رواية وضاقت الأرض بي الفصل الخامس والخمسون 55 - بقلم لبنى الموسوي

#وضاقت_الأرض_بي

للكاتبة #لبنى_الموسوي

- انتِ رويحتي
انتِ بعد امي وابوي وبنيتي الوحيدة
انتِ العافية الردت لية من يوم ما نورتي حياتي
انتِ النفس اليصعد وينزل هنا.... وأشر على صدرة

اعشگنچ فستقة
انتِ من جدمچ الراسچ بالنسبة لية عشگ
والعشگ مامش شي بالدنيا يوصلة هو ذاتة المودة الاستغنى بيها رب العالمين عن ذكر الحب بكتابة
عبن المودة والعشگ شي يفوگ العگل ويتخلل مسام الجسم ويستقر بالگلب بلاية استأذان بحيث يصير جزء منا تماماً مثل علاقة الجسد بالروح ما يفترگون إلا بالموت وهذا ما يمر البشر غير مرة بالعمر لكت الحب چان ولازال ذكرى نعيشها وننساها ونرد نعيشها وننساها ونظلنة هيچي لبين ما نحضى بالعشگ اليغنينا عن كل الذكريات المرت بحياتنا وسميناها بفرد يوم من الأيام حب

- شتحچي إسحاق ؟!!

- شني الحچيتة بوية
غير سألتي وآنه رديت شمالچ متعجبة

- لحظة الله عليك
عيد الكلام الگلتة هسه حتى استوعب الموضوع

- الكلام اليخرج من الگلب ما ينگال غير مرة وبس

باوعتلة مصدومة
كتلة من المشاعر اجتاحت كل خلايا جسمي بهاي اللحظات

فرح حب سعادة صدمة
ما اگدر اوصف كم هالمشاعر بكم سطر
لأن حروف اللغة العربية كلها راح تخوني اذا  اجيت اشرح الگاعد احس بي حالياً

بعدني گاعدة بحضنة
رجع باس زندي وكأن ديحاول يصحيني بـ هالحركة

- عليش ضاربة دالغة الحلوة

- اوگف لحظة
حچيتها ونزلت گعدت مقابيلة ضبط
يلا هسه اشرحلي شلون وشوكت وليش حبيتني كل هذا الحب

- ههههههه حرمتي بوية حرمتي

- اي اعرف والله
بس إسحاق اني وياك معايشين مثل اي رجال ومرتة

حتى الحواجز بيناتنا استمرت فترة
يمكن ما گدرنا نتخطاها إلا قبل كم شهر واحنة صار اكثر من سنتين متزوجين

وضيف عليهن
ظروف زواجي منك المچانت ظروف طبيعية
تنكر يعني انت ما چنت رايدني والشيخ جبرك على هالزواج

- لا ما انكر
بس نوبات تتنوعين الشخص بنظرة عابرة
وفجأة تتحرك مشاعرچ بصورة تخرج عن الطبيعة حتى نفسچ تستغربين منها

فـ شلون لو چان هالشخص اقرب الچ من كل الوادم
سترچ وغطاچ
سندچ وعامود دارچ
امنچ وامانچ
تلمسين بنظراتة الطبيعية راحتچ وتهيسين بداخل حضنة الدافي وطنچ وانتمائچ

تشوفينة عافية وكت التعب وضحكة ساعة الفرحة
يحس بلي يدور بجوفچ بلاية ما تحچين ولون گلبچ مرة الوجع من كل وبد يمر بگلبة خلافچ

آنه موش نبي غسق
آنه رجال حالي حال غيري عايش الوحيدي وما حاط ببالي فكرة الزواج

فجأة وبلاية مقدمات اجيتيني
اي انجبرت اعليچ ما انكر لكت موش استنقاص منچ والله شاهد اعلة چلمتي هاي

آنه بية الصوچ
عايش بنقص الظروف جبرتني اعلي وما چنت حاب يتصلح إلا ان اجيتيني

صديتچ بالأول
عاملتچ مثل ما اعامل ريحان عبن ما هاوي شي اسمة معاشرة ويا اي حرمة بالكون

بس تخيلي وياي
بزونة مغمضة ما تعرف من هالدنيا حاجة غير بس چلمة الصار

ظروفها لبستها الغلط رغم الغلط موش بيها
لكت ظلت رغم كل هذا محافظة اعلة تربيتها بالوكت الغيرها عايشات بالعز ويبيعن شرفهن بلاية مقابل

