رواية وحوش بشريه الفصل السابع عشر 17 - بقلم Rozaya1122

#البارت الثامن عشر
#وحوش بشريه
#روزايه

باجر تعــشــك ويــــهواك غير انسان
واذا گلك يحبـــك مــثلــي لـــتصدگه؟
نعم تلـــگـــه اليحبك وانه اظن الگيت!!
بس گــــــد ماهــــويتك والله ماتــلگه؟؟
خلص هسه انتهينه وعمري صار كتاب
خليه اعله رفك والــــمــهم طــبـــــگه
ضل اسمك نبض فاضحني صبح وليــل
يدك بقلبي سيــــف وتــجــــرح الدگه....

رافد: انتي؟؟؟ شنو شتريدين دكولين اني اسفه  واعتذر ومو قصدي شنو هاي الصلافه العندج تشيلين سلاح وتضربين بنيه مثلج

وين تربيتج واخلاقج اكو زلم وهي تصرف وين واصله بيج

مافكرتي بالعواقب حضرتج صايره فازوع زلم عليهه العتب مشوربه ما تسوي سوايتج..

شنو هالوقاحه العندج وقله تربيه واستهتار ادكين هيج دكه الصوج بيه اني انطيتج اكبر من حجمج وخليتج تتمادين

شمه: صح غلطت حاسبني بس قبلهه روح حاسب اختك الي خلت دم شهد بطولهه وامك تدري وسكتت

وانت تسكت بشهد كلما تريد تحجي ودكولهه مو هسه ليش لان اختك المجرمه وهسه جاي تحاسبني

بعدني احجي وجان يضربني راشدي من قوته وكعت بالكاع لزمت خدي احسه اشتعل نار

جرني من ايدي وكومني خله ايده بركبتي وعيونه كلهه شر ابد مو رافد هذا الواكف كدامي اول مره اشوفه بهالعصبية...

اختنكت ما اكدر اتنفس لزمت ايده الي لازمني بيهه وهو يضغط على ركبتي  وعيوني تتوسله يعوفني...

حسيت روحي راح تطلع نزلت دموعي على ايده وهو ضاغط بكل قوته وعبالك الي كدامه رجال مو بنيه ويتلاوه ويا...

صاك على اسنانه ويحجي بكل عصبيه حته عروقه مبينه

رافد: كلشي توقعت منج بس توصل لهنا ابد..
ما يوم اجيت ما لكيتج مسويه مصيبه

كل هذا و اوكف بجانبج ومقدر وضعج واكول حقهه محرومه من حنان امهه وابوهه

ولج ماخليتيلي خاطر ماكلتي هاي امه وهاي اخته شنو هالاستهتار العندج اذا اكتلج بمكانج خلاص اكو احد يلومني

طلعتي عن الطريق وفوكاهه بكل وقاحه
وقله ادب تحجين والسانج شطوله

نزلتي راسي وخليتهم اشمتوا بيه وكلمن يكول هاي الي ذبحت نفسك عليهه

شمه: دفعني بكل قوته وترك ركبتي ردت اوكع لزمت التخم واني اكح وعيوني مغوشه من الدموع الا شويه جان متت بين اديه

اشوفه دار وجهه ويفرك براسه ماحجيت شي ضليت لازمه ركبتي واخذ النفس كوه واكح

التفتت عليه وحجه بتهديد ويأشر بأصبعه

قسما بالله اذا شفتج واصله الباب وطالعه منا اكسر رجليج اثنينهن وكولي رافد ماكال

تضلين هنا علما اشوف تاليتج شلون ووين راح توصل وياج ...

فتح الباب وطلع وهو بركان توقعت راح اموت بين اديه كل هذا يطلع من رافد الهادئ الي مايوم شفته عصبي

سوده بوجهج شمه شسويتي بروحج عساج ميته ولا شفتي هاي الايام

مسحت دموعي وطلعت من الاستقبال تلكتني عمه فضه شافت حالتي ماكدرت تحجي شي عفتهه وصعدت للغرفه بس هزيتلهه راسي

ادحك على نفسي شسويت ياربي دمرت حياتي واكيد ما راح تعدي الي وراح ادفع ثمنهه غالي

ادحك على اديه شلون لزمت سلاح وصوبت وطلعت دم شنو هالروعنيه الي عندي

ليش اني هيج متوحشه وعرمه وكولت رافد تصرفات وحده بلا اخلاق شنو الي وصلني لهنا؟؟؟

خليت الكل يتهمني بعدم التربيه والاستهتار شنو الي اريد اوصله من سويت هيج لو ميته البنيه جان شنو مصيري؟؟
...

