رواية وحوش بشريه الفصل السادس وثلاثون 36 - بقلم Rozaya1122

#البارت السابع والثلاثون
#وحوش بشريه
#روزايه

( حبايبي اشكركم من كل قلبي على تفاعلكم والقصه بعدهه ماكملت وحققت اكثر من ربع مليون مشاهده وبالمرتبه الاولى....
وبالنسبه للبنات الي يكولن ليش متردين علينه حبيباتي والله احاول ارد على كل التعليقات الي على الفقرات لان نت ضعيف ومايطلعهن كلهن بس الي ع الفقرات اشوفهن)

كولوله عني خبر
مجبوره وانا وماريدهم
موبيدي اني رويحتي
خل الغريب يفيدهم
حسمو قراري من الامس
خلو دفنتي بالعرس
وتراب احس بكبري انثر جكليتهم
كولوله عني خبر 
مجبوره انا وماريدهم
تابوتي فصلوا غرفتي
ومن الجفن خيطو بدلتي
عالموت علنو زفتي
وصارت ذبحتي من ايدهم
ودوله عني خبر ماريدهم
مجبوره انا وماريدهم
....

اريد انزل اشوف منو الي يصيح باسمي بس اسعود مانعني وبس يأشر وما افتهم شي علي...

الي افتهمته منه عود لا تتأذين ويحاول يغطي راسه بأيده ويسحب بيه من يم الشباك ...

انقهرت علي مرتين شافني ويحاول يحميني والي من دمهم ولحمهم رادوا يذبحوني وهيج عذبوني...

بعدهه الهوسه مستمره والصياح  ما اتحملت نزلت اركض على الدرج اتلكتني ام جاسم وهي ادردم

ام جاسم: جبتي شرج علينه وخليتي الزلم متكاونه برا منين اجتني هالبلوه يايمه ياجاسم...

شمه: شكتلج انتي وعلاهن موكتلكم اني نار احركج بس اصبرن انتن اثنينجن نفس الطينه  ...

علاهن: اسمعي ولج اطلعين دكليله يروح منا ترى حشمت الزلم يزرفون صدره بالرصاص امشي بسرعه والله اكتله ومايرفلي جفن...

شمه: حسبي الله ونعم الوكيل بيج ياعلاهن ...

طلعت اركض وكفت متفاجئه عمامي وابو جاسم وابنه واكف واني اشوف اخر شخص افكر يجي ينقذني...

اخر شخص يجي على بالي صار سنين ماشايفته وسامعه صوته ...

رافد واكف وبيده السلاح وموجهه على محسن والشرار يطاير من عيونه ويحجي بغضب والموجودين كلهم موجهين سلاحهم على رافد خفت علي حيل لا يروح يكتلوا ...

رافد: انتي مخبله شلون تقبلين تزوجين هيج واحد وهيج عائله ماتعرفينهم شنو هذول..

شمه: اسأل علاهن وعمامي الي رادوا يخلصون مني قبل لاينفضحون..

رافد: محسن وحق الله اكتلك بمكانك بطل هاي اللعب القذره مثلك اعرف ابوي مابي خير واعرف مايعتمد علي بس مو شفتوا الساحه فرغت وبديتوا تمارسون ظلمكم...

علاهن: شمه حاجي ابن خالج يريد يروح سالم لو احفر كبره هسه ...

شمه: اعرف علاهن كلش زين وتنفذ مخططه لو بعد سنه تقربت على   رافد ما اريده يتأذى بسببي

رافد روح اني مابيه شي ولا تخاف عليه محد يكدر يأذيني انت عدو لعلاهن وتأذيك والله وما اريد اكون سبب بدمار حياتك لخاطري روح واطلع من الانبار لاتضل هنا...

اريد شغله وحده من عندك تخابر قيصر وتحجيله السالفه محد يكدر لعلاهن بس هو
لان مجرمه وماتخاف من اكبر واحد...

رافد: شمه شتحجين انتي اني رجعت علمودج صار اسبوع اني بالعراق اجيت على شغله وماجنت ناوي ادخل لانبار مدامني عدل بس وولد عمج كسروا التليفون عليه ...

