رواية وضاقت الأرض بي الفصل السابع والسبعون 77 - بقلم لبنى الموسوي

ردت أقول له: "ليش تضحك؟ " رن جهازه. قام جاوب والضحكة تارسة وجهه، فجأة اختفت هاي الابتسامة. "نعم؟ شني شني؟ "على مهلچ خلني أفهم السالفة بوية." ما أحس إلا سد التلفون وركض سحب السلاح وطلع من الغرفة بملابس البيت. تخبلت من منظره. "وين راح هذا؟ وليش أخذ السلاح وياه؟ طلعت وراه خايفة. الشيخ موجود بالصالة، ما قدرت أقول له لا يروح ينهبط ويصير بيه شي لا سمح الله. بعدني طفلة ما أعرف شلون أتصرف.

فتحت الباب الخلفي وتمشيت للحديقة، ظليت رايحة راجعة، قلبي راد يوقف من القلق. كل شوية أريد أطب أبلغ إخوانه وأتراجع. أخاف ينهبطون، أخاف هو ما يقبل. أخاف اكو مشكلة ما يحب أحد يعرف بيها، وإذا حچيت يزعل مني أو يعاقبني. حتى ما لحقت أعرف أطباعه زين. صح صار لنا قرابة السنة متزوجين، بس ما بيني وبينه غير الكلام الضروري. ما تجرأت أتقرب منه حتى أفهمه، ولا هو حاول وياي علمود يفهمني. أكثر من نص ساعة وهو ماكو.

كلش أخاف من حياة العشائر هنا بعد ما شفت شلون أبويه وإخواني. چانوا يوميًا مشكلة شكل، بحيث السلاح أبدًا ما يوقع من إيدهم. تعبت من الوقفة بالحديقة. "راح أروح أحچي وياهم، وشيريد يصير خليه يصير." درت وجهي دأطب سمعت الباب انفتح. باوعت ماما دخلت. الوجه شحاله صاير خريطة وماكو حجاب. شامرة بلوز حبيب على راسها وطب هو وراها بطرك الفانيلة الداخلية. تخبلت من شفت منظرها. هم رجعوا ضربوها، هالميخافون رب العالمين.

ركضت عليها، حضنتني وقامت تبچي. طالعة بتراك البيت، مسحت على ظهرها. ووقعت خصلة من شعرها بإيدي. ما تحملت صرت أناشغ وياها. طب حبيب جاب لها عباية من جوه، بعدني عنها وخلاها على راسها. بدون ما يباوع كال: "تعاي خلافي عمة." سحبتها من إيدها وطبينا. الشيخ لسه قاعد بالصالة، من شاف منظر ماما وحبيب وقف على حيله. الشيخ ضاري: "شني الصاير وليدي؟

حبيب: "شوفة عينك يبوي. ضاربين الحرمة وطارديها بملابس البيت حتى ما مش حجاب على راسها يسترها." الشيخ ضاري: "وسلاحك هذا شني؟ لا تقول لي صوبتهم؟ حبيب: "لا ما لحقت، جيرانهم فكوني عنهم." حنظل: "لا خجل لا مستحة. شني هالوادم ومنين مخلوقين؟ راح أتسودن وعلي." صهيب: "هساع يجونا هدادة اللي يقول الحق وياهم." صخر: "هلا بيهم. غير ما يطلعون منا سالمين، بس خلهم يعتبون هالدار." ديحچون، اندقت الباب حيل. عرفتهم اجو.

من الخوف اخذت ماما وركضت لغرفتي ع السريع. سودة علي، كسرت قلبي. واقفة مثل الذليلة بيناتهم، ما تعرف من الخجل تودي وجهها وين. الحجية وعمة هم ما تدخلن. قدرن حالتها وعافونا وحدنا. رحت قعدتها ع الچرباية، الجسم ينفض مثل السعفة. "ماما ليش ترجفين؟ ما ماكلة شي؟ هزت براسها لا. ركضت للفواكه مالت حبيب لسه بمكانهن. فتحت البرتقالة أريدها تاكل، ما تقبل. آخر شي حطيتها بحلقها بإيدي. تاكل ودموعها تجري.

من الضرب شفتها وطرف الحاجب مورمات. صارت عيني على إيديها كلها آثار عض، جسمها عبارة عن كدمات مو ضرب إجرام والله. فتحت الموزة وهم جبرتها تاكلها. شلون المفروض أتصرف بمثل هالموقف؟ والله ما أدري. أعقم لها الجروح التارسات جسمها؟ لو آخذها أغسل لها أو أخليها تطب للحمام تسبح؟ أخاف لازم أسوي لها أكل؟ بس شلون وهي حتى الفواكه بالقوة تقبلتهن بمعدتها. مو فاهية بس طفلة. أني أحتاج واحد يداريني مو العكس.

