رواية وضاقت الأرض بي الفصل الثامن والأربعون 48 - بقلم لبنى الموسوي

#وضاقت_الأرض_بي

للكاتبة #لبنى_الموسوي

چانت تحچي ومبتسمة
بس التفتت عليه اختفت ابتسامتها خفت بس حاولت ما ابين هالشي خصوصاً امي گاعد ويانة

- هناء مو ؟؟

- اي دكتورة آنه

- قبل كل شي
اريدچ تصيرين قوية لأن راح تحتاجين هالقوة بالأيام الجاية هواي

- ليش دكتورة شنو بية ؟!!

- للأسف امي
اكتشفنا وجود كتلة عندچ داخل الرحم
لازم نستئصلها بأسرع وقت ونجري عليها الفحوصات اللازمة حتى نعرف اذا چانت خبيثة او حميدة

حچتها لو آنه مدري شصابني
ظليت صافنة بوجها سمعت امي گالتلها متأكدة من كلامچ دكتورة ردت عليها للأسف اي

درت وجهي باوعتلها
- وهاي الكتلة راح تأثر على فرصتي بالأنجاب ؟!!

- عيني اسمعيني
صحتچ وحياتچ اهم من كل شي حالياً

لذالك اتركي سالفة الأطفال وفكري بنفسچ
منا لما الله يكتبلچ السلامة وتعدين هالأزمة على خير

- ادري والله ادري
آنه ما جاي اگللچ صحتي مو مهمة
بس اردن اعرف العلة وحدة لو راح تصير ثنين  علية

- آنه مجرد دكتورة نسائية
ما اگدر اجاوبچ على هيچ سؤال مهم وخطر بنفس الوقت

الجواب اكيد راح تحصلي
يم دكتور اختصاص بالأورام ومعالجة الأمراض السرطانية

بس حسب خبرتي البسيطة
حالتچ انتِ هنا راح تنقسم الشقين مو اكثر

الشق الأول
يطلع الورم خبيث
وبـ هالحالة ينجبرون يستئصلون الرحم كلة حتى لا ينتشر المرض وان شاء الله ميكون منتشر

اما الشق الثاني
اذا طلعت هاي الكتلة حميدة
هنا راح نعتمد على المضار السببتها داخل الرحم طول لفترة العاشت بي وتغذت من خلالة حتى نعرف نسب فرصتچ بالأنجاب

- يعني بالحالتين آنه الخسرانة

- قوي نفسچ ليش هالحچي
ترى بعدچ بأول الطريق وگدامچ هواي بعد ميصير تستسلمين من اولها

- زين بس فهميني
اذا طلعت خبيثة الحل الوحيد راح يكون استئصال الرحم ماكو غيرة ؟!!

- امي حياتچ اهم
كافي تفكرين بالأطفال فكري بنفسچ وحاولي تقوين روحچ حتى تعدين هالأزمة على خير

- ماشي دكتورة مشكورة

- انتظري وين رايحة
هاچ هذا كارت دكتور معروف بالبصرة
شاطر بمجال الأورام السرطانية وان شاء الله راح يگدر يساعدچ  طول فترة العلاج

- رحم الله والديچ

شمس.. باوعت عليها طلعت ع السريع
ظلت خالة نجمة يم الدكتورة تحچي وياها واني رحت ورى هناء

لگيتها واگفة بالباب ووجها ع الحايط
تقربت حطيت ايدي على چتفها وبچيت السمعنا قبل شوية صعب علينة لعد هي شلون الله يساعدها

- هناء
راح تصيرين زينة صدگيني

- ان شاء الله خية

- هسه شلون شنسوي

- اتصلي على صخر يجي علينة شنسوي يعني

- ليش مراح ترحين للدكتور النطتچ عنوانة ؟!!

