رواية وضاقت الأرض بي الفصل التسعون 90 - بقلم لبنى الموسوي

#وضاقت_الأرض_بي

للكاتبة #لبنى_ الموسوي

شمس.. اندگ الجرس صعدت غسق فوگ ع السريع
رحت فتحت الباب
طب صخر محمل كومة غراض سلمت علي واخذتهن من أيدة للمطبخ

رجعت لگيتة مگعد الجهال بحضنة
جايب العاب اشكال وألوان
وهم فرحانين يلعبون ويا بيهن وهو مبتسم الفرحتهم

رفع راسة شافني اباوعلهم
- شلونچ
- الحمد لله بخير انت شلونك
- برحمة الباري

- كافي تجيبلهم العاب البيت انترس يمعود
- الي تخرب ذبيها بالعگد
- هو داشمر وبعدهن كومة اذا انت كل أسبوع تجيب

دنحچي بچت رقية
نزل صوتها ليجوة باوع ع الدرج وسأل بـ أستغراب
- هذا ياهو ؟!!

- بت خالتي زعلانة وگعدت فوگ هي وجهالها
- ياهي منهن !!!
- هاا لميا خطية تعاركت ويا رجلها البارحة واجت لهنا

باوعلي وسكت
شوية ورقية گامت تصيح بصوت عالي
خالتي سوت روحها تخابرها
- يمة دسكتي بنتچ رجل شمس جاي من سفر وراسة يوجعة

عود سدت الخط بعدها تصيح
گام صخر
طلع باكيت الجگاير من جيبة وگال آنه ماشي للباب ادخن فرد جگارة واردن من رخصتكم

بس راح باوعتلي خالتي
- خاف شك بيها ولچ شو خفت
- لا خالة
هو هم مثلي عبالة غسق صدگ ويا إسحاق بـ تركيا
- اي لعد زين اذا هيچ

عشر دقايق ورجع
صبينا الغدة ورقية خابصة الدنيا بالصياح دناكل دگ الجرس گام صخر گال آنه افتحها

راح شوية ورجع گال لبسن الحجاب اجة رجل لميا
باوعت الخالتي مصدومة
ياااا رجل لميا شجابة شنو چذبنا الچذبة وصدگناها

شمرت الحجاب على راسي وعيوني ع الباب
طب إسحاق
عزززة گلبي وگف شحال غسق
ثووول شمس حتى هاي ما دبرتيها راحت بيها البنية يربي شلون ورطة

سلم على خالتي بصوت ناصي
التفت باوعلي
- وينها
- منو قصدك ما فهمت
- شمس !!!
- هاي شبيك إسحاق دحچي بوضوح حتى اجاوبك

صخر.. اصعد خوية فوگ تلگاها

بس حچاها استأذن من خالتي وصعد
كلش خفت على غسق
ردت اصعد ورى قطع الطريق علية صخر
- اتركيهم خاطر يحلون السالفة بيناتهم هيچي احسن

غسق.. اكثر من ساعة وهي خابصة الدنيا
شلتها افتر بيها كافي ماما فدوة كافي ليسمعچ عموو
بعدني احچي وياها انفتحت الباب بقوة
التفتت صار إسحاق بوجهي
الميز وراية بالضبط رجعت سندت نفسي علي قبل لا اوگع من الصدمة وكل جسمي صار ينفض

اباوع بعيونة نظراتة كلش غريبة
متحملت بچيت
خايفة منة
خايفة من ردة فعلة
خايفة على بنتي ليحرمني منها
خايفة من مواجهتة.. حسابة.. عقابة ادري بگد ما اني مجروحة هو مجروح مثلي واكثر

سد الباب وتقرب علينة
حضنت بنتي حيل وايدي الثانية احمي بيها وجهي ما متوقعة منة غير الضرب بمثل هذا الموقف

وصل يمي شديت قبضتي عليها
مد ايدة رجعت ليورة
ضميتها الصدري بقوة رغم جسمي كلة ينفض فدوة لا لتاخذها مني ابوس ايدك لتاخذها

بس حچيتها سحبني اني وياها دخلنا بنص حضنة
- هدي بوية هدي

صرت اناشغ بصوت عالي
غريبة انتِ غسق مو هذا الچنتي خايفة من مواجهتة
هسه صرتي تحتمين من عندة بي ؟!!