كالوا روح شوفهه وطلعهه بأي طريقه اكثر من مره اجوا لهنا وترجعهم السيطرات لان جناسيهم تقره بغداد ...

واني كوه دخلت لان عسكري وهنا من وصلت لكيت المسلحين وبالف دعاء يله وصلت لهنا خاف يعرفون بيه عسكري...

تدري جازفت واجيت علمودج امشي وياي وما الج علاقه لاتخافين حتلوا انكتل بس اطلعي منا...

شمه قيصر باليوم يخابرني الف مره مايكدر يرجع الا يكمل الاقامه مالته شكد حاول يرجع وترفض السفاره...

حملني امانه اوصلج هذ الكلام وكال خلي تطلع باقرب فرصه الوضع بي ومايتأزم اكثر وكال لا تخضع لعلاهن وخلي تضل على الوعد..

شمه: من سمعت كلام قيصر اتجمعت الدموع بعيني ونزلت دمعه ضعيفه مني مسحته وحجيت بيأس..

رافد محد يكدر يخلصني منا لان هسه متزوجه اعتبر وعلى ذمه رجال صح اخرس بس بعد تورطت وشوفهم شلون واكفين ينتظرون زله منك والله يكتلوك ومايرفلهم جفن..

بس احجي لقيصر الي كلته الك ولاتخلي ولد عمي يجون الوضع خطر واخاف عليهم امانه لاتخليهم يجازفون واخسرهم...

رافد: شمه اخر فرصه كدامج اني باجر ارجع خليني اخذج منا حتلوا بالقوه ترى الطرق صعبه ومسدوده ومسلحين حته طلعتج صعبه تصير ويجوز مستحيله....

شمه: رافد علاهن مجرمه تكتلك بدم بارد ما اريد واحد يتأذى بسببي حاول توصل الكلام لقيصر وكله شمه تنتظرك ...

رافد: ديربالج على نفسج وابد لاتضعفين واخذي الحذر من هاي العائله وراح اوصي ابوي ولو ماكد المقام بس ما اكدر اضل اكثر من اليوم واجيت ويه رتل عسكري وباجر يرجع.....

شمه: راح رافد وهو جان اخر امل اي بس من شفت علاهن وشلون تهدد وتتوعد اتحمل الاذيه ولا اشوفه ميت شنو ذنبه شاب ماشاف شي ...

انتهت التمثيليه وكلمن راح لبيته واني صعدت للغرفه كعدت بالكاع بجيت بكل قوتي اخر امل عندي هذا وماكدرت اضحي بي ..

راح اضل هنا الوحوش تنهش بلحمي من كدما بجيت حسيت عيوني ورمت فوك الضيم صرت متزوجه حته مايكدرون ياخذوني جبر وانهزم ...

التفتت شفت اسعود كاعد وصافن عليه ياربي فوك ضيمي وقهري انوبه هذا براسي...

اسعود رجال فقير حيل اكله اكعد يكعد الظاهر معلمينه اليوم زواجه ولازم يبوس العروس كلساع يجي يريد يبوسني وابتعد...

حذرته بألاشاره كتله حرام الله يذبك بالنار وتجي الشرطه يذبحوك طلع من اهل الله بسرعه خاف وماتقرب بعد من يشوفني يشمر على جهه..

يله على الاقل ارتاح من هم هاي الشغله وما ورايه حقوق بعد...

كل لحظه ودقيقه يجي قيصر ابالي شراح يكول من يسمع بيه اتزوجت بس والله مجبوره محد سندني ما اتوقعت نفسي هلكد جبانه وخضعت لعلاهن...

حابسه نفسي بالغرفه لا اطلع ولا اشوف احد انام بالكاع وهو ينام على الجربايه...

ورا يومين اجت ام جاسم هاده وتصيح كومي اشتغلي جايبتج نايمه يمي حجايه منا وحجايه منا تعاركنه..

نزلت من يمي ورا شويه جابتلي علاهن صوتهه القبيح يرج الصاله...

علاهن: اسمعي ولج تصيرين خوش ابنيه لاتعرفين شسوي بيج مو شفتي سكتت من اجه ابن خالج ترى انهيج...