ما طلعت منها العيبة
انطت الدلال وما اخذتة حافظت اعلة الأمانة الواگعة من رويحتي رغم هي ما تعنيلها شي

فستقة الرجال شكثر ما چان صلب
يذوب مثل الجليد ويتبخر مثل الماي الساخن بنظرة وحدة من حرمة معدلة وبنيت اصل وحلال

وانتِ رغم اغلاط اهلچ
لكت والنعم من البطن الشالتچ والگلب الطيب
الرباچ اعلة الطيب وزرعة بداخلچ بذرة لبين ما كبرت هالبذرة وصارت تشبع غيرها بلاية مقابل

سنتين عاشرتچ بالمعروف
ما لمست منچ إلا كل خير صنتيني وحافظتي اعلة اسمي وطعتيني بكل كلمة گلتلها وراح اگولنها بعد

شلون تردين بعد كل هذا ما اعشگنچ
تدرين مرت اعلية ايام صرت اتنوع للحريم مثل ما اتنوع للحياية

وحدتهن تعاشر بالوجه
وبس تدورين عنها تلدغ وتخش راسها خاطر لا تعرفين هالسم الجاي يسري بدمچ من هاي العاشرتيها سنين

والحمد لله گدرت اتجاهل هالتفكير
لكت بجيتچ الحلوة ودخولچ الدافي الحياتي گدرت اتجاوز هالشي موش بس اتجاهلة

- شوف حقك لأن العشتة انت ابد مو سهل

بس حچيتها گلب وجهه
لزمت ايدة حيل اي اعرف كل شي اعرف عمتك حچتلي قبل فترة بسيطة

بس لتخاف
وروح امي مراح اسألك اي سؤال بس اريدك تسمع الكلام الراح اگولة

مو كل اصابعك سوة إسحاق
يعني الوردة لو تحطها بنص كوم من النفايات
راح تظل تميز عطرها المستحيل ينسلخ عنها بس لأن وگعت بمكان قذر

يعني على سبيل المثال انت
غيرك واحد ويمر بالمريت بي يگول على شنو اني اظل محافظ على مبادئي

وشنو الحصلتة من هالمبادئ
خليني اعيش حياتي اتونس اخلص يومي مثل ما اريد

وماكو واحد يتجرأ ويحاسبني
وبنفس الوقت احاول ارد ولو جزء من الصار بية لأن الطيب بهالزمن ينوكل

بس انت ما صرت هيچ
لا رجولتك ولا تربيتك ولا دينك انهزوا مقدار شعرة بعد كل شي صار وياك

وهذا هو الصح
الأنسان الزين يظل زين مهما جارت علي الظروف

ومثل ما انت انخدعت اني هم انخدعت
لا مرتك الله يغفرلها ولا ابن عمي چانوا زينين بيوم من الأيام

احنة الي انخدعنا بيهم
طيبتنا انعكست بمرايا عيونهم فصرنا نشوفهم انقياء بنقاوتنا وناصعين البياض مثل بياض گلوبنا تماماً

لذالك الخلل بينا مو بيهم
احنة الي لازم منشوف كل الناس زينين ونأمن للرايح والجاي

بس بنفس الوقت
ملازم نشوف الكل مو زينين
لأن هالشي ظلم بحق نفسنا قبل لا يكون ظلم بحق الناس القريبين من عدنة

شوف مداحچي هيچ حتى اقويك
بس والله العظيم المريت بي انت اهون ألف مرة من وجعي

يعني شلون افهمك
ممكن بشوية كلام مهما كان بسيط
تگدر تراجع نفسك وتصلح من الخراب السكن تفكيرك

بس اني غير
كلام الدنيا كلة ميمحي الصار وياية
اذا انت مشكلتك الثقة اني مشكلتي اللمسة القذرة الدتخلي حتى الحلال حرام بعيني

تدري ليش انفر منك كلما تتقربلي
اتخيل إسحاق بس تجي يمي يرجع ينرسم ذاك اليوم گبالي واشوفة هو مو انـ.....

