رواية وحوش بشريه الفصل السادس عشر 16 - بقلم Rozaya1122

#البارت السابع عشر
#وحوش بشريه
#روزايه

انا مضيع عمر باكته مني سنين
ادور جيوبهن بلجن عسى والكاه
ينوي على الرحيل وينطي مكفى فراك
واخذ كل شي اله من بالي حتى انساه
بيا بخت آل اجيبه وساعه ليا يعود
وترد ايامه ليل واكعد وانا وياه
حدب كل شي بيا من السمع للشوف
وصرت معبر هموم وقنطره للممشاه
انكسر مجداف عمري بزحمه الروح
ووكف بيا الزمن يم ال يكرهون
وخفت همي تكشفه أسرار العيون
خيطت النظر عن لا يشوفون
وخفت حيلي يحدب يكشف العوز
ظهر شديت صبري لشيل المتون
وخفت شماتي تصرخ اي وكع طاح
وكفت رمح على جرحي كبال العيون
ولجمت الجرح لا يصرخ ب اخ
وشلت صفنات روحي وجلمة الشلون

طبيت اركض جان تتلكاني اسماء املخه نفسهه وتصيح ولج اسماء راح مات الغالي..

شمه راح ابوي ما لحك يفرح بينه عمة عيني عليك يابه بعدك شباب..

كعدت وياهه بالكاع وابجي وياهه عمي حسين نعم الاب والعم جان اليه مايوم قصر وياي ولاكسر خاطري هو السبب برجعتي للدراسه..

البيت انملى ناس وعلاهن صوتهه شعلوه وهي تبجي وتنوح بس بعدهه جبل مايهزهه ريح

كوه كومت اسماء من الطرمه وطبينه جوه لكيت عمه فضه منتهيه

مخليه  راسهه على الحايط وعبالك مصدومه بس تصيح حبيبي حسين وين عفتني اني غريبه ياحسين ياعمري

بعدهه مامستوعبه الخبر البيت بس نسوان والولد كلهم رايحين ورا يجيبوا من المستشفى...

عمي حسين رجال يخاف الله وصايم ومصلي ومايوم طلعت حجايه مو حلوه منه رجال مثقف معلم متقاعد راسه ابيض من الشيب

فنى عمره بسبيل يشوف ولده باحسن حال
الله رزقه ب4 ولد وبنيه وكلهم وصلوا بالدراسه
والكل تحمد باخلاقهم

خطيه جان طالع من الصبح اكو فصل بغير منطقه
ومكملين وراجعين وبالطريق متخربط واصل للمستشفى ومتوفي بسبب سكته قلبيه

وفاه عمي جانت فاجعه بالنسبه الهم ولبيت علاهن حته خالي سلمان اتأثر لان صديقه الوحيد هو ما اهتم للعداوه وضل مثل ماهو ويحب الخير

مرت ايام الفاتحه واني كاعده يم اسماء ماعفتهه ابد منهاره اكثر من عمه فضه  الولد حته ما اشوفهم كل واحد بغرفته مرات اسمع صوت بجي واكعد ابجي وياهم...

يوميه بالليل عمه فضه تخلي ولدهه وتكعد تبجي حالهم يفطر الكلب موته جانت فجأه والطيب والزين الكل تنقهر علي

خلصت الفاتحه ورجعت للبيت منا شهد ومنا اسماء اواسي منو واهتم بمنو ؟؟

شهد شويه بدت تتحسن بس لحد الان ماحجت ولاكالت منو سوه هيج

اروح لبيت عمي الكه اسماء نايمه بالفراش وضرغام حالته تبجي العدو بعده ماطاب من وكعه شهد اجته مصيبه ابو...

اني بديت اقره راح تجي الامتحانات واني يوميه مصيبه جنت مندمجه اقره نبهني صوت شهد وهي تصيحني

شهد : شمه اذا اجه رافد من الدوام خلي يجيني
شمه: هو اول مايجي يمر عليج يشوفج بس ليش اليوم تسألين علي

شهد: كلما اريد احجي يكول تحسني وصيري زينه واحجيلي هسه تحسنت اريد حقي

شمه: كمت كعدت يمهه ولزمت ايدهه الصاحيه شهد مودكولين اني اختج ليش ماتحجيلي

شهد: شحجيلج ياشمه منو يصدكني سعاد لو الشيخ؟؟

شمه: شوفي شهد اني كلت لرافد اذا ماخذت حقهه اني اخذه لو عشر زلم ماتوكف بوجهي بس احجي 