فـ شلون لو چانت أمي قدامي بهاي الحالة، وأني أدري بروحي قليلة حيلة وما بإيدي شي أقدمه إلها. بعدني أباوع لها وأبچي، اندقت الباب. عدلت حجابي وفتحته. صار بوجهي إسحاق، قال: "وين أمچ؟ " فتحت الباب على حيله، صارت عيونه عليها. "امشي وياي خويه." "الله يخليك، لا ترجعني لهم. تحملوني بس الليلة ومن الصبح أني أتصرف، أوعدك." "وياهو هذا اللي يرجعچ لهم؟ امشي للمستشفى خاطر أسويلچ تقرير. ومن بعدها آخذچ ونمشي للمركز نقدم شكوى بيهم."

بس حكاها مسحت دموعها ووقفت. قال لها: "ناطرچ بره لا تطولين." سديت الباب وراي وطبيت أركض. فتحت الميز عندي عصير وكيك طلعتهن إلها. "هاچ أكلي حتى يصير بيچ حيل. ماما أترجاچ لا تسكتين. أحچي لهم كل شي، الجوع، الحبس، الضرب، الإهانة، وكل شي تعرضنا له بهالسنتين، قولي." "لا تخافين أني وياچ. حتى لو طلبوني أجي أكيد حبيب ما يقول شي بعد ما شاف بعينه شمسوين بيچ." "أريد فلوس عندچ؟ "إي عندي، حبيب كل شهر ينطيني مصروف، انتظري."

رحت للكنتور. "شقد؟ 100 كافي لو تردين أكثر؟ "لا تكفي وتزود." "هاچ يلا ولا تقصرين، هاي فرصتچ الوحيدة ماما." "انطيني شال ألبسه." "هذا هاچ. وشعرچ هماتين راويهم بالمستشفى مو تنسي." لبسته وطلعنا سوه. إسحاق چان واقف يم أمه وعمته بالصالة. بس شافنا أخذها وراح. صوت الزلم تارس البيت، معناها بعدهم بالمضيف. هم الهم عين ويحچون فوق عمايلهم السودة. ظليت قاعدة يمهم، يسألوني شصار وأجاوب. وين تالي الليل يلا طلعوا. طب الشيخ ويا الولد.

هم أعصاب وهو بارد ثلج، ما نطق وياهم ولا كلمة. قريب الثنتين سمعت الباب انفتح. ركضت قبلهم. شفت ماما طبت ووراها حبيب وإسحاق. بس شافني حبيب قال: "أخذيها لحجرتنا." طبينا للغرفة. قعدت ع الچرباية تبچي، عفتها ترتاح. شوية وسكتت. تقربت منها قعدت وسحبت راسها علي، حضنتها حيل. "شصار أحچي لي ماما؟ "قدمت بلاغ عليهم وإسحاق اتكفل بالباقي." "لعد على شنو هالبچي؟ باوعت لي ودنقت.

"خايفة منهم وحايرة بنفس الوقت. لا بيه بعد أظل هنا ولا أقدر أروح لبغداد وأعوفچ." "شكو علي؟ غير تزوجت. صح راح أشتاق لك بس أكيد نتشاوف قابل وين بغداد؟ هي هاي وينها؟ حچيتها والخنگة بصوتي. أضحك على نفسي لو عليها لو على من بالضبط؟ وين أقدر أفارقها وأني مالي غيرها بالدنيا، هي أبويه وأمي وإخواني وكل أهلي وناسي. قاطعني صوتها: "مستحيل أعوفچ يمه. لمن رايحة وهو أني ما طلعت من هـ الدنيا غير بيچ؟

"شو لا أهل ولا عمام. ومثل ما أني كل أهلچ أنتِ حياتي وكل ما بيها. مستحيل يقدر الإنسان يستغني عن حياته بسهولة يا أعز ما أملك أنتِ." حضنتها وبچيت بحرقة. "إي ماما صدق لو تعوفيني أموت. بس هم أني ما أقبل يظل اليسوى واللي ما يسوى يهين بيچ وتتحملين الخاطري." "تفرج ماما تفرج. بلكت أحصل شي بعد هـ البلاغ، ننتظر حماچ ونقرر." دتحچي، اندقت الباب. صحت: "تفضل." طب حبيب. قبل ماما قامت، قال لها: "خليچ عمة بس أخذ ملابسي وأمشي."

