رواية وضاقت الأرض بي الفصل الخمسون 50 - بقلم لبنى الموسوي

#وضاقت_الأرض_بي

للكاتبة #لبنى_الموسوي

منشوف إلا حنظل طب يركض وإلياس يركض ورى
هذا يصيح عوفهم خوية ابوي يتصرف وياهم وذاك يصيح لا والله موتهم اعلة ايدي اليوم
بس عليمن جاي يحچون مندري

شوي وطلع مثل المسودن
كاض الدشداشة بحلگة والسلاح تارس ايدة الثنتين
بعدة ما طالع من الباب
رفع سلاحة ورمى بالهوى وهو يصيح جمااااااااار

هو آنه سمعت بأسمة لو انكمش گلبي
شني الصاير؟!! وجمار شعامل وياهم خاطر حنظل يتسودن اعلي هيچي

طلعوا يركضون ظليت ارجف
عفت البنات وفتت جوة صارت امي گبالي جاي تطلع من الحوش گبل صرخت بوجهي

- لچ اخوچ تسودن وراح يضيع حالة يريحان

- شني الصاير يمة
جمار شمصخم مرة الاخرى وهيچي معصبين اعلي

- كل شي ما اعرف
احچي ويا الجدران ترد واخوتچ ما يردون اعلية

- شني رايچ ادگن اعلة ابوي خاطر يتلاحگ اعليهم

- اي اي چا شني الناطرتة

ركضت جوة
من الخوف حتى جهازي نسيت وينة
ظليت ادور علي شوي ولگيتة بـ ايدين ود تلعب بي

اخذتة ودگيت على ابوي
رن وانتهت الرنة وهو ما راد علية
ردت اتصل مرة الأخرى دگ هو گبل فتحت الخط

- السلام عليكم

- وعليكم السلام بوية
فدوة الحگ اعلة حنظل ما اعرف شمالة
اخذ السلاح ومشى وهو يصرخ بأسم جمار وإلياس ويا

بعدني احچي فصل الخط
باوعت للجهاز يا شني القضية عليش هيچي سدة بوجهي ؟!!

- ها ريحان شني رد

- ما جاوب شي يمة
قفل الخط بالعجل حتى گبل لا اكمل كلامي

- صخام الصخم وجهك حميد
معقولة جمار راد للبصرة واخوچ رايح خاطر يچتلة

- لا لا ما اظنن
جمار ما يتجرأ يرد لهنانة بعد كل شي عملوا ابوي واخوتي ويا

- لچ هذا عينة عين الـ××××
يعمل العملة ويظلة واجف چدامچ يتباهى بسواد وجها و وجه الخلفوا

- عزززة لو صدگ هالحچي معناتها راح بيها اخوووي

ثناء.. ياربي اتصل بي ميرد هسه اني شسوي بروحي

الحجية هيلة.. هدي يمة هساع الشيخ يلحگ اعلي لا تخافين من شي محلولة ان شاء الله

نجيبة.. ها ارتاحيتي يريحان
دگيتي رجل إلا تاخذين هالمايع وهاي تاليتها مامش بشر تورط بنتيجة فعلتچ غير زلمتي

ريحان.. ااااااااانتِ ااااااااسكتي
لا تظنين من ما رديت اعليچ معناتها خايفة منچ ؟!!

لاااااا والله
ما راح افوتها ولا ارتاح اذا ما اردنها ليچ
بس خلي بالي يصفالچ شوي وتلگي الراح يصير بيچ ساعتها ينجيبة

نجيبة.. تنوعن العرامة
فوگ شينها گواة عينها دحيري برويحتچ اول وتالي عودن حاسبي الوادم

ردت اهجم عليها صارت امي بيناتنا
- وتالي وياچ نجيبة
سمچ هذا اليمتة تبطلين تشمري اعلة الرايح والراد

- عمة ما تتنوعين شلون تجاوزت اعلي

- وياهو العال بالأول
سالفتچ الغمة راح توصل الحنظل بس خل هالطلابة تعدي اعلة خير

التفتت علية
- وانتِ ريحان لزمي لسانچ شوي
ما اريدن طلايب البينة كافينة كل وحدة منچ تحير برويحتها والتغلط ما راح يصير خير وياها 