- بسچ لا تكملين بسسسسسس

- تعال انتظر وين رايح
اني والله محچيت هيچ حتى اضوجك
كل الموضوع ردت اقويك واحاول اشرحلك شوية من الوجع الچنت ولازلت اعيشة بدون ذنب

اني هم احبك
لا ومو حب عشگ مثل متگول انت
ولو اكو بقاموس اللغة العربية كلمة اكبر من هاي تعبر عن حجم المشاعر الأحملها الك بصدري مچان ترددت احچيها الك ولا لحظة

تدري شلون احبك
مثل حب البنية الصغيرة الأبوها
لو شافت غيرها تقربت من حضنة واخذت ولو جزء صغير من حنانة تنجن وتدفعها حتى تگعد بمكانها

مثل حب الأم الوحيدها
وساعة الي يكون الولد وحيد امة
تصير تخاف علي حتى من النسمة لأن ماعدها غيرة بـ هالدنيا

ومثل حب الأنسان البلدة
وانت اكثر واحد تعرف الوطن شنو يعني للمواطن

اي اني هيچ
اغار عليك من نظرات الغير حتى لو كانت هالنظرات عابرة

واخاف عليك مثل خوفي على نفسي
لأن انت بالنسبة الي وطن بدونة اضيع واذا خسرتة حياتي راح تصير عدم ومالها اي معنى بعد

ويلا هسه بعد هالكلام الحلو
اريد انام بحضنك للصبح بدون اي نفس يعكر علية وعليك صفو هاللحظات التاريخية

حچيتها وسحبتة من ايدة
تمددت أأشرلة على صدري حتى ينام شو هز راسة بضحكة

- شبيك تضحك يلا تعال

- بوية من كل عگلچ

- حباب حباب شوية والله
شبيها يعني مو انت يوميا تنومني بحضنك هم تسمع مني اعتراض

- شو اتنحي خلني انامن

- لا شو إلا بحضني

حچيتها وسحبتة من ايدة
حط راسة على صدري يضحك والله احسن برويحتي جاهل وعوزة بعد بس تلوليلة

- ههههههههه
تريد الوليلك ما عندي مانع ترى
بعدين اي اني احس بنفسي طفلة وانت ابوية تدري لو لا

- چا يلا بنيتي نامي بالعجل السهر موزين للجهال

- هههههههه
تدري شگد احب هالكلمتين منك
بنيتي وبوية بس اكيد احبك اكثر منهن بهواااي

- وآنه اموتن اعليچ

حچاها وباس باطن ايدي مرتين
ظل نايم على صدري كلما يريد يوخر ما اخلي لحد ما غفى

ابتسمت لأن بدا يشوخر
مررت اطراف أصابيعي بين خصلات شعرة
ودنگت علي سحبت عطرة الداخلي وغمضت فرحانة

صحيت الصبح ماكو يمي
گمت طلعت للصالة سمعت حس الماي
يعني ديسبح جهزت الريوگ وگعدت ود حتى تصحي ومتظل نحسة طول الطريق

داحط الصينية بالصالة
طلع ينشف بشعرة من شافني ابتسم صباح الخير

- صباح النور بوية

- يلا تعال اتريگ
هاي ثاني مرة احمي الچاي ليرجع يبرد

اجة باتجاهي باسني من راسي وشال ود باسها
گعدنا ناكل بعدنة ممخلصين دگ جهازة ردت اگوم اجيبة ما قبل

اربع مكالمات وهو ممهتم
بالخامسة عاف الريوگ وگام ما گدرت اروح ورى لأن ود تلعب بالصينية

اخر شي ما تحملت
شلتها يم التلفزيون شغلتة وخليتها تباوع
تقربت من الغرفة صوتة ناصي بس اگدر اسمع كلامة

- لا بوية صعبة
هساع راح آنه رادن بس اخلص ريوگي

اي ان شاء الله
يمكن اسبوع اسبوعين موش اكثر صار ببطن عيني

سد الخط رجعت المكاني ركض
بس اجة للصالة ما تحملت اسكت اكثر ها إسحاق منو الخابرك هسه

- صاحبي

- شيريد

- ظن نلتقي اليوم
بس گتلة ما اگدر عبن هساع راح اردن

- خطية ليش متروح تشوفة اخاف محتاج شي

- لا بوية كل شي ما يريد
اعلة جية الاخرى لون الباري خلانة طيبين عودن اروح اشوفنة

- اي زين لعد
راح اگوم اكمل شغلي بين متتريگ

حچيتها واخذت ود للغرفة
بدلتلها وراحت يم ابوها سديت الباب غيرت ملابسي سمعت جهازة دگ باوعت مكتوب سيد جعفر

