رواية وضاقت الأرض بي الفصل الخامس والسبعون 75 - بقلم لبنى الموسوي

#وضاقت_الأرض_بي

للكاتبة #لبنى_الموسوي

ملاحظة/ بارت مفاجئ لعيونكم وباچر استراحتي
متابعة ممتعة 💛

مشيت من يمة شغلت الضوة
رجعت كررت سؤالي وين چنت بدون لف ودوران
اندار عني يفرك وجهه بعصبية
وچان اشوف اثار بوسات الخاتونة أمل تارسة رگبتة اكثر من اربع أماكن

ما صدگت الگاعد اشوفة گدامي
يمكن بعدني نايمة يمكن احلم يمكن عيوني من النوم مدتركز زين

مديت ايدي الچانت ترجف بشكل مو طبيعي
لمست رگبتة نز بخوف
بعد نفسة عني يحاول يخفي بيهن تقربت منة اكثر ورجعت لمستها

- صخر !!!

- شمس هدي اترجاچ هدي
گبل لا تسوين اي شي نندم اعلي تالي اسمعي مني

- شنوووو ااااااااااااسممممع
جايني وكلك اثار من هذيچ النگسة وتريدني ااسمعك

حط ايدة على حلگي سكتني
نزل ايدة الثانية حظن بيها بطني حيل
هدي يبوي لا يصيبكم شي واسمعي مني والله ماصار شي والسالفة موش مثل ما جاي تفكرين بيها

گمت احتاجيت للحمام
وعطشت والله عطشت وطلعت اشرب ماي
من جاي ارد للحجرة طلعت أمل بوجهي تبچي الحگ صخر باقر وگع نوبة الأخرى

ركضت قبلها للحجرة
دخلت ماهو الفرخ ومامش بشر بالمچان اصلاً
ما اسمع إلا طگت القفل
درت وجهي اعليها نازعة العباية وبثياب النوم الخزي والمفتاح مدري وين شامرتة

آنه بين الصدمة وبين نظراتها الشيطانية ضعت
گلتلها شجاي تسوين أمل
تقربت مني
حطت أطراف اصابيعها اعلة حلگي ما أحسن إلاوهي جاي تتلمس جسمي بجرأة

اظلني بشر موش نبي ولا أمام
ما انطتني مجال هي ومنظرها الكلة اغراء وضعفت
بس ما صار شي

وداعتچ ما صار أي شي ولا بادلتها
انتِ واخوي منعتوني حتى ارفع ايدي والمس طرفها

صحيت اعلة نفسي
چانت جاي تبوس برگبتي دفعتها حيل
ظلت تتوسل بذل
اريدك صخر ما تحس شمالك الله يخليك حس تراني لية بيك مثل ما الشمس وازود بعد

حاولت ردت ابعدها عني وترد تهجم
تبادلت الأدوار
لحظات جزت انگلبت بيها أمل زلمة براسي ولون چان يطيح بايدينها هي الـ ××××××

رغم كل الأغراءات العملتها وياي بس ماگدرت تغريني
وصلت بيها تتعرى جدامي وما اهتميت
كل الي ردته منها بـ هاللحظات
تناولني المفتاح خاطر اطلع من هالحجرة وافتك من شرها

بس اول لحظة وداعتچ
عبن چنت مصدوم من منظرها گدرت توصل الرگبتي
بس خلافها تعرت جدامي وما انهزت شعرة مني

اخر شي جزعت روحي منها
سحبت الشال
سديت بي حلگها وضربتها ضرب بس الله يعلم بي

تالي كضيتها من شعرها للگاع
صحت المفتاح وين
اشرت جوة الميز اخذتة وفتحت الباب ورديت ليچ

- هه لا والله
يعني تريد تقنعني هي من أول مرة تسوي وياك هيچ

- لا هي حاولت من گبل
لكت موش بالفعل وداعتچ بالكلام وبس
مثلاً لمن ابنها باقر تخربط وظلة بحضني لبين ما هاد هي باستني من خدي عودن تشكرني

