رواية وضاقت الأرض بي الفصل الرابع عشر 14 - بقلم لبنى الموسوي

#وضاقت_الأرض_بي

للكاتبة #لبنى_الموسوي

عافوني وطلعوا گبل گمت من مكاني
باوعت على إسحاق سد الباب وطگ القفل ما اشوفة إلا رفع دشداشتة ونزعها بدون مقدمات

صفنت علي بخوف
ياربي هذا شديسوي من كل عقلة ؟!!

شمر الدشداشة ع الچرباية وظل بالسروال والفانيلة الداخلية
ما احس إلا صار يمي بدون ميباوع علية دنگ ع الميز وطلع منة خنجر

رجعت ليورة بخوف
چان يگول الوصلة وين ناوليني
هزيت راسي بدون ما احچي لان احس لساني انبلع من رهبة الموقف

- يابة شمالچ
وصلة النيشان وين فضيني عاد

درت ع الجرباية شلت الوصلة وانطيتهيا
شو هذا فتح اللفاف من زندة ولچم الجرح مالتة گبل طگ دم غمضت عيني باشمئزاز

- هاي ليش سويت هالشكل !!!

ما جاوبني
فتحت لگيتة حاط الوصلة على جرحة ويباوع علية
بقيت صافنة بوجها معقولة هذا الدم عود نيشان عذريتي

شوية وحط الوصلة ع الميز
اباوع عليها كلها دم زين شلون لو اكتشفوا هذا مو دم عذرية اكو نسوان متفوتهن هيچ سوالف

درت وجهي علي شفتة گاعد ع الچرباية
بـ ايدة الگطن والديتول يحاول يعقم بجرحة
تقربت گعدت بصفة لازم نحچي اريد اعرف بشنو ديفكر بالضبط

- ابو ود

- نعم

- تحب اساعدك
جرحك دينزف لازم تضمدة وتلف علي اللفاف

انطاني الگطن بدون ميحچي
سحبت الديتول من ايدة الثانية وبديت اعقم الجرح
چان الخياط مفتوح من الطرف لذالك الدم دينزل بكثرة شگد حاولت اوگف النزف بس ما گدرت

- ميصير تظل هيچ
جرحك مفتوح ويجوز تحتاج خياط ثاني

- ما بي شي
بس اضغطي اعلي باللفاف حيل وهو يوگف

- براحتك

عقمت الجرح ولفيتة الة حيل مثل ما طلب مني
باوعت الروحي منا بدلتي متدمرة من دم الذبيحة ومنا دم إسحاق حتى نفسي لعبت من ريحتي

رفعت راسي لگيتة يباوعلي
- اريد اغسل شلون

- هذا وينة الحمام گدامچ

درت اباوع اكو حمام بالغرفة
يمكن هذا احسن شي چنت شايلة هم شلون اطلع من الغرفة واني بهذا الوضع

فتحت الكنتور ما اندل شي بي
كل الجهاز عمة سكينة رتبته على ايدها حتى الملابس

بقيت ادورلي شي البسة
شوية ولگيت ملابس البيت سحبت دشداشة مستورة وسديت الكنتور

فجأة سمعت صوتة صاحني
باوعتله وهزيت راسي چان يگول لبسي شي مال نوم

فتحت عيوني علي مصدومة
معقولة ناوي يتقرب مني واني فرحت
كل ظني ميريدني وراح اخلص من هذا الهم

شافني صافنة علي باوعلي بطرف عينة وگال
- تعاي اگعدي جاري

مشيت بخطوات بطيئة
گعدت بصفة خايفة چان يحچي وهو داير وجها عني

- اسمعي يبت الناس
آنه ادري الصار وياچ موش سهل والله يعينچ اعلي

لكت بذات الوكت لا تترجين مني شي
آنه سترت اعليچ وهذا حدي وياچ اكثر من هيچي تعذريني

- واني مرايدة منك اكثر من هذا
خلف الله عليك من سترت علية بالوقت المحد تقبلني بالعيب البية حتى اهلي