قمت ع السريع. طلعت له تراك لأن اللي لابسه انعدم. باوعت له سحب الخاولي من الزاوية. فتحت الكنتور طلعت داخليات، عرفتَه يريد يسبح. رحت وراه دأسد الباب، التفت علي. باوعت له بتساؤل. ما أحس إلا تقرب مني وهمس بإذني بصوت دافي: "خليها تنام يمچ، آنه أنام بالمضيف." انسطر راسي سطر. أريد أنطق بعد ما أقدر، ظليت بس صافنة. هسه هو شنو سوى قابل حتى يصير بيا كل هذا؟ ومن شوكت اختفى الخوف من وجوده بقربي؟ كله من المسلسلات التركية.

"بطليهن ولچ ترف، عايزه يعني أنتِ؟ خليچ حايرة بضيمچ أحسن من هـ السوالف التعبانة." صحاني صوت ماما. درت وجهي باوعت لها، صاحت: "شبيچ؟ مو دأحچي وياچ، وين صافنة؟ "لا هيچ. نامي اليوم هنا حبيب ينام بالمضيف." "لا يمه فشلة من الرجال." "شبيچ؟ هو قال. بعدين حبيب من الصبح يروح للدوام وباوعي الساعة راح تصير شقد؟ "شلون يعاملچ؟ "عادي مثل كل مرة، ماكو شي جديد."

"والله لو تفترين كل الدنيا ما تلگين منه. يا رجال متدنية نفسه على مرته حتى لو چانت طفلة. بس حبيب غير. صدق أثبت بهالتصرف شقد هو إنسان مثقف وواعي." "إي صدق خوش ولد." "هههههههههه ولد شنو؟ ولچ ماما عيب اكبري عاد وتعلمي شلون تحچين عنه." "لعد شقول؟ "بعدين أعلمچ، أريد أسبح وأنام تعبت كلش." "شلون مو ما عندچ ملابس؟ "أرجع بهذني العلي، شسوي يعني؟ أمري لله." يومين مرن والوضع مو تمام. باليوم الثالث حرك إسحاق الدعوى بالمحكمة.

هم ضد مرت أبويه وإخواني. وهم دعوى طلاق بعد ما أمي طلبت منه هالشي. شمس. اسبوعين وصخر ماكو، حتى اتصال ما يتصل. الأيام صارت تمر بصعوبة. من دخلت بالسادس وفعلاً الأعراض زادت عندي مثل ما قالت الدكتورة بالضبط. اختنقت من الوحدة. هناك الوقت يركض ويا البنات وبالليل ما ألحق أگعد ويا صخر، هسه 24 ساعة وحدي. هم زين صخر شد لي انترنت.

مرات أباوع مسلسلات ع النت ومرات أراسل ريحان وثناء، وإذا بالليل شفت إسحاق نشط بالواتس اب أحكي ويا غسق. وأحيانًا من الضوجة أسوي حلويات. لو أطلع أكلات من الإنترنت وأگعد أشتغل عليهن. بس يا ريت آكل. ساعات واقفة بالمطبخ أشتغل وأتعب تاليها بالأخير أشيله وأنطيه لبيت أبو وسيم. اليوم صبحت مريضة. حاولت أرفع راسي من الفراش ما قدرت. حرارتي مرتفعة وبلاعيمي ما أحس بيهن بحيث أريد أبلع ريقي ما بيه. بالقوة سحبت نفسي من الفراش.

مجبورة أقوم عندي علاج ولازم آخذه بعد ربع ساعة. طبيت للمطبخ دخت ردت أوقع، قَبل قعدت بمكاني. شوية وقمت يمكن ضغطي نازل. أريد أغلي الماي ما أقدر. سويت حليب بارد وعندي كيك أخذت قطعة وطلعت للصالة قعدت ع التخم. بس أخذت علاجي رجعت نمت بلا غطا. سمعت الجرس اندق. رفعت راسي حيل بـ 12 شلون ما حسيت على روحي. قدرت أقوم أحسن من الصبح. سحبت حجابي شمرته على راسي وصحت: "منو؟ أجه صوت ولد ما أعرفه. باوعت من العين السحرية عامل توصيل.

فتحت الباب: "نعم؟ "بيت أستاذ صخر مو صحيح؟ "بلي؟! "هذا الطلب لحضرتك." "شكرًا بس ثواني أجيب لك الفلوس وأجي." "لا ما يحتاج فلوس، الطلب والتوصيل اندفع بالعافية." أخذته منه وطبيت. شمرتهن ع الميز وقعدت فتحت العلبة أشكال موصي. باوعت للكاميرا بعصبية ورجعت سديتها. ظل لا تتصل ظل مكابر. بس أبد ما توصل لعنادي صخر أفندي وهسه تشوف. رجعت تمددت جوعانة كلش. باوعت للعلبة لو أموت جوع هم ما آكل منها.