ونوبات من تصير جدامي تتنوعلي بنظرات غريبة
وبفرد يوم بالليل
اجتني للحجرة لمن چنتِ يم ريحان وگالت آنه احبك

لكت ما تدنت اليمي غير اليوم
والله وحگ راس ابوي
وغلاتچ وبمعزة ابني الببطنچ مابعتچ ولاخنتچ ولا آنه الناگص خاطر اسويها

ولون طخت براسي اواجهچ
موش ابن الشيخ ضاري اليغدر بحرمتة
آنة زلمة واضح واتحمل مسؤولية افعالي يعني ساعة الأريدن شي اسوي بالضوة ما خايف من بشر

- وهاااااي شنوووووو
هاي شنو فهمني هاي شنوووو... واضرب على رگبتة

شلون خليتها تتقرب منك
شلون سوت وياك الأني اسوي شلون ضعفت گدامهااا شلووووون جااااوبني

- تعاي وياي

سحبني من ايدي ليبرة
باوع للصالة لأن بدون حجاب شاف ماكو احد اخذني الغرفة أمل

فتح الباب بدون ميدگها
چانت نايمة ع الچرباية بملابس النوم وتبچي بحرگة
من حست گامت تغطي بروحها عود خجلانة

اباوع عليها واسحن بروحي من القهر
صح مبين هو ضاربها وحتى حلگها كلة دم بس چانت متحضرة الة مثل العروس واكثر

ذكرتني بنفسي أول مرة تقرب مني بيها
هم هيچ جهزت نفسي الة
حتى الشعر مسشور والجسم يلمع ومختارة ثوب نوم احمر لأن الكل هنا يعرف صخر يحب هاللون

عفتهم وطلعت أركض
رجعت الغرفتي ردت اسد الباب
گبل صخر حط رجلة بالفتحة ودفعها علية بكل قوتة اندفعت وياها ردت اوگع إلا شوية

لزمني ع السريع
سحبت روحي منة ديري بالك تلمسني صخر دير بالك
ابتعد عني بخطواتة
راد يسد الباب لزمتها ع السريع اطلع ما اريد اشوفك بالغرفة بعد

- شمس ؟!!!

- ااااطلع صخررررر
لو تريدني اااااظل عايشة اني وابنك الي ببطني اطلع وعوفوني هسه

ما حچة شي
راد يبوس راسي دفعتة حيل
راح للميز اخذ جهازة ومشى للباب ديطلع رجع التفت علية

- هدي الخاطر الجاهل
لون خسرتي هالنوبة راح تخسرين حتى رويحتچ وما يفيد الندم عگبها

حچاها وطلع ركضت رگعت الباب ورى
ظليت رايحة جاية بالغرفة
تخبلت ما ظل عقل براسي لو يطلع بـ ايدي إلا اروح احرگهم اثنينهم 

بچيت بچي لحد ما راسي انفجر
جفوني ثكلت
اريد اباوع گدامي مااگدر رحت للحمام غسلت وجهي ورجعت

كافي شمس كافي
انتِ قوية وراح تظلين طول عمرچ قوية
اي ولچ
انتِ اقوى من ان تنهاااارين وتخلين المثل أمل تهزمچ

البچي ميفيدچ بشي
يلااا بسرعة راجعي نفسچ ودوسي على روحچ قبل لا تدوسين عليهم وعيشي اااي عيشي

فتحت الكنتور ع السريع
عندي جنطة سفر صغيرة كلش طلعتها
اخذت ذهبي والفلوس المجمعتهن وعلاجي وحطيت كم قطعة لبس وسديتها

طلعت مستمسكاتي حطيتهن بالجيب الخارجي
لبست ملابس مستورة
وذبيت الحجاب على راسي شلون مچان وطلعت من الغرفة