- خلني اكمل

- تفضل

- تظلين حرمتي وان چان هالشي بس بلأسم
كل حگوگچ توصل اليم رجليچ وبذات الوكت كل الحگوگ العليچ مجبورة تأديها وانتِ الممنونة

گدام الخلگ انتِ حرمة الميزان
يعني واجب اعليچ تصونين اسمة طول ما انتِ حاملتة برگبتچ گدام رب العالمين وعبادة

بية عيوب بگد ما ربچ خالگ بشر
تتحمليهن مني مثل ما راح اتحمل عيوبچ العرفتهن والما عرفتهن بعد

وبنتي ما تگربين صوبها
هي بكتر وانتِ بكتر ما اريدن اشوفها بـ ايدينچ لا بحضوري ولا حتى بغيابي

تسمعين مني اشيلنچ فوگ هامتي
لا والله مشيتي اعوج وما همچ شي بالدنيا بس لأن ابوي بظهرچ هنا راح تشوفين وجهي الاخر واحسنلچ لو تخليني خافي لأنة مراح يعجبچ صدگيني

ها شگلتي ؟!!
سمعيني حسچ لا تظلين ساكتة هيچي

باوعتلة واني حابسة الدمعة بعيني
- صار مثل متحب

- چا خوش
گومي لبسيلچ هدمة مال نوم خاطر من يجن عماتي ما يشكن بشي

- شنو ناوي تسوي

- تعرفين الوادم هنا ما مرتاحة الجيتچ المفاجأة
ضروري نثبت الهم انتِ بت بيت وما اجيتينا لهنا بمكسورة مثل ما جاي يتحچون بظهرچ

- وشلون لو وحدة من النسوان عرفت هذا مو دم...
وسكتت

- لا تخافين
ابوي اتفق ويا عمتي نجمة اعلى كل شي
لا آنه ولا هم راح نرضى احد يمسچ بحچاية سوء وانتِ حرمة الميزان

آنه ما احبن هالسوالف
لكت انجبرت عليها خاطر اثبت للكل انتِ هدية موش دخيلة ووراچ عملة مثل مايگولون

هيچي يلا يبلعون لسانهم
ويسكتون عنچ وعن سيرتچ وانسد هالسالفة كلش خاطر تستمر حياتنا طبيعية گدام الوادم

گومي غيري بسرعة
ولون اجن النساوين الحجرتچ لاتتنفسين وياهن بحرف
وغير چلمة المشكورة ما اريدن اسمع من لسانچ

گمت بدون ما ارد علي
فتحت الكنتور اباوع الملابس النوم
ردت اسحب لون بيجي لأن استر من غيرة چان يصيح الأبيض موش هذا

باوعت علي واخذت الروب الأبيض
طبيت للحمام صار انعكاس صورتي بالمرايا باوعت على روحي ونزلت دموعي لا ارادياً

اي يا غسق هذا هو حالچ مراح يتغير
ابد لتتصورين هالدمعة راح تنشف بيوم من الأيام

عشتي غريبة وراح تموتين غريبة ومظلومة
هاي اذا چنتي عايشة اصلاً وما متي من يوم ما اعتدوا عليچ ولد الحرام وخسرتي بساعتها حتى نفسچ

گعدت بالگاع ابچي بصوت مخنوگ
انهانيت هواي وانذليت اكثر
ولو ما حرام علية چان سويتها ورجعت لاهلي حتى يكتلوني خلاص والحگ بشجن وامي وارتاح من هالعيشة المرة

ما ادري شگد مر وقت واني ابچي
سمعت الباب يندگ وراها إسحاق صاح يلا بوية شمالچ بطيتي هيچي

مسحت دموعي وگحيت حتى يتغير صوتي
گتله اي جاية
جاوب استعجلي بلاية زحمة اعليچ

گمت من مكاني ع السريع
نزعت البدلة وغسلت جوة عيوني لأن سال المكياج ودمر وجهي بسبب الدموع