اجت غسق سحبتني من گدامهن
گاعدة بالصالة افور اريدن بس واحد يطمني شني الجاي يصير وياهم ماكو

اذن المغرب گمنا نصلي
وراها ظليت اقرا قرأن حتى ما گدرت اگومن خاطر اعين البنات بشغل البيت

لثمانية سمعت الباب انفتح
گمت اركض باوعت من الشباچ ابوي طب واخوتي كلهم ورى

تلگيناهم بالممر
فتحت عيوني ويا طبتهم
حنظل دشداشتة كلها دم واخوتي شكولهم مخربطة مثل المتعاركين

سألتهم امي محد من عدهم رد
گعدوا بالصالة ساكتين بحيث من الهدوء مالهم لو نزت الأبرة بالأرض همينة نسمعلها حس

الحجية هيلة.. وتاليها وياكم
احد يرد اعلينة مو گلوبنا غادية مثل النار من نهد ما طلعتوا ولساع

الشيخ ضاري.. عليش تسألين يهيلة ؟!!
شني التترجين يجي من فروخچ غير بس الطلايب

وتعال يضاري رگع خلافهم
خاطر والله لا تصيرون فرجة للوادم بسبب طيشهم وتصرفاتهم الموش مدروسة

حنظل.. يابة ما تنوعت لي....

الشيخ ضاري.. بسسسس لا تكمل
من يمتة واحنه نرفع السلاح بوجه هذا وذاك

لك عالوا بينة ما علنا
هساع جاي حضرتك تطيح الچيلة ببن عمك

حبيب.. يابة چا احنه موش گلنالة مچان بالبصرة مالك عگب عملتة ذيچ

الشيخ ضاري.. البصرة لاهي ملكك ولا ملك الخلفك
البصرة گاع الله الوسيعة لا انت ولا غيرك الكم حگ تحرمون بشر منها

ولون طردنا بالأول
فهالشي چان درس لي عگب ما ضحك اعلة الشوارب وحريمة چتلوا ابن اختك ورادوا يچتلونها هي همينة لو ما الله لطف بحالها وحالنة

لكت هالساع خلص
انتهت السالفة ومر اعليها زمن وهاي اختك جدامك اتعافت من مرضها ووگفت اعلة حيلها

حنظل.. ما تعافت يابة
لا عبالك عبن تتنوع ليها تروح وترد وتداوم معناتها هي بخير

الصار وياها مو شوي
اگعد جارها عشر دقايق موش اكثر وانت راح تحس بجرحها شكثر لساعة هش 

إلياس.. آنه اكيدن ضد عملة حنظل
لكت ويا بموضوع ريحان عبن سالفة جمار ما تنسي وردتة لهنا اكبر غلط بحگنا وحگ اختنا

الشيخ ضاري.. هذا الحچي گبل لا اخوك يتسودن
لكت هساع وعگب ما نيم الچيلة بزند جمار مالنة بعد حگ نتنفس ويا بحرف واحد

سكوتة يجبرنا نسكت
عبن بسكوت جمار حنظل لساعة گاعد جدامكم وما انشمر ويا المجرمين والحرامية

حنظل.. لون هذا همك لا تفكر بي
آنه مستعد اخلص الباگي من عمري بالسجون
ولا اتنوع لأختي متوجعة واظلن واگف اتفرج اعليها بلاية ما احرك ساكن

الشيخ ضاري.. لك وتاليتها وياك
انت اليمتة تهيد لمن تموتني يعني عودن ساعتها ترتاح جااااوب

إلياس.. اسم الله اعليك يابة
حنظل بسك يخوي خلة بالبصرة شني تريد منة
واكيدن ما راح نخلة يگرب صوب ريحان او يمسنها بحچاية

صخر.. هذا موش منطق
انطرد منا عگب عملة اليهود ما يعملونها ولون رد غصب عنة معناتها عيب نتسمى زلم ساعتها

حنظل.. تنوع يابة
آنه وصهيب وصخر اعلة راي واحد
واكيدن إسحاق همينة ويانة من هيچي لابد تحترم راي الجماعة