باوعت بخوف لحد يشوفني
ماكو الصالة فارغة
مشيت سريع فتحت الباب وطلعت اركض مثل الطير ساعة اليتحرر من قفصة

الضوة بعدة مطالع
الدنيا شتا والليل كلش طويل ماادري شلون راح اطلع منا

تمشيت بالگوة خايفة حيل
صوت الكلاب تارس المكان كل شوية اتخيل يهجمون علية ويخربون الأول والتالي

عبرت البستان بشق الأنفس
وصلت للباب الخارجي الحارس چان صاحي
گاعد ديشرب چاي
بالعشر دقايق واني انتظرة يتحرك من مكانة ماكو ولا تزحزح

عصرت مخي لازم اتصرف
يلاشمس يلا فكري شتسوين حتى تطلعين منا سالمة
باوعت للگاع اي لگيتها

شلت حجارة چبيرة كلش
صرت ورى الشجرة ورگعتها بالباب حيل وگبل ختلت قبل ليشوفني

طفر من گعدتة مفزوع
سحب سلاحة وطب للبستان الجوة يركض
ما صدگت فرغ المكان
طلعت مثل المخبلة حتى حجابي فلت من راسي لأن ملابستة عدل

مشيت الشارع يصفر
بمثل هيچ ساعة حتى تكسي مراح الگة هسه شسوي بروحي يربي

اضطريت اتمشى سريع
المسافة بعيدة تقريباً بالربع ساعة بين بستان الشيخ وبين الشارع الخارجي

منا لما وصلت ظهري راح
ادري بروحي خاطرت وادري ممكن اخسر الطفل بعد الشي السويتة بس ما عندي غير حل

مستحيل ابقى بهذا البيت
بعد كل شي صار وبعد دخول أمل الحياتنا مالي مكان هنا من اليوم ورايح

باوعت للشارع السيارات ينعدن ع الأصابع
وگفت بالخمس دقايق
ماكو تكسي بس سيارات خاصة شوية وطبگ واحد يمي باوعت بخوف

نزل الجامة ولد شاب
- اصعدي اوصلچ وين متردين
- لا شكراً
- اصعدي هاي شبيچ لا تخافين ما راح اكلچ يالحلوة

- گتلك شكراً شنو حمار متفهم بالكلام

- هاي شنو ؟!!
طلعتي حلوة بس من برة من جوة لسانچ متبري منچ

- وايدي هم متبرية مني

حچيتها ونزعت الحذاء
من شافني هيچ تحرك وعافني باوعت للشارع مو ما اظل هنا ما احصل شي

كملت مشي ربع ساعة ثانية
هسه لو بس تطلع الشمس شوية المشكلة الدنيا ظلمة يعني حتى ما أمن اصعد ويا احد

تعبت كلش حتى رجلي متحملني
اوجاع ببطني وظهري مو طبيعية شمرت الجنطة من ايدي وگعدت ع الرصيف

بچيت بحرگة
امسح دمعة توگع عشرة بمكانها
المشكلة اني بالشارع اريد اسيطر على روحي بعد ما اگدر

هناك وطبگت يمي سيارة ثانية
نزل منها رجال بعمر حنظل تقريباً باوعت علي
مبين بابة عرب لأن لابس دشداشة
يعني اكيد مراح يأذيني ولا يتحرش بية مثل القبلة

- خوية شني المگعدچ هنا بـ هالساعة
- تكسي انت ؟!!
- اي
- تروح البغداد عفية

- لا خوية ما اطلع خارجي
- حباب انطيك ضعف الكروة بس لتخليني وحدي هنا
- مو على الكروة آنه
- اعتبرني اختك وساعدني الله يخليك

باوع علية بتردد
- وين اهلچ وليش طالعة وحدچ بس لا مهزومة

- لا لا ممهزومة
بس امي متخربطة وزوجي بالواجب
ماگدرت انتظرة يجي واروحلها حتى هاك شوف هاي الحلقة بـ ايدي

