رواية وضاقت الأرض بي الفصل السادس والثمانون 86 - بقلم لبنى الموسوي

قبل گالت اصعدي آخذ لك، أكيد هسه يبين. صعدت أتشاهد مو أدعي. غمضت عيني وبدت تاخذ لي شوية وصاحت: عززززة بعينچ شمس! لچ حامل بـ 3 يبووووو. ثلاثة شنو يمعودة؟ مثل ما گت لك وبعد لك أسبوع وتقبطين الشهر الثالث. شلون يعني؟ شنو شلون؟ مو گلتِ مرة تقرب لك من عرس حماتك؟ أي. وجع! بعد شكو؟ هاي حماتك راح يصير لها 3 أشهر متزوجة. قمت من مكاني مضروبة طلقة مو مصدومة. بدون ما أجاوبها طلعت من الغرفة.

ماكو أي كلام يوصف الحالة اللي كنت بيها بهاللحظات. شلون صار هالشي؟ أي صح، عندنا وراثة قوية بالتوأم من الطرفين بس لا مو هيچ، أبد مو هيچ يا ربي. صاروا أربعة كافي. هو أنا گوة مدبرة روحي وياهم يجوني ثلاثة بعد؟ يعني شنو؟ يصيرون سبعة وأنا وأبوهم واصلين للانفصال؟ بالگوة خلصت دوامي. رجعت للبيت واصلة مرحلة من اليأس مو طبيعية. طبيت خالتي مخبوصة بأطفالي. لو فعلاً جبت ثلاثة بعد معناها مو بس دوامي لا حتى حياتي أنساها. تلقتني:

الله يساعدچ. هزيت براسي بلا جواب ورحت لغرفتي. حتى ما لي عين أفتح الموضوع وياها وهي اللي ما خلت شي ما سوته حتى تقنعني أرجع لصخر. من التعب ردت أشرد بالنوم. توني غفيت اندقت الباب، فزيت، دخل صخر. كنت أدري بيه راح يجي اليوم لذلك ما خابرته، نحكي وجه لوجه أحسن. گعد يمي، قمت سديت الباب ورجعت. شلونچ؟ مو زينة صخر، مووو زينة. خيرچ بوية؟ اليوم عرفت بنفسي حامل، مبرووووك. بس حكيتها ابتسم. على شنو تبتسم هاااا؟ على شنوووو؟

ليش سويت هالشكل؟ أكثر من مررررة منعتك لأن أدري بحظي شگد مصخم وأنت ولاااااا يمممممممك. اضحك بعد اضحك. عبالك بس أنا أتبهذل؟ لا والله أنت تتبهذل أكثر مني. تدري ليش؟ لأن حامل بثلاثة هالمرة، يعني صاروا سبعة برقبتك يا السبع. فجأة تحولت الابتسامة لصدمة. ضحكت عليه. درت وجهي أحاول ألزم أعصابي، أجا صار گبالي: صبر صبر، شني ثلاثة؟ مثل ما سمعت. همينة توأم؟ إييي توأم تووووم، أنت تتونس براسي وأنا اللي أبتلي. فهمني ليش سويتها عناد؟

گلت لك لا يصير حمل، حاكيتني بحيل صدر: لا ما يصير لأن ما تجيك الشهرية. لاااااا والله أخاف ما تقبل. منو قنعك بهالشي؟ أمك لو عمتك؟ ولو لاااااا. أنت أصلاً تعمدت تحبلني في سبيل أرجع لك. بس تحلم صخر، والله تحلم لأن حتى لو صاروا عشرة مو سبعة هم ما أرجع. اشتغلت سوادينچ. طلقني عاد. شلون تاليها وياچ؟ تراك جزعتيني. وأنا زهقت أكثر منك ومليت والله مليييت، هذا مو وضع، إلى متى تظل حياتي هيچ؟ شنو ماخذني مكينة؟

بس أخلف وأرجع لورا، وإحنا حتى حياة مثل العالم والناس ما قاعد نقدر نعيشها. من إيدينچ. إييي صحيح، إيييي. مو أنا اللي تزوجت عليك وأنا اللي رحت طگعت رقبة الرجال بنص الليل ورجعت لك قلت آسفة بدون وعي. بس حكيتها ضربني على حلگي. تخبلت. دفعته حيل، لزم إيدي قيدها لورا ودار ظهري عليه. بسچ عاد، لا تختبرين صبري وياچ شمس. صخر روح رووووح. ماشي بلا ما تقولين، بس أحذرك تأذين اللي ببطنك، عاد ساعتها ما يصير خير تسمعييين.

