رواية ودي بدفا صدرك اصيح لين يهلكني البكا و أتعب و أنام الفصل الثلاثون 30 - بقلم HaboOoshy

ضمنيّ !
بـ : شُوويشّ محححححححتَاجّ آمؤؤت !
مؤؤت
يَفرقْ عن مفَاهيمً آلبشرّ !
مؤ ؤ ؤ ؤ ت ..?
فيه أحزاني تمؤؤؤؤت " !
.. وأرجَع لـ : دنياّي
.. وّ ..
أحزانيّ .. صصفرّ .. !
ضمممنيْ
مآ قدِررتُ آنٍـآم ..!
ضضمّنيْ
ودِي بـ دفَـآ صْدرِك آصيَيَـح '
لييّـن يِهلككنيْ البكًـآ
.. و ..
آتعبْ :وآنـآاِاِآِاِم</3

تسندت على الحاجز الحديدي المكشوف عالساحة و بهاللحظة صابها تبلد إحساس غير طبيعي !
مر على مسامعها صوت المراقبة و هي تقولها ( احنا نبي نساعدك يمكن فعلآ انتي محتاجة تحاليل تفيدك ! )
تحاليل وشو ؟
تحاليل تثبت ما إذا كانت ( ذكر أو أنثى ) !
على هالأفكار ، أخذت نفس عميق تحاول تنزل منها دمعة ، دمعة وحدة تكفيها عن هالعذاب اللي عاشته مدى سبع سنين متواصلة !
صحيح كانت دائما تراودها توقعات كونها ذكر أو أنثى ، و لكثرة بحثها بهالموضوع و قرايتها لقصص كثير بنات نفس حالتها و بالنهاية اكتشفوا انهم فعلآ محتاجين عمليات ترجعهم لأصلهم ( ترجعهم لطبيعتهم الذكورية ! ) ، حطت ببالها انها إحتمال كبير تكون نفس حالتهم و لا جا الوقت و انكشف حالها لا تنصدم و تنهار !
لكن لما جاء الوقت اكتشفت مدى ضعفها !
أبد أبد ما تقوى على تقبل هالحقيقة ،
قاطع أفكارها صوت من وراها : تــــــــــالا ! شصاير ؟
غمضت عيونها و تجاهلت زوجة عمها ،
مريم قربت منها و بخوف : تالا ردي علي ، اتصلت حصة تقول الإدارة طالبيني و خوفني كلامها !
استمرت بتجاهلها و لا كأن أحد موجود ،
طلعت من غرفة الإدارة فاطمة : تعالي هنا مريم ، تفضلي
بمجرد ما دخلت مريم و تصكر الباب ، ارتعشت أطرافها بتعب و ببالها تتخايل ردات فعل أهلها ، جدها و جداتها مع عمامها ما تتصور ردة فعلهم من عنفها ، هم من الله مستحقرينها بسبب تصرفاتها الصبيانية و بسهولة بيصدقون اللي انقال ! ، أبوها رح تكون ثقيلة عليه أكثر مماهي ثقيلة ! ، دايم يراودها إحساس انها مجرد ثقل على أبوها أو مجرد بنت تجيب له المصايب و الهم !
بهاللحظة طرى ببالها ( بدر ) ، و قبل لا تتوقع ردة فعله ، محت صورته من بالها ، مين يكــــــــــون علشان تفكر فيه ؟ - بــــــــــحريقــــــــــة تحرقــــــــــه إن شاء الله و توديه لنار جهنـــــم ! -
_ : تــــــالا !
التفتت عالصوت ( المحبب جدآ لقلبها ) و ارتسمت عليها إبتسامة لا إرادية و كأن الدنيا تقولها - دآم ميـــــرآ و شــــوق معك أجل الدنيا مازال لها نكهة ! -
ميرا بخطوات سريعة و يدينها محملة بالساندويتش و العصير و الموي : وش يبون منك ؟
تالا هزت كتوفها : ناس متخلفة ! . . الله يآخذهم ! - التفتت عالأصوات الجاية و كانت شوق و معها ريان و منى و ملاك - بهمس لــ ميرا : وش جابهم ؟
ميرا : مدري ، بس يللا كملي شفيهم !
شوق تقاطعهم : بنات شصاير عمتي مريم هنا !
ميرا تضربها على كتفها : أووووووه انتي انطمي خليها تكمل !
تنهدت تالا و حكت لهم كل شي بــ وجه بــــــــــارد ، : بس ذا اللي صار !
شوق بوجه باهت : تحليــــــــــل ؟ - ضحكت بعدم إستيعاب - هههههه ياشيخة وش يحسون فيه ؟
تالا ببرود ظاهري : مع نفسهم - التفتت على ميرا اللي كانت ساكتة طول الوقت وبققت عيونها و هي تلمح دموع ميرا - ميــــــــــرا ! وش فيك ؟
ميرا تمسح عينها لا تنزل دموعها و بحشرجة صوتها : إذا انتي مو مستوعبة الوضع اللي فيه ، تذكري ان عندك أهل يترصدون لأخطاءك ! ، انتي عارفة عمتي حصة مارح تترك أحد إلا و تخبره ‎! - سكتت شوي و أردفت - انا عارفتك ، من داخل تموتين بس ما أدري ليش تكبتين ؟
عم الهدوء بينهم و كلن مشتت ، لين قاطعته ميرا و هي تحط الساندويتش و العصير بيدين تالا : خوذي كلي ، عارفتهم مارح يطلعونك لين ينتهي الدوام وانتي ما أكلتي شي !
تالا ترجع الأكل لميرا : أقول بس شيليه معك ، أصلآ ما بقى شي عالدوام !
ميرا : بتآكلينه و لا كيف ؟
تالا بضيقة صدر : تكفين مالي خلق لشي !
سحبت العصير ميرا و قالت وهي تفتحه : ماتبينه أنا جوعانة ! ، ذي نعمة محد يفرط فيها !
بمجرد ما انتهت آخر كلمة ، انفتح الباب و طلت منه مريم و وجهها شاحب و مقلوب !