- رجلچ ضابط يعني ؟!! 
- اي
- بس طلعتچ بـ هالفجرية ما ترهم ولد الحرام هواي

- شسوي انجبرت
هسه شنو راح توصلني لو لا والله شگد متريد انطيك

- لا بوية شل قضية
الوادم تگاطعت خوب ما تگاطعت
امشي اوصلچ من باب المساعدة ولو السيارة ماتصلح لهيچ مسافات

- الله يوفقك ويستر على عرضك خوية

حچيتها وگمت صعدت
وين رايحة والمن رايحة هم ما ادري ولا راح ادري
حالة ضياع فضيعة
أول مرة اعرف الواحد يمشي للطريق المجهول برجلة ومسلم امرة الهذا الشي وراضي بي

حطيت راسي ع الجامة وغمضت
يمكن شكلت عيني
فزيت على طسة قوية كلش گبل لزمت بطني بألم

- خوية الله يخليك اني حامل على كيفك
- چا ليش ما حچيتي من الأول ما چان مشيت سريع

- عادي مصار شي بس عفية دير بالك بعد
- ان شاء الله خيتي

رجعت راسي وغمضت
لزمت بطني صارت عندي تقلصات تموت تشبه اوجاع الأسقاط الما صدگت اخلص منها

هناك وتذكرت الموبايل
طلعتة من الجنطة باوعت الساعة بالستة ونص غلقتة وشمرتة بصفي المصيبة احتاج اعرف الوقت

- خوية بلا زحمة
عود لمن تصير الساعة بالتسعة انطيني خبر لأن عندي علاج ضروري لازم اخذة بالموعد

- تامرين امر
- رحم الله والديك خوية

غسق.. گعدت ويا إسحاق كالعادة
سويتلة ريوگ وطلع للدوام بعد ما رجعت نمت
ظليت ارتب بغرفتي
وراها نزلت للشغل البنات متعودات يوميا يگعدن من وكت ويا الولد

دالملم بالصالة سمعت صخر صاح يا الله
نزيت هذا شجابة
ذبيت حجابي على راسي چان يطلع من المضيف يااا شنو السالفة شصاير اليوم

الحجية هيلة.. شني وليدي عليش ما مداوم

صخر.. ما نمت امس يمة
خوية غسق
بلاية زحمة اعليچ امشي الشمس شوفيها گعدت لالة

- لا هي يوميا تگعد بالتسعة تتريگ وتاخذ علاجها

باوع للساعة وراح غسل
رجع للصالة گعد يم الحجية بهالأثناء طلعت أمل من غرفتها شايلة باقر

مچنت منتبها عليها
سمعت عمة صبيحة سألتها شمالة وجهچ مزورگ
التفتت عليها عزززة شديصير اليوم
بعدت نظرها عنهم حطت باقر يم صخر وگالت وگعت عمة

- وشني الوگعچ هيچي
- بالحمام زلگت رجلي عادي تصير

صخر.. چاي راسي يوجعني كلش
أمل.. آنه اسويلك
صخر.. غسق خوية چاي ولو اسوي زحمة اعليچ
غسق.. لا تتدلل شنو السالفة

عفتهم ورحت للمطبخ اكيد اكو أنَّ بالموضوع
ثناء چانت دتتريگ
صبيتلة منها چاي وسويت ويا بيضتين عين ورجعت للصالة

حطيت الصينية گدامة رفع عينة ع الساعة
- ما تگعدينها صارت إلا عشرة
- اي هسه راح اگعدها حتى تتريگ وياك ع الواهس

رحت الغرفتهم
دگيت الباب اكثر من مرة ماكو جواب
عادي مرات متحس شمس نومها ثگيل فتحتها بهدوء مموجودة ؟!!!

