رواية وضاقت الأرض بي الفصل السابع والخمسون 57 - بقلم لبنى الموسوي

بعدني واقفة وكل جسمي يرجف عليها. دق جهاز صهيب، كان واقفًا بصفي، باوعت هذا رقم غريب. هاي المكالمة اللي قلبت الموازين عليَّ، المكالمة اللي خلتني أكره هاليوم اللي كان أبشع أيام حياتي. هذا اليوم اللي أتمنى أشيله من تاريخ السنة، أنتزعه وأمحيه من أيام عمري. هاليوم اللي كان فيصل بين حياتي ومماتي وسبب رئيسي لخسارتي لنفسي، ومستحيل اكو شيء يعادل خسارة النفس أو يجبر كسرها. كل الأيام اللي راحت وأنا عايشة بقلق.

اكو شيء داخلي يخليني ما أرتاح، ما أتفاءل، ما أغمض عيني وأنا مرتاحة، ولا أكون طبيعية ويا صهيب وكل الموجودين بالبيت، بس ما كنت أعرف شنو السبب. يمكن الإنسان لمن ينتظر مصيبة بحياته يحس بيها قبل لا تقتحمه، يلمس وجعها ويذوق مرارتها قبل لا تحول أيامه البيض لأيام أسود من ليل رب العالمين. وهذا اللي صار وياي. الكل كان يلومني بسبب حالتي النفسية، بس محد بيهم حس باللي جاي أحس بيه بلا سبب. رد صهيب وكل جوارحي صارت وياه. -ألووو.

أي أنا، تفضل ياهو وياي؟ خير إن شاء الله. شني يعني ما جاي أفهم عليك؟!! ما أجي ليكم قبل لا تفهمني السالفة موش حكي هذا. بعده يحكي باوع لي وراح للغرفة. رحت وراه وصلت يم الباب وقفت علمود أسمع لأن متأكدة اكو شيء وراء هالمكالمة. كان يتعارك بس كلامه ما مفهوم. شيء واحد قدرت أستوعبه الاتصال هذا له علاقة بيَّ. سد الخط وطلع. شافني قدامه قال: -شعندك هنا؟ ما جاوبته لأن الوقت مو مناسب للنقاش. طبيت وسديت الباب وراي.

أنا سمعت باچر تواعد حتى يمشي لبغداد، منا لباچر يصير خير إن شاء الله. شمس: وصلنا للمستشفى وأنا الألم ياكل بيَّ. راد ينزلني صخر ما قدرت، ظهري ما أحس بيه عبالك مكسور. حبيب كان ويانا، طب جوه يركض جاب عربانة وانطاها لصخر. بالقوة تعاون هو وعمة صبيحة علمود يصعدوني بيها. دخلنا للمستشفى تلقَّتني الممرضة. قالت: -شعدها؟ عمة شرحت لها اللي صار، أخذتني وطبينا للصالة. يريدون يصعدوني ع السدية ما أقدر.

من الوجع قمت أبكي مثل الجهال حتى النسوان اللي بالصالة التمّن على صوتي. تعاونوا شالوني وأنا أصرخ من الألم. توهم حاطيني ع السدية حسيت شيء نزل عليَّ، قبل لزمت الدكتورة من أيدها. -فدوووة دكتورة، ساعديني ابني راح يوقع، دا أحس بروحي أنزف. -هسّه عيني صبري. حكتها ورادت تفحصني. قبل دفعت أيدها: -شتسوين؟ هي مال فحص تريدين الطفل يوقع؟ -شنو جاي تعلميني شغلي؟ -أي طبعًا أعلمك، لأن أنا هم دكتورة ونسائية يعني أعرف بهالسوالف.

