رواية وضاقت الأرض بي الفصل السابع عشر 17 - بقلم لبنى الموسوي

#وضاقت_الأرض_بي

للكاتبة #لبنى_الموسوي

شمرت الغصن بالگاع ومشيت
اباوع داير مدايري فجأة خفت اني وين طالعة ؟!!
بلا تيهت وما عرفت ارجع بـ هلليل

درت وجهي حتى ارجع للبيت
شفت رجال ملثم عبر السياج بس شافني ركض بأتجاهي بكل سرعتة

اني هم ركضت سريع
ما صرت اميز الطريق منين المهم بس اخلص من الورطة الوگعت روحي بيها بهذا الليل

حسيتة اقترب مني كلش
صرخت بصوت عالي وعثرت على وجهي من السرعة

درت اباوع وراية شو هذا ما موجود !!
گمت نفضت هدومي ومشيت واني اتلفت داير مدايري

شنو معقولة راح لأن خاف لا ينكشف؟!!
لو بعده موجود بالبستان وعلى ساعة يطلع ويلزمني

ما ادري وين اني حالياً
ما بعدت عن البيت إلا بمسافة بسيطة بس من شفت هذا الرجال الملثم ركضت هواي وتيهت طريقي

باوعت للأشجار وبچيت
شحسيتي غسق من طلعتي للبستان وانتِ كل عمرچ ما طالعة وحدچ حتى لباب البيت

معقولة الصار وياية موت گلبي
معقولة اني اتحجج علمود اذب روحي بالمشاكل عسى ولعل اموت وارتاح من حياتي !!!

بچيت بشهگة وراها صرخت ساعدووووني
عادي عندي حتى لو حچوا علية لأن طالعة بـ هالليل المهم ما يتكرر الصار وياية بالماضي مرة ثانية

بقيت اصيح بدون نتيجة
شكلي بعدت هواي رغم صوتي العالي بس محد سمع الصراخي 

مسحت دموعي ومشيت
يارب يطب الحارس للبستان يفتر
بلكي يجي يشوفني ويدليني ع الطريق قبل لا ابعد اكثر

باوعت للأتجهات منين امشي ؟!!
حاولت اركز عسى ولعل اوصل للطريق الصح بس ما گدرت

كل الدروب ظلمة ومليانة اشجار
خفت لا اتحرك بعد ويطلع الأتجاه خطأ وساعتها اكون بمصيبة اصير بـ اثنين

تقربت من الشجرة ابچي
فجأة انسد حلگي من ورى وسمعت واحد همس يم اذني

- اششش لا تتنفسين

جمدت بمكاني من الصدمة
حط السچينة على نحري صار يمررها بهدوء وهمس

- يعجبچ تجربين الذبح

هزيت راسي بـ لا
گال چا حتى النفس اريدنچ اتگطعي

بعد عني وهو موجه السجينة علية
باوعت هو هذا نفسة الرجال الملثم بـ ايدة دبة صغيرة من الريحة عرفت البيها نفط

صار يرش على الگاع بحركات سريعة
وراها طلع شخاطة من جيبة شغل العود وشمرة ع الزرع

تقرب مني انطاني الدبة وهمس بضحكة
- اجيتيني من السما تعرفين لو لا

بس حچاها عافني وراح
رجعت ليورة والدبة بـ ايدي لأن النار دتمشي بسرعة رهيبة والموقف مينوصف

ماكو دقيقة واجة الحارس يركض
شافني گدامة قيد ايدي وصاح ياهو انتِ وعليش حرگتي بستان الشيخ

اكتفيت بالسكوت
لأن ماعندي شي احچي من هول الصدمة
سحبني حيل وهو مچتفني،، ظل يركض ويجر بية ورى لحد ما وصلنة للبيت

دگ الباب سريع وهو يصيح
- احترگنا شيخنا احترگناااااااااا

ثواني وفتحها إسحاق صرخ بوجها
- شني الصار جبر

- احترگ البستان الداخلي عمي

انتبه علية فاتح عيونة
بسرعة سحبني من ايد الحارس دفعني ع الحايط

- شني الجابچ هنانة

جبر.. هي هاي الحرگت بستانكم
آنه شفتها واگفة يم الزرعات وبـ ايديها الشخاط وهالدبة التشوفها گبالك

ما جاوبة واكتفى بالصدمة
الكل طلع بـ هالاثناء على صوت الصياح وريحة الدخان الترست المكان حتى النسوان طلعن