مرت الايام واني بين تأنيب الظمير وبين الندم عايشه...

تجي اسماء من الدوام تضغط عليه يله ابدي اقره ومرات حته تزعل لان الكتاب ما افتحه واني فتره مراجعه

امتحاناتي قربت واني ما اعرف مصيري شنو محبوسه بالبيت اخاف من تهديد رافد

هو راح وبعد ماشفته ابد ولا سأل عليه وحتى ما ادري بشهد شلونهه..

الوضع يم بيت عمي هادئ ضرغام بالدوام كل اسبوع يله يجي....

كذلك وسام وحسام بالدوام واسماء تطلع من الصبح ماترجع غير ل3 وتعبانه وبسرعه تنام

قيصر من السالفه لحد الان ماشفته كالت عمه فضه مسافر عدهم مؤتمر الدكاتره بليابان ...

واني بمكاني اراوح محد سأل عليه لا ام لا اب لا اخت كاعده اعد الايام شوكت تفرج

بدت امتحاناتي واني مخليه راسي بالكتب
كل يوم امتحنه يجي ضرغام يرجعني ووسام هو الي يوصلني

وطول الطريق امشي واحل بلاسئله وضرغام يكول اخذيهه مني تنجحين يخلي عندي حافز بحيث ارجع بوجهي اقره

بهاي 10 ايام مال الامتحانات جنت اضل للصبح اقره حتى انام على الكتاب من التعب 

عمه فضه ماقصرت وياي ابد حته الاكل تجيبه الي للغرفه دكول وراج شمات شدي حيلج محد يفيدج
...

اخر امتحان جان فيزياء رجعنه بالطريق نمشي اني وضرغام وراسي بلاسئله احل بيهه وهو يدور بلاجوبه بالكتاب

ماحسيت غير سياره وكفت كدامنه كطعت الطريق عنه

رفعت راسي سرت الفرحه بداخلي وكلبي زادت دكته من شفته

رافد نزل سلم على ضرغام واشرلي بعيونه اصعد بس بخزر اني بسرعه صعدت بالسياره واسمعهم يسولفون..

ضرغام: ترجعهه للبيت ابو الروافد لو تخلصنه منهه ترى صار عشر ايام داخلين انذار من ورا امتحاناتهه

رافد: شدكول انت تستاهل ارجعهه بعد سوايتهه يول ضرغام ما تنغفر سوايتهه

ضرغام: لا لاتحجي هيج احنه بني ادم خطائون ماكو انسان ما يوكع ويتعلم من خطأه

وشمه دافعت عن اختك المظلومه ووكفت بوجه الظالم

لاتزعل مني رافد بس شمه سوت الي ماكدرتوا تسوو وسترتو علي

شهر كامل محد كلف نفسه يسألهه منو سوه بيهه هيجي حته ابوك الشيخ سكت

صح ما يريد يفضح بنته الثانيه بس شنو ذنبهه هاي وصلت الموت

لاتعتبره دفاع عن شمه واحثهه على الغلط بالعكس اني اول واحد حجيت عليهه وماقبلت بتصرفهه

بس انت لو واكف على حالة اختك وشايف ايدهه المخلوعه وراسهه المفتوح جان حجيت غير شي

رافد: شلون راح تعيش وياي وتصير عدهه جهال وهي بهالوحشيه والعنف عبالك مجرمه

ضرغام: يابه والله لو مكانك وانام وراسي بارد هاي سباعيه ماينخاف عليهه بس اني اكلك يرادلهه ترويض حته تبطل الوكاحه والروعنيه

اكبر غلط تصرفهه بس مو معناتهه نعاقبهه بلاسوء وبالتالي راح تتمرد اكثر

رافد: اكيد ادافع عن بنت عمك وماتنطي بيهه المهم راح اخذهه مشوار وارجعهه لبيتكم

هي خلصت امتحانات الاسبوع الجاي نتزوج والزفه من بيتكم وياريت امك تطلع وياهه حته تجهزهه لان الوضع عدنه بالبيت مشحون...

