رواية وضاقت الأرض بي الفصل التاسع والأربعون 49 - بقلم لبنى الموسوي

#وضاقت_الأرض_بي

للكاتبة #لبنى_الموسوي

مشينا بخطوات صعب تنوصف
رايحة آنه بشعور الرايح على حبل المشنقة برجلينة وينتظر بصيص امل يرجع بروحة الحياة

ايدي بـ ايد صهيب ما فلتها ابد
كل لحظة والثانية يشد عليها بقوة وكأنة جاي يگول آنه يمچ لا تخافين من شي ابد

من وصلنا رادني اگعد
وهو يروح يجيب نتيجة الزرع ما قبلت
اصريت ادخل ويا وسويت الي براسي بالأخير لأن ميگدر يضغط علية وآنه بـ هالحالة

شكلهم چانوا ينتظرونا
تقدم صهيب صاحوا جاي علمود نتيجة هناء
هز براسة اي حتى ما گدر يطلع صوتة ويجاوبهم

انطوا الأوراق سمعتة گلهم شني النتيجة ؟!!
محد من عدهم رد
رجع كرر سؤالة عليهم جاوبوا روح للدكتور وانت تعرف

هم گالولة هيچ لو صهيب صار أعصاب
تقدم عليهم اكثر وصوتة رج المستشفى رج بحيث كلها التمت تشوف شجاي يصير هنا

- شني يعني روح للدكتوووور وانت تعرف
چا انتم هنا شني شغلكممممم جااااااوبووووووووني

- اخي لتصيح ترى هاي مستشفى مو شارع

- من دنعل ابوكم لابو المستشفى مالكم
واريد ×××× يجي ويفك حلگة وياي خاطر انسي حليب امة التزوهرة سنتين كاملات

بس اردن اعرف انتم ما بگلبكم رحمة
××××× تعرفون احنة عليش جايين وتدرون كلش زين هالمرض ما يرحم صاحبة

تاليها الكلمة تتعاجزون تحچونها
ابن الكلب ينقص منك ايد لو رجل لون رديت اعلينة بكلمة تبرد گلوبنا

تقربت سحبتة من ايدة
- صهيب شجاك

- اششش انتِ لا تتدخلين

- اخي افهمني ارجوك
احنة ما عدنة صلاحية نحچي بالنتيجة
وانتم اصلاً هيچ هيچ رايحين للدكتور شيصير يعني لو تصبرلك ساعة

- لو امك مريضة بـ هالمرض
همينة راح تگول مالنة صلاحية وتظلك منچب خاطر تصير براسي ابو القانون

لكم هو البلد خرررررب
البشر صار ما يرحم البشر وناس تاكل بناس لا ظلت رحمة بعگلنة ولا ضماير بوجدانة

بس يمين عظيم يكسر ألف ظهر
اذا ما خليتك تعض اصابيعك ندم اعلة هاللحظات ما اطلع آنه صهيب ابن الشيخ ضاري

- روووووح
شتريد تسوي سوي ما ظل علينة بعد بس المعدان

هو حچاها لو صهيب تسودن
ما اشوفة إلا طفر علي تولى ضرب بحيث صار مثل العجينة بين ايدة

المستشفى كلها التمت على صوتة
حاولوا يخلصوا من عندة بس محد گدر إلا لمن اجو الأمنية وتدخلوا بالموضوع

سحبوا صهيب يردون يطلعوا برة
فلت من ايدهم وجر سلاح واحد من الأمنية وجهة عليهم

آنه هنا تسودنت
صرخت بكل صوتي صهيب لااااااا
بـ هالاثناء اجة الضابط ظل يحچي ويا بـ لسان طيب

اخر شي گلة حتى يهدي
بس ذب السلاح واذا الك حق يمنة تشلعة من عيونة

التفت ع الولد وشمر السلاح يم رجلة
وراها دنگ بالگاع شال نتيجة الزرع وگلهم بس ارجع حرمتي اليم امها وامشي وياكم 