تقربت من تالا اللي مجرد ماشافتها عطتها ظهرها ، و بصوت واضح فيه الصدمة : تالا ! شسويتي ؟ ، انتي مستوعبة اللي سويتيه ؟ - هزت راسها إستياء و بصوت مقهور - حسبي الله عليك كان بتوطين روسنا !
قاطعتها شوق : عمتي مصدقة اللي انقآل ؟
مريم بقهر واضح : شلون ماتبيني أصدق ؟ و أستاذة مناير ( أستاذة الجغرافيا ) بنفسها تقول انها ارسلت تالا أمس لتشيك عالكهربا و مارجعت إلا متأخر و معها ذيك البنت المسكينة و حالها منعفس ؟
ميرا بإنفعال : ياجعلها بحريقة تحرقها ذي المسيكينة ! ، يتبلون على بنات الخلق و نسوا ان فوقهم رب !
قاطعتها مريم بعصبية : لا تقولين ناسيين ربهم و بنت عمك مسوية الحرام ! انتي عارفة انها تنطرد من رحمة الله ! - أردفت بعد سكوت لثانيتين - وإذا هي بريئة مثل ما تقولين ورا ماتدافع عن نفسها !
تالا تكلمت أخيرآ و أعصابها مشدودة : أصــــــــــلآ انتي وش دخلك ؟ لا انتي أمي و لا أبوي ! ، لو أسوي كل جرايم العالم انتي و الـــ******** - وهي تأشر على باب الغرفة - مالكم شغل فيني - و بمط للكلمة - مـــــــالـــكم شغــــــــــل !
صفقت مريم كفوفها ببعض : و تقولين بريئة ! ألفاظها وحدها مصيبة ! بس والله يا تالا هذاني أقولك لو ياصل العلم لجدك لينحرك بدم بارد !
تالا تحرك يدها بتطنيش : يا شيخة !
مريم تنهدت بهم و نزلت تاركتهم وراها ، جلست على أحد الكراسي و هي مو مستوعبة اللي صار ، ' معقــــــــــولة ! ، معقولة توصل لهالحد يا تالآ ! - أخذت نفس عميق - هذا لاننا ما وقفناها عند حدها ! -
مسكت جوالها و رفعته لأذنها بعد مادقت على زوجها يوسف ، و عينها تطيح على بنت طويلة جاية لعندها ، ما اهتمت لها و ثواني ووصلها صوت يوسف : السلام عليكم
مريم : أهلين و عليكم السلام ، هآ يوسف متى تجيني ؟
يوسف : والله يا قلبي مشغول ، ما ظنيت أقدر أجيك
بقلة صبر و عينها عالبنت اللي تحوم حولها و كأنها تبي شي : يعني أضل هنا أنتظر لمتى ؟
يوسف : معليش ما بقى غير ربع ساعة على طلوع البنات ، انتظري لين يجي واحد من العيال و ياخذكم !
بتردد و الفكرة طرت عليها فجأة : بدر انتهى من دوامه ؟
يوسف : بعد شوي بينتهي ، بوصيه يجيبكم - و كأنه تذكر - إلا وش قالوا لك ؟
تنهدت : لا تشغل بالك ، بعدين أخبرك
يوسف : اوكي بأمان الله حبيبتي
مريم : مع السلامة
حطت الجوال بالشنطة و التفتت عالبنت اللي جلست بجنبها
ريان بهدوء : خالة ممكن شوي من وقتك ؟
مريم عقدت حواجبها و بإهتمام : تفضلي !
ريان بهدوء و رزانة : يا خالة على أي أساس صدقتي اللي انقال عن تالا ؟ ، ما سمعتيها و لا تفاهمتي معها و لا شي ! ، بس مجرد ما قالوا لك على طول هبيتي فيها !
مريم تقاطعها بحرقة قلب : والله يا بنتي منيب مستوعبة ! بس والله مابي أظلم البنت المسكينة و أوقف مع قريبتي وكل شي يثبت صدق البنت !
ريان : طيب نفترض صحيح كلام البنت ، بهالأسلوب تعاملون تالا ؟ ، و ما يحتاج أخبرك عن أستاذة حصة و وشلون وقفت بوجه تالا ! ، انتم أهلها و بمقام أمها المتوفية مفروض تدارونها و تحسسوها بالحنان و تكلموها و تخلونها تطلع اللي بقلبها ، أنا اللي ما أعرف تالا كثير حاسة من عيونها انها شايلة شي كبير بقلبها ! ، شي طبيعي دامكم بعيدين عنها و محد مداريها بترتكب الأخطاء ! ، هي تشوف ميرا و عندها أمها و عمتها معطينها كل الحنان و شوق انتي وجداتها معتبرينها بنتكم ، طيب وهي ؟ مين معها ؟ لا تقولين أبوها لأن الأب عمره ما حل مكان الأم ! ، هالشي أكيد محسسها بالنقص و هو السبب ورا انها تكون بنت مسترجلة ! ، - أخذت نفس عميق و تابعت - الإنسان لما يغلط مايبي الكل يبعد عنه و يستحقره ! ، يحتاج من يشد على يده و يعلمه الصح و الخطا بككككل حنان ! - سكتت شوي ثم تابعت بإبتسامة و الجرس يعلن نهاية الدوام - آسفة خالتي أدري طولت عليك بس و ربي من قهري عاللي صار ، و ياليت دايم تحطون ببالكم ان تالا أكثر وحدة محتاجة تكونون معها - وقفت - أنادي لك البنات خالتي ؟
مريم و لا زالت تحت تأثير كلام ريان ، رفعت راسها ببطء و بهمس : إي الله يرضى عليك ناديهم
و بمجرد ما أبعدت ريان ، تنهدت بألم و صورة أم تالا ما فارقت خيالها ( الله يرحمك يالغالية ، الله يرحمك )
التفتت عالصوت الجاي وكانوا البنات جايين و معهم شنطهم ، لبسوا عباياتهم و الصمت هو سيد الموقف
