رواية وضاقت الأرض بي الفصل السادس والخمسون 56 - بقلم لبنى الموسوي

-خيتي أم حنظل، صح الوكت موش مناسب المثل هالحچي، بس وليدي الضبع ما عاد يصبر أزيد، وهل تشوفين دزني اعليكم خاطر أطلب لي إيد بنيتكم ريحان اعلى سنة الله ورسوله.

ريحان: صح آنه ما أشوفن، بس التفتت ويا مصدر الصوت مصدومة من طلبها. أيوب بعمر أخوي الميزان، ربيت اعلى إيده عبن هو الچان يگودني من إيديني وياخذني للمدرسة ويا أخته فاطمة. كل عمري أشوفن إسحاق بي، ما مر فرد يوم وباوعت له بغير نظرة الأخ، وهو همينة بكل صغري يعاملني معاملة الأخو اليخاف على أخته من كل شي. ولمن شبيت وتفرع عودي، صار يتعامل وياي مثل أي زلمة غريب، ما يرفع عينه بعيوني إلا للضرورة، ولون رفعها وتنوع ما أشوفن بنظراته غير بس الأحترام. من هيچ چنت أعتبره أخوي، لا الواقع ولا العمر ولا حتى العلاقة التربطني بي من طفولتي تسمحلي أفكر بي زلمة لية.

سمعت أمي گالت لها: نتشرف يم أيوب، لكن انطيني مهلة أشاور أبوها وأخوتها، وعودن يصير خير إن شاء الله. ظليت گاعدة على أعصابي، ما عولت يمشون بس سمعت حس أمي بالصالة گمت على حيلي. -يمة تحچين من صدگچ؟ عليش تگولين لها أسأل أبوها وأخوتها؟ شني المترجيتة مني فهميني. -چا يمة شني الينگال بمثل هيچ مناسبة؟ غير الأصول تحتم اعلية ما أحچي أي چلمة بلاية شور أبوچ وولده. -چااااا وآنـه؟ رأيهم الأهم لو رأيي ما جاي أفهم اعليچ.

-شني لا تگولي لي راح ترفضين يمعزاية؟ -أكيدن أرفض، وأترجاچ تنهين السالفة من يمچ وما تفاتحين هلي بيها. عبن تدرين شنهو أيوب بالنسبة ليهم، وهيچي راح يبدون يضغطون اعلية وآنه ما ناقصة كلششش. صبيحة: يا يا تسودنت البت، أنتِ من كل عگلچ تنخش هيچ سالفة اعليهم؟ لون ما سمعوها من عدنة يسمعوها من الزلمة، شنهي عذرچ ساعتها ليهم؟ الحجية هيلة: والله ما أعرف، تريد تورطني ويا أبوها، لا وبموضوع الضبع هي بس هاي العايزة.

ريحان: آنه ما أريدن أتزوج، شني هي گوه؟ الحجية هيلة: عودن من يجي أبوچ گولي له هالحچي، آنه مالي غرض منچ ليهم طلعيني من السالفة. غسق: بعدنة صافنين عليهم، نشوف شديصير، گالت ريحان أريد أروحن الحجرتي. ظلينا وحدة تباوع للثانية، چان تصيح حيل آنه مو جاي أكل وحل وأگولن وحدة من عدچن تاخذني الحجرتي. قبل لا أگوم الها مشت سريع، ردت ألزمها ما لحگت، عثرت بطرف الحصير ووگعت على وجها.

أني بـ إيدي ود، ركضت شمس شالتها من الگاع، أباوع الريحان عيونها صارت دم هي من غير شي مو زين عليها العصبية. درت وجهي على هناء، انطيتها ود وگلت لهم خلوني بس أني وشمس يمها، لأن محتاجة واحد يوگف وياها وبنفس الوقت تحتاج للهدوء هسه. أخذناها للغرفة، أول ما طبينا كفختها شمس على راسها، دفعت إيدها حيل ليش تضربيها ولچ؟ -لأن هذا شرطنا وريحان تعرف قصدي، والله حسيت أيوب يحبها وهي خلصتها أخته وأخوي. شنو گلت لچ قبل چم يوم أحچي؟