سحبني من ايدي ومشينا
من الخوف بعد ما احس حتى برجلي ولا اذكر احنة المن جايين لهنا

وصلنا يم امي بس شافتنا گامت
- ها يمة بشروني

- بعد عمة النتيجة لساعها ما بينت
خلي هناء يمچ وآنه رايح بمشوار ساعة زمن واردن

- يمة وغوشتني
صاير شي احچي لا تخش عني

- ما صاير لا تخافين
بس اگعدن هنا شوي واجي ليكم بالنتيجة

حچاها وراح
باوعت علية امي بتعجب
شمالة يهنيوة زلمتچ عليش هيچي ملابسة مخربطة

گعدت ع الكرسي وايدي على راسي
ما احس بگلبي بعد ومن الهبطة الأكلتها نسيت كل شي حتى مرضي

- آنه جاي احچي وياچ لو ويا رويحتي

- تكاون يمة

- صخام بوجهي
ويامن تكاون الزلمة ولچ ااااااحچي

- هساع اسولفلچ بس خليني اجر النفس

شوي وحچيتلها كل شي
ظلت تجيب وتودي بالكلام ساعة تحچي عليهم وساعة تلوم بصهيب وما سكتت لحد ما شافتة واگف گدامنة

گمت ع السريع تلگيتة
- ها شصار وياك

- ما صار شي بوية
حچايتين من يمهم حچايتين من يمي فضت السالفة

- چا ليش تأخرت هيچ

- مشيت للأدارة اشتكيت اعلة ذاك الزمال

- لاااا صهيييب
هساع عليش سويت هيچ بلا صارلة مشاكل برزقة

- لا تخافين
آنه حجيت وياهم ما اريدن اضرة ابد
ردت بس اسويلة جرت اذن خاطر يجر عدل ويا الوادم منا ورايح

- وصدگ عود التعليمات ما تسمح الهم يگولون النتيحة ؟!!

- لا يابة كلاوات هاي
همَ خشمهم داگ بالسما وعبالهم الوادم عبن مرضى راح يصيرون عبيد يمهم

ام هناء.. عمة الزم اعصابك شوي
هالنوبة لون جزت سلامات نوبة الاخرى تتطيح بيها

- ان شاء الله عمة
لا تشيلين همي اعرف اليمتة الزم اعصابي واليمتة افلتها

جريت نفس براحة
درت وجهي حتى اشيل الجنطة تذكرت المرض

- صهيب النتيجة ؟!!

- امشي هساع اخذچ للطبيب
ولا منيتهم هالما يخافون الله ولد الـ.... استغفر الله رب العظيم واتوب اليه

- بسك صهيب
اعرف الضغط عليك چبير بس ما يصير هيچ
لازم تهدا لا يروح يصيرلك شي لا سامح الله بشني نستفاد ساعتها من عصبيتك هاي

- امشي بوية امشي

وصلنا للدكتور ما تأخرنا ربع ساعة ودخلنا
رجع الخوف بية مثل اول ما دخلت للمستشفى وكل جسمي صار ينفض بحيث گبل گعدت ع الكرسي

سلم صهيب النتيجة للدكتور وظل واگف
عيونة تترقب كل حركة منة تعابير وجهه هي الفيصل بالنسبة الي

بالبداية چان يقرا بتركيز
شوي ورجع نفسة ع الكرسي وشمر الورقة ع الميز

ابتسم
اي ابتسم وبهاي الأبتسامة ردتلي روحي الي انسلبت مني من اكثر من شهر

صهيب.. ها دكتور بشرنا

الدكتور.. الحمد لله الكتلة طلعت حميدة

باوعت الأمي بچت گبل
ما ادري اگوم احضنها حتى تهدا شوي
لو اشمر نفسي بحضن صهيب وابچي لحد ما ارتاح لو شسوي بالضبط

صهيب ما گدر يسيطر على فرحتة
لا ارادياً وبس سمع الخبر راح حضن الدكتور ورجع باس راس امي وراها باوعلي وابتسم

الدكتور.. ألف الحمد لله على سلامتچ بنيتي

هناء.. الله يسلمك دكتور

- بس للأمانة اني مجبور احچيلچ الصراحة
حسب ما شفت بعيوني الكتلة كان حجمها كبير للغاية

لذالك وللضرورة
لازم تتواصلين ويا الدكتورة النسائية بـ أسرع وقت ممكن حتى تعرفين حجم المضار السببتها الچ داخل الرحم

ام هناء.. اي دكتور اكيدن راح تراجع

على كثر ما فرحت على كثر ما ضجت وخفت
هو هذا الچان قالقني من يوم ما عرفت بالموضوع ولساعة