ايدة على كتفي
يحركها من الأعلى للأسفل حتى يهديني
حسيته ديرجف بوضوح
بحيث نسيت كل خوفي وظليت مركزة ويا رجفة كفة الـ هزت گلبي مو بس متني

ابتعد عني مسح دموعي وباوع الرقاوي
راد ياخذها منعتة
رجع باوعلي وسحبني الحضنة جيبي لا تخافين بنتي اريدن احملها ما ماخذها منچ

- تچذب علية والله تچذب
حچيتها وشهگت

- يا يوم آنه مچذب اعليچ
يابة وداعة ذيچ الأيام الحلوة الجمعتنا سوة
ما اريدن احرمنچ منها
ولا آنه الچنت ناوي اسويها بس ناوليني مو گلبي ناط اعليها

بالگوة اقتنعت انطيها الة
شالها ضمها الصدرة ورفعها ليفوگ صارت گبال وجهه
گبل ضحكت بصوت عالي
باسها من خشمها گامت تضرب على خدودة طبيعتها ابد متستغرب عكس اختها ود

اباوع لعيونة صارن بلون الدم
ما ادري الوم نفسي !!
لو الومة !!
لو الوم الناس الي وصلونا لهذا الطريق بلا مخافة رب العالمين

گعدت بمكاني ما بية بعد اوگف من الخوف
ابد ما حچة وياها
خلصها بس يباوعلها ويبتسم
ادري بي مخنوگ يعني بس تطلع الكلمة منة يضعف گدامي

رجعت ضربتة اكثر من مرة على خدة
سحبت شفتة حيل
ضحك بصوت عالي هي هم ضحكت ويا عبالك تحس هذا ابوها لأن تصرفاتها ابد مو طبيعية

- شلونها بنيتي
شلونها رويحة ابوها وكل عمرة
تدرين شكثر حلمت اتنوع الـ هالعيون الحلوة وغفيت وآنه اتمناهن يمرني ولو بالطيف

چنت حاس راح تجيني بنية
وتمنيت هالشي
اخذ مني رب العالمين ورد وانطاني بمكانها رويحتي

التفت علية شني سميتيها ؟؟
- رقية
رجع باوعلها وكمل كلامة
- اخذ مني ورد وعوضني عنها برقية ويامحلا العوض لون چان يتجسد بيچ بوية

ظلت تدردم مدري شتحچي ويا
تمالكني الخوف
شنو راح يسوي بعد هاي اللحظة ؟!!
معقولة ياخذها مني وهو حلف ميسويها ربي رحمتك مابية لفاجعة جديدة

بقى يبوس بيها لحد ما شبع
شوية وباوعلي
يلا البسي خاطر نمشي منا بالعجل ناطرچ آنه جوة

- وين ؟!!
- للشقة وين يعني
- إسحاق...

ما خلاني اكمل فتح الباب ونزل
ركضت ورى خايفة لياخذها ويروح ما عندي ثقة بي
باوعت من الدرج
الحمد لله نزل للصالة گبل صخر اخذ رقاوي من أيدة

- صدقة بنيتك هاي
- اي رقية
- رويحة عمها تشبهك كلش بس لونها من حرمتك

شمس.. فهموني شديصير هنا ؟!!
صخر.. موش وكتچ هساع

حچاها وراح الأطفالة
- تعالوا وليداتي سلموا اعلة بنيت عمكم بالعجل

جوهرة.. نيني بابا (انطيني)
صخر.. لا نيني ولا عيني
لا ترحين تطيحينها وعمچ يرگعنا بـ فصل معدل هاي العزيزة