حكاها وطلع رگع الباب وراه. گعدت أبكي. هم رجعت للحالة النفسية اللي عشتها بحملي الأول، يا ربي شلون سالفة هاي. نص ساعة وهدأت شوية. مديت راسي. بعده قاعد بالصالة يحكي ويا خالتي وأطفالنا بحضنه. استسلمت للواقع. صحيح انفرض علي وصحيح راح أتبهذل. بس بالأخير يظل رزق رب العالمين وما أقدر أعترض عليه. اعتراضي بس على صخر. لأن أنا متأكدة كان متقصد يخليني أحمل. بس شنو النتيجة؟

هو نفسه انصدم لأن ما كان متوقع يصيرون توأم مرة ثانية وعلى التوالي. صبت خالتي الغدة صاحتني ما رحت. أجت للغرفة. توسلت بي حتى أقوم. قلت لها نعسانة، من أقعد أكل. توها طالعة طبت جوهرة تزحف، قبل قمت شلتها أبوس بيها. ظلت يمي تلعب. للعصر يلا راح صخر، كنت أنوم بجوهرة أجت خالتي. مبين حاكي لها. لو يمكن سمعتنا من كنا نتعارك لأن اثنيننا صوتنا كان عالي كلش. ها خالة، شبيك صافنة بوجهي؟ أي حامل.

وبتوم ثلاثي هم، شلون وليش ما تسألين لأن أنا نفسي ما أدري، كله من ذاك اللي كان قاعد يمك. رزق ربك، حرام هالحكي. ونعم بالله، بس رب العالمين ما يرضى باللي سواه صخر. وأنتِ عقلك وين كان ساعتها؟ مو براسي، ليش هو يخلي عندي عقل بسوالفه الـ... أسكت أحسن. شوكت هالحكي صار؟ بعرس ريحان بس أخذ مني حيف السنتين وتقصد يسوي هيچ، والله تقصد. ترى هو هم شايل همك. أي أكيد يشيل همي لأن ما كان متصور أرجع أحبل بتوأم. باوعت لها وسكتت.

دنگت راسي صافنة على جوهرة. رجعت سألتها: شلون خالة مو حبلت مرة بتوأم ليش تكررت الحالة؟ وراثة قوية يمه. أنا عندي توأم، بيبيتك ببطنين توأم. عمك هم عنده توأم وجدك هو أصلاً شقاية توأم وحتى صخر هو توأم ويا أخوه، شلون ما يصير بعد. لعد من كنت أطرحهم كله واحد. هم عايزة تطرحين توأم؟ غير ربك رحم بحالك، هو بس واحد وكنتِ تشبعين قهر عليه. لا هو حظي. حتى العالم من يصير لهم توأم بس اثنين. إلا أنا حظي يشتغل بالجملة.

أربعة وثلاثة بعد، عوزي بس ستة حتى تكمل السبحة وياي. قولي ما شاء الله الحمد لله. مو قبل كنتِ تتحسرين على ريحة الطفل لو نسيتِ؟ الحمد لله والشكر. بقينا نحكي شوية وعافتني أنام. أسبوعين مرّن. صخر ظل يجي علمود الأطفال، يبات ليلة ويروح بدون ما يحكي وياي. وهيچ أحسن لأن كلما نحكي نتعارك بحيث من يمي تعبت. بهي الفترة المسؤولية والتعب زاد عليّ. منا دوامي منا الحمل منا أطفالي متعبين بشكل.

وصلت مرحلة من أنام بالليل أبكي من وجع ظهري وجسمي حتى بحملي الأول ما عانيت هيچ. اليوم راجعة من الدوام ميتة تعب. بس بوست أطفالي ورحت للغرفة بدلت وتمددت، ما أريد غير بس أنام حتى أخلص من هالوَجَع. توها شكلت عيني حسيت بشي غريب. قمت مرعوبة. يا ربي شنو السالفة؟ معقولة راح أطرح؟ أي والله صح لأن مو مجرد وجع، اكو شي قاعد ينزل عليّ. قمت للحمام لقيت نفسي أنزف. رجع الخوف بيّ. مثل أول مرة من طرحت بحيث صرت أبكي ولا كأن عندي أربعة.

قلت لخالتي قبل اتصلت على صخر. طلب منها تاخذني للدكتورة بين ما يوصل لأن يتأخر بالطريق. النزف كان كلش قوي. قالت: ما أتصور يبقون لأن نبضهم ضعيف. ممكن لليل يتوقف. لذلك خليكِ مستعدة لأي شي راح تتعرضين له، أطفالك كبار وصعب ينزلون بدون تدخلنا. لليل وأنا على هالحالة. كل شوية يزيد النزف ويجون يفحصوني. أجا صخر بقى برا. ظلت خالتي رايحة جاية خطية محتارة بيني وبينه وبين أطفالي اللي بقوا يم بنتها. للعشرة ونص توقف نبضهم.

شما أقول شفت الموت يلا نزلوا هم قليل. الموت كان أرحم بألف مرة من العذاب اللي عشته بمثل هاللحظات الصعبة. طلعت من المستشفى كارهة حتى روحي. أجا صخر. راد يبوس راسي دفعته حيل. قبل خالتي أشرت له يعني اتركها لأن شافت شصار بي جوة. وصلنا للبيت قبل رحت لغرفتي. تمددت بالگوة. أحس الوجع يدق بقلبي مو بس راسي. شوية وجابت لي خالتي الجهال بوستهم وبكيت، رادت تاخذهم مني ما قبلت. ظلوا يمي لحد ما ناموا يلا شالتهم.

