رواية وضاقت الأرض بي الفصل السادس والستون 66 - بقلم لبنى الموسوي

#وضاقت_الأرض_بي

للكاتبة #لبنى_الموسوي

بارت مفاجئ لعيونكم حبايب
نفسيتي متدمرة والله بالگوة كتبتة الكم اعذروني لو ما كان بالمستوى المطلوب
متابعة ممتعة ♥🥀

صرخت لحد ما تعبت
نزلت راسي بـ أستسلام لتحاولين ريحان
هاي أرض الله الوسيعة ردت وضاگت بيچ خلاص لهنا وانتهت حياتچ بعد

رجعت بخطواتي ليورة وگعدت بالگاع
رجليني بعد متعيني خاطر امشي ورويحتي صارت اظلم من سواد هالليل

غمضت عيني خايفة
الگاع باردة والوجع ياكل بكل كتر بجسمي
اصلاً معجزة لساعني عايشة وما متت بعد كل شي صار وياي

بـ هاللحظة تمنيت روحي تطلع
تمنيت اغمض عيوني العمية وما اگعد للأبد
عسى ولعل ارتاح من العذاب الجاي ينهش بلحمي بلا رحمة

تمددت بالگاع ابچي
يارب كون افقد الوعي يارب معجزة منك تسلب بيها روحي خاطر ارتاح من هالوجع

كمية الألم الچنت احسن بي ما تنوصف
عگب ما برد جسمي
هاجت علية كل الأوجاع وكلها بچفة والحرگ بچفة ثانية

والله ألمة ما ينحمل
اشبه بالسچين الغارسيها بوسط گلبك ويحركون بيها اعلة مهلهم البين ما تطلع روحك وترتاح

ما تحملت اكثر بعد
صرخت صرخة صعدت السماوات رب العالمين

حطيت راسي ع التراب
ونبتت ايديني بجوفة اريدن اخذ من عندة برودة اطفي بيها نار جسمي

من الصبح ما ماكلة حاجة
ابرة الأنسولين لازم اضربها الظهر وبالليل
واكيدن عگب كل الي صار وياي فول سكري من هيچ كضني الضعف

جسمي صار ينفض بتعب
راسي افتر
عيوني تحرگني
اذني تصوفر
ريگي جف
شفايفي يبست

الوعي صار ينسلب مني شوي شوي
حسيت الگاع تهتز جواية والتراب عصف بوجهي
غمضت عيوني بأستسلام وعگبها ماحسيت على شي بعد

غسق.. صار الفجر ومحد منهم طمنا
ويااذان الصبح طبوا كلهم سوة بس حنظل مو وياهم

سألتهم الحجية صار شي
رد حبيب لا تسألين ييمة لون چان صاير ما لگيتينة هساع جدامچ

باوعت الإسحاق صعد الغرفتنا
ظليت واگفة بالصالة
صافنة عليهم منهارين الكلمة ما تقبل تطلع منهم من ثگل الحمل الچانوا شايلي ساعتها

عشر دقايق گاموا يصلون
صعدت للغرفة هم حتى اشوف إسحاق وهم اصلي

فتحت الباب چان ساجد
وگفت يم الباب انتظرة طول بالسجدة خفت كلش

ما تحركت من مكاني
عيوني علي اريد اي حركة من عندة اطمن گلبي بيها
رفع روحة گبل تنفست براحة

چان منصي راسة
ركزت ويا وانصدمت صدمة عمري من شفت إسحاق يبچي ؟!!

ارتبكت كلش
الموقف هزني هز حرك شكو حب بداخلي الهذا البشر

احتاريت ويا نفسي شسوي هسه
اروح اخذة الحضني واضمة لو اتجاهل الموضوع لأن ادري بدمعة الرجال شگد غالية

تمشيت للچرباية گعدت
ظل ع السجادة يدعي باوعت للوقت الصلاة راح تفوتني

گمت ع السريع توضيت وطلعت
لگيت كاف السجادة وگاعد ع الطلبة يم الميز يسبح

اني هم وگفت صليت
أول ماخلصت صلاتي لفيت السجادة وشجعت نفسي حتى اروح احچي ويا

وگفت يمة ورفعت راسة بـ أطراف اصابيعي
- راح ترجع إسحاق

ريحان طيبة كلش
يعني مستحيل رب العالمين يتخلى عنها
خلي ثقتك برحمة الله الواسعة اكبر من همك وگول يا رب