إسحاق.. تعاي عمي تعاي مالچ غرض بـ أبوچ

صاحها استغربت
اخذها صخر الة گعدها بحضنة وحط رقاوي بحضنها

- ها تحبينها لالة
- اي حبها
حچتها وملخت شعرها لأن طويل ركضت شمس الها

شمس.. لا ماما لا عييييب دادة ميضربوها
صخر.. واضح الحب بوية هههههه
إسحاق.. صدقة تغار من حگها بنية بوسط ثلث أولاد

طبيت للغرفة بسرعة
بعدني البس بالحجاب صاح يلااا وين صرتي
جاوبتة جاية
لبست ع السريع ونزلت تلگتني شمس من الدرج شنو وين رايحين غسق ؟!!

- للشقة
- شلونة وياچ خو ما أذاچ احچي حتى امنعة ياخذچ

- لا ما أذاني لتخافين
لازم اروح ونتواجه حتى تنحل هالمشكلة وأرتاح عاد

- بس كل شي محچيتيلي هيچ راح اقلق عليچ
- احچيلچ والله بس احلها ويا إسحاق
- تمام براحتچ حبيبتي

سلمت عليها ومشيت
شافني صخر گام على حيلة الحمد لله اعلة السلامة

- شكراً خوية الله يسلمك
- يلا امشينا

تصافح ويا صخر وطلعنا من البيت
الشمس كلش قوية
انطاني رقاوي گال هاچ خليها جوة عبايتچ ما تتحمل

اخذتها سحب الجنطة من ايدي
صعدنا بالسيارة
گبل شغل التبريد هي دقيقة بس صرنا ماي من الحر

تخبلت رقاوي بالبچي
تحرك بسرعة وظل يحچي وياها حتى تسكت
شوية وبردت السيارة
هدأت بس شنو بقت بس تگمز
كل شوية وطافرة على شغلة بالگوة مسيطرة عليها

وصلنا للشقة نزل قبلنا
فتح الباب واشرلي انزل ردت اشيل الجنطة گال آنه انزلها بس غطي رقية عدل الشمس ما ترحم

دخلت المكان هوسة
مبين كل هالفترة چان يبات هنا لأن كل مرة من اطب ما الگة غير التراب هالمرة البيت مگلوب

نزعت عباتي وخليت رقاوي بالگاع
شفت إسحاق تأخر
استغليت الفرصة ولملمت على السريع بعدني دانظف بالمطبخ دخل إسحاق بـ أيدة السفري

- هاچ جهزي الغدة
- الك لأن اني ما اشتهي هسه
- لا تشتهين

حچاها وطلع من المطبخ
الله يصبرني
ما ادري شلون راح اتحمل وين ما اروح لعباااان نفس

رتبت الأكل بالصينية وطلعت للصالة
گاعد يلعبها وهي منطلقة
اموت واعرف شگاعد تحس معقولة تدري هذا ابوها ودتضحكلة هيچ راح اتخبل

حطيت الأكل ع الميز شالها واجة
گعدها بحضنة
ياكل وعيوني علي شوية وشال كباب راد يوكلها گبل لزمت ايدة لااا شدتسوووي يمعوود

- شني شمالچ
- متاكل بعدها صغيرة بس ع الرضاعة
- عمرها خمس اشهر ؟!!
- اي

باسها ورجع يتغدة
بنص الأكل صارت نحسة كلش بس تبچي
گمت اخذتها من ايدة
گال وين جاوبتة مو صار وكت نومتها خطية تبهذلت

ما حچة شي
رحت غسلتلها دمرها من حلگة واخذتها للغرفة
ما طولت هواي تعبانة
بعدها دترضع غفت تسحبت بهدوء وطلعت من يمها

لگيتة گاعد بالصالة يدخن وينفخ بعصبية
ريگي يبس
خفت خوف بس الله يعلم بي
رفع راسة شافني گدامة اشرلي تعالي تمشيت گعدت گبالة

طفى الجگارة بالنفاضة وشبك ايدة يباوعلي بخزرة
- يلا احچي
- شحچي بالضبط هن هواي ؟!!

