رواية وجوه مختلفه الفصل الثاني 2 - بقلم دانيا

رواية وجوه مختلفه

الفصل الثاني2

بقلم دانيا

رحلت مع ناس خالي في بيتهم اليوم الأول عدى في آمان الله ،، اليوم التاني بالليل كنت نايمه في الغرفه ومعاي بت خالي الصغيره تماضر ، قمت من النوم مخلوعه كأنو في حاجه صحتني اول ما فتحت عيوني كان النور مطفي بس الشباك فاتح كان في ضوء خفيف في الغرفه لأنو القمر كان طالع منور الدنيا كلها برا....عاينت على الباب كان في ظل اسود واقف اتهجمت وقمت من السرير مخلوعه قلت خالي م رد لي وبقى جاي علي في صمت.

قعدت في زاوية السرير وغطيت وشي بيديني وبقيت اصرخ ،، لمن بت خالي صحت مخلوعه وخالي ومرتو وولدو حسام جو جاريين مخلوعين شغالين لي بسم الله مالك يابت خالي نور اللمبه.....عاينت ليهم لقيتهم هم بس واقفين مافي اي شيء ؛ مرت خالي جات وقعدت جنبي حضنتني وبقت تهدي فيني قلت ليهم والله هسي كان في خيال حاجه سوداء ضخمه شديد كانت واقفه جنب الباب .

بقوا يعاينو يفتشوا في الغرفه وخالي وحسام طلعوا برا فتشوا البيت كله مافي حاجه ،، جو راجعين خالي قال لي مافي حاجه يابتي روقي بقيت ابكي قلت ليهم والله كانت واقفه في خشم الباب...خالي قال ليهم انتوا ارجعوا نوموا انا بقرأ ليها شوية لمن تهدأ وتنوم ؛؛ بقى يقرأ لي تاني م صحيت إلا الصباح بعد صليت مشيت لمرت خالي في المطبخ قالت لي انتي كويسة يابتي عدن؟ قلت ليها كويسة يمكن كان كابوس .

خالي جاء اطمن علي وقال هو ماشي السوق وحسام طلع معاهو مشى الجامعه ،، جات صاحبتي رحيق قالت لي يا عدن عارفه دا م وقتو لكن بعدا حاولي انزلي الجامعه لأنو الأمتحانات قربت.....قلت ليها والله يارحيق مخي جايط وم عارفه اعمل شنو زاتو ، مرت خالي جابت العصير ل رحيق وسمعت حديثنا قالت لي كلام صحبتك صاح يابتي انتي بعدا لأزم تفكري في دراستك ومستقبلك وم تنسي المشغل حق ابوكي الله يرحمه محتاج لشخص يديروا ويقيف فوق راس العمال ومافي زول غيرك انتي وحيدة ابوكي وامك ولازم تحافظي على ملكهم زي ما هم خلو ليكي.

بقيت افكر في كلام مرت خالي دا بعد رحيق مشت مني ،، قلت خلاص بكره بنزل الجامعه اصلاً دي آخر لي سنه بعد اخلص بدير المشغل حق الملابس بنفسي ؛؛ للعشاء كدا جوني عمي وبنتو سماح كان الوقت دا خالي لسه م جاء من السوق....قعدوا معانا للساعه 9 حتى طلعوا قبل يطلعوا جابو لي معاهم علبه قلت ليهم دا شنو؟ سماح قالت لي افتحيها فتحتها لقيت فيها تلفون ابوي ومفتاح عربيتو ،، عاينت ل عمي قال لي يابتي التلفون حق ابوكي دا اتكسر لكن وديتو صلحتو .

في التلفون ح تلقي كل شيء ليهو علاقه بشغل المشغل حق ابوكي وكمان ح تلقي اسماء العملاء الكان بتعامل معاهم ،، طبعاً بعد تخلصي الجامعه ح تديري المشغل انتي وح تتعرفي على وجوه مختلفه ، كل يوم ح تتعاملي مع ناس شكل بس حالياً ح يستلم إدارة المشغل ايوب ولدي مسافة تتخرجي لو م عندك مانع.....قلت ليهو ولو ياعمي العفو الحاله وحده مافي فرق بيني وبين ايوب كلنا واحد ،، قال لي ربنا يكرمك وقبل انسى العريبه جبتها ليكي معاي هسي برا كانت في الورشه وبعد اتصلحت جبتها معاي.

قلت ليهو وانت ح ترجع بشنو في الليل دا ياعمي ؟ اديتو المفتاح قلت ليهو سوقها معاك امشي بيها انا اصلاً م محتاجه ليها هسي بعد اخلص بستلمها....قال لي واصلي بيها للجامعه يابتي قلت ليهو لا انت امشي بيها المسافه م قريبه وكمان الدنيا ليل ،، طلعوا مشوا كنت واقفه جنب الباب اول ما جيت داخله حسيت مرت خالي وشها اتغير ،، قالت لي يابتي عدن اوثقي لكن م للنهايه ، وقفت مندهشه من كلامها وقبل اسألها قصدك شنو قامت دخلت جوا ، بقيت واقفه محتاره وجملتها دي تمشي وتجي في راسي .

قاطع تفكيري صوت الباب بضرب مشيت فتحت لقيت خالي جاء من الشغل هو وحسام جو مع بعض ،، بعد قعدو واتعشوا وبقينا نتوتس كلمتو قلت ليهو عمي جاء هنا هو كان بطبز في تلفونو اول ما قلت ليهو عمي جاء وشو اتغير بس م رفع راسو عاين لي بس قال لي إن شاء الله عافيه ؟ قلت ليهو عافيه وحكيت ليهو بالكلام الدار بيني وبين عمي.....من قلت ليهو ايوب استلم شغل ابوي ، سكت وم اداني اي رد قام على حيلو وقال لي خير ودخل جوا.

بقيت قاعده مستغربه في ردودهم وكلام مرتو القبيل،، طوالي حسام قال لي خير ما فعلتي يابت العمه واصلاً انتي حالياً م فاضيه للأمور دي كلها وبعد الجامعه إن شاء الله كلو بتهون قلت ليهو إن شاء الله قعد يحكي لي ويطمن فيني وكدا ،، بعد كلامو حسيت نفسي مرتاحه قلت الحمد لله لقيت لي زول بطمني شوية والله الحياه بقت جايطه لي في راسي وم مفهومه ابداً....قال لي م تشيلي هم شيء وخشي نومي بكره الصباح بوصلك الجامعه بطريقي قلت ليهو تصبح على خير.

دخلت مشيت شلت مويه من المطبخ قبل امشي الغرفه ،، جيت ماره بجنب غرفه خالي كان بتكلم مع مرتو سمعتو قال غبيه خلاص....استغربت قلت خالي الله مالوا منفعل م من عاداتو لكن يمكن ضغط الشغل ،، مشيت نمت بالليل بقيت اشوف نفسي في مكان فاضي لا بيوت ، لا شجر ولااا شيء والدنيا ضلام ونفس الحاجه السوداء الأمس كانت ساكاني

اضغط