحة وعايفتني يم هالوحوش وحدي بدون متفكرين شلون راح اكمل حياتي بلاچ

باوعت السيف يبچي
الله ينتقم منك عسى دموعك هاي تيزاب تنزل على وجهك يا حقير

طلعوا جنازتها من البيت وروحي طلعت وياها
سودت الدنيا بعيني وضاق صدري من القهر الحسيت بي يومها

نصبوا الفاتحة ببيت جدها
3 ايام بقيت هناك مگابلة صورتها وابچي
نار بصدري وعقلي مديستوعب كل شي انتهى وشجن نامت جوة التراب وعافتني

حاولت اتخيل حياتي بدونها ما گدرت
بعد بيمن اتصل من اضوج والمن اشكي من انقهر

شلون اشوف مكانها فارغ لمن اصعد بالخط
وويامن امشي بالجامعة واني ما عندي صديقة غيرها

معقولة اگدر اكمل حياتها بدونها
اي يگولون النسيان نعمة ورب العالمين ينطي الصبر للأنسان لمن يفقد عزيز على گلبة بس هسه شلون

هسه منين اجيبة للصبر
وشلون اگدر اخفف ولو شوية من الوجع الداحسة يحفر بصدري بغيابها

ما لگيت اجوبة الأسئلتي غير الدموع
ولا اكو شي برد نار صدري غير الحلم الحلمتة بيها وهي واگفة تبتسم بوجهي فرحانة

خلصت الفاتحة ورجعنا البيتنا
بقيت اواسي نفسي بصورها واگول تحملي غسق المهم هي مرتاحة

مو قليل العذاب الشافتة طول الـ 3 ايام بسبب الحرگ
واذا عاشت شلون راح تواجه العالم بجسمها المشوه

وشرفها النسلب بسبب اخوية الحقير
شلون راح تعيش بدونه ويا اهلها الوحوش الما بگلبهم ذرة رحمة

بعد السابع رجعت الحياة طبيعية للكل إلا اني
صرت حتى ما اهتم الأبوية واخواني اذا ضوجني ولا انقهر من كلامهم

مرة من المرات كالعادة اشتغل واني صافنة
قدمت الچاي الأبوية وبدون ما انتبهت شمرته علي

حار شسوه بية
حتى ضرب ضربني من غير الغلط والأهانة
رغم كل شي ما اهتميت ولا انقهرت مثل قبل يمكن لأن گلبي مات

گعدت بـ الصالة اسمع الحديثهم
رجعوا على سيرة الورث ومشاكلهم ويا بيت عمي ولا كأن راحتلهم بنية بعمر الورد بسبب حقدهم والطمع التارس عيونهم

ثاني يوم رجعت للدوام
صعدت للخط باوعت المكانها فارغ حسيت نفسي ضاق

حچيت ويا وحدة من البنات وبدلت مكاني وياها
وصلت للجامعة الكل صار يعزيني بس بالي مو وياهم كل مكان وكل زاوية هنا يذكروني شجن

اول يوم چان صعب علية
ممتعودة امشي وحدي ولا عندي الجرأة ارفع راسي واباوع بعيون الطلاب ويا كل هالنقص البية

ما گدرت احضر غير محاضرة وحدة
عفت كل شي ورحت گعدت بالحديقة اداري دموعي وضعفي من عيون الطلاب

مدنگة اشغل نفسي بالملزمة حسيت احد يمي
رفعت راسي شفتة مهيمن گال شلونچ مجاوبتة سحب الكرسي وگعد گبالي

- ممكن نحچي

- لا

- ليش

- لأن طلعت جبان حالك حالهم
شلون سكتت عن عملتهم مهيمن والله راح اتخبل

- شتريدين اسوي
اخبر عن ابوية واخواني وبهاي ايدي اطببهم للسجن واقفل عليهم الباب

انتِ تسويها
جاوبي لو اخوچ فعلاً غلطان وبس انتِ تعرفين الحقيقة راح تحچين بيها

- اي واخوية فعلاً غلطان
بس حچيتها صفن بوجهي فاتح عيونة

اختك بريئة
وانت واخوانك تعرفون هالشي كلش زين بس مع ذالك ما گدرتوا إلا على هاي المسكينة

- وانتِ ليش متأكدة من برائتها

- لأن شجن اختي
معاشرتها من طفولتي واعرف عنها كل شي والأهم من كل هذا اعرفها متربية صح ومستحيل تطلع الغلطة منها

- يعني سيف ورى السالفة

- اي
يلا گوم اخذ حقها منه ومن اخوتك لو راح تظل ساكت حالك حال غيرك

- لا راح اخذة وعيونچ

- يعني راح تخبر عنهم

- لا

- لعد شلون تاخذة ؟!!

