رواية وحوش بشريه الفصل السابع وثلاثون 37 - بقلم Rozaya1122

#البارت الثامن والثلاثون
#وحوش بشريه
#روزايه

( حبايب طلب صغير ارجوا منكم متابعه هذا الحساب بي قصص حلوه لا تفشلوني احبكم..
HASSAN591

ﺑﻌﺪﻧﻲ ﺷﻤﺎ ﻋِﺜﺮ ﺑﻴﻪ ﺍﻟﺰﻣﺎﻥ ﺍﻗﻮﻩ
ﻭﺑﻌﺪﻧﻲ ﺍﺷﻤﺎ ﻋﺜﺮﺕ ﺑﻨﺎﺱ
ﺃﻛﻮﻝ ﺍﻭﺟﻮﻫﻢ ﺗﺴﻮﻩ
ﻭﻳﺠﺮﺣﻮﻧﻲ ﻭﺃﺭﺩ ﺍﺷﺘـﺎﮒ
ﻭﺍﺩﺭﻱ ﺍﻟﺼـﻮﭺ ﺑﻴﻬﻢ ﺑﺲ ﮔﻠﺖ ﻓﺪﻭﻩ
ﻳـﻔﺪﻭﻩ ﺷﻠﻮﻥ ﻋﻨﺪﻱ ﺃﻋـﺰﺍﺯ
ﻻ ﺫﻛﺮﻭ ﺣﭽﻴﻨﻪ ﻭﻻ ﺩّﻧﻮ ﺧﻄﻮﻩ...
...
شمه: الضوه بي ومايقترب انتهيت بهاي اللحظه واني اسمع صوت زلم تحجي وتقترب اكثر...

حيل ماضل عندي لا اكدر انهزم ولا اكدر اضل بمكاني تملكني الخوف الموقف بحد ذاته مرعب واني انتظر مصيري ...

صح اشجار كثيفه بس الي يفوت يشوفني وفوكاهه هذني البنات من التعذيب لا يحركن لا ايد ولا رجل حته ما اكدر انهزم بيهن ...

اردد ايات بكلبي لعلى وعسى تكون ساعه استجابه  فززني صوت اقرب للهس وهو يصيح شيما شيماء؟؟

من صوته عرفته صكر جنت مغمضه من الخوف فتحت عيني شفته هو ويا 2 ملثمين ماطالع شي منهم بس عيونهم...

صكر: عوفي البنات بمكانهن وتعالي ارجعج للبيت قبل مايحسون انتي ماكو ويدورن عليج..

شمه: البنات خطيه تعبانات خلصهن بسرعه لا تجي علاهن وتحس بيهن..

صكر: الولد ياخذونهم ويعبروهن لاتخافين عليهن ارجعي بسرعه اعتبريهن وصلن بامان...

شمه: مشيت ويا والدنيا ليل وبس صوت الحيوانات نمشي بين الاشجار حته محد يشوفنه اثناء الطريق اجه ابالي سؤال..

انت شلون عرفت عن نفسك ماخفت اني اشتغل ويه داعش واروح اخبر عنك بأن انت نقيب؟

صكر: من يوم ما اجيت هنا واني مراقبج بكل خطوه وعرفتج ضدهم وعرفتج عراقيه اصيله ..

شمه: ممممم جوابك مو مقنع بس ماعلينه المهم نقذتهن ويطلعن سلامات..

صكر: كالولي عليج ذكيه حيل وفطنه وماتخاف وهسه تأكدت بعيني صدك سباعيه تسوين ميه رجال...

شمه: منو كالك عليه ؟؟

صكر: مو مهم منو كال المهم اخذي الحذر من تنقذين مره ثانيه وهسه وصلنه روحي لايشوفج احد...

شمه: عافني وراح واني واكفه اباب البيت الخلفي بسرعه دخلت واني صافنه منو كاله اني ذكيه وماتخاف هذا منين يعرف تفاصيلي منو صكر؟؟ وشجابه على قريتنه ومتأكده منه غريب ومن الجنوب...

ركضت مددت بفراشي واني احمد ربي بداخلي ولساني يلهج بالدعاء الحمدلله كدرت انقذهن ووصلن للامان لان الجهه الثانيه بيد الجيش..

خطيه مبينات مومنا يمكن من الموصل وجايبيهن سبايا الله يلعنكم ياداعش..