-شوفولها غير دكتورة أنا ما أتحمل هيج نماذج. -بعد أحسن والله. بس حكيتها راحت. دزيت الممرضة صاحت عمة صبيحة اللي أجتني. حكيت وياها علمود صخر يروح يجيب لي فد دكتورة تفتهم، وطلعت تبلغه. أقل العشر دقايق، وأجت دكتورة أخلاقها مرسومة على وجهها. سوت لي الفحوصات اللازمة وقالت: -عندك نزيف قوي لازم ما تتحركين من مكانكِ. أنطتني مثبت ومقويات وراحت. المشكلة بظهري لحد الآن ما أقدر أتحرك من مكاني. حكت ويا عمة صاحت لي غير دكتورة.

طلع عندي رض قوي، أنطتني علاج وهم نفس الحكي قالت: -ارتاحي ولا تتحركين. طلعنا من الصالة تلقَّانا صخر. كان لونه مخطوف يريد من عدنا الكلمة حتى يطمن روحه بيها. شرحت له عمة وضعي وطلعنا من المستشفى. صعدت السيارة وأنا أشيل وأرقع بروحي من الوجع. بالطريق سألوني: -شنو صار وياكِ؟ قعدت سولفت لهم كل شيء مو بس العركة لااا، حتى أذيتهم لريحان حكيتها كلها علمود يخلون حد لنجيبة ونرتاح من شرها. وصلنا للبيت طلعن البنات ساعدني أنزل.

نوموني بفراشي وظلن يمي بس غسق راحت علمود تسوي لي حليب أشربه. غسق: توني طالعة من غرفة شمس، صار حبيب قبالي مدري شبيه أعصابه طافرة بعيونه. تجاوزني وراح للصالة. ركضت وراه شو هذا راح على نجيبة. تفاجأت من شفته وقع بيها دق رزايل وهاي لسانها طويل ما تسكت حتى لو قدام الرجال، فظلوا يتجادلون. -مااااااا مسموح لكِ، وموش من حقكِ تمدين أيدينكِ عليها لأي سبب كان. بعدين تعال قل لي شلون تتجاوزين على أهلها؟ شلون تسبينهم وهمَ ميتين؟

مسلمة أنتِ لو يهودية فهميينيييي؟ -جا هي همينة تجاوزت، قالت أنا أشرف منكِ ومن عشيرتكِ، غير أنتم عشيرتي ترضونها تحكي عليكم يعني؟ -لا والله بيكِ الخير، لو كنتِ شايلة همنا ما أذيتِ أختنا الوحيدة بكل فرصة صحت لكِ. بس وحق ربكِ وحقه اللي ربكِ، ما أفوتهن لكِ أاابد، لا أذيتكِ لريحان ولا حتى شمس، بس خل أخوي يرجع بالسلامة ويصير خير. -شني جاي تهددني؟

خل يجي عمي ويتنوع ابنه الصغير شلون يتجاوز على حرمة أخوه وبنت عمه بذات الوقت، خاطر نشوف يرضاها عليَّ لو لا له. دتحكي طب الشيخ. من عرف بالسالفة قلب الدنيا على رأس نجيبة، وراها راح لغرفة صخر يشوف شمس. شمس: أخذت علاجي كله، وبالقوة خليت صخر يدهن ظهري علمود يخف الوجع شوية بلكي أقدر أنام. روحي مسحونة من القهر. منا أفكر بالطفل لأن النزف بعده مستمر، ومنا ألم ظهري قاعد يدق بقلبي قبل راسي. ما أدري شلون قدرت أغفى.

حسيت الفجر على أوجاع كلش قوية. قعدت عبالي دا أحلم لأن اختفت ويا ما فتحت عيني، بس من انتظرت دقايق رجع الألم إجاني. عدلت قعدتي وحطيت أيدي على بطني. يارب ما يصير له شيء هواي انتظرتُه، ما أتحمل أخسره بهالسهولة وأنا حتى ما لحقت أفرح بيه. بعدني أدعي وأحكي ويا نفسي. إجاني وجع كلش قوي بحيث شاغت روحي. ويا ما إجى حسيت النزف زاد، قبل ندست صخر بيده. -قووم، صخر قووم. فز مرعوب. -بسم الله شمالكِ بويه عليش تصرخين؟