اخذتة وطلعت
- هاك مدري منو ديتصل بيك

- اي بوية عاشت ايدينچ

ظل يحچي ويا الرجال لحد ما الچاي برد
اول ما خلص گال شيلي ما مقسوملي اتهنى باللگمة

ردت احميلهيا ما قبل
استعجلني علمود الأزدحام غسلت المواعين وطلعنا مباشرتاً

ريحان.. اليوم همينة عندي امتحان
صخر ما گدر ياخذ اجازة فـ طلب من شمس تجي وياي

تونه مكملين تبديل دگ ايوب هورن
وصلنا للجامعة راد ينزل ما قبلت شمس عبن هي وياي

ما عافتني لحد ما گعدتني بمكاني
شوي واجة الاستاذ حچتلة صديقتي عن وضعي عبن بكل نوبة هيچ

لازم نحچيلهم موش الكل يعرفون بوضعي
عزلني بالأخير وصاح موظفة اردنلها الأجوبة وتحل بمكاني لبين ما خلصت

تقريباً بديت اتعود على حالتي
گمت سلمت للاستاذ الورقة وطلعت من القاعة
بس هالمرة تلمست عدل خاطر لا اربد الباب واصيرن مضحكة مثل النوبة المضت

اول ما فتحتها تلگتني شمس
- ها بشري شلونچ بالأمتحان جاوبتي ان شاء الله

- اي الحمد لله جاوبت

- الحمد لله
ضايجة مو تحبين نغير جو شوية

- لون انتِ حابة ماعندي اعتراض

بس حچيتها اخذتني للنادي
عزمتني ع غدة ولو موش وكته هساع تالي اخذتني وصارت تفتر بية الجامعة

جاي نمشي ونسولف براحة
صح ما اشوفن بعيني بس نفسيتي محتاجة اطلع من جو البيت وتفكيري بمرضي فجأة سمعت حس ولد من صوتة عرفتة وياي بالشعبة

- ريحان ممكن نحچي شوي

- نعم خوية گول

- وحدنا اذا تسمحين

شمس.. لحظة لحظة وحدكم شنو؟!!
مگاعد تشوف حال البنية وينها وين هالسوالف

- وانتِ منو

- مرت اخوها

- زين يا مرت اخوها
حچيت وياچ آنه وجهتلچ الكلام طلبت تجين وياي شكو تتدخلين

ريحان.. خوية انتبه اعلة كلامك
ما اسمحلك تحچي وياها هيچي ولون عندك شي احچي بالعجل خاطر نمشي

- اعصابچ ما گلت شي
آنه بس ردت اگلج حاب نتعرف شوي
بلكي تصير بيناتنا قسمة لأن مثل ما انتِ مطلقة آنه هم مطلق

ريحان.. لا خوية اعذرني آنه ما افكر بالزواج

- ليش تردين بساع
انطي النفسچ صبر حتى تفكرين بالموضوع زين

شمس.. اخي شبيك
يعني ما ادري شلون تفكر شتشوف هالوقت مناسب حتى تفتح هيچ موضوع وياها

- للمرة الألف اگلچ لا تدخلين

ريحان.. شمس امشينا

شمس.. لا لحظة اريد اشوف هذا شبي
حچيتها وتقدمت علي ردت اتعارك ويا سمعت صوت ايوب صاح بينة من بعيد

درت وجهي شفتة اجة بـ اتجاهنا ع السريع
لزمت ريحان من ايدها ومشينا صار گبالنة بس شكلة كلش عصبي

- صگد تحچون
الي فوگ الساعة ادگن اعليكم عليش ما تجاوبوني

ريحان.. ياااا نسيت الجهاز صامت اعتذر والله

ايوب.. عفية اعليچ
تدرين شني الصار بية وچم فكرة اجت براسي البين ما وصلت ليكم

ريحان.. اسفة والله
ما چنت اعرف راح نتأخر وهمينة ما اجة بالي راح تدگ اعلينة عبن بالعادة ما تجي إلا لمن نتصل احنة
بيك

