رواية وحوش بشريه الفصل التاسع وثلاثون 39 - بقلم Rozaya1122

#البارت الأربعون
#وحوش بشريه
#روزايه

يجي يوم ..
 الســچچ تـتــلاگى ونغـــني
يجي يوم ..
الگمر خدران چي ضلك شبگ ضلي
يجي يوم ..
ونفز عشاگ وچفوفك تلم چفي
يجي يوم ..
وغصب ع الفات اناديلك هلة بخلي..
...

شمه: سد التليفون ضرغام ووجهه نظراته على شهد نظرات حزينه

فضه: خير يمه شكو ورافد شبي ليش خابر؟؟

ضرغام: الجيش قاصف القريه ومخليهه رماد لا بيت ولابستان باقي وخابرني يريد يخبرنه ..

فضه: اني امك ياقيصر الحمدلله من طلعت شمه سلامات فدواتك ربي جان شحجينه لو البنيه هناك..

ضرغام: علاهن وعمامي كلهم ميتين ولاكين علاهن مقتوله قبل مايقصفوهه..

شهد: ضرغام ماكالك شي عن ابوي..

ضرغام: البقيه بحياتج ابوج وسعاد ميتين...

شمه: دحكنه على شهد ماعدهه اي رده فعل بس تفرك بايدهه ومدنكه ضرغام خله ايده على ضهرهه وهي حته دمعه ماوكعت منهه

قيصر: هسه ماعلينه كومي اسماء اخذي شمه ترتاح ويمه تعالي اريد احجي وياج

فضه: قيصر يمه شو ما اهتميت بالخبر

قيصر: شتريدين انصب جادر واسوي فاتحه لعلاهن ومحسن لجهنم وبئس المصير

فضه: لا لا يقيصر لاتحجي هيج ماعلمكم ابوكم الشماته وتضل ام ابوك..

قيصر: يمه لو شايفه الي سوته علاهن تكومين وتكعدين تسبيهه تجازى هي وربهه بس ابيش راخ تقابله وشراح دكول

ليش كتلت هاي الابرياء ودفنتهم بدم بارد وفوكاهه ماكفاهه الظلم مالتهه انظمت لداعش

شحجيلج يمه والله من حجالي صكر دنكت راسي من يكول جديتك كتله لادكول هيج ما انتمي الهه ولا اعرفهه

تدرين هي وام مناهي يجيبن بنات سبايا ويبعهن على الدواعش ويجاهدون بيهه شكم بنيه راح شرفهه من ورا هالعجوز..

فضه: دخيلك ربي ولك شتحجي معقوله هيج وصلت بيهه ..

قيصر: كومي اسماء اخذي شمه متشوفيهه كامت تغفي

اسماء: صار ادلل عيوني..

شمه: رحت ويه اسماء وكلساع تحضني وتبوسني بطنهه شكبراتهه حامل ومتغيره حيل سمنانه وصايره احلى مابيه حيل احجي واسأل بس اريد اسبح وارتاح..

اسماء: هاي ملابس حضرتلج كومي اسبحي..

شمه: شكرا اسماء بس فدوه وراهه اريد انام احس نفسي مسطوره..

اسماء: اي نامي ماعدنه شي اني بليل يجي زيد عليه لان ماعنده خفاره اليوم..

شمه: من اصير زينه عود سولفيلي شلون تزوجتي

اسماء: اي اسولفلج بس اريد السانج نفسه شو كصران..

شمه: الي شفته والي عشته زين مخليني واكفه كدامج لحد الان..

اسماء: الله يساعدج بس يله عيني طلع اخوي الدكتور ولهان بحضرتج سنه ونص وهو يوميه يخابر ويتعارك ويه الولد شلون ماتكدرون اطلعوهه..

شمه: اي هو الشي الوحيد حلو بحياتي

اسماء: يله حبيبه راح اروح يم شهد خطيه الخبر موهين وانتي اسبحي وارتاحي..

شمه: رحت للحمام صار شكد ماسابحه سبحه بيهه خير نفضت غبار الايام الخاويه والماسأة لفيت شعري بالخاولي وطلعت للغرفه ...

هي نفسهه غرفه اسماء من متزوجه ضاله على نفس وضعيتهه جريت الكرسي وكعدت كدام الميز ادحك على ملامحي شكد تعبانه يجوز يراد عشر سنوات يله ارجع طبيعيه...

اعظام ركبتي مبينه وعبالك طالعه من مجاعه لازمه المشط بأيدي وادحك على نفسي شلون طلعت من الموت بأعجوبه...

الدم والجثث وصوت التعذيب يرن باذاني اريد انسى ما اكدر شلون راح اوكف على رجليه وارجع طبيعيه...