لبست الروب الابيض
چان مفتوح بشكل فضيع وما ينطلع بي
عاد همزين فوگا تور على طولة اگدر استر جسمي بي

باوعت الروحي بالمرايا مبين من عيوني باچية
سحبت شعري ليورة لأن التسريحة نازلة وخففت الحمرة وراها طلعت لگيت إسحاق يفتر بالغرفة

بس شافني ظل صافن
شوية وانتبه على روحة دار وجها ع الميز شال النيشان حطة ع الچرباية وفات من يمي طب للحمام

دقيقتين وطلع غاسل ايدة من الدم
سحب الدشداشة البيضة لبسها وفتح الباب وقبل لا يطلع گال

- هذا النيشان ما تسلمي غير العمتچ نجمة تفهمين

- اي

بس طلع دخلن عماتة للغرفة
ما عاولي شفت خالة ام هناء گمت من مكاني بسرعة حضنتها ابچي

ظلن يصيحن يا شبيها الفرخة
ما اهتميت وبقيت على نفس وضعي لحد ما حچت عمة سكينة

- شنهي الجرة ييمة
كون لا يطلع الزلمة مأذيچ

ام هناء.. النيشان وين بنيتي

باوعت عليها ومسحت دموعي
رحت للچرباية شلتة وسلمته بـ ايدها مثل ما طلب إسحاق

بس شافنة گامن يرگعن بالهلاهل
اخذتة خالة ام هناء وطلعت من الغرفة
ما ادري على شنو متفقين وياها بس هي حتى ما راوتة الهن يادوب بس لمحنه من بعيد وصارن يهلهلن

اقل العشر دقايق طلعن من يمي
بقيت گاعدة اخاف اروح اسبح ويجي إسحاق
مدا اگدر اتحرك براحتي لأن ما احس هالمكان مكاني

انتظرتة بالربع ساعة يلا اجة
سد الباب وتوجه للكنتور سحب ملابسة ودار علية
ديروح للحمام باوعلي بطرف عينة

- ليش لساچ ما سابحة

- چنت انتظرك

شمر ملابسة ع الچرباية وتمدد بالجهة الثانية
- گومي بوية
اسبحي وغيري الهدوم العليچ بعد محد يزعجچ من هالساع

- وانتِ مو تريد تسبح

- اسبح خلافچ

بس حچاها گمت للكنتور
طلعت ملابس مستورة واخذت المنشفة الوردية اكيد هي مالتي لأن منشفتة عندة اخذها ويا ملابسة

دخلت للحمام افتح بالتسريحة وماكو
شعري ثخين وحايرة ام الصالون شلون تثبتة بالماشات

خلص صبري وشعري ما خلص
تأخرت كلش اكيد الرجال تعبان ويريد يسبح وينام لو ادري هيچ اتأخر چان خليتة يطب قبلي للحمام

سبحت ع السريع وطلعت
لگيتة مغمض عيونة بالبداية عبالي متمدد بس لمن تحركت وما فتح عرفتة نايم

وگفت ع الميز امشط شعري بهدوء
رفعتة ليفوگ دارجع المشط بدون ما انتبهه طخت ايدي بالعطر وگع گبل فز إسحاق

- اسفة گعدتك

- نعيماً

- شكراً
تگوم تسبح لو تكمل نومتك

- لا اسبح

شريت المنشفة واخذت ملابسة للحمام
علگتهن الة وطلعت لگيتة ينتظرني بالباب بس شافني گبالة گلي مشكورة ودخل يسبح

بقيت گاعدة ع الچرباية
اباوع بزوايا الغرفة بين ميطلع حتى اشوف شلون ووين اگدر انام

ما طول خمس دقايق وطلع
نشف شعرة وطفة الضوة اباوع علي شو هذا تمدد ع الچرباية ونام ولا كأني موجودة وگاعدة انتظرة

- ابو ود

- نعم

- اني وين انام ؟!!