- هذا ياهو الچان واگف وياچن

- عادي زميل

- وشجاي يسوي جارچن يعني

- هيچي بس سلم ومشى

شمس.. لا مو عادي ولا سلم وراح
هذا واحد صلف والله شنو تعالي نتعرف بلكت تصير بيناتنا قسمة لأن اني مطلق وانتِ مطلقة

بس حچيتها باوع ايوب الريحان بخزرة
- وانتِ شلون تنطي مجال يحچي وياچ هيچي

- ما حچيت والله
هو بس گال هيچي عفتة ومشيت

- يعني ما رديتي اعلي

- لا رديت بس گتلة اعذرني ما مفكرة بالزواج

- امشن يلا وراي شغل الراسي

شمس.. مشينا وعيوني على ايوب
اكو شي مو طبيعي بالموضوع ليش هيچ تغير حالة بس شاف الولد ويانة

صعدنا ويا وخلص الطريق يدخن
بالي كلة يمة چنت اراقبة ظاهرياً يبين هادئ بس عيونة دتگول غير هالشي

وصلنا للبيت وراح
اول ما طبينا للحديقة سحبت ريحان للمرجوحة
التفتت داير مدايري اشوف اخاف اكو واحد يسمعنا

- ها خية شمالچ عليش وگفتينا

- ريحان ايوب شنو بالنسبة الچ

- شني يعني غير اخوي حالة حال إسحاق

- وهو شنو يعتبرچ ؟!!

- اكيدن اختة

- لا حبيتي غلطانة
اگص ايدي وراسي وياها اذا ما طلع ايوب يحبچ

- هههههه
شمالچ تسودنتي ولچ

- ريحان والله يحبچ
ولچ ما شفتي شلون ضاج من عرف الولد مصارحچ

- سوة هيچي بدافع الغيرة
عبن هو من يوم يومة يتنوعلي مثل اختة فاطمة غير تربينا اعلة ايدة

- اويلي على گلبة لعد
ولچ يا اختة يا صخام الرجال واگع على وجهه وهاي مخلصتها اخوية واختة هنيالي اي والله

- ههههههه
الله يهديچ وتجوزين من هالأفكار الماعرف شلونها

- اني وياچ والزمن طويل
راح يجي اليوم الأذكرچ بي بكلامي بس والله ساعتها اكفخچ على راسچ لحد ما ارتاح

- امشي خية امشي الجو حار هنانة

اخذتها ودخلنة للبيت
استلمتها مني هناء واني رحت اغير ملابسي
وراها اتصلت على صخر حتى ابلغة برجعتنا وطلعت سويت الشغل العلية

للضهر اجو غسق وإسحاق
باوعت عليها الوجه مورد والضحكة تارسة الشفة معناها شغلي جاب نتيجة الحمد لله

لليل واگفين نسوي بالعشى طبت رؤى بت حنظل
- يا عمة انتِ هنا وآنه ادور اعليچ

ريحان.. اي گاعدة ويا البنيات ضوجة الوحيدي

رؤى.. تعاي اسمعي شني الصار
گبل شوي خالتي دگت اعلة امي وگالت ليها
جمار من يومين كاتل نهلة كتلة اخت الموت وكاضتها الطلوگة بذات اللحظة

بس متلاحگين للفرخ
ولمن سألوها بالمستشفى ياهو العمل بيچ هيچي ما انطت بي وگالت آنه طحت من الدرج

ثناء.. ياااااا
ليش كتلها وهي حامل خطية الطفل

رؤى.. الله اليعلم شمصخمة عبنها موش راحة
بس لا تخافين جابت ولد شحلاتة ولا چنها اكلت كتل وردت ليورة 

ريحان.. سدن السالفة عفية
وعمة رؤى انتِ بعد لا تحچين لية اي حاجة تخصهم مالي غرض عاشوا ماتوا آنه ياهو مالتي

رؤى.. آنه اجيت افرحنچ
المهم حنة خالي مال الزلم يوم الأربعاء
جهزن ارواحتچن عبن جدي گال نمشي نعينهم شوي

ريحان.. ان شاء الله

غسق.. باوعت للباب طلعت
التفتت على شمس سمعتي حنة خالها الأربعاء الطمم

ثناء.. هههههههه
ترى بالحنة يرگصون بيها ميلطون

شمس.. لا مو هي اعداداتها بالعكس ويا اهل نجيبة
يعني باعراسهم تلطم وبفواتحهم ترگص خصوصاً لو چانت فاتحة نجاة