أنا هم من التعب قبل نمت، ما أدري شنو الحكمة من الشي اللي صار بس الحمد لله على كل حال. علاقتي بصخر بعد الشي اللي صار تأزمت كلش. أخاف قبل كنت أقعد وأضحك وياه. هسه لا كل شي اختلف. صرت بس يجي أطب لغرفتي وأقفل الباب حتى ما أراوي وجهي إلا للضرورة. غسق: صخر ما حكى شي عن حمل شمس. منها عرفت. وبگد ما شلت همها لأن عندها أربعة. بگد ما انقهرت عليها من عرفت بيها خسرت حملها. اليوم قاعدة العصر ويا هناء نسوي كليچة. طبت الحجية. صاحت:

ثناء قالت عاوني غسق أريد هناء برأس چلمة بيناتنا يمه. قبل باوعت لي خايفة. أدري نفس الخطر على بالي خطر على بالها. ولا هي أكثر مني. لأن الوجع بيها قبل لا يكون بيّ وكانت وراح تظل دوم خايفة من يوم خسارتها لصهيب. هناء: غسلت إيدي ورحت للصالة. ما لقيتها. سألت عمة صبيحة قالت تلقيها بحجرتها. رحت دكيت الباب صاحت تفضل. ها عمة خير؟ تعالي اجلسي يمه، الحكي هواي. قعدت يمها أباوع بقلق. بلا ما أتعب رويحتي تعرفين شني الرايدته منچ.

أي أعرف. أنا نطرتك تطيبين وما قصرت وياكِ بنيتي. وهاي أنتِ الحمد لله تعافيتي وصرتي وردة مفتحة. زلمتك ما يصح يظل بلا فروخ. وأنتِ تعرفين بصهيب. زلمة معدل يعني ما راح تنضامين ويا عقب زواجه. حرمة ما تاكل حرمة يوم. وأنا أدري بكِ بنية مرباية وبت حمولة. يعني مثل ما صبرتِ على المرض وتجاوزتِ. راح تصبرين على الأهون منه وتتجاوزيه وأنتِ يمنا. وبذات الوكت ما ترضيها صهيب يظل بلا فروخ. مثل ما وگف لكِ بمرضتكِ.

أنتِ واجب توقفين ويا خاطر يصير أبو. وبالنهاية فروخه فروخكِ يعني همَّ لكِ قبل لا يكونون لي موش صح؟ هزيت براسي أي. ظلت تحكي بالساعة كلمة أسمعها وعشرة لا. بس خلصت ركضت لغرفتي. أول ما دخلت شمرت نفسي عالجرباية وبكيت لحد ما قلبي طق وعيوني ورمت. بعده الضعف بجسمي من أقل شي أتخربط. حسيت بروحي ما بيّ أقوم. حضنت نفسي بإيدي وسحبت الغطا عليّ. طبت أمي قالت نايمة شعجب؟ ما رديت لأن صوتي مخنوگ. أجت قعدت بصفي. ظليت مغمضة حطت

إيدها على گصتي قبل صاحت: شني هاي الحرارة؟ ولچ شمالكِ أحكي. ما جاوبتها قبل سحبت راسي. فتحت عيوني وحضنتها أبكي، بالبداية ما حكت شي. من شافتني ارتاحيت أصرت تعرف شبيه. سولفت لها كل شي صار. رادت تقوم لزمت إيدها: لا يمه لا، الله يخليكِ. لااا تتعاركين وياها حقها هذا والله حقها وأنتِ تدرين الحق ما ينزعل منه. حق أي حق ما قلت شي. لكت الدنيا ما طارت، ما جاي تتنوع ليچ شكثر تعبانة. يعني ما بيها تنطر سنتين بعد؟

ما مش رحمة بقلبها لو عاد أنتِ بت نجمة جاي تتفنن بأذيتكِ خاطر تأذيني بيكِ. لا أكيدن مو هيچ. لا هيچي يا هنو، هيچي. لا تعلميني ببنية عمي وأنا أكثر بشر بالدنيا يعرفها. تعاي وين ماشية؟ رادة لداري وأنتِ حرة، تريدين تظلين هنا وتتحملين كل اللي راح يصير بيكِ ظلي. ما تريدين؟ حضن أُميمتكِ مفتوح، قبل دارها. ما جبتكِ من العقد. نازلة أنتِ من قلبي واللي يوجعكِ يوجعني وأزود همينة، يعني الجاي يصير ما أطيق أتحمله يا بنيتي.