- لا مو هساع

- ليش ولچ
لازم تراجعين بأسرع وقت

- ميخالف اراجع بس مو اليوم باچر ان شاء الله

- زين انطيني موبايلچ اتصل منة ما عندي رصيد

- هاچ اخذي

فتحت الرمز وانطتنيا
طلعت بالممر دورت على رقم صهيب كاتبة على توم واني بعز قهري ضحكت على خبال جيري

دگيت علي
قريب ميخلص الأتصال رد الووو ها هناء

- ها صهيب اني شمس

- هلا خوية خيركم صاير شي

- تگدر تجي علينة بلا زحمة عليك

- عليش موش صخر أخذكم غير هو اليردكم

- مشغول لذالك اتصلت عليك

- اي تامرون
بس تعرفين العنوان لو اخابر اعلة صخر اخذة منة

- لا لا اعرفة

رديتلة العنوان وسديت الخط
رجعت جوة هناء گاعدة ع الكرسي وامها فوگ راسها تحچي ودموعها تجري بحرگة

تقربت منها وطلعت الكلينس من جنطتي
- گولي يا الله خالة
اني گلبي مرتاح ان شاء الله الشغلة سهلة والكتلة تطلع حميدة ومابيها مضار

- الله يسمع من يمچ يمة

- اخذي خالة مسحي دموعچ
هناء محتاجتة قوة من عدنة شلون ترديها تصير زينة وهي دتشوف الضعف بعيونة

ما حچت شي
اخذت الكلينس مسحت وجها وگعدت بصف هناء تستغفر

ظليت واگفة والموبايل بـ ايدي
الصمت چان سيد الموقف وكل النسوان عيونها علينة لأن سمعن الكلام الدار بيناتنا

نص ساعة تقريباً واتصل صهيب
رفضت الخط وطلعنا صار بوجهنا واگف بباب المجمع
من شافتة هناء تفاجأت وباوعتلي

- عليش دزتي ورى

- احسن والله
لأن حالياً تحتاجين صهيب اكثر من اي شخص ثاني

- لا شمس لو مبلغتني ع الأقل

- ديلا اسكتي هذا وينة وصل يمنة

صهيب.. السلام عليكم

ام هناء.. هلا يمة وعليكم السلام

صهيب.. شمالچ عمة
عليش باچية صاير شي وآنه ما اعرفنة

ام هناء.. خلنة نوصل واسولف ليك

مشينا للسيارة وهو عيونة على هناء
ما حچة شي طول الطريق يسوق ويباوع بالمرايا
چانت كلما تنزل دموعها تمسحهن بدون متطلع صوت

وصلنا للبيت قريب التسعة
توني طابة اتصل بية صخر رفضتة ومشيت للصالة لگيتة گاعد وياهم من شافني گام ع السريع

- ها بوية وينچ
ظل بالي اتصل وماكو خوبن ما صاير وياكم شي

- لا مصاير
وما خابرتك لأن صهيب اجة علينة

- شمالچ شمس بيچ شي ؟!!

- مو اني هناء

- شمالها احچي

شفتها طبت ندسته بـ ايدة حتى يسكت
سلموا عليهم رادت تروح للغرفة وگفها صوت امها

- انطري الوين ماشية

- اريدن ارتاح بغرفتي يمة تعبت شوي

- گبل لا تمشين ضروري زلمتچ واهلة يعرفون بحالتچ

صهيب.. عمة احچي تراچ وغوشتيني شمالها هناء

وگفت تسولف والكل صافنين عليها بصدمة
منا لما خلصت امها السالفة
هناء انهارت گاعدة ع التخم وايدها على عيونها تبچي بحرگة

رحنا اني والبنات يمها
شگد حچينا بس چذب لو گدرنا نشيل ذرة من الوجع الگاعد تحسة بگلبها

صهيب.. عمة هاي الطبيبة متأكدة من تشخيصها ؟!!

حرمتي واعرفنها عدل
مامش يوم اشتكت من شي او وجعها شي
اخافن هالدكتورة
غلطانة عليش ما راجعتن غيرها

- يمة هي گالت
هالمرض ما بي اعراض واذا بينت اعراضة فتبين متأخر كلش

هناء.. بس حچتها گمت اركض الغرفتي
طبيت وسديت الباب مخنوگة كلش ما اعرف شلون اتصرف

اكثر من سالفة صارت على راسي
مرضي خطورتة حياتي التهددت تنتهي بين لحظة والثانية

والأهم من كل هذا
حرماني من احلى شعور تتمنى تعيشة اي بت بهاي الدنيا

نزعت حجابي وگعدت ع الچرباية
حطيت ايدي على حلگي اكتم بيها صوتي وبچيت بچيت بچيت لحد ما انگطع نفسي

ساعات الأنسان يضعف
يفقد ايمانة ويعترض على ارادة رب العالمين
بس هالشي مو بـ ايدة لأن الله خالق البشر بطبيعتة ضعيف واقل شي ممكن يهدة