- هنانة
واشر على الچرباية

صح الغرفة چانت ظلمة
بس اكو ضوة خفيف من البستان ضارب عليها
باوعت علي بأستغراب رفع تك حاجبة وعدل گعدتة

- شمالچ بوية
عليش استغربتي هيچي غير انتِ حرمتي وآنه زلمتچ

- لا مو قصدي
بس يمكن لأن ما توقعت منك هالكلام

- شني الرايدتة هساع
اگوم انامن بالگاع خاطر تاخذين راحتچ

- لا اني الأنام بالگاع هذا مكانك

ردت اگوم جرني من زندي حيل
باوعت علي شو هذا خزرني بعصبية وشد قبضتة على ايدي بحيث توجعت كلش

- ها عليش ناوية ست غسق
تردينة نتهاوش (نتعارك) من اول يوم بسبب اعنادچ

- ليش اني شسويت

- گلت تنامين هنا يعني تنامين
صحيح آنه ما تگربت منچ بس تظلين حرمتي يعني هاي الحركات مالهن لازم

- ايدي وجعتني ممكن تهدها

- چا ظلي بمچانچ ولا تطلعين جنوني اعليچ

حچاها ودار وجها عني
سحب الغطا على راسة ونام ظلت الغصة بصدري اريد ابچي بس لا لازم اقوي نفسي كافي دموع لأنها مراح تسويلي شي ولا تعدل حياتي العوجة

ماكو دقايق وگام يشوخر
اريد انام ما اگدر،، للفجر واني اتگلب منا صوت شخيرة عالي ومنا هذا مو مكاني تعودت على غرفة ريحان

للفجر اذن الأذان
گمت صليت ورجعت تمددت بصفة
توني اريد اغفى سمعت صوت جهازة يدگ منبه گعد طفا وگام صلى ما حسيت بشي بعد لان نمت

گعدت الصبح على صوت الهلاهل
فتحت عيني ماهو يمي گمت داروح للحمام اندگت الباب صحت تفضل طبت خالة ام هناء تهلهل

- ألف مبروك يمة شايفة كل الخير
وبوستني

- الله يبارك بيچ خالة

- شلونچ وشلون زلمتچ وياچ

باوعت عليها بدون ما ارد چان تگول
- يمة مو سهلة اعلي يتقبل وضعچ من اولها

اي لا تتنوعيلي هيچي
اعرفة ما تگرب صوبچ وحگة يمة
مثل ما انتِ ما تردي وما راغبة بي زلمة الچ هو ذات الشي يبنيتي

لكت إسحاق خوش إسحاق
زلمة من ظهر زلمة معدل واخو خيتة وساعة اليتقبل وجودچ بحياتة يا كبر حظچ لأن راح تعيشين أميرة ويا وهو الملك اعلى راسچ

اصبري يبنيتي
تراچ وحيدة وهو من هالساع صار كل هلچ والما بي خير لأهلة ما بي خير للوادم

خليچ ويا حرمة معدلة
ولون چانت طاعتة بالخير طيعي يغسق
خاطر تكسبين گلبة وتأسسين عايلة ويا تعوضچ عن الضيم الشفتي بحياتچ

- ان شاء الله خالة
بس ادعيلي دوم الله عليچ لتنسيني بدعواتچ الطيبة

- مامش ام تنسى ضناها وانتِ ضناي الماخلفتة

بست راسها وحضنتها حيل
چان تگول فوتي اسبحي والبسي شي يبينچ عروس گبل لا يصعدن النساوين خاطر يباركن ليچ

طبيت للحمام وخالة ظلت تنتظرني بالغرفة
سبحت ولبست فستان طويل علمود اگدر انزل بي جوة

من طلعت لگيت النسوان بالغرفة
بقن هلاهل ومباركة بالنص ساعة اخير شي لبسني حجابي ونزلوني جوة وياهم

باوعت للصالة ماكو بس النسوان
چانت الحجية گاعدة من شافتني دارت وجها صاحت ريحان الريوگ نزلت المسعدة من حجرتها

ندستني خالة ام هناء
باوعت عليها اشرت بمعنى روحي بوسيها
عفت النسوان الواگفات علمود يباركنلي ورحت بستها من راسها