رحت للحمام الباب مسدود
- شمس شمس دتسمعيني شمسسسس
حتى صوت ماي ماكو
فتحت الباب الحمام فارغ ياا ربي وين راحت هالبنية

طلعت برة باوعت للممر
يمكن گاعدة بالحديقة تشتم هوى مرات تسويها
فتحت الباب باوعت للمرجوحة فارغة
تمشيت بكل أتجاه مالها أي أثر طبيت ليجوة أركض

ما فتت للصالة
رحت للحمام الجوة دگيت الباب ماجاوبت
فتحتها هم مموجودة
تخبلت يربي وين ممكن تكون راحت من الصباحيات

صعدت للحمام الفوگ
دورت بالممر السطح نزلت للمطبخ حتى الغرف ماكو شمس فصح ملح وذاب

رجعت للصالة أركض حتى عثرت
- صخرررر شمس ماكووو
چان دياكل وگعت اللگمة من ايدة وظل صافن علية

- شلون يعني ماكو ؟!! 
- ماكو والله مموجودة بغرفتها
- هههههه دوريها عدل خوية اكيدن بالبيت وين تروح

- صخر شبيك دورتها
حتى للسطح صعدت شمس مموجودة والله ماكوووو

الحجية هيلة.. صخام بوجهك حميد وين البت ولكم

صبيحة.. يمة غسق متأكدة دورتيها عدل
غسق.. والله عمة دورتها ما خليت مكان يعتب علية

بس حچيتها طفر صخر من مكانة
ركض للمضيف
ثواني وطلع الموبايل بـ ايدة يمكن اتصل عليها مغلق ما احس إلا رگعة بالگاع حيل

صبيحة.. ها شني شمالك ما حصلتها
صخر.. مغلق ولكم مغلللللق

فجأة التفت بعصبية
درت وجهي عززززة هذا ديباوع الأمل
بعدني صافنة عليها
ندفر الميز حيل اجت ضربتة بية وركض عليها سحبها من شعرها

گطعها يضرب بلا رحمة وشراينية ناطة
امة وعمتة واحنة وجهالها الي يبچون يم رجلة ماكو محد شفعلها يمة

ضربها ضرب لحد ما صاحت ارحمني
تعب وشمرها بالگاع
عاط بكل حسة بحيث كلنا انخلسنا من صوتة العالي

- اااالشي الصاااااااار ما اريدنة يطلع منااا سامعيييين

الحجية هيلة.. اي يمة اي
افتهمنا وعلي بس هدي لا يروح يصيبك مكروه ياهو الي يفدك ساعتها

أمل بعدها نايمة بالگاع
دفرها برجلة وفات باوعت علي راح الغرفتة
بكل شي مافكرت
ولا اريد اعرف شصار بس المهم شمس وطفلها بخير

ظلت الحجية تتناقش ويا عمة بالموضوع
بس شافنة طلع سكتن
طلع موبايلة من جيبة اتصل بخالة نجمة سألها على شمس وسد الخط

گال آنه رايح البغداد
واحذركم اسمع هالموضوع طالع من حيطان هـ الدار
وراح ع السريع حتى ما سلم

شمس.. الطريق طويل ميقبل يخلص
مغمضة عيني واذكر منظرها شلون چانت متحضرتلة واتخيل شلون تقربت منة ولمست جسمة

فزيت على صوت السايق
باوعت گلي موعد علاجچ صار خوية الساعة تسعة
لا ماكلة شي لا عندي ماي اشربة
التفتت على الشارع زين اكو محلات ع الطريق يعني قربنا نوصل

استأذنت منة وگف على صفحة
نزلت للأسواق
اشتريت كيك وحليب وبطل ماي حتى ابلع العلاج بي

جبرت نفسي اكل من القهر ما اشتهي العسل
لگمتين حتى ما كملتها
بلعت العلاج ورجعت راسي ع الكشن گال خوية وين بالضبط