صح طلعت نتيجتي سليمة
بس الظاهر راح اعاني هواي بمسألة الأنجاب وبالتالي لو احظى بفرحة الأمومة لو انحرم منها طول العمر

بعد ما طلعنا من الدكتورة اتصلنا بالبصرة
بشرناهم بالنتيجة وعمي الشيخ من الفرحة گال النة هساع تردون اريدن افرح بسلامة بنيتي وياكم

چان المفروض نبات
الطريق طويل وصهيب اصلاً مريض الة يومين وما بي يسوق بس انجبرنا نرجع الخاطرهم

صارت رجعتنا بلليل
اول ما نزلنا من السيارة صار الشيخ بوجهنا واگف بالباب

اشر للولد ع السريع
جابوا الذبيحة ذبحوها جوة رجلي
وراها گدامهم باس راسي وگال الحمد لله اعلة السلامة بنيتي الغالية

- الله يسلمك عمي

صهيب.. يابة عليش هيچي مكلف نفسك 

الشيخ ضاري.. بنيتي تستاهل ماي العين موش ذبايح

ام هناء.. رحم الله عمي شيخنا ما گصرت

دخلنا للبيت والكل تلگونا فرحانين
ظليت گاعدة يمهم بالصالة رغم تعبانة بس فرحتهم بية نستني كل تعبي

لـ 11 بعد تعبت كلش
سلمت عليهم ومشيت للغرفة توني مغيرة ملابسي طب صهيب

- ها حبيبتي شلونچ هساع

رديت بـ أبتسامة
- الحمد لله زينة طول ما انت يمي

- چا يلا ردي مثل گبل
صارلچ مدة تتعززين براسي وآنه ساكت هساع صار الوكت خاطر اردنها ليچ

- ههههههه
اي گول شني رايد وبعيوني

بس حچيتها اشر على ملابسة
عرفتة يريد انزعة لأن آنه عودتة ع الدلال وما يگدر بدونة بعد

رفعت البلوزة بس وخرتها منة سحبني علي
باوع العيوني ابتسمت بتعب صهيب اريد انامن والله مالي حيل الكل شي هساع

- اشتاگيتلچ ولچ

- وآنه بعد اشتاگيتلك

- چا يلا شني ناطرة

- تعبانة والله
بعدين انت مو مريض وجاي من السفر وينك وين هالسوالف

- آنه جار هالسوالف اصيرن مثل الحصان لا تاكلين همي

- ههههههه
زين ممكن تأجلها الباچر وبيك خير وتتدلل

- يابة صارلي شهر صايم
اول مريضة ويوميا طايحة تالي عمليتچ وبالاخير نفسيتچ تعبانة وتفكرين بالنتيجة

هساع خلص
مالچ حجة بعد واليوم يا آنه يا انتِ يبت نجمة

- هههههه
انت والله انت بس اسمعني.....

ما خلاني اكمل كلامي گبل باسني
نمت بيومها براحة لأول مرة من بعد شهر كامل من الخوف والقلق

يومين وراجعت دكتورتي
وفعلاً مثل ما گال وتوقع الدكتور الي ببغداد

الكتلة مسببتلي مضار وخمول بالرحم
ويحتاجلي رحلة علاج طويلة بس الي طمني بكلامها اكو امل اصيرن ام بيوم من الأيام ان شاء الله

ومن يومها وامي رجعت للبيت
شكثر توسلوا بيها حتى تظل يمنا بس گالت بنيتي وصارت زينة مالكم حجة اعلية بعد

غسق.. خلصت امتحانات نص السنة واجت العطلة
اليوم واگفة انظف بغرفتي علمود اخلص وقت صارت هوية إسحاق بالمجر گدامي

چانت استنساخ وگوة الكتابة تبين بيها
اخذني الفضول اقراها كلمة كلمة بلكت اتعرف على رجلي الي صارلي اكثر من سنتين معاشرتة وما اعرف عنة شي

بديت اقرا بيها وصلت التاريخ ميلادة
2/17/****
هاي اول مرة اعرف مواليدة

چنت ادري بعمرة التقريبي
بس السنة بالضبط مچنت اعرفها وهسه يلا عرفت

رجعتها للمجر واخذت الوصلة من الكرسي
دامسح بالميز فتحت عيوني بصدمة 2/17 يعني هذا الشهر !!!