الشيخ ضاري.. لك وليدي يشتكي اعليك وتروح بيها

حنظل.. خلة يشتكي
اولها وتاليها تنحل هالسالفة المهم جمار ما يظلة بالبصرة يوم واحد

ريحان.. ممكن احچي لون تسمحونلي

الشيخ ضاري.. تحچي يابة

ريحان.. حنظل خوية
ممنونة منك عبن تفكر بية گبل لا تفكر برويحتك

لكت جمار ما عاد يعنيلي شي
صدگني ان ظلة هنا ولا مشى هو والماكو سوى
عسى ما هساع يصير جدامي امشي واتخطى چني ما شايفتة اصلاً

من هيچي اترجاكم
لا تسونها سالفة وعوفوا بالبصرة
همينة ابوي ما يستاهل تأذوا بسبب هالموضوع وهمينة جمار يظلة ابن عمنة وعمر الدم ما يصير مي شما واجهنا من ظروف

الشيخ ضاري.. ها سمعتوا اخيتكم

حنظل.. يابة هي گالت هيچي عبن ما تريد تورطنا....

الشيخ ضاري.. بسسسسك عاااااد
اسمعوا مني چلمة وما راح اثنيها إلا بموتي

قسماً عظماً اليگرب صوب جمار
او يدوسلة اعلة طرف ما يلگا من يمي الخير وهايني حذرتكم كلياتكم

اتنوع الاخوتي ظلوا يتجادلون
كلمة من يمهم كلمة من يم ابوي صارت كونة الها اول مالها اخر

تالي ابوي هددهم ومشى الغرفتة
بيومها حتى ما تعشوا ظلوا لاهين بالطلايب لبين ما تعبوا وكل واحد منهم راح ينام

غسق.. المشكلة كبرت كلش
ولد الشيخ طبيعتهم يحترمون كلمة ابوهم
بس اكو مواضيع ميگدر الشيخ يسيطر عليهم بيها مثل موضوع جمار يعني

التالي الليل يلا هدأت الوضعية
ود گوة نامت من صياحهم خافت وظلت بس تبچي لحد ما الله هداها وقبلت تنام

صعدت الغرفتي الساعة بالوحدة
ضايجة ومجاييني نوم منا افكر بالمشكلة الصارت اليوم ومنا مشكلتي ويا إسحاق شاغلة كل تفكيري ومدتخليني ارتاح

اخذت ملابسي وطبيت اسبح
الجو بارد والمي حار نسيت نفسي جوى واني افكر بكل شي صارلي من يوم حادثة شجن الله يرحمها ولليوم

كلما اتذكر ارجع اعيش الأحداث من جديد
تنرسم گبالي وكأنها هسه دتصير اعيش مرارتها وينغز بگلبي وجعها

حرگ شجن صديقة عمري واختي
صدمتي ببيت عمي واني اشوفهم يحرگون بتهم گدامي

اهلي وقساوتهم وياية
مهيمن وحقارتة المستحيل يتقبلها العقل قبل الدين

امي الماتت بحسرة شوفتي وعشت وراح اعيش عمري كلة بحسرة وداعها للمرة الأخيرة قبل لتروح وتتركني للأبد

حيرتي بذيچ الليلة بالمكان المهجور
والشوارع الصفيت بيها اتوسل بالغريب علمود شربة مي ولگمة تسند طولي

غربتي بعد ما ضاقت بي الأرض
واخرها عيشتي واني اسيرة الكل شي صار وياية بالماضي

لو حياتي التقيدت بي
وجبرتني اعيش الباقي من عمري سجينة بين الوجع والذكريات حتى لا اعيش حالي حال كل البنات

سديت الماي ونشفت
جفوني من گد ما بچيت توجعني باوعت بالمرايا
ها غسق بعد كل هالبچي ارتاحيتي لو راح تظلين كل عمرچ تعبانة ؟!!

فركت عيوني بوجع
من گد البچي اختفن والوجه صاير دم منا الدموع ومنا المي الحار ما ظل بية غير بس لوني

جريت كبوس التراك على راسي لأن الجو بارد
سديت باب الحمام والتفتت
چان انصدم بـ إسحاق ديبدل ملابسة بس ما شافني لأن داير ظهرة الي

ظليت واگفة بمكاني
محتارة شسوي اسلم علي لو انتظرة يشوفني حتى اعرف ردة فعلة شنو

اندار بـ هالاثناء باوعلي
من شاف حالتي بدون سلام اجة باتجاهي مصدوم

- شمالچ بوية عليش وجهچ صاير هيچي

- لا ماكو شي بس چنت اسبح

- غسق

باوعلي بنظرات تساؤل
رديت النظرة بعتب بس حط ايدة على وجهي بچيت

گبل سحبني الحضنة
- بسچ بوية بسچ عاد لا تزعليني منچ
گلبچ راح يوگف مو كافيچ باچية بالحمام لمن الله گايلچ بس