صفنت ليش اني ادري وين حتى اگولك
رجع كرر سؤالة
باوعت ما عندي غير خالتي گتلة للـ ××××× خوية

وصلني گبال البيت
ردت انزل الحمد لله على اخر لحظة اتذكرت موبايلي شامرتة يمي چان نسيتة بالسيارة

خطية حتى ما طلب هواي
بس اني انطيتة 25 ألف زيادة لأن سيارتة تعبانة زين لو گدر يرجع بيها للبصرة

سلم وراح
وگفت گبال الباب ردت ادگها ترددت
أول شي صخر راح يندلني بسهولة ثاني شي والأهم رجل خالتي مستحيل يتقبلني

خصوصاً حالتة الصحية كلش تعبانة
هو قبل ما تقبل وجودي بيناتهم
يجي هسه من مريض واني حامل يصبر علية وماينق بگلب هالمسكينة

درت وجهي ومشيت وين ما ادري
هااااا شمس هم رجعت الدنيا ضاقت بيچ مرة لخ لعد شوكت ترتاحين

صفنت ع الشارع حايرة
بلا وعي وگفت تكسي وصعدت گال وين گتلة ماادري
گبل التفت باوعلي

- شلون متدرين ؟!!
- لا مو قصدي اخذني للأمام الكاظم عليه السلام
- عليه السلام

حچاها ودار وجهه تحرك
وصلنا ويا الأذان توضيت وخليت الغراض بالأمانات
طبيت للصحن
چانوا ديقيمون صلاة الجماعة والدنيا مخبوصة جوة

دخلت للمرقد فارغ تقريباً لأن وكت صلاة
استغليت الفرصة حتى ازور
ما بية ع الدفعات واني بعدلي يوم واطب بالسادس

زرت بس بچيت بچي ما بچيتة بوفاة اهلي
من التعب انسحبت من المرقد وگعدت بصف الحايط
رجعت ظهري علي وغمضت

اصعب اللحظات هي هاي
من تضيع تتشرد تتعب وما تلگة ظهر تستند علي
من تحتاج اهلك ومستحيل تحصلهم
من تصفى وحيد بالدنيا بعد ما چنت عايش بخير كل العالم يحسدوك علي

مسحت دموعي وگمت
شوية ولازم اخذ علاجي اذا مو الخاطري
فـ الخاطر هذا الطفل الي مالة أي ذنب بكل شي صار

وگفت صليت بالگوة
دموعي متوگف حيلي ميساعدني اسند طولي علي والأمر من هذا
گلبي اليريد يوگف من الوجع الگاعد احس بي حالياً

طلعت من الأمام اتمشى
دخلت بمطعم شعبي طلبت لفة اكلت نصها ع الواگف وطلعت

بلعت علاجي وظليت افتر بالسوگ
ما ادري شگد مر وقت وگفت يم محل صارت الساعة گدامي بالأربعة ونص !!!

ياربي ما ظل شي ع الليل
وين اروح هسه وين انام يا مكان يحويني
لازم اشوفلي حل خو مااا ابقى بالشوارع فوگاها البرد ميرحم

طلعت من السوگ للشارع
وگفت تكسي گال وين گتلة امشي واني اگولك
ظليت اباوع ع الطريق
شسوي هسه مستحيل انزل بالفندق ومستحيل اروح العمامي

باوعت للسايق مبين علي حباب
- خوية ممكن سؤال
- تفضلي اختي

- اريد بيت ايجار واليوم اگدر احصل
- لا صعبة تحصلين بنفس اليوم والدنيا جاية ع الليل

- منا منا
يم اهلك اقاربك اصدقائك اتذكر فدوة

صفن شوية چان يصيح أي تذكرت
- يا الله وين

- بالـ ××××
يم بيت نسايبي اكو مشتمل أرضي عارضي للأيجار

- وديني عفية
- اي واني اعرف صاحب العمارة راح احچيلچ ويا
- رحم الله والديك

وصلنا للمكان نزل واني ظليت بالسيارة
دگ الباب طلع رجال چبير
بقى يحچي ويا بالعشر دقايق وراها رجع من شكلة عرفت ماكو خير

- ها خوية
- يگول اجرة قبل يومين بس بعدهم مگاعدين بي

- وشلون لعد ؟!!