-ما أدري أحس اكو شيء غريب قوم ساعدني. -شني أسوي فهميني؟ -ما أدري أتصرف، صيح البنات يجن يساعدني راح أموووت الوجع ما ينحممممل. قام يركض أخذ موبايله اتصل على إسحاق. -ها خويه اعذرني صحيتك، لا بس شمس محتاجة لحرمتكِ. قعدها بلا زحمة عليكِ خلها تنزل ليها بالعجل. غسق: كنت نايمة حسيت على صوت إسحاق. فتحت عيني قال: -شمس مدري شصابها. بس حكاها ما خليتُه يكمل كلامه. قُمزت من مكاني. لبست حجابي ونزلت لغرفتهم.

دقيت الباب قبل فتحها صخر، لقيت شمس قاعدة ع الجرباية ورايحة من البكي. -اسم الله شبيكِ ولكِ؟ -ما أدري ساعديني أروح للحمام. -أي يلا قومي بسرعة. أنا وصخر نريد نوقفها ماكو. كلما نحركها خطوة تصرخ من ألم ظهرها. آخر شيء بعدني صخر وشالها للحمام، ركضت لغرفة عمة صبيحة. دقيت الباب أكثر من مرة ماكو. طبيت لقيتها نايمة وقفت يم رأسها: -عمة أقعدي عمة. ما أحس إلا رقعتني بالعصا انفشخت برأسي.

من قوة الضربة حسيت اكو شيء نزل بعيوني، رجعت ليوره لزمت بالحايط. -آااخ هاي ليش ضربتني عمة؟ -يا هاي أنتِ يمقموعة، ظنيتكِ حرامي غير تدقين الباب شني تدخلين هيج؟ -اكو حرامي يقعدكِ؟ أنا أدري الحرامي يطب يبوق بهدوء حتى لا يقعدون أهل البيت مو يجي يقعدهم. بعدين أنا دقيت الباب، أنتِ نومكِ ثقيل شنو ذنبي وتفشخيني هيج بلا هسّه عميت؟ -العار ما يصيبه شيء. هساع قول لي شتتصخمين بحجرتي بـ هالساعة بس لا جاية تكتليني؟

-هههههههه، والله ضحكتيني وأنا ضايحة. -أي شني، خاطر تخلصين مني ومن الوعد اللي قطعتيه على نفسكِ تكتليني وتخلص السالفة. -يااا عزززززة نسيت على شنو أجيت، قومي قومي شمس مدري شبيها عفتها بالحمام ويا صخر وأجيت أقعدكِ علمود تساعدينا. -هاكِ عينيني. مدّت أيدها قومتها وطلعنا. رحنا للحمام شمس حالتها حالة ما ندري دتصيح من الألم لو من حرقة قلبها. قعدت عمة يم رأسها والتفتت على صخر. -أمشي يمه خلنا لوحدنا هساع وأنا شوي وأطمنكِ.

بس حكتها طلع. ماكو ثواني وشمس صاحت: -نزل ولكممم ابني نززززل. باوعت عمة صبيحة قالت: -أي هاي طيحتي. هي حكتها لو شمس تخبلت قامت تدق على رأسها أريد ألزمها ما أقدر. آخر شيء عمة كتّفتها. -ما يصح يمه قولي يا الله، لساعكِ بأول عمركِ يتعوض موش آخر الدنيا هاي. -شنووو يتعوض هااا شنوو؟ أنا متتتتت علما صار كنت أنتظره يوم يوم أحسب ساعة ساعة تالي متالي يروح هيج.

الله ينتقم منكِ نجيبة، هي تدري أنا حامل وتعمدت تدفعني حيل، حتى يوقع بس يا ويلها من عذاب رب العالمين وهي قاتلة روح بريئة بلا ذنب. غسق: عمة شنسوي هسّه؟ أصيح صخر حتى يوديها للمستشفى لو شلون؟ -لا يمه الفرخ وطاح، خلها للصبح عودٍ ياخذها للسونار لو احتاجته. عفتها تساعدها وطلعت. صار صخر بوجهي قبل صاح: -ها خويه بشري؟ دنّقت وجاوبته بخنقة: -الله يعوضكم إن شاء الله. عافني وطب يركض لشمس.