عفية لا تعوفيني وتمشين. أولها وتاليها أنا ماشية، ما أقدر أظل هنا كل العمر. أي ما يخالف بس مو هسه حبابة. لا تلجين يمه. حكتها وطلعت من الغرفة. رحت وراها ظليت أتوسل وأبكي ما فاد بيها أي شي. أخذت أغراضها وراحت للصالة. سلمت عليهم عمة صبيحة عرفت صاير شي أخذتها وراحت للمضيف. ربع ساعة وطلعن. عبالي راح تقنعها بس للأسف سلمت علينا وراحت. انتبهت لعمة. أخذت الحجية وراحت للمضيف. أنا هم رجعت لغرفتي ما بيّ أحكي ويا أي بشر هنا.

للتسعة طب صهيب. غيّر ملابسه وقومني بالغصب حتى أتعشى وياهم. قعدنا ع السفرة ناكل. شوي وعمي الشيخ صاح: جا وين نجمة ما تجي تاكل؟ هناء: مشت عمي. الشيخ ضاري: شني يعني مشت؟ واليمتى مشت؟ لبيتها قبل شوي. قالت أنتِ وصرتي زينة شعندي ظالة هنا بعد. باوع للحجية وسكت. من خلصنا صهيب هم ظل يسألني عليش راحت وأنا ما عندي غير هالجواب لأن ما لي خلق المشاكل. بس خلصت شغل المطبخ رحت لغرفتي. قبل نمت ما انتظرت صهيب.

ما أريد أفكر بشي بعد لأن صدق تعبت. ما لي طاقة أتحمل أكثر من اللي تحملته بالسنتين الراحن. قعدت الصبح على صوت المنبه. قمت ويا البنات. جهزنا الريوگ بعدهم الزلم ياكلون طب الشيخ عصبي. إسحاق: خيرك بوية؟ الشيخ ضاري: عمتك نجمة ما جاي تفتح الباب، امشوا وياي خاطر نشوف شني الصابها. بس حچاها كلهم طفروا. ظليت الوب بمكاني، اريد اعرف شنو صار وياهم، محد اجة طمنة. شوي واتصل حنظل على ثناء. عرفت منها امي ضاربتها جلطة.

ومو جديدة، دومها هي هيچ. وتالي الله يلطف بحالي، عبن يدري ما عندي غيرها بهالدنيا، واذا صابها شي اموتن. بس هالمرة غير. امي ظلت اكثر من أسبوع بالمستشفى. حالتها چانت كلش خطرة. الدرجة الدكاترة گالوا ما نتوقع تعيش اكثر من هيچ. عمي الشيخ ظل يم خوالي بالمستشفى. يجي يا دوب يسبح ويبدل ويرد الها، واكيد صهيب وياهم ما عافهم ولا لحظة. غسق: الخوف العشتة بمرض خالة نجمة مينوصف. نفس خوف خسارتي لأمي.

وشلون لا وهي صارتلي أم بالوقت الي بي كل الناس تخلوا عني وأولهم اهلي. أسبوع مر وهي بالمستشفى. عمة صبيحة خطية تخبلت عليها، اشوفها تروح ترجع تحچي ع الحجية، بس ليش ما اعرف لأن ابد متوضح كلامها. بعدها گالوا يحتاجلها عملية. هنا صارت مشكلة شكبرها بين عمة صبيحة والحجية. وصلت بيها لمت ملابسها ورادت تروح. ركضت للغرفة وراها احاول امنعها لأن لو عرف الشيخ بالموضوع أول وحدة راح تتأذة الحجية. -عمة وين؟ خطية ابوية لتزوديها علي.

-خليني امشي غسق. -الله عليچ لا تسوين هيچ، والله البيهم كافيهم، وانتِ هم ما عندچ غيرهم، وين ترحين؟ -أرض الله وسيعة لا تخافين. -هسه غير اعرف شبيكم، ليش هالمشاكل؟ ما تعودت اشوفكم هيچ. -ولا آنه الأحبن الطلايب. بس تنوعي الوين وصلتنة بسبب حقدها، فوگ شينها العين گوية عليش ما اعرف. -منو؟ امي؟ -اي چا ياهي غيرها. سحبت الجنطة من ايدها وسديت الباب. -اگعدي خلي نحچي. -اتنحي غسق. -ما اوخر ولا راح اخليچ تطلعين.

غير لو صدگ سويتيها الشيخ وإسحاق يگلبون البيت عزة على روسنا. بالگوة قنعتها تگعد. -شبيچ عمة، هذا كلة لأن امي تريد تزوج صهيب؟ -يا ريت بس اعلة هاي ياااا ريت. چان هينة يغسق. بس آنه ونجمة نعرف اعلة شني هيلة جاي تدگ، وهذا ما يصرف لا لية ولا ليها. -شلون يعني فهميني مدافهم والله. -ما اگدر احچي. ضميري ماااااا يسمحلي انطي بحرمة اخوي وأم ولدة، صعبة يمة صعببببة. بس كل الأگدر اگولنة هي السبب بكل شي صار. بزمناتها چتلت نجمة.