هوايه امور ما وصلت للاعلام ومارسوا وحشيتهم الدواعش بكل قذاره ومحد شاف الي مرينه بي وعبالهم كلنه وياهم وهاي اني اول وحده ضدهم ...

بس مدامني عدله احاول انقذهم حتلو خسرت روحي اصلا اني مستحيل اطلع من الانبار  واني من ضمن داعش يجوز اذا لزموني الجيش يعلكوني بالدبابه ...

غمضت عيوني واني استعد ليوم جديد ومغامره جديده ويه علاهن ووحشيتهه وقذارتهه ...

نص الليل بحدود 3 فزيت على صوت الطلقات والصياح نزلت اركض لكيت علاهن كاعده واتلطم وين راحن البنات ...

اني كعدت يمهه واهدء بيهه وهي ادك على راسهه شلون راح تخسر الظاهر بيهن فلوس مافهمت شي بس سمعتهه تصيح شنكول لابو سفيان...

قبح الله وجهج ووجه ابو سفيان اوكفيلي يا علاهن اذا ما اخليج تفترين بالبستان مثل الخبله ....

كلهه طلعت ادور بالبستان وكل اثر مالكوا الهن حته صكر شفته يدور وياهن بس ماشافني لان جنت لابسه نقاب...

فدواتك ربي الحمدلله من نقذتهن وسترتني ومحد عرف بسالفتهن...

علاهن تخبلت بيومهه وحته سمعت دزوا عليهه للمقر وراحت ومن رجعت جنهه ثور هايج ...

ضلت يومين هي لاليل ليلهه ولا نهار وتصيح شلون انهزمن واني وياهه اهدي بيهه...

موزين على صحتج اذا صار بيج شي منو النه ياشيخه ..

علاهن: ولج شمه اكو خاين بنصنه ولو الزمه اشرب من دمه حشمت الزلم يعرفوليا والا اذبحه بيدي

شمه: شيخه راح تموتين نفسج اني اضيع وراج حبابه لاتسوين هيج صحتج مهمه

علاهن: اااوف اني علاهن الكل يهابني ابو سفيان يطاول عليه وخسرني فلوس هذني السبايا..

شمه: لازم ينكشفون لاتخافين هي القريه صغيره وين يروح قابل بس فدوه اني ماعندي غيرج غير اموت وراج...

علاهن: تحبيني شمه واني هيج سويت بيج؟؟

شمه: شلون ما احبج جنت طايشه وما اعرف مصلحتي بس بمرور الايام اكتشفت الي سويتي كله من مصلحتي..

تدرين بيبي اتمنى يرجع قيصر لو اخوته واكلهم اريد اضل ويه الشيخه من زوجتيني لاسعود رجال حباب اضل ممنونه الج

علاهن: مقتنعه بزواجج ولج شو جنج تخبلتي

شمه: شلون مامقتنعه المهم حباب وخايف ربه شريك قابل واني اصلا جنت مامرتاحه ويه بيت عمي ..

علاهن: اني غير جنت اخاف من قيصر جان من زمان جبتج يمي ...

ااخ لو يجي قيصر ويشوفج شلون وكفتي بجانبي حته يطك ويموت ...

شمه: يجي يون ويشوفني وهذيج الساعه محد يكدر يحجي لان عبالهم اني ما احبج بس هسه ما اتخلى عنج ابد

علاهن: عفيه بالسباعيه متأكده من قيصر يجي يدور عليج اريدج تذلي كدامي ويرجع فارغ

شمه: لاتخافين شيخه عد عيناج اني شوفي شسوي بي حته الحصخ مالتي اخذهه منه

علاهن: عفيه بشمه اني وياج وابن ابو الي يحاجيج...

جنت اطمن بعلاهن بس حته تبعد الشك عني وماتنتبه اعرف الي حجيته غلط وحجيت كلام مامعقول بحق قيصر بس اريدهه تطمئن وماتضل تراقبني .. ...

مر اسبوع كامل واني على نفس وضعي مرات اكعد بالغرفه اشبع بجي واني اتذكر حياتي شلون جانت وشلون صارت..

ومرات اتذكر قيصر وسوالفه حته ما اتهنيت بحبه ..

كطعت الاكل لان كل اكلهم حرام يجيبون اشكال والوان تحير شتاكل بس كله حرام من دم الابرياء كمت اطلع للبستان اخذ من الشجر شنو موجود ونهائيا ما اكلت وياهم...

