رواية وحوش بشريه الفصل الثامن وثلاثون 38 - بقلم Rozaya1122

#البارت التاسع والثلاثون
#وحوش بشريه
#روزايه

اشكد مشتاك اضمك للكلب ساعات
واشم عطر الأمان بروحك الترفه
حتى أكعد عمر بعيونك الحلوات
ومن لمست حنانك عمر ثاني اغفه
يل حتى من اشوفك هم أرد اشتاك
ولوشوفك عمر ماتبرد اللهفه.
...

خطواته تقترب واني بوسط حلمي ما اريد اكعد ويطلع وهم واكفه وعيوني تتفحص بي معقوله هذا هو ..

نبهني صوته العذب وعطره الي استنشقته من بعيد اي هو هذا قيصر هذا حبيبي...

بدون شعور وبدون وعي ما ادري بنفسي ركضت علي مثل الطفل وشاف ابو جاي من بعيد...

شمرت نفسي بحضنه واني متمسكه بي بكل قوتي ما اريد يطلع حلم..

قيصر: شمامتي بنيتي روحي عمري...
شمه: ماكدرت اجاوب بس دموعي تجري اختنكت بالغصه ..

قيصر: اششش لاتبجين هاي اني اجيت اخذج..

شمه: ابتعدت عنه واتذكرت نفسي اني متزوجه وحرام ..

عيوني مركزه عليه ما اريد ارمش خاف جاي احلم ...

قيصر: تعالي انطب للبيت

شمه: مشيت ويا واني امسح دمعتي بعدني في حاله صدمه ومامصدكه هذا قيصر دخلنه للبيت هو عنده المفتاح اول ما دخلنه للمطبخ ...

سحبني من ايدي وحضني حيل جانت حضنته توحي شكد مشتاق حسيت اضلوعي تكسرت بيده...

بادلته نفس الحضن ودمعي ينزل على صدره رفع راسي باثنين اديه وباسني من كصتي ومن خدودي اثنينهم ومن عيوني ...

انفعلت حيل  بجيت بدون وعي هاي الغصه والكتمان مال سنه ونص كلهه طلعتهه هسه ابجي وهو يمسح بدمعتي...

حسيت كلبي انتفض من جديد وزال الغبار عنه هو بعده واكف ويتمعن بوجهي..

قيصر: هاي شصاير بيج حبيبتي خوما مريضه

شمه: قيصر الله عليك طلعني منا ما اتحمل بعد فدوه ساعدني...

قيصر: ماتتخيلين شكد عانيت يله وصلتلج عبرت الموت بسبيل اخذج منا ...

شمه: قيصر عذبوني هوايه حته اكل ما جاي اشبع ويوميه انام جوعانه ..

قيصر: اشش لاتحجين والله وداعت هاي العيون الي من وراهن عبرت قارات واجيتج اذا ما اخذ حقج واحد واحد ما اتسمه قيصر...

شمه: هسه تشوفك علاهن وتروح تخبر داعش عليك اموت وراك..

قيصر: اسم الله عليج لاتخافين علاهن احسابهه يمي..

شمه: شوف راح اروح للبيت وادبر حجه واجي يمك انت غسل وارتاح وانتظرني فدوه لاتطلع من البيت اكو اشياء ماتعرفهه شنو...

قيصر: تريديني اختل مثل المره كل عقلج امشي كدامي واريد اشوف علاهن شسوي ...

شمه: انت ماتعرف شصار قيصر اني متزوجه من كلت هيج كعدت بالكاع وبجيت بحرقه والم وكمت اكطع بشعري بدون شعور...

تقرب عليه وكعد بمستواي ولزم ايدي حته ما اضرب نفسي..

قيصر: اعرف متزوجه كالي رافد وصلتلج رساله بأيده وجاوبتيني عليهه ماعليه متزوجه والا لا المهم اخلصج من هذا الضيم

شمه: وشلون لازم اطلك يله

قيصر: طبعا تتطلكين واريد اشوف يا كو... يوكف بوجهي...

شمه: خلي اروح هسه ما اتحمل بعد لاتجي علاهن فدوه اروحلك لاتشوفهه اليوم...