الحارس خبص الدنيا بـ هالجملة
- هالبت هي الحرگتكم وآنه شفتها بعيني
فجأة صرخ بي إسحاق بصوت نززني من مكاني

- بسسسك عااااااد

اشرلي بـ ايدة وعيونة دم من العصبية
- فوووتي للداخل انتِ والحريم بسااااااااااع

طبيت للبيت اسحل روحي بالگوة
ركض الشيخ هو وولدة حتى يطفون النار
أسمع الهوسة برة صارت لأن كل الناس فزعت علمود ينقذون بستان شيخهم

فوگ الساعة والدنيا مخبوصة
گاعدة بالصالة افرك بـ ايدي ورجلي ترجف خوف
كل الموجودين يباوعولي بنظرات شك ويتهامسون بيناتهم حرمة الميزان سوتها !!!

تمنيت لو ميتة بيومها ولا انحط بـ هالموقف
محد يهمني هنا
لكن الشيخ الي حماني ووگف وياية بالوقت التخلوا عني اقرب ناسي صعب لمن يحس جازيتة بالطعن

بدت الأصوات تهدأ تقريباً
دقايق وطب ابن حنظل الچبير يركض الـ بيبيتة
گمت من مكاني خايفة وكل شي بية يراقب كلامة وادعي كون مطفين النار بدون خسائر

جعفر.. حبوبة ابشرنچ طفوها طفوها

الحجية هيلة..  اللهم صلِ على محمد وآل محمد
گلي يجعيفر خوبن محد من الوادم تأذة بنار هل ما يخافون ربهم

- لا مامش خساير
لكت الزرعات تلفت والبستان صار أسود بـ أسود

- فدوة يمة فدوة
بالمال ولا بالعيال اهم شي انتم سالمين غانمين

دتحچي طب الشيخ والحارس ويا
بعدة ما گاعد اجو الولد بس شحالهم من فوگ ليجوة متروسين بالصخام

درت عيني ع الشيخ يباوعلي بنظرات عتب
وراها سأل الحارس
- احچي بوية شني الصار بالضبط

جبر.. آنه واگف بمچاني مثل كل يوم
سمعت صوت صريخ لكت بعيد كلش گلت اكيدن يتراوالي عبن الوادم كلها نايمة

شگفت سلاحي ودخلت للبستان
اتمشى خاطر اتأكد خافن اكو شي غريب جاي يصير هناك

وآنه امشي تنوعت للنار صعدت من فوگ البستان
دخلت اركض واشوفلك هالحرمة واگفة چدام الزرعات وبـ ايدها الدبة جاي تحرگ بالگيعان

غسق.. لا والله مو اني الحرگتة

الحجية هيلة.. هاي تاليها
حويناچ بدارنا وسويناچ منة وبينة تالي تجازينا بالغدر

حنظل.. ها يابة شني حچيت
وهاي الچنت احذرنك امس من عندة صار اليوم

غسق.. والله مو اني الحرگتة والله والله

إلياس..  وكلام الحارس شني تفسيري

غسق.. صح اني چنت بالمكان بس مو اني الحرگتة

صهيب.. چا شنهي الوداچ لنص البستان

حنظل.. تنوع الها شلون ساكتة
حگها تسكت ليش تگدر تحچي شي وهي عاملتها

باوعتلهم وبچيت
اشتد النقاش بيناتهم الكل چانوا يحچون بعصبية بـ استثناء الشيخ وإسحاق گاعدين يتفرجون عليهم

رجع الحارس عاد كلامة حتى يثبت التهمة علية
صاح حنظل بصوت عالي

- ها يبوي
راح تظلك انت واخوي ساكتين وانتو اهل الأنة

هنا صار المچنت متوقعتة يصير
گام إسحاق سحبني من ايدي گدام الشيخ وصاح بكل صوتة

- لحد يتهم حرمتي بشي هي ما عاملتة وإلا تشوفون مني الما يعجبكم

حنظل.. چا شنهي الچانت تسوي بالبستان بهيج وكت

إسحاق.. چانت وياي

حنظل.. شلون يعني وياك ؟!!

