رواية وجوه مختلفه الفصل العاشر 10 - بقلم دانيا

رواية وجوه مختلفه

الفصل العاشر10

بقلم دانيا

بعد كم جرس حتى الرقم رد اول ما رد ايوب قال الووو المكالمه فصلت تاني رجع فيهو طلع مقفول حاولو كم مره بس لسه كان مقفول ،، قلت لأيوب خلاص مامشكله خليهو امشي نوم انا بكره بحاولو تاني....الصباح صحيت متأخره لأني امبارح م قدرت انوم جات اسماء بت عمي الصغيره صحتني قمت عاينت للساعه لقيتها 8 وكم دقيقه قلت يالله اتأخرت شديد قعدت في السرير وشلت اسومه قعدتها في حضني قلت ليها شكراً اسومه العسل لأنك صحيتيني لعبت معاها حبه وقمت جهزت نفسي.

مشيت شربت الشاي مرت عمي قالت لي انتي الليله مالك نمتي كدا انتي كويسة ؟ قلت ليها كويسة بس راحت علي نومه ،، قمت طالعه قلت ليها بعد الجامعه ح امشي بيت خالي اسلم عليهم واشوفو بقى كيف ، بعد طلعت اتصلت ل رحيق بعد صبحت عليها حكيت ليها بالحاصل وقلت ليها بعد الجامعه عاوزاك تمشي معاي لشركة الإتصالات ل عمو عادل صاحب ابوي ؛؛ سكتت مسافه وتاني ردت لي قالت لي والله ياعدن كنت بتمنى امشي معاكي بس عندنا قريبنا اتوفى وعاوزين نمشي العزاء في الحله التانيه عشان كدا مضطرة ارجع البيت سريع قلت ليها البركه فيكم خلاص تمام يا زولة ما مشكله .

بهناك ايوب كان ماري على العمال يشوف الشغل ماشي كيف بعد ما الطلبيه جهزت قاعدين ينقلوا الكراتين للطابق الأرضي عشان الزبون جاي يستلم اثناء ماهم بنقلوا في الكراتين في عربيتين جو وقفوا برا الأولى كبيره حقت البضاعه والتانيه صغيره لونها رصاصي مظلله ،، في واحد من العمال قال لأيوب سيد البضاعه جاء شكله ايوب نزل تحت جاء واحد نازل من العربيه الصغيره لابس ملابس سواقين جاء لأيوب قال ليهو سيد البضاعه قال ليك ارفعوا بسرعه لأنو م عندو وقت كتير.

ايوب عاين ليهو نظرة إستغراب قال ليهو ليه هو م ح ينزل يشيك على البضاعه يعني ؟ الزول سكت وتاني رفع راسو وقال مافي وقت للإجراءات دي كلها نحن زبائن قدماء للمرحوم ،، واثقين كل الثقه ، ايوب قال ليهو يديكم العافيه .

قال للشباب الشغالين لو سمحتو خفوا يدينكم سريع سريع انقلوها ليهم في العربيه ،، وطوالي طلع فوق وقف جنب الشباك وهو براقب في الشباب وهم يرصو البضاعه في العربيه

قبل عاين للعربيه الصغيره كان الشباك حق الباب الورا مفتوح ركز شوية لمح وجه الزول قال الزول دا انا شايفو مشى على ادراج المكتب فتح الدرج طلع الصور بقى يفتش فيهم اخيراً لقى الصورة الفيها الزول دا في الصورة كان قاعد وقدامو صناديق كتيرة ومن ضمنها صناديق الملابس ومعاها اسلحه كتيره شديد ايوب اتصدم طوالي رجع عاين بالشباك لقى الزول قفل الشباك وعربية البضاعه خلاص شحنت وكانوا بقفلو فيها .

جرى سريع سريع نزل تحت قبل يصل العربات اتحركت ، قال للمساعد صلاح انتبه على الشغل لمن ارجع وركب العربيه ومشى وراهم ،، انا بعد الجامعه طوالي طلعت مشيت شركة الإتصالات قلت للبت القاعدة في الرسيبشن عاوزة اقابل المدير قالت لي لشنو عاوزة تقابليهو قلت ليها ضروري السبب انتي بس قولي ليهو عدن فتح الرحمن عاوزة تقابلك وهو ح يعرفني ....قالت لي انتظري دقيقه اتصلت ليهو ورتو وبعد خلصت وصفت لي مكتبو .