قيصر: يله روحي وانتظرج تعالي...

شمه: ماحجيت شي بسرعه سحبت ايدي منه وطلعت رغم الفرحه بشوفته بس خايفه من علاهن خاف توصل رساله لابو سفيان ويجون على قيصر ياخذوا..

رجعت للبيت لكيت اسعود كاعد وصافن اجيت يمه حجيت ويا بلاشاره وهو يجاوبني نفس الشي...

شمه: شبيك صافن بيمن تفكر
اسعود: افكر بيج

شمه: ضحكت على جوابه يحضي شتفكر..

اسعود: انتي خطيه متعذبه لازم اطلعين منا...

شمه: اذا اطلب منك الطلاك اطلكني..

اسعود: اي اطلكج وادعيلج بالسعاده انتي حبابه وتخافين الله عكس علاهن المجرمه ..

شمه: الله يحفظك ومايشوفك مكروه انت خوش اسعود

ضحك من كتله هيج كمت من يمه رحت لعلاهن اريد اشوف الوضع وسمعت بجيه قيصر ..

اول ماطبيت تلكتني وجهه اصفر لزمتني من ايدي حته اني خفت..

شمه: شكو شصاير

علاهن: ولج يشمه قيصر راح يجي هذا مايتفاهم يكتلني بلحظتهه

شمه: واذا اجه ليش تخافين مو بظهرج ابو سفيان وحمايته..

علاهن: هو نفسه ابو سفيان يخاف من قيصر ولج انتي ماتعرفين قيصر شيسوي بلمحه عين يدفن ابو سفيان ورجاله

شمه: ليش قيصر شنو فاندام ترى انتي مكبره السالفه

علاهن: كومي منا يغمه حقج ما شايفته شسوه بينه قبل 15 سنه دنكت على رجله وحبيتهه يله عافني...

شمه: انتي خضعتي لقيصر معقوله...

علاهن: امشي من وجهي هسه اجمع عمامج وانشوفلنه حل قبل مايبطش بينه...

شمه: جمعت عمامي كلهم صدك الخوف حلو محسن وجهه ينطي الوان ويكلهه يمه شنسوي اذا اجه ..

مدري اضحك مدري ابجي على حضي بس اريد اعرف السر الي خلاهم يخافون منه ...

ضليت يمهم حته شويه واروح لقيصر وعيالي عبالهم يم علاهن...

بعدهم كاعدين يتشاورون وعلامات الخوف واضحه عليهم ...

اجت مرت محسن تركض وتصيح عمه عمه الشيخه قيصر شفته بعيني طلع من بيتهم...

كلهه كامت وكفت اني تفاجأت عود وصيته لايطلع...

بعدنه واكفين على هبه الاستعداد جان يطب بكل ثقه واريحيه لابس تراك اسود ومبين سابح اول ماشافته علاهن فزت مرعوبه..

قيصر: شلونج علاهن اشتاكيتلج هواي وانتو نسوان علاهن شلونكم( جان يقصد عمامي)

علاهن: شجابك قيصر وشلون عبرت السيطرات مال ابو سفيان

قيصر: منو ابو سفيان بسلا قصدج سالم الفلاح

علاهن: اسمع ولك كلمتين ما عندي غيرهن اطلع منا لا اخلي دمك بطوله

قيصر: هههههه يابه جنج حاميه محسن ماتجيب مي بارد لامك موزين عليهه واخاف يرتفع ضغطهه

محسن: شتريد جاي موخلصنه منك..

قيصر: مارايد شي بس اريد اخذ شمه واروح
علاهن: اي اخذهه بس طلكهه من رجلهه وخلي تلزم عده مضبوطه لاتطلع حامل...

قيصر: سدي حلكج لا اسده الج بطلقه وحده ماجاي اتحاسب وياج ولا اريد اسمع مبررات وكلام فارغ..

دزيلي على سالم كليله قيصر يكول خلي يجي قبل ما اروح اهدم غرفته على راسه

وانتي شمه امشي تعالي يمي ..