ظل يمسح على ظهري يحاول يهديني
دقايق وارتاحيت
يمكن لان رجع وياية طبيعي وهالشي خفف ولو شوية من تعبي

ابتعدت عنة امسح بدموعي
- ها هساع ما راح تگليلي شمالچ وعليش كل هالبچي

- ما بية
بس تذكرت امي وتعبت شوية

- الله يرحمها بواسع رحمته

- يرحم الجميع
ليش اجيت بهيچ وقت مو تدري الطريق خطر

- عگب عملة حنظل شلون ترديني اظلن بمچاني

- يا ومنو گلك

- صخر دگ اعلية وبلغني

- جوعان

- لا اكلت بالدرب

حچاها وسحبني من ايدي
گعدني ع الطبلة گدام الميز ونزعني الكبوس
ما اشوفة إلا شال المشط مالتي وصار يمشط شعري

باوعتلة بالمرايا مصدومة
رفع راسة ابتسم بوجهي اني هم رجعتلة الأبتسامة
شو هذا فجأة وبدون سبب گلب وجهه وحط المشط بحضني وطلع من الغرفة

ظليت صافنة ع الباب
شنو صار وشبي هيچ ضاج فجأة ؟!!
معقولة بدر مني تصرف ضوجة بدون ما احس على روحي

نص ساعة وهو ما راجع
لبست حجابي ونزلت جوة دورتة بكل مكان
المطبخ الصالة الديوان الحمام ماكو اخر شي فتحت الباب وطلعت للحديقة

لگيتة گاعد ع المرجوحة ويحچي بالموبايل
بس گدرت اسمع جملة وحدة من كلامة
بسچ لا تلوميني اعلة شي انتِ تدرين كلش زين هو موش بـ ايدي

ما ادري شلون حس على وجودي
التفت شافني واگفة گبل استأذن وسد الخط
من الصدمة والبرد تجمدت بمكاني لا بية ارجع جوة ولا اتقدم خطوة بـ اتجاها

هو هم من شافني هيچ گام
سحبني من ايدي وصعدني فوگ للغرفة
اول ما دخلنا عطست گال يرحمكم الله ما جاوبتة

- بوية عليش نزلتي وانتِ هساعچ طالعة من الحمام

- نزلت علمودك
تأخرت وگلت اشوفك وين صرت بس الظاهر اجيت بالوقت الغلط

باوعلي صفح وراح تمدد
صفنت ويا نفسي اسألة ويامن چان يحچي لو اعبر الموضوع ع القليل بس هالفترة

احتاريت بقراري
اخر شي فضلت السكوت لأن توة راجع من السفر ومنا هو شايل بگلبة علية قبل ليروح يعني ماصدگت يرجع وياية مثل الأول

تمددت بصفة ساكتة
سألني على موضوع جمار وشصار بالبيت
حچيتلة كل شي وراها گبل نام لأن چان تعبان من الطريق

يومين والبيت مخبوص بهالسالفة
اخر شي ما گدروا الولد على إسحاق والشيخ
لأن اثنينهم نفس الرأي وهيچ گدر جمار يرجع للبصرة مرة ثانية

العطلة ما بقالها يومين وتخلص
حسيت الصبح على صوت المنبه يدگ فتحت عيني شفت إسحاق طفى ورجع حضن المخدة

ما گدرت ارجع انام
رحت للحمام غسلت ورجعت لگيت المنبه يدگ وهو ولا يمة رايح بسابع نومة

تقربت من عندة ندسته بچتفة
- إسحاق
إسحاق گوم مو راح تتأخر ع الدوام شجاك اليوم

جاوب هو ومغمض
- ما اداوم اليوم

- اي لعد ليش موقت الجهاز اذا متداوم

فتح عينة وگام للحمام بدون ميجاوب
شوية وطلع الخاولي بـ ايدة باوعلي وگال سوي ريوگ لية وليچ اعلة السريع