رفعت تالا عينها و طاحت على مريم و هي تناظرها نظرات غريبة ، طنشتها تالا و لبست عبايتها
قطع الصمت رنين جوال مريم ، ردت بعد ما شافت اسم ( بدر ) : هلا . . . . . إي خلاص الحين نطلع لك
قفلت الجوال على وصول حصة بعبايتها ،
طلعوا من المدرسة ، و بمجرد ماشافت تالا السيارة السوداء غمضت بعيونها بقوة و هي تزفر بضيق
مرت من جنبها شوق : سيارة بدر مو ؟
تالا بغيض مشت مع شوق : ذا اللي ناقصني !
عند بدر ، نسف شماغه و بإبتسامة و عينه عالمرايا : كيف ؟ مضبوط !
تركي بملل مسند كفه على خده : ياشيخ وربي مادرت عنك ! ، مابي أجرحك بس أقولها بوجهك تراها ما تدانيك
ناظره بدر بطرف عينه : ياليت تكرمنا بسكوتك قبل لا أنزلك من السيارة !
تركي بسخرية : ميت على سيارتك الحين ، ترى كلها خطوتين وأوصل للمستشفى و آخذ سيارتي
انفتح الباب و دخلت حصة ، بدر بإبتسامة : ياحيا الله ، بس وراكم اليوم كثار !
دخلت تالا من الجهة الثانية و صارت ورا تركي ، ميرا برى متكتفة : وأنا ، مالي مكان ؟
تركي : انتي روحي بيت أمك ، مالك مكان
مريم و كأنها تذكرت : إيه صحيح خبريها بكرى جايينها !
ميرا مبققة عيونها : من صدقكم طارديني ؟
بدر : مافي مكان وين تبين تدخلين ؟
ميرا : طيب جوالي ! مقدر أعيش من دونه
تركي : اوكي بجيبه لك ، بس يللا انقلعي !
ميرا : و ملابسي بعد ، قل لملاذ تجهزها
تركي : ياليــــــــــل !
مريم : خلاص انتي روحي و بنجيب لك كل شي !
مشت ميرا خطوتين ، و بثواني رجعت لهم : لحظه لحظه ، إذا تذكرت أي شي برسل لك من جوال أمي
فتح تركي الباب و من نظراته المعصبة فزت ميرا رايحة ، تأفأف بضيق و رجع للسيارة و قفلها : مــــــــــرض !
حرك بدر السيارة : ماقلتي لنا يا عمة وش جابك لمدرستهم ؟
جت حصة بتتكلم لكن مريم قاطعتها و هي تحط يدها على فخذها : ماعليك ماهو ذاك الشي المهم
تركي : والله اني متأكد هالبنات هببوا بمصيبه و طلبوك تشوفين لها حل !
حصة بعد ما شافت الرسالة اللي جاتها عالواتس من مريم ، زفرت : خلها على ربك
تنهدت مريم براحة بعد رد حصة ، الحمدلله يعني فهمت رسالتها اللي كان محتواها ( لا تحكين بالموضوع الحين ، خليه بيننا و بين أحمد و هو يتصرف )
عم الصمت لدقايق قبل لا تقطعه تالا و هي مقدمة جسمها لكرسي تركي : تركي ، عطني جوالك شوي
تركي هز راسه نفي : مافي !
غمضت عيونها بقهر : بلا ملاغة ، بس أبي من أبوي شي !
تركي بإصرار : نو ، من بعد ذيك المرة حرمت اعطيك
خذت نفس تحاول تهدي نفسها لا تقوم و تفترس عليه و تاخذ الجوال غصب ، لكن قبل ما تنطق بشي ، انمد قدام عيونها جوال من نوع جالكسي ،
بربكة رفعت عينها لصاحب الجوال و باغتها صوته : خذي استخدميه ، لا يذلك ذا المعفن
تركي ناظره بطرف عينه : ترى يا بدر للآن محترمك بس عشان زوجتك موجوده !
اكتفى بدر بضحكة صغيرة و كلمة ( زوجتك ) أنعشت روحه ، بنفس الوقت انمدت يد تالا برعشه و سحبت الجوال من بين أصابعه
و بمجرد ما صار بين يدينها داهمها سؤال غريب ( ليش أخذته ؟ ) أصلآ هي ما تبي أبوها و لاشي ، بس طبع فيها لا توترت تمسك الجوال تطلع حرتها فيه و أقرب شي لها جوال تركي ،
و فجأة حصلت نفسها تكتب رقمها ، و بمجرد ما كتبت أول خمس أرقام ظهر لها اسم ( توتة البدر )
مجرد ماشافت الاسم ، رغبتها بالبكاء زادت ،
من وعت على الدنيا و هو دايم يقولها ( انتي توتة البدر ) ، و بالمقابل هي ترد عليه ( وانت بدر تالا )
وين البدر الحين ؟
ليش هدم كل شي بيدينه ؟
بعد مرور دقيقة ، مدت الجوال لبدر : مدري شفيه ، شكله معلق !
بدر اللي كان مشتت ماهو عارف يركز عالطريق أو يضل تحت سكرة صوتها المبحوح ، مد إيده لورا وأخذ الجوال منها ، و بمجرد ماطاحت عينه عالشاشة عقد حواجبه و هو يشوفه مفتوح عالملاحظات ،
تركي : ركز عالطريق لا تقتلنا !
بدر وعينه عالمكتوب : طيب بس لحظة - عاد قراءة المكتوب مرة ثانية ( إذا فضيت اليوم ياليت تجي بيتنا ) ، شعور جميل خالجه و هي تطلب منه يجيها ، أول مبادرة كانت منها : )
كتب تحت كلامها ( بعد صلاة العشاء ؟ ) ،
رجع لها الجوال و بمجرد ما شافت رده : لا خلاص مابيه
أخذ جواله و إبتسامة هادية تزين وجهه
و خلال ربع ساعة وصل الجميع لبيته