حضرتَه ما يكلف نفسه يتصل يسأل وساعة اللي يريد مني شي يصير له ع الحاضر. حاولت أرجع أنام ما قدرت. هناك وتذكرت إني ما مصلية قمت توضيت ع السريع. صليت دا أكف السجادة انفتحت الباب. رفعت راسي، يا هاي خالتي صخر قبل لا يروح انطاها نسخة من مفتاح الشقة. "ها يمة شلونك؟ "الحمد لله خالة أنت شلونك؟ "الحمد لله." بس حكيتها أجت لمست قصتي. "هااااي شنوووو؟ "حرارتك مرتفعة حيل ليش ما اتصلت عليّ لما شفت روحك هيج؟ "ماكو فرق صخر اتصل."

"لا وين ما اتصل؟ "خوش." التفت ع الميز: "شنو موصي أكل من بره؟ "راح أسوي روحي مصدقتك وأجابوا، أي وصيت." "لعد ليش ما أكلتِ؟ "وشعرفك ما أكلتِ؟ العلبة مسدودة، شميتِ قفة إيدك؟ "لا بس مبين ما أكلتِ." "شلون مبين بلا ممكن أعرف خالتي؟ فتحت العلبة: "هاك شوف مثل ما هي." "هاي من فتحتيها بس قبل لا تفتحيها شلون عرفتي؟ "كافي عاد راح أحمي حتى تأكلين." "ما أريد ما أشتهي." "مو بكيفك تأكلين يعني تأكلين." "والله ما أشتهي."

"بروح أهلك كلهم أكل، أطفالك خطية شنو ذنبهم؟ باوعت لها ودمعتي بعيوني. راحت حمت الأكل وأجت حطته قدامي. انجبرت آكل بعد ما حلفتني بالغالين بس غسلت أجت جايبة لي العلاج. "هذا شنو بعد؟ "علاج لحالتك ولتخافين زين ع الحامل." "وصخر شمعرفه إني شبيه؟ "هو مال التهابات يعني يفيد كل الأمراض." أخذته منها بلعته. بيومها ظلت يمي لليل بالتسعة ونص راحت وقفلت الباب عليّ من بره. بس طلعت رحت لغرفتي نمت.

حسيت الصبح على صوت الباب ينفتح رفعت راسي خايفة. الساعة قريب الـ 11. قمت بهدوء سمعت قحات صخر جريت نفس براحة. ردت أطلع من الغرفة صار بوجهي. "السلام عليكم." "وعليكم السلام شعجب بينت؟ "شلون صرتي؟ "من الله بخير والحمد لله." حكيتها ورجعت لفراشي. توني متمددة أجه حط إيده على قصتي دفعتها حيل. "بلعتي علاجك؟ "تعرف ما يحتاج تسألني." "يلا ردي نامي، أطلع عندي شغل وآني أجيب أكل من دربي لا تسوين." غمضت بدون ما أجاوبه.

حسيت عليه طلع قمت غسلت وظليت ألملم بالشقة. صح خالتي نظفتها بس شأسوي. هيج أمشي وقت بالشغل أحسن ما يأكلني التفكير. ساعتين ورجع. كنت قاعدة بالصالة طب ما قمت له. راح للمطبخ رتب الأكل بالصينية وأجه حطه قدامي. قعد ياكل شافني صافنة خزرني. "ما تأكلين؟ "ما أشتهي، أكل أنت." "مو على مزاجك، جواتك أرواح موش روح وحدة." حكاها وحط اللقمة بحلقي. ظل يوكلني لحد ما خلص ماعوني يلا رجع ياكل. بيومها ما عافني.

صحيح ما نحكي وصح هو بالصالة وإني بالغرفة بس كافي عليّ أحس نفسه يمي بالبيت. يومين وقال راح أرد للبصرة. بالليل كان نايم بالصالة والموبايل فوق راسه باوعت ديلمض بس صامت ماكو صوت. تقربت بهدوء أم مريم1. حلوووو والله حظرها من ذاك الرقم طلعت له من هذا. فتحت الجهاز وطبيت ع الفايبر. اليوم حاكية وياه لأن باقر واقع وماخذته هي وحبيب للمستشفى. كان ديسألها شلون صار ولتنسين علاجه. آخر شي مراسلته بالليل:

"وين صرت عفية مو ابن أخوك ديبكي عليك خبصني يريدك." ما مجاوبها هو. راجعة مراسلته باسم بنتها مريم. عود تسأل علي وهم ما رد عليها هذا الحكي بالعشرة. آخر رسائل هسه كاتبة له: "صخر أريد أوصيك على شغلة بس مستحية منك." "محتاجة هذا الكريم." "ما موجود غير بس ببغداد لو تقدر تجيبه لي وأنطيك فلوسه." بعدني بالمحادثة دزت صورتها بعقد ريحان. بيومها طلعت كلش حلوة من كل النواحي حتى إحنا تحارشنا بيها. ثواني حذفتها واعتذرت: "آسفة بالغلط."