- بس اني ما اكل بهيچ وقت وانت تدري

- امشي بوية لا تعاندين

ما جادلتة
نزلت جوة چانن البنات بالمطبخ يشتغلن
مسويات الچاي للولد بس طگيت البيض واخذت الصينية ورجعت للغرفة

جبرت نفسي اكل لأن كل شوية وباوعلي
بعدين اخذت المواعين غسلتهن وظليت جوة يمهم

خمس دقايق وسمعتة صاحني
صعدت ع السريع فتحت الباب گبل گال وين صرتي

- جوة غير علمود اشتغل ويا البنات

- عوفي الشغل هساع
فوتي غيري خاطر نمشي للنجف نزور

وسعت عيوني بفرحة
- والله يعني راح تاخذني لأمي وشجن هماتين

- اي 

بس حچاها ركضت حضنتة
طبطب على ظهري بـ باتسامة ونزل اني هم بدلت ركض ورحت ورى

چان گاعد بالصالة ويا امة وابو
من شافني گام باس راسهم وسلم ردت اخذ ود ما قبل گال خليها يم عمتها تتبهذل بالدرب

طلعنا قريب الثمانية
الطريق كلة واني الدمعة بطرف عيني
ما ادري هالدموع سببها الفرح لو الحزن بس المهم راح ارجع ازورهم مرة ثانية

وصلنا للنجف
اول شي زرنا الأمام علي عليه السلام
بعدين رحنا للوادي من وصلنا الگبرهم انهاريت مثل أول مرة

عافني براحتي
حتى ما ادري شگد مر على وجودي هنا
لأن احس كل شي توقف بـ هاللحظات حتى الوقت

ما گمت من گبرهم إلا بعد ما اكتفيت
باوعت الدنيا راح تصير الغروب واني ناسية نفسي وناسية إسحاق وياية

- اسفه والله ما انتبهت ع الوقت

- ولا يهمچ بوية المهم ارتاحيتي هساع

- اي كلش

- چا يلا يا دوب نرد وعودن بالدرب ناكل شي

- بس الوقت تأخر كلش وانت مماكل شي من الصبح

- چا انتِ الماكلة

حچاها وسحبني من ايدي
طلعنا من الوادي بنص الطريق اشترى لفات ورجعنا للكراج

ما گدر ياكل لأن يسوق
فتحت لفتة وسحبت الكلينس داريد اوكلة باوعلي مصدوم

- لتباوع هيچ
مستحيل اخليك تكمل الطريق وانت جوعان

اصلاً المفروض نبات هنا
الطريق شطولة وين تتحمل تسوق كل هالمسافة روحة جية وبيوم واحد

- لا آنه متعود
بس لون انتِ حابة نبات گليلي خاطر اردن هساع

- لا مو شغلة حابة بس علمودك

- لا تاكلين همي ما تأثر اعلية هيچي مسافات

- زين بس اكل من ايدي
محد اكو الشارع فارغ وما بيها شي لو وكلتك شوية

باوعلي وابتسم
وكأنما بـ هالنظرة انطاني اشارة بالموافقة
بديت اوكلة وشلع گلبي كل لگمة يصيح كافي طلعت روحي علما خلص لفة وحدة

وصلنا للبصرة بعد طريق شطولة
طبينا للبيت الكل نايمين فتحت الباب على ريحان لگيتها نايمة وود بصفها

تقربت بستها بهدوء وطلعت
صعدت الغرفتي بس بدلت ملابسي نمت على وجهي من التعب

ريحان.. ما صدگت رد الدوام
هو الشي الوحيد اليگدر يطلعني من ضوجتي وتفكيري السلبي بحياتي المضت

داومنا اسبوع والأوضاع هدوء
بالاسبوع الثاني خلص الدوام وگعدت بمكاني انتظر غسق تجي خاطر ادگن على ايوب

صافنة ع الطلاب وبالي موش يمي
فجأة لمحت واحد جاي من بعيد ركزت عدل وگمزت من مكاني بس شفت جمار گدامي

ردت امشي ما لحگت
وگف گبالي قطع علية الدرب وهاي اول مرة اشوفنة بيها عگب ما تطلگنا

- اوگفي اريد احچي وياچ

- مامش حچي يجمعني بيك جمار
من هيچي احترم حالك وامشي من گدامي احسن

- ليش هيچ تحچين وياية
اي اعترف اني غلطت وسبحان الما يغلط بس بعدني شاريچ بروحي ريحان

- لا واضح استاذ جمار
من العرس الفخم وشهر العسل السويتة الحرمتك صخلة خاتون

- يا عرس يا شهر عسل شبيچ انتِ ؟!!