شهد: بيوم الي اجيتج مبدله وتوسلتلج نروح
ابوي الشيخ كال عيب من عمتكم واحنه اهل لزم نروح

بيومهه جنت فرحانه لان راح اطلع واغير جو خلصت عمري محبوسه وهاي اول مره اطلع واشوف الناس

من رجعت من يمج اريد اروح اغير شالي ماعجبني سمعت سعاد تتوسل ببراء حته تروح

وهاي ماتقبل اسمعهه تحجي ويه امهه دكول كلما اروح يقلدن عليه وعلى جسمي ويكولن شهد احلى منج

ما اروح وشهد هم ماتروح واذا راحت اسوي بنفسي شي بيوقتهه شكد انقهرت واني اشوف براء تتحكم بطلعتي

وصدك غصبا عني ضليت بالبيت سعاد راحت كالت لابوي الشيخ براء تتحسس تطلع وكلما يشوفن شهد يكولون حلوه وهي تضوج واخاف تسوي شي بنفسهه

وسلمان عنده تحترك العشيره ولا براء تزعل كال شهد ضلي يم اختج

شايفه شكد صعبه ياشمه وانتي محضره ومبدله وفرحانه وتالي تبدين تنزعين ملابسج وبراء كاعده مشمته وتضحك

بيومهه فارت روحي عليهه حاولت بكل الطرق اتجنبهه بس هي ماتكدر اذا ماتغثني وفوكاهه وحدنه بالبيت

حارت شسوت بيه مرتين خلتني انظف البيت وصلت بيهه حته ملابسهه غسلتهه

طكت روحي ما اتحملت كلت حتلو نتعارك وابوي يرجع عليه بس لازم اطلع قهره اليوم بيهه

تعاركنه اني وياهه وهي تغلط وتصيح واني ارد عليهه اخر شي كالت الا اكول لابوي عندج علاقه ويه واحد من الحراس

هي كالت هيج واني فرت فور كمت اغلط واصيح عليهه كلتلهه من تسوين هيج عبالج تحصلين ضرغام

لا متوهمه ياعيني ضرغام شاب وحلو مايباوع للهايشه مثلج

شمه اني كلت هيج وهاي هجمت علي وكعتني بلكاع تشيل براسي وتضرب بالكاشي احس دماغي راح يوكع

ادفع بيهه ماكو عبالك مو مره حديد فلتت نفسي كوه منهه وركضت اريد اجي عليكم

ويه طلعتي اكو مي واكع بالباب مال المطبخ اتزحلكت ووكعت ويه وكعتي انظرب كتفي بالباب

بلاول ماحسيت بشي مثل مايسموهه حدة صواب من حلاه روحي رديت عليهه تفلت بوجهه حشاج

وطلعت اريد اجي عليكم ماحسيت غير الضربه اجت براسي التفتت عليهه شفتهه واكفه ومتحزمه بعدهه تريد تهجم

حسيت بحروره كامت تنزل شويه شويه واتغطى وجهي كله دم لحد ما وصلت الكم وبعد ما ادري بنفسي

شمه: شهد تحجي واني احس نار واشتعلت بيه جان ماتت شهد بسبب وحده مثل براء تغار وحقوده لان اختهه احلى منهه

يولي شهد اليوم لو مو سلمان لو ظاهر يطلع من كبره مايوكفني عنهم اليوم براء الا اخلي بيهه نيشان طول عمرهه

كمت من مكاني رحت اركض ادري بهيج وقت بس النسوان محد اكو خوالي كلهم بالمزرعه يشتغلون لان انطوا فصل للولد المات وخسروا

اسمع شهد تصيح على كيفك ماتكدر بس اليوم لوكاتل لومكتول

رحت طلقه لبيت سلمان اول ما وكفت بالباب كمت اشيل طابوك واكسر بالباب محد طلع

فتحته ووطبيت اركض لكيت سعوده هي وبلاء كاعدات يكصن بالناس

سعاد: هاي انتي تكسرين الباب جنج جلب مسعور

شمه: لاتغلطين يامرت الشيخ يا ام الاصول
سعاد: ولج احترمي نفسج لا ادوس ببطنج موعبالج رافد كبر راسج

