رواية وجوه مختلفه الفصل التاسع 9 - بقلم دانيا

رواية وجوه مختلفه

الفصل التاسع9

بقلم دانيا

اثناء ما انا واقفه عيني جات في صورة لأبوي ومعاهو زول دنقرت رفعت الصورة وقلت ل ايوب كيف راح عن بالي الزول دا ،، عاين بإستغراب وعاين للصورة قال لي قصدك شنو بتعرفيهو؟ قلت ليهو ااي دا عمو عادل صاحب ابوي شديد ودائماً كان بجي معاهو في البيت وكمان لمن كنت بمشي لأبوي في المشغل احياناً كنت بصادفو هناك ؛ الزول دا هو الحايساعدني انا متأكده لأنو كان صاحب ابوي شديد .

ايوب عاين لي بحاجب مرفوع وبنبره حاده قال لي يساعدنا ،، يعني انتي مفتكره ح اخليكي تحلي الموضوع براكي ؟ عاينت ليهو وتاني دنقرت راسي قلت ليهو انا م عاوزاك تدخل في مشاكل يا ابن العم....قال لي مجنونه انتي دا كلام شنو .

يلا صاحب ابوكي دا شغال شنو ؟ قلت ليهو تغريباً شغال في شركة إتصالات ،، طوالي ايوب اتحمس وقال لي ممتاز والله حسيت اللغز قرب يتحل ، قلت ليهو وانا بعاين فيهو بإستغراب قصدك شنو؟ قال لي اول خطوة لازم نعرف الأرقام دي مسجله بمنو عشان نقدر نوصل للزول البتراسل معاكي بالتلفون والزول الجاب الظرف ، ولو قدرنا نوصل ليهم ح نعرف كل شيء .

قلت ليهو تمام لكن إلا نمشي ليهو بكره ول شنو؟ سكت مسافه وقال لي بكره عندنا طلبيه كبيرة في المشغل سيدها مستعجل والله على التسليم عشان كدا ح اطلع بدري واجي متأخر ،، لكن انتي امشي حلي موضوع الرقم وانا بشيل الصور دي معاي يمكن اقدر اتعرف على زول من الناس الكان بتعامل معاهم عمي ،، دا لو جاء واحد المشغل او طلب طلبيه.

لم الصور وطلع قال لي تصبحي على خير لازم انوم عشان اصحى بدري ، قلت ليهو وانت من اهله لكن المفتاح دا حق شنو ؟ جاء راجع شالو عاين فيهو مسافه قال لي م بعرف والله م اظن يكون بفتح حاجه في المشغل قلت ليهو طيب خليهو انا بحاول اتزكر لو عندنا حاجه ليها مفتاح زي دا قال لي تمام .

طلع تاني جاني راجع قال لي م تمشي براكي سوقي معاكي رحيق قلت ليهو طيب ،، نمت وانا لسه بالي م مرتاح وبفكر في الصور وفي موضوع الأسلحه والدهب وعلاقة ابوي شنو بالموضوع غفيت وانا لسه راسي مزدحم بالأفكار بقيت اشوف باب اسود والمكان كان مظلم فيهو ضوء خفيف وانا كنت براي بقيت امشي على الباب بخطوات بطيئه لمن وصلت طلعت مفتاح من شنطتي وكان نفس المفتاح وفتحت بيهو الباب.

اول مافتحت الباب سمعت اصواات من وراي بتقول لي واخيراً شكراً ليكي ، اتخلعت واتلفتت وراي سريع واول ما شفتهم لمن جسمي رجف بقيت اعاين ليهم بخلعه قلت ديل ما نفس الناس الفي الصور؟ فجأة من غير ما احس لقيتهم مقتحمين المكان دفروني لمن وقعت وخشو جوا وبقوا يهبشو في صناديق الأسلحه والدهب ويضحكوا ،، واحد فيهم قال واخيراً وصلنا وبقى يعاين لي قال ودي نعمل فيها شنو ؟ رد واحد تاني قال حلها بسيط ورفع واحد من الأسلحه ووجهو علي وبقى يطلق النار.

فجأة قمت مخلوعه قربت اصرخ بقيت اعاين حوالي مافي اي زول بقيت اهبش في جسمي مافي اثار ضرب ،، والعرق كان بتصبب مني رغم إنو الدنيا شتاء والجو بارد قلت بسم الله الرحمن الرحيم دا كان كابوس...بس وين المكان دا م غريب عني حاساهو مألوف ياربي انا بعرف المكان دا وين؟ سمعت صوت نغمة التلفون بضرب عاينت لتلفوني م لقيت فيهو مكالمه عاينت للساعه لقيتها 2 صباحاً قمت من السرير مخلوعه بقيت بفتش في مكان التلفون الراني دا وين .

عاينت للدرج رجعت لورا قلت التلفون داك انا قفلتو كيف يعني يتصل ومنو ح يتصل في وقت زي دا؟ بقيت امشي على الدرج بخطوات بطيئه وكلي خوف لمن فتحت الدرج المكالمه فصلت شلت التلفون لقيت مكتوب " مخلص " قلت مخلص دا منو كمان تاني قفلت التلفون في محلو ورجعت عاوزة انو اول ما اتغطيت بالبطانيه التلفون رن تاني ،، المره دي حسيت حركة رجليني زاتها اتصلت انا قفلت التلفون وكل ما اقفلو يفتح تاني قمت بسرعه مشيت على الدرج شلت التلفون فتحت الخط طوالي المكالمه فصلت.

عاينت للتلفون كان مكتوب تحتاج كتابة كلمة المرور عقب إعادة تشغيل الهاتف ،، قلت غبيه ياعدن كنتي ح تسببي لنفسك جلطه وتموتي اثناء ما واقفه جاء ايوب دق الباب وقال لي عدن انتي صاحيه؟ قلت ليهو صاحيه وفتحت الباب قال لي تلفونك دا مالو برن نص الليل ول دا منبه ؟ عاينت ليهو وقلت ليهو دا م تلفوني دا تلفون ابوي م بعرف المتصل منو في وقت زي دا ، قال لي جيبيهو اديتو ليهو سجل الرقم عنده واتصل فيهو.

رد بعد كم جرس

اضغط