- احچيهن وحدة ورى الأخرى
- أول انت احچيلي بعدني خاينة وساقطة بنظرك ؟!!

- هالموضوع خلة البعدين ما ينحچة بسالفة وثنتين

- بس من حقي أعرف
اني ما طلعت من ذاك البيت إلا بعد ما انمسيت بـ أعز شغلتين عند المرة شرفها وأمومتها

أمومتي الحمد لله اني گدرت احافظ عليها
بس شرفي شلون ؟!!
گدرت ترجعة الي يا سيادة القاضي
گدرت تاخذ حقي منك
قبل لا تروح وتاخذة من الي خطط ونفذ الـ هالمصيبة

بس حچيتها گام بـ أتجاهي
شگد چنت احچي بكل ثقة وقوة بس خطوة وحدة من رجلة گدرت تهز كياني
حتى گلبي صرت ما احس بي بعد من الخوف... دنگ بمستواية بعدت نظري عنة مرتبكة

- ليش حگچ انتِ ما اخذتي بوية ؟!!
لچ اااازود من سسسنة
اختفيتي وتركتيني حاااااير بلاية ما تگلين هالحيوان شني الراح يصير بي بغيابي

ازود من سنة وآنه ادور اعليچ
بابل نجف بغداد أربيل مستشفيات مراكز ملااااااااهي
يسألوني هاي ياهي
ما اتجرأ واگللهم حرررمتي شلون يعني حرمة الميزان تركب لي گرون وتمشي للمجهول ؟!!

وثقت بيچ آنه
رغم كل الأدلة الوگعت بـ أيديني انطيتچ الحرية
تاكلين تشربين تنامين
حتى لمن مشيت للحمام ما فكرت اخذ المفتاح ويااي عبن ما چنت متصور راح تعمليها

- هه ضحكتني والله
هاي يا ثقة الدتحچيلي بيها ويا حرية
تريد اذكرك بالكرسي والغرفة الظلمة اااخاف حضرتك نسيت العذاب العيشتني بي ترى اني ما انسى

- شكثر طال هالشي ممكن تحچيلي
- شنو ؟!!
- الجاي تحچين اعلي هالساع
- أسبوع

- وعگبها
- عفتني بس شنو الفائدة فهمني إسحاق

اولاً اكتشفت بيك ما عندك ثقة بية
ثانياً عذبتني عذاب عمري ما عشتة حتى ويا اهلي
ثالثاً ردت تحرمني من بنتي وتشمرني للنار

رابعاً والأهم من كل الحچيتة هسه
خنتني إسحااااق
اي خنتني ويمكن متزوج علية هم
جاي تحچيلي بالخيانة وانت اكبر خاااااين وأنااااااني

اصلاً اني من زمان شاكة بيك
بس گلت ما اظلمة
خليني انتظر بعد اكيد اذا ديكذب علية يجي اليوم اليوگع بي وفعلاً صارت و وگعت

تحاسبني ع الخيانة وانت خااااين
لتگول الله محللي
صح حلل الكم بس احنة مو عبيد إسحاااق
من حقنة لو قرر واحد من عدكم يتزوج يجي ويبلغ مرتة يجوز ميعجبها تظل ويا

- هساع انتِ اعلة شني معترضة بالضبط فهميني
عدم ثقتي بيچ هاي اولاً
وزواجي مدري علاقتي بالحرام ثانياً
هيچ لو آنه غلطان خاطر اعرف شلون اجاوبچ خاتون