ذبيت كل شي من ايدي وركضت
إسحاق معلگ تقويم ع الحايط ويوم بيومة يشطب علي بسبب مواعيدة وتواريخ القضايا اليستلمها

باوعت للتقويم هو اليوم شطب گدامي
15 بالشهر معناها بعد بس يومين ويصير عيد ميلادة

ارتبكت ما اعرف شسوي بعد
من جهة فرحانة لأن عرفت التاريخ قبل ليفوتني
ومن جهة ثانية حايرة شلون راح اتصرف ويا هاليوم بدون ما اخجل من شي

نزلت جوة شمس چانت يم هناء
دگيت الباب وطبيت اجت ود تركض وراية وگعدت بحضني

هناء.. فدوة شوفي شلون متعلقة بغسق

شمس.. لعد غير هي امها الربتها

هناء.. اي والله صح
گالوها وارجع اگولنها آنه الأم الي تربي مو الي تجيب

غسق.. بنات عندي موضوع واريدكم تساعدوني بي

شمس.. اي من عيونة گولي

- عيد ميلاد إسحاق بعد يومين واريد اسويلة مفاجأة

- اي خية سهلة
سويلة كيكة بالفرن ملطخيها بالككو
وطلعي للسوگ جيبيلة دشداشة حلوة هدية وفضت السالفة

شمس.. باوعوا هاي يا الله
فرن شنو دشداشة شنو صدگ تحچين ؟!!

- چا شني تجيب مصاص لو حامض حلو مثلاً

- يبوووو
اسكتي اسكتي راح تجلطيني والله

حچتها والتفتت علية
- معليچ بهناء خليچ وياية اني
لأن لو تظلين وراها تگولچ حلبي حليب الة من الجاموس وسويلة روبة ياكلها ويااااا الهبيط مالتهم

- عشتووو هاي فوگ ما اعلمها يعني

- لا شكراً خلي افكارچ الجهنمية الصهيب المسكين

- ههههههه
هو صدگ مسكين تدرين بعيد ميلادة هذا شجبتلة

- دشداشة مو

- لا يا ريت
جبتلة موبايل صرصور واخذت موبايلة الجديد

- هههههههههه
لا والله انتِ مو طبيعية صدگ لو گالوا توم وجيري

- اي چا شعبالچ
حتى بعيد ميلادة اقفص علي غير آنه هناء

يحچن واني مبتسمة الكلامهن
طبت ريحان وعمة سكينة جايات علمود هناء گبل شمس سحبتني وطلعنا من الغرفة

ظلت تحچي وتعلم بية قريب الساعة
اخر شي اتفقنا نطلع باچر علمود اجهز الترتيبات قبل بيوم وبدون ميحس إسحاق

لليل خلصت شغلي وصعدت
چانت ود يم ابوها تلعب اخذتها نومتها ورجعت لگيتة يريد ينام

- إسحاق شنو راح تنام

- اي بوية خيرچ محتاجة شي

- اي
يعني اقصد اريد استأذنك

- كملي

- اريد اطلع ويا شمس باچر
عندي هواي نواقص محتاجة اشتريهن ضروري

- وياهو اليمشي وياكم

- وحدنا غير

- لا بوية لا
لو تشوفن الچن حرمة چبيرة تمشي وياچن لو مامش روحة احسن

- اي ليييش
يعني شكو بيها لو رحنا وحدنا قابل صغار وانتيه

- غسق لا تعاندينننني

- ااااي ميخالف
عود اشوف منو تجي ويانة بس وافق

- خوب ذكريني انطيچ فلوس باچر گبل لا ترحين

- لا ما اريد اني عنـ...

بعدني ممكملة كلامي رفع راسة خزرني
گبل سكتت خلي اخذهن بدون مشاكل وعود الهدية اجيبها من فلوسي الخاصة

ثاني يوم ظليت حايرة
منو يعني تجي ويانة الحجية ؟!! اكيد لااا
زين عمة سكينة فشلة ما عندي ميانة قوية وياها حتى اطلب منها هيچ طلب

لگيت الحل واخيراً
صح تعبانة بس هاي خالة ام هناء مستحيل ترد واحد ينخاها حتى لو چانت نايمة بالفراش

اتصلت بيها وگبل وافقت
للعصر واگفة البس بحجابي وإسحاق يمشط وراية لأن هو اليودينا

باوعت علي مد ايدة الجيبة
گال شكثر محتاجة گتلة 25 وعشرين شو هذا رفع حاجبة وباوعلي صفح