انفتح الباب التفتت عبالي اسماء بس انرسمت ابتسامه خفيفه على وجهي ..

قيصر : نعيما ياحلو..

شمه: الله ينعم عليك  ...تقرب عليه اني كمت من مكاني ووكفت كدامه

مد ايده يتلمس وجهي حرك اصابعه على حواجبي وخدودي غمضت عيني بهدوء ..

اصابعه صارت اكثر جرأه وهي تتلمس بشفايفي والصمت يسود المكان...

قيصر: شمامتي ما اريد اسوي شي بالحرام اعرف نفسيتج تعبانه ويرادلج وقت يله ترجعين طبيعيه..

باجر الصبح اريد اجيب الشيخ يعقدلنه حته ما اضل اتعذب من اشوفج..

شمه: قيصر كلت لعمه فضه ع هيج خبر ..

قيصر: شعليهه عمه فضه وين تلكه مثلج جنه

شمه: بكيفك لعد..

قيصر: يله مشطي شعرج ونامي اني هم تعبان راح انام والصبح ان شاء الله اجيب شيخ ونعقد..

شمه: ان شاء الله باسني من راسي وراح ..

شكد جنت اتمنى واحلم بهاي اللحظه عجل هسه ليش مو حيل فرحت معقوله الحزن البداخلي اقوى لفيت نفسي باللحاف ونمت حته ما ادري ابيش الساعه

لحد الصبح فزيت على صوت شهد تكعدني

شهد: شمه شمه اكعدي قيصر يريدج

شمه: صباح الخير

شهد: صباح النور اكعدي اتريكي وبدلي قيصر يريدج..

شمه: شلونج انتي البارحه ماكدرت اجيج تعبانه

ش هد: يضل ابوي وموبيدي ما ابجي علي بس الله يخلي ضرغام الوحيد الي يكدر يهديني ..

كومي شمه عندي سوالف مال سنه ونص ضبط رجعي طبيعيه اريد اسولفلج لان تعبت حيل ضامته بكلبي

شمه: خير ان شاء الله

شهد: ان شاء الله خير راح انزل كدامج وانتي اتحضري ترى قيصر مستعجل..

شمه: غسلت وبدلت محضراتلي كلابيه خليجيه نزلت بعدني امشي على الدرج ..

وعمه فضه تهوس عبالك اليوم عرس صدك..

فضه: شمه ردت لعيالهه وطير السعد يبرالهه

شمه: صباح الخير كوه حجيت لان استحيت من نظرات قيصر

فضه: هلا ياريت كل صباح مثل هذا وشوفه هذا الوجه تعالي خلي احضنج ماشبعت منج يبعد كلبي...

شمه: اروحلج فدوه مارحتلي عن بالي ابد كل شغله اسويهه اتذكرج

فضه: يابنيتي والله اتمرضت وراج ويوميه اكعد نص الليل ادعي الله يحفظج ..

شمه: بفضل دعائج هاي اني رجعت سالمه..

قيصر: شمه اتريكي بسرعه هسه الشيخ يوصل وبعدين احضني عمتج

فضه: هادكتور كمت تغار من هسه ولك تغار من امك

قيصر: لا يمه شغار بس مو هسه يجي وهي بعدهه

فضه: كومي اتريكي ترى وليدي واعرفه العيون كامت تجدح عيني لا تعصب علينه اخذهه واشبع حضن بيهه

قيصر: يمه شنو هالحجي

شمه: عفتهم وكمت وضلت عمه اداهر بي تريكت على السريع بعدني اعزل بالمواعين انفتح الباب ...

اجه قيصر كالي فوتي ومن اصيحج تعالي انتي وامي..

دخلت جوه يم عمه متحضره وكاعده اريد اسأل ليش محد يدري بالخطوبه بس سكتت ...

شويه واجه قيصر صاحني رحت يم الشيخ بسرعه عقدلنه وراح هلهلت عمه وباستني...

شهد ووقار باركلي والكل فرحان الا اني مدري شجاني احس نفسي موطبيعيه وداخلي مريض حته ما اضحك..

طلعوا الولد بسرعه كلمن لشغله وضلينه بس اني وعمه والبنات مثل الخطار كاعده وساكته حته استحي اناقش واحجي ملتزمه الصمت...

صاحتني شهد اجي يمهه بغرفتهه يله على الاقل اطلعني من هاي القوقعه العايشه بيهه...

تفاجأت بغرفتهه راقيه حييل اكثر من ماتصورت هوايه اسئله ادور ابالي كعدنه بالكاع وكل وحده خلت مخده بحضنهه وبدينه نسولف...

شهد : شمه شلون عشتي كل هاي المده شلون اتحملتي..