- يا رب يا رب

اخذتة من ايدة للچرباية
گعدت بنصها وسحبتة الحضني
اول مرة إسحاق ميعارضني حط راسة على رجلي بلا اي نفس

مشيت أصابيعي بين خصلات شعرة وحچيت
- شسويتوا سولفلي

- گولي شني الما سوينا

- زين بالجامعة ما حصلتوا نتيجة

- انعل ابو الجامعات رب الفشل
الكاميرات حاطيهن للمنظر اليشتغلن معدودات اعلة عدد الأصابع

اروحن للأمن الـ بالباب
اسألهم بلكي شافوها يجاوبون شني احنة ما عدنة شغل وعمل بس نراقب بالرايح والجاي

يابة مو هذا شغلكم
لا موش شغلنا هم طلاب جامعة قابل طلاب مدرسة ونراقبهم

امشي للعمادة همينة ياكلون وحل براسي
هي الوضعية فالتة
وصلت بيهم يگولون شوفوا بتكم وين شردت وانتو عبالكم مخطوفة

خلني اخلص من هالمصيبة واتفرغ ليهم
كلمن ما يسوگة ضميرة نمشي بالعصا هالوادم مو مال عيني واغاتي بعد

- عززة بعينهم على هالصلافة
تدري من اختفت وظليت ادور عليها راحن البنات للأمن علمود يجون يساعدونا

هم حچوا نفس الكلام
شو وين طالعة قابل طفلة وتنخطف
عمي مو البنية متشوف
يگولون اي عادي واذا متشوف تطلع ويا اي احد مو فد مشكلة

عوفك منهم وحاچيني
شراح تسوي ويا بيت عمك ولويش ما خليت ابوية يطلع البغداد

- جمار اليوم يرد من السفر
همينة دزيت اعلي يجيني وهمينة جاي اسعى خاطر اقدم بلاغ بالمركز گبل الموعد

- إسحاق مرت عمك ونهلة وين

- ببغداد الهم اسبوع
وتأكدت من هالشي امس تالي الليل
صاحبي يعرفهم دزيتة اعلة بيت خالهم وشافهم هناك بعينة

- زين فهمني
اذا جمار مسافر وفاتن ونهلة ببغداد منو سوة هيچ

- ما اعرف غسق ما اعرف
احسن دماغي ماجاي يحمل الموقف وهالشي ما جاي يخليني افكر عدل

- الله يساعدك بس هدي نفسك

- شلون غسق فهميني
شني حال ريحان هساع وشني الي مسوي بيها هالما يخافون ربهم

- راح احچي شي بس مو تضوج

- شني گولي

- اني بيوم الحادث الما ينذكر
هم ظليت وحدي بمكان مهجور والدنيا باردة كلش

تصور طلعت اشوف اني وين
بنص الطريق ولحگني الچلاب ومو بس هيچ عثرت واني احاول اشرد منهم

ورغم كل هذا الله نجاني
رجعت للمكان وسديت على نفسي الباب للفجر يلا طلعت

ومن حاولت ارجع لأهلي حتى فلوس ما عندي
اكيد كل هالشي چان بي صالح الية
لأن لو عندي وراجعة چان حرگوني مثل بت عمي

مقصد كلامي
مثل ما رب العالمين وگف وياية
ونجاني من كل مصايب ذيچ الليلة راح يوگف ويا ريحان

راح يخلصها صدگني
ريحان اطيب من ان يتخلى عنها رب العالمين
مثل هيچ بشر دائماً ايد ربك ممدودة الهم بكل مكان وزمان

بس حچيتها گام من حضني
- وين رايح

- اشوفن شغلي
اجيت خاطر اصلي واردن امشي

دگ جهازة بهالأثناء
طلعة من جيبة مدري منو المتصل لأن ما گال اسمة

- ها خوية
هاي شني متأكد من هالحچي

چا شناطر اتحرك بالعجل
لا آنه راح اظلن هنا عندي اشغال مهمة اولها بالمركز واخرها ويا جمار