- اي بالضبط واثنينهن مينغفرن

- زين حاچيني
ياهو هاذ الگايل ليچ آنه متزوج مدري مصاحب

- ميحتاج احد يگول
اني سمعت بـ أذني گلتلك حبيبي وين صرت
وقبلها هم سمعتك تحچي ويا وحدة بس ما واجهتك

- هاي شني
يعني هساع سمعچ كافي حتى تتأكدين آنه خاين

- ليش اكو اكثر من هالشي يأكد خيانتك
- چا آنه سمعت بخشمي مثلاً

لو أذنچ تسمع صح وأذني غلط
او يمكن الثقة لازم تكون من يمي بس انتِ من حگچ تمحيها بمجرد تسمعين شي يأكد ليچ خيانتي

تعرفين شني مشكلتچن انتن الحريم
تمشن وتصيحن جنس أدم ما يستاهلون نثق بيهم
ومن يم حواء
كفر لون واحد خونها چااااا شلون ياااابة غير انتن ما تخونن ابددددددد

هساع لون تردين تحاسبيني اعلة خيانتي
طبعاً مثل ما تگلين انتِ
اجي آنه احاسبچ اعلة خيانتچ وعندي الدليل وعندچ الدليل وخلنة نشوف ياهو الأدلتة اقوى من الأخر

نعوف الخيانة نجي اعلة الثقة
لون اجيتي خاطر تحاسبيني اعلة ثقتي النهزت بيچ اجي آنه احاسبچ اعلة ثقتچ النهزت بية

وهمينة عندي الأدلة وعندچ الأدلة
نعرضها حتى اعلة الوادم موش النفسنة وبس خاطر نشوف ياهو الويا الحگ وياهو لالة

تردين تحاسبيني اعلة الأسبوع العاقبتچ بي
آنه همينة اجي احاسبچ غسق
هساع تگلين عليش
كلش سهلة يابة تأكدت من خيانتچ وعاقبتچ بالحبس
تأكدتي من خيانتي وعاقبتيني بالشردة

اذاً شني راح يصير هنا
تحاسبيني اعلة عقابي احاسبچ اعلة شردتچ وكان الله أعددددل العااااادلين

ها متصافين لو لالة
لو بعدچ حواء الي تغفر الروحها كل شي عوج
ولمن تصير الشغلة يم أدم
هنا لااا غلطة وحدة تمحي كل زينياتة رغم هي الغلط همينة راكبها من ساسها الراسها

چا بوية أدم نبي بس ولدة بشر موش معصومين
هو همينة ما يغفر
يتأثر ويطلع من طورة عليش جايات تحسسنة احنة ملايكة الغلطة منة ما تنغفر مثل الشرك بالله

- باوعتلة حايرة
ادري بنفسي ابد مو گد إسحاق
هسه ليش حچيت بالخيانة مو هيچ ضيعت كل حقي ثووول اي والله ثووول

- هااا جاوبي
- عود عبالك انت لأن قاضي مراح اگدر عليك ؟!!

لا اكيد غلطان
اني شكيت بيك بسبب تصرفاتك بس اني ما تصرفت أي شي يدل على خيانتي الك

- ليش انطري خلني اذكرنچ
چم نوبة نمتي جوة خاطر لا اتگرب منچ
وچم نوبة صديتيني
وچم نوبة تعاركنا اعلة هالسالفة بالذات
وجم نوبة تعطلتي جوة لنصاص الليالي وآنه حتى ما سألتچ وينچ لساعة

هذا كلة انذكر
بالرسايل الأخيرة الما قريتها وياي چان مكتوب آنه جوة يم البنات ما اصعد لحد ما إسحاق ينام

اطمن حبيبي مثل متريد ديصير
مراح اخلي يتقربلي لأن مخلصتها جوة حتى هو صار يتعارك وياية بسبب هالشي

ها احچي لون فتحتي جهازي بيوم
ولگيتي بي هيچ رسالة
حبيبتي خليچ مرتاحة آنه ما جاي اتگرب من حرمتي عبن احبنچ الچ وبس حتى جاي انامن من وكت تجي تگعدني بس ما اهتم ليها