- مبروك

- الله يبارك بيچ يمة

سكينة.. شمالچ خية
ما تنطين الفرخة نگوطها خلها تفرح

- اي نسيت

مدت ايدها الجيبها طلعت علبة ذهب
انطتنياها وگالت تتهنين بلبستها ان شاء الله
ابتسمت بوجها واخذتها بدون ما ارد صاحت عمة افتحيها خاطر النسوان يتنوعن ليها

فتحت العلبة چانت سوار وحجل ذهب
رجعت بست راسها وانطيت الهدية العمة سكينة ورحت ابوس النسوان لأن واگفات ينتظرني

ربع ساعة وطلعوا الرياجيل من المضيف
بس شفت الشيخ گمت من مكاني ع السريع ورحت بست راسة اما هو تلاگني بابتسامة

- بالمبارك بنيتي
منه المال ومنچ العيال خاطر تترسينة هالدار فروخ

- رحم الله والديك يابة

صاح الريحان جيبي هدية اخيتچ
راحت الغرفتة شوية ورجعت بـ ايدها علبة چبيرة
اخذها من ايدها وباس راسي

- عليچ بالعافية يابة

اجت عمة سكينة سحبتها من ايدي
فتحتها وهي تصلي على محمد وآل محمد
باوعت تخم كامل ذهب شنو السالفة شو هداياهم كلها ثگيلة معقولة بس الي لو هم عاداتهم هيچ

صخر.. بالمبارك خوية الله يسعدكم

صهيب.. مبروك خوية

حنظل.. مبروك

إلياس.. مبروك مرت اخوي زواجة الدهر ان شاء الله

حبيب.. الف مبروك خوية

اباوع الهم مبتسمة وبس اهز براسي
ما متعودة ع هيچ شي ولا اعرف اجامل بالمناسبات
لأني اصلاً مو اجتماعية وعمري ما طلعت خارج دائرة اهلي وبيت عمي سالم

شوية وصبوا الريوگ
توني گاعدة بصف إسحاق اجت بنتة تريد تگعد بحضنة شالها حطها بحضنة وصار يوكلها

ما اشتهيت اكل كالعادة بس گعدت اجاملهم
اول ما خلصنة ردت اخذ ود اغسللها تذكرت كلام إسحاق وبطلت

فجأة الشيخ گال گومي غسلي للبت
باوعت الأسحاق هز راسة بمعنى اي،، اخذتها ورحت للحمام

غسلتلها وغيرت ملابسها بغرفة ريحان
بعدني امشط بشعرها طبت خالة ام هناء علية والجنطة بـ ايدها

گمت ع السريع فاتحة عيوني
- شنو خالة راح ترجعين للحلة

- اي يمة
چا عمچ من اسبوعين وهو وحيدة هم خطاية

- واني

- شمالچ انتِ
عين الله عليچ تزوجتي ومن زينة الزلم

بس عاد لازم اروحن
اتطمنت اعليچ وزوجتچ ما اظن گصرت بشي وياچ

- لا حشاچ من القصور
بس الله عليچ لتگطعين وياية ترى مالي غيرچ بالدنيا انتِ صرتيلي ام واكثر

- لا الچ
زلمتچ واهلة هم اهلچ من هالساع
واذا اعلية اكيدن ما اعوفچ چا غير انتِ بنيتي

بستها وحضنتها حيل
- راح اشتاقلچ هواي فدوة لا تطولين بالجية للبصرة

- لا يمة كل شهر امرلچ لون الله خلانة طيبين

طبت هناء شافتنة متحاضنين
- ااااااحممممم ترى بديت اغارن موش سالفة هاي

- ههههه
تغارين من اخيتچ ولچ

- لا يمة اتشاقى
حچتها واجت حضنتي
راح نشتاگ الچ هواي ظلي اتصلي اعلينة

- وانتِ هم خابريني دوم
مرات استحي اتصل من كيفي

- هاي بس هسه
كلها چم يوم واگفلچ من التفلون
صار البيت لأم طيرة وطارت بي فرد طيرة ههههه

