رواية وجوه مختلفه الفصل الثامن 8 - بقلم دانيا

رواية وجوه مختلفه

الفصل الثامن8

بقلم دانيا

قاعدين منتظرين خالي لسه م جاء والعشاء اذن قمت مشيت صليت العشاء ايوب جاء ،، مشيت ليهم في الصالون قلت لأيوب حمدلله على السلامه ، قال لي الله يقبل حمدك .

طوالي عمي قال لي يابتي شكله خالك دا م جاي البيت م بعيد للدرجه دي لو راكب سلحفا كان جاء....قلت ليهم دقيقه اتصل ليهم اتصلت في تلفون خالي لقيتو قافل خليتو قمت اتصلت ل حسام ، قلت ليهو وين انتوا ؟ قال لي انا ياداب جيت من السوق وهسي طالع عليكم لكن ابوي وصلكم صاح؟ قلت ليهو لا والله من قبيل قال لي جاي عليكم لكن تلفون قافل هسي ولحد الآن م وصل.

قال لي خلاص هسي انا طلعت بشوفو معاي في الطريق لو لقيتو ،، قفلت منو قلت ليهم خالي طلع من هناك لكن وينو لسه م وصل الحاصل عليهو شنو وتلفونو قافل مالو؟ عمي قال زول مستهتر ؛؛ عاينت ليهو بإستغراب لأنو م من عاداتو ينتقد غيرو....والصدمه الخلت الدم يجمد في عروقي من الخلعه من غير ما احس كنت قاعده في الكرسي قمت على حيلي بسرعه لمن هم إستغربو زاتهم ! عمي وايوم كانو قاعدين في سرير واحد وانا قاعده في كرسي طرف لمن عمي قال عن خالي مستهتر عاينت ليهو بس فحأة عيني وقعت على الحيطه الكانت عاكسه فقط ظل ايوب وهو جالس إما عمي م كان في إنعكاس ل ظلو .

قمت مهجومه بقوا يعاينو لي عيني وقعت في عين عمي الكانت نظراتو غريبه نفس نظرات الشخص الشفتو آخر شيء يوم الحادث ،، ايوب قال لي بسم الله مالك يابت؟ قلت ليهم برجع ليكم واصلاً الموضوع م مهم شديد اعفوا لي تعبتكم وطلعت بسرعه اول ما طلعت جاتني رساله من رقم في تلفون ابوي بإسم الشبح....لمن عاينت للإسم ساي لمن جسمي بقى يرجف فتحت الرساله كان مكتوب " الصديق هو العدوا الأول " .

الصديق؟ المقصود شنو بالكلام دا والقاعد في الصالون دا منو؟ وعمي وين وخالي مالو م وصل ؟ وعبارة الصديق دي قاصدين بيها شنو وكيف عدوء ؟ قمت رديت انت منو وقصدك شنو ؟ م رد لي ، اتزكرت قلت طيب ما اتصل في تلفون عمي ، اتصلت م رد لي قلت خليني اطلع برا تاني اشوف الحاصل شنو تلفوني وتلفون ابوي كانو في يدي ،، عاينت لتلفون ابوي مسافه قلت التلفون دا ملخبط لي راسي إلا هو ح اقفلو واختو في الدرج تاني م بستخدمو.

قفلتو وفتحت الدرج عشان اختو لقيت الظرف داك قلت انا الظرف دا كنت ناسياهو من يوم الحادث لحد الآن م فتحتو اشوف فيهو شنو ،، ختيت التلفون وشلت الظرف قعدت في السرير وفتحت الظرف....اول شيء لقيت فيهو مفتاح صغير م عرفتو دا حق شنو ، تاني جوا الظرف كان في ظرف طلعتو قبل افتحو عاينت كان في كتابه من برا مكتوب " حقائق مخيفه " قلبي رجف قلت حقائق شنو وقبل افتح الظرف الصغير ايوب ناداني قمت مشيت.