حته الزيت الي يطبخون بي مال حرام تجي لوريات كبار ينزلون براميل مال زيت واكثره زيت الزيتون ...

عزلت اكلي وحدي وبيت ام جاسم مايكدرون يحاجوني ماخذهم الخوف من ناحيتي وخاصه علاهن بجانبي ....

بيوم منهن متت من الجوع ونفسي ما تتقبل تاكل هذا الاكل قررت اروح لبيت عمي بلكي اكدر افتح البيت واطب ...

الوحيد البيت ضل مقفول وعلاهن ماتقبل واحد يوصله ...

فتحت الباب من جوه ودخلت الطرمه متروسه تراب عبالك مهجور صار عشر اسنين حاولت افتح الباب ماكدرت لان جان مضروب قفل......

كدرت افتح الشباك مال المطبخ جنه نخلي الزيت على الشباك مديت ايدي احاول افتحه لكيت بطل زيت اخذته ورجعت...

اكو نبات يطلع وحده بلارض نسمي خباز كمت اشلع منه واكل تقريبا شهر كامل واني على هذا الاكل غدا وعشا لو سلك لو حمس ..

صرت جلد على عظم بس نفسي ابيه رفضت تاكل وتتهنى واني اشوف الكل ياكل احسن اكل لحم ودجاج بس ابد ماخليته بحلكي...

من اشوف الظلم واسمع صوت القصف يوميا كل شبر بيه يكوم ينزف واني اتخيل شبابنه وبناتنه يدافعون عن عرضهم والي ادافع عن شرفهه بيد هذوله الانجاس...

مرات اكعد واحسد الناس الي عايشه ومرتاحه اتخيل بغداد هسه شكد حلوه والبنات يداومن كليات والخطوط تسابق بيناتهم  ..

اتخيل اللمه الحلوه الي بكليه وكل مجموعه بنات يسولفن على شاب صاك ...

شكد حلوه هسه كل عائله بعائلتهه مجتمعه ويسولفون...

ياترى شهد شلونهه واسماء شلونهه تخرجت لا ورقاء عفتهه حامل ياترى شجابت ولد لو بنيه..

وسام ضرغام حسام عمه فضه شلونهم هم يتذكروني هم حاولوا يجون مره ثانيه ويطمنون عليه ...

قيصر بالغربه شلونه وهسه رجع للعراق لولا صار سنه كامله على سفره هو كال 6 اشهر واجي هم يفكر بيه ويفكر ينقذني...

صار سنه ماشايفه بيت عمي ولاسامعه اخبارهم انتهت حياتي وراح اندفن هنا ويضيع ذكري ومحد يدري بيه عدله لو ميته..

جانت هاي الافكار يوميه تزورني وشمه ماعادت شمه القديمه ..

نسيت الضحكه سنه كامله اقسم بالله ما يوم ضحكت ولا يوم فرحت اعيش ايام حقيره انتظر رحمه رب العالمين عليه...

صحتي ادهورت اكثر وزني نزل حيل حته اعظامي بينت السواد الجوه عيوني هالك حته اكل ماشبعانه ومرات انام بدون عشا ولا اكل من اكلهم ...

يوم اشوف القريه متروسه دواعش ويوم تفرغ وتصير هادئه ابو جاسم من يوم الي ضربته ماتجرأ ووصل يمي ...

بيوم منهن دزوا علينه كالوا اكو غنيمه جبيره لازم نروح نشتغل لان القائد جاي والكل يروح يخدم اني ماجنت اشتغل بسبب علاقتي القويه بعلاهن مخليتني مراقبه ع الشغل..

رحت لبيت علاهن وجان اشوف منظر يقطع الكلب يبجي الحجر شفت شباب بعمر الورود اول ماشفتهم تذكرت ولد عمي ...

معذبيهم ومأسريهم وجايبهم لسجن علاهن لان الوحيد امين وبعيد عن مراكز الجيش ومقطوعه بي كل وسائل الاتصال ...

جان عددهم 7 الي عرفته هذوله جنود ومأسريهم حبسوهم بمخزن قديم وينطوهم وجبه وحده ...

كمت اني اوديلهم بدون مايدرون لفات صغار امد ايدي من الفتحه الهوائيه وانطيهم مرات ماياخذوهن بس اخليهن بعلاكه واشمرهن حته مايشوفوني لان الهوائيه عاليه.. ...