،

وش تســــــــــوين ؟
شهقت بخرعة من صوته اللي باغتها فجأة و هي بقمة سرحانها ، لفت عليه بنرفزة من ضحكته العالية على خرعتها : وليــــــــــد يالسخيف ! مافي شي يضحك !
جلس على طاولة الطعام اللي بطرف المطبخ : آآآآآخ ليتني صورتك ، لقطة ماتتفوت !
كاترن ترجع للمواعين تغسلها : ســــــــــامج !
وليد بتعقيدة حواجب : وش عندك تشتغلين ؟ ، العاملات يكفون !
كاترن معطيته جنبها و هي مستمرة بالتنظيف : ما أدري ، أحس بالمتعة وانا أشتغل هالشغلات
عقد يدينه على صدره : أنا لو أدور بالعالم كله بنت بنشاطك مالقيت
بإقتضاب : اللهم لا حسد
ابتسم و لا علق ، تعلقت عيونه عليها ، فعــــــــــلآ هالإنسانة فتنة ! جمالها جذاب بشكل غير طبيعي ، جت بباله صورة ( سحــــر ) بالمرة الوحيدة اللي شافها بدون حجاب ، كان بحديقة بيتهم ينتظر لجواد يطلع له ، و أثناء ماهو واقف انفتح الباب الخارجي و دخلت منه وهي تفصخ طرحتها و علامات الضجر واضحة عليها ، و لأنها ما انتبهت له استمرت بفتح أزرار عبايتها و شالتها لين ظهر له كامل زينتها بفستانها القصير و بدون أكمام و شعرها الفكتوريا معطيها شكل أصغر من عمرها ، و خلال دقيقتين اختفت من قدامه و صورتها أبد ما فارقته لا بخياله و لا بمنامه !
بدون إحساس منه صار يقارن بينهم ، و بدون تفكير ( كاترن ) كانت الأجمل بعينه ! ، سحر صحيح جميله و حلوة لكن عند كاترن مافي مجال للمقارنة !
صحى من سرحانه و شال عينه عنها ، أستغفر ربه و هو يشتت نظراته ، فعلآ الحجاب يلعب دور !
أخذ نفس عميق و هو عازم يفاتحها بالموضوع : كاترن !
لفت عليه و هي تنشف يدينها : همممم !
وليد : عاجبك وضعك كذا ؟
عقدت حواجبها و هي تجلس قدامه : ايش تقصد ؟
وليد نزل عينه للكوب اللي قدامه و هو يلعب فيه : مابيك تفهميني غلط ، بس صدقيني ما أقول كذا إلا لأنك تهميني ، و تهميني كثير بعد ، - أردف بعد ما سكت شوي - حجابك يا كاترن ليش متهاونة فيه كثير ؟
مجرد ما نطق بكلمه حجاب ، عفست وجهها و بلا مبالاة : وليد بليز إذا بتكلمني بهالموضوع ، أقولك من الحين مارح تستفيد ، قناعاتي و ما أغيرها !
وليد : يعني لهالدرجة مستسخرة نفسك ؟ اللي يسوى و اللي مايسوى يشوفك و كأنك بضاعة معروضة ؟
زفرت بضيق : تفكيرك المتحجر اللي يقول هالحكي
هز راسه بحسرة : خسارة تفكيرك كذا ! كنت أتوقعك أرقى !
كاترن : اوكي ممكن تغير الموضوع ؟
وليد اكتفى بزفرة و تابع لعبه بكوب الشاي ،
استمر صمتهم لخمس دقايق قبل لا يقطعه وليد و كأنه تذكر شي و هو يطلع جواله : صحيح كاترن بسألك عن هذي - رفع الجوال لمستوى عينها - مين تكون ؟
ثبتت عينها عالجوال و هي تشوف صورة البنت : ليش تسأل ؟
وليد و صورة البنت اللي شافها مع جموعة صور أول ما جا هنا ما راحت أبد : بس كذا ، خاطري أعرف
كاترن بنبرة هادية بعد ما نزلت راسها : خطيبه ماجد
بقق عيونه : أممممن عاد ! - و بحسرة ممزوجة بإستهبال - يعني فاتتني !
بنفس نبرتها : ماتت
بانت الصدمة على وجهه ، لكن سرعان ما قال بهمس و هو يمسح صورتها من جواله : الله يرحمها - و بعد صمت لدقايق - بنت مين ؟
كاترن : بنت خالك حسام
بقق عيونه : أختك ؟ - و بعدم إستيعاب - لمار خبرتني ان خالي حسام ما عنده غير بنتين ، انتي و أختك المتزوجة !
تنهدت : هي وحدة منهم
وليد و الدهشة مرسومة عليه : أختك أم نواف ميته ؟ لحظة أصلا شلون خاطبها وعندها عيال شباب ؟
كاترن : مهيب هي ، أنا
وليد فتح فمه بفهاوة ، و سرعان ما كبت ضحكة كانت حتنفلت منه ، أول شي جا بباله ان كاترن يكون فيها إعتلال نفسي ، و فسر تجاهل العائلة لها بهالشي !
رمى عليها نظرة شفقة و طاحت عينه عليها و هي صادة وجهها عنه و دمعة معلقة برمشها تحارب لتنزل ، تنهد بحزن و قام واقف

،
'