ختيت الظرف في الدرج وطلعت مشيت ليهم قال لي حسام اتصل وقال م بقدرو يجو لأنو ابوهو تعب فجأه وكان في ناس في الطريق أسعفو للمستشفى وهو هسي معاهو هناك وقالك اطمني هسي ضغطو نزل شويه ،، بتكلم معاي كدا الباب دق قال لي انا بفتح الباب طلع مشى على الباب وانا قلت خلاص اتصل ل حسام اشوف خالي بقى كيف بتكلم مع حسام سمعت صوت ايوب بقول انت هسي كنت قاعد معانا انا وعدن في الصالون كيف تقول ياداب جيت .

طلعت برا لقيت عمي شايل اكياس وياداب جاء من السوق ،، ايوب قال لي يا عدن عليك الله هسي ابوي مش كان معانا؟ عمي قال ليهو يا ولد جنيت انت انا دي جيتي من السوق م قدرت اجي بدري لأنو زميلنا عمل حادث واسعفناهو المستشفى حتى لقيت ود خالك هناك وقال لي جابو ابوهو احمد المستشفى لأنو تعب فجأة ،، انا بقيت اسمع ليهم من غير ما اقدر ارد او حتى افهم الحاصل شنو.

عمي دخل جوا وايوب بقى يعاين لي قال لي الحاصل شنو ؟ ابوي دا مالو انتي م حاسه تصرفاتو غريبه؟ قلت ليهو تعال معاي جبتو الغرفه كنت عاوزة اوريهو الظرف م لقيت الظرف في الدرج ومكان ما فتشت م لقيت ليهو اثر ،،بقيت واقفه مصدومه الظرف مشى وين ، ايوب قال لي مالك يابت ؟ عاينت لمحت الظرف في الشباك استغربت قلت دا كيف وصل هناك انا ختبتو في الدرج ،، مشيت شلتو وفتحتو بسرعه لقيت فيهو كميه من الصور.

ختيتهم في التربيزه وبقينا نقلب فيهم ونعاين فيهم كانت كلها عباره عن صور لأبوي مع ناس ، مره قاعدين عاملين حلقه وكأنهم في إجتماع ، وصورة فيها ابوي كان بسلم على زول وفي تربيزه بيناتهم فيها كميه من الدهب...بقيت اعاين ل ايوب وهو بعاين لي مصدومين ومستغربين شديد .

تاني في صورة كانت فيها ابوي لافي شال في راسو وسايق عربيه جاي من منطقه كلها جبال وكان معاهو نفرين ،، وتاني كان في صورة ابوي قاعده مع ناس ووراهم كان في صناديق اسلحه انا لمن شفت الصورة دي حسيت الدم جمد في عروقي ...الناس ديل اشكالهم غريبه ووجوهم دي اول مره اشوفها ،، ولسه كان في كميه من الصور م قدرت اعاين ليها تاني قمت على حيلي وجسمي كله بدأ يرجف وبدأت الأسئله تزدحم في راسي ياربي الناس ديل منو وابوي عندو معاهم شنو والدهب والأسلحه ديل كلهم تبع منو ؟.

قاطع تفكيري صوت ايوب لمن قام بسرعه ووجه لي صورتين مداهم لي وقال لي عايني ،، الصور كانت وحدة للمشغل عباره عن كراتين ملابس وبين الملابس خاتين الدهب ومرة خاتين اسلحه ،، والصورة التانيه صورة الحادث الحصل لأبوي وامي من شفتو لمن حسيت راسي تقيل من شدة الصدمه ، قلت لأيوب الصور دي معناها شنو؟ من غير ما احس دموعي بقت تجري ، قال لي م بعرف اول مره اشوفها لكن في بعض من الوجوه دي م غريبه عني .

بس المشغل دا كان شنو زمان؟ عاينت ليهو بصدمه وكأني فهمت معنى سؤالو ،، قلت ليهو مستحيل ابوي م بعمل كدا

اضغط