مو گلت لچ ريحان أيوب يحبچ وعيونه المليانة غيرة فضحتة گدامي. بس أنتِ شسويتي ضحكتي اعلية، وهاي هسه أجه يخطبچ حتى أني الأضحك عليچ. غسق: هو أبد ما يبين مشاعره، والله من نصعد بالسيارة لحد ما ننزل عيونه ما يرفعها بالمرايا. بس أني هم شكيت بي يحبها، من تزوجت جمار حيل تغير للأسوأ ولمن تطلگت مو ذاك أيوب حتى ابتسامته رجعت له.

شمس: والله بس ريحان گالت ربيت على إيده صحت أويلي عليك. عرفته يحبها من زمان، سودة علية شگد لعد تعذب لمن تزوجت غيره وهو واگف يتفرج. عززززة ولچ غسق، مو أيوب هو الي زفهم بيومها لو أني غلطانة؟ -أي هو. -يبوووو الله يساعد گلبة شلون تحمل يزفها لغيره بإيده. -ياااا تذكرت شي، أبوية مو طلب منه يزف ريحان؟

اعتذر گال راسي يوجعني. وحتى بيومها ظل إسحاق يقنع بي، أتذكر گال له هي حباية ابلعها ويمشي الحال، طلع المسكين ديتحجج علمود يخلص من هالموقف. -زين هو ليش ما خطبها؟ يعني حسب ما أشوف علاقته قوية بيهم، أكيد لو طالب إيدها ينطوها له وهم مغمضين. -ما أدري والله، بس المحيرني معقولة إسحاق يعرف بي دز أهله اليوم حتى يخطبوها؟ -من يجي إسألي، هو أقرب شي لأيوب هواي راح تحصلين معلومات من عنده. ريحان: شمالچن أنتِن؟!!

اطلعن شو اطلعن وأتركني الوحيدي بلاية هالخرابيط. شمس: ريحان بشرفچ فكري لا ترفضين بسرعة. -گلت امشن مناااا. غسق: ههههههه، أمشي ولچ لا تجينا ضربة تايهة البنية تخبلت. أخذت شمس وطلعنا، لليل أجه الشيخ والولد كملنا العشى وفتحت الحجية الموضوع وياهم. باوعت الصدمة انرسمت على وجوههم، شوية وضحك الشيخ گال: ليش لالة وين انحصل مثل الضبع زلمة خاطر نأمنه اعلى بنيتنا وإحنا مغمضين. الحجية هيلة: بس بنيتك رافضة يا ضاري. -هي گالت ليچ؟!!

-أي هي، وحتى همينة ما رضت أفتح وياكم الموضوع خاطر لا تضغطون اعليها وهي بهالحالة. -يصير خير بويه. حچاها وظل گاعد، استغربت كلش شلون هيچ سكت، چنت متوقعة گبل راح يگوم علمود يحچي وياها ويقنعها. بـ 12 صعدت لغرفتي، چان إسحاق ديشتغل على قضية رحت للحمام أمشي وقت بين ما يخلص. طلعت لگيته ديلملم بالأوراق، جففت شعري داروح يمه صاح: طفي الضوة. گلت له: لا خلي شوية أريد أحچي وياك. -خيرچ بويه؟

-على موضوع ريحان، أنت تعرف أيوب دز أهله يخطبوها لو تفاجأت مثلنا؟ -لا تفاجأت حالي حالكم، حتى همينة ما خطرت السالفة اعلى بالي كلش. -ليش؟!! -عبن أيوب أخونا السابع، يعني كل عمرنا چنا نعده أخو الريحان مثلنا وأزود سواء آنه وإخوتي أو أبوي. -هااا، زين هو شعجب ما متزوج مو چبير بالعمر؟

-ظروفه صعبة شوي، وبذات الوكت نفسه عزيزة ما يقبل المساعدة حتى من أقرب الوادم له. شكثر أبوي حاول يزوجه ما رضى، حتى آنه حچيت وياه بيناتنا أكثر من نوبة، لكن موقفه واحد مستحيل يغيره بچلمة و چلمتين. -أي وشنو هالظروف أحچيلي؟ -بويه أنتِ شكثر فضولية، أمشي طفي الضوة أرد أنام وراي گعدة من الفجر. -ليش شعندك من الفجر؟!! -شغل ويا أبوي. -لعد أني عندي امتحان ما تدرسني شوية؟ -الأحد غير؟!! -أي.