ضرغام: الف رحمه على والديك واخير راح اخلص من شمه وطلايبهه بيهه الخير ياب

رافد: الخير يصيبك يوم الك

شمه: اسمع كلام رافد واني بسياره بس شنو اريد اطلع راسي من الجامه واصيح احبك رافد

الفرحه غمرتني وبينت عليه الضحكه شكت حلكي ووصل لاذاني

الفرحه ماتوصف عندي الهي الك الحمدلله وشكر عبالي راح يطلكني اروح فدوه لطوله وكلبه

اجه صعد بعد ماسلم على ضرغام حرك السياره والتفت عليه

رافد: اسمعي الي راح اكوله

سوايتج ما انساهه ابد ولا راح اعديهه الج بطلي هالخفه هاي وصيري بنيه حالج حال البنات مو رجال انتي لو ماخذه طكه علاهن

الف مره كتلج اني موجود الي يضوجج احجي الي واني اخذ حقج مو تصرفين من راسج

شمه: اجيت اكله جان اخذت حق شهد شهر وانت ساكت اووف منك يلساني شيسكتني

رافد: سمعتي لو اعيد لهذا الراس اليابس

شمه: سمعت

رافد: شوفي شمه صار شكد على الحادثه شهر تقريبا بالموت الاحمر قنعت اهلي

شلون راح تصيرين جنتهم بس فهميني وانتي من اولهه هيج سويتي

ولج بيت شيخ وانتي شايله اسلاحج وتهدين على عائلته ادري رجال انتي

شمه: سكتت  ما حجيت لان الغلط راكبني من فوك ليجوه

رافد: ما اريد اعيد الي حجيته بعد هاج هاي الفلوس وابدي حضري بنفسج الاسبوع الجاي نتزوج والزفه من بيت عمج

وهسه تروحين وياي تعتذرين من ابوي وامي

شمه: شنوووو والله ما اعتذر لو تصلخني فوك ما امك كالت عليه ك....

وكالت انتي مو بنيه وانتي وانتي وتريدني اعتذر

مثل ماسمعت منهم لازم تسمع مني ماسألت نفسك هاي ليش سوت هيج لان سمعت كلام مايلبس علي ثوب

تدري يارافد براء شكالتلي ...

كالت هسه اذب عليج تهمه واخلي يطلكج تدري امك سبتني وكالت بنت الزاني وامج ام الرجوله

وهسه تريدني اعتذر ..

رافد: شمه انتي ضيعتي حقج بيدج لو حاجيتلي هيج جان اخذت حقج من بين عيونهم وخليت الكل يعتذرلج هسه بيا عذر ادافعلج

شمه بهاي سوايتج دنكتي راسي شكد سمعت حجي واني ما اعرف ادافع وشحجي وشكول

شمه: رافد اني وحدي واهلك وحدهم لان من الاساس هم ماقابلين عليه وانت تدري كولش زين

رافد: امشي وياي هسه للبيت الحجيه اكلت راسي عليج وشهد تريد تشوفج

شمه: وصلت للبيت اخاف اطب خاف الكا خالي سلمان نزل وياي  رافد اول ماطبيت تلكتني مرت خالي نعمان وبناتهه سلمت عليهن

وركضت لببيي حضنتني وبوستهه شكد مشتاقتلهه اول ما رزلتني وسبت علاهن وبعدين تبوسني

بعدني كاعده يمهه واجت شهد تمشي على كيف ركضت حضنتهه وابوس بيهه وهي نفس الشي تلوم بيه وليش هيج سويت

رافد واكف ينتظرني لان يدري باهلهه مايتامنون

سولفت شويه ويه شهد وبيبي وطلعت ويه طلعتنه صار خالي وسعاد بوجهي

كلت خلي اكسر الشر وسلمت علي شلونك خالي

مارد السلام ولاعبرني ولاسعاد  عادي ما اهتميت زعله كلووو هم حاسب نفسه شيخ ابو الدكايك

رجعني رافد لبيت عمي وكال يومين واجيبج جمعي ملابسج وغراضج حته احولهن للبيت

بارد حيل وياي بكلامه بعده زعلان اني هم سكتت
شيحجي اكوله ايي

رجعت للبيت لكيت عمه فضه منطيهه خبر ضرغام
كعدت احجيلهه شكال وانطيتهه الفلوس

فضه: باجر نخلي ضرغام ياخذنه لبغداد نجهز مناك هو يوم اكتبي الي محتاجته حته ماننسى شي والي ننساهن عود نشتريهن من الانبار

اني ما اطلع وياجن اضل ببيت اخويه وانتي اسماء اطلعن

شمه: عمه خايفه عندي احساس مو حلو خاغ يصير شي

فضه: لا لتخافين يمه هاي كل عروس هيج تفكر وتصير عدهه رهبه احمدي ربج رافد متمسك بيج وما فرط بيج ابد

شمه: شلون راح اعيش وياهن

فضه: انتي بيتج وحدج سدي الباب عليج واكعدي ما الج علاقه بأحد وان شاء الله تنجحين واطلعين معدل وتلتهين بالدراسه
...