وما اكتفت لاااا، اجت هساع تكمل اعليها فوگ عمايلها السودة. -ليش شنو علاقة خالة بأمي، هن مو بنات عم؟!! باوعتلي وسكتت. دارت وجها تنفض بالمخدة، رجعت باوعتلي. لاااااا راح احچي عبن گليبي اهيسنة راح يوگف من الحرگة. -أسم الله عليچ عمة، لتحچين هيچ. -تنوعي يمة. هيلة هي بت عمي الچبيرة ونجمة بت اصغر عمامي. ابو هيلة الشيخة چانت بـ ايدينة. بكثر ماهو أنسان عادل بكثر ما چان حازم يخاف منة الچبير گبل الجاهل. نرد النجمة، ااااخ ي نجمة.

هاي عشگ الشيخ ضاري وفزة گليبة ووجعة. حباها من الصغر. وهي بعد حبتة، حبتة حيل كلش. وكل عشيرتنا چانت شاهدة اعلة حبهم الطاهر والنقي. عمي ابو هيلة يموتن اعلة ضاري. يحبنة ازود من ولدة وچان يتمنى الوحدة من بنياتة. وعبن هيلة تعرف استغلت هالشي الصالحها خاطر تحصل ضاري عبنها تحبة هي همينة مثل حب نجمة. ما اگدر اگلنلچ شني العملتة. بس كل الأگدر احچي لعبت هي وامها لعبة قذرة، منها گدرت تطيح ضاري بطلابة لا تنحچى ولا تنگال.

وخاطر يحلون الطلابة وزن براس عمي. گوم انت بالمجلس. وانطي نجمة الزلمتها الله يرحمه وجدام كل الوادم. اخوانها اعترضوا. عليش تنطي اختنة وانت عندك بنيات وضاري همينة عندة خوات هذا موش عدل. گوم يعمي وسكتهم بالفلوس. باوعوا اختهم مقابل چم فلس ينداسن جوة الحذاء. هنا نجمة انتفضت. صاحت لونكم بعتوني وسكتوا، آنه ما ابيعن رويحتي والموت اهون عندي من زواجي بهالشكل. الطلابة كبرت كلش.

وصلت بيها للدم، وضاري راح بالرجلين بسبب عملتهن هالميخافن الله، وظلة يتفرج ما يگدر يتصرف شي. مشى عمي ابو هيلة النجمة. گعد يقنع بيها ضاري يموت وضاري ينسجن. وضاري هيچ وضاري هيچ. وما اظنن انتِ ترضيها اعلي عگب كل السمعتي مني. اوعدنچ لون ترضين اطلعنة من هـ الطلابة. وموش بس هيچي. لا الشيخة همينة لي من عگب عيني. بس تنازلي لون موش الاجلي فلاجل ضاري ابن عمچ. طيحوها بين نارين. يا رويحتها يا الزلمة الحبتة كل عمرها.

واكيدن نجمة اكبر من الأنانية من هيچ فضلت ضاري اعلة نفسها ووافقت. بهاي المدة ضاري چان مسجون. بمجرد ما قبلت طلع من السجن وانحلت السالفة. بس هو من عرف تسودن. راح لزلمتها وگالة ما تريدك ولونك زلمة لا تاخذها من غيرك. هواي سعى خاطر يخربها ما گدر. ظل يصيح نشدوها. بس محد من عدهم سمع حچايتة والـ براسهم مشوا غصباً اعلة الكل. راح ليها بليلة ظلمة. بلاية علم اهلها شافتة ظل يتوسل، گالتلة انت يضاري وسمعتك وحياتك اهم عندي من نجمة.

انساني وعيش الرويحتك. بس لا تظن بفرد يوم آنه تنازلت عنك. لا ابد آنه تنازلت عن نجمة الك وبين هاي وهاي فرق شاسع يبن عمي. وهيچ تزوجت نجمة. بس ما طاقت تعيش هنا عگب كل شي صار. راد زلمتها ياخذها البغداد عبنة مناك بس هي رفضت. گالت بغداد مداسهم. وآنه ما اريدن مچان يجمعني بيهم. لا ببيت عمي ولا بأخوتي، اخذني البعيد اردن اعيشن براحة. واخذها ومشوا للحلة. انگطعت اخبارها وصارت گطيعة بينها وبينة.

حتى اهلها هجرتهم عمر لا سنة ولا سنتين خاطر بس تفتك منهم عگب ما دمروها هي وضاري. سنة وزوج عمي هيلة الضاري. عگبها أمر الشيخة تصير لي من بعد عينة. وهيچ ظل راس ضاري مرفوع بين الوادم بفضل الله ثم تضحيات نجمة. ما اكتشف چذبهم إلا من مات عمي. واكيدن ما يگدر يخرب حياتة وكل هالفروخ برگبتة. من هيچ مشاها. بس ظلة ما مرتاح طول ما نجمة مختفية عن عينة. وين سنين وسنين يلا عرفنا مچانها بالحلة. مشى اخوي الشيخ.