وهالشي صدگ آنه مسوي وياچ
اتركي عنچ المثالية وجاوبني بالعگل تصدگين لو لالة

عليمن اسألنچ اصلاً
موش انتِ الي اتهمتيني بالخيانة بس عبن سمعتي من حلگ وحدة چلمة حبيبي

وآنه رساااااااايل لا تنحسب ولاااااا تنعد
كلها نوم وفراش وصور
واسرار بيت واسرار خاصة مامش بشر يعرفها غيرچ جدامي وتردين ما اصدگها

وهمينة ما صدگت عبن ثقتي بيچ چبيرة
بس آنه اسبوووع ادور ورى السالفة خاطر الزم راس خيط يوصلني للحقيقة

سألت فروخ إلياس مامش واحد يتذكر هالشي
تحريت عن الرقم بأسم مهيمن
مشيت خلاف الموقع طالع من نص دارنا غسسسق

حاچيني لون صرتي بمچاني شني تعملين
لا انطري انطري
آنه اردن عنچ عبن جاوبتيني بفعلتچ لمن شردتي مني بس عبنچ سمعتي وحدة گالت لية حبيبي

ولا تگلين الخاطر حملي
لون چانت السالفة تخص حملچ وبس
چان شردتي من أول اسبوع ما نطرتي شهر كامل يلا هجيتي

موششش من حگچ تحاسبيني اعلة شي
انتِ احگ تتحاسبين اعلي
وهساع آنه اشرح ليچ السالفة بجملتين موش ازووود

موبايل رسايل خيانة
أنسان ملچوم اعلة فراشة ومن حب حياتة
مريض وسنين يتعالج من علتة
أسرار بيها ألف اصبع للأتهام كلها متوجها اعليچ وبس
ادلة دامغة
متهمة ما عدها شي تبري بي نفسها غير دموعها

وآنه قاضي وانتِ محامية
ونعرف المتهم بريء حتى تثبت ادانته وثبتت غسق
وما تحاكمتي لااااا

اسبوع واحد ولزمت اعصابي عنچ
همينة الفرخ الي ببطنچ خلصچ بفضل رب العالمين
وهمينة آنه عرفت اضبط اعصابي بـ الأخير بمساعدة غيري عبني أنساااان مرررريض

وكل هذا اظلني ابن شيوووخ
شكبرها بحگي من الوادم يعرفون حرمتي هجت مني

حاچيني هساع ياهو الي المفروض يتعاقب
آنه لو انتِ ؟!!
وعبني غلطت حالي من حالچ ولو غلطتي ليها مبرررر بس غلطتچ لاااا قررت ما احاسبچ

بس من حگي اعرف
ازود من سنة وين خلصتيها وشلون خلصتيها
دورتچ بكل كتر
ما لگيت ليچ اثر عفتيني حاير بزماني ومشيتي عدل

ما گلتي هذا شني راح يصير
يدور اعلة برائتي عبن تدريني ما چان عتقت حالچ إلا لأني عندي أمل ولو واحد بالمية انتِ بريئة

لو يمشي ويدور اعلية
ويا ريت بس انتِ لا بنيتي ببطنچ يعني هناااا الضربة صارت ثنتين همينة انتِ وهمينة ضناي

باوعتلة وسكتت
من أول گلت حقة بس هاي المرأة كرامتها تظل فوگ كل شي حتى لو على حساب المقابل

- احچي غسق ااااحچي
- بس لتصيح بنتك نايمة خطية لتخترع
- احچي

- ما عندي حچي
انت دتشوف نفسك صح واني هم اشوف نفسي صح انتهى الكلام بعد ميحتاج نحچي بي

باوعلي بعصبية وضرب الميز بقوة
دار ظهرة علية يفرك بوجهه ويستغفر خفت منة حيل
المصيبة هو مديشوف نفسة صح