ثاني يوم رحنه لبغداد من الصبح اني واسماء وساره طلعنه نجهز ما رجعنه غير المغرب ميته تعب بس تعشيت نمت

ثاني من الصبح  اجاني رافد حته اجمع غراضي
طول الطريق اسولفله ششتريت وعلى بغداد

وهو يجاوبني احسه شويه احسن وبده يرجع مثل الاول واشوف نفس اللمعه الي بعينه بس بعده يكابر

وصلت للبيت ماكو احد بس مرت خالي نعمان وبيبي كعدنه اني وشهد نجمع بالغراض ونسولف

بلأول سولفنه على ضرغام وكالت كليله على السبب الي خلاني ارفض

اندمجنه بالحديث وانذكر قيصر بنص الحديث

شهد: شمه خو ما بعدج تحبين قيصر؟؟

شمه: لا يولي عندي رافد يسوه الدنيا

شهد: اي عبالي لسع تفكرين بقيصر وتحبي لان تعلقتي بي حيل وكلت مستحيل شمه تنسى قيصر

حته من وافقتي من خطبج رافد كلت يجوز تريد تنسى قيصر وقبلت حته جنت انقهر على حب اخويه

شمه: اي صح حبيته اسنين طويله بس كولشي راح وانتهى وقيصر اختار حياته واني عندي حياتي

سكتت واني اصفط بالملابس انفتح الباب رفعت راسي

شفت رافد واكف وعلامات الصدمه واضحه كل الوضوح علي

ماكدرت اميز حالته مخبوطه عصبيه على صدمه على خذلان ما اعرف شلون اوصفهه

رافد: كومي شهد اريد احجي ويه شمه
شمه: كلبي احسه راح يوكف ياربي بسلا سمع كلامنه دخيلك ربي استرني
كامت شهد طلعت وعيونه عليه

رافد: سؤال واحد وجاوبي بصراحه؟؟

انتي تحبين قيصر جنتي؟؟

شمه: ضليت فاتحه حلكي وما اعرف شجاوب بس هزيتله راسي ب لااااا

رافد: لاتراوغين سمعت كلشي واتذكر حالتج من خطب قيصر وشكيت بوقتهه بس كلت لااا

كالتلي امي وهم ماصدكتهه بس هسه سمعت بأذني ومستحيل اجذب اذاني

شمه: رافد ماعندي شي ويا اصلا ماحاجين مجرد ابن عمي بس انعجبت بي وراحت وحبيتك انت

رافد: حبيتيني؟؟ صار سنتين مخطوبين واني اشوف البرود الي عندج وانطيج اعذار

ساعه اكول طبعهه ساعه اكول مامتعوده موعبالج ماتجي هاي الافكار بالي واكول خاف تحب قبل بس مستحيل اخليج مذنبه ابرئج واتهم نفسي

شمه: جان من يحجي بكل هدوء احس الصدمه مسيطره علي كمت وكفت كدامه ولزمت ايده واني احجي وابجي

رافد جنت طايشه والله ولا حجيت ويا ولا يدري بس حبيتك انت والله

رافد: ترى سمعت من امي انتي عندج علاقه بابن عمج بس تدرين شلون دافعت عنج دفاع

ماسمحت لمخلوق يمسج بسوء ولا اجيت وسألتج لان اثق بيج ومستحيل شمه يطلع منهه هيج..

يعني من جنتي دكولين انت مثل اخوي انتي جنتي ولهانه بحب قيصر

ياعيبه العيبه عليك رافد لهدرجه طلعت مغدور

شمه: لا تحجي هيج رافد والله ماعندي شي ويا وحته مااحجي ويا مراهقه وغلطت

رافد: يجوز بعدج ماتعرفيني ما اتقبل انسان كلبه ويه غيري وحتلو دكولين نسيته واحبك انت

يجوز اعديهه شهر شهرين بس هذا عمر راح اذيج واذي نفسي

ماراح احاسبج ولا اعاتبج منا وانتهى كل واحد يروح بطريق رجعي لابن عمج وتعلقي بي بعد اكثر

شمه: لا رافد لادكول هيج والله احبك اموت عليك الله عليك لا تعوفني ماعندي غيرك عاقبني اهجرني بس لا تتخلى عني