اكثر من مره سويت هيج بس محد كشفني كله هذا من ستر رب العالمين  يجوز خلاني عايشه لهيج يوم حته اساعدهم...

كلما اتذكرهم تنزل دمعتي شباب عمرهم عشرينات والله مزينهم بالجمال وكعوا اسرى بيد الدواعش..

جنت اشوفهم رغم المهم والتعذيب بس ابد ماخضعوا حته يغلطون ويسبون ..

رحت ادور عن صكر حته يساعدني وينقذهم مالكيته ضليت يومين يوميه اروح ادور علي وماكو..

سألت واحد من الحراس كال صكر يحرس بالجهه الثانيه شرايده..

شمه: روح انطي خبر الشيخه علاهن تريده خلي يجي بسرعه..

ضليت انتظر بحدود الساعه شفته اجه لابس دشداشه بيضه ولاف غتره على راسه ركضت باتجاهه ...

صكر: شسوين هنا الوضع مدهور والجيش قريب منا..

شمه: اكو 7 جنود اريد اشردهم ساعدني..

صكر: ما اكدر اليوم بس خلي اتاكد من الحراس وموعد نومتهم يله  ..

شمه: حاول لاتتاخر ...

صكر: اكو واحد يسأل عليج واحتمال يوصل قريب وعبر اكثر من سيطره

شمه: منو الي يسأل عليه ماعندي احد

صكر: ما ادري بس اجتنه منادات واحد يسألن عن علاهن وبعد الاستفسار ذكروا اسمج

شمه: ما اعرف احد بسرعه استعجل لازم ننقذ الجنود عفته ورجعت ركض ضليت احوم داير مداير المخزن محد يطب عليهم بس اني انطيهم لفات كلساع ...

شلون محد كشفني ولزموني لحد الان فدواتك  ربي استرني بسترك ولا تفضحني...

ضليت افكر منو هذا الي يسأل عليه معقوله ولد عمي لا مستحيل هو كال عبر اكثر من سيطره وولد عمي مايكدرون يعبرون...

معقوله رافد رجع حته ينقذني الافكار موتتني راسي ليل نهار صداع من ورا التفكير والقلق...

ثاني يوم رحت ادور عن صكر جنت امشي بخطوات سريعه عثرت ووكعت على وجهي ...

التفتت اريد اشوف بيمن عثرت عيوني ماركزت بلاول عبالي عوده يابسه ضليت مركزه شويه
صرخت مفزوعه واني اشوف ايد بشر طالعه من حفره ...

من الخوف ما اعرف شسوي كمت اركض بلا شعور وين اروح ما اعرف الله جاب صكر كدامي ...

كعدت بالكاع واني اشرله بيدي والساني انعكد..

صكر: شبيج يمعوده كومي وجهج اصفر..

شمه: ميت هناك ميت هناك...

صكر: وين شنو ميت؟؟

شمه: عثرت بايد ميت والله رجعني للبيت  الله عليك اكو ميت مدفون بالبستان...

صكر: شمه كومي هاي الكاع متروسه موتى اكو سفاح هنا مامخلي واحد مادافنه..

من اجيت لهنا هاي خامس جثه الكاهه وكلهه قديمه حته اطفال كومي الفرج قريب وراح تخلصين منا بس لا اطلعين بعد  ..

شمه: بعد ما اكدر اجي اخاف بس انقذ الجنود وخلوني اموت تعبت ما اتحمل بعد حرام الي يصير والله حرام...

صكر: اني اليوم بالليل اهزمهم كومي ولا اطلعين ابد بس دليني بالمكان المظبوط وابد لاتعتبين البيت ...

شمه: شلون تنقذهم وانت وحدك وبنص البيت هم؟؟

صكر: ترى هذوله الي تشوفيهم كلهم خونه وشده فلوس تسكتهماني من يساعدوني وياخذون فلوس ورا ما اكمل اكتلهم ...

شمه: انت وحدك تشتغل هيج؟؟

صكر: لا ويايه جماعه لا اتعبين نفسج بلاسئله دليني المكان وارجعي..

شمه: دليته بالمكان ورجعت بوجهي للبيت ما اتحملت كعدت منهاره احس نفسي صرت مجنونه ...

كمت ابجي يوميه لحد ما اتعب وانام وافز ابجي احس نفسي صرت بحرب نفسيه ومثل المريضه..