طلعت مشيت دقيت الباب قال اتفضل دخلت سلمت ليهو وبقى يتعذر لي لأنو م قدر يقابلني في العزاء قلت ليهو م مشكله قال لي تشربي شنو يابتي قلت ليهو شكراً م عاوزة حاجه بس جيت اسألك عن كم حاجه كدا وامشي م ح اعطلك كتير ،، طلعت تلفون ابوي من الشنطه وريتو الأرقام كلهم قلت ليهو ديل انا عاوزة اعرفهم اصحابهم منو؟ وتاني قمت وريتو كم صورة للناس ديك قلت ليهو بتعرفهم ديل منو ياعمي؟ حسيت ملامحه اتغيرت بس م ادى اي ردة فعل غريبه بس ابتسم في وشي وقال لي م بعرفهم والله ، صاح انا صديق المرحوم بس م كنت بتدخل في شغلو يعني معقولة الصور دي تطلع صاح؟ المرحوم كان تاجر دهب واسلحه؟

عاينت ليهو نظره حاده قلت ليهو دا كلام شنو ياعمي ابوي مستحيل يعمل كدا انت معقوله م بتعرفو؟ طوالي غير كلامو قال لي طبعاً مستحيل المرحوم كان إنسان محترم م بعمل كدا لكن الناس ديل يابتي للأسف انا م بعرفهم وبالنسبه للأرقام كشف هويتهم ح يأخد زمن شويه عشان كدا انتي امشي وانا برسلهم ليك في التلفون تمام.....قلت ليهو تمام قمت عاوزة امشي تلفونو كان قاعد في الطاوله طوالي اتصل عاينت للرقم من غير ما اقصد بس الحاجه الصدمتني كان مكتوب " رحيق تتصل " عاينت ليهو قلت وانا اقول ملامح عمو عادل بتشبه منو؟ وحتى رحيق إسمها رحيق عادل ، وقفت مندهشه وانا بعاين للتلفون قلت ليهو يعني انت ابو رحيق صحبتي؟

عاين للتلفون وسكت م رد لمن المكالمه فصلت ، رفع راسو عاين لي قال لي يمكن إسم على مسمى انا اولادي برا البلد ،، قلت ليهو ايواه طيب عن إذنك وطلعت حسيت بالإحراج قلت غبيه ياعدن نسيتي إنو رحيق أبوها مسافر برا البلد بعد طلعت من عندو ، جاهو واحد داخل قال ليهو مالك م قلت ليها حقيقه الأرقام والناس السألت منهم؟ قال ليهو بنبرة غضب انت عاوزني ادخل نفسي في مشاكل مع الجماعه هي اصلاً مصيرها ح يكون زي مصير ابوها بلا شك.

ومشى وقف جنب الشباك وختى يدينو في جيوبو ، قال ليهو اطلع دي شايفها تاني جات راجعه ياربي بتكون مالها كمان عاوزة توجع لي راسي ،، طوالي الزول طلع وقفل الباب بعدها تلفون عمي عادل اتصل تاني ونفس الشيء مكتوب رحيق رد عليها بسرعه وقال ليها مالك يابت في شنو صاحبتك الغبيه زي ماقلتي لي جات وفي راسها كتير من الأسئله بس تلقى الأجوبه من وين ؟ تحلم وبقى يضحك قال ليها وانتي اشتغلتي شغل ممتاز المنظمه اكيد ح تنبسط مننا ،، البت دي م بتعرف إنو الناس ديل انا العرفت ابوها عليهم .

بس الحاجه المحيراني منو البحاول يخون المنظمه ويساعد البت دي ؟ وكمان مسكها راس الخيط لمن اداها الصور دي نحن ضروري نعرف الخاين دا منو عشان نقدر نوقفو في حدو ،، اثناء ماهو بتكلم انا جيت دقيت الباب سريع قفل الخط وقال اتفضل جيت داخله عاين لي بدهشه ونظرة إستغراب قال لي انتي من متين هنا؟ قصدي ليه جيتي راجعه ؟ قلت ليهو نسيت تلفون ابوي هنا لمن وريتك الصور عاين في الطاولة قال لي ااي صاح شالو مداهو لي.

طلعت مشيت جاتني مكالمه من ايوب

الفصل الحادي عشر من هنا

اضغط