والله احبك واتعلقت بيك رافد اترجاك لا تاخذني بذنب الماضي

رافد: لا انتي ماحبيتيني انتي حبيتي اهتمامي وخوفي عليج

شمه رجعي لبيت عمج والي يسألج كولي ما اريد رافد ما احبه ويضرب ويأذيني مو خوش ادمي شتريدين كولي ذبي الصوج بيه وشوفي حياتج

راح اضل بجانبج مثل ما وعدتج واحاميج منهم بس مااكدر اكمل حياتي ويه انسانه جانت تعشق ابن عمهه موبس تحبه

شوكت ماتحتاجيني تلكيني كدامج واساعدج

ماكدر يكمل الحجي اختنك بسرعه وطلع

شمه: ماخلاني حته احجي عافني وطلع واني اركض ورا كلبي فرفرح بهذيج اللحظه

شافتني شهظ اركض ورا لزمتني واني ابجي بكل قوتي

اريد رافد والله حبيته وتعلقت بي والنبي احبه روحي شهد كوليله شمه تحبك

هو كالي اني سندج واضل وياج وما اعوفج ليش عافني بسرعه

كمت ابجي بكل حرقه وادك على صدري احس كلبي يريد يطلع ويركض ورا يطلب السماح

دخيلك ربي شسويت عندك وهيج تعاقبني الهي اخذ امانتك وخلصني المن عايشه ياربي

ولك رافد ياكسره ظهري ياحبيبي والله احبك وتعلقت بيك ليش عفتني بنص الطريق

ماكدرت اضل بالبيت طلعت اركض لبيت عمي ما اريد اشوف نظره شفقه بعين مرت خالي وبناتتهه

دخلت للبيت شمرت نفسي بحضن عمه فضه وابجي
تسألني شبيج واني مثل بلاع الموس ما اكدر احجي

شكول عمه طلكني رافد لان جنت احب ابنج شحجي يافضه وشكول

انهاريت بيومهه اريد اكتل نفسي واخلص كل معاني الالم ماتوصف الي احس بي

ادحك على نيشاني وحلقتي ادحك على نفسي الي ماكملت فرحتهه

ابيش تنسيتي بيع يا سناء وطلعت حياتي هيج ماكو غير شمه مكتوبلهه القهر والحزن

طلكني رافد وانقطع اخر امل بحياتي مالحكت افرح حالي حال البنات جبت حياتي هم بقهر بمصايب

شلون انطاك كلبك يارافد تتخلى عني وانت جنت دكول ادفع نص عمري بس اشوف ضحكتج

هانت عليك شمه وعاقبتهه بذنب ماضي تعيس
كلبك ما اوجعك عليه ماكلت هاي وحيده ماعدهه احد
...

مر اسبوع على طلاكي واني عباره عن جسد كل روح مابيه لا اكل ولا اشرب بس الدموع مغركتني

شكد حاولت اسماء وعمه فضه اطلعني من حالتي بس مايفيد

خسرت عمري وروحي وحياتي ما اعتقد راح اضوك طعم الفرح بلياك يا رافد

ماادري بعد خساره رافد راح اخسر حياتي وراح ادخل بدوامه مظلمه ما الهه نهايه

لو شايفه لحظه وحده من حياتي ما اتمنيت انولد
لو خانكتني امي بالكماط ولا هاي الايام الي شفتهه وراح اشوفهه ..
..

اجه موعد اعلان النتائج واني ما مهتمه ابد ولا حتى اسأل عليهه النار الي بصدري كافيه عليه

بعد ملحة اسماء وضرغام يله نزلت من الغرفه وتحركت من مكاني

كعدت وياهم بالمطبخ جانت الساعه ب5 العصر شهر السابع سنه 2011

دك تليفون ضرغام دحك على الرقم كال اسكتوا هذا صاحبي وصيته على نتيجه شمه

كلنه نترقب ضرغام وشراح يكول صاحبه جنت مخليه راسي على ظهر الكاونتر ...

وعيوني متروسه دموع منتظره خبر يضيف حزن على حزني

ضرغام: هااااااا رحمة الله والديك تعبتك....

فضه: ها يمه بشر ناجحه لولا؟؟؟

#يتببببع

هوايه بنات كالن نريد صور شبيهه للابطال كل ما الكه شبيهه لواحد انزله الكم هذا شبيهه رافد تقريبا نفس الهيئه بس رافد بعد اطول واضخم
انتظروني انزلكم البقيه بالبارتات الجايه
وبالبارت الاخير انزلكم علاهن😂