- والله ما ادري يا اختي
گتلچ صعب تلگين ايجار بـ هالسرعة
واذا لگيتي فاكيد يحتاج تعب وفرة ومثل مدتشوفين الدنيا ظلمت هسه

- تنتظر احچي ويا
- شتحچين الرجال ديگول مأجرة
- ميخالف شوية بس انتظر واذا ع الكروة لتشيل هم

شفتة ما حچة نزلت
دگيت الباب طلع نفس الرجال السلام عليكم عمو
- هلا بنيتي وعليكم السلام

- توة الولد حچة وياك علمود ايجار المشتمل
- اي والله بابا اجرتة
- عمو فدوة ساعدني ما عندي مكان اروح بي وماكو غيرك يگدر ينقذني بـ هالليل

- شسوي بنيتي مو گتلچ اجرتة
- زين شوكت صاحبة يريد يستقر بي ما گال
- اي اسبوع تقريباً

- زين خليني اگعد هنا فد يومين مو أكثر
بين ماالگة بيت للأيجار وشگد تريد انطيك والله بس ساعدني

- لا بوية شنو السالفة
اني هسه راح اتصل بصاحبة مو علمود شي
بس علمود الحلال والحرام لأن اني مستلم مقدم اذا قبل اگعدي بي ببلاش منا لما تأجرين

- الله ينطيك الصحة ويرزقك عمو
- اجمعين بنيتي

حچاها وطب
سمعتة بالممر ديحچي ويا المستأجر
شوية وظل يتشكر منة ويدعيلة بالخير معناها اكيد وافق

طلع مبتسم والمفتاح بـ ايدة
- وافق مووو
- وافق بابا وهذا المفتاح تعالي وياية حتى ادليچ بي

- بس ادفع الكروة لأبو التكسي واجيك
- على راحتچ

رجعت للولد بعدة ينتظرني
تشكرت منة وانطيتة الكروة واخذت غراضي وراح

مشيت ويا الحجي للعمارة
مسافة بسيطة تفصل بينها وبين بيتة
فتح الباب واشرلي دخلت قبلة چانت الشقة بالوجه

فتحتها وطبينة حلوة بس ثلج
باوعت ما بيها غير الحيطان هاي شلون راح اظل بيها بهالبرد

- شوفي هذا الحمام
وهاي الصالة ومنا غرفة النوم وذاك المطبخ ولو انتِ مراح تعيشين بي

- ابو منو العفو
- وسيم
- عمو ابو وسيم اريد اطلب منك طلب وخجلانة

- گولي بنيتة الناس البعضها

- مشكور رحم الله والديك
بس مثل مدتشوف الدنيا كلش باردة ولو ازحمك بس أي شي انام علي واتغطى

- چان گتلچ تعالي يمنة
بس بيتي متروس ولد وعندي واحد مو راحة اخاف يخجلني وياچ

- لا لا عمو ابد اصلاً اني ما اقبل
بس اريد شي انام علي
لأن كلش باردة واني حامل اعتبرني مثل بنتك

- وانتِ بنيتي هم عندي وحدة بعمرچ
راح اطلع وهاچ المفتاح
قفلي الباب لا تفتحيها إلا لمن تسمعين صوتي خوش

- اي عمو صار

راد يطلع رجع باوعلي
- لا تفهميني غلط بابا بس تدرين الدنيا ما تتأمن
- اي صح تفضل
- احلفچ بهذا البطنچ خو ما وراچ مصيبة تبليني بيها

- وداعة ابني ماكو مصيبة
لتخاف اهل ماعندي ورجلي مو صاحب مشاكل بس صارت بيني وبينة خلافات وصلتنا لهنا