_ : مــــــيرا ، ميـــرا اصحي المغرب دخل
فتحت عيونها بضيق و هي تستوعب المكان اللي هي فيه ( إيييييه ، عند أمي )
استعدلت بجلستها و هي تفرك عيونها : الساعة كم ؟
مرام : ست و ربع ، قومي صلي اللي فاتك
فزت من السرير : ياربـــي ، استغفر الله ورى ماصحيتوني
مرام : صلي أولآ بعدين تكلمي
دخلت الحمام - الله يكرمكم - توضت بسرعة و صلت صلاتها الفايته
و قبل ماترفع من سجودها الأخير ، قالت بقلب صادق : يارب افرجها على تالا و يسر امرها ، و يارب اجمعني بمشاري في القريب العاجل ، يـــارب
رفعت من السجود و أتمت صلاتها ، فسخت الجلال و بعد ما رتبت شعرها طلعت من الغرفة
قابلت مرام بالمطبخ : مروم ، أمي وين ؟
مرام : بالمجلس ، الظاهر رائد عندها
ميرا : طيب زوجك موجود ؟
مرام : موجود بس بشقنا ، يعني خذي راحتك
ابتسمت ميرا : اوتسي
مرت من الصالة و الهدوء معتري البيت ، عكس إزعاج بيت جدها بالضبط !
تعدت الصالة و هي قريبة من المجلس سمعت صوت أمها مع صوت راكان ، داهمهتها ابتسامة تحس براحة فضيعة بعد كلامها مع راكان
دخلت المجلس و بإبتسامة و وجهها مفقع من النوم : صبــــــاح الخير ،
راكان رفع راسه لها : صبـــاح النور - عفس وجهه - اللهم سكنهم مساكنهم
ميرا ترمش بغرور ولا زالت واقفة عند الباب : أترفع عن الرد
فجأة حست أمها مثل الريح الهايجة هبت عليها و دفتها لين دخلتها الصالة !
ميرا بفجعة : يمـــه شفيك ؟
أمها تسحب أذونها وهي تصارخ : ياجعلك منيب قايلـــة ، تدخلين عالرجال كذا ؟
ميرا بألم : وييييي يا أمي تعوريـــن ! ترى كلها راكان
ضربتها على كتفها : وراكان محرم لك ؟ تدخلين عليه كذا بلا حجاب و ستر ؟
ميرا عالكنب تفرك يدها : آآآآآخ يمه راكان مثل أخوي من وعيت عالدنيا وهو ناشب لي
تخصرت أمها : لا والله ؟ لا يكون بس بالبيت دايم تطلعين له كذا ؟
ميرا : لا والله بس أحيانا !
أمها بوعيد : والله يا ميرا لو تدخلين عليه كذا مرة ثانية لأغضب عليك ليوم الدين - و راحت لغرفتها و هي بقمة زعلها -
ميرا تفرك مكان الضربات و تكلم نفسها : آآآآخ حشى كأنه واحد غريب ! بالنهاية كلها راكان !
وقفت عند المرايا وهي تهف على وجهها : لا تبكين ، لا تبكين يا ميرا ، خلاص كنتس وحدة بزر تبكي على أي شي ، - ناظرت لنفسها بعمق و فجأة انطلقت منها ضحكة قالت و هي تبعد : والله نفسيات !
راحت للمقلط ناوية تسولف مع ملاك ، و بمجرد ما فتحت الباب تفاجأت بـ منى و ريان و معهم بنت صغيرة جالسين مع ملاك ، تداركت دهشتها بإبتسامة صغيرة : عادي أجلس و لا موضوع خاص ؟
ملاك : أخسس من متى الإستئذان ، ادخلي عادي
ميرا بضحكة صغيرة و هي تجلس قريب منهم : لا والله بس خفت اني أكون نشبة - أرفت بعد ماشافت البنت الصغيرة - ياقلبوووســـي هالحلوة بنت مين ؟
منى بإبتسامة : بنت أخوي ،
ميرا تأشر لها : تعالي حبيبي
ريان أبعدتها عن حضنها عشان تروح لميرا
ميرا بعد ما شالتها بحضنها : ايش اسمك يا حلوة ؟
تالا بصوتها الطفولي : تالا
باستها بقوة : ياقلبوووووسي - طلعت جوالها من جيبها و فتحت عالصور ، و هي تقرب الجوال لوجهها - شفتي هذي سميتك !
استمرت بملاعبة تالا الصغيرة لربع ساعة ، و فجأة وهي بقمة اندماجها مع تالا طرت ببالها فكرة عالطاير
بسرعة أخذت الجوال و فتحت الواتس و هي تبحث عن اسم ( بدر )

،
'

أبعدت اللحاف عنها بعد محاولاتها الفاشلة بالنوم ، أصلآ شلون تنام و روحها مشتتة ؟ حاسة بإختناق كبير يكبت على صدرها ، قامت من السرير و اختناقها يزيد ،

