رواية وجوه مختلفه الفصل السادس عشر 16 - بقلم دانيا

رواية وجوه مختلفه

الفصل السادس عشر16

بقلم دانيا

اتصل حسام ل ايوب قال ليهو ابوي بسأل من عدن كتير وقال إلا يجيكم يطمن عليها بعد يطلع من الشغل بس انا قلت ليهو الأيام دي مشغولة مع الجامعه والإمتحانات وكدا عشان كدا م قدرت تجينا ،، ايوب قال ليهو والله الموضوع دا زاد عن حده ونحن المفروض نتحرك لأنو م ممكن ليها يومين مخطوفه ونحن م نقدر نوصل ليها هسي يمكن تكون في خطر ، يازول انا طالع ماشي ابلغ .

اثناء ما حسام بتكلم مع ايوب سمع ناس بيتهم برا اصواتهم عاليه وابوهو كان بنادي ليهو ،، قال لأيوب خلاص يازول نتلاقى في القسم يلا بينا التلفون ، قفل الخط وطلع من الغرفه لقى ابوهو وناس بيتهم كلهم واقفين على حيلهم وبتناقشوا ، فجأة لمح رحيق واقفه معاهم وكانت بتقول الزوله دي ليها زي تلاته يوم م جات الجامعه وتلفونها مقفول ،، قلقت عليها وم بعرف بيت عمها عشان كدا جيت اسألكم....ومن شافو حسام استلموهو بالكلام ، حسام من شاف رحيق بقى يعاين ليها بإستغراب قال في نفسه دي الجابها هنا شنو العارض دي هسي خربت اي شيء ، قاطع تفكيرو صوت ابوهو وهو بقول ليهو انا ما بسألك ياولد انت قلت شنو مش قلت عدن منشغله مع الجامعه ؟ ول كنت بتكذب علي .

حسام بصوت متردد صراحه يا ابوي عدن ضايعه قال الكلام دا وهو مدنقر راسو وبعاين في الأرض ،، ومن دون اي مقدمات ابوهو ضربو كف قال ليهو ضايعه؟ كيف يعني ضايعه ومن متين ضايعه وليه م اتكلمت ؟ حسام قال ليهو روق ياابوي انا وايوب هسي ماشين نبلغ في القسم واكيد ح تتلقي ،، ابوه عاين ليهو نظره حاده وطلع من غير ما يتكلم ، امو جات وقفت جنبو قالت ليهو كُر يا ولدي عاد بت الناس دي ح تكون مشت وين الله يحفظك يابتي نعل ما تكون مخطوفه ،، من قالت كدا رحيق بدأت تبكي قالت ااااخ ياصحبتي عدن ربنا يرجعك طيبه ، حسام عاين ليها بنظرة غضب وقال ليها جيتي زي القدر هسي الجابك شنو ، اطلعي ولو شفتك هنا تاني م تلومي غير نفسك ، امو قالت ليهو اجي ياولدي دا كلام شنو ، طوالي طلع مشى.

انا اثناء ما ماشه ورا العم وبنادي عليهو وبقول ليهم خلوهو حرام عليكم ماشين بيهو وين ،، ياعمي ما تخاف ما انت العلمتني انو طول ما الزكر في لسانا ما لازم نخاف ، اول ما قلت الجمله دي حسيت نفسي اتزكرت حاجه كنت ناسياها اتزكرت كلام العم القالوا لي إنو يمكن يخدعوني بشخصية العم ، طوالي وقفت في محلي للحظه حسيت نفسي غبيه شديد ليه م اتزكرت حاجه زي دي من الأول ، درت ظهري بسرعه وفكرت ارجع جري للشارع الجيت منو وعرفت إنو دا فخ ،، وقبل اخطو خطوة للأمام سمعت اصوات ضحك عاليه وراي لمن قلبي عمل شح قلت لا ياعدن م تتلفتي اجري بس .

