رواية وجوه مختلفه الفصل السادس 6 - بقلم دانيا

رواية وجوه مختلفه

الفصل السادس6

بقلم دانيا

اثناء ما انا ماشه بالجهه الخلفيه للمشغل كانت الشمس على وشك المغيب ،، اتصل لي ايوب عاينت للمكالمه بقيت اتلفت قلت إن شاء الله م يكون شافني ، رديت على المكالمه بعد مسافه....سلم لي وسألني من ناس البيت وقال لي وين م ظهرتي علينا يابت عمي ولاا بتقولي عندي اهل امشي اسلم عليهم ولاا بتزوري المشغل ،، قلت ليهو والله ياايوب حقكم علي لكن الأيام دي بالنيه بس ؛؛ قال لي خير .

انتي م مرتاحه في بيت خالك ؟ احكي لي عارفاني لو الناس كلها خلتك انا دائماً سند ليكي يابت عمي ، سكت مسافه وتاني قمت حكيت ليهو الحصل لي من اول شيء لآخر شيء بس م حكيت ليهو قصة التلفون اثناء ما انا بتكلم معاهو بالتلفون جات عربيه ماشه بسرعه شديده قربت تطقشني لمن قلبي عمل شح ،، اول ما جات جنبي الزول الفيها م قدرت اميزو من الخوف والخلعه بس رمى لي ظرف بالشباك وساق بسرعه في ثواني العربيه اختفت.

ايوب كان في التلفون شغال يقول الووو عدن الووو يا عدن انتي كويسة دا شنو صوت العربيه دا ؟ يابت خوفتيني عليكي ردي.....انا التلفون دا طلع من بالي بقيت مركزة على الظرف بس شلتو من الأرض قبل افتحو قريت كلام مكتوب برا الظرف " اهربي عاوزين يقتلوكي " اتجمدت في محلي حسيت براسي تقيل بعد قريت العباره دي بقيت اعاين للظرف وانا برجف من الخوف.

واقفه بقيت اتلفت حولي وخلاص الشمس غابت والمغرب اذن ،، بقيت ارجف وحسيت رجليني م شايلني قلت منو عاوز يقتلني وح يستفيد شنو زاتو؟ قاطع تفكيري صوت التلفون وهو بضرب عاينت لقيت مكتوب ايوب م قدرت ارد ليهو قلت لازم اطلع من هنا اساساً لو قلت امشي المشغل ح القاهو مقفل لأنو بقفل من الساعه خمسه.....قمت ماشه على الطريق العام عشان اركب عربيه اوصل بيها البيت فجأة لمحت لي خيال لمجموعه قريب خمسه وغير اللون الأسود المغطيهم م شايفه شيء.

وقفت مخلوعه وهم كانو على مسافه بعيده شويه مني ،، قلت هوي يا عدن اجري مافي حل تاني ختيت الظرف في شنطتي وجريت بنمره واحد.....حسيت قلبي ح يقيف من التعب واول ما قربت للطريق العام قلت الحمد لله وصلت طوالي حسيت بحاجه سحبتني للورا ،، صرخت بصوت عالي واتلفت بسرعه وراي لقيتو دا ايوب لمن اتهجمت لمن شفتو ؛؛ وقفت في صمت وانا بعاين وراهو وبتلفت عاوزة اشوف الكانو جاريين وراي بس م شفت اي شيء.

ايوب قال لي عدن انتي كويسة والجابك هنا شنو ؟ في الوقت دا وليه حالتك كدا حاولي اخدي نفس عميق كنتي جاريه ول شنو ؟ انا ياداب قفلت المشغل لأنو في طلبيه اتأخرت حتى جهزت وياداب رسلتها للزبون وطالع على البيت شايفك واقفه هنا وفي المكالمه فجأة سكتي وم رديتي وم عرفت مالك والحاصل عليك شنو....يابت احكي خوفتيني عليك قلت ليهو ااا مافي شيء كنت ، وقبل اتم كلامي جات رساله من نفس الرقم كان مكتوب فيها " يمكن دا واحد من العاوزين يقتلوكي اوعك تحكي " عاينت للرساله فجأه ملامح وشي كلها اتغيرت .

ايوب قال لي في شنو يابت وكأنو انا م بتكلم معاكي ،، بقيت اعاين ليهو واعاين للتلفون قبل افتح خشمي بحرف جات مكالمه في التلفون عاينت لقيت مكتوب " ايوب يتصل " انا هنا حسيت الدم جمد في عروقي....قلت كيف يعني ايوب هنا وايوب هناك ،، عاينت ليهو ومع ضو العربات لمحت لتعابير وشو الكانت كاسياها إبتسامه غريبه إبتسامه تحمل كل معاني الشر والألغاذ ، م اتكلمت معاهو رجعت منو خطوتين للورا ونسيت إني واقفه على حافه الظلط وقبل ما اتصدم بالعربيه لاحظت لوجه الكان فجأة بقى يأخد عدة ملامح تحسو كأنو وجوه مختلفه في جسد واحد وفجأة اصطدمت بالعربيه ووقعت وقبل عيوني تغمض عاينت بإتجاهو بس كان اختفى

اضغط