شمه: ااخ ياشهد مرت ايام وليالي واني بدون اكل يوميه انام واخلي السجينه جوه راسي اخاف يهجمون عليه...

اضطريت اجامل علاهن وامثل دور المسكينه والمحبه والمطيعه الهه ...

لو احجي ايام ما يخلص العشته عوفيني مني احجيلي عنج اشبيج ؟؟

شهد: شحجيلج شمه اني عايشه بماضي اليم ما اكدر انسى ولا اتخطى...

شمه:ليش شهد اتزوجتي خيرة الرجال بعد شكو لازم تنسين وتكملين حياتج

شهد: شمه يولي اني ما استاهل ضرغام ولا حبه ولا اهتمامه ...

شمه: ليش يولي؟؟؟

شهد: ابد مامقصر ويايه بكد الشعره بس اني مقصره تدرين شمه ما اخلي يتقربلي بشهر مره وكوه...

تطلع روحه يله اقبل ومن يتقربلي عبالك جثه هامده اي تبادل ماكو شكد رومانسي وياي شكد يحاول ساعات بس يريدني اندمج ويا وماكو..

بس يتقرب ارجع اتخيل الوضع الي صرت بي وهذولاك الانجاس الي سوو بيه ما اكدر انسى..

شمه تعبت شنو ذنبه هالرجال مو من حقه يعيش ويتونس حاله حال الشباب الي بعمره ..

مومن حقه مرته تعيشه ليالي من العمر بس ضرغام مكتوب علي القهر ...

شمه: اكعدي واحجي ويا بهدوء وفهمي حتلوا يعرضج على طبيب نفسي مابيهه شي...

شهد: كعدت وحجيت ويا متفهم وضعي حته مايضغط عليه بس اني انقهر علي يولي شاب ما اتمهل بزواجه شكد يتمنى البس واتمكيج واني حجاره ليل نهار هاي حالتي..

شمه: والله ما اعرف شحجي حته دماغي حاليا واكف الله يعينج..

شهد: زودتج همج فوك ما انتي مهمومه

شمه: احجيلي هذا البيت المن وشجابكم هنا..

شهد: من رجعنه من العمره الوضع موزين وماخلونه ندخل الانبار انريد ناخذج عود اجينه هنا يم بيت خالهم ابو عبير ضليينه شهر كامل يمهم...

وبعدين قيصر دزلنه فلوس واشترينه بيت وكعدنه ومن شغل الولد وراوتبهم رمموا البيت واشتروا اثاث..

شمه: البيوت ببغداد غاليه منين جاب قيصر هلكد فلوس...

شهد: والله اني هم تفاجأت بس ضرغام كال قيصر بايع كل الاملاك الي بلانبار ومحولهه رصيد بالبنك مخلي بس البيت والحديقه الي كاعدين بيهن ...

جان حاسب احساب هيج يوم وخاصه وضع الانبار مدهور..

شمه: دائما قيصر يفكر للبعيد ضلينه انسولف شويه ارتاحيت ...

بديت ارجع طبيعيه او بلأحرى احاول ارجع طبيعيه بس وجودهم وحنيتهم عليه خلتني اتمسك واحارب حته ارجع شمه القديمه...

جنت كاعده بالغرفه والتفلزيون مفتوح بس ما ادحك علي ما انتبهت ولاحسيت على الباب من انفتح ...

بس نبهني من صفنتي صوت قيصر وهو يكعد بصفي ويصيح باسمي

قيصر: شعنده الحلو صافن..

شمه: قيصر ماحسيت عليك من اجيت ..

قيصر: اي صافنه واني اضوج من هاي الصفنه معناتهه انتي بعدج بالقريه ...

شمه: قيصر ما جاي اكدر ارجع طبيعيه احس داخلي متحطم..

قيصر: حبيبة كلبي الانسان مبتلى ما اكول سهله بس لازم ننسى ونكمل حياتنه شنو راح تستفادي اذا ضليتي هيج

اني راح اكلج شيصير راح تتمرضين واحتمال تصير بيج حاله نفسيه وغير الامراض الي ادكوم تتحجج...

شمه: احس نفسي مريضه بالداخل كوابيس اتراودني وماتعوفني بحالي اريد اتخلص من هاي الكوابيس..

اني احجي وهو يدحك بعيوني تقرب عليه بهدوء واخذني بحضنه خليت ايدي على صدره وراسي مدفون بركبته...

جان يهمس باذني كلام حلو وغزل يحاول يطلعني من هاي الحاله الي وصلتلهه..

بحركه مفاجئه سحب راسي بين اديه وطبع بوسه سريعه على شفايفي..

فزيت من حركته