جبت لها الملابس ورجعت لقيت صخر حاط رأسها على حضنه وهي منهارة من البكي. -بسكِ يبوي بسكِ يبعد قلبي، موش قسمتنا شلون يعني نموت أرواحنا ورا؟ -ليش هيج صخر فهمني ليش؟ هاي مرتين أطفالي ينقتلون بحقد البشر. بالمرة الأولى تعرف شصار والمرة الثانية مرة أخوكِ الحية موتته. ما أريدكِ تواسيني، أريد حق ابني يرجع وقدام عيوني، لا تتصور أسكت لو أعرف أخرب حتى حياتي. بس حكتها طلع من الحمام. لزمتها عمة باستها من رأسها وغسلت وجهها بالماي.

-ما يصح تحكين هيج، هو همينة قلبه متأذي على ضنا، عليش تزيدها عليه؟ غسق: حكي عمة صح، ما تدرين شلون كان خايف عليكِ لو من عرف الطفل راح قبل طب يركض علمودكِ. يعني هي تظل مرة أخو، شتريدين يسوي يمد أيده عليها مثلًا؟ أكيد هاي مو رجولة. زين شيسوي لعد؟!! يتعارك ويا أخوه وتخرب علاقتهم بسبب النسوان هم ما ترهم، ولد الشيخ أكبر من هالشي.

هسّه يرجع حنظل من بغداد، وأنا متأكدة بس يعرف بالموضوع مستحيل يسكت لنجيبة، لأن سالفتها جبيرة هم أنتِ وهم ريحان. صبيحة: ربي يكملچ بعقلچ بنيتي، وانتِ اسمعي من مرت أحماچ و صيري شاطرة خاطر تحافظين على بيتچ وزلمتچ. تراهم يطگون إصبعتين لون خربتي حياتچ، و مامش بشر يخسر ساعتها غيرچ يا شميسة، عَبن آنه أعرف طينة بنيات أخوي عدل. -تعبت، طلعوني منا. -خلي أصيح صخر، متگدرين تتحركين وأنتِ بهالحالة.

طلعت من يمها، صخر مو بالغرفة. رحت للصالة ماكو، التفتت لگيت الباب مفتوح، مديت راسي گاعد بالحديقة يدخن. -خويه صخر. بس سمعني طفى الجكارة وگام. -ها خويه خيركم؟ -تعال أخذ شمس الفراشها متگدر تتحرك. -چا ما تمشون للمستشفى؟ -لا عمة تگول ميحتاج، وشمس هم تعرف بروحها إذا تحتاج أكيد تگولك.

عافني وطب. رحت وراه مقهورة عليهم اثنينهم. منا شمس فوگ قهرها على ابنها ألم ظهرها المينحمل، ومنا صخر وضوجته على ابنه ومرته، وفوگ كل هذا موقفه الصعب ويا أخو، الله يساعدة شلون راح يتصرف والمن يحاول يرضي. طبيت للغرفة لگيته دينومها على الچرباية. ظلينا يمها بالنص ساعة، كل شوية وعمة جايبتلها شي تشربة وهاي مجبورة تسمع الكلام وإلا شيخلصها.