بس شسوي احتاريت ما عندي جواب
هم هو قاضي وهم ذكي
يعني مستحيل راح اگدر علي لو شما حاولت وانتهى

- غسق
- حچاها وظهرة علية جاوبتة نعم
- سولفي وين چنتي وشلون خلصتيها بهاي السنة

- تعال اگعد خو ما نحچي واگفين

رجع گعد مقابيلي
حچيتلة كل شي من طلعت من بيتة ذاك لحد ما اجة البيت خالة شمس ولگاني يمهم

چنت احچي واستذكر كل شي صار وياية
من البچي نفسي خلص
گمت احچي الحچاية بالگوة بحيث تطلع من صدري بشكل متقطع ما ادري شلون افتهم علية

بس كملت گام بـ أتجاهي
سحبني من ايدي الحضنة شگد چنت زعلانة
ما گدرت إلا ما احضنة بكل قوتي
حتى افرغ گلبي بـ أكثر مكان ارتاح بي وأكثر مكان اشتاقيتلة وراح اظل اشتاقلة  

- بسچ بوية بسچ
العملتي چبير كلش غسق بس ربچ وأهل بيتة وگفوا ليچ

ربع ساعة وهدأت
رحت اغسل وجهي گعدت رقاوي
ركضت للغرفة اريد اروحلها لتوگع لا سامح الله لگيت إسحاق شايلها وهي تضرب بوجهه مدري شجاها

اخذتها من ايدة بچت !!!
- اتركيها تريديني
- هي يا الله يجي خلاف يركب ع الچتاف بس ادري كل شي بالحظ واني حظي يخبل اعرفة

طلعت من الغرفة اهز بـ أيدي
تسع أشهر وشفت الضيم بيها تالي بيوم واحد باعتني علمود ابوها حلوة هاي والله لا والأخ فرحااااان

مو بـ أيدي ظليت ضايجة منة
لليل وهو يلعب وياها
شگد ما احچي ما اگدر اوصف الفرحة الشفتها بعيونة من شافها ولحد ما تعبت من اللعب ويا ونامت

العلاقة بيناتنا كلش متوترة
هو أرحم بس اني كلما اشوفة اذب حچاية ويبلعها لا يجاوبني ولا يصدر من عندة اي رد فعل

اريد اتعارك يربي
مدينطيني مجال ولا يسوي شي يخليني اطلع ضييم السنة الراحت بحضرة جنابة

لليل نام بالصالة
عود چنت متحزمة بس يدخل للغرفة
گبل اخذ بنتي واطلع للصالة من كل عقلي اگدر علي

ثاني يوم اخذني الشمس
ابد ماكو كلام يجمعنا حتى ما سألتة ليش جبتني لهنا

من وصلت استلمتني شمس
حچيتلها كل شي حتى سالفة مهيمن وجماعتة
ما اخاف من شي بعد كل الي صار
مستعدة اواجه الكل بالماضي وأولهم إسحاق
هاي اني وهاي حياتي
اليتقبلني اهلاً وسهلاً والـ مايريد يتقبلني الله ومحمد و12 معصوم ويا

احچيلها وابچي وهي تبچي وياية
بس خلصت حضنتني
- هاي شصاير بيچ غسق واني الثولة معترضة على ضيمي انطم احسن والله

- الي شفتي هم مو قليل
- لا اااابد صح مو قليل بس ميجي قطرة من قهرچ

شلون تحملتي هااا شلووون
يمكن اني لو بمكانچ اموت ما اتحمل والله
لا وما اكتفوا بهالشي
اجوي وشمروا عليچ تهمة اكبر من قذارتهم الله ينتقم منهم الحقرررراء

- مسحي دموعچ وركزي وياية
منو تتصورين سوة بية هيچ عقلي راح يوگف والله

- شبيچ انتِ تعقليها إسحاق ما وصل الهم
اكيد وصل
وإلا مچان تعامل وياچ بـ هالحنية بس تريدين الحق الرجال معذور والله معذور

