رواية وجوه مختلفه الفصل الخامس عشر 15 - بقلم دانيا

رواية وجوه مختلفه

الفصل الخامس عشر15

بقلم دانيا

امشي وما تتلفتي لأي سبب من الأسباب وم تقطعي الزكر من لسانك ،، وقبل ما تمشي نسيت حاجه مهمه....هناك م تظهري للبعرفوكي عشان م تتأذي وعشان تنهي تحالف اعدائك مع الجن حاولي تخليهم يجتمعوا في مكان ديني ، مكان للزكر ، سواء كان مسجد ، او حلقه للزكر وتلاوة القرآن ، وبكدا اكيد الجن لمن يشوفهم في اماكن زي دي ح يغضب منهم ويفكرهم نقضو العهد البينهم وح ينقلب السحر على الساحر.

يلا استودعتك الله ، بعد سمعت كلام الراجل العجوز كله وحفظتو بالحرف شكرتو وبديت امشي في الطريق الوصفو لي هو وكان رغم إنو الصبح قرب بس كانت الغابه ظلماء شديد ،، انا ماشه وماسكه شنطتي بيد والكتاب الأداني ليهو الراجل العجوز بيد ، اثناء ما انا ماشه سمعت لي صوت عالي صرخه قربت تأثر على طبلة اضاني بس م اهتميت للأمر رغم الخوف الجواي بس كانت خطواتي ثابته وفجأة ظهرت لي مره قدامي وكانت بتضحك بطريقه هستيريه وكانت ملامحها غريبه شديد .

بقت هي جايه علي وانا ماشه عليها لمن قربت مني حسيت بخوف شديد جواي وجسمي كله بدأ يرجف ،، لأن ملامحها كانت عبارة عن مره لابسه اسود وجسمها كله احمر شديد كأنها افترست حاجه قبل تعترض طريقي ، لمن حسيت بيها قريبه مني شديد وقفت واتزكرت كلامك الراجل العجوز إنو م اقطع الزكر من لساني ، بس الحاجه الخلتني ارجف إنو حسيت لساني اتربط م قادرة انطق بأي شيء وحسيت كأنو الزكر الفي راسي كله اتمسح ،، بقيت واقفه مجمده في مكاني وبحاول اطق ما قدرت حسيت دموعي بقت زي الشلال في وشي.

اول ما رفعت يديها عاوزة تخمش وشي رفعت يديني وغطيت وشي وكان لسه المصحف في يدي ،، واول ما لمحت المصحف حسيتها رجفت وفجأة صرخت صرخه عاليه واختفت من قدامي ، للحظه حسيت نفسي نجوت عاينت للطريق قدامي كان فاضي قلت لنفسي يلا يا عدن سارعي في خطواتك مسحت دموعي ومشيت بخطوات مسرعه ، مشيت مسافه بس لسه مازلت في الغابه وبين الشجر ، قدام كان في شجرة كبيرة ضخمه على الطرف الأيمن من الطريق جيت ماشه قبل اصلها .

فجأة في حاجه وقعت قدامي من راس الشجرة لمن حسيت بالأرض اتهزت تحت اقدامي ،، حسيت قلبي كان ح يقيف من الخلعه بس قبل اعاين اشوف الوقع شنو قلت بسم الله واول ما قلت كدا عاينت م لقيت اي شيء قدامي بقيت اردد " حسبي الله ونعم الوكيل " وانا ماشه بسرعه اشبه بالجري ، حسيت الضلام على وشك يتلاشي والمكان كان هادئ بس فجأة ظهر لي كائن جسمو كله جسم حيوان بس وقفتو وقفة إنسان وكان معلق جسم كاسيه الدم معلقو فوق شجره وبجرد في لحمو اول ما شافني ضحك بصوت عالي ،، من الخلعه قربت اجري بس اتزكرت كلام عمك داك ،، قلت بسم الله الرحمن الرحيم ، فجأة اختفو من قدامي .

بقيت امشي بسرعه بس حسيت بالتعب ورجليني زاتهن كل ما تخلعني حاجه بحس بيهن الدم قرب يجمد في عروقهن لمن بقن يتلخبطن في المشي ،، عاينت بكل الجوانب م شايفه اي شيء قلت خليني اقيف ارتاح شويه وقفت مسافه في نص الطريق شفت لي عود كبير واقع على حافة الطريق قلت انمش نقعد فيهو حبه ،، مشت قعد فوق ليهو وبعاين للطريق قدامي قلت معقوله مافي ولا بشر بجي بهنا يعني للدرجه دي الوادي دا مشؤم .

بهناك ايوب وحسام بعد الضرب داك مشو سريع ركبو عربية حسام واتحركو ،، حسام عاين لأيوب بحيره وشيء من الغضب قال ليهو اها نعمل شنو؟ ايوب سكت مسافه وختى يدو في خدو نظام يفكر وبعدها طوالي قال ل حسام دور بإتجاه الخلا يمكن نلقى اثر م معروف ، قال ليهو طيب ولفى مشى بإتجاه الخلا قبل يصلو اتصل عمي فهد ل ايوب قال ليهو انت وين تعال سريع البيت حاسي نفسي م تمام وقفل الخط ، ايوب ملامح وشو اتغيرت حسام قال ليهو في شنو ؟ قال ليهو بتردد والله م عارف بس ابوي شكله تعب فجأة كدي نزلني انا لازم ارجع البيت.

حسام قال ليهو انزلك شنو ورح ح اوصلك عشان توصل سريع هو عان نحن لوش الصبح م قدرنا نوصل لنتيجه ،، والصباح إن شاء الله نكلمو الشرطه عشان تقوم معانا ، مشو بيت عمي لقو عمي نايم في الصالون اول ما جو داخلين ايوب خت يدو في جبين ابوهو عشان يتفقد حرارتو قال ليهو ابوي انت كويس؟ حاسي بشنو ضغطك ارتفع ؟ قوم نوديك المستشفى ، حسام قال ليهو كفارة سلامتك يا عمي هسي حاسي نفسك كيف؟ بقى يعاين ليهو وقال بصوت منخفض هسي انا كويس احسن الحمد لله اخدت الدواء وبقيت احسن شويه ، حسام قال ليهو الف سلامه ليك يلا يا ايوب انا ح ارجع البيت وبينا التلفون ، حسام طلع مشى وايوب دخل غرفتو ، طوالي عمي قام على حيلو .

بهناك انا قعدت حبه قلت لا ياعدن دا م وقت الراحه لسه المشوار طويل قومي ،، قمت ماشه لمحت لي حاجه واقفه بعيد قدامي دقري ما انا كنت قاعده في العود على طرف الطريق بالإتجاه اليمين ومقبله على طرف الطريق التاني قلت ياربي دا مش عمك العجوز جابو هنا شنو؟ فجأة سمعت صوتو بصرخ بصوت عالي وكان في مخلوقين غريبين واقفين وراهو ، لمن وصلو ليهو مسكوهو من يدينو وكان شكلهم مخيف شديد ،، بقى يعاين لي ويستنجد بي كان بقول " ساعديني يابتي " وصوتو كان عالي واول ما قال كدا بدو يسحبوهو للورا وهو لسه بصرخ....وقفت متجمده في مكاني داك واطرافي كلها بردت من الخوف م اتزكرت غير مساعدتو القدمها لي م حسيت بنفسي غير قطعت الطريق ماشه عليهو وهو لسه متلفت بعاين لي وبصرخ وهم جارنو ،، خليت شنطتي والكتاب فوق للعود وقطعت الطريق ماشه وراهم وانا بعاين ليهو

الفصل السادس عشر من هنا

اضغط