آخر شي طلعنا وعفناهم. صعدت الغرفتي سمعت الأذان يصيح، فتحت الباب، إسحاق چان على السجادة ديصلي. رحت للحمام توضيت ورجعت. بس كمل التفت علية. -الله يتقبل حبيبي. -منا ومنكم، شمالها حرمة صخر خوبن ما بيها شي؟!! -طرحت خطية. -لا إله إلا الله، وصخر شلونة شفتي؟ -أي هو چان يمنة، شلونة يعني هم الله يساعدة محتار بين مرته وأخو. -خله لا يحتار، حنظل أخوي وأعرفنه مستحيل يسكت ليها عگب كل شي صار. -يااا شنو يعني راح يطلگها؟

-لا ما توصل هيچ، لكت راح يسوي ليها جرة إذن ما تنساها كل العمر. -ما أدري شگول غير الله يهديها. -گومي بويه، صلي وتعاي نامي باچر تتعبين لون ظليتي بلايه نوم. -أي هو أني من هسه تعبت. گمت فرشت السجادة وصليت. رجعت الفراشي بالي كله يم شمس، أني الوحيدة الي شهدت على فرحتها بالحمل. لذالك حاسة بيها، وادري شگد متوجعة حالياً من برة وجوة خصوصاً هذا ثاني حمل تخسره وبنفس الطريقة.

ردت أنام ما گدرت مخنوگة كلش. التفتت على إسحاق حاط ايده على عيونه، من حركة صدره عرفته دينام. ندسته بـچتفه. -إسحاق نمت؟ إسحاااق. ما تحرك جاوبني على نفس وضعيته. -ها بويه خيرچ؟ -تعبانة. حچيتها وبچيت، گبل رفع ايده باوعلي. -شمالچ رويحتي شني تهيسين؟ -ما أدري مخنوگة، المشاكل هاي دتضوجني بشكل. شمس، هناء، ريحان وحتى أخوانك صخر وحنظل هم شايلة همهم.

-هذا كله من طيب اصلچ، لكت بويه مامش شي يظل على حالة، باچر ريحان تتعافى وشمس وهناء حظنهن ينترس فروخ. أما حنظل وصخر فلا تاكلين همهم، خوتنه أكبر من أي شي ثاني ما تجي تنهز على تالي العمر بسبب سوالف الحريم. -الله يسمع منك. بس حچيتها سحبني علي. حط رجلي بين رجله ورفعني من خاصرتي باس شفتي حيل. ابتعد عني مبتسم. عدل شعري بـ ايده رجعه ورى اذني وهمس بيها. -أگلچ على سر يخصني ومامش بشر يعرفه غيرچ.

هزيت براسي أي. رجع باسني من شفتي ونزل ايده على نهاية ظهري كلش، نقطة ضعفي الوحمة الهنا. فتحت عيني بصدمة. شوية وبعدته عني. -يا سرسري هاي أنت شلون شفتها؟ -هههههههههه، سرسري شني غير حرمتي بويه؟ -أي بس أنت يعني شلون أفهمك... -فاهم لا تكملين، تردين تگولين آنه ما شايف جسمچ أي لو لالة؟ -أي هيچ، أصلاً هاي محد يعرف بيها غير بس أمي وشجن الله يرحمها، لأن حتى منطقتها حساسة. -مو بفرد يوم چنتي نايمة وآنه أخذت راحتي بيچ.

-عزززززززة، أحلف بالله إسحاق والله ما أصدگ أنت تسويها. بس حچيتها ضحك. -أحچي حباب لتضحك صدگ مسوي هيچ؟ أي لعد شعرفك بيها إذا مشايف جسمي بروح أبوك بطل ضحك وجاوبني. -هههههههههه، ولچ بويه هو آنه شكول هالسوالف؟ لون ردت أتنوع أتنوع جدامچ، عليش من وراچ غير حرمتي. -لعد شلون عرفت عندي وحمة بنهاية ظهري؟ -لمن ظهرچ هاج عليچ وخليت ليچ من دهني. صفنت ويا نفسي، أي صدگ نسيت. رجعت باوعتله بخزرة. -بس هاي جوة شوصلك لهنا؟

