رواية وجوه مختلفه الفصل الرابع عشر 14 - بقلم دانيا

رواية وجوه مختلفه

الفصل الرابع عشر14

بقلم دانيا

قلت في نفسي حسبي الله ونعم الوكيل قاطعني وقال لي ما تخافي يابتي رفعت راسي عاينت ليهو ،، مواصفاتو كانت " رجل عجوز ، نحيل ، حامل عصاء في يدو اليمين ، وفانوس في يدو اليسار " قلت في نفسي انتي انتهيتي يا عدن احسن شيء تقومي تجري ، حاولت اقوم من الخوف حسيت رجليني مشلوله كل ما احاول اقوم بلقى نفسي وقعت في مكاني .

مسك العصاء والفانوس بيد واحده ومد لي التانيه عشان يساعدني اقوم ،، عاينت ليها وكيف كانت نحيله كأنها يد زول م اتناول الطعام ليهو كم شهر بس عايش بقدرة رب العالمين ، شجعت نفسي وقمت من غير ما امسك بيد كشى جسمي وقت شفتها... اول ما قمت سمعت صوت صراخ عالي جاي من الغابه المظلمه دي بقيت اتلفت بهلع وخوف شديد اول شيء فكرت فيهو الجري عشان اقدر القى نهاية الغابه الشؤم دي واطلع منها ، قلت ياربي ايوب هسي بكون حصل عليهو شنو ؟ اكيد بكونو كلهم بفتشو فيني .

اتحركت عاوزة اجري قال لي استني م من هنا اشر لي بإتجاه تاني قال لي من هنا ،، وقفت عاينت ليهو بإستغراب شديد قال لي متفهم خوفك لأني قبلك مريت بنفس الموقف ، بس انتي الغابه هاربه او ضايعه؟ م رديت ليهو ، قال لي انا نجوت لأني كنت اكبر منك عشت واتعلمت من الحياه دار ضهرو ومشى خطوتين قال لي اتبعيني....بقيت واقفه وبعاين ليهو وهو ماشي وخطواتو زي خطوات الشافع الياداب بتعلم المشي مشى مني مسافه وانا لسه قلبي م مطئن ليهو عشان امشي معاهو .

دار وشو عاين لي وقال لي م عندك خيار تاني وكمل في طريقو ،، بقيت واقفه في محلي لمن فجأة سمعت صوت وقع اقدام جايه بإتجاهي من الخوف م لقيت نفسي غير جريت حصلتو.....بقيت ماشه وراهو من غير ما اتكلم معاهو او يتكلم معاي ،، بعد مسافه ظهر قدامنا بيت صغير زي الكوخ واول ما وصلنا قدامو الراجل العجوز وقف وعاين لي قال وصلنا ، بقيت واقفه مزهوله من كل شيء وكان في اسئله كتيره في راسي كيف العجوز دا عايش براهو وليه وحوش الغابه م قضت عليهو ؟

وكيف قدر يصنع بيت من حطب بالطريقه دي اثناء ما انا واقفه بفكر ، فتح بابو الكان عباره عن حطب مرصوص وقال لي اتفضلي ودخل ضوى فانوس تاني كبير ضاء كل البيت ،، وقفت في الباب مندهشه من الشيء الشايفاه عيني البيت كان عباره عن سرير منسوج من حطب ومفرش بصفق الشجر العريض ومن الجهه التانيه كان في حطب مرصوص في شكل تربيزه وفوق ليها في كؤؤس مصنوعه من القرع بالأحجام كبيره وصغيره .

وجنبها في حاجه مغطيه بصفق الشجر وعلى الإتجاه التاني كان في مكان بولع بيهو النار ،، اثناء ما انا وقفه وبعاين في كل زوايا البيت ، العجوز اشر لي بأيدو على السرير قال لي اتفضلي مشيت قعدت طوالي مشى على التربيزه جاب لي مويه في كأس صغير مسكتها منو وانا لسه راسي جايط وم فاهمه شيء ،، تاني مشى جاب لي صفقه شجر عريضه ختاها لي جنبي في السرير كان فيها قطعة لحم مشوية على الحطب بقيت اعاين ليها بإشمئزاز قلت في نفسي الزول دا قتل شنو وجابو لي؟.