- غشم رويحتك غشمها
بعدين عليش استغرب انت والحيلة اخوان بالرضاعة ورابين سوة

- منو وصلچ هالكلام ؟!!

- الكل جمار ما ظل بشر ما جاب سيرتة
بس خاطر ترتاح وتمشي من دربي
متهمني بعد لا انت ولا حياتك وما اريدن اشوفنك گدامي مرة الاخرى تفهمممممم

- لتصيحين ريحان
ترى اني مقدر وضعچ واعرف تأذيتي بسببي هواي

واذا عفتچ كل هالفترة
فـ هالشي بس لأن اريد اعصابچ تبرد بس مال اعوفچ مستحيل انتِ الي تعرفين شنو يعني الي

انخلقتي الحضني
وراح تظلين الي كل العمر رضيتي بهالشي ولا ما رضيتي

- هههههههههههههه
تعرف هساع لو احچي الأخوتي اعلة جيتك لهنا شني الراح يسوو بيك

- ههههههه
اي حياتي اعرف ليش ما اعرف
ومثل ما ظليت بالبصرة بسبب حنظل راح ارجع اخذچ بسبب صهيب مثلاً وهم الممنونين

- تحلمممممم
نجوم السما اقرب ليك مني يا جمار

- ريحان احبچ
من يوم ما تركتيني واني عايش بالضيم

كل حياتي صارت سراب
لا اگدر اشتغل ولا اگدر انام ولا عندي عافية حتى اوگف على حيلي

باوعي الشكلي وانتِ تصدگين
هذا شكل واحد مرتاح ومتعافي وعايش سعيد بدون روحة

- روحك يمك وامك يمك وحرمتك همينة يمك
آنه وياك انتهينا يبن عمي

الله يسعدك ويهنيك بحياتك
ولو ما اظننها تمر بلاية ما تضوگ لعوتي عبن مثل ما تعرف كل ساقي سيسقى بما سقى

- ريحان اترجاچ
شتريدين اسويلچ والله اطلبي واتمني بس رجعيلي

ردت اجاوبة سمعت غسق تصيحني
درت وجهي لگيتها صافنة على جمار ثواني واجت باتجاهنا عصبية

- ااانت شجااااابك هنااااا
شهل وقاحة العندك يا اخي مو كافي السويتوا بيها انت واهلك شتريدون منها بعد

- لتتدخلين اني ومرتي انتِ شكو

- چاااااانت
چانت مرتك وياريت متچذب الچذبة وتصدگها

- بسچ غسق
امشينا منا حتى ما يسوة نضيع وكت ويا

- تسمع شگالت عنك
گالت متسوووة وفعلاً انت متسوة
لذالك ابعد عنها ودير بالك تراويها خلقتك مرة ثانية ترى ساعتها ميصير خير وروح امي

- وانتِ منو حتى تهدديني

- اختها
والأخت ساعة التخاف على اختها
مستعدة كل شي تسوي علمود تحميها وفهمك كفاية هاي اذا طلعت تفهم من الأساس

سحبتها من ايدها خاطر انهي النقاش
مشينا مسافة وغسق تلوم بية لأن شافتني احچي ويا تاليها گالت راح احچي الإسحاق حتى يخليلة حد

- لا غسق
ما اريدن تحچين بالموضوع عبن هو هذا اليريدة جمار

حتى هو گالها
مثل ما بقيت بالبصرة بسبب حنظل راح ارد واخذچ بسبب صهيب

- بس إسحاق مو مثلهم
يگدر يتصرف بهدوء وبدون مشاكل لتخافين علي

- ميخالف لا تحچين عفية
ولون حچيتي نخرب ساعتها يغسق خليچ مساندتني بكل شي خاطر نظل خوات العمر كلة

- براحتچ مثل متردين

مشينا مسافة وراها گعدنا
اتصلت على ايوب رفضني نص ساعة واجة علينة ردنة للبيت

شمس.. بلليل گاعدة بغرفتي ضايجة
احس حياتي بعد التخرج صايرة ملل بملل وماكو شي بالدنيا يمليها

شوية وطب صخر
گعد يمي يشتغل طگت روحي
طول النهار ماكو وبلليل لو يگعد يم اهلة لو يشتغل لو ينام

- صخر
صخررر مو داحچي وياك

- ها شمالچ بوية مو جاي اشتغل

- هو انت شعندك غير الشغل

رفع راسة باوعلي
- عليش تحچين هيچي ما فهمت اعليچ

- صخر ليش احس الحب بيناتنا انتهى ؟!!