-أيدي راحت شلون أكضنها قابل؟ -والله أنتو الزلم مو راحة، من شفتك گلت ايبااا هذا ماكو هيچ حتى ما تصورت تتقبلني بحياتك تالي طلعت من جوة الجوة. ردت أدور وجهي سحبني وقيد حركتي برجله. -آنه لون مثل ما گلتي من جوة الجوة، ما چان نمتي يمي سنتين بلايه ما أكض طفرچ وأنتِ حلالي. بس بالنهاية آنه أظلن زلمة، وموش أي زلمة عاشگ ويعشگ حرمته الحد الجنون، مو زين مني صابر عليچ الهساعة. -أمممممم، يعني أفهم من كلامك إسحاق يعشق غسق بجنون؟

-وهايم وذايب بفستقته شتحچين أنتِ؟ -ههههههه، بس مو بگدي لأن متدري شگد أحبك. يارب كون تعدي هالأيام على خير، وأني هماتين أكمل تطبيقي حتى أتعالج وأخلص من هالكابوس بلكت هيچ نرتاح. -تگضي وداعتچ تگضي. حطيت راسي على صدره سمعته گال. -ممكن سؤال ما طول حچينا بالسالفة خن نكملها؟ -ههههههه، أكيد سؤالك يخص الوحمة مووو؟ -ذكية مريتي، أي هو ردت أسألنچ، شني متنسية أمچ بيچ خاطر يجي كل هالعسل هذا؟

-هههههه، خف علية شوية، ترى والله أني مو حمل هالحچي الحلو منك. المهم خلي أجاوبك على سؤالك، تنست بعرموط اكو أسهل وأرخص منه جاوبني؟!! -أي بس هو طيب. -شنو الفايدة إذا ما أكلته؟ أذكر مرة سولفتلي گالت حامل بيچ وتنسيت عرموط. ومن طلبته من أبوية تدري شجاوبها؟

گلها ذاك الشارع واطلعي اكلي حصو ما فاتح بقالية هنا حتى جاية تتنسين براسي. ما جاوبته، طبت لغرفتها تبچي، وجابتني وهي ما ماكلته وهاي النتيجة مثل متشوف. طلعت الوحمة بية. يمكن أنت تشوفها مجرد وحمة، بس هاي الوحمة بالنسبة الي كل العذاب العاشته أمي ويا أبوية بسنين حياتها القليلة. هواي تعذبت إسحاق، چان يبخل عليها باللگمة ياما وياما نامت جوعانة بسببه وأني وياها. تصور يحاسبها لو أجت بلليل ورادت تاكل، گبل يگولها مو تعشينا قابل فاتحها سبيل أني للخلفچ وياريت اكتفى بعذابها لا أبد.

أني هم چان الي نصيب من هالعذاب، حتى دراستي بالگوة خلاني أكملها لو ما جدي الله يرحمه أني هسه ابتدائية ممخلصة. چنت أروح للمدرسة فلس مينطيني، أداوم وأخلص الدوام على لفة الجبن بحيث آخر شي جسمي يصير يرجف من الجوع. ومن أرجع وهو موجود ميقبل أكل، ممنوع يجون أخوانچ وننجمع على السفرة وبعدين عود تزقنبي ويانة. ومرت السنين وكبرت، وتعرف البنية من تكبر تكثر احتياجاتها لهالسبب أمي اشتغلت. گامت تخيط للناس وتجمع فلوس، ولمن وصلت للسادس

جيرانة چانت مدرسة بصفنة. انطتها العدها والماعدها، بس حتى تضبط الي العربي والأنگليزي علمود أدخل قانون مثل مچانت تحلم كل حياتها. وتحقق حلمها وطلعت قانون، وهم أبوية ما قبل أداوم على أبو كلية وسمعت البنات مو زينة بيها. وكل محاولاتنا بإقناعه فشلت، تالي خطية أمي لبست عباتها وراحت من ورى الجدي وگعت على أيده باستها في سبيل يقنعه أداوم. واقتنع أداوم، بس وگف بوجهنا وگال مالي علاقة بيچ، فلس ما أصرف بس خطچ علمود لتصيعين

بالشوارع. وعادي ما اهتميت لكلامه، گلبي مات شنو الجديد من يوم يومه يعاملني مثل اللقيطة ولا يوم حسسني أني بنته.