انطر اتصالك لا تنساني
هساع اتحرك وكت ما ظل الشغلة ما تتحمل تأجيل
الله وياك

سد الخط وشال سلاحة
راد يطلع طفرت من مكاني وسحبتة من ايدة حيل
 
باوعلي مصدوم
بدون تردد گتلة احبك واموت عليك
ظل صافن بوجهي رفعت روحي بستة من رگبتة اكثر من مرة

- دير بالك على نفسك حبيبي ترى ما عندي غيرك

هز راسة وطلع بدون ميجاوب
لبست حجابي ونزلت ورى لگيت الكل طالعين ماكو احد بالبيت بس النسوان

محد بيومها نام
ظلينا نلوب للصبح صارت العشرة وماكو خبر منهم

نص ساعة واجو كلهم حتى الشيخ
انفتحت الباب وچان ننصدم بجمار طب وياهم
إلياس مقيد ايدة ليورة وحنظل لازمة من رگبتة مثل السجين المعتقل

وصلوا للصالة دفعوا حيل ع القنفات
اشر الهم الشيخ يبتعدون وظل رايح جاي گدامة وهو يباوع علي بتوتر

- اي يجمار احچي لية الوين مشيتوا ببنيتي

- عمي والله ما ادري
اني چنت بالأمارات عندي شغل ويا شركاء ابوية الله يرحمة

اجاني اتصال من صديقي
ابن عمك سألني عنك ويريد يوصلك ضروري حاول تتصل بي 

اني عندي رقم إسحاق دگيت علي
وهذا هو گدامك اسألة اني مو اتصلت من رقم دولي لو لا

لو عندي شي مچان اجيت لهنا مباشرتاً
والله اني خايف عليها فوگ متتصورون واجيت حتى اساعدكم بلكت نلگاها قبل ليأذوها

بعدة ديحچي صاح ايوب يا الله
رد الشيخ تفضل بوية
طب شحالة حتى شعرة مكفش عبالك چان ديتعارك

وگف يم إسحاق ورجعوا يحققون ويا
اباوع على جمار من عصبيتة وخوفة الواضح بعيونة شكلة صدگ مالة علاقة بالموضوع

ظل يصيح والله مو اني
ادري ليش متصدگون شعندي واخطفها قابل عصابة

بس حچاها ركض ايوب ضربة بوجهه
- لكككك عااااااار
بعد كل شي عملتوا وياها ما نستبعد لون تذبحونها مثل الكببشششش جدام عيون الوادم

- ايوب هاي شبيك
اذا اهلي اذوها اني مستحيل اگدر اسويها حتى لو على حساب مصلحتي

الشيخ ضاري.. اتركة ضبع
السالفة اكبر من جمار السالفة وراها حقد وانتقام

حگ بنيتي آنه اعرف شلون اردنة
بس خلها ببالك يجمار
ما راح تمشي منا إلا لون شفت ريحان واگفة جدام عيوني تسمع لو لالة

- اني اصلاً مناوي اروح
شلون تردوني ارتاح وما اعرف ريحان وين وشگاعد يسوون بيها

ايوب.. سد حلگك سدة عاااااار

إسحاق.. ضبع امشي وياي محتاجك بشغلة

دفر جمار برجلة وطلع ويا إسحاق
ما اعرف وين راحوا اكثر من ساعة ونص وهم ماكو

الولد مخبوصين خبص
ناس تحقق ويا جمار وناس طابة طالعة
تشتغل ع الموضوع
وناس ما وگع الموبايل من ايدها ولا لحظة

بـ 11 ونص تقريباً اجو إسحاق وايوب
توهم طابين دگ جهازة اخذة وطلع للحديقة بالعشر دقايق يلا رجع

وگفوا على صفحة يحچون ويا الشيخ
ظليت اباوع عليهم بقلق احس الوقت ديفوت وهم ما گدروا يلزمون خيط يوصلهم الريحان

هاي مر يوم كامل على غيابهم
شگد بعد يلا يعثرون عليها ويا ترى شلون حالها هسه
معقولة الأنذال مسويلها شي لا سامح