هسه اني داصفنلها
مجرد بس شفت اثار على رگبة صخر وألف مرة برر واعتذر وما گدرت اسامحة وبعدني خايفة

هو شلون
يعني لو انتِ لگفتي موبايل عندة وبي كل هالقذارات تتأكدين من خيانتة لو تگولين عندي ثقة بي

- يا ثقة يمعودة
هو اني بس سمعتها گالتلة وينك حبيبي تخبلت

- عود صدگ هاي منو ؟!!
- مرتة شي اكييييد اگص ايدي اذا ما طلع خاين ابو النسوان

- هههههه اعصابچ
- اعصابي شنو ليش ظلت اعصاب والله يا ربي

ولچ فر السالفة علية ما شفتي
والله شكيت بيچ شكيتي بية سودة علية برررررريء

يعني مخابرات تالي الليل
وروحاتة البغداد عبالك راس الشارع يوميا زايرها
والبيت اجي الگى نظيف
واخر شي وين صرت حبيبي حبتچ حية يا حييية

بس شنو شمس
هاي يعرفها من بعد موت مرتة مبين ترى
رجال ويحتاج مرة
تلگي تزوجها مؤقت ولطشت بي شافتة ميتعوض ولا تعوفة بعد حتى لو ميريدها

واني الغبية عبالي من صبر علية رجولة
طلع عندة البديل
عزززة كلما اتخيلة وياها ويجيني اتمنى انتحر وربچ

- شبيچ اصبري يجوز عندة تبرير
- حبيبي !!!
- هي هنا المشكلة ابن الشيخ وحبيبي ما تترگع ااابد

- يعني شنو هسه احچيها
- خاين خاين
- اي خاين وصخر هم خاين ديري بالچ ترجعيلة والله ساعتها صدگ تصيرين غبييييية شمس

صاحت خالتها من بعيد
- ظلن بـ هالعقلية اخير شي تگابلني وتگعدن ثولات

شمس.. ههههههه ترزلنا
غسق.. عادي عود عبالها مثلها نتحمل ضيم الرياجيل

ظلت طول اليوم شمس تتذكر وتبچي
تندمت حچيتلها
بس ياربي شگد هالبنية طيبة ونقية
يمكن صار وياها هالشي لأن تعتبرني اختها مثل ما اني اشوف بيها اخت واكثر

أسبوع وإسحاق ممبين
طلعت ويا شمس اشتريت بأسمها سيم كارت واخذت أرقام البنات منها حتى اراسلهن من تنحل السالفة

اليوم من الصبح اتصل إسحاق بشمس
گال جاي بالطريق
ما ادري وين يريد ياخذني تجهزت وظليت انتظرة

ما طول بالتسعة وصل الظاهر طالع من الفجر
شلت رقاوي وسلمت عليهم
صعدت بالسيارة دگ موبايلي گبل باوعلي ابتسمت فرصة واجتني لازم استغلها

- هاا شنو موبايلي هذا عندك أعتراض ؟!!
فتحت البصمة
هاك دور بي اخاف تشك من حقك محد يلومك ترى

- ردي
- ما ارد ميعجبني

باوعت هاي شمس جاوبتها
- ها شموسة
- الملهية مالت رقية نسيتيها
- يااا همزين گلتيلي

سلمت عليها وسديت الخط
گلت الإسحاق يرجع ما قبل وگف بالطريق واشترالها

چانت تصرخ من البچي بس حطيتها بحلگها سكتت
باوعت علي مستغربة
إسحاق وين رايحين دفهمني شبيك !!!
رد وعيونة على الطريق
اليغلط غلطة لزوم يتحاسب اعليها وحان اليوم موعد الحساب ي ام رقية.....

يتبع

لتنسووون ⭐⭐⭐⭐⭐⭐
كل الحب ❤🥀