إسحاق.. يعني انت تعقلها
اكو حرمة تتجرأ وتطلع للبستان بهيچ وكت لوحيدها

ها عليش ساكت ؟؟ 
اكيدن يخوي مامش وحدة براسها عگل تسويها حتى وان چانت ناوية اعلة الشر

حرمتي چانت وياي
آنه اخذتها ومشيت للحديقة عبن ضاگ صدرها شوي

حنظل.. لكت جبر گال شافها بالبستان وحيدها

دار إسحاق علية باوعلي
- آنه دخلت للبيت خاطر اجيبن ماي وماعرف شني الصار خلافها

حنظل.. تمشي وتخليها بالبستان ؟!!

الشيخ ضاري.. بسكم عاد من اللغاوي الزايدة
الطلابة هاي ما تخص بشر غيري آنه وإسحاق ومن هيچ ما اريدن اي واحد منكم يتدخل بيها

إسحاق وليدي
اخذ حرمتك واصعد للحجرة
خل يطر الصبح وعودن نحچي بالسالفة خاطر احلنها بهدوء

وانتم هم امشوا تجددوا للصلاة
وخلافها ناموا ما مش مشكلة مالها حل والحمد لله بالزرع ولا بوحيد منكم

سحبني إسحاق من ايدي وصعدني فوگ
بس دخلنة للغرفة رگع الباب حيل باوعت علي راح للكنتور يدور بالرفوف

طشر الدنيا كلها
اريد اسألة شتدور ما اگدر خاف احچيلي كلمة ويطلع قهر گلبة بية

ظل قريب الربع ساعة يحوس بالغرفة
اخير شي باوعلي وصاح جنسيتچ وووووين ؟!!

عيوني انفتحت علي بخوف
ما اگدر انطيهيا لأن هي المستمسك الوحيد الچان بجنطتي بيوم الحادث

بدونها اني مو غسق
ليش شنو اليثبت البشر هذا منو وشلون غير جنسيتة وبس

تقرب مني لزم فچي حيل
- ج ن سي تچ وووووووووين

باوعت علي صار غير واحد
شگد خفت بأول مرة شفتة بيها بس چذب يوصل للخوف الداحس بي هسه واني اباوع بعيونة

دفعني ع الكنتور وصاح
- ناوليني الجنسية بالعججججل

درت وجهي ما عندي غير حل
چنت ضامتها هي وباج الكلية والفلوس جوة الكنتور
اريد اطلعهن سحبني إسحاق شمرني ليورة ومد ايدة طلعهن هو

فتح العلاگة اخذ الجنسية يباوع عليها
شوية وطلع الفلوس صفن عليهن بعدين باوعلي بعصبية

- هذني منين ؟!!

- مالاتي

- منيييين

- چنت اشتغل مربية للاطفال قبل لا اجي للبصرة
وخالة ام هناء تعرف بهالشي لأن هي شغلتني يم دكتورة تعرفها واذا ممصدگني اتصل عليها حتى تتأكد

خزرني وشمر الفلوس علية تطشرن على كبر الگاع
رجع باوع للعلاگة طلع الباج مال كليتي صفن بي شوية وراها ضمة هو والجنسية بجيب دشداشتة وراح للحمام

ظليت گاعدة بمكاني
اريد ابچي بس لازمة روحي بالگوة
انتِ هيچ هيچ واگعة بيها ضحية مثل العادة غسق سواء غلطتي او ما غلطتي

خمس دقايق وطلع متوضي
فرش السجادة صلى وتمدد ع الچرباية
گمت لازمة ظهري بوجع من قوة الدفعة انرگعت بطرف الميز علي

رحت توضيت وطلعت
لگيتة حاط المخدة على وجها لأن الضوة معلوگ
طفيتة وصليت بالظلمة وراها تمددت بصفة وغمضت عيني بلكت انام بدون تفكير

ما سمعت الة صوت
چان هادئ بشكل حتى ما تحرك من مكانة
شغلت نفسي بالأستغفار لحد ما غفيت قبلة وياريتني ما نمت

انعاد الحادث الصار وياية على شكل حلم
شفتهم شلون يغتصبوني بطريقة ابشع من الواقع بس ببستان الشيخ الضاري مو بالخرابة

چان مهيمن واگف گبالي يضحك
اتوسل بي وهو يهز راسة بسخرية وديشوف جماعتة شلون يغتصبوني گدام عيونة

فجأة شغل الجداحة وشمرها ع الزرع
گمت اصيح لا حرام عليك الشيخ ممسويلك شي حتى تضرة هالشكل