كمت يوميه اشوف الدم واشوف الجثث اشكال من جبير للصغير حيل بعد ماعندي وكمت اضعف شويه شويه 

حيلي خلص وكلبي بعد مايتحمل الالم ثاني يوم من كعدت لكيت البيت فارغ طلعت لبيت علاهن هوسه والزلم مسلحه وتفتر كالوا الجنود مهربيهم...

حمدت ربي وشكرته بس سمعت علاهن تصيح جيبولي صكر حي اريد اكتله بيدي...

عرفت صكر انكشف امره ياربي دخيلك انقذه ياما ساعد ابرياء..

رحت اسئل واريد اعرف اخبار صكر..

شمه: شيخه شصاير وشبي صكر؟

علاهن: صكر خاين وهرب الجنود وصوب عمج محسن وكاتل 2 من ازلامنه

شمه: وين راح قابل

علاهن: عبر لذاك الصوب للجيش وبعد مانكدر نوصله بس اكو من يساعده وماعرفناه

شمه: صحتج شيخه حاركه دمج على شنو اشو قريتنه امان ومحد يوصلهه حته بعيده عن الجيش لاتفكرين هدي حالج..

علاهن: ااااخ لو الزم صكر شسوي بي الا اذبحه بأيدي...

شمه: اني راح اروح للبيت شويه تعبانه..

علاهن: خاف حامل يولي شو كلشي ماكو لسه..

شمه: لاماكو لسه بلكي عن قريب وافرحج...

طلعت من علاهن واني مختنكه من التمثيل تعبت اجامل واكسب بعلاهن تعبت واني امثل دور المرتاحه ...

الاشتياق قاتل اشتاقيت لقيصر حيل خاصه هاي الايام احس كلبي يتكطع من الالم علي يارب مابي شي ومرتاح حتلو بعيد عني بس المهم مرتاح...

مرت سنه واربعه اشهر ضبط صادفت سنه 2015 شهر العاشر الحال كماهو اصلا الوضع امان وعادي الناس تطلع وتمشي لان كلهه المنطقه بيد داعش وداعش هم اهل المنطقه...

بس وسائل اتصال ماكو وعبالك عايشين باخر العالم ماجابوا اسرى بعد لان دائما اهربهم لذلك اعتبروهم موكد المسؤؤليه...

طلعت اتمشى من البيت حنيت لبيت عمي عبرت النهر ومشيت بين الاشجار الخاويه وكفت يم المصطبه الي جان ضرغام يكعد يغني يمهه...

وكفت على المكان الي صعدت دراجه وسام واسماء وعبير وبان وراي ..

ابتسمت على هاي الذكريات الحلوه ياريت ترجع هاي الايام بعد ماعندي حيل احس نفسي مريضه مثل المجنونه ومرات اكعد احجي ويه نفسي ساعات وانتبه على حالتي...

وضعي بي ومايتأزم وحالتي للاسوء محتاجه طبيب وعلاج محتاجه انسان يلمني ويحتويني ...

التفتت على الشارع واني ادحك على الفراغ الشارع فارغ بعد ماجان مملي بالشباب ويلعبون طوبه ...

كملت طريقي وواني اراجع الذكريات الجميله انتابني شعور غريب حيل ونسمه هوه بارده على الرغم الجو مو بارد...

خيط شعاع الشمس اتسلل لداخل كلبي ينبهني باحساس غريب مخلوط بفرح قليل...

كملت طريقي فجأه توقفت وتوقف كولشي بيه فركت عيوني اكثر من مره اريد اصدك واريد اكعد من الحلم...

معقوله الي دا اشوفه كدامي لا شمه انتي حلمانه اصحي اصحي  ...

لا مو حلم هذا دمعتي هي الي اثبتت هذا الحقيقه نسمه الهوه البارد الي داعبتني والفرحه الي تسللت لكلبي اثبتت هذا حقيقه...

#يتبببع

( رجاءآ الي تشوف القصه بيهه جذب هوايه لا اتابعهه ترى مليت من تعليقاتتكم المابيهع معنى وانتي جذابه والقصه فلم هندي وصلت بيهم حته غلط على البطله بالخاص

هوايه امور عاشوهه اهل الانبار والموصل ليش دكولن جذب يابه تشوفين نفسج مرتاحه وعايشه بنعيم غيرج شاف الويل رجاءا ماعاجبج لاتعلقين ولا اتابعين ..
متابعيني الحلوين اشكركم على تفاعلكم)