حسيت ع الباب انفتح
سحبت الكلينس امسح بدموعي بدون ما اباوع منو دخل علية

شوية ولمحت صهيب وگف گبالي
ظليت مدنگة راسي ما اگدر اباوعلة بس تصير عيني بعيونة انهار وهالشي مو صحيح

- هناء بوية
تنوعيلي شو مو جاي احچي وياچ

- نعم

- هاي شني ؟!!
هناء تگول نعم من يمتة ولچ صرتي عاقلة وراحن سوادينچ

ما جاوبتة
سحبني من ايدي گومني الحضنة ورفع راسي باوع العيوني

- ما احبن اشوفنچ هيچي
اريدن هناء ام السان ونص رديها لية لا نتخارب والله

بس حچاها بچيت
گبل اخذني الحضنة وطوقني بـ ايدة حيل

- بسچ حبيبتي
لا تخافين من شي وصهيب موجود

راح تتعالجين يم احسن الأطباء
ولون چان علاجچ بأخر الدنيا همينة اخذچ ونمشي لي بعيد عن كل هالوادم

بس ما اريدن اشوفنچ هيچي
اترجاچ هالضحكة الحلوة لا تخليها تفارگ هالوجه الحلو لون چان لصهيب معزة يمچ ولو شوي

- صهيب

- عيون صهيب
حچاها ورفع ايده يمسح بدموعي

- آنه مخايفة من المرض
بكثر خوفي من حرماني من الخلفة

يعني حتى لو تعالجت
شنو فايدة حياتي وآنه مراح اصير ام ولا اجيبلك الجهال التحلم بيهم كل عمرك

- وياهو الگالچ آنه احلم بالفروخ
يمعودة بلاهم شني اليجي من وراهم غير بس وجع الراس

آنه زلمة صايع
ما احبن المسؤولية ولا اريدن اتقيد بحياتي

هو انتِ وگوة جارعچ
النوب يجولي فروخ منچ لاااااا والله هنا اهجن وما تلگيلي درب بـ أرض الله الواسعة

- هههههه
ليش يعني وين تروح

- اسكن الوادي
اجدي من الوادم كل خميس بروح موتاهم يگلچ خوش وراد يطلعون المجادية هناك

- هههههههههههه
والله عليك سوالف... حچيتها وصفنت بوجها

- اي ضحكي
الله لا يحرمني هالضحكة الحلوة

- يعني ما راح يجي اليوم التعوفني بي صهيب

- إلا مسودن واسويها
شايفتلچ بشر يگدر يعوف النفس چا شلون يعيش بعد

آنه وياچ هناء
هساع وباچر والأخر العمر همينة
راح اظلن الچ الأبو والأخو الي انحرمتي منهم گبل لا اكونلچ الزلمة التستندين اعلي

بس هذا ما يمنع العب شوي
من كل وبد الواحد يشوف خلق جديدة عبن التغيير حلو ومطلوب

بس حچاها ضربت صدرة حيل
- اي هساع هذا صهيب گبل شوي مو انت والله

- هههههه
چا تردين اغشنچ مو زين نحچي الصگد مامش شي بالدنيا احلى من الصراحة

- لا الچذب حلو مرات اذا چانت الصراحة مثل صراحتك

- ههههه اموتن اعليچ

- هساع هاي صدگ چذب ما فهمت

- وسفة والله
تشكين بحبي يبت نجمة هاي الما مرجية منچ

- ليش يمتة حبيتني كل هاللحب

- والله آنه همينة ما اعرف
بس المهم حبيتچ شلچ باليمتة وشلون بعد

سحبت نفسي منة وگعدت ع الچرباية
رجعت الأفكار تدور براسي ولا ارادياً دموعي نزلت مرة ثانية

گعد بصفي وسحب راسي الحضنة
بچيت بصوت عالي ما حچة شي عافني ابچي لحد ما سمعنا الباب تندگ

وخرني وگام فتح الباب
چان ننصدم بالشيخ واگف گبالنة بس باوعلي گمت على حيلي بسرعة

الشيخ ضاري.. تسمحلي ادش وليدي

- اكيدن يابة تفضل مچانك هذا

دخل وهو يصلي ع النبي
وصل يمي باس راسي وسحبني الحضنة ما تحملت گبل بچيت وحضنتة حيل

- بسچ يبعد ابوچ
كل هذا اختبار من رب العالمين
والله سبحانة وتعالى ما يختبر غير بس اليحبهم من عبادة