شمه: شتسوين ؟؟ تسوين فضل لو جبتي اسلاحج ورميتيني ماتفرق عندي ماعندي شي اخسره

علاهن: والله اكتلج بمكانج واخلي الجلاب تاكلج وتسحل بيج اسبوع...

شمه: شبيج علاهن كاعده تهددين كومي جيبي اسلاحج وتعالي مو كتلج ماتفرق عندي ..

علاهن: صلفه وعينج كويه اني اعرف شلون ادمرج..

شمه: اذا ماكفتج ايدج خلي رجلج شتريدين سوي وانتي ام جاسم اياج اتسمعيني صوتج بعد ...

ياحيف ياعلاهن راح صكارج الي جنتي من تشوفي تبلعين السانج والله مع الاسف طلعلج السان..

تدرين انتي جبانه بمعنى الكلمه لان ماتجرأتي بيوم وفكرتي تسوين هيج من جان قيصر موجود بس من اطمئنيتي  بديتي بتنفيذ مخططج..

خليهه ابالج مو اليوم باجر اذا مو اني اخذ حقي نفسه الي كسر العوده عليج وهو طفل يحفرلج كبر وكولي شمه ماكالت...

عفتهن وصعدت حته ما انطيتهه مجال تحجي بس اسمعهه تهدد وتسب وتغلط ...

عقلي مشوش والافكار تجيبني وتوديني الوضع حيل موزين جنت ماخذه موقف على ولد عمي ليش ماسألوا بس من سمعت رافد كال بالهم يمج فرحت...

صدك مره كال حسام اذا صار شي نطلع منا لان ولادتنه بغداد ودائما بالسيطرات يوكفونه ويشوفون اسمائنه بلحاسبه...

مرت اشهر حقيره ايامهه سود واني ابيت ام جاسم مامرتاحه لابو جاسم ابد ما اكل ولا اكعد وياهم اني اسوي اكل لنفسي حته بديت اضعف...

شهر السادس 2014 جانت ليله كشره
نسمع صوت مواجهه قويه وبيهه وماتزداد لحدما صار الصبح صار الرمي من كل الجهات...

المدافع والاصوات  اعلنت سقوط الانبار بيد الدواعش ظهرت الناس على حقيقتهه طلعوا الي بجانب داعش وترسوا الشوارع....

هنا خاف اكو امل انقطع اخر خيط متمسكه بي بجيت وبجيت مو بس على سقوط الانبار بجيت على حظي الاغبر الي وصلني لهنا على حالي شلون راح اعيش وحدي ومتاكده هاي العوائل راح تنظم للداعش...

القريه مابقوا بيهه هوايه رافد ونوفل طلعوا خارج العراق الي سمعته بتركيا ضل بس سلمان وسعاد حته خالي نعمان اخذ عائلته وراح لكركوك ...

تهجرت هوايه عوائل عافت بيوتهه واملاكهه وطلعت بروحهه العزيزه من ورا الارهابين الي اتستروا بالدين...

بين يوم وليله سقطت محافظه شكبرهه بيد الارهاب عيني ادور على فسخه امل واطمن نفسي بيهه ماكو ...

عيوني ماعادت تشوف النهار كل حياتي صارت ليل وظلام دامس نفسهم ولد القريه صاروا مسحلين وقطاعين طرق ...

كل الي يفوت راحوا مسلبي وقاطعين الطريق علي لو يكتلوا لو ياخذوا لمقر داعش...

كرهت حياتي واتمنيت ما انولدت خلال اشهر قليله هيج صارت حالتي ولازم اعيش وياهم واكل من اكلهم الحرام... ...

وضعي يم ام جاسم كماهو ما اختلط ولا اشوف احد واسعود اصلا يخاف مني بس اخزره يشرد من الغرفه حيل مرتاحه من ناحيته...

علاهن صارت القائده الكبرى لنسوان القريه تحت خدمه داعش وخلت النسوان يشتغلن عضاضات كل الي يلزمنهه يموتنهه بالعض لحدما يطلعن دمهه...

والي تحجي ودكول داعش الله كتبهه عليهه لازم الكل يكول الدوله الاسلاميه كمت اشوفهم يمشون بالبستان نفسهم الفلاحين والعمال ربوا لحيه وشعر وصاروا جنود داعش...