- هههههه
والله راح اشتاق لسوالفچ الحلوة

- وآنه هماتين
ديري بالچ اعلة نفسچ وصيري قوية ما اريدن اشوف الدموع بعينچ من اجي مرة لخ

- ان شاء الله
رحم الله والديكم ما قصرتوا وياية ابد

- لا هذا واجبنا
انتِ صرتي منة وبينة موش غريبة

- والنعم منكم ومن اصلكم
حچيتها ورجعت حضنت خالة ام هناء

نص ساعة وصاح الشيخ الزلمة برة ناطركم
سلموا عليهم وراحوا للحلة

حسيت نفسي اختنگت والعبرة تارسة صدري
بس مع ذالك وعدت نفسي ما ابچي بعد ولازم اكون گد كلمتي ووعدي

اسبوع مر والوضع مثل ما هو
بالنهار إسحاق يگضيها بالمضيف يم الزلم وبلليل يلزم الكتب يقرا ما ادري شنو لحد مينام على روحة

من يحتاج شي يطلب مني عادي
واذا شافني خجلانة انزل يمهم يفهم علية بدون ما احچي وينزلني ويا يخليني يم ريحان ويوصيها علية يلا يروح للمضيف

وبعد الأسبوع
طلع إسحاق الصبح من البيت لليل يلا رجع متأخر
حميت الة الأكل وحطيتة گدامة تعشى وگام غسل ديريد يصعد چان يگول الشيخ

- يابة غسق
من هالساع الفرخة تنام يمچ انتِ امها بعد

باوعت على إسحاق ضاج بس ما اعترض
عافنة وصعد اخذت ود من ريحان حتى اصعدها وياية گامت تبچي اجة الشيخ شالها يسكت بيها

- بنيتي اسمعيني عدل
هاي الفرخة امانتچ صيري گد الأمانة وعامليها باليرضي رب العالمين خاطر تكسبين محبة زلمتچ

- صار يابة

- الحجرة البصف حجرتچ جهزتها ليها
عوديها من هالساع تنام الوحيدها ما يصح تظل وياكم بمچان واحد

- ان شاء الله تأمر

باوعت عليها سكتت شوية
اخذتها من ايدة وصعدت فتحت الباب چانت غرفة جاهزة من كل شي حتى العاب بيها

ظليت گاعدة العب بيها
كل شوية تتنحس وتبچي تريد ريحان واني احتار شسوي حتى اسكتها

بعد ساعتين انهد حيلي يلا نامت
هي مو صغيرة عمرها سنتين تقريباً ومفطومة من الممة يعني مستحيل تگعد بلليل

طلعت وطفيت الضوة عليها
فتحت باب غرفتي چان إسحاق گاعد يقرا بالكتاب ويدخن

اخذت تراك من الكنتور ورحت بدلت بالحمام
طلعت بعدة على نفس وضعة گعدت بصفة چان يگول

- وين صرتي

- انوم بود

- وين نيمتيها

- بالغرفة البصفنا
ابوية مجهزها من كل شي علمود بنتك

باوعلي ورجع يقرا بالكتاب
- ابو ود

- خير

- اني ما گدرت اگول لا للشيخ

- مامش بشر هنا يگدر يگول للشيخ لا
نفذي اوامرة وانتِ ساكتة لأن الچلمة الأولى والأخيرة الة موش الغيرة

- زين لعد
تصبح على خير

- وانتِ من اهلة

تمددت افكر بكلامة
همزين ما زعل مني عبالي راح يضوج لأن ابو فرض علينة شي هو ما رايدة

صارت الأيام تمشي بهدوء
تعودت على حياتي وياهم وصرت اشاركهم الشغل واني ساكتة حتى اتجنب المشاكل واظل عايشة بسلام

الكل چانوا زينين وياية
باستثناء الحجية ومرت حنظل نجيبة
احسهن واگفاتلي ع الزلة وينتظرن مني الغلط حتى ينهدن بية بدون سبب