شمه: رحت وكفت بصفه شفته مد ايده على خصره سحب المسدس لزمته من تشيرته ...

اول ما وجه المسدس على محسن وحسن هذوله اثنينهم رجفوا وكاموا يتوسلون مروتك سامحنه اتوبه من داعش ما نشتغل وياهم بعد

قيصر: راح اخذ شمه واعوفكم بحالكم بس اياكم تخطون خطوه وحده خارج البيت منا لمن اطلع من الانبار..

وهسه تروح لبيت ام جاسم تصيحهم كدامي حته يطلكون شمه ..

علاهن: عد عيناك يدكتور اركض يمه محسن صيحهم وجيب اسعود خلي يطلكهه ...

شمه: واكفه بصف قيصر حجيت على كيفي قيصر شجاي اتسوي انت ؟؟

قيصر: اريد اطلكج منا واعقد عليج هسه عندج مانع .

شمه: شلون مو مايصير لازم الزم عده من كلت هيج خزرني بنظره غضب والتفت عليه

قيصر: شنو عده زواج حقيقي متقربلج؟؟

شمه: لا لا ليروح بالك بعيد بس غير الزم عده..

قيصر: لا ما الج عده هسه انتي مثل المخطوبه وفسخت خطبتهه ماكو فرق

شمه: قيصر اني خايفه ؟؟

قيصر: من شنو خايفه اهدي حبيبتي باجر من الصبح نطلع لبغداد لاتخافين...

شمه: شويه واجه محسن جايب ابو جاسم وام جاسم واسعود ومدري منين جايب شيخ كلشي صار بسرعه ...

الظاهر محسن مفهمهم السالفه بسرعه اطلكت من اسعود وكلمن  راح لحال سبيله ...

رجعت ويه قيصر للبيت بس الخوف متملكني ما اعرف ليش اخاف من علاهن ...

قيصر: تعالي شمه اكعدي احجيلي كلشي صار وبالتفصيل..

شمه: كعدت على التخم وهو كبالي وبديت احجيله من يوم السافر بي لحد ماشفته ..

كل حدث مؤلم  ابجي علي بقوه عافني ابجي وافرغ الي بكلبي كله حته عيوني غوشت وكمت اشهك..

سحبني بحضنه وخله راسي على صدره كام يلعب بشعري وهو يحجيلي عن وضعهم...

قيصر: بيوم الي دكيتي وكلتي الحكلي وانقطع الخط دكيت عليج شكد وماحصلتج خابرت على حسام كال الطرق مسدوه ومانكدر نفوت للانبار...

تخبلت بيومهه لان اعرف علاهن شنو وعلى شنو  مخططه خابرت على سلمان سألته عليج كال زينه وهسه شفتهه مابيهه شي بس اعرفه جذاب رجعت خابرت على رافد ادري بي جاي للعراق وطلبت منه يطلعج بكل الطرق من الانبار ...

من رجع رافد وحجالي وضعج والي صار ماضل عندي عقل تدرين اني ايام ابات بالسفاره بس اريد احصل موافقه حته اجي لو اسبوع واحد ...

تعاركت ويه حسام شلون يعوفج حته ويه امي زعلت شلون امنتج يمهم وعافوج وحدج

شمه تأذيت حيل سنه كامله ماشفت طعم النوم شنو كلما انام افز مرعوب وافكر شصار بيج وخاصه من سمعت علاهن منظمه لداعش...

تمنيت قريب واجي ادفن علاهن بمكانهه شلون تجرأت تلمس شي ملكي واني محذرهه

شمه: قيصر عمه فضه شلونهه واسماء حيل اشتاقيتلهم

قيصر: امي من يوم ماسمعت بيج شكل عدهه سكر وضغط ودائما تخابرني تبجي دكول ما اسامح نفسي ...

واسماء اتزوجت زيد ابن خالي

شمه: اسماء اتزوجت بسرعه بجيت قيصر اتزوجت واني ماشفتهه ..

قيصر: لاتبجين اصلا ماسوت عرس من الصالون لتركيا حته حفله ماقبلت تسوي كالت شلون شمه ما ادري شنو مصيرهه وافرح...