نزلت بخطوات مرتبكة و هي ببداية الدرج وصلها صوت حصة الثاير !
زفرت بضيق ، و كملت طريقها لين وصلت عند باب المجلس ، هاجمها بعنف صوت حصة من الداخل : يا أحمـــــــد ياخوي صدقني بنتك مهيب طبيعية ! يا تسوي لها فحص يمكن فعلآ جسمها من الداخل ذكوري ! أو بنتك فيها إعتلال نفسي يخليها تميل لبنات جنسها ! ، وربي اني صرت أخاف على بنات عمها منها ! انت لأنك أبوها مب مستوعب الوضع ! بنتك شاذة ، تعرف وش يعني ؟
ارتجفت يدين تالا بحرقة من كلامها و قبل لا تكمل دخلت تالا و ببرود غريب : اوكي أنا ملعونة أنا شاذة أنا ****** وأنا ****** أنا كل شي غلط بهالدنيا بس انتي ياليت تتفضلين لبيتك بدل ما تجلسين ببيت وحدة شاذة - و بسخرية - يمكن لا قدر الله هالملعونة تسوي لك شي ! و لا أقول ورا ماتلحقين زوجك اللي يجري ورا الحريم - و بحدة - يالســــــــــــاحرة ؟
وقبل لا تكمل كلامها حست بشي حار يحرق خدها بشكل مؤلم ، حطت يدها على خدها تحاول تستوعب الضربة اللي جاتها من أبوها ، حست حرقة خدها تنتقل لقلبها ، مافي مشكلة أبوها يضربها أو حتى يحرقها بتتقبل ، لكن مو قدام حصة ، مو قــــــــدام حصــــــــــــة !
ببطء حركت راسها و طاحت عينها على أبوها و وجهه أسسسسسود ، مو أبوها اللي تعرفه أبد ، رغم غضبه الواضح إلا إن نظرة الإنكسار قدرت تلمحها ،
ما قدرت تتحمل هالإنكسار بعين أبوها و بهاللحظة استسلمت لكل شي و مشت خطوتين تبي تضمه ، تضمه و تبكي بحضنه و تطلب منه يسوي أي شي لها ، يقتلها ، يرميها يتبرأ منها أي شي و لا تشوف هالإنكسار بعينه ( إلا هالإنكسار يبه ، لا يقرب صوبك )
لكن يده حطمت كل شي و هو يرفعها ناوي يضربها مثل أول !
و بحركة لا إراية رفعت يدينها تحمي نفسها ،
لكن فجأة قبل ما تلمس خدها ، انسحبت بقوة لورا و قبضة يد غليظة تلتف حول ذراعها ، و بمجرد ما صارت خلف صاحب اليد ، انفكت يده من ذراعها بعد ما سببت لها ألم فضيع !
بدر ماسك يدين أحمد يهديه : أحمد تعوذ من الشيطان ، ما تنحل الأمور كذا !
حصة من وراهم تبكي بحرقة من كلام تالا اللي بالصميم ، قامت واقفة تلم عبايتها : حسبي الله عليها ، حسبي الله عليها من بنت ، أنا ما عاد لي جلسة ببيتك يا خوي
بهاللحظة دخل تركي اللي كان جاي مع بدر وانصدم بأشكالهم ، أحمد جالس عالكنبة منزل راسه و كفينه حول راسه ، و بدر واقف بجنبه و كأنه يهديه ، اللي فعلآ فجعه شكل أخته حصة وهي تعدل عبايتها و دموعها أربع أربع !
قال بدهشة : بسم الله شصاير ؟
أبعدته حصة عن طريقها و هي تسب و تلعن في تالا
زفر بضيق ( آها أجل السالفة تالا ، هذي حصة ما تعقل و تبعد دوبها عن تالا )
بدر رفع راسه لتركي و أشر له على أحمد
طلع من المجلس قاصد يروح لها ، وهو طالع بالدرج جات بباله صورتها ، ما ينكر أبد انه انصدم بشكلها !
تالا الصغيرة اللي يعرفها أبد مب ذي ! ، جسمها ذبل و هيئتها بشعرها البوي و بجامتها الشبابية الواسعة جدآ كانت صدمة بالنسبة له !
صحيح كان يعرف انها بستايل بوي ، لكن أبد ما تصورها بهالشكل !
تعدى الدرجات و دخل للمر اللي يودي لصالة الغرف العلوية ،
و بمجرد ما وقف عند المدخل كانت متسندة عالجدار اللي بجنبه ورافعة راسها لفوق و يدينها حول رقبتها و كأنها مخنوقة !
وجودها بهالشكل قدامه و بدون أي حواجز و تحت مسمى انها ( حــــــــــــلاله ) أربك مشاعره بحدة ، حس دقات قلبه تضخ الدم بعنف لشرايينه ، و بصوت ثابت رجولي : تالا !
شكلها توها انتبهت له ! هذا أول شي طرا على باله بسبب فزتها من مكانها ،
مجرد ما طاحت عينها عليه أبعدتها بسرعة ، و فضلت الهروب بهالحالة ، تقدمت بسرعة ناوية تدخل غرفتها ، لكن يده سبقتها وهو يمسك معصمها بشويش ،
غمضت عيونها ما تبيه يشوف نظرة الضعف فيها وبدون لا تلتف وقفت ، وصلها همسه رقيق : توتـــــة البدر ، ناظريني !
على هالكلمة تهدمت كل الحصون بداخلها ، أخذت شهيق بدون زفير و أخيرآ طاحت منها دمعة كانت حبيسة لطول ( سبـــــع سنين ) !
لفها له بشويش و لازالت كفه قابضة على معصمها ، و بإبتسامة حنونة و يده الثانية ترتفع لذقنها و ترفع وجهها : تبكين ؟
و قبل ما يترك لها مجال ترد ، سحبها بقوة ناحيته لين صدم راسها بأسفل صدره ، لف يده اليمنى حول رقبتها و اليد الثانية تركها تغوص بشعرها القصير
شد عليها بقوة لما حس بيدينها تلتف حول ظهره و شهقاتها تزيد ،
ما كانت حاسة باللي حولها ، و لاهمها هي الحين بحضن مين ، دام هالدفا يحاوطها ما يهمها غير تفرغ الكبت و الضيقة اللي لازمتها طول سبع سنين على هالصدر الدافي !
و كل مازاد بضغطه عليها زادت هي بدفن راسها جوا صدره ،