لا تخافين من شي
علاجچ كلة اعلة حسابي وبأحسن المستشفيات

وآنه متأكد السالفة هينة
ما راح تتعبين منها بس قوي رويحتچ
عبن اهم شي نفسيتچ اذا هي زينة انتِ همينة راح تصيرين زينة بأسرع وكت

صهيب.. يابة هي شني العلاجها اعلة حسابك چا وآنه شني طرطور

- انت مالك غرض
آنه وبنيتي عيب تتدخل بين البت وابوها
لو اجي اعلمنك عگب ما كبرت وصرت زلمة مشورب

رجع باوعلي
آنه اعرفن بت نجمة قوية مثل اللبوة الخلفتها

لا تخيبين ظني بيچ
خليچ مثل ما اشوفنچ بعگلي دايماً
كافيني وجع ريحان لا تزودينها اعلية بروح ابيچ

هزيت راسي بدون جواب
التفت على صهيب خليك جارها كثر ما تگدر لا تطلع إلا للضرورة

- لا عمي
آنه اريدن امشي ويا امي

- شني هالحچي ؟!!
شلون تعوفين زلمتچ وحدة وتمشين ما يصح هالشي

واذا اعلة نجمة
آنه ما اخليها ترد الدارها إلا وانتِ متعافية من كل علة ان شاء الله

- مراح تقبل تبقى هنا امي واعرفها

- لا تظل خليها اعلية ولا تفكرين بشي

حچاها وباس راسي وطلع
شوية واندگت الباب هالمرة امي اجت
بس شافها صهيب خلة وطلع من الغرفة حتى يعوفنة الوحدنة

- ها يمة شلون صرتي

- احسن الحمد لله

- ما تمشين وياي وتقنعين صهيب يجي همينة

- مستحيل يمة
وين يقبل قابل متعرفي انتِ
بعدين ليش ما تظلين هنا شعندچ بالبيت وحدچ واني محتاجتچ بـ هالفترة

- هو راح اظلن وامري لله

بقت تحچي وياي ساعة
تحاول تصبرني مدري تحاول تقوي وتصبر بنفسها
لأن جاي اشوف الضعف والخوف واضح ذاك وينة بعيونها رغم حاولت هواي حتى تداري نظراتها عني

غسق.. موضوع هناء چان صدمة للكل
حتى ريحان الخلصت الأشهر بغرفتها صارت تطلع وتگعد ويانة علمود تواسيها وتخفف عنها ولو شوية

مر اسبوعين ومراجعات هناء للدكتور مستمرة
بس للأسف بسبب الحالة النفسية حالتها الصحية هم صارت تتدهور

فجأة وبدون مقدمات تتمرض
يا ترتفع حرارتها يا تستفرغ بعد الأكل مباشرتاً يا تلزمها الدوخة وتوگع

وطبعاً الكل عرف
هالشي بسبب تفكيرها المستمر بالمرض وموضوع الحمل

گعدت الصبح عندي امتحان ولازم اداوم
نزلت جوة چانت خالة نجمة واگفة بالمطبخ والچاي ع النار صبحت عليها وبست راسها

- شعندچ بالمطبخ خالة

- يمة هنيوة تعبانة وصهيب يريد يطلع الشغلة
خوبن ما اخلي يروح ومعدتة فارغة ما يصح هالشي

- اني هسة اسوي
روحي ارتاحي انتِ وينچ وين وگفت المطابخ

- لا يمة شمالني قابل
لساعني بصحتي ماطول رجليني تعيني خاطر اوگف اعليها

- خالة فدوة لتعاندين
اني والبنات يوميا نسوي الريوگ لتخافين مراح يطلع صهيب على معدة فارغة

- چا خلني اگعد هنا لو همينة راح تمانعين

- هههههه
لا بالعكس وين لاگيتها اكل وهالوجه الحلو گبالي

- اروحن فدوة ونذر لحچاياتچ التفتح النفس من صباحيات رب العالمين

- اسم الله خالة لتحچين هيچ فدوة
الله يطول بعمرچ ويحفظلچ هناء من كل شر وسوء

- ويحفظچ لية چا غير انتِ بنيتي الخامسة

رحت يمها والدمعة بطرف عيني
توني دنگت ابوس راسها طب إسحاق للمطبخ
من شافنة هيچ ابتسم وگح بصوت عالي حتى ينبهنا بوجودة