-أي بويه، چا باچر بالليل إن شاء الله أقريچ ساعة زمن ويمشي الحال. -هههههه ساعة بس؟ -أقل همينة، وشرط إلّا درجة كاملة لون فتحتي مخچ وياي. -ههههه، مخي وعيوني وگلبي وكل شي بية وياك، ليش أني أگدر أشرد بفكري عنك وأنت گاعد گبالي. -طفي الضوة وتعاي. حچاها وغمز لي، هزيت راسي بضحكة وگمت. طفيت الضوة ورجعت تمددت يمه، گبل لمني بحضنه بحيث حسيت نفسي اختفيت بين أيديه. غمضت عيوني مبتسمة، چان يهمس بـ أذني:

اسمعي هاي ولو آنه صار لي فوق الأربع سنين ما مغني لبشر. يم العيون السود ما أجوزن أنه يم العيون السود ما أجوزن أنه وخدچ الگيمر أنه أتريگ منه خدچ الگيمر وأنه أتريگ منه لابسة الفستان وگالت لي أنه حلوة مشيتها دتمشي برهدنة لو تحب خادم خادمها أنه ولعوف الدولة واعوف السلطنة واگفة بالباب وتصرخ يا لطيف لا أنه مجنونة ولا عقلي خفيف من ورى التنور تناوشني الرغيف يا رغيف الحلوة يكفيني سنة -لتسكت حباب غني بعد حبيت صوتك كلش.

-أي ليش لا تامرين. گلي يا حلو منين الله جابك گلي يا حلو منين الله جابك خزّن جرح گلبي من عذابك خزّن جرح گلبي من عذابك گلي وششفت مني أذية گلبك من صخر ما حن علية لو چان الهجر منك سجية تعال ونصلح وهاي هي گلي يا حلو شجابك علية چملت الألم والهم أذية وأني الجرحت أيدي بدية هويتك وأنت مغتر بجمالك گلي يا حلو منين الله جابك -الله الله طلع المضموم، طلع عيني ليش لا. -هههههههههه. -ليش تضحك؟

احچي الأغنية الأخيرة چنت دتلمح بيها شي مو؟ گلبك من صخر ما حن علية وچملت الألم والهم أذية لا وكلها كوم وآخر بيت كوم هويتك وأنت مغتر بجمالك مدري شبابك. -هههههه، بويه نامي لا تسويها سالفة بنص الليل. -احچي بداعتي أني مأذيتك مووو؟ -حتى الأذية منچ اعلى گلبي أحلى وألذ من العسل. -حيال والله، ترجمت مشاعرك بـ هالأغنية ميفيدك الحچي بعد. -يلا تصبحين اعلى خير بويه.

-نام عيني ناظم الغزالي، هم وأذية وشجابك علية الأغنية كلها خلصها بس يرزل. ما گال كلمة بيها حظ يتغزل بيها، عود بس البداية گلي يا حلو وهم ما انطى گلبة يكملها فگال شجابك علية. -هههههههههههههه، ولچ حتى هالمگرود ما خلص من لسانچ. اتركي الرجال مرتاح بگبره، نزلتي اعلى دوسة ونص يمچ گرباچ، والله حلوة هساع آنه شصابني وفكرت أغني ليچ. -هههههه، مو أنت تقصدت والله، ما لگيت يعني بس هالأغنية لو ما تريد تمرر ضيمك من جوة الجوة بكلماتها؟

-وأم العيون السود ما علقتي اعليها يعني؟ -بس أني عيوني مو سود. -نامي ولچ لا أبتلي بيچ ناااامي. -هههههه، صدگ حبيبي نسيت أگولك، الكلية يريدون أسماء المحاكم النطبق بيهن ما عرفت شكتب گلت أجي أسألك أول. -أي زين سويتي، أكتبي محكمة ×××××× وانتبهي للخيارات عدل ترى لون صدرت الأسماء ما تتغير بعد. -أنت تداوم بيها هاي المحكمة؟!! -أي. -يعني راح أحضر وأشوفك وأنت.....