"عودًا جاي أدز لك صورة الكريم مو بالقصد والله." طلعت من المحادثة رجعت راسلت. فتحتها كاتبة: "آسفة لا تضوج تراني ماشية على اتفاقنا." "ولأن أطلب منك شي عيب حالك حال إخوتي أمون عليك." قَبل سديت المحادثة. لو أبقى دقيقة بعد أقرأ بيها أجيب بمكاني من القهر. شلون صلافة وكذب يا ربي. تدز صورتها وتقول والله بالغلط. هه بعد كم يوم تدز له مقطع الـ..... أستغفر الله ما أريد أوسخ لساني بيها. رجعت الجهاز يم راسه ورحت لغرفتي.

طلاق مستحيل يطلقها. وآني وزعل عليّ وحملني مسؤولية كل اللي صار. ما ظل بعد بس أنتظر يتم زواجهم ويجي الخبر طاير. غمضت عيني أدعي أنام لحد ما غفيت. قعدت الصبح على صوته راد يحط الفلوس على الميز دفعت إيده حيل. "ما أريد فلوسك." "ما أريد منك شي ليش دتحسسني محتاجة للصدقة؟ "هذا واجبي صدقة شني؟ "لا مو واجبك." "لا عايشة يمك ولا دا أنطيك حقوقك على شنو تصرف عليّ فهمني." "بعدين إني ما طالعة من البيت."

"وأنت قلت إني أوديك للدكتورة بعد على شنو دتخلي هالفلوس يمي؟ صاحبتك وما أدري." "شمسسسس! "لا تصيح وشيل فلوسك من أريد شي عندي وأصرف ما أحتاج صدقة منك." "أنتِ عليش لسانك متبري منك هيجِ؟ "ليش أخذتني لعد؟ "غلطة." "صحح الغلطة مو صعبة ترى." "إن شاء الله تتصحح." "ومنا لذاك الوقت يا ريت لو ما ترويني وجهك بعد." بس حكيتها سحبني من فكي حيل. "للمرة المليوووون أرد وأقول لك لسانك قصّررري." "وإذا ما سكتت شتسوي يعني؟ "تضربني مووو؟

"يلا يلا شو مد إيدك واضرب ولو على شنو دأتحدّاك مو هاي أنت أصابعك نبتت بفكي." "لا إله إلا الله." "لاااااااا إله إلااااااااااا الله." حكاها وباوع لي بعصبية. راد يكمل كلامه سكت سحب الجاكيت من الجرباية وطلع بدون ما يسلم. قبل لا يفتح الباب عطت بصوت عالي: "روح روووح بلا سلام." "هسه صارت شمس غريبة عنك وست أمل هي الأصل." "بس والله راح تندم." "وراااح ترجع تتوسل وما أااااسامح صخر تسمع ماااااا أاااااسامحك."

ما أشوف إلا رجع للغرفة يركض. لزمني من فكي مرة الثانية والشر يتطاير من عيونه. "يا هو اللي يسامح؟ يا هو حاااااكيني؟ "لك آني شني اللي سويته ويااااااك؟ تزوجت أاااي بس ماااا خنتك." "أنت اللي عفتيني شمس." "أنت اللي بعتيني وأنت اللي قررتي تبتعدين عني." "وأنت اللي صغرتيني جدام خلق الله لمن شردتي بالليلة ما بيها ضوه رب العالمين." "غيري واحد لو ما قتلك يكسرك." "أي يكسرك." "يكسر عنادك هذاااااا بعنااااده وينزل حرمة."

"حرمة يعني حرمة موش على الحبر وبسس وساعتها عودًا خل هـ الصلافة تنفعك." "كلما أحاول أسكت تجبريني على الحكي." "يبت الناس جوزي عاد." "خل هـ الأربع أشهر يعدن على خير وخلافها يجي كل اللي ترديه يم رجيلاتك." دار وجهه ديروح صحت: "أوقف لحظة." قَبل باوع لي: "شفت موبايلك مووو؟ "خير شكو بعد؟ قمت من مكاني وقفت قباله. "دزت لك صورة الكريم بس قبلها صورة محذوفة." "تدري شنو هالصورة؟!! "صورتها عيني حتى تغريك بيها و.........