شمه: تخوصرت ووكفتلهه احجي بعصبيه
اسمعي زين وحق الله ياسعاد وانتي الحيه براء عبالج اخلي وكعه شهد تروح هيج

وانتي امهه مرت الشيخ تدرين ابنتج سوت هيج بشهد وساكته ياظالمه الله ينتقم منج انتي وهاي البايره الي مخليتهه جنهه ثور بالبيت

براء: ساقطه تسكتين وطلعين برا لو اجي اشوفج الثور شيسوي

شمه: جربي هدي وشوفي اذا ما اخلي دمج بطولج ام الوسخ ام سنون

هم الج عين وتحجيم وانتي ياخطاب يجي يشوفج يشرد تغارين من شهد لان احلى منج

سعاد: ولج شو تجاوزتي هواي شو تعاي اليوم ابوج اصمطه

شمه: شفت سعاد تقربت واني فاقده كل تصرف يطلع مني بدون وعي شلت طابوكه مخليهه بباب المطبخ وكلتلهه

والله اطير راسج بهاي الطابوكه ولادكولين مرت شيخ ولا ام خطيبي الي يمس شهد بالموزين اني الي اصده

بعدني احجي وشفت الثور المجنح هد عليه استغليت الفرصه وجان اضربهه بالطابوكه

ماعرفت انيشن زين اجت بكتفهه كامت تصيح وتفشر وسعاد حارت بنتهه سعاد مبينه جبانه وطلعت بس بوخه

بعدني مستمره اعد وارزل وسعاد تفشر وتغلط التفتت وما اشوف غير فيلق بدر مسوي هجوم

بناتهه 3 متزوجات جايات هن وزعاطيطهن وشافن المنظر كدامهن

اشو هذني خلن غراضهن وجهالهن بالكاع وكامن يلفن باردانهن وكل وحده من صوب

دحكت على نفسي الكثره تغلب الشجاعه حاولت اشغلهن باللسان حته افلت بروحي

بس كلامهن يسم البدن انواع الفشار والغلط ذبنه عليه حته تهمني اني مو بنيه ورافد اخوهن يستر عليه

عدهن عاده يتهمن المقابل مثل ماكالت شهد حته خلني ما اعرف شنو احجي وادافع

همزين جان الباب الثاني مفتوح بسرعه شلتهه ركضه للبيت واسمعهن يضحكن ويكولن انهزمن

واكثر كلمه جانت واضحه ك.....

فقدت من سمعتهه اني هيج فشرن عليه وبنات الشيخ ما ادري بذاك الوقت شجنت احس

شلون تصرفت هيج لحد الان ما مستوعبه الصار شلون كدرت اقدم على هيج فعل

مرات الانسان نتيجه الضغوطات والمصايب الي تتوالى علي يفقد صوابه ويكوم كل فعل يسوي خارج عن ارادته

واني مثال لهذا الانسان الي فقدت عقلي باللحظه وماجنت مفكره بعواقب هذا الفعل

ركضت للمضيف اندل خالي نعمان وين يخلي سلاحه جان معلك بالحايط جريته بسرعه وسحبت اقسام وررجعت على بيت سلمان

اني اعرف اضرب واسحب اقسام بس مامجربه من جنت زغيره اتذكر علاهن علمتنه كلنه بس اسماء عمي حسين ماقبل

بس اني تعلمت لان امي تخاف من علاهن وابوي يشجع امه على الغلط

المهم اخذت السلاح ورجعتلهن لكيتهن بعدهن متجمعات بالطرمه من شافني لازمه السلاح كامن يضحكن ومستهزءات

حجايه منا وحجايه منا وهاي براء رغم الطابوكه الي ضربتهه بيهه ما تأثرت عبالك ضربتهه بحايط

اشتدت العركه وكامن يشمرني بالطابوك والنعلان ..

لحظه شيطانيه ما اعرف شسميهه دست على السلاح سمعت بس صوت الطلقه بس بيمن وكعت ما ادري

صار الصياح واني واكفه بمكاني واشوف الدم بالكاع رفعت راسي واشوف براء واكعه واخواتهه فوك راسهه

من اثر الصدمه ما كدرت انهزم ضليت واكفه بمكاني التمت علينه الحراس واجت الحجيه ومرت نعمان يركضن

الكل متفاجئ ومصدوم كل الي يجي يشوف براء بالكاع واني لازمه السلاح  ركضوا عليهه شالوهه واخذوهه...