بعدني ممكملة حط أيده على حلگي، رويحتي ما الله يهديچ وتنامين واليرحم أمچ الطيبة تنوعي للساعة شلون أگعد الفجر بعد. -أي أي آسفة، يلا نام أروح أشرب ماي وأرجع تريد أجيبلك وياية؟ -لا بويه مشكورة. بسته من خده وگمت. نزلت جوه أشوف ريحان خاف گاعدة وتحتاج الحمام طبيت لگيتها نايمة سديت الباب ورجعت صعدت. ثاني يوم الوضع ظل مثل ما هو، حتى ريحان استغربت سكوتهم صح هي متريدهم يفتحون وياها الموضوع بس هدوءهم يحير.

لليل تعشينا وصعدت من وكت، شوية ولحگني إسحاق درسني ساعة ونام لأن گاعد من الفجر. گعدت الصبح راجعت شوية، وراها نزلت جوه ساعدت ريحان وجهزت الريوگ ويا البنات لحد ما أجانا أيوب. من صعدت عيوني عليه، ما صدر منه أي رد فعل معناها بعد ما وصله رفض ريحان وإلا مچان يظل بهالبرود هذا. مرت الأيام واجت امتحانات آخر السنة، آخر امتحان دأقرا بيه اندگت الباب وطبت علية شمس. -ادخلي غسوقة. -أي حبيبتي تعالي. -آسفة راح أعطلچ شوية عن دراستچ.

-لا عادي، بس خطية ريحان شلون عفتيها وحدها؟ -لا مو وحدها، هناء يمها وثناء هم دتساعدهم على فراغها. -أي يلا سولفي شعندچ. -يمكن أني حامل. -والله تحچين صددددگ؟ گمزت حطت أيدها على حلگي. -أششش ولچ، ليسمعون نصي صوتچ شجاچ. -يااا وليش متريديهم يعرفون؟ -لا مو هيچ بس أريد أتأكد أول، خاف يطلع ماكو حمل وأتفشل گدامهم ما أريدهم يتأملون بالخالي بلاش. -زين شلون شكيتي بنفسچ؟

-فايتتني أسبوع، وراسي مسطور چان صخر ينام قبلي هسه بعده ما طاب للغرفة يجي يلگيني نايمة. -لعد شمنتظرة متروحين تحللين؟ -أي هو راح أحلل، بس گومي وياية ما أگدر أروح وحدي، صح عندچ امتحان بس منتعطل شغلة نص ساعة مو أكثر. -أي بعيوني بس إسحاق شيقنعه نطلع وحدنا؟ -هذا المختبر قريب حتى ميحتاج سيارة. -خلي نروح على خالة نجمة أحسن، لأن رجلي وأعرفه مراح يوافق نطلع إلّا هيچ. -أي ميخالف، هاچ موبايلي اتصلي حافظة رقمه لو لا؟ -أي حافظته.

انطتني الموبايل ونزلت. دگيت على إسحاق مكالمة ما رد بالثانية قريب متخلص جاوبني. -ألو نعم تفضلوا. -حبيبي أني غسق. -منين جاي تتصلين؟!! -من شمس، أگول تريدني أروح وياها، عدها مراجعة يم الدكتورة وخالة نجمة هم راح تجي ويانا تقبل أروح؟ -چا وامتحانچ شلون؟ -منتأخر نص ساعة مو أكثر لأن هي حاجزة. -روحي بويه ومن ترجعين دگي اعلية من ريحان. -إن شاء الله. سديت الخط وگمت بدلت.