بالمجلس ~
تنهد تركي و عينه على أحمد ، مضت أكثر من نص ساعة من بدآ أخوه يشكي له و هذا هو أخيرا ساكت و كفه على عيونه
السالفة كل أبوها ما دخلت مزاجه ! ، تالا يعرفها كثير مستحيل تسوي كذا ! و حصة أكيد مكبرة الموضوع !
بس لا يكون الحادثة اللي صارت قبل سبع سنين مأثرة عليها و سببت لها الإنجراف ورى هالرذيلة !
نفض راسه من هالفكرة السلبية و داخله يقول ( لا ، مستحيل ) ، تنهد للمرة الألف و هو يذكر وعده هو و بدر - يمحون ذيك الذكرى من بالهم و لا ينفتح موضوعها مرة ثانية و لا حتى تطرى ببالهم - ،
قام واقف : بروح أشوف تالا ، أكيد متضايقة وانت زدتها عليها !
ماتحرك أحمد من مكانه و لا أبدى أي رد !
طلع تركي من المجلس و توجه للدور العلوي ، و بمجرد ما دخل الصالة العلوية طاحت عيونه على بدر جالس عالارض و بين يدينه تالا غايصة بحضنه وهي متشبثة بشماغه ، و ما يخترق سكون البيت غير شهقاتها المتقطعة !
شكلها بهالصورة كان قاسي على قلبه ، من عرفها وهي تالا القوية اللامبالية ! ، آخر مرة شاف دموعها بذاك اليوم المشؤوم ! ،
قاطع تفكيره همس بدر الخافت : افتح الغرفة
رفع حواجبه و بنفس الهمس : نايمة ؟
اكتفى بدر بهز راسه إيجاب ، غمر تركي الحزن عليها ، من شدة بكاءها نامت بدون لا تحس !
تقرب من غرفتها و فتح بابها ،
بدر أبعد وجهها بشويش عن صدره ، و ارتسمت إبتسامة حنونة على شفاته و هو يشوفها لافة طرف شماغه حول يدها و مثبتة يدها قريب من خشمها و كأنها تستنشق ريحة الشماغ ! ، نفس حركتها و هي صغيرة ، ما تنام إلا وحول يدها أي شي لكن الفرق انها كانت تمص أصبعها مع القطعة
رفعها بخفة بين يديه و بمجرد ما دخل غرفتها بانت الصدمة على ملامحه !
الغرفة من أولها لآخرها صور ( مصارعين و لاعبين ) !
مافي غير صورتين بالوسط ، صورة لها هي و تركي و أبوها ، و الصورة الثانية لشوق و ميرا و هم صغار ، أما الباقي صور اللاعبين و المصارعين !
تركي بعد ما عدل سريرها ، قال بصوت واطي وهو عند الباب : بعدين تعال أبي أكلمك
هز راسه إيجاب و نزلها عالسرير بشويش ، و قبل ما يرفع نفسه استوعب انها ماسكة شماغه ، بهدوء شال عقاله و سحب شماغه من راسه و تركه فوقها ،
طاحت عينه على بطنها المكشوفة ، بقق عينه بصدمة على العلامات الزرقاء المتفرقة ببطنها ،
جلس على طرف السرير و رفع أطراف البجامة ، بان الإستياء على وجهه ! ( معقولة يا تالا تاصل لهالحد ؟ ) ، بهاللحظة إحساس الأبوة غلب إحساس الحب اللي يكنه لها ، حس انها فعلآ بنته قبل لا تكون حبيبته !
لمح طرف شاش أبيض أعلى بطنها ، رفع بجامتها أكثر و انصدم بالشاش اللي يلف كل صدرها !
ما كلفه كثير و هو يفهم الموضوع ، هالشاش يستخدموه بعض المسترجلات ليخفوا معالم الأنوثة !
تنهد و هو يفتح طرف الشاش ( الظاهر المشوار معك يا تالا طويــــــــــــل ) !
بعد ما شاله كله عن جسمها ، سترها و غطاها باللحاف و لا زال الشماغ بيدها ، وقف و رمى الشاش بالزبالة الصغيرة ،
تقدم ناحية التلفزيون اللي قدام السرير بالضبط و فتحه على قناة ( السعودية للقرآن ) ، زاد من الصوت شوي
و قبل لا يطلع قفل الستاير و الأنوار و ترك نور الأبجورة ،
نزل لمستواها و طبع قبلة طويلــــة على خدها

'
،

بعد محاضرة الدكتورة الطويلة و نصايحها بالإهتمام أكثر بنفسها و أخيرآ انتهت من هالجلسة المملة بالنسبة لها !
طلعت من عيادة الدكتورة و عينها متلهفة لشوفته ، من يوم جت للمستشفى أبد ما شافته ، خاطرها تلمحه و لو شوي !
طلعت الأسنسير و انتقلت للدور ( 15 ) ، قاصدة غرفة ( دانة )
طقت الباب و جاها صوت دانه : تفضل
فتحت الباب و على شفاتها إبتسامة : سلام دنون
دانة رفعت راسها شوي و اتسعت إبتسامتها و هي تشوف شوق : أهلين
تقدمت شوق و باست خدها : شلونك الحين ؟
دانة هزت راسها : الحمد لله أحس اني أفضل كثير ، مدري ليه رافضين يطلعوني !
شوق ابتسمت : خايفين عليك
دانة بضيق : بس خلاص يكفي ، هنا أتضايق كثير ! - و بهمس خافت - بعدين ما بقى شي على ملكتي
بانت الصدمة بوجه شوق : هــــــــــــآه ؟ ملكتك ؟
دانة بإستغراب ممزوج بخجل : ليش ما خبرك تركي ؟
شوق بعدم إستيعاب : لا ما خبرني أي ملكة ؟
دانة : ملكتي على صديق تركي ، غريبة ما خبركم ؟
اعتلت ملامح شوق الضيق الشديد ، على أي أساس يزوجوها ؟ ، ابتسمت غصب : يا قلبي ألف مبروك
اكتفت دانة بإبتسامة باهتة
وقفت شوق بعد ما وصلتها رسالة : أشوفك قريب إن شاء الله
دانة : لا تقطعون
ابتسمت وهي تلبس نقابها : أكيد
طلعت بعد ما سلمت على دانة ، شافت عمها يوسف واقف بعيد ، تقدمت له : سوري عمو تأخرت عليك !
لف عليها و بإبتسامة خبيثة : قولي لحبيب القلب سوري ، تأخرتي عليه هو
بفهاوة : هــــآه ؟
ضحك يوسف : هههههههه شفيك ، بندر هو اللي بيوصلك
بمجرد ذكر اسمه حست بطنها تقلب عليها من الخوف ، لااااااا يعني بكون وحدي معه بالسيارة !
ما أمداها تنهي تفكيرها إلا و بندر جاي بخطوات سريعة لعندهم ، قال بإستعجال : هلا عمي وش بغيت ؟
يوسف : وصل شوق على طريقك ، انا باقي عندي كم ورقة تحتاج مراجعة
رفع عينه عليها و توه انتبه لها : اوكي ، أجل يللا مشينا
مجرد ما أنهى كلامه تحرك بخطوات سريعة ، مشت وراه و ضربات قلبها موترتها و هي تحاول تجاري سرعته
مجرد وصولهم للسيارة احتارت فين تجلس ، !
بندر بعد ما قفل باب سيارته ، مال شوي و فتح الباب الأمامي و بحركته هذي دقات قلبها زادت ، يعني مافي مجال غير تجلس بجنبه !
هي مجرد ما يكون متواجد بنفس المكان حتى لو بينهم عشر جدران ، التوتر ياصل عندها أقصى درجاته ، فكيف لو كانت معه لوحدها بنفس السيارة !
تحرك بندر و الصمت يعم السيارة ، لين قاطعه وهو يوقف عند الإشارة و بثقل و عينه على قدام : غطي عيونك !
مجرد ماسمعت صوته حست قلبها يوقف ، وحمدت ربها مية مرة انها سمعته و لا طلعت بصورة الهبلا قدامه ، رفعت طرف الطرحة و غطت عيونها
ما أمداها تهدأ من صوته إلا وهو يقول مرة ثانية : و بعدين هالعباية ترى مالها داعي
حست بالضيق من كلامه ، الظاهر من الحين بدآ بالأوامر ! ،
أردف : مجرد ما تحركين يدك تطلع كلها عند الرجال !
استمر بتعليقاته و ضيقتها زادت وهي ملتزمة الصمت