كاعده بالغرفه لا اشوف ولا اسمع بالي على بيت عمي وقيصر ياترى هم يفكرون بيه اعرف مايكدرون يدخلون الانبار كلهم ولادتهم مسجله بغداد ماعدا قيصر الانبار...

يعني الدخول صعب عليهم واعرف عمه فضه مستحيل تخليهم يجازفون ويجون لان ماكو جيش بلانبار بس المسلحين حته السنه نفسهم ماخلصوا شكد كتلوا منهم بحجه المتمردين...

ياترى قيصر شيكول كلبك من تذكرني هم تفكر ترجع وتخلصني من هذا الظلم يجوز مايلحك عليه ويلكاني خلصانه...

قررت اطلع من هذا القبر مالتي واشوف علاهن وام جاسم شيسون لازم انقذ نفسي اذا ضليت هيج معناتهه راح اضل على نفس الوضع...

بديت اطلع من الغرفه ومرات اطلع بلبستان اشوف هوايه ناس جدد واكو منهم حته مو عراقين بس ملفيهم يمنه ...

زلم ونسوان وكلهه مسلحه والوسخ كاتلهم اني من اطلع البس نقاب اسود يعني الي يشوفني يكول داعشيه...

كل نسوان القريه يطبخون ويخدمون بالارهابين ومن يرجعون اديهم ملطخه بالدم يتلكنهم بالهلاهل والهوسات...

عيوني ثكلت واني اشوف ابشع البشر كدامي اديهم ملطخه بالدم ويدعون الدين ويحجون بالحلال والحرام...

قررت اقوي علاقتي بعلاهن وارجع طبيعيه اريد اعرف شنو علاهن وشنو ماضيهه ...

كمت اروح يمهه بالبيت ما احجي شي وامثل دور المسكينه ماتحجي شي بس ماتعبر عليهه هاي السوالف...

انتبهت عليهه مخليه واحد يراقبني من اروح واجي بس اني امشي بطريقي وارجع بطريقي...

ابو جاسم انظم لداعش وكل اسبوع يله يجي محسن وحسن صاروا مسؤؤلين عن حمايه القريه بس اكيد جوه ايد الكباريه ومرات يسوون سهره ودك وركص ونهايه الليل نسمع صوت الطلقات...

بمرور الوقت خليت علاهن تأمن من ناحيتي وتطمئن ماشافت مني شي يخوف او يجذب الاتتباه لان حيل مثلت دور المسكينه حته حسيت نفسي اختنكت وعلى ساعه انفجر...

مقطوعه عن العالم الخارجي لاتليفون ولا انترنيت ولا اشوف احد ماعدا هاي الوجوه القذره....

كمت اشوف اشياء توكف العقل يجيبون بنات شابات ومراهقات يزيديات ويحبسونهن ايام تحت التعذيب وبعدين ياخذوهن ...

علاهن القائده وهي الي تدخل ساعات يمهن ونسمع بس صوت الصياح مالتهن انهار اركض للمخزن حته محد ينتبه عليه وصلت بيه اجرح نفسي بالموس بس حته اتخلص من هذا الالم وتأنيب الضمير شلون ما اكدر اساعدهن...

اكثر من مره توصل بيه اريد اكتل نفسي بس اتذكر كلام نوريه الله يرحمهه من دكول راح تنقذين هوايه ناس...

كمت ارجع للبيت ام جاسم لان كلنه نطلع نخدم ابيت علاهن هو البيت الجبير ويجون قاده تجتمع بي...

بيوم منهن تعبت من الالم والتفكير مددت وبسرعه غفيت حسيت على حركه على رجليه فد شي يمشي...

بين الصاحيه وبين النايمه حسيت بخشونه الايد الي تمشي على رجليه فزيت مرعوبه من نومتي

جان اشوف ابو جاسم الكلب بس بالشورت ولازمني من رجليه ...

دفعته حيل بس جان لازمهن تكاونت ويا بأيدي ردت اعيط بس سد حلكي ...

هجم عليه مثل الكلب يبوس وايده تتحرك شمأزيت حيل ضليت اضرب بي على ضهره بقوه تأذى

ابتعد عني ويريد يدور على شي يربطني بي اني دائما اخلي سجين جوه  راسي اخذت السجين وهو مدنك يفتح بواير التلفزيون ضربته بظهره ...