وصلنا للمختبر حللت وظلينا ننتظر النتيجة ربع ساعة وصاحوا اسمها. -گومي شبيچ متسمعين ديصيحوچ؟ -ما أگدر والله، عفية گومي أنتِ جيبيها وإذا سلبية كل شي لتحچين. -هههههه، مخبلة والله الي يشوف رجفتچ هاي يگول صار عشر سنين محرومة من الجهال. -دگومي جيبيها ولتحچين زايد. عفتها تريد تبچي من الخوف. طبيت للمختبر سلموني النتيجة قبل لا أفتحها گالت المحللة ألف مبروك إيجابية.

تشكرت منها وطلعت أركض، لو بيها مجال چان تشاقيت وياها شوية، بس أدري كلمة وحدة كفيلة تموتها ع الخوف الچانت عايشة بيه ساعتها. بس شافتني صاحت بشري. رديت بضحكة ألف مبروك راح تصيرن أحلى ماما. من الفرحة بچت، گامت حضنت خالة نجمة ورجعت علية حضنتني، وراها طلعت للشارع انطت صدقة للفقيرات الـ بالباب. رجعنا للبيت شمس ما تنطي فرحتها لأحد، طلبت مني ما أحچي لأن تريد تبشر صخر بالأول، أني هم تطمنت على ود وصعدت لغرفتي حتى أكمل امتحاني.

شمس.. الساعة صارت متمشي، منا لما أجه صخر حسيت عمر فات من عمري بس شفته گبالي أشرتله يلحگني. تأخر بالعشر دقايق ما جاي، أول ما فتح باب الغرفة صحت بعصبية هاي وين صرت يمعووود؟ -هههههه، ما شفتي عمتي وأمي جاي يحچن وياي مترهم أعوفنهن وأجيچ. -دتعال هسه مو وكت هالسوالف. سد الباب وتقرب لزم أيدي. -شمالچ حبيبتي أحد غاثچ عليش لونچ مخطوف؟ -لا مو هيچ، بس عندي الك خبر على گد ما حلو ما أعرف منين أبدي بيه وشلون أحچي. -خير يارب.

ركضت للجنطة طلعت النتيجة، خليتها بـ أيده وبست خده حيل آسفة طلعت بدون علمك بس متأكدة من تشوف هاي راح تعذرني. رفع حاجبه ورجع باوع للورقة، فتحها يقرا شو هذا تأخر كلش معقولة ميعرف، مديت أيدي أشرتله على النتيجة أقرا بس هاي صخر معليك بالباقي. ظل على نفس وضعه، رفعت راسه عيونه بيها لمعة عرفته مصدوم وفرحان بنفس الوقت گبل ضحكت. -حقك والله، هو أني گلبي راد يوگف من عرفت أنت شلون.

يلا حبيبي، كافي صدمة صحصح أريد أشوف الفرحة بعيونك. حچيتها وضميته الگلبي حيل، ثواني وعصرني بحضنه ألف مبروك رويحتي الله يگومكم الي بألف سلامة. -الله يسلمك يا روحي، يعني فرحان بهالخبر مثلي لو لا؟ -وأزود وداعتچ، هالخبر صار لي ناطره من يوم ما طيحتي حملچ الأولي شلون ما ترديني أفرح بيه؟ -أي والله وأني هماتين، هسه شنو نطلع نبشرهم لو شلون؟ -ههههههه، لا يبوي شل قضية فشلة أبوي وأخوتي هنا. -لعد شلون أول وتالي يعرفون؟

-أنتِ أحچي لأمي وعمتي ومالچ غرض بالباقي. -ها يعني همَ هنا يعتبرون وكالة الأنباء؟ -ههههههه جبتيها عدل. -لعد يلا امشي خلي نفرحهم. حچيتها وطلعت أركض قبله، بعدني ما گلت لهم گاموا يرگعون الهلاهل حتى الجهال التموا على حسهم. الكل عرفوا بالخبر، صارت عيني على هناء واگفة بالزاوية وتباوع علينة من انتبهت لي أجت تبارك. -ألف مبروك خية يوم حمام أنفاسچ. -حبيبتي يوم الألچ إن شاء الله. -الله كريم.