ومثل العادة، كل مصاريف الجامعة وگعت براس أمي چان ظهرها ينكسر بالشغل علمودي. جمعت قسمين، قسم مصرف الي وقسم گالت من أزوجچ وأفرح بيچ أشتري ذهب بالجمعتهن الچ. ماتت إسحاق وما شافت هاليوم، والله اليعلم الفلوس الجمعتهن سوولهن فاتحة بيهن لو أكلوهن ببطونهم مثل ما متعودين. حچيتها وأني أناشغ من البچي، گبل سحبني علي حضني حيل بدون ميحچي أي شي ويايه. ظل يمسح على راسي بهدوء، أسمعه يحچي بهمس يمكن يرتل آيات قرآنية لحد ما غفيت.

هناء.. گعدت الصبح صهيب جاي يحچي بالتلفون. گمت غسلت وطلعت للصالة، أباوع الوجوه مگلوبة، صبحت عليهم وتقربت من عمة صبيحة. -شصاير عمة شبيكم؟ -غير شميسة طيحت الطفل أمس. -ياااااا، وينها هسه صخر يمها لو لا؟ -بحجرتها وصخر راح لشغله. عفتهم ورحت أركض، دگيت الباب صاحت غسق تفضل، طبيت لگيت شمس بحضنها ومنتهية من البچي. تقربت حضنتها وبچيت، هو آنه أريدنلي حجة وهاي أجتني من الله خاطر أفرغ گلبي بلكن أرتاح.

غسق.. أدري صدگ چذب، هي طارحة وتبچي أنتِ شكو لو أخذچ الواهس وياها؟ يلا عادي، مو أنتن متزوجات توم يعني الجينات مختلطة حتى بهالسالفة. شمس.. هههههه، عابتلچ ضحكتيني وأني ضايجة. غسق.. دضحكي يمعودة أضحكي هي خلصانه. هناء.. لتنقهرين صارت مرتين تصير عشرة، إن شاء الله متعدي هالسنة إلا وابنچ ببطنچ وتجيبن علينة تالي الليل وتبهذلينة وياچ. -وأنتِ ويايه إن شاء الله. غسق.. عفتهن يحچن وطلعت.

كملت الشغل ويا البنات، للظهر دنتغدة اجة حنظل. ما حچوا شي. بدّل وگعد يمهم ديشربون چاي. كتّت الحجية الأكو والماكو، لأن هي أكثر وحدة بينة ضايجة ع الطفل من بعد شمس. على گد ما صار عصبي من يمي خفت. گام اشر لنجيبة وراح للغرفة، دقايق وسمعنا صوتها تصرخ والولد كلهم گاعدين. تقربت من إسحاق: -گوم فدوة متسمع صوتها. -مالچ غرض هو وحرمتة ينجازون بيناتهم. باوعت للشيخ گاعد ما تحرك. ابن حنظل

يم الباب يدگ بيها ويصيح: بوية افتحها، بس هو ولا يمه. ما تحملت صياحها. ركضت للمطبخ طبيت وسديت الباب حتى اخلص من الصوت، شوية ولحگتني ثناء: -عزززة ولچ هذا شديسويلها؟ -ما ادري. حنظل أبد ميستخدم أسلوب الضرب، مدري شصارله هسه. -أي مو هي طلعتها من ماعونها، منا ريحان منا شمس، حقه يتخبل عليها. -عزززة، هسه شنسوي؟ -إذا انتِ مرتة التعرفي وخايفة هيچ، اني شگول؟