غسق.. هههههه
لا ولچ عباتلچ اسم الله مو الـ هالدرجة

يومين وصارت الحنة
صعدت العصر بعد ما بدلت الود
لگيت إسحاق ديلبس بملابسة ظليت صافنة علي شوية وباوعلي

- ها بوية اعليمن صافنة

- عود هم تطبون بالبيت اقصد بيت عمك

- اي اكيدن بعد الحنة
همينة نجي نسلم اعليهم وهمينة ناخذچن

- لتجي حباب
خلي اخوتك يجون هم هواي ما شاء الله

- ما يصح يابة لازم ادخل اسلم عيب بحگي

- ااااف لو بـ ايدي حتى اني ما اروح والله

بس حچيتها ضحك واجة حضني
- رويحتي صايرة غيرتها مال مسودنين

- اي والله كلش
لو ما معترفلي احسن صرت اغار عليك حتى من عيوني وداعة عيونك

- بس آنه ليچ
ليچ الوحدچ وعيوني ما تتنوع الغير عيونچ وراس ابوي الغالي

لا تفكرين بنجاة
موش اليوم صارلها زمن تركض وراي من أول ما شبت وصارت حرمة

- وتريدني ما اغار ؟!!

- بوية آنه من چنت ضايع
والدنيا طافرة من عيني ما انطيتها ريج حلو تردين هساع وعگب ما عشگت الفستق مالي اتنوع للبلوط

- ههههههه حلوة هاي البلوط

- ههههههه يلا بوية لا تعطليني
غيري اعلة السريع خاطر اشمرچ من دربي

- اي صار
حچيتها وبستة من شفتة ردت اروح سحبني حيل

- عليش تتحارشين ولچ

- رجلي غير

- ها يعني آنه هم لزوم اتحارش عبن انتِ حرمتي

- هههههه متتحارش منو لازك

بس حچيتها باسني من شفتي بلهفة
من يوم ما اعترفلي احس نفسي صرت اتقبل لمساتة بس من توصل الشغلة للجد يرجع الحادث براسي

چنت مندمجة ويا وناسية نفسي
شوية شوية صار يتجرأ بلمساتة على جسمي بس كل الوقت يحچي بـ اذني حتى ما اتذكرهم

ما ادري شلون تجرأت وسويتها
سحبتة من راسة حيل واخذت رگبتة بشفتي
گبل صاح لا ولچ لااا ما اهتميت لزمني من خاصرتي وبعدني عنة

- احبك

- عليش سويتي هيچي
شلون اطلع للوادم هساع وآنه بـ هالحالة

- ما بيها شي حياتي تتغطى بالدشداشة هههههه

- وجع تضحك الفطيرة

حچاها وراح للحمام
ضحكت ويا نفسي مو غسق الفطيرة بعدك متعرفني سيادة القاضي

بدلت ع السريع توني مكملة طلع
لبس دشداشتة ووگف گدام المرايا يباوع صح تغطت بس اقل حركة تبين وينفضح

حسيت علي ضاج
نزل قبلي لبست حجابي ونزلت ورى لگيتهم جاهزين

اخذت ريحان وطلعنا
وصلنا البيت عمهم اول ماطبيت صارت بوجهي نجاة اجيت اشگ هدومي من شفتها حاطة الوردي

شمس.. هههههههه
اگولچ والله هاي راح تخبلني
عندي حمرة ماروني انطيهيا واكسب بيها اجر وثواب

- ههههههه
لا تلوگلها الوردي خليها لاطشة بي

- كرهتني بشكو لون وردي مو بس الحمرة

- هههههه
الله وكيلچ عندي منشفة وردي سويتها للمسح بسببها

- ههههههه
لعد اني هم بس ارجع اسوي منشفة صخر للمسح لأن هم وردية

ريحان.. هههههه
ولچن گعدني وعوفن الوردي تعبت

هناء.. تعاي آنه اگعدنچ هذني لاهيات يگصن بالوادم

غسق.. ضربتها على چتفها بضحكة
اخذت ريحان وراحت گعدت يم خالة نجمة

مو هاي هناء القديمة الچانت تضحك للهوى
هسه حتى من نحچي ونتشاقى لا تشاركنا الكلام ولا الها نفس تضحك ويانة