بهاي الأثناء اجت امي
بس شفتها گمت اركض شمرت روحي بحضنها ابچي واصرخ

- ماما مهيمن الحقير اغتصبني هو وجماعتة

- اي بنيتي ادري

چانت النار قريبة منها سحبتها علية
- تعالي منا لتحترگين ماما

- لتخافين علية
متلوحني نارهم بس خافي على روحچ منها

باوعت للنار وابتسمت
- شنو رأيچ هسه لو اشمر نفسي هنا حتى ارتاح من هالعذاب

ها شتگولين اسويها
بس والله ماما أخاف مو من النار لا
أخاف من رب العالمين الما قسملي الموت مثل شجن وتركني وحيدة لهل الناس الما ترحم 

بعدني احچي
ما احس إلا مهيمن شمرني بنص النار
روحي طلعت من الألم واني اسمعة يصيح بكل صوتة

- احترگي مثل ما احترگت اختي بناركم
ذوقي ولو شوية من الألم الحست بي شجن بسبب اخوچ الناااقص 

فزيت مرعوبة بشكل
كل جسمي يأذيني وكأنما صدگ چنت احترگ مو مجرد حلم

باوعت الإسحاق چان نايم
سحبت نفسي من يمة بهدوء طبيت للحمام وقفلت الباب علية

هنا صدگ انهاريت بعد
وگعت بالگاع ابچي واني اتمنى الموت بيومها اكثر من أي وقت ثاني

ليش عايشة ؟!! والمن عايشة ؟!!
شو حتى النفس محسوب علية أن چان قبل يم اهلي لو هسة ببيت الشيخ

صارت عيوني ع المنظفات الي برف الحمام
گمت سحبتهن بدون تفكير
فتحت واحد منهن وصلتة يم حلگي ردت اشرب بس تراجعت

- لا غسق لا
استغفري ربچ واعقلي حرام تضيعين حقچ بهذا التصرف

انتِ مظلومة
ومستحيل رب العالمين يقبل بالظلم او يضيع حق عبده المظلوم

راح ياخذ حقي منهم
اليوم باچر بعد سنة عشرة
المهم بالأخير كلمن يلگة جزاء أفعالة الناقصة ويوگع بشر أعمالة الحقيرة

رجعت كل شي المكانة وغسلت وجهي
طلعت من الحمام مخنوگة ما اگدر ارجع انام شيجيب الصبح

ضحكت على روحي
على أساس تنتظرچ حياة سعيدة حتى تترجين الصبح يطلع

ظليت گاعدة اتصفن
ساعة افكر بالحلم وساعة الوم نفسي على طلعتي المراح تعدي على خير

للسبعة دگ المنبة
گام إسحاق فصلة،، راح للكنتور اخذ ملابسة وطب للحمام

ربع ساعة وطلع
دار وجها ع الميز يمشط وگال
- جهزي روحچ خاطر تجين وياي

- وين ؟!!

- للمضيف
شني تظنين السالفة خلصت ونفذتي منها

- اي بس اسبح

- لا تتعطلين
آنه نازل گدامچ تلگيني بالمضيف

حچاها وطلع من الغرفة
حسيت البوخة صارت تطلع من بين عيوني
شسوي هسه وشلون اواجه الشيخ وبشنو ابرر طلعتي بمثل هيچ وقت

اخذت ملابسي وطبيت للحمام
بالنص ساعة واني واگفة جوة الماي نار بگلبي ما تقبل لا تخمد ولا تهيد

حسيت روحي تأخرت كلش
نشفت ع السريع وطلعت لفيت الحجاب على راسي ونزلت

كلهم چانوا مجتمعين بالصالة
سلمت عليهم اكو منهم ما جاوب واكو الي رد السلام من ورى خشمة بس ريحان ابتسمت بوجهي

تقربت منها همست
- ود بعدها نايمة واني رايحة للمضيف عينچ عليها

- لا توصيني حبيبة

عفتهم ورحت للمضيف
دگيت الباب صاح الشيخ تفضلي بوية
طبيت لگيت إسحاق گاعد يمة بس ما باوعلي ولا حتى رفع عينة بعيني

اشرلي الشيخ بسبحتة
گعدت مقابيلهم ونزلت راسي ادعي ياربي ساعدني
شوية وگال

- احچي بنيتي شني الطعلچ للبستان

- ما ادري
چنت مخنوگة وما جايني نوم
نزلت للحديقة اشتم هوى بس هم ما ارتاحيت اخير شي طلعت للبستان