وبعد اسبوعين ضبط
نومت ود البدت تتعود علية شي ورى شي
صح بعدها تبچي وتشلع گلبي يلا تنام بس اهون من اول ايام

طفيت الضوة ورحت الغرفتي
اتفاجأت بإسحاق واگف ديجهز بجنطة السفر سديت الباب وتقربت منة بأستغراب

- هاي شنو

- باچر عندي روحة البغداد

- لعد چان صحتني اني اجهزها الك

- غير چنتي تنومين البت
بعدين انتِ ما تعرفين شني تجهزيلي اعلة الجايات ان شاء الله

- جايات ؟!!
ليش انت دوم تسافر البغداد

- اي شغلي هناك

باوعتلة بتعجب ورحت تمددت ع الچرباية
بقت عيوني علي اراقب حركاتة وافكر ويا نفسي

شدت انتباهي ملابسة
عبارة عن ملابس رسمية ليش هو شيشتغل معقولة تزوجنا وما اعرف عنة شي لحد الأن ؟!!

كمل الجنطة وطفا الضوة تمدد بصفي
ما طول عشر دقايق ونام ظليت گاعدة افكر بغموضة لحد ما غفيت

حسيت الصبح على صوت المنبة
فتحت عيوني ماهو دا اگوم من الفراش طلع من الحمام ينشف بشعرة

إسحاق.. صباح الخير

غسق.. صباح النور
اجهزلك الريوگ لو مستعجل

- لا جهزي عندي وقت

رحت غسلت وجهي وطلعت
لبست حجابي ونزلت جهزت الريوگ شوية ونزل وراية بـ ايدة الجنطة

گعد يتريگ وهو ساكت
كمل گام غسل ومد ايدة الجيبة طلع فلوس من محفظتة

- خلي هذني يمچ خاف اعتازيتي الشي
وعينچ اعلة البت ما اوصيچ بعد وعودن اتصل اعلة امي خاطر اطمن اعليچ واعليها

- توصل بالسلامة

- الله يسلمچ بوية

حچاها وطلع من المطبخ
سلم عليهم وراح بقيت بمكاني صافنة شلون اگدر اعرف شنو البيك يا إسحاق !!!

للظهر گاعدة ويا ريحان بالغرفة
چانت تلعب ود ومنطلقة وياها انتبهت عليهم
علاقتهم هاي مستحيل تكون علاقة عمة وبت اخو

لا دا احس علاقتهم علاقة ام وبتها
بحيث الحب الأشوفة بعيونهم البعض ما شفتة غير بعيون امي الله يرحمها لمن چانت تباوعلي

ماكو غير ريحان
هي وبس تگدر تجاوبني على كل تساؤلاتي
گمت من مكاني گعدت بصفها وسحبت الطوبة من ايدها شمرتها على ود حتى تلتهي بيها

- هاي ليش دادة مو جاي العب الفرخة

- خليچ وياية شوية
عندي موضوع مهم لازم نحچي بي

- خير يارب

- اخوچ

- شمالة !!!

- شنو قصتة
وين مرتة وشيشتغل وليش الكل مهتمين بي دون عن البقية

- روحي اسألي هو ليش جاية تسأليني

- ما عندي الجرئة افتح ويا هيچ موضوع
بعدين انتِ صديقتي الوحيدة بهذا البيت شكو بيها لو حچيتيلي

- لا خية اني شلي غرض ذاك وينة وروحي سألي

- ريحان حبابة
والله ما احچي لأحد وروحها لامي
بس احچي ريحيني ميصير اني مرتة وكل شي ما اعرف عنة لسه

صفنت بوجهي شوية وگالت
احچي لكت عندي شرط ومجبورة توافقين اعلي...

يتبع

وضاقت الأرض بي
فـ لجأت لغير ارضي باحثتاً فيها عن الأمل
هل ياترى سـ أجد الاستقرار هناك ام تضيق بي مجدداً !!!

وبدأت الحكاية

لتنسووون ⭐⭐⭐⭐⭐⭐