ريحان.. خبر حمل شمس غير من جو البيت شوي. كلش فرحنا بيومها، حتى امتحاني نسيته ظليت گاعدة ويا البنيات لحد ما سحبتني هناء. ظلت وياي ما عافتني لتالي الليل، توني متمددة أرد أنامن سمعت حس أبوي يمي گال نايمة بنيتي. -لا بويه گاعدة تفضل. -ما أعطلنچ وراچ امتحانات، بس ردت آخذ منچ خبر أخير خاطر أردن اعلى أيوب صار له هواي ناطر. -ليش أنت لسه ما جاوبته؟!! -قلت أخليك تفكرين شوي، يجوز تغيرين رأيك. -لا بوية.

آنه ما أريد أتزوج لا من أيوب ولا من غيره، إلا إذا كنت مستثقل مني هنا تختلف. بس حكيتها باسني من راسي: -اكو جسم يستثقل من روحه؟ غير أنتِ رويحة أبوكِ. -چا بوية رد له خبر. أيوب بالنسبة لي أخو وأزود، وراح يظل هيچ، عيبان الصار ما يغير من هالحقيقة شي. وأترجاك لا تحاول. كل اللي ببالك أعرفه، وما في داعي تعرفني يا هو أيوب. لكن آنه طويت صفحة الزواج من حياتي. وبذات الوقت أيوب أخوي، وما في بنت تفكر بأخوها زوج لها تالي العمر.

-اللي تريدي يجرى لك بنيتي. نامي هالساعة، تصبحين على خير. -وأنت من أهله. تمددت أحاول أنام. هالموضوع له فترة ياكل ويشرب وياي، لسا ما استوعبت شلون أيوب تقدم لي. عقب يوم أتى امتحاني. طلعنا للجامعة، امتحنت وساعدتني صديقتي أوصل للحديقة، خاطر أنتظر غسق هناك. بعدني قاعدة أنتظرها سمعت حس أيوب سلم. اتفاجأت من جيته بهيچ وقت، عيبان ما رمشت عليه، بس ما بينت هالشي. -ها خويه، ترى غسق لساها بالامتحان. -إي أعرف.

آنه أجيت خاطر نحكي لوحدنا شوي، لو ما تمانعين. -إي تفضل أسمعك. -أبوي أمس قال لي أنتِ رفضتيني. -قبل أي شي أيوب. آنه أعزك فوق ما تتصور، ولا تظن رفضتك العيب بيك لا سامح الله. لا وحق من أخذ نظري بين ليلة ويوم. آنه ما أريد أتزوج، وهذا كل الموضوع، يعني رفضي سببه بيّ آنه موش بيك. -عليش فهّميني. لساك بأول عمرك، تريد تقنعني راح تظلين هيچي لآخر يوم بحياتك؟!!؟ -إي الزواج موش كل الدنيا.

وعقب كل شي عشته وعانيت، أطلع مسودنة لو رضيت أعيد هالتجربة مرة أخرى. -ما يصح تخلين كل الزلم بكف واحد. لو جمار كان ناقص، موش معناتها كل الزلم مثله، وتنوعي لإخوانك خاطر تعرفين قصدي عدل. -أعرف أيوب. لكن آنه ما أريد أعيد التجربة نوبة أخرى. وضيف عليها أنت أخوي، شلون تريد أفكر بيك زوج... قاطعني بسرعة: -آنه راح أظل ناطرك. لحد ما غيرتي رأيك تلقاني موجود وشاريك بماء عيوني، غير هالشي ما أقدر أحكي وياك.

-أعرف لأن آنه بنت الشيخ وأخت إسحاق. بس أنت طول عمرك تاخذني وتردني للدراسة، عليش هالساعة تغير الحال وصرت ما تقدر تحكي. -لا آنه كل عمري هيچي، بس أنتِ بالك موش وياي. -شلون يعني؟ -تالي تعرفين. هاي حرمة إسحاق أجت، تمشون لو ظالين شوي؟ -أنطر خل أسألها. غسق: -ها أيوب، شوكت أجيت؟ -هالساعة. تمشون لو أروح وأرد ليكم لحد ما تدقون عليّ. -لا أنا تعبانة ما بيّ أظل. ريحان نروح لو عاجبك نبقى شوية بالجامعة لأن آخر يوم؟ -لا خية امشي.