- يعني جاية تقنعيني
انتِ هيچي سباعية خاطر تطلعين للبستان بعز الظلام

- ما اعرف
اني هم تفاجأت من نفسي واعترف بغلطي
بس صدگ شيخنا مچنت رايدة اطلع هي صارت بعد

مفكرت بأي شي
المهم بس ردت ارتاح ومن شفت الحارس امنت لأن كلها گيعانكم وماكو غريب بيها

- واحنة ما عدنة حرمة تطلع الوحيدها لا بعين الشمس ولا بمغيبها

- واني هم ممتعودة اطلع وحدي
هاي اول واخير مرة صدگني منها وحرمت بعد

وشغلة ثانية اريدك تعرفها
اني عايشة وشايلة جميلك برگبتي
حايرة شلون ارد افضالك علية شلون تتوقع مني اگدر اضرك ولو بشي بسيط

- وآنه ما گلت هذا الشي

لون الكل شك بيچ آنه ما اشكن
لكت شغلة وحدة ما جاي استوعبها وهي طلعتچ للبستان بهيچي وكت

زلمتچ گاعد هنانة ويريدن منچ تفسير
من واجبچ تحچين كل شي خاطر تبعدين الشك عن عگلة

- يعني حضرتك مصدگ مو اني الحرگت البستان

- من الصبح آنه وإسحاق نتدانش بالموضوع
مامش شي يثبت انتِ عملتيها حتى الدبة الچانت بأيدينچ ما تابعة لينة

لكت الي نريد نعرفة منچ
شني الوصلها لأيدينچ وعليش چنتي بالبستان ؟!!

نزلت راسي وحچيت الهم كل شي
من وقت ما طلعت للحديقة لحد ما اخذني الحارس وسلمني لإسحاق

رفعت عيني لگيتهم صافنين علية
شوية وگال الشيخ منچ لزلمتچ آنه مجبور اطلع من السالفة كلها

گام إسحاق واشرلي اطلع
رحت ورى لگيتة واگف يحچي ويا الحجية
عفتهم وصعدت فوگ

ظليت افتر بالغرفة
فكري يم الجنسية ليش اخذها مني وعلى شنو ناوي بس الله اليستر

دقايق ودخل للغرفة
فتح الكنتور يدور گتله شتريد ما رد علية

اخذ ملابس رسمية وراح بدل بالحمام
وراها سحب سلاحة وجنسيتي من دشداشتة وطلع من الغرفة حتى بدون ميسلم

بيومها ما نزلت جوة
خجلانة منهم وبنفس الوقت نفسيتي تعبانة ما اتحمل اسمع كلمة زايدة واني بهيچ وضعية

صارت الساعة فوگ الـ 11 وإسحاق ماكو
گاعدة ع الچرباية وصافنة ويا نفسي طبت علية ريحان وبـ ايدها صينية الأكل

گمزت من مكاني اخذتها منها
- هاي ليش تعبتي نفسچ

- چا شنهي الحل
شفتچ ما نزلتي لا اعلة الغدة ولا العشى گلت ما بيها مجال لازم اصعد ليچ آنه

- ما اشتهي والله

- ابوي وصاني ما انزل الصينية إلا وانتِ ماسحتها

- هههههه
لعد ود وينها ليش ما جبتيها علمود تنام

- هساع اجيبنها
اگعدي اكلي اول خاطر يصيرنلچ حيل تتعبين وياها

ابتسمت بوجها واكلت مجاملة
شوية وصعدت جايبتلي ود اخذتها من ايدها ابوس بيها اشتاقيت الها لأن طول اليوم هي مو يمي

ربع ساعة ونزلت ريحان
اخذت ود الغرفتها بدلت ملابسها وبقيت انوم بيها قريب الساعة يلا غفت

رجعت الغرفتي صارت عيني ع الساعة
شنو إسحاق ما ناوي يرجع اليوم مو راح تصير الوحدة وهو ماكو

بقيت انتظرة بخوف
شديسوي وليش هيچ تأخر فوگاها اخذ جنسيتي ويا

صارت الـ 2 وهو ما جاي
نعست كلش سحبت المخدة وتمددت انام
بعدني ما غافية رجعت حلمت بس هالمرة شفت سيف ديحرگ شجن بنفس الموقف