دخيلك ربي شسويت اني عبالك كابوس اريد اصحى منه ما اريد اضل احلم

دقايق ثواني لحظات ما اعرف شنو اسميهه بس الي اعرفه خسرت خساره جبيره 

بسبب هاي اللحظه راح ادفع ثمنهه طول عمري ياريت الطلقه رجعت عليه وخلصتني

بعدهه الناس ملتمه والحراس اخذو السلاح مني وواكفين بصفي خاف انهزم والتليفونات ادك على خالي

شفت كدامي ضرغام وعيونه ادور عليه وورا قيصر وحسام ووسام ولد عمي اربعتهم واكفين يشوفون مصيبه بنت عمهم

بهاي اللحظه استوعبت الصار وكامت دموعي تنزل واني استنجد بضرغام بعيوني الوحيد الي يفهمني

تقدموا باتجاهي وهم مامستوعبين الصار واحد من الحراس وكف بوجه قيصر وصار كدامي  مايخلي يحاجيني

لزمه قيصر من ياخته ودفعه اني واكفه وارجف اديه ورجليه ودموعي شلال

قيصر: ليش هيج شمه وين عقلج؟
شمه: الله عليك لاتخليهم يسجنوني

ضرغام: امشي بسرعه خلي ناخذهه للبيت لايجي خالهه
قيصر: اخذهه واني راح اضل هنا نشوف تاليتهه ويه سلمان..

شمه: رحت ويه ضرغام وهو ماسألني ليش سويت هيج لان حالتي ماتسمح بلاجابه

عمه فضه واسماء مصدومات اكثر بس اخذني غسللي وانطني مي واذاني على الصوت البرا

مرت نص ساعه تقريبا ما نسمع غير الصياح وصوت الطلقات عبالك هادين على رجال مو بنيه

اسمع خالي يكول دمهه مهدور الا اكتلهه واشكال الحجي واني ارجف بين ادين عمه فضه

اجه ضرغام يركض وقيصر ورا صعدوا فوك نزلوا السلاح بيدهم

عمه فضه ادك على راسهه واسماء لازمه ضرغام وعيونهم طاير شرار دفعوا اسماء وطلعوا

كعدت بالكاع ادك على راسي شسويت بنفسي شعلت نار ماتنطفي بين العائلتين دخيلك ربي ساعدني مايصير دم ياربي سامحني

بدت الاصوات تهدء شويه واني حالتي ماتسر اجوا الولد فوك حزنهم على ابوهم فوك دكتي الناقصه

كعد قيصر يحقق وياي واني احجي وابجي حجيتله كولشي وشنو الي خلاني اسوي هيج

عمه فضه تهدي بيه وكلامهه عباره عن اطمئنان

لاتبجين يا امي انتي اخذتي حق يتيمه صح السويتي غلط واكبر غلط تلزمين سلاح بس هسه منكدر نلومج لان ابوهه وامهه سامحيلهه تأذي هاليتيمه وهم ساكتين

والله من تحجيهه محد يصدك اخت تغار من اختهه لان حلوه بهذا الزمن نشوف اشكال والوان

لاتخافين وهدي حالج عندج ولد عم واخوانج هذوله لو موسلمان ميخلوا ياذيج ورافد اذا يحبج راح يضل وياج واذا تخلى عنج فهذا قدر ومكتوب ماتكدرين تغيري

ساعه اسمع لوم وساعه اسمع براء تستاهل ضرغام وكف بجانبي وخاصه بعد ما سمع بالسبب
يكول يجوز لوما كاتلتهه انتي اني اكتلهه ..

سألتهم عليهه خاف ماتت كالوا مابيهه شي طلقه شطح وجايه برجلهه العار مايموت

اجه خالي يهد عليه ويصيح ومن شهد وصلت الموت مادور على الجاني منو وكلهم سكتوا حته رافد

ضليت بهاي الليله يم بيت عمي حسين والوضع هادئ ماعرفت شلون سكت خالي سلمان وبشنو هددو لان بس طلع قيصر وضرغام سكا

ثاني يوم كعدت من الصبح قبل الكل واني مانايمه ولاشفت النوم ضليت انتظرهم بين ماكعدوا

كعدنه على الريوك بس اني وعمه فضه وضرغام البقيه نايمين..