- هلا يمة حياك تفضل

- شلونچ عمة

- بخير وليدي لون انت بخير

- دايماً ان شاء الله

حچاها وگعد بصفها يسولفون
شوية وطب الشيخ باوعتلة فاتحة عيوني
بالعادة ابد ميطب للمطبخ ولا اشوفة هنا بهيچ وقت

الشيخ ضاري.. صبحكم الله بالخير

إسحاق.. هلا يابة تفضل

الشيخ ضاري.. شلونچ نجمة خوبن ما تشكين من شي

ام هناء.. لا شيخنا بخير ورحمة لا تاكل همي

بعدهم يحچون طبت الحجية
اني هنا حسيت اكو شي مو طبيعي بالموضوع
باوعت على إسحاق عيونة تتنقل بيناتهم والأبتسامة مرسومة على وجهة

معناها اكو شي ما اعرفة يدور براسة
تقربت منة هم ملتهين يسولفون همست بصوت ناصي

- إسحاق شديصير هنا ؟!! 

- الحرب العالمية الثالثة

- هههههههههههههههه

- وجع نصي حسچ لا يسمعونچ

- لا صدگ فهمني شگاعد يصير

- امشي بوية
الچاي عطب موش بس فار الله يعينة شلون راح نجرع مرورتة

درت وجهي لگيت القوري يصيح الغوث
ركضت طفيت النار وشلتة للحوض درت منة شوية شو هذا اسود بلون العباية

التفتت على إسحاق
يباوعلي بنظرات خباثة عرفتة ديضحك علية

ما اهتميت ابد
گدامة فرغت الچاي بالحوض وسويت غيرة رغم الوقت تأخر شوية

داسوي بالبيض
حسيت على خالة نجمة انسحبت من المطبخ
وراها طلعوا الشيخ والحجية ماظل يمي بس إسحاق

- بوية عجلي شوي
ما ظل وكت هساع ايوب يجي فشلة يظل ناطركم بالباب

- اي خلصت ما عندي شي

- چا جيبي بالصالة ناكل
وآنه هساع ادزن ليچ وحدة من البنيات خاطر تعينچ

- اي تمام

لليل تونة مخلصين عشى اندگت الباب
طلع حبيب يشوف منو شوية وطب هو وبيت عمة اهل نجيبة

باوعت عليهم
اهوووو هم اجت نجاة العوبة
درت وجهي على إسحاق واگف يسلم على عمة وهي عيونها تگص بي من فوگ ليجوة

راحوا الرياجيل للديوان والنسوان گعدن بالصالة
خمس دقايق وگامت ويا اختها للغرفة
انسحبت وراهن واذا المرة الفاتت سمعت كلامهن بالصدفة هالمرة تقصدت اتسمع عليهن

وصلت يم الباب حطيت اذني
چانت نجاة دتحچي بس كلام عادي عن اهلها شوية وگالت اي هساع نحچي بالمهم

- اي خية سولفي

- لچ اجت فرصتچ يمحظوظة
ذني كلهن طلعن عواگر شمس وهناء وغسق وياهن

- چذب حتى غسق عاگر

- اي عاگر
حتى ما راحت تفحص يم الطبيبة عبن خافت لا تنكشف چذبتها

- يا جذبة ؟!!

- مو هي ياهو اليسألها وگالت إسحاق ما يريد فروخ
اگص ايدي من عرگها لو ما تطلع عاگر وتخاف تكشف السالفة يم الشيخة

- عليش تخاف
مو هذني شمس وهناء راجعن وعادي الكل عرف بسالفتهن الغمة

- لچ يا ثولة هي غير
هي مرت الشيخ اعلة سن ورمح
شلون تردين يرضوها تظل عاگر وما تجيب ولي العهد لإسحاق

- همينة صح والله

- وهساع اجة دورچ
إسحاق ملچوم ببنيتة وما ظللة بهالدنيا غير ود

اكيدن هساع متمرمر اعلة حس الفرخ
تلحلحي شوي وحركي رويحتچ خاطر تاخذي وتصير نجاة الكل بالكل هنا

- الطلابة ما جاي اشوفنة هواي
شلون يتنوع لية وآنه كلما اجي حرمتة توگفلي مثل السلة بالزردوم

- الزلمة بنظرة يوگع
صيري ذكية وجيبي راسة اليوم گبل باچر
ما يحتاج يعني تختلون الوحيدكم يلا تگدرين توگعي