فزيت مرعوبة
تعبت والله تعبت شوكت ارتاح من هالعذاب
فوگ الواقع المر هالدور الكوابيس علية...  بچيت

شوية وگمت للحمام غسلت وجهي
رجعت احاول انام للفجر واني گاعدة اخير شي صليت يلا گدرت اغفى

ثاني يوم لليل وإسحاق ماكو
ظل بالي كلش لبست حجابي ونزلت بس شافتني الحجية گالت نزلتي يالخاتون

ما رديت عليها
دورت على ريحان لگيتها واگفة تسوي العشى ويا أمل

- ريحان

- ها حبيبة واخيراً شفناچ

- إسحاق وين صار انشغل بالي علي

- اي خابر
گال آنه ببغداد لا يظل بالكم يمي

- شوكت اتصل ؟!! 

- امس

باوعتلها وسكتت
چانوا ديشتغلون گلت خلي اساعدهم ميصير صارلي يومين عازلة روحي عنهم

بعدني ممتحركة من مكاني طبت نجيبة
بس شافتني صاحت
- تعمل عملتها وتلبد بحجرتها

ريحان.. نجيبة بسچ

نجيبة.. عليش تسكتي
موش هاي الشعلت النار ببستانكم وهل واگفة چدامچ ولا چنها عاملة شي

ثناء.. هسة انتِ شتسوين هنا
اليوم شغل المطبخ مو على ريحان وامل
اطلعي وخليهن يشتغلن براحة بعيد عن مشاكلچ

نجيبة.. لا يال ****
تطرديني بكل عين صلفة آنه اعلمنچ

حچتها وركضت على ثناء
لزمتها تضرب بيها اني وريحان وامل نريد نخلصها من ايدها ماكو ثور وهاج بعد

فجأة سمعنا صوت حنظل صاح بيها
درت وجهي شفتة ركض عليهم سحب ثناء منها وهي هم من حرگتها حضنتة گدامنة تبچي

حنظل.. انتِ شلون تتجرأين تمدين ايدچ اعليها

نجيبة.. چا ترضاها تگول اعلية ام المشاكل و****

ثناء.. عزززززة والله ما گلت هيچ

ريحان.. نجيبة فشلة والله
فروخچ صاروا بطولچ ولساچ تجذبين

ثناء.. حنظل والله ما گلت الها شي
كل الموضوع واگفين نسولف وهي دخلت تسوي مشاكل وتحچي على مرت إسحاق

عاد اني گلتلها
شغل المطبخ اليوم مو عليچ اطلعي وخليهن يشتغلن بلا مشاكل

هذا كل شي صار
وهي اصلاً الفشرت علية مو اني حتى اذا ممصدگني اسأل البنات

حنظل.. ثناء روحي الفروخچ
وانتِ نجيبة لحگيني للحجرة حسابچ وياي عسير اليوم

حچاها وطلع من المطبخ
اباوع النجيبة وجها صار ينطي الوان مچنت متخيلتها تخاف منة الـ هالدرجة

راحت ورى شوية وسمعنا صياحة
ضجت كلش عود نزلت اشتغل والهي نفسي ثاري الفگر فگر حتى لو عاش بقصر

طلعت للصالة چانت ود تلعب ويا الجهال
گعدت يمها والحجية بس تخزر بية لو بـ ايدها يمكن تگوم تكتلني وترتاح

للتسعة خلصنا من العشة وهوستة
ظليت گاعدة يمهم قريب الساعة لأن الشيخ موجود وراها اخذت ود وصعدت الغرفتي

ردت ابدل واخذها تنام بعدين تراجعت
إسحاق ومموجود خليها تنام يمي اليوم ع الأقل انشغل بيها عن التفكير

طلعت الغرفتها جبتلها ملابس
بدلت الها وگعدت العب وياها احط ايدي على وجهي واسويلها دددي وهاي خربانة ضحك

ساعة تقريباً وتعبت
جرت المخدة من الچرباية وصاحت ليلو يعني تريد تنام

بستها حيل وخليتها على رجلي
ظليت اهز بيها ربع ساعة ونامت حولتها على مخدة ابوها وگمت طفيت الضوة ورجعت تمددت يمها

اباوع عليها مبتسمة
هنيالچ حبيبتي بعدچ طفلة بريئة ما شفتي شي من هالعالم القذر

غمضت عيوني واني حابسة الدموع بيها
چنت تعبانة صارلي يومين منايمة زين لذالك غفيت بسرعة