عاوزة اجري حسيت بحاجه رفعتني فوق وخبطت بي الأرض لمن حسيت راسي زي كأنو فيهو لمبه فصلت ،، حسيت بألم شديد وقبل ارفع عيوني اعاين الحاصل شنو حوالي تاني اتكرر فيني نفس الموقف ، في حاجه قاعده ترفعني فوق وتخبط بي الأرض لمن حسيت براسي ثقيل شديد ختيت يدي في راسي من الوجع لمن م قادرة افتح عيوني ،، حسيت بحاجه سايله من راسي لمن نزلت بعيني لحد وصلت رقبتي ،، ختيت يدي في راسي ورفعتها صوب عيني فتحت عيوني الكانن يلا وآمين بفتحت عاينت ليدي كانت الرؤيه طشاش طشاش كانت يدي كلها لونها احمر من الدم.....رفعت عيوني لفوق عاين لقيت نفس المخلوقات واقفه فوق راسي واصواتهم العاليه في اضاني زي كأنها بتنحت نحت في اضاني ،، حسيت راسي تقيل ولساني اتقل م قدرت انطق بحرف.

بقيت واقعه وبتمر علي الكتير من الزكريات حسيت خلاص دي النهايه ياعدن ،، بعد تعب قدرت انطق واول ما نطقت قلت " اشهد لا إله إلا الله واشهد ان محمداً عبده ورسوله " بس بعد نطقت بالشهاده فجأة حسيت بالكائنات دي اصواتها علت شديد وبدأت تتراجع ، وفي اللحظه دي حسيت كأن ارتدت فيني الروح وبقيت اردد لا إله إلا الله وحده لا شريك له.....ولسه الكائنات كانت بتصرخ لمن فجأة اختفت ، بعدها حسيت نفسي شديدة شوية قمت قعدت وشلت طرحتي ربطت بيها راسي محل الجرح ،، وبقيت اعاين ليديني ولبسي البقى غرقان بالدم ولون الملابس اتغير .

كان في عود صغير واقع جنبي شلتو استندت عليهو واتشجعت وقفت على حيلي ، بس حسيت رجليني كأنو م فيها روح م قادرة تتحرك بعد تعب قدرت اخطو كم خطوه لكن راسي دايش وم عرفت انا جيت من ياتو إتجاه بقيت واقفه وبعاين لكل الإتجاهات ياربي امشي بي وين ؟ وانا عارفه لو سلكت طريق غلط يمكن يرجعني لنقطة الصفر او يمكن اتوه في الغابه دي وم اقدر اطلع منها ،، اثناء ما انا واقفه جاء قرد جنبي بقى يعاين لي بطريقه غريبه لمن قلبي بقى يدق بسرعه اول ما حس إني خفت منو بقى يضحك ، قلت في نفسي قرد بضحك رجعت منو خطوتين لورا قربت اقع ، قال لي انا بعرف انتي جيتي من ياتو إتجاه تعالي وراي ودار ضهرو ومشى مني على امل إني اتبعو .

قلت هوي ياعدن م كفاكي المقلب القبيل تاني م بتحصل فيكي خليتو مشى مني مسافه ،، طوالي اتحركت برجليني الواجعني ديل بخطوات سريعه بإتجاه تاني من غير ما اتلفت عليهو زاتو ، وقف عاين لي وقال تعالي ياغبيه ح تموتي ، فجأة وقفت مخلوعه بس من غير ما اتلفت ،، تاني اتكلم معاي قال لي لو م مصدقه استنيني تحت الشجره دي لمن اجي ، عاينت يميني كان في شجره كبيرة ضلها ضليل فكرت امشي عليها تاني قلت لا ، واثناء ما انا واقفه فجأة ظهر قدامي لمن اتخلعت مد لي حاجه عاينت ليهو ،، اتصدمت شديد قلت شنطتي ؟ جبتها من وين

الفصل السابع عشر من هنا

اضغط