- ها شنو هواي
عادي انطيني 15 اذا ما عندك

- لچ بوية لا تسودنيني
امس تگولين عندي حاجات هواي ناقصتني
واليوم تگولين اريدن بس 25 شني تضحكين اعلية لو اعلة رويحتچ

- ها يعني تقصد قليل

- ههههههههه
الأدري بي انتِ موش غبية بس عليش مرات احسنچ هيچي

خجلت وبعدت نظري عنة
سحب ايدي حط بيها 100 ألف وگال ها هيچي زين لو محتاجة ازود

- لا لا اصلاً هواي هذني

- بالعافية يابة

حچاها وطلع من الغرفة
نزلت ورى انطيت الود نستلة وبسكت
حتى تنشغل بيهن عني لأن تبچي اذا رحت گدامها وتسحبت بدون متحس علية

شمس نصحتني اشتريلة ساعة
گالت ماكو شي مهم بالنسبة للقضاة اكثر من الوقت
ومن فكرت بيها شفتها صح فـ اشتريت ساعة ماركة لأن هاي اول هدية فعلية اقدمها الة بهيچ مناسبة

وراها اشتريت انواع الزينة
اخر شي الكيكة صح راح اتبهذل بيها منا الباچر بس ما عندي غير هالفرصة حتى اشتريها

رجعت للبيت صعدت بوجهي للغرفة
لفيت الكيكة بعلاگة سودة وضميتها بالثلاجة
اخاف بالصدفة يفتحها إسحاق حتى لينتبه عليها وتخرب المفاجأة

بـ 12 يلا اجة متأخر
لأن خابر عليهم وگال آنه يم ايوب راح اظلن ويا لحد ينطرني اعلة العشى

بس شفتة گبالي گمت
طلعت ملابسة ورحت للثلاجة صبيتلة گلاص مي خاف يعطش ويفتحها

قدمتة الة باوعلي مستغرب
- بوية آنه ما گلت اريدن ماي

- اي ادري
بس گلت ويا نفسي توك راجع من برة اكيد عطشان

- عاشت ايدينچ

اخذة حطة ع الميز رجعت شلتة
اشرب إسحاق ترى الماي ضروري للجسم حتى لو متحس بعطش بس لازم تشرب

- هههههه
جيبي لا تسوينها سالفة اعلية

حچاها وشرب الماي
جريت نفس براحة هسه مراح يفتح الثلاجة بعد

ظل گاعد بالساعة
يشتغل على قضية مهمة بحيث ما رفع راسة رغم كل شوية يتثاوب من التعب

اخر شي طفة كلش
لم الاوراق حطهن ع الميز وگال طفي الضوة

ماكو دقايق ونام
اني هم امنت على نفسي بعد ونمت ورى ما حسيت إلا الصبح

طول اليوم مرتبكة
ادري بنفسي ما مستعدة بس لازم اكسر هالحجاز البيناتنا حتى ارتاح واخلص من التفكير

العصر بعد ما طلع إسحاق
رتبت الغرفة وزينتها وراها جهزت نفسي
وشمس شالت عني كل الشغل حتى لتحچي الحجية علية

بس خلصنا العشى
عفتهم مجتمعين بالصالة وصعدت
الزينة چانت جاهزة بس شلتها من صعد إسحاق يبدل رجعت ركبتها وطبيت سبحت

خلصت كل شي تقريباً
حتى ود نومتها خليت الكيكة وظليت اراقب من الباب حتى بس يصعد اطفي الضوة واشغل الشموع

سمعت خطواتة ع الدرج
ركضت طفيت الضوة والجداحة بـ ايدي داشغل الشموع ما لحگت طب

ملامحة ممبينة كلش لأن بعيد وظلمة
بس اكيد انصدم لأن ممتوقع هالتصرف من عندي

مشيت بـ اتجاها من وصلت يمة شفتة مبتسم
سحبتة من ايدة للميز وگفت گبالة وهمزين چانت ظلمة حتى اتشجع واحچي البگلبي بدون خجل

- اول شي كل عام وانت بـ ألف خير

كل عام وانت سندي الوحيد من بعد رب العالمين
كل عام وانت كل شي الية اب اخ زوج صديق وكل شي حلو بحياتي

كل عام وانت أنسان ناجح
كل عام وانت أبن بار بـ ابو وامة
كل عام وانت احن اخ بالدنيا على اخوانة

كل عام وانت اطيب اب
الله يخليلك ود ويخليك النة ويفرحنا بأخ او أخت الها يملون علينة حياتنا الجاية

ما ادري اذا نسيت شي او لا
بس اكيد كل هالكلام قليل بحقك إسحاق
انت تستاهل الأكثر وشهادتي بشخص مثلك مجروحة لو احچي منا لألف سنة

سكتت شوية چان يسحبني من ايدي الحضنة
- كل هذا وتگولين قليل ؟!!