عصرت دماغي بخوف
التفكير بالموضوع يرعبني بشكل
قبلها مريت بـ هالموقف
واعرف كلش زين حجم الضياع التحس بي البنية من تنخطف

الوضع كلما جالة يسوء
هناء المسكينة من الصدمة نامت بالفراش
والحجية ضغطها معلگ ميقبل ينزل گوة شمس تنزلة الها وماكو ساعة ويرجع يصعد من القهر

صافنة وافكر بقلق
انتبهت على صهيب ما هو بيناتهم
رحت سألت البنات محد من عدهن تعرف وين راح

خفت كلش
ليروح يسوي مشكلة ادري بي ميسيطر يلزم اعصابة

انطيت ود الأمل ورحت الإسحاق
بعدة ديحچي ويا ايوب والشيخ توني اريد اصيحة دگ جهازة

طلعة من جيبة مخبوص
باوع عليهم هذا رقم غريب صاح الشيخ رد وليدي رد

- الووو نعم
ريحان خوية وين انتِ
صبرچ لتبچين بس حاچيني وينچ خاطر اجي ليچ

ياهو جارچ
ناوليهم ناوليهم بالعجل
هلا خويي وين انتو ؟!! اي اي خلكم هناك جايكم مسافة الدرب

حچاها وسد الخط
- رايح بوية بس لا تسألني هساع اردن ويصير خير
ايوب امشي وياي

طفر ع الميز شال سلاحة وصاح الحنظل
طلعوا بسرعة الولد رادوا يلحگوهم منعهم الشيخ

الفرحة متنوصف
منعرف نبچي منعرف نضحك
خو اني من سمعتة گلها ريحان خوية وين انتِ گلبي راد يوگف بلحظتها

ريحان.. فزيت على گرصة برجلي
شاغت روحي عبن انگرصت بمكان الحرگ وما اعرف هالحيوان گرصتة سامة لو لا

الرؤيا صارت تتوضح اكثر
باوعت دايري مدايري صحراء ما بيها غير التربان

گمت اسحل بنفسي سحل
ما بية اتحرك والأصوات هنا مرعبة بشكل
من قوة الصوت حسيت حيوانات الدنيا كلها موجودة بـ هالمكان

مشيت بطريق مجهول
الدنيا ظلمة كلش والجو يموت برودتة تدگ بالعظم بمثل هيچي فجرية 

نهلة الحقيرة الله لا يوفقها
ساعة الي رجعت الملابس على جسمي
لبستني بس الفانيلة الداخلية وهالفانيلة خفيفة كلش لا تدفي ولا تستر

ظليت امشي وكل شوي اردن اوگع
وارد ادعي الربي ينطيني القوة لأجل اهلي عبن ادري يموتون لون صابني مكروه

ما اعرف الوين ماشية
وشكثر ما امشي يظل الگدامي فراغ
يمكن آنه جاي ادورن بذات المكان وموش دارية ولا حاسة على رويحتي

فركت عيني وعطت
ايدي محروگة ولچمتها بلاية وعي
هم موش يگولون وجع ينسي وجع آنه هنا وجع گلبي نساني كل اوجاع الدنيا

ركزت ع الدرب عدل
يلا ريحان امشي ورب العالمين وياچ
لون متي اعلة الأقل تموتين بشرف موش مثل چلاب الشوارع

بديت امشي وعيوني مغوشة
بالگوة اركز بالمكان
نوبة اتنوع للگاع ونوبة اردن نظري اعلة الدرب

كل شوي وصار حيوان گدامي
والحشرات تتطافر بين رجليني مثل الجراد
يمكن لون هالشي صار وياي بيوم عادي چان بالعجل غبت عن الوعي من الخوف

بعدني امشي سمعت صوت الچلاب يمي
درت وجهي وراية ديركضن بـ اتجاهي ظليت واگفة بس غمضت عيوني

- بسم الله الرحمن الرحيم
وجعلنا من بين ايدهم سداً ومن خلفهم سداً
فأغشيناهم فهم لا يبصرون

ظليت ارددها وگلبي يدگ بالعجل
شوي واختفى صوتهم فتحت اتنوع شفتهن مسويات حلقة ويفترن داير مدايري