- چا انطيني حمرة ما جايبة وياي

- هاچ وردي وردي

- ما عندچ غيرها خلنة نغير شوي

- لا خايبة هو هذا احلى لون چا شتريدين بنفسجي

- لا ويييع
خلنة اعلة الوردي احسن عبن إسحاق يحبة

درت وجهي اهز ايدي بـ استهزاء
والله وطلع عندچ ذوق يا نجاة العورة لا وتگول ويع ع البنفسجي

هو غير انتِ لو خليتي هاللون
إلا ينشطب من قاموس اللألوان وروحها الأمي

مشيت بهدوء وصلت للممر
صارت المنشفة گدامي لونها وردي ركضت شمرتها بالگاع بعصبية

- ياربي ما تاخذ هاللون وتريحني

تذكرت من گالت إسحاق يحبة
عود صدگ يحب الوردي واني ما ادري ؟!!

رجعت للصالة گاعدين يسولفون
ظليت واگفة وعيوني ع الطريق بس لا يجي إسحاق وهاي ضاربتلة الوردي والله انجلط

شوية واجت مملطخة الحلگ بالحمرة
خفت هالبراطم اي والله ولا براطم الجمل عوزچ بعد بس بوكس ويگعدن عدل

بعدني ادردم ويا نفس طلع إسحاق
گبل نجاة گمزت من مكانها المي چان ع الميز راحت تسوي روحها تشرب حتى تصير بطريقة

باوعت عليها بعصبية
ما اشوفها إلا وگفتة تسلم علي وتعوج بالحلگ يعني ذاك وينة مبين دتغري

رحت يم الدرج بلكت اسمع شديحچون
رفع راسة باوعلي عافها واجة بـ اتجاهي عبالي جاي يحچي وياية شو هذا تجاوزني وصعد فوگ

انسحنت روحي من القهر
صعدت ورى طبيت للغرفة لگيتة ديگلب بالمستسكات

سديت الباب حيل باوع علية
- شمالچ بوية هيچي تربدينها تسودنتي خوبن ما تسودنتي

- شنو چنت تحچي ويا نجاة ؟!!

- عليش تسألين ؟!!

- مرتك ومن حقي اعرف

بس حچيتها گام صار گبالي
- متأكدة انتِ حرمتي والچ اعلية كامل الحگوگ ؟!!

بلعت ريگي بتوتر
- اي ما گتلي شنو چنتوا تحچون قبل شوية

- شي ما يخصچ موش ضروري تعرفي

- إسحاااااق

- حسچ بوية لا تعلي

- حباب جاوبني ترى راح انفجر

- عليش كل هذا ما تفهميني

- يعني مراح تجاوب

- ما اجاوب

درت وجهي ردت اطلع
رجعت باوعتلة ديسد القاصة اگول إسحاق سؤال بعيد عن نجاة الـ..... وسكتت

باوعلي بطرف عينة
- اسألي بوية وخلني انزل تراچ عطلتيني

- شنو لونك المفضل

- هههههههه
لا انتِ ضارب بعگلچ فيوز اليوم

- ادري شبيك
شو كل سؤال اسألة متجاوب علي ليييش

حط المفتاح بجيبة واجة يمي
- عادي كل الألوان احبنها ما عندي لون محدد

- لا بس اكيد اكو لون مفضل عد كل شخص

باوعلي وسكت
گتلة الوردي مووووو
شو هذا بس حچيتها انگلب وجهة ع البطانة

- شبيك حچيت شي غلط ؟!!

- هذا ياهو الگالچ بهالشي

- لا هيچ توقعت

- لا بوية غلطانة
هاللون بالذات ما اطيق اشوفنة گبال عيني

- ليش ؟!!

- بلاية سبب هيچي ما احبنة من الله

- زين لعد شنو لونك المفضل

- همينة رديتي

- حباب حباب
بس هالسؤال شدعوة هالگد انت غامض

باوعلي وابتسم
چنت واگفة يم الميز تقرب علية حط ايدة علي صرت بالنص

- سؤالچ شني بالضبط

- هاااا
اي تذكرت سؤالي يا لون تحب

- اعليچ ؟!!