- ماشي بنيتي الله يهدي سركم

حچاها وطلع من الشقة
رحت ع السريع قفلت الباب عشر دقايق واندگت
صحت منو اجاني صوتة گمت فتحتها
طب ويا مرة چبيرة بالعمر وبنية بعمري بايدهم كومة غراض

- شلونچ يمة
- هلا خالة ليش زحمتوا روحكم

- لا يخالة شمسوين قابل
هي فرش تنامين عليها وهاچ هذا اكل
الحجي گال البنية حامل و البيت شوفة عينچ فارغ شتاكلين لمن تجوعين 

- عاشت ايدكم ما قصرتوا الله يوفقكم
- هاي بنتي رقية
- اهلاً وسهلاً واني شمس

رقية.. اخذي رقمي اخاف تحتاجين شي

شمس.. لا ان شاء الله ما احتاج
راح انام وموبايلي ما بي شحن عود باچر اخذة منچ

رقية.. على راحتچ
حچتها وطلعوا وصاني اقفل الباب وما افتحها إلا الة

مديت الفراش وسحبت البطانية
تمددت ما نايمة من البارحة ومع ذالك عيني مدتاخذ النوم

تذكرت صخر
شحالة هسه وشمسوي بغيابي
والله ما اريدة يتأذة بس شسوي ما عندي غير هالحل

ساعات واني اتگلب
توها مشكلة عيني اجتني اوجاع فضيعة
فزيت مرعوبة
لا يا ربي كل شي ولا الطفل والله اذا خسرتة ااااموت

اريد اگوم ما اگدر عبالك داطلگ
ظليت اتلوى حايرة شسوي حتى ما بية اطلع للشارع علمود الحجي واهلة يساعدوني

اضطريت افتح موبايلي
باوعت شحن مابي عشرين بالمية والساعة بالثنتين الفجر

اجتني رسائل من الشركة
الدنيا محترگة خالتي البنات الشيخ حتى عمامي بس كلهم كوم وصخر كوم ثاني

گبل اتصل بية
ما ادري اخاف من وجع بطني لو من مواجهتة
ما گدرت اجاوب
رفضتة وياما فصلت الخط اجتني أوجاع گمت اصرخ

رجع اتصل بلا وعي جاوبتة
سمعني اصيح
ظل يعيط انتِ وين بالگوة گدرت انطي العنوان

نص ساعة الموت شفتة بعيوني
رجع اتصل جاوبتة بالصياح گال يا شقة بالضبط آنه بالعمارة

گمت فتحت الباب صار گدامي
ما حچة اي شي
طب سحب حجابي لفة على راسي وطلعنا سوية

وداني المستشفى خاصة
استقبلتنا الدكتورة گالت شنو بيچ ما گدرت ارد صخر جاوب عني

- حامل بالسادس وعدها أوجاع
- جيبولها كرسي بسرعة

اجو يركضون راح صخر اخذة من ايدهم
گعدني علي ودخلوني للسونار
توني نايمة ع السدية طب تفاجأت مدري شلون دخل

غمضت عيني ابچي من الوجع البية
حسيت علي لزم ايدي
فتحت شكلة چان ضايج مو يمي اصلاً بس ديحاول يقويني بـ هالحركة

حطت السونار على بطني ظليت اردد بالقرأن
- هذا أول حمل مو
- اي بس عندي اسقاطات قبلة متكررة
- كم أسقاط
- أربعة

باوعت على صخر ورجعت باوعت علية مبتسمة
- ما شاء الله تبارك الله
وهاي رب العالمين عوضكم بدل عن الواحد أربعة
- شنو يعني ؟!!
- شبيچ ماما انتِ حامل بـ أربع أطفال.....

يتبع

لتنسوون ⭐⭐⭐⭐⭐⭐
كل الحب ❤🥀