شو هي بكل الحالات آنه ما مستفادة شي من ظلتي هنا. -يلا لعد قومي. أخذت أيدها ومشينا. أكيد أيوب أتى علمود يحكي وياها. لأن من وصلت لقيته قاعد قريب منها، وبس شافني سكت. وصلنا للبيت وراح. صعدت بدلت ونزلت أسوي الشغل اللي عليّ، أجتني رؤى بنت حنظل. -غسق ما تقريني شوي. أبوي قال هاي آخر سنة لك، لو رسبت بالسادس ما يخليني أكمل بعد. -شنو عندك؟!! -تاريخ ومالي واهس أقرأ. -يلا هسّه بس أخلص التمن وأدرسك، تتدللين. -شكرًا حبيبة.

حكتها وطلعت من المطبخ. صح كنت تعبانة كلش بس والله خطية. شفت حنظل شلون تعارك وياها قبل الامتحانات. إذا هي الله يسلمها كل سنة تخلصها بسنتين. حتى الصباحي بعد ما يقبلوها بسبب عمرها وحولت ع المسائي، وبعدها على نفس الرنة. خلصت شغلي ورحت لها. ظليت أدرس بيها كل شي محافظة، آخر شي قعدت أشرح لها بالعامي علمود يطب بدماغها. لليل وأنا على نفس القعدة. قريب الـ 12 وصلنا آخر فصل بالكتاب. هنا حسيت روحي انهاريت وما بيّ أكمل بعد،

باوعت لها: -رؤى حبيبتي. امشي خل ننام، ومن الفجر أقعد وياك نكمل الباقي. -أخاف تاخذك النومة. وآنه أخجل أدق عليك الباب وعمي موجود. -لا لتخافين. أوقّت موبايل إسحاق علمودك بالخمسة، زين؟ -إي كلش زين. -يلا لعد تصبحين على خير. حكيتها وطلعت. صعدت لغرفتي دأفتح الباب، طلع إسحاق قبل صاح: وينك اليوم؟ -ويا رؤى. خطية عندها امتحان وكل شي ماكو، قعدت أدرسها. -رحم الله والديك. -ووالديك بالرحمة. دخلت للحمام غسلت وأجيت تمددت يمه.

-عود وقّت موبايلك بالخمسة حتى أقعد أكمل لها المادة. -هاك أنتِ وقّتي. فتحه وأنطاني إياه. دأوقّت المنبه لمحت رسالة أجته بالواتساب: "نامت إسحاق؟!! ما لحقت أشوف الاسم. وقّته وخليته بحضنه، أخذه يمكن جاوب لأن شفته ديكتب، وراها تمدد دقايق ونام. ما اهتميت. قلبي خلص صايرة حتى بروحي أشك بسبب النقص اللي بيّ، وهاي أبد مو وضعية. حسيت الفجر المنبه قاعد يدق. طفيت وقمت، نزلت بالقوة قعدتها،

فوقاها تقول: "خاف تاخذك النومة"، لو عايفتها حتى الامتحان يروح عليها. لحقت أخلص لها المادة. والحمد لله من أجت راجعت لها الأسئلة مجاوبة زين. كملت وياها باقي الامتحانات على نفس النمط. صح تعبت بس فرحت بنفس الوقت لأن حسيت بنفسي قدمت لها شي حلو وراح تعبر السادس وتكمل دراستها إن شاء الله. هناء: -العلاج أخذ مني كل حيلي. ما أعرف شنو اللي قاعد يصير وياي، دوم أحس بنفسي خاملة وما بيّ أسوي أي شي. ولون أجتني نوبة لعبان النفس.