-يحظي انتِ غريبة ما يسويلچ شي. بس هسه لو طلع وشافني واگفة گدامه، يمكن يحطني ببوكس يطلع حرگته بيه. -هههههه. ولچ مو توچ گلتي ميضرب؟ -اي گلت. بس شو خفت هسه، متسمعين نجيبة شلون دتصرخ؟ دتحچي، سمعت صوته قريب صاحها. من الخوف ختلت بالزاوية مالت المطبخ، فتح الباب وگال: وينچ مو جاي أصيحن؟ -ها عيني گول. يااا هاي شبيها ايدك ليش هالدم؟ -جيبي التعقيم انجرحت بيها. -تعال تعال اگعد هنا. اجت من جهتي. نست اني خاتلة، من شافتني رادت

تحچي اشرتلها على حلگي: اششش. اخذت التعقيم وراحت. شوية وسمعته گال: عليش بوية ترجفين هيچي؟ -هااا. لا ما أرجف متوهم. -وهاي ايدينچ شمالها جاي ترگص مثلاً؟ -ههههه. أي صراحة خفت منك، گلت هسه تطبگني ويا نجيبة ع الواهس. -الحرمة المعدلة تنشال اعلة الراس ما تنطگ. لكت الحيوان اللي يحچون ويا مرة واثنتين ومية ويظلة اعلة عواجه، لزوم انطگه خاطر يتعدّل. -أي حنظل ادري. قابل تعلمني بيك، بس هو الموقف يخوف مو بيدي.

-هي حرمتي. بس انتِ بنيتي ومامش بت تخاف من ابوها. حچاها وسمعت صوت البوسة. من يمي استحيت وغمضت، عبالك داشوفهم گبالي. فجأة صارت ثناء بوجهي، عرفته طلع. گبل ضربتها على ايدها: صدگ متستحين مو تدرين اني هنا، شو ماخذة راحتچ كلش! -شسويت قابل؟ چنت متوقعة بس يشوفني راح يضربني. تالي اجتني بوسة تخبل، ادفر نعمتي برجلي واصير متعافية يعني؟

-ههههههه. يا انتِ هم طالعة عينچ مو مثل ما عرفتچ أول مرة. بس والله عمي هالحنظل طلع رومانسي. واني اگول ثناء على شنو حبته، اثاري هذا السبب. -هههههههه. شبي ترى يخبل خلقة واخلاق، وين ألگي مثله؟ سمعت صوت نجيبة بالصالة راحت تركض. لحگتها لگيت الوجه صاير خريطة، من يمي حسيت بالوجع بمكانها. گال حنظل للشيخ: ماشي اخذها لأهلها. محد اعترض، اخذها وراح، وجهالها بقوا هنا بس ابنها الصغير اخذته وياها. هناء: بعد ما طلع حنظل.

انتبهت لصهيب راح للغرفة، عفتهم ورحت ورا، لگيته ديبدل: ها وين؟ -لبغداد. -اجة وياك؟ -وين بوية عندي شغل. -صهيب لتضحك علية. ترى أمس سمعت المكالمة وعرفت السالفة تخصني، من حقي اعرف شجاي يصير. -لا متوهمة. -لا ممتوهمة، واليوم يا آنه يا انت. ظل معاند وآنه مصرة. اخر شي ما گدر علية، سويت البراسي ومشيت ويا. بالطريق گال: مخابري من المختبر. اكو شي يخص التحليل السويته گبل مدة، وما گدروا يگولونه ع التلفون. وصلنا بالليل.

اتصل عليهم گالوله تأخرت، خليها على باچر. نزلنا بالفندق وثاني يوم من ثمانية طلعنا للمستشفى. ظلينا ننتظر احد يجي ويحچي ويانا. شوية واجة الدكتور نفسه الأشرف على حالتي، گام صهيب سلم علي وگعد يمنا: -خير دكتور وغوشتونا باتصالكم هذا؟

-والله ما ادري شگولك وليدي. مثل ما تعرف بهالحياة جل من لا يخطئ. وبالطب واردة الأخطاء مثله مثل أي مهنة ثانية. لذلك يؤسفني ابلغك مرتك كتلتها چانت خبيثة، بس صار التباس عدهم بينها وبين بنية ثانية تعاني من نفس المرض وتبدلت النتائج بيناتهن..... يتبع