رواية وجوه مختلفه الفصل الرابع 4 - بقلم دانيا

رواية وجوه مختلفه

الفصل الرابع4

بقلم دانيا

فجأة سمعت صوت البوري حق الركشه اتلفتت مخلوعه بتاع الركشه قال لي انتي كويسة؟ لي قريب نص ساعه بتكلم معاكي تحاسبيني عشان انا ماشي ،، بقيت اعاين ليهو واعاين للبيت قلت معقولة يعني انا لسه م خشيت لا حوله ولا قوه إلا بالله ركبت في الركشه تاني ووصفت ليهو بيت خالي قلت ليهو وصلني....عاين لي بإستغراب وقال لي طيب ودور الركشه طوالي ومشى وصلت بيت خالي حاست بتاع الركشه ودخلت جوا م لقيت زول في البيت .

تماضر وامها شكلهم طلعو وخالي في الشغل وحسام في الجامعه ،، بعرف وين بختو المفتاح شلتو فتحت الباب ودخلت جوا دخلت الغرفه قعدت في السرير كدا التلفون ضرب كان مكتوب رحيق رديت عليها قالت لي اها مشيتي بيتكم؟ قلت ليها مشيت لكن م قدرت اخش جوا ورجعت....قالت لي الكوابيس البتحصل معاكي دي انا متأكده إنها بسبب فعل فاعل م ساي ، استغربت وقلت ليها قصدك شنو؟ قالت لي الليله بعد الظهر امي شافت مرت خالك طالعه من بيت دجال الحي الإسمو العفريت.....اتصدمت من كلامها قلت ليها مستحيل قصدك شنو ؟ مرت خالي ح تضرني يعني لا مستحيل اصدق حاجه زي دي.

قالت لي يا عدن م تكوني على نياتك وتثقي في الناس على العميانه ،، طوالي اتزكرت كلام مرت خالي القالتو لي " اوثقي لكن ما للدرجه دي " الكلام دا بعد اديت مفاتح العربيه ل عمي اليوم الجانا بالليل ،، بقيت شارده وبفكر قاطع تفكيري صوت رحيق وهي بتقول الوووو يابت مشيتي وين؟ قلت ليها ااا معاكي لكن شوفي م تدخلي اوهام زي دي في راسي انا براي مشتته افكاري ، قالت لي طيب رايك شنو نمشي ليهو نسألو منها ليه جاتو وعملت شنو؟ قلت ليها يابت الله ييكي وقفلت منها.

المساء قلت الليله نهائي م بنوم خليني اشوف الحاصل شنو؟قاعده في الغرفه في نص السرير ومخليه الضوء شاعل وتماضر نايمه جنبي....بعد شويه غلبني النعاس وغفيت سندت راسي على رجل السرير ونمت ،، حسيت بحاجه صمطتني كف لمن قمت مخلوعه فكرت السقف وقع فوق راسي فتحت عيوني وختيت يدي في خدي لقيت الضوء كان طافي وفي خيال طالع من الغرفه ؛ بقيت اصرخ خالي جاء جاري قال لي في شنو بسم الله يابتي في شنو ؟ ولع اللمبه وجاء قعد جنبي .

مرت خالي قالت لي مالك يابتي في شنو كل يوم مقعطه لينا نومنا ،، قلت ليها انا م قصدي والله وبقيت ابكي خالي اتلفت عليها قال ليها دا كلام ليكي تقوليهو هسي سكتت ودنقرت راسها خالي بقى يهدي فيني زحيت يدي من وشي ،، فجأة ملامح وشو اتغيرت وهو بعاين لي حسام جاء قرب مني قال لي دا شنو الفي وشك دا ؟ طوالي خالي قال لي احكي يابتي الحصل معاكي شنو ؟ قلت ليهو كنت نايمه حسيت بحاجه ضربتني بقوه لمن قمت مخلوعه وكانت جنبت وشي واجعاني شديد.

قام على حيلو وقال لا كدا كتير انا متأكد في حاجه غلط في البيت دا ،، اثناء ما هو بتكلم سمعنا صوت كركبه برا قاموا جرو برا يفتشوا مصدر الصوت دا من وين فجأه باب الحوش فتح وفي حاجه طلعت منو مشينا وقفنا في الحوش وخالي وحسام طلعوا جرو وراها في النهايه جو راجعين بعد ربع ساعه ومعاهم زول لابس اسود في اسود انا من شفتو حسيت الدم جمد في عروقي كان كله مغطى باللبس الأسود ومكمكم وشو ؛؛ خالي قال افتحي وشك دا....بقينا نعاين مستغربين انا طوالي رجعت خطوتين للورا .

سمعت صوتها من تحت الغطاء بتقول سامحني يا خال ،، والله م قصدي الأذيه بس عاوزة اخوفها ، انا بقيت منططه عيوني قلت تخوفني وليه تخوفني وهي منو زاتها وعاوزة مني شنو؟ خالي مسكها من يدها قال ليها قلت ليكي افتحي وشك دا من غير كلام كتير مرت خالي بقت ترجف اول مافتحت وشها بقيت اعاين ليها في صدمه وم قادره استوعب قلت ليها انتي الكنتي بتخوفيني ؟ انتي مش بت اخو مرت خالي عاوزة مني شنو يابت

اضغط