- تعرفين اول وتالي
بس المهم سيف راح يدفع ثمن عملتة غالي

- واخوانك

- شبيهم

- متحاسبهم

- الله موجود هو اليحاسبهم

- گوم مهيمن
گوم روح الحچي وياك مابي نفع

- ابوية بالنص
من كل عقلچ تردين احاسبة

- والله اليغلط لازم يتحاسب
ماكو فرق لو مو ابوية بس للأسف ما عندك الشجاعة الكافية حتى تواجههم

- لتلغين لغوة زايدة
هذا لسانچ السليط روحي طلعي على اخوچ العار مو جاية تتشطرين براسي

صفنت علي
كلهم نفس ××× اريدلي واحد بي حظ ورجال بهاي العائلة ماكو

گمت اخذت غراضي ومشيت
بقيت اروح واجي بالممرات حايرة شلون اتصرف حتى يرتاح گلبي

فكرت هواي
معقولة دم شجن يضيع
معقولة حقها ينداس والمظلوم يتوسد التراب والظالم يعيش رغد بهذا الزمن

املي چان بمهيمن
بعد ما شفت خوفة عليها وحرگة گلبة من سواية اخوانة گلت راح ياخذ حقها

كلها ايام
بس يخلص السابع ويطلع من صدمته راح يتحرك ويحاسبهم على جريمتهم القذرة

بس للأسف
چانت هاي مجرد ظنون وأن بعض الظن أثم

تعبت من المشي
شمرت غراضي بالگاع وسندت نفسي ع الحايط
صار صوت شجن بـ اذني لچ لترجعين ع الحايط مو ملابسچ تتدمر

نزلت دموعي بخنگة
ما اتصور يا شجن راح ارتاح وانتِ حقچ ضايع لازم اتصرف بأي طريقة

اخذت غراضي ورحت للأمنية
سألتهم كم سؤال وتمشيت لباب الجامعة
بعد نص ساعة على موعد الخط اگدر اتصرف بيها ان شاء الله

طلعت خارج الجامعة
مشيت مسافة 500 متر شفت ولد من بعيد راكب دراجة

تجرأت اوگفة
هاي اول مرة اسويها واحچي ويا شخص غريب او اطلب طلب منه،، حتى زملائي بالجامعة ما اختلط بيهم

تجاوزني لأن چان يمشي سريع
ثواني ورجع الدراجة علية خفت ممتعودة اكون بـ الهجرأة بس لازم اكون

- نعم صحتيني

- اي اخي

- خير محتاجة مساعدة

- اي
مثل متشوف اني طالبة جامعة والخط مالتي تعطل وللأسف صدفت موبايلي خلصان شحن

اذا ممكن
بس تنطيني موبايلك اخابر اهلي دقيقة مو اكثر

- اي خوية تتدللين

مد ايدة الجيبة
رجع باوعلي خفت كلش بس لا شك بية
چان يگول

- اذا ما عندچ كروة اني انطيچ ليش تظلين تنتظريهم والدنيا باردة عليچ

- لا لا عندي
بس هم صعبين شوية ما عدهم بنية ترجع وحدها

- اذا هيچ براحتچ

فتح موبايلة وانطانيا
باوعت علي بتردد افتهم علية اخذ دراجتة وراح بصف الحايط

دگيت الرقم وايدي ترجف
يارب ساعدني يارب ما عندي غيرك اخذ حق شجن من اهلها وطلعني من هالسالفة بدون مشاكل

انطيت اتصال
رن مرتين بالثالثة انفتح الخط حسيت گلبي انفتح ويا

- نعم تفضلوا

- السلام عليكم

- وعليكم السلام

-اريد اخبر عن جريمة قتل...

يتبع

لتنسوووون ⭐⭐⭐⭐⭐⭐