التهينا بالشغل وما خلصت الحنة إلا بـ 11
طبوا الزلم يسلمون باوعت النجاة ركضت لغرفتها غميتها حيل امداچ اي والله روحي حطي وردي انتِ وبراطم البغل هاي

شوية ورجعت مطوخة المكياج
جابت الچاي قدمت للشيخ وحنظل وراها راحت الإسحاق

چان داير وجهه يسولف
من وصلت يمة التفت حتى ياخذ الأستكان
ظلت صافنة علي باوعت عيونها على رگبتة يعني شافت الأثر لأن تحرك

گلبت خلقتها وابتعدت
صاحت الرؤى انطتها الصينية حتى تكمل التقديم عنها

والله ياربي
يعني رجال متزوج شتتوقعين من عندة
لا وفوگاها تضوج من تشوف اثر المرتة على جسمة

رجعنا للبيت هلكانين تعب
بعدنة بالباب انتبهت الهناء راحت للمغسلة تركض

لحگناها اني وشمس واجة صهيب ورانة
بين فترة والثانية تظل تستفرغ لحد ما روحها تطلع بسبب بعض العلاجات الدتاخذهن حالياً

صهيب.. حبيبتي شجاچ
عوفي هذا العلاج لو اگلچ عوفي هالدكتورة راجعي غيرها احسن

شمس.. لا صهيب
والله الدكتورة زينة بس هذا العلاج اني اعرفة صدگ يأذي

صهيب.. چا اليمتة تظل هيچ خطية ما جاي ترتاح

شمس.. لتخاف عليها فترة وتعدي هي سباعية

صبيحة.. ها شمالها هنيوة

صهيب.. عمة سويلها هذا العصير السويتي ذيچ النوبة

صبيحة.. وچذبتني بسبتة

صهيب.. ههههههه وتالي اليمتة تنسين

صبيحة.. شدعواك هيچي ترجف اعلة بت نجيمة اثگل شوي الثگل حلو

شمس.. ههههههه
يا عمة غير مرتة شلون ميخاف عليها

صبيحة.. ساحلات الزلم سحل يمة منچن بنيات المدينة

هناء.. آنه منكم عمة شو صفيتيني وياهن

صبيحة.. لا انتِ نص ونص لكت همينة موش تربيتتا

صهيب.. عمة بس سويلها العصير وشني تردين انطيچ

التفتت على هناء
هذا الزلمة خلي بنص عيونچ
عبن لو تلفين كل الدنيا ما تلگين ادمي يحبچ نص ربع حبة

هناء.. ادري عمة والله يخلي الي يارب

غسق.. راحت عمة صبيحة تسويلها العصير
واني وصهيب وديناها للغرفة تمددت وانطيتها علچ لأن نفسها لسه دتلعب

هناء.. تعبت يربي شوكت اخلص من هالسالفة

صهيب.. گولي يا الله
هساع جاي نگول اعليچ سباعية

هناء.. انت هم سودة علية يوميا مخوفتك وياية

صهيب.. ليش چم هناء عندي
هي وحدة لو تطلب ارويحتي مني همينة ما ابخل اعليها بيها

حچاها وباسها من راسها
عفتهم وطلعت فدوة الولد الشيخ ضاري ماكو احد برجولتهم وحبهم الصادق والنقي

ثاني يوم صار العرس
صبحت مريضة شحالني بس ما گدرت إلا ما اروح

ما ادري شلون عدة
بس خلصت الزفة اتصلت على إسحاق واجة رجعني للبيت لأن شاف حالي قبل لا اطلع

الجمعة للعصر صرت احسن شوية
گاعدة وياهم بالصالة اندگت الباب راحت رؤى تشوف منو شوية وطبت هي وام ايوب واختة

- لچ ريحان اجت فاطمة

- يا والله شكثر مشتاگتلها

گبل اجت حضنتها وسلمت عليها
ظلينا گاعدين نسولف سوالف بنات شوية وانصدمت ذيچ الصدمة بكلام ام ايوب لمن گالت للحجية

- خيتي ام حنظل
صح الوكت موش مناسب المثل هالحچي
بس وليدي الضبع ما عاد يصبر ازيد وهل تشوفي دزني اعليكم خاطر اطلب لي ايد بنيتكم ريحان اعلة سنة الله ورسولة....

يتبع

لتنسووون ⭐⭐⭐⭐⭐⭐
كل الحب ❤🥀