"وتدز شني يعني؟ "بعمايلها هاي تصغر وترخص بعيني ما تكبر ولا تغلى." "أنتِ لو تعرفيني عدل ما حكيت هالحكايات." "بس ما تعرفيني شمس." "وبعمرك ما راح تعرفيني من هيج اهتمي برويحتك وفروخك واتركي عنك التفكير بيّ." حكاها وطلع من الغرفة. وصلنا الطريق ما بي مخرج بعد. مثل ما إني تعبت منه هو هم تعب مني ومل خلص. قررت أستسلم للواقع. أنتبه على نفسي منا لما أجيب بالسلامة.

وراها أعيش حياتي بعيد عن صخر وعن الماضي اللي ما ارتاحيت بي ولا يوم. غسق.. علاقتي بدكتورة طيف. خلال هـ الفترة صارت قوية بشكل بحيث صرنا أكثر من خوات. صح بالبداية كنت ما مرتاحة لها. بس بعد ما عاشرتها فترة وفتحت لها قلبي. تأكدت هي شقد طيبة وعلى نياتها مو مثل أول نظرة شفتها بيها. سري لحد الآن محتفظة بي. بكل زيارة تخليني أعيده بيني وبين نفسي. بس ولا مرة حكيت له إياها ولا أتجرأ بيوم أحكي لا لها ولا لغيرها.

الحمد لله التحسن واضح بحالتي. حتى من أعيد الحادثة ويا روحي أتألم بس ما أبكي وهي لاحظت هالشي عليّ. بآخر مراجعات صرنا نحكي عن إسحاق أكثر. شي يحب. شي يكره. شنو اللي أحبه بيّ إني. شلون أشوفه بعيوني. وكل شي يخصه صغير كان أو كبير. بدت تجهزني حتى أتقرب منه. كل مراجعة تتعمق عن اللي قبلها بالتفاصيل أكثر. حتى تزيل التوتر مني وتعيشني الحالة بفكري قبل لا أعيشها بالواقع. اليوم موعد مراجعتي وياها.

وصلني إسحاق من الباب سلم عليها وراح. بالعادة أول ما أقعد تخليني أعيد الحادثة ويا نفسي بس هالمرة سكتت. انتظرتها تحكي ماكو. باوعت لها بتعجب: "شنو ما راح نبدي الجلسة دكتورة؟!! "لا ليش هسه نبدي؟ "يعني أبدي أحكي لو شنو ما فهمت؟ "ههه لا إحنا صرنا أبطال وتجاوزنا هـ المراحل بعد." "لعد شنسوي؟ "نتجهز للمشية مثل أي ناس عاديين." "يا مشية ما فهمت؟!! "مشيتك غير." "إن شاء الله تردين أنطيك الإسحاق بالخالي بلاش؟ "لا عيني لا."

"يجي يخطبك مني شخصيًا." "ونقعد إني وياك نحط رجل على رجل ونتشرط عليه." بقيت صافنة عليها هاي شدا تحكي راح أتخبل. رفعت الجهاز اتصلت بالسكرتير. "عيني ممنوع أحد يدخل علينا حتى أنت." "باستثناء أستاذ إسحاق من يجي خلي يتفضل بدون استئذان." حكتها وسدت الخط. قومتني من إيدي تضحك: "شو تعالي خلي نرتب نفسنا شوية." نزعتني العباية وإني على صدمتي. "أي حلو لبسك." فتحت الشال: "الله شنو هالشعر الحلو ما تصورتَه هيج." ابتسمت لها بتعجب.

فتحت شالها تضحك: "هذني الماشات حاطتهن دوم بسبب كذلتي قصيرة وتنزل على عيوني." "يلا هسه أجه دورهن شفتي كل شي يفيد... وغمزتلي. دارتني ع المرايا. -عندچ مشط عفية گولي أي. -أي عندي بالجنطة ما أطلعه لأن دوم أمشط الود. -جيبي بسرعة. -تفضلي هذا بس شراح تسوين؟ -اشششش مالچ علاقة خليها علية ويجيچ الصافي. حچتها وبدت تمشط بي. سرحته الي وعافته مفتوح على طوله بس لمته من الأطراف بماشاتها. فتحت جنطتها طلعت كحلة ومسكارا وحمرة.

التفتت علية تضحك. -أنتِ حلوة كافي عليچ هذني، بعدين لازم بالمشية البنوتة تظل على طبيعتها حتى بالعرس تتميز. إذا الحايط يجاوب أني أجاوب. حطتلي مكياج وگعدتني ع الكرسي. -باوعي هسة أني منو أحچي لتصفنين. -دكتورة طيف. -لااااا هاي شبيچ أني أختچ الچبيرة، ديري بالچ گدام الرجال تصيحيلي دكتورة ترى والله يخلي ويهج وأني ممّسؤولة. -يا رجال شبيچ؟!! -اليريد يخطبچ غير لتصيرين ثولة. دتحچي اندگت الباب. طب إسحاق تفاجأت بمنظره.

لابس قاط أسود وبـ إيده ورد طبيعي وعلبة چكليت. راحت تركض تلگته. -أهلاً وسهلاً تفضل ليش واگف بمكانك. باوع علية مبتسم. -لا تگولين هي هاي العروس. -أي ليش الوالدة ما وصفتها الك؟ -بلى وصفتها بس ما ظنيتها حلوة هالكثر. ابتسمت لا إراديًا. والله هالزوج فـ لا صاحين أبد. باوعلها وگال: -بس أقدم الورد للورد. ابتسمت وگالت: -طبعًا طبعًا. أجه باتجاهي گمت وگفت. أنطاني الورد مبتسم دا أخذه منه طخ إيدي وغمز. گبل طيف صاحت:

-عيييب هالحركات أهلها واگفين يرجال صدگ چذب. -موش بالقصد خوية. -يلا مصار شي هي إن شاء الله راح تصير حلالك. گعد بالكرسي المقابيلي. سحبت طيف كرسيها وگعدت بيناتنا. تباوع علينة بابتسامة وإحنا واحدنا صافن بوجه الثاني. -أي عيني خليك وياية شوية. -أي وياچ خوية. -لا واضح وياية بس يلا المهم، أختي الله يسلمها مو متطلبة متريد منك غير 100 بـ 100 خوما هواي. -هههههه لا كلش موش هواي ما گايلين شي يابة. غسق:

-هو بفلوس الدنيا كلها بس وجوده كافي. طيف: -اثگلي دادة لا تفشلينا، معليك بيها 100 بـ 100 يا هيچ يا مالك مرة يمنا. -تستاهل ماي العين. -تسلم عيونك، وبعد نريد عرس بدلة تصوير يعني توثق هـ اللحظات لحظة لحظة ميفوتك ولا شي. -صار. -وشهر عرس بتركيا تحديدًا، الشهر يصير أسبوع مو مشكلة بس المهم تاخذها مو تحبسها بالغرفة لاحگين عود. -هههههه همينة صار، بس خوية مو كافي كلچ خلگ أختها لو أمها شعملتي.

-ليش يمة أختها شوية، بس گول أريد أسمع صوتها أسكتي حتى أسكت. -هههههه تسوين فضل. -راح أسكت بس شي أخير، ممنوع المقابلة بيناتكم منا للعرس حتى تشتاق زين وتستعجل بالتجهيزات. -لا هاي الما متفقين عليها. -والله هذا العندي، عاجبك عاجبك ما عاجبك خوية أخذ الورد والچكليت وانطلق من حيث أتيت. غسق: -يااا وأني وين أظل. طيف: -مرت حماچ مو وحدها روحي يمها حتى هي تساعدچ. شاورتني ما حچت گدامه. هزيت راسي بابتسامة صاح: -هااااا اتفقتن علية.

-يلا گوم أخذنا الشمس فرصة أتعرف عليها. -تظلها هناك يعني؟ -أي شعندك قابل الباچر أنت مجهز كل شي مو؟ -إن شاء الله. طلعنا سوة شقة شمس. الطريق إلها بعيد وبغداد چبيرة كلش. وآني كل شي ما أندل بيها لحد الآن شقتنا ما حافظة مكانها عدل. وصلنا دگ إسحاق الجرس فتحتها مبتسمة. استقبلتهم وراحت للمطبخ. أشرتلي من بعيد تعالي بس طبيت حضنتني وبچت. -اشتاقيتلچ غسوقة. -والنبي أني هم اشتاقيتلچ شلون تعوفينا ولچ.

-أسكت وخليني بضيمي، صدگ هاي منو وياكم من الخبصة نسيت أسألچ. -هاي دكتورتي طيف. -عزززة وشعندچ جايبتها الي والله هسة أطلع أگطع النعال على راسها. -هههههه لا ولچ مو گتلچ طلعت حبابة شجاچ. -شو ما أصدگ. -لا صدگي عاشرتها وعرفتها هسة أسولفلچ شسوت. جهزت التقديم عنها وطلعنا. ظلينا گاعدين بالنص ساعة تعرفت طيف على شمس وگامت استأذنت. باوع إسحاق للساعة وگال: -محتاجين شي بوية؟ شمس: -وين تعشوا وروحوا. إسحاق:

-لا خوية مشكورة، وأمانة لون إعتازيتي لأي شي لا تترددين دگي علية اليمتة ما چان. شمس: -متقصر رحم الله والديك. بس حچاها طلعوا. باوعت علية متعجبة: -شو بقيتي شنو الفلم لتخبليني. سديت الباب وسحبتها للصالة. سولفت كل شي صار ويانا وهاي خلصتها بس تضحك. آخر شي گلتلها: -راح أضربچ لحد متجيبين. حطت إيدها على حلگها: -لا خلص سكتت بس ما عندچ مجال بعد لازم نتحظر.

-أي هو لعد ليش اجيتچ، بالطريق إسحاق گال تجهيزات العرس علية أنتِ بس جهزي نفسچ. -يعني هو يجيب البدلة وهالسوالف؟ -أي. -حلووو شغلنا سهل لعد. حچتها وگامت مدري شتسوي. يمكن طفت الكاميرات. ظلت وياية كل الليل رتبتني وما نمنا إلا الفجر. ثاني يوم للظهر طبيت سبحت. طلعت لگيتها صابة الغدة خطية. أكلت وگبل جففت شعري وبدت تشتغل بية. للعصر اندگت الباب. ولد جاب الغراض طببتهن للغرفة تركض. رحت وراها: -يمعودة لتركضين صدگ چذب الجهااااال.

فتحت البدلة مال أعراس حتى منفوشة. الحذاء أبيض وعالي والمسكة بيضة وبيها ورد أصفر تجنن تجنن تجنن. هي انصدمت بيهن أكثر مني. كملت آخر لمساتها بالمكياج ولبستني ماناسي أي شي حتى الشغلات الصغيرة جايبها. تسريحتي چانت بسيطة لأن ما عندها ماشات. فتحت العلاگة شمس. لگته جايب أشكال حتى تاج وورد جانبي ينحط بالشعر. باوعت للساعة وصاحت: -بعد عدنا وقت. رجعت فتحتها. ردت حاولت يمعودة تعبتي كافي ماكو أحچي ويا الحايط.

للسبعة ونص خلصتني من كل شي. باوعت لنفسي بالمرايا. عروس عروس حتى لمعة وجهي واضحة حالي حال أي بنية بـ هاليوم المميز. گعدتني بالصالة واتصلت على إسحاق. ما خلتني أسمع. راحت للغرفة حچت ويا ورجعتلي نص ساعة واندگ الباب. راحت فتحتها طب هو وطيف. هم مثل البارحة. لابس قاط وبـ إيده كومة غراض أخذتهن منه شمس وراحت للمطبخ. ظل يباوعلي بابتسامة. ندسته طيف: -ها عيني شفتي أختي شحلاتها تسوة المية لا؟ -مو گتلچ تسوة الدنيا كلها.

-هههههه لعد بالعافية عليك وعليها. -الله يعافيچ. عافتنا طيف وراحت للمطبخ. أجه گعد يمي باسني من خدي وگال: -أموتن عليكِ. ما گدرت أرد من الخجل. شوية وطلعن بـ إيدهن الكيك والحلويات. بالساعة ظلينا گاعدين. ضحك وسوالف وهن يهوسن صدگ حسيت نفسي بعرس مو مجرد كلام. شمس وطيف صارنلي أهل. حسيت بيهن أمي وشجن النحرمت منهن قبل هاليوم الحلو. باوعت طيف للساعة وصاحت: -يلا موعد التصوير. طلعنا حتى هن أجن ويانا.

صدفة چان يوم خميس والدنيا مخبوصة الناس كلها معرسة ويانا. عود حاجزين ع المصور ونص ساعة يلا دخلنا. أخذنا صور كلش حلوة. من ضمنها صورتين وحدة جماعية والثانية ويا شمس هي وبطنها الچبيرة وأني أبوس بيها. وصلناهن كل وحدة لبيتها ورجعنا للشقة. طبيت الضويات أشكال. البيت متروس نشرات وبباب الغرفة نشرة بأسماءنا. فتح الباب وشالني. ضحكت: -نزلني إسحاق والله أخجل. غمزلي وگال: -الخجل البعدين هساع ما مسوين شي. دخلني للغرفة وسد الباب.

باوعت علي ممصدگة معقولة أني هنا بلا خوف. معقولة تخلصت من كابوس الماضي. لو هم راح أنصدم بي؟ مجرد ميتقرب مني وتنعاد علية ذيچ الليلة الصعبة....