- صگد تحچين ؟!!

- اي صدگ
شتشوف انت حياتنا طبيعية هيچ
لا تگعد وياية ولا نطلع ولا نسافر بس وكت حاجتك عود تجي وتذكرني بكلمة حلوة

- چا بوية هي هاي الحياة
مشاغلها هواي ما ترديها تخلص بالعشگ والكلام المعسول

- بس مو هيچ
والله بديت امل لا طبة لا طلعة
وعود انتظر الليل يجي حتى التهي وياك تاليها لو تگعد يم اهلك لو تشتغل واذا تعبت من الشغل تلف راسك وتنام

- چنچ فارغة وتدورين حجج خاطر تزعلين

- اي عفية اني فارغة
وحتى تخلص مني ومن نقي اريد اتعين

- شمس حچينا بهالسالفة من گبل

- اي حچينا على اساس عدنة اطفال
بس الله ما رزقنا شسوي يعني اظل گاعدة وايدي على خدي بهالحالة

حباب عييني
اريد اشتغل اريد اشوف ناس
اريد احس بروحي داقدم شي يستاهل التعب التعبتة بالدراسة

- چا مو تردين تكملين ماجستير

- اي فد سنتين بعد وافكر بالموضوع

- بوية ناقصچ شي وتدورين تعيين مجاي افهم اعليچ

- ترى التعيين مو بس فلوس
المسألة اني درست وتعبت واريد اشوف ثمرة تعبي مو بعد كل هالتعب اگعد بالبيت

- واذا حبلتي شني تسوين

- عادي قابل بس اني احبل واداوم
عود من اجيب انسق وقتي بين الأطفال والدوام

ولتنسى البيت ما شاء الله متروس بنات
يعني راح يساعدوني مثل ما اني داساعد غسق بود من تروح لدوامها

- ان شاء الله

- شنو ان شاء الله يعني راح تعييني؟!!

- اي

حضنتة اضحك
- الله ليحرمني منك ومن طيبة گلبك حياتي

- ولا يحرمني منچ
ولا تعيدينها بعد وتگولين حبك لية انتهى

صح مشغول بالدوام وطلايب الحياة
لكت انتِ تعرفين ما عندي شي اهم منچ عگب امي وابوي شمس دنياي

- وهالشمس ما تگدر بدون الگمرة حتى تكمل حياتها
لذالك حباب فرغ نفسك شوية الي والله داشتاقلك وانت يمي

- چا شني رايچ لو اخذچ ونسافر

- والله

- وللمچان الأنتِ تختاري همينة

- لا اعذرني هيچ بعد ما اقاوم

حچيتها وتقربت بستة من رگبتة اكثر من مرة
گبل سحبني علي حيل

- هو هذا الچنت ناطرة منچ
اموتن اعلة وكاحتچ وجرأتچ وياي شمسي

- هههههه
واني احب اتوكح وياك

- چا يلا توكحي وريحي گليبي شني الناطرتة

- ههههههه
لا حبيبي ممنتظرة شي حلالي واني حرة بي

حچيتها وبستة بادلني بلهفة
عشت وعيشتة من احلى الليالي بعمرنا
لأن صدگ چنت محتاجة الأهتمامة الصارلي مدة مستفقدتة

غسق.. بلليل گاعدين بالصالة نتعلل
اجة للشيخ اتصال باوع للتلفون واخذة وراح للديوان

تأخر هواي
قريب النص ساعة رجع للصالة سألتة الحجية ياهو الدگ اعليك

باوع للولد وگال
عمتكم صبيحة راح ترد للبصرة عگب اسبوع وآنه بلغتها تسكن ويانة بـ هالدار.....

يتبع

لتنسووون ⭐⭐⭐⭐⭐⭐
كل الحب ♥🥀