عاين لي وابتسم إبتسامه خفيفه قال لي م تخافي كلو حلال وكلنا مسلمين ،، وقبل انطلق بحرف مشى طلع كتاب قرآن جابو ختاهو وطلع برا اتوضى وجاء صلى ومسك الكتاب وبدأ يقرأ....بقيت اعاين ليهو بإستغراب من سمعت صوت القرآن ياداب حسيت بالإطمئنان وشلت قطعة اللحم ديك وبديت آكل وبعدها مشيت اتوضيت وجيت صليت ، اتزكرت التلفونات شلت شنطتي فتحتها طلعت التلفونات م لقيت شبكه بس لقيت فيديو غريب م كان عندي فتحتو كان فيهو عمو عادل صاحب ابوي وقت اتصلت ليهو رحيق بعد انا طلعت.

من هنا عرفت إنو رحيق بت عمو عادل نفسه صاحب ابوي ومنها عرفت إنو عادل دا اخطر زول في المنظمه ،، وبنادهو الزعيم بس قلت الفيديو دا جاء من وين؟ اتزكرت الراجل لمن شال التلفون مني...اتصدمت وقلت دا مصلحتو شنو من الحركه دي؟ الراجل العجوز قاطع تفكيري وقال لي اها م قلت لي الجابك الغابه دي شنو ؟ بديت احكي ليهو الحاصل كله ،، ولمن جبت ليهو سيرة الدهب والجن والتحالف ،، قال لي لكن المشكله دي م بتنتهي بسهوله يابتي عشان تنهيها لازم اول شيء تقطعي تحالف الأشخاص ديل مع الجن عشان البشر لمن تواجهو براهو ح يكون ليك اخفه قدراً لكن لمن يكون في طرف مساعدو ح تكون ليك صعبه او مستحيله .

قلت ليهو اعمل شنو ياعمي حتى صديقتي الوحيدة قدرت بي حسيت بقصه في قلبي قلت معقولة يا رحيق دي انتي الكنتي رفيقة دربي؟ خساره والله ،، قمت قلت ليهو ياعمي دلني على طريق الرجعه وبس تاني م عليك ، قال لي إن شاء الله ح ادلك مع الطريق لأنو اصلاً م من مصلحتك تقعدي في المكان دا كتير ، الصباح بدري قبل الوحوش تصحى انا ح اطلعك من هنا...قلت ليهو بإستغراب وانت م طلع وهم ليه م بسألوك؟ سكت مسافه وقال لي انا زي ما انتي شايفه لا شحم لا لحم ح يعملو بي شنو ، وبالنسبه للرجعه انا اكتفيت من البشر تاني م راجع ليهم لكن انا هنا يابتي الله حافظني وطول ما كتاب الله في ايدي مافي مكروه بصيبني.

الصباح بدري صحاني قال لي يلا لازم تطلعي قبل طلوع الضوء ،،وقبل دا كله هاكي دا خليهو معاكي عاينت ليهو جاب لي مصحف صغير قال لي خليهو معاكي ولمن تطلعي من هنا م تفكي الزكر من خشمك اقري لمن تطلعي ولو مها حصل م تتلفتي للوراء ولو سمعتي اي اصوات ماتخافي وم تديها اهميه وامشي بخطوات واثقه وحتى لو سمعتي صوتي انا زاتي م تتلفتي حتى لو طلبت منك المساعده م تتلفتي لأنو دا م انا دا ح يكون فخ ليكي عشان تقطعي الزكر عن لسانك ويقضو عليكي

الفصل الخامس عشر من هنا

اضغط