نشد اعليها واعلة حياتها هناك، ولمن عرف بيها عايشة ومرتاحة يلا گدر يهيد ويستقر. حاول يساعد زلمتها عبنة فقير كلش. بس لا هو رضا ولا نجمة. اخر شي ساعدة من بعيد، دبر لي شغل بس لليوم ما تعرف نجمة هو ورى هالسالفة. هاي هي قصتهم. وهاي نجمة بعين الشيخ ضاري. نجمة الي ضحت بحياتها لأجل حب حياتها وخسرت كل شي خاطر يربح هو كل شي. چانتلة واقع يسعى التحقيقة. وصارتلة حلم بعييييييد يموت وما يمر طيفة بيوم. هاي يغسق نجمتة الما گدر يلوحها.

لكتها ورغم بعد المسافات ما انطفت وظلت ساطعة خاطر تنور سما جبروت الشيخ وقوته وكل هيبته منها هي وبس. عبنها چانت ولا زالت وراح تظلها المصدر الأول والأخير لأسم شيخ ضاري واساس متين لمچانته بين الوادم. -اسمعلها واني مصدومة. عمري متصورت الشيخ يحب خالة نجمة. صح انتبهت هو يعزها ويريد خاطرها بس گلت يجوز لأن بت عمة مو اكثر من هالشي. ظليت لليل افكر بالموضوع. ما قبلت تحچيلي شمسوية الحجية.

لأن متريد تنطي بيها گدامي حتى لو چانت غلطانة. بس كلش انقهرت على خالة نجمة. رحت الهناء. سألتها ونفس جواب عمة هي هم متعرف شنو صاير لأن أمها ما حاچيتلها أي شي. اسبوع وسوت العملية. الحمد لله عدت على خير وگامت بالسلامة. گاعدين بالصالة. طلع صهيب من غرفتة العصر مبدل ويريد يروح الها. -يابة عندي سالفة وياك. -خير. -اريدن اعزل آنه وحرمتي لون حضرتك ما تمانع. الحجية هيلة: تعزل شني؟!! -مثل ما سمعتي.

اعزل وما اريدن أي ادمي يتدخل بحياتي من اليوم ورايح. الشيخ ضاري: البيوت هواي يوليدي. اختار واحد وشيل. لكت حاول تقنع عمتك نجمة خاطر تعيش وياكم مو مال تظلها وحدها عگب الي صار. -بلاية ما تگول فكرت بهالشي. -چا يلا نمشي. حچاها وذب گلاص الجاي. شال العباية شمرها على چتفة وطلع، ركضت الهناء. عبالي تعرف طلعت مصدومة مثلي. بس رغم هذا فرحت علمود أمها لأن چانت شايلة هم شلون تظل وحدها. وفعلاً سواها صهيب.

بس طلعت عمة من المستشفى جهز بيتة أسبوع مو اكثر وشالوا. أول أيام كلش ضجنا على هناء بس بعدين تعودنا. هي هم ارتاحت. امها يمها وخلصت من كلام الحجية. بس ظل الخوف ملازمها. لأن تدري ما راح تظل ساكتة كلها فترة وترجع لنفس الموضوع. ريحان. أربع شهور مرت على زواجي من أيوب. رغم مشاكل بيت أهلي، لكن الحمد لله چنت حيل مرتاحة بحياتي، رغم إني خلصتها بس أفكر بيهم. عگب عملية عمة نجمة ارتحت. هي قامت بالسلامة، و صهيب عزل لوحده.

يعني نگدر نگول: انسدت هالسالفة و افتكينا منها إن شاء الله، بس كون أمي تسكت عنهم. بالليل واقفة أسوي بالعشا، سمعت الباب انفتح. ظليت بمكاني. تأخر أيوب ما طب للمطبخ. صحت: "هاي وين صرت؟ رد: "فوق رويحتي جاي أبدّل." كملت العشا و صحتله. نزل باسني و گعد ياكل، بس خلص صعد. ظل بالي وياه. شماله اليوم؟ أحسه صاير شيء و ما جاي يحچيلي، عيبن موش عادته يظل بالحجرة. لملمت المطبخ و صعدت. فتحت باب الغرفة ظلمة. "يا شني نمت أيوب؟!

شعلت الضو و چان أنصدم. كيك و نفاخ و حلويات، ما استوعبت اللي شفته گدامي. أجه باتجاهي، سد الباب و سحبني للميز. "كل عام و أنتِ رويحتي. كل عام و أنتِ شمعة داري، أطفى و ما تطفى إن شاء الله." باوعتله مصدومة. أي والله اليوم عيد ميلادي، بس آنه أبد ما أهتم لهاي السوالف، من هيچ ما خطر على بالي هالشي. "ها صافنة؟ "شكرًا حبيبي، فاجأتني والله." "و هساع صار الوقت خاطر تعرفين من اليمتة و آنه أحبنچ."