كام ضرغام يحجيلنه شلون سكت خالي
شمه: شلون سكت خالي عن السالفه؟؟

ضرغام:سكت لان قيصر كاله اني اشيل ذنبهه وارفع دعوه عليه ومالك علاقه بشمه

كول قيصر يرمي بالسلاح وهي بالطرمه ووكعت بيهه
ومن اطلع الكاك شايل من القريه كلهه واياك اشوفك هنا لا انت ولا عائلتك...

شمه: ليش يشيل هم حلاله وبساتينه هنا فوك ما اني الي كتلت بنته فوك مايشيل شلون يحجي هيج قيصر

ضرغام: كلهه هاي القريه باسم قيصر بستان خالج وحلاله ومزرعته كلهه اشتراهه قيصر...

من صارت سالفه الولد المات وطلبوا علي فصل غالي لو ينسجن وهو شيخ وشلون ينسجن وتصير سمعه والناس بعد ماتهابه وتحترمه

هنا جان خالج مايملك ربع لان هو منطي فلوسه كلهه لواحد يشتغل ويا عود يسوي معارض سيارات وهذاك ماخذهن ومنهزم...

اجه على قيصر وكاله اشتري البستان والمزرعه ولادكول لرافد لان رافد منطي فلوس عود مشارك الرجال بس خالج انضحك علي ويخاف من ابنه

بلأول قيصر ماقبل بس ابويه الله يرحمه كاله مدام عندك فلوس اشتري وساعده هم تسهيل امر وهم يضل ورث الك ولجهالك لذلك اشترى قيصر كلشي

شمه: شتحجي انت ضرغام ورافد يدري بهذا الشي ؟؟؟

ضرغام: مو كتلج محد يدري هسه حجيتلج ورافد مايقبل على ابو وخالج متورط بدين قديم واضطر يبيع كولشي واتفق ويه قيصر احسن مايبيع للغريب من يصير عنده يرجع يشتريهن من قيصر

شمه: زين هو البستان بي حصه ورثه اخواته واخوته وبيبي نوريه شلون قنعهم؟؟

ضرغام: خالج مسوي ووكاله ومقشمرهم عود حته يشتري املاك ويبيع ويراوس بدون مايوميه يدز عليهم

انتي تدرين خالج عنده طريقه اقناع قويه وفوك كل هذا عنده واسطات هواي كدر يدبرهه ويراوسهه

هاا وهذا الحجي ماجان قيصر يعرف بي من داور الكاع كال مسويلي وكاله بعدين عرف وراح تعارك ويا لان يكول حرام حصه ورثه هاي

خالج سلمان رجال جذاب منافق ماعنده مخافه الله لذلك لاتخافين منه بس خوفج من رافد شلون راح يتقبل الصار ويشوف خطيبته كتلت اخته

كلام ضرغام مثل الصاعقه على راسي وخاصه من كال خوفج رافد

دخيلك ربي كولشي ولا رافد احبه وتعلقت بي لاتحرمني منه خلي يزعل عليه ويضربني ويرزلني ولا يتخلى عني

عمتي فضه دزت على ملابسي وكتبي كالت حته تقرين لاتضيع عليج الامتحانات

مرت على الحادثه 4 ايام ضبط وبراء زينه ومطلعيهه شهد ما اعرف شلونهه ووضعه شلونه

جنت كاعده اني واسماء وسمعنه الباب اندك راح وسام يشوف منو ؟؟

شويه واجه كال شمه هذا رافد خطيبج بالاستقبال يريد يشوفج هو كال هيج واني حسيت لحظه اعدامي ...

شلون راح اطلع واواجهه وشريد احجي ساعدني يارب

مشيت واني اتخبط بخطواتي اول مادخلت اجت عيني بعينه جان واكف عبالك مستعجل

مبين ملامحه ضايج ومهموم وعيونه عصبيه اجت عيني على ايده شفته يلم ويفتح بيهه دليل على عصبيته

تقربت يمه كتله شلونك رافد الحمدلله على السلامه
رافد: الله يسلمج ست شمه

شمه: رافد اني...... ماخلاني اكمل كلامي
رافد: ماحسيت غير الراشدي انطبع على خدي بكلل قوه ايده

شمه: حقك تضربني بس لازم تسمع مني
رافد : شمه انتي................

#يتببببببع
متابعه ممتعه حبايب❤❤ توقعاتكم للاحداث الجايه