وحسام صارت عنده بنيه وامي اصرت اله اتسميهه باسمج وهسه اسمهه شمه ووكيحه مثلج ..

شمه: ههه اني هسه حبابه وشهد وضرغام شلونهم

قيصر: هذوله مكتوبلهم القهر شهد حامل شهرين ومات الطفل وبعد ماراجعوا طلعت عدهه جرثومه وتكتل الطفل وهسه على حالهم ..

ووسام نجح من السادس وراح تربيه رياضه وبعدين حول راح كليه اعلام يكول اريد اصير مراسل...

شمه: شكد مشتاقه احضن عمه فضه

قيصر: واني ما مشتاقه تحضنيني ؟؟

شمه: استحيت من كال هيج دنكت وضليت العب باضافيري.

قيصر: تعالي نامي بحضني حته نكعد من وقت نطلع منا .

شمه: جان يحاول يخليني انام وعبالك عنده مهمه وراي ..

اني هم ماصدكت تعبانه حيل خليت راسي على رجله ونمت بس هو ضل كاعد يلعب بشعري...

غطيت بنوم عميق واول مره هيج انام مرتاحه فزيت على صوت طلقات متفرقه ...

دحكت ماكو قيصر افتريت بالبيت ماكو صحت قيصر قيصر ماكو جواب الاضويه مفتوحه بس ماموجود..

كعدت على التخم ولميت رجليه وين راح وعافني وحدي وشنو هاي الطلقات ياربي سترك خاف صار بي شي...

بحدود الربع ساعه سمعت الباب انفتح كمت اتلكيته اول ماشفته شهكت وضربت على صدري

شنو هاي قيصر؟؟

قيصر: فوتي للغرفه خلي اسبح واجي..

شمه: قيصر شنو هذا الدم بيك شي

قيصر: شمه كتلج فوتي للغرفه بس اسبح واجي لا اتلحين..

شمه: خفت من شفته هيج قميصه ملطخ دم والمسدس بحزامه كعدت انتظره شوكت يكمل..

طلع من الحمام يفرك بشعره بالخاوله ركضت علي لزمته واحجي..

قيصر شنو هاي احجيلي وين رحت ودم منو هذا؟؟

قيصر: كتلت علاهن ومحسن وحسن ماخذ عائلته ومنهزم..

شمه: شنوووو ؟؟؟
قيصر: تعالي نامي تعبتي اليوم

شمه: تحجي ابرود انت شلون كتلتهه انت قيصر الدكتور لطخت ايدك بالدم

قيصر: حلال كتلهه هاي مجرمه وياما اذت ابرياء اصلا اذا ما اكتلهه اني يكتلهه الجيش قريبين علينه ومن الصبح هم هنا..

شمه: قيصر ما اصدك الي سويته

قيصر: لاصدكي صح اني انسان مسالم بس ما اقبل بالظلم حذرت اكثر من مره والي يمس شي خاص بيه الله كتبهه علي وانتي ملكي

شمه: ما اعرف شجاني بسرعه بجيت بحرقه مع العلم المفروض افرح بس ما ادري ليش هيج احساس اجاني...

حضني قيصر يهدي بيه ويطمن باجر نطلع ونخلص ونبدي حياة جديده..

انطاني حبابه مهدء اخذتهه ونمت ماحسيت على شي لحدما فزيت على صوت قيصر يكعد بيه ..

قيصر: كومي شمه خلي نطلع الجيش على الشارع وراح يقصفون القريه ...

شمه: خلي ابدل اوكف ..

بسرعه لبست عبايه اسلاميه وكلشي ما اخذت حته ما التفتت طلعنه اني وقيصر مشي لشارع والساعه ب5 الفجر...

امشي واتعثر وايدي بايد قيصر كلساع اعثر ويكومني لان طابوك والطريق وعر ...

وصلنه للشارع مشينه مسافه ابتعدنه عن القريه هوايه تعبت من المشي وصلنه لرتل عسكري وبي جنود هواي وحته اكو عوائل تريد تطلع...