أنتهي حتى معدتي تظل توجعني، وهالشي أثر كلش على حالتي النفسية بهاي الفترة. واقفة ويا البنات بالمطبخ نسوي العشى. مخبوصين لأن بيت عمهم موجودين يمهم، وساعة اللي يجيهم خطار تقوم الدنيا وما تقعد بعد. طبت نجيبة ويا أختها نجاة. وقفن يجهزن بالمواعين، وإحنا نسوي الزلايط. كان أسمعها تقول لأختها، وتعمدت تحكيها لأن ريحان قاعدة ويانا. -چا غير بنات عمي حسان دزوا لي هاي الصورة، تنوعي. -يا صدقة أغدي له، يا هو هذا الفرخ الحلو؟

-ابن جمار. ويمكن مسمي أركان راكان، هيچي شي اسم غريب يعني. -يمه شوفي العيون شحلاتها، الله يخلي لأهله. باوعت لريحان. ما تعرف بعد وين تودي وجهها من القهر. قبل شمس أخذت السچينة اللي بيدها وراحت عليهن ع السريع: -أنتن وتالي وياكن. شوكت تحسّن على دمكن وتعوفن البنية بحالها. شعليها هي يعني. خلف مات، عاش، تزوج مرة عشرة. هي شكووو؟ ليش جايّات تسمعنها حكي يسم اللي يقول وحدتكن حية. نجيبة: -وأنتِ يا هو اللي حكى وياكِ.

أصلًا آنه ما أدري بريحان هنا، وبعدين جمار يظل ابن عمنا، خوبن ما تريدين نقاطعهم لأجل ريحان وغيرها. -لا تقاطعينهم براحتك. بس سيرتهم ما نريد نسمعها هنا. تريدين تحكين بيهم روحي لأهلك بغرفتك، بالوادي أي مكان، بس مو هنااااا. -ووادي أهلك بنت الكلب، بيش مفاولة علينا؟ -هاي عليمن قاعد تغلطين؟ -عليك وعلى الوادم اللي راحت وما عرفت تربيك. -لك آآآهلي يشرفوك ويشرفون عشيرتك يا حقييييرة. -يلا لك مقطمة. لا تشوفيني سكتت لك ذيك النوبة.

من مديتِ أيديك عليّ، هالنوبة أكسرها لك، فاااهمة؟ -يلا شو كسريها حتى أكسر رأسك. وديري بالك تجيبين سيرة أهلي على لسانك مرة ثانية. غسق: -عوفيها شمس، خلي تولي. اللي ما عندها احترام للشيب اللي برأسها ما تيجي تتعلم الاحترام على آخر عمرها. نجيبة: -خوش سويتن تحالف. ما ظل عليّ بس بنات الشوارع اللي ما نعرف أصلهن وفصلهن منين. شمس: -ولك آآآآحنا بنات الشواااارع؟ حكتها ودفعت نجيبة حيل.

رادت تكفشها من الحجاب، قامت نجيبة ودفعت شمس بكل قوتها بحيث رجعت مسافة وانضربت بالكاونتر على ظهرها. قبل قامت تصرخ: آآآخ ولكم ظهري. ركضنا عليها نريد نقومها، ما تقدر. أتوا الولد على أصواتنا يركضون. دفعنا صخر وقعد يم رأسها: -شني الصار، شو وقعها هيچي يمعووودين؟ شمس: -ظهري صخر، ظهررري راح أموووت. الشيخ ضاري: -قوم أخذ حرمتك بوية، تلاحق للفرخ لا يصير له شي. هناء: -بس حكاها ركضت لغرفتها.

جلبت لها العباية لبسناها أنا وغسق، وشالها صخر للمستشفى، وعمة صبيحة راحت وياهم. بعدني واقفة وكل جسمي يرجف عليها. دق جهاز صهيب، كان واقف بصفي، باوعت هذا رقم غريب. هاي المكالمة اللي قلبت الموازين عليّ. المكالمة اللي خلتني أكره هاليوم اللي كان أبشع أيام حياتي. هذا اليوم اللي أتمنى أشيله من تاريخ السنة. أنتزعه وأمحيه من أيام عمري.

هاليوم اللي كان فيصل بين حياتي ومماتي وسبب رئيسي لخسارتي لنفسي، ومستحيل اكو شي يعادل خسارة النفس أو يجبر كسرها.