،
'

مع إشراقة شمس جديد ( صباح الأربعاء ) *

على الصوت العذب ، صوت الشيخ ( إبراهيم المعيقلي ) ، فتحت عيونها
حاسة بشي غريب داخلها ، شي ما ذاقته من سبع سنين ، ما تدري وش هو لكن الأكيد انه شي ججججدآ مريح !
حاسة ان شي كبير كان يكبت على صدرها راح و انزال ، هالراحة اللي تحس فيها الحين تتمنى لو تضل دايم ملازمتها
إحساس بالسعادة و زوال الهم يرافقوها هاللحظات ، حتى جسمها تحسه خفيف و مسترخي !
الكآبة اللي دايم حولها ما تحس لها وجود ،
مددت يدينها تتمغط ، والإحساس الحلو لازالت مستمتعة به
عقدت حواجبها بإستغراب من التلفزيون المشغل ، عادة ما تشغله قبل ما تنام ، أو بالأصح عادة إذا صحت تلقى نفسها بغرفة أبوها - لأنها ببساطة ما تقدر تنام وحدها - ،
استعدلت جالسة و ريحة العطر الرجولي مازالت تعبق بأنفها ، و بمجرد ماجلست ظهر لها الشماغ بحضنها
بهاللحظة استرجعت كل شي صار أمس ، بدآية من استدعاء الإدارة لها إلى . . . . وقفت عند هالنقطة تستوعب كل اللي صار !
طلوعها من المجلس و الجرح الكبير اللي سبب لها أبوها كانت تتمنى لو يحضنها ، بس صدها بأقسى أنواع الصد ،
تواجد البدر المفاجئ ، و كلمته ( توتة البدر ) اللي فجرت كل حصونها !
ما تنكر أبد انه بإحتواءه لها زال الكثير من الثقل عليها ، و الأهم ' الأحاسيس السلبية ' اللي تكمن داخلها كلها انمحى وجودها الحين !
ببساطة حاسه نفسها إنسانة جديدة ، إنسانة إيجابية : )
وقفت و راحت للحمام - الله يكرمكم - تاخذ لها شاور
بعد نص ساعة طلعت و هي تجفف شعرها ،
داهمها صوت المعيقلي وهي تعدل شعرها ، صوت فعلآ يبعث السكينة ، فجأة تذكرت صلاة ( الفجر ) ، صلاتها جدآ مقصرة فيها ، أحيانا كثيرة تنام و هي ما صلت صلواتها ، ما تصلي إلا إذا أحد أمرها !
و تقصيرها المفرط بحق ربها هو السبب الرئيسي بالضيقة اللي ملازمتها و سبب الهموم اللي هي فيها !
حست بالخجل من نفسها ، فرشت السجادة و لبست جلالها ، بدأت صلاتها و فعلآ تحس أنها أول مرة تصلي ! ، صلواتها دايم ما تكون على عجل و بدون إستشعار الطمأنينة !
بعد ما أنهت صلاتها ، شعور الراحة عندها زاد أكثر و أكثر ، أول مرة تعرف قيمة الصلاة !
لبست مريولها و هي عازمة تبعد عن أبوها و أهلها هالفترة ، تهدى و يهدون
رمت شنطتها على كتفها و أخذت عبايتها بيدها ، نزلت تحت و بقلبها تدعي انها ما تقابل ابوها ، بعد اللي صار حواجز كبيرة انبنت بينهم ، بالأصح بينها هي و العائلة كلهم ، بإستثاء ( البـــــدر ) و ما تعرف وش السبب ، يمكن كونه الإنسان الوحيد اللي قدر يطلع الدموع اللي كتمتها طول هالسنين !
وصلت للصالة الرئيسية و حطت شنطتها و عبايتها عالصوفا ، راحت باتجاه المطبخ ناوية تاكل لها أي شي ، تحس الجوع بيقتلها من أمس الصبح ما أكلت شي !
لكن مجرد ما وقفت عند الباب تراجعت بسرعة و هي تشوف أبوها جالس وحده عالطاولة معطي الباب ظهره و بيده كوب كوفي ،
تنفست براحة بعد ما أبعدت لأنه ما حس بوجودها ، فضلت تطلع الحديقة تنتظره لين يروح بعدين تاكلها أي شي ، لكن باقترابها من الباب وصلتها أصوات ضحك و سواليف ، بدون ما تفكر عرفت صوت ( تركي و البدر ) ،
فتحت الباب شوي تتأكد من وجود أحد غيرهم أو لا ، و من حسن حظها ما كان أحد غيرهم
فتحت الباب زيادة و تقدمت و كون وجه بدر مقابلها ، شافها بسرعة ،
حرك يده إشارة عـ السلام ، و على شفاته إبتسامة تظهر غمازاته ، اكتفت برد إبتسامة نادرآ ما تظهر عليها و هي تقرب ناحية الطاولة اللي جالسين عليها