شفت قيصر يحجي ويه واحد مألوف عليه انتبهت شويه هذا صكر لابس زي عسكري والنجمات على اكتافه ...

صعدنه بلوري عسكري مضروب جادر بي عوائل زلم ونسوان كعدت بصف قيصر واتحرك الرتل ابطئ غمضت عيوني واني اردد الحمدلله والشكر خلصت من هذا الظيم....

همس يم اذني بهدوء..

قيصر: جوعانه ؟؟

شمه: لا بس نعسانه ..

قيصر: خلي راسج على كتفي ونامي ..

شمه: شنو مصير القريه؟؟

قيصر: راح يداهمهه الجيش وبعدين يقصفوهه انسي القريه كابوس وكعدتي منه...

شمه: نمت على كتف قيصر وكل ما اطس السياره احس بلمسه ايده على كتفي ما اعرف شكد مر الوقت بس الله ذب عليه النوم ...

اكلت لفه ورجعت نمت شكد سيطرات واجهتنه وانطول ساعات واكفين لحدما صارت الساعه ب5 العصر يله دخلنه بغداد...

كعدني قيصر كال اكعدي وصلنه بغداد ما اعرف شلون ومنين طبينه المهم اني هسه بامان...

نزلنه من الرتل يم السيطره وقيصر طلع الموبايل يخابر باهلهه كال حسام جاي بالطريق...

اسنشقت هواء عذب الله يابغداد واخير هذا الهوه الصافي يملى صدري بعيد عن هوا القريه الممزوج برائحه دم الابرياء...

ادحك على الناس كلمن ملتهي بروحه الي متسوك والي رايح للدوام انتبهت على قيصر جنت من الصدمه حته مادحكت علي هوايه ...

متغير هوايه شعره ابيض حته لحيته بيهه شكم شعره بيضه خلال سنه وحده شعره ابيض من سافر من العراق بعز شبابه ..

شويه واجانه حسام اول ماشافني لو واكع بايده جان حضني سلم عليه سلام حار حته شفته مسح عيونه الظاهر منع دمعته قبل لاتنزل...

صعدنه بالسياره واني ساكته ماحجيت ابد احس جنت شايلته بحيلي بس هسه كل حيل ماعندي ...

احس نفسب تعبانه وداخلي مريض بس متمسكه وما اريد اضعف ادحك من الجامه وفرحانه بشوفه بغداد وعيني تتفحص البيوت شكد راقيه وعاليه شكد اكو مولات واسواق ومحلات وين جنت مقبوره الله لايرضى عنج ياعلاهن...

وصلنه للبيت احس نفسي دايخه كوه متماسكه حته قيصر حس عليه لزم ايدي قبل لا اوكع طبينه للبيت اتلكتني عمه فضه اوا ماشافتني هلهلت واني اشوف الدموع بعيونهه...

حضنتني بكل قوتهه وتبجي واني ابجي اتجمعوا عليه ورقاء وشهد واسماء كل وحده احضنهه دقايق والدموع هي سيد الموقف...

سلمت عليهم واحد واحد ضرغام ووسام شكد متغيرين عبالك صار قرن ماشايفتهم ...

كعدنه بالصاله واني ادحك عليهم اخاف يطلع حلم خاف بعد ما اشوفهم عمه فضه لازمه ايدي وهي تتفحص بيه حسيت بحنانهه ...

الكل يسألني ليش هيج ضعيفه شنو ماتاكلين صدك جنت اخوف حواجبي راح يطخن بعيوني عبالك حبل وضعيفه حيل والجوه عيوني اسود مثل مجاعه افريقيا....

بعدنه كاعدين جان يدك تليفون ضرغام من دحك بالموبايل عقج جواجبه وجاوب..

ضرغام: هارافد شلونك
سكت شويه وهو يستمع اله جان يفز ضرغام وهو يكول شنوووووو؟؟

#يتبببع

اعذروني حبايب الاشتراك خلصان ومايقبلون يجددون وهاي نشرت على بيانات الهاتف
شكرا الكم على سوائلكم والله فرحت بيكم وبتعليقاتكم
احبكم ❤