"ياااااا من هيچ گلت أحچيلچ عگب أربع شهور؟ "عفية عليچ." "شوقتني، أحچي حباب." "نحتفل أول." "و لو الفضول راح يموتني، بس ميخالف لعيونك." "ههههههه اسم الله عليچ بوية." حچاها و باس شفتي سريع. شغل الشموع و رجع عايدني، عگبها گال غمضي خاطر تتمنين شي. باوعتله مبتسمة. "ما أغمض و لا أتمنى، عيبن ما مش شي يسوى أتمنى عگب ما حصلت عليك أيوب." "ما يهم تمني غيره، الحياة تراها طويلة." "امممم جاهل منك مثلًا؟

"اااااااخ بوية، گليبي راح يوگف من جمالچ و علي." "هههههههه اسم الله عليك حبيبي." باس خدي و انطاني السچينة. "يلا بسم الله." "ما أدري عليش ما مرتاحتلك." "هو آنه موش راحة، توچ يلا عرفتي بوية." ضحكت و نزلت أقطعها. حركها شوي و گال: "منا رويحتي منا." قطعت، حطيتها بالماعون، طاح منها شي، من الصوت عرفت. التفتت باوعت، هذا محبس مال خطوبة. باوعت عليه و رديت باوعت للكيكة، بيها مثل القصاص. سحبتها أقرأ:

"حضني بدونچ بارد و ما بي روح، ترضين تمليه؟ ترضين تصيرين لية بستان، خاطر أملي ليچ بالفراشات اللي دموعچ الحلوة نزلت عليهن؟ تتزوجيني ريحانتي؟! باوعتله و ضحكت. "حبيبي غير تزوجنا و شبعت بيه، بس همينة شكرًا." "هاي موش هساع." "شني؟! "هاي الكتابة موش هساع ريحان، هاي قديمة كلش." "شلون يعني قديمة؟! "تذكري عدل." "شني أتذكر أيوب؟ سطرتني، أحچي عاد." "همينة بفرد يوم سويت ليچ عيد ميلاد آنه." "أنت لا، بس فاطمة الله يرحمها."

"أي شني صار بيومها؟ تذكرين لو آنه أذكرنچ؟ "لا أذكر. هذا الحچي بالخامس إعدادي، دزت علي العصر و چانت مسوية لي مفاجأة. كلش فرحت بيومها، بس شني ما رضيت آكل الكيك عيبن سكري چان كلش صاعد." "و ما رضيتي حتى تفتحينها. و گبلها فاطمة سألتچ شني رأيچ بأيوب؟ گلتي ليها: لا تحچين حچي زايد، هذا مثل أخوي حالة من حال إسحاق." "عزززة يعني أنت چنت تسمع؟

"أي، و چنت حاط هالورقة و المحبس بالكيكة، خاطر أطلب إيدينچ بهاي الطريقة. عودن عگبها أمشي و أخطبنچ من أبوي، أكيدن لازم أضمن موافقتچ بالأول، بس أنتِ خربتي الأول و التالي." "يعني حچايتي هاي هي اللي منعتك؟ "حچايتچ و رفضچ للكيكة و هواي أمور غيرها." "مثل شنو؟ "مرضت أمي عگب شهر، و من سويت ليها العملية ذبيت كل فلوسي المجمعهن خاطر أطلبنچ بيهن." "من اليمتة و أنت تحبني؟

"حبچ مالة زمن ريحان، حبچ انزرع بيه من نولدتي. ما تنوعت لغيرچ. من أنتِ و جاهل عيني عليچ بخوف أبو، و لمن كبرتي تحولت نظرتي لحب و عشگ." "أول ما وعيتي صحتي ليه عمو، تالي كبرتي، عودن ردت أخليچ تجوزين منها تحولت عمو لخوية." "هههههه. والله و لا حسيت، كل ظني أنت هم تشوفني أختك. و تريد الصدگ حبيبي، لو جاي و طالبني بذاك الوقت ما چان وافقت، عيبن أشوفنك مثل أخوي، لو ما صار اللي صار ما قبلت بيك."

"موش استنقاص والله، بس آنه چنت عمية عنك، ما أعرف عليش، يمكن حظي، عيبن لو مفتحة عدل ما عضيت أصابيعي ندم تالي." بس حچيتها رفع إيدي باسها. "و آنه ما چان خليتچ تصيرين لغيري لو ما فقر حالي. چان حاولت و حاولت و ظلّيتني هيچ لبين ما تقبلين، و بعلم أهلچ، عمري ما تجرأت وياچ، و لا چنت ناوي أتجرأ و أخون الأمانة اللي تركوها عندي."

"حبيتچ حب نظيف، حب انحفر بگليبي، حتى لو راح بفرد يوم راح يظل أثره للموت ريحان، و هذا اللي صار. من صرتي لغيري تسودنت. يوم زواجچ چان موتي، لكت قويت رويحتي لأجل أمي، أدريها ما تتحمل شوفتي بهاي الحالة." "أيام و ليالي و آنه أفكر بيچ، أتخيلچ ويا غيري و أموت باليوم ألف موتة. و أرد و أستغفر، حرام عليك أيوب، صارت حرمة الزلمة غيرك، كفر لو فكرت بيها."