انتِ سكوتچ كلام
وكلامچ دوة يرد العافية الجسمي
نظرتچ ترويني
ولهفتچ اعلية الاتنوعها دايماً بعيونچ الحلوة تغنيني عن الدنيا وما بيها

تدرين فستقة
موش انتِ الوحيدچ چنتي محتاجة الشخص مثلي بحياتچ

آنه بعد
چنت وما زلت وراح اظلن كل عمري احتاجچ بحياتي

- واني موجودة وياك
اليوم وباچر ولحد اخر يوم بحياتي لأن ما عندي غيرك بـ هالدنيا ولا اريد غيرك اصلاً

يلا هسه اتمنى امنية وطفي الشموع
وحباب لتستهزأ حتى لو ما عندك أيمان بهالسوالف بس سويها الخاطري

- لا وطلعتي حافظتني همينة حلوووو

- هههههههه
لعد بس انت تحفظني وتفهم علية واني ساكتة
اكيد اني هم حافظتك وما اگول افهم سكوتك بس ع الأقل داحاول افهمة

باوعلي وابتسم
ما احب يردني غمض واتمنى ويا نفسة
الفضول چان ياكل بية بس مع ذالك ما سألتة شنو تمنيت لأن مو وكتها هسه

شغلت الضوة ورحت للكنتور
طلعت الهدية قدمتها الة كل عام وانت بألف خير مرة ثانية

هاا وهاي مو من فلوسك ترى
خاف تگول تاخذ مني وتشتريلي ههههههه
واكيد اعرف ماكو فرق بيناتنا بس حبيت تكون أول هدية مني شخصياً

- مشكورة بوية بس بعد لا تعيدينها

فتح الهدية شافها وابتسم
- ها عجبتك ؟!!

- منچ اكيدن تعجبني
عبن كل شي من ايدينچ حلو مثلچ

خجلت من كلامة
درت وجهي سحبت السچينة باوعتلة ملتهي يباوع للساعة فتحت الحبل مال الروب بس خجلت انزعة

قطعت قطعه والتفتت علي
دياخذها مني باوع على ملابسي بلع ريگ واخذ الماعون رجعة ع الميز

قفل الباب ورجعلي
ما اگدر اوصف الشي الچنت احس بي بوقتها

سحبني الحضنة وتقرب من اذني همس
كل عام وانتِ جاري ما تفارگين حضني ولا دقيقة

حاولت اقوي نفسي على گد ما اگدر
صار يبوس برگبتي وراها باسني من شفتي حيل

شعور الرفض صار ازيد هالمرة
من اول ما سحبني علي وبداخلي شي ميريدة
بس ظليت ضاغطة على روحي لأن اريد اخلص من هالحالة وارتاح

باسني اكثر من مرة مثل الديحاول يهدأني
بدت نفسي تلعب بشكل مو طبيعي
حطيت ايدي على صدرة وچانت حركتي واضحة خصوصاً الشخص ذكي مثل إسحاق

ابتعد عني ما تحملت بعد
لزمت حلگي وركضت للحمام بعدني بالباب تقيأت

وگعت بالگاع ابچي
تعبت كلش هالحالة بدت تسلب العافية والراحة من جسمي شوكت اخلص منها وارتاح

ظليت ربع ساعة بمكاني
معدتي فرغت ودموعي ما جفت هنا نفسي صعبت على نفسي وحسيت بالضعف من جديد

گمت بعد ما هدأت شوية
نظفت الگاع وغسلت وطلعت ما لگيت إسحاق بالغرفة اكيد زعل وحقه محد يلومة

لملمت الميز ونزلت الزينة
رجعت كل شي المكانة وحتى ملابسي غيرتها اخر شي طفيت الضوة وتمددت انام