صاح بصوت اااخ ماردت انفضح وهو يشتغل وياهم  رجعت ضربته بطابوكه مال الباب على راسه رب العالمين راد يسترني بهاي اللحظه...

من صاح ااخ كعد اسعود فزز من المنظر واجه يركض على ابو لزمته من ايده واشرله بان راد يكتلني واني دافعت عن نفسي...

رب العالمين ذب الرحمه بكلب هذا المسكين عبالك يفتهم او مسير جر ابو وهو مغمي عليه وذبه برا الغرفه...

ورجع للغرفه سحبني من ايدي ويسكت بيه لان ابجي اتشكرته حيل وكمت نظفت المكان حته مايضل اثر ...

ضليت بفراشي ابجي على حالي ياربي يدعي الدين ويريد يعتدي على مرت ابنه ششوف بعد ياربي شلون ماتكلبهه بينه

ثاني يوم طلعت من الغرفه لكيت ام جاسم كاعده تنوح على رجلهه العار سألتهه شكو؟؟

ام جاسم: ابو جاسم مصوب بضهرهه

شمه: منو صوبه

ام جاسم: طافرين علينه حراميه ومتلاوي وياهم وضاربينه سجينه

شمه: لاتخافين علي العار ميموت جان ماتت علاهن

ام جاسم: كبر لهالحك الموت اخذج عينك عينك كدامي وتحجين وفوكاهه تكولين عار

شمه: قابل جذب كلكم عارات ماشفت رجال لحد الان ولاتغلطين ترى واصله لخشمي هسه اروح اخبر عليج ادعمين الجيش

ام جاسم: شبيج تخبلتي اليوم امشي من وجهي..

شمه: هااا خفتي يجيج يوم ام جاسم اهلهل على كبرج...

عفتهه وطلعت لبيت علاهن احاول بكل الطرق اخلص هذني البنات حته عددهن ما اعرفه شكد بس اسمع صوتهن ..

ضليت اراقب علاهن ومرت محسن تاخذلهن اكل شفتهن كاعدات ومربطه اديهن عددهن 3 بس شلون اخلصهن منا...

ضليت يومين ضبط افكر بطريقه اخلصهن وحته اذا شردتهن وين يرحن ...

احنه قريبين على الشط والصوب الثاني الي ورا الشط بيد الجيش وصوبنه بيد داعش...

كمت اروح للشط بحجه اودي اكل لعمامي تقريبا يومين اني اودي اكل لان هم كاعدين يراقبون خاف يصير هجوم...

حفظت الطريق زين بس نسوان وزلم هواي يفترون صايره هوسه شلون ياربي ساعدني مو لخاطري لخاطر هذني البنات....

اثناء ما اروح وارجع لاحظت شخص غريب مومن القريه هو وشكله مايوحي هو داعشي ...

شاب تقريبا بكد ضرغام اشوف عيونه تفتر وراي مع العلم اني لابسه نقاب ...

تجرأت وحجيت ويااا ما ادري ليش انتابني شعور مريح اتجاه هذا الشخص

شمه: السلام عليكم
الشخص: وعليكم السلام هلا يحرمه شرايده...

شمه: شكلك غريب ومو من قريتنه عجل منين انته

الشخص : اني من قريه بيت احمود واشتغل هنا  انتي شتعملين هنا

شمه: اني حفيده الشيخه علاهن واخذ اكل لعمي محسن

الشخص: ردي لداركم ولا اطلعين هيج حزه ترى الجيش محاوطنه وعلى ساعه يقصفونه...

شمه: عفته ورجعت بس حسيت علي مو منا ولا انباري لان كوه يحجي مثلنه وعنده كلمات من اهل الجنوب انتابني الشك اتجاهه...

قررت اضل ويا يوميه احاجي ما ادري ليش احسه هو الي  راح يساعدني فكري يم البنات الاسيرات ..

وهاي علاهن يوميه تفوت يمهن تخلي صريخهن يوصل لاخر الدنياا بهاي الفتره نسيت نفسي حته ما افكر اخلص روحي بس همي اخلص الاسيرات...