ما ادري شگد مر وقت
حسيت الباب انفتح فزيت مرعوبة عبالي احلم باوعت هذا إسحاق

چنت لابسة ثوب خفيف مال نوم لأن صيف وحارة كلش،، ما گدرت اگوم ويشوفني بي رجعت تمددت وسحبت الغطا علية

طب ذب غراضة ع الميز وراح للكنتور
انطيتة ظهري حتى يبدل براحتة شوية واجة رفع الغطا علمود ينام تفاجأ بود نايمة بمكانة

رفعت نفسي وگتلة
- هسه اشيلها منا فد لحظة

- لا عوفيها لا تشيلينها

تقرب عليها باس راسها ودناها علية
تمدد بمكانة بس ما انطاني ظهرة مثل كل مرة
بقى يباوع البنتة ويمرر اصابيعة بين خصلات شعرها

باوعت علي شكلة چان تعبان من السفر
ترددت اسألة اخير شي گلت
- ابو ود تريد اسويلك شي تاكلة

- لا بوية مشكورة

- وين چنت ؟!!

- مسافر

- وليش ما گتلي ظل بالي يمك

باوعلي وسكت
اني هم سكتت بس حسيت بشي غريب
نظراتة چانت مو طبيعية أول مرة يباوعلي هيچ بحيث حسيت بيها حچي هواي

ما گدرت استمر اكثر
درت وجهي للجهة الثانية وغمضت
شبي ياربي ليش ديباوعلي بـ هالغرابة ؟!!

بعدني مغمضة حسيت ايدة صارت على چتفي
دمي نشف من الخوف
ما تحركت اخاف ادور ويصير شي ممتوقعتة

دقيقة وهو على نفس وضعة
بس يحرك ايدة من چتفي ينزلها على زندي وبالعكس

فجأة حسيتة گام طلع من الغرفة
گمت ع السريع لازم اغير ملابسي قبل لا يرجع عاد همزين چنت متغطية من حط ايدة علية

لبست شلون مچان ورجعت المكاني
نص ساعة وهو ماكو ما ادري وين راح بس همزين راح

غمضت عيوني اهدي بنفسي
لتخافين غسق مراح يصير شي بس نامي كافي تفكرين

ما اعرف شلون نمت
حتى للصلاة ما گعدت بيومها للصبح فزيت على صوت ود دتضحك

فتحت عيني لگيت إسحاق يلعب وياها
گلت صباح الخير ورحت للحمام غسلت ونزلت اسوي الريوگ

مرت الأيام بلا جديد
ما تكررت الحالة ويا إسحاق ورجعت علاقتنا رسمية يا دوب على گد الطلب والتنفيذ

صار وقت الأمتحانات
حبيب سافر البغداد يمتحن مرحلة خامسة طب وريحان سادس اعدادي

بـ هالفترة تقربت من ريحان كلش
ولأن چانت ادبي ساعدتها هواي لأن المواد اسهل من العلمي

چنت انزل يمها واسهر للفجر
تقرا واني اراجعلها علمود لتضوج وحدها والضهر اعوض النوم على نومة الكل

ريحان طبيعتها جبانة هواية
بكل امتحان تگعد تبچي واني اظل ساعة اقنع بيها انتِ گدها وراح تجاوبين بس شيلي الخوف من گلبچ

وصلت بيها الحالة
قبل كل امتحان يصعد سكرها وچنت انقهر عليها كلش بعدها صغير منين اجاها هالسكر !!!

خلصت امتحاناتها على خير
بأخير يوم گاعدة بالصالة عيوني ع الساعة وانتظرها ترجع تبشرني بالعشرة ونص طبت تضحك

گمت الها ع السريع
- ها بشري

- الحمد لله خلصت

- جاوبتي يعني

- اي جاوبت كلش زين

- اي الحمد لله
الف مبروك حبيبتي يوم القبول الزين

- يبارك بعمرچ مرت اخوي الغالية

باوعتلها وابتسمت
راحت تبدل واني اخذت ود سويتلها ريوگ وگعدت اوكل بيها بالصالة

فجأة صارت هوسة برة
ما نسمع إلا صهيب يصيح ولك ماااااااات
ركضنا نباوع من الشباك نريد نعرف منو وشنو ماكو بس الزلم تتطافر گدامنة...

يتبع

لتنسوون ⭐⭐⭐⭐⭐