حاولت اغفى ما گدرت
گلبي يوجعني على إسحاق قبل نفسي
وين راح وشگاعد يحس هسه بسببي شلون اگدر انام وهو زعلان

گمت دالبس حجابي طب
ما حچة شي طفى الضوة وتمدد اني هم رجعت نمت

بقيت انتظرة يحچي
عادي حتى لو يرزلني قابلة بس ليظل ساكت هيچ

تعبت وهو ما تعب من التجاهل
اخر شي دار ظهرة الية بالعشر دقايق عرفتة نام لأن گام يشوخر

غمضت عيني وگبل نزلت دموعي
رجع المنظر مال ذاك اليوم براسي وهم يتقاسمون حقارتها علية

الله ينتقم منكم
وين ما چنتوا ان شاء الله حوبتي تدور وياكم وكون متشوفون الراحة ولا تعرفون طعمها بيوم

للصبح فزيت إسحاق ماكو
الظهر هم ما اجة ع الغدة سألت ريحان گالت اتصل اعلة امي يگول عندي شغل ما اجي لليل

تعشوا واني ما اشتهيت اكل
بس خلصت شغلي ويا البنات صعدت للغرفة
بقيت انتظرة قريب الـ 12 يلا طب سلم علية ونزل الجنطة من ع الكنتور

گبل گمت من مكاني بـ اتجاها
- خير وين رايح ؟!!

- البغداد

- ليش !!!

- شني عليش غير عندي شغل

ما جاوبتة
رجعت الفراشي ضايجة صارلي فترة خلصانة من روحات بغداد شذكرة بيها هسه

خلص ترتيب الجنطة وبدل
تمدد يمي دايرلي ظهرة كلما اريد افتح ويا الموضوع اتردد لأن ما عندي شي يبرد گلبة حتى اگولة الة

ثاني يوم انطاني فلوس وسافر
يومين وهو ممخابر باليوم الثالث اتصل على الحجية بس سأل عليهم وسد الخط حتى ما حچة وياية

ريحان.. بديت اتظاهر گدام اهلي بالعافية بس داخلي مرض بمرض

مو سهلة علية اتجاوز مشكلتي بسهولة
بس رغم كل شي جاي احاول عبن جمار بالذات ما يستاهل الزعل الزعلتة علي

العصرية گاعدة ويا البنات بالمطبخ نسولف
سمعت نجاة يم الباب تحچي ويا بتها رؤى بكلام رجعني النقطعة الصفر

- ولچ غير جمار لاعب جولة
يگلچ مسوي النهلة ذاك العرس الما شافتة ريحان منة لا وموش بس هيچي ماخذها شهر عسل همينة للخارج

- يا عودن جاي ينتقم من عمتي بعملتة هاي

- لالة ولچ يا انتقام هذا
اكيدن يحب نهلة ويموت اعليها ما تشوفي بين ليلة ويوم نسى كل شي وصارت هي الكل بالكل

من كلامهم اختنگت
البنات يمي يباوعن علية وعليهم ما تحملت خانتني دموعي ونزلت گدامهم غصب عني

ثناء.. عمة بعينها ان شاء الله
تدري بريحان هنا واجت متقصدة حتى تسمعها الحچي

شمس.. غير صلافة عدها هالمرة والله عجييييب

هناء.. لااااااااااا
آنه بعد فلا اسكت الها واليريد يصير خلة يصير

حچاتها وگامت تركض
راحت وراها شمس تصيح تعالي اخذيني وياچ

طلعنا واگفات يتعاركن وياها
شوي وصار الممالخ من الروس وعبن هن اثنين ما گدرت نجيبة اعليهن

بالگوة امي فاككتهن
اخذني وطلعنا للحديقة عيوني بعدها تجري عشرة عشرة وهن واگفات گبالي يحاولن يهدن بية

منشوف إلا حنظل طب يركض وإلياس يركض ورى
هذا يصيح عوفهم خوية ابوي يتصرف وياهم وذاك يصيح لا والله موتهم اعلة ايدي اليوم
بس عليمن جاي يحچون مندري

شوي وطلع مثل المسودن
كاض الدشداشة بحلگة والسلاح تارس ايدة الثنتين
بعدة ما طالع من الباب
رفع سلاحة ورمى بالهوى وهو يصيح.....

يتبع

لتنسووون ⭐⭐⭐⭐⭐⭐
كل الحب ♥🥀