"و من صار اللي صار وياچ ما فرحت، لا والله ما فرحت. كسرتي بكسرتچ ريحان، و الوجع جاسني من گبل لا يجيسچ صدگيني. لكت كل شي بي صالح للإنسان، و رغم سوء الشي العشتي بس هو اللي جمعنا بالنهاية." "من هيچ آنه أگلنلك دوم أنت أحلى شي صار لي. أنت رويحة ريحان أيوب." "و أنتِ أيوب كله موش بس رويحته." حچاها و باسني بلهفة. ردت أبعده خاطر نكمل كلامنا، ما استجاب. دفعني على الچرباية و صار فوقي. باوعتله أضحك. "أيوب بس أسألك شي؟

قاطع كلامي ببوسة قوية. تركته براحته. ابتعد عني، لبس ملابسه و سحبني لحضنه. مديت إيدي للجهاز. قبل لا أفتحه باوعتله و رديت بسته من شفته. فتحت الجهاز شغلت الفيديو. شگد چان فرحان، انقلب وجهه من شاف أمه و فاطمة گدامه. بست خده حتى أهديه. "هاي ذكرى خاطر لا تنساهم بيوم." "اللي بالگلب مستحيل ينسي." ظل يباوع شوي و سألني: "هاي فاطمة صورت؟ "أي." "هههههه أنتِ طلبتي لو شني؟

"لا والله البنات، بس كلش فرحانة بي، أقلها ما ظلت حسرة بگليبي. بس سؤال حبيبي، شني حچيتوا بالنهاية و فاطمة قطعت التصوير؟ فضول يعني." "على المشية. گلت ليها كل شي يطلبون وافقي، حتى لو چان فوق إمكانيتي، لا تشيلين هم، آنه أدبرها." دمعت عيوني لكلامه. رجعت بست خده حيل و حضنت إيده بإيديني. "و آنه ما طلبت هواي عيبن أدريك ذهب ما تتثمن." "و آنه چنت مستعد أجيبن ليچ مال الدنيا، عيبن أدري كله ما يسوى ذرة من تراب رجليناتچ بوية."

"أموتن عليك." "و آنه أعشگنچ رويحتي. يلا گومي ناكل كيك، عودن عگبها أضربچ الإنسولين." غسق: مرت الأيام هادئة. الحجية و عمة صبيحة تخبلن لأن ما يصير عندي طفل. ما خلن شي ما سونَه. و من شافن كل الطرق انسدت بوجههن غيرن الطريق. گالت الحجية: "أكو علوية تعرف بهالسوالف، آخذچ ليها تشوف، أخافن بيچ شي يمنع الخلفة، ما خسرانين شي أحنه." حچت ويا إسحاق رفض.

آخر شي سلطت عمة صبيحة علي، لأن تدري ما يرد الها طلب و بس هي اللي تگدر علي بالبيت. وافق أروح و رحت فعلًا. ظلت تسألني و أجاوب، آخر شي گالت: "دايسة و ما جاي يصيرلها الحمل." انطتني كومة دعوات و أشياء أسبح بيها و رجعنا. نوعًا ما اقتنعت بكلام هاي المرة. لأن بس ذيچ الليلة الصعبة اللي عشتها بالمكان المهجور كافية حتى تحرمني عمر كامل من الأمومة. ظليت شهرين ملتزمة بالعلاج.

و أكيد مو بإرادتي و لا من كيفي، الحجية و عمة چانن دوم فوق راسي و بإيديهن يسون الشغل لي. اليوم خلصت شغلي و ظليت جوه. أغلب الأحيان أظل سهرانة ويا ثناء و رؤى و ترف بغرفة ريحان. و لو إسحاق يضوج، بس شسوي گعدتهن و لا ينمل منها، بحيث ينام و آني بعدني جوه. قامن البنات ينامن، آني هم صعدت. طبيت للغرفة، إسحاق نايم. ويا سدت الباب حس علي. باوعلي: "وين صرتي اليوم؟ التفتت للساعة، بالواحدة. "جوه يم البنات توهن راحن ينامن و صعدت."

قام من مكانه ضايج. غسل و رجع، چنت متمددة دأنام، سحبني علي. التفتت باوعتله مبتسمة. "موش چنت نايم شگعدك؟ "چنت ناطرچ و غفيت بلاية ما أحس." "امممم زين ليش بلا دتنتظرني سيادة القاضي؟ "اشتاگيت ليچ موت." "و آني هم اشتاقيتلك كلش." حچيتها و بسته، گبل سحبني من خاصرتي لحضنه. مد إيده على التشيرت ديرفعه، سمعنا صوت هزاز. باوعتله فاتحة عيوني و هو صافن بوجهي. صحت بنترة: "عود هاي منو ديدگ عليك بنص الليل إسحااااق؟! رفع جهازه بوجهي.

ماكو، مطفي الضو مالته و الهزاز بعده مستمر. قام بسرعة اتبع الصوت، حسيته موجود قريب راسنا. رفع مندر الچرباية، چان يطلع من جوه موبايل حديث. باوعت للشاشة مكتوب: مهيمن يتصل... يتبع.