لان اني عايشه بامان واحسن اكل ناكل ومايمنه شي بس هذني المسلوبات لاحول ولاقوه..

ثاني يوم هم رحت وديت الاكل وهم تلكاني هذت الشخص كلت اليوم اسأله عن اسمه

شمه: ماكتلي شسمك يالغريب

الشخص: اسمي صكر

شمه: صكر منو يحرس العبره الي تعبر لذاك الصوب..

صكر: ليش تسألين؟؟

شمه: الشيخه علاهن دزتني اتحرى عن الموضوع

صكر: اني احرس بالليل وواحد من ازلام علاهن يحرس بالنهار..

شمه: شكرا شكرا
هستوني مشيت جان يسحبني من ايدي بكل قوته وخلا ضهري على النخله مد ايده نزع النقاب من عندي وضل مركز بوجهي ...

صكر: لاتلعبين وياي صارلج شكم يوم تريدين تعرفين شي احجي قبل ما اخلص عليج..

شمه: ابتعد عن طريقي لا اجمع القريه عليك بصوت

صكر: اسمعي ولج احجي من الاخير قبل ما افرغ المسدس براسج الكدامج الواكف نقيب بالجيش وجبت كل عمري ويه الارهابيه مو انتي تلعبين عليه...

شمه: من كال نقيب تفاجأت شيسوي هنا اكيد متنكر بنصهم حته يعرف مواقعهم...

مدامك نقيب شجابك على داعش وتبيع وطنك وكاعك ما استحيتوا

صكر: لاتخربطين بالحجي كولي شعندج

شمه: عندي 3 يزيديات اريد اهزمهن لذاك الصوب وماعرف شلون تكدر تساعدني ياحضره الضابط

من كلت هيج ابتعد عن طريقي ودار وجهه..

صكر: اليوم بالليل جيبيهن الساعه 12 لهذا المكان وماالج علاقه بالباقي وحاولي تلبسهن ملابس رجال ...

شمه: تحجي صدك شلون امن بيك ماتكتلهن وتسلمني لداعش

صكر: روحي منا مواني الي ابيع عرضي وكاعي لاتخلين واحد ينتبه عليج...

شمه: رجعت اركض وفرحانه حيل على الاقل يساعدني ما ادري ليش مافكرت خاف يكون جذاب بس المهم اخلص هذني المسكينات...

اندل وين المخزن مال الملابس لان مرات اغسلهن اخذت 3 وضليت اراقب شوكت تنام علاهن لان هن كاعدات بغرفتنه القديمه...

بيومهه كلتلهه راح ابات يمكم احس نفسي تعبانه وعلاهن حيل مطمئنه من ناحيتي ...

صارت الساعه ب11 ونص الكل ناموا القريه مالتنه حيل امنه حته حمايه ماعليهه قليلين واندل مكان تواجدهم

تقريبا شهر كامل اني اراقب واحفظ الاماكن المفتاح عند مرت عمي محسن شفتهه من اخذتلهن اكل واني بحجه اساعدهه شفتهه ضمته فوك الميزانيه مال الكهرباء...

ما ادري غباء مدري الله يريد يعثرهه من ناموا اخذت المفتاح وطبيت عليهن من التعذيب حته مايكدرن يتحركن...

انطيتهن ملابس وخليتهن بسرعه يبدلن وطلعتهن من الباب الخلفي الدنيا ظلمه حيل حته الكمر غايب ...

اسحل بيهن سحل كوه وصلت للمكان المحدد من التعب كعدن بالكاع واني اراقب وافرك بيدي من الخوف...

احس اكو من حاميني ومحاوطني بس اخاف انكشف شفت ضوه اجه من بعيد تملكني الخوف..

عزا بعيني راح الزم واروح بيهه كمت اردد وجعلنا من بين ايديهم سدا ومن خلفهم سدا..

يارب ساعدني يارب خلصني وخلص هذني المسكينات....

الضوه بي ومايقترب انتهيت بهاي اللحظه واني اسمع صوت زلم تحجي وتقترب اكثر

#يتبببع
احداث قصتنه اخذت مسار اخر من التشويق والاثاره متابعه ممتعه❤