- شنو ما فهمت

- يعني يا لون احبنة اعليچ

- اخذني الفضول اعرف جوابة وگتلة اي

- كل لون تلبسي احبنة
عبن انتِ التجملين الألوان موش هي التجملچ

- والجهال

- شمالهم بعد

- هم تحبهم مو

- اكو مسودن يكره نعمة رب العالمين

- هاااا

- يلا خلصتي تحقيق خاطر انزل للوادم

- لا هو مو تحقيق مجرد فضول

- مرة الاخرى اجلي فضولچ لبين ما يمشون الضيوف

حچاها وباسني من خدي حيل
كلامة خوفني كلش منا شكيت بسالفة الوردي لأن نجاة تگول يحبة وهو على العكس تنرفز بس جبتلة سيرتة !!

ومنا حبه للأطفال
اخاف صدگ وبسبب صدي المستمر يسويها ويتزوج نجاة عزززززة

نزلت جوة لگيتة بالديوان همزين ما ظل هنا
بقيت گاعدة يمهم اباوع النجاة ونجاة تباوع علية يمكن لو بيدي وبيدها نگوم نتمالخ بنص العالم

ساعتين وراحوا
المطبخ چان على ثناء وامل لذالك بس نومت ود صعدت الغرفتي

باوعت بالمرايا
ها غسق راح تظلين بفهاوتچ هاي ؟!!
لحد ما إسحاق يروح من عندچ للي متسوة وبدون متحسين

حسيت بخنگة مو طبيعية
إسحاق هو كل اهلي وناسي وبدونة اني اصفى بالشوارع فلازم اتصرف صح وما اخسرة ابد

فتحت الكنتور صافنة
بالعادة اني البس تراك بيت وانام
بس هالمرة سحبت ثوب نوم ستن قصير بس اكو روب مستور فوگا

من جهاز العرس موجودات على حطتهن
همزين عاد عمة سكينة هي جهزتني لأن لو تظل علية كل شي ما اشتري

رحت للحمام
سبحت ورتبت نفسي ردت احط مكياج استحيت

حاولت اكثر من مرة بس فشلت
ما عندي هيچ جرئة هو الروب وحايرة شلون راح اطلع بي عاد همزين إسحاق بعدة ما صاعد للغرفة

شمرت المكياج وطلعت
انصدمت بي نايم ع الچرباية بس شافني بالروب صفن بوجهي

لعد لو يشوفني بثوب النوم شيسوي
مشيت سريع گعدت ع الميز جففت شعري وگبل طفيت الضوة

تمددت بصفة خايفة
ادري بي ذكي ويلگفها هي وطايرة
ظليت متحنطة اخاف حتى يرتفع نفسي ويحس بي

فجأة سحبني الحضنة
باس رگبتي اكثر من مرة وراها دفن راس بيها وگال تصبحين اعلة خير

انصدمت صدمة عمري
ليش هيچ سوة ؟!! وهو يدري كلش زين اني رايدتة

ما طول بسرعة نام
ظليت گاعدة قريب الساعة افكر بالموضوع بدون نتيجة لحد ما نمت

من يومها بعد ما حاولت ويا
رجعت على لبسي القديم وتصرفاتي المعتادة إما علاقتنا ظلت مثل ما هي بلا اي جديد

هناء.. مرت الأيام بصعوبة
كل يوم چان يعدي علية بسنة وطعم الأنتظار مر ما ينجرع كلش

بعد العلاج والمراجعات
استئصلوا الكتلة وحولوها ع الزرع حتى يعرفون النتيجة

ظلينا ننتظر على اعصابنا
صح صهيب يضحك ويتشاقى گدامي بس ادري بي يسوي هيچ علمود يقويني

اليوم نتيجة الزرع
طلعنا من الفجر البغداد آنه وهو وامي ويانة

ما خلص الطريق إلا لمن خلصت روحي
وصلنا للمستشفى وظليت انتظر دوري بخوف وقلق مو طبيعي

ساعة وصاحوا اسمي
رادت تجي امي ويانة ما خليتها
حطيت جنطتي بحضنها وبست راسها حيل

- ادعيلي يمة

- ادعيلچ بنيتي
بكل لحظة آنه ادعي شني البيدي غير الدعاء

ابتسمت بوجها والتفتت على صهيب
گبل لزم ايدي خايف مثلي واكثر بس ديحاول على گد ما يگدر يسحب الخوف مني بـ هالطريقة

مشينا بخطوات صعب تنوصف
رايحة آنه بشعور الرايح على حبل المشنقة برجلينة وينتظر بصيص امل يرجع بروحة الحياة....

يتبع

لتنسووون ⭐⭐⭐⭐⭐⭐
كل الحب ♥🥀