ما اگدر اوصف رهبة الموقف
ظلن يحومن يمي نوبات يعون ونوبات يتنوعن لية

ما ادري شني الصار
فجأة عافني وركضن البعيد باوعت للسما وبچيت من گلبي

شكثر مرت علية مأسي
بس رب العالمين ما تركني الوحيدي
ما زال مستمر يقدم لية المعجزات رغم محاوطة الشر بية من كل اتجاه

رجعت امشي واردد الاية
وجعلنا من بين ايدهم سداً ومن خلفهم سداً فأغشيناهم فهم لا يبصرون

حتى ساعة ما عندي اشوفن بيها الوقت
جردوني من كل شي يا دوب بس ذبوا علية هدوم ما تستر من جسمي إلا شي بسيط

ظليت امشي بتعب
ما ادري الخوف نساني الأوجاع ما ادري معجزة رب العالمين هاي

تذكرت مريم العذراء سلام الله عليها
انتبذت من اهلها مكاناً شرقيا
ورغم چانت صحراء بس رب العالمين مد ليها رحمتة

اكيدن آنه ما اوصل الأظفرها
لكت ثقتي برحمة ربي كلش چبير بعد كل المعجزات الصارت وياي واولها نظري الرد لية بلاية سبب

وگفتي هاي على رجليناتي اكبر معجزة
غيري وحدة لا ماكلة ولا شاربة
وسكرها الله اليعلم شكثر وصل وتعذبت بأبشع انواع العذاب چان ماتت من زمان

مشيت ومشيت ومشيت
گلبي تعب وجسمي ما صاح الأاااخ
كل شوي يصير موقف شكل وياي ورحمة ربي تدفعة عني عبن عمري بالدنيا

ظلام الليل اختفى
ضوة الفجر طر اصوات الحيوانات هدأت
وآنه لساعني امشي

يعني لو اردن احسبها بالعقل
يمكن مشيت بالقليل تسع ساعات لون ما چان ازود من هالعدد بهواااي

صار الصبح والشمس ترست المكان
عيوني ساعة بعد ساعة يزيل الغواش عنها وتتوضح الرؤيا عندي

ما ادري الوين ماخذاتني
الصحراء كلش چبيرة عجز وخلص صبري وماخلصت مسافاتها البعيدة

هنا تعبت حيل
گعدت بالگاع ابچي طاقتي خلصتي يا الهي ما بية امشي ازود

اجة صوت بـ اذني يشبه صوت ابوي
گومي تحركي لا تظلين گاعدة شوية ويجيچ الفرج

ما اعرف شنو تفسيرة
يمكن احساس او يمكن يتهيألي هالصوت
گمت نفضت هدومي ورجعت امشي رغم رجليني من الوجع ما احسن بيها بعد

وهمينة مشيت هواي
ساعة او ساعتين ويمكن ازود
بس خطواتي چانت بطيئة كلش على گد الحيل الظل بية

هناك والمح شي من بعيد
رفعت ايدي احجب الشمس عن عيوني حتى اركز عدل

ما تنوعت زين
نظري لساعة ما رد كامل بس آنه متأكدة جاي المح حاجة بدربي

توسلت برب العالمين ومشيت
استعجلت بخطواتي على گد ما اگدر خاطر اوصل بالعجل

لمن گربت من المكان
شفت نار ودخان صاعدات ليفوگ يعني اكو شي جاي يحترگ

ركزت شوي
اكو زلم واگفين وبصفهم سيارة چبيرة يمكن مال زبل

عدلت ملابسي احاول استر بنفسي ولو شوي
بس للأسف كل شي ما يفيد
عبن ما چنت لابسة غير فانيلة خفيفة وستريج عودن بس الحجاب ساتر راسي

صح خفت لا يلوحني شي ابشع من الصار
بس ما عندي غير هالحل سميت بسم الله وتقدمت عليهم

چانوا ديحرگون بالزبل
گلت السلام عليكم گبل التفتوا علية بأستغراب ظلوا واحد يباوع للثاني

- خوية گلت السلام عليكم واحد منكم يرد

- وعليكم السلام
منو انتِ وشدتسوين بـ هالمكان

- احنة وين بالبصرة عفية جاوبوني

- لا خوية يابصرة
انتِ ع الحدود منو جابچ هنا مخطوفة لو شنو

- اي اي
عداوات ويا اهلي خطفوني وشمروني هنا

بس حچيتها واحد باوع للثاني
سمعتة شاور صديقة لك خاف هاي ارهابية ونتورط وياها

رجع باوعلي من فوگ ليجوة
سترت جسمي بـ ايديني وبچيت والله آنه مو چذابة ولا ارهابية

آنه من البصرة وبت شيوخ
ولون ساعدتوني ورديتوني لأهلي
شني التردونة يجرالكم من ابوي واخواني ومستعدة احلفلكم يمين عظيم خاطر تصدگوني

- شلون هسه نساعدها لو لا

- لا ولك لاااا
هسه تطلع عصابة يتاجرون بالأعضاء امشي امشي

دار وجهه جاي يروح
من حرگة گلبي كضيتة من ايدي حيل
والله وحگ رسول الله موش عصابچية آنه بت عالم وناس

هاكم شوفوا جسمي
رفعت البدي راويتهم اثار التعذيب حتى يصدگوني

ساعدوني واستروا علية
الله يستر على عرضكم دنيا واخرة ولا يراويكم بيهم مكروه

- اگولك كسرة خاطري
احنة ولد وهي بنية شتريد تسوي يعني
واذا حسيتها ملعبة وعدها شي كرك واحد على راسها تگعد وزن يم ابو لهب

- والله راح تورطنا بطيبتك هاي

- ولك مو اخاف نعوفها
وتطلع صدگ مخطوفة حرام تموت هنا منو يساعدها غيرنة

- يلا امشي والله يستر من هاليوم

اشرلي اصعدي
السيارة كلش عالية باوعت علي ما اگدر شلون اصعد

حط ايدة وشبكها گدامي
- اصعدي يلا

- لا استغفر الله

- خوية دصعدي مو وكت هالسوالف

دنگت راسي فشلانة
لزمت بالسيارة جاي اصعد اجيت اطيح لو ما الثاني كضني من ورى

والله على هالموقف الصرت بي
لو غيرهم ولد حرام چان اعتدوا علية
لا ملابس لا ستر لا صخاااام وفوگ كل هذا صاعدة على ايدين الأول ونايمة بحضن الثاني

اعتذرت منهم وعدلت روحي
بالگوة صعدوني گعدت ليورة بمكان عالي وهم گبالي

بالعادة آنه اخافن من الأماكن المرتفعة
بس الظاهر وبعد كل شي صار مات گلبي وما عاد اكو شي بالدنيا يهز ريحان

مشينا مسافة سمعت الولد گال
- خوية بس نوصل المدخل البصرة انطيچ موبايلي تتصلين على اهلچ

- اي عفية الله يوفقك

سكت ما گال شي
مدري وين موديني بحيث طالعين من البصرة

مسافة طويلة يلا دخلنا للمدينة
گبل اول ما عدينا المدخل ركنوا السيارة على كتر ونزلوا اثنيناتهم

- حافظة رقم واحد من اهلچ

- اي اي حافظة

- هاچ اتصلي

اخذتة منة ايدي ترجف
دگيت رقم إسحاق گبل جاوبني بس سمعت صوتة بچيت

سأل وين آنه ما گدرت اردن
انطيتة للولد گلة احنة بمدخل البصرة وسد الخط

ظلينا ننتظر بنفس المكان
خطية الولد كل شوي ويباوعون للساعة يمكن عدهم شغل

صافنة ع الدرب اعد الثواني
شفت سيارة إسحاق صارت گبالي ويا حنظل وايوب

بس نزل ركضت شمرت نفسي بحضنة
بچيت بچي ما باچيتة إلا بموت ابني گبل ايوب نزع سترتة عبن طويلة وذبها على جسمي

ظليت على هالحالة
ما اگدر اتحرك خطوة من مكاني
صار إسحاق يبوس بية نوبة بـ ايديني ونوبة براسي

- بسچ يبعد اخوچ
بسچ ينظر عيني بسچ هدي
ما اطلع ابن الشيخ ضاري لون ما رديت حگچ مربع من بين عيونهم

ايوب.. صعدوها للسيارة
آنه ماشي اتشكر من الزلم واردن ليكم

سحبني حنظل من حضن إسحاق
باس راسي ومسح دموعي بأطراف أصابيعة
اوعدنچ يريحان راح يبچون دم بدال كل دمعة نزلت من عيونچ

بس حچاها حضنتة اشهگ
ثواني واخذوني للسيارة من صعدنا سأل حنظل شني الصار ما گدرت اجاوبة من البچي

إسحاق گلة خلنة نوصل وترد اتركها هساع
حنظل چان گاعد بصفي
سحب راسي على صدرة وباس گصتي حيل

من سوة هالحركة انهاريت
ظليت بحضنة ابچي لحد ما غفيت على نفسي

صحيت على صوت إسحاق
باوعت احنة بالبيت ما صدگت عيوني
مد ايدينة لية هو وحنظل بذات الوكت كضيت بيهم ونزلت

گبل اهلي طلعوا
عفت كل شي وركضت الحضن ابوي
بالضبط مثل الجاهل ساعة الي يشوف ابو بعد سفر طويل

ما حچوا وياي اي شي
طببوني ما اشوفن دربي من الدموع
وصلت للصالة عيوني كلش مغوشة فركتها حيل هو آنه شفت جمار لو تسودنت

ركضت علي ناسية حتى نفسي
دفرتة حيل بكل قوتي وصرخت صرخة طالعة من اعماق گلبي

- الككككككك عييييييين وگاااااااعد هناااااااا

لكككك الله ينتقم منك
دمرررررررتني مووووووووووتني
سلبت مني الضحكة والعافية والراحة شني الرايدة مني بعددددد

- اهدي ريحان والله اني مالي علاقة بالموضوع

- لكككك انت السبب
من ساعة السودة الشفت بيها خلقتك الزفرررررة

ياريت بس يرد بية الزمن
چان تفلت اعليك بنفس الساعة الطلبت بيها ايديني وعفتك ومشيييت

الله ينتقم منك
بسبب نزواتك وقذارتك ودناءة نفسك آنه تدمرت

شني الغلط السويتة بحگگ
بشني علت وياك خاطر تغدر بية وتأذيني هيچي

آنه حتى ما اذيتك
لككك ما خليت شي ما عملتة وياي تاليها درت وجهي ومشيت بلاية ما احاسبك

خنتني بفراشي
فرغت قذارتك بالبت الرابية بحضنك وكبرانة اعلة ايدك وتعتبرها اخيتك الوحيدة

غربتوني
شردتوني
موتوا وليدي المتتتتت باليوم ألف مرة خاطر احملنة بحضني

كل هذا وگلت مو مهم
الله شاف بيك السوء وبعدك عني
تطلگت خاطر افتكن منك ومن قذارة اهلك بوكت واحد

بس ما تركتووووووني
يوميا جاييني يا انت يا صخلتك للجامعة لحد ما طفيتوا عيني بحقارتكم

اجيييت اموووتن للمرة الثانية
وعبن الله كاتبلي عمر عشت غصباً اعليك واعليهم

لكت انتو حالفين اعلة موتي
ما ترتاحون إلا تسلبون روحي من جسمي وتفجعون اهلي بية

لكككك دمررروني
لكككك علموا بية الما يرضى حتى الكاااااافرررررر

الله ينتقم منكم
يااااا انذااااااااااااال
يااااا عااااااااااااااااارت
يااااا اااسقط وارذل خلق الله

حچيتها ودفرتة حيل
طبلة الميز شلتها وشمرتها علي حيل
المخاد المزهرية الحذاء لو بيديني اكتلة وما يرتاح گلبي

كل هذا وهو يتفرج ساكت
ما احس إلا ابوي سحبني الحضنة يهدي بية

درت وجهي اعليهم
اردن اشكيلهم الصار وياي خاطر ارتاح
باوعت للباب فاتحة عيوني اخوي وحزام ظهري صهيب
طب للصالة وكاض بـ ايدينة نهلة ومرت عمي مثل الخرفان منا ومنا.... 

يتبع

لتنسوون ⭐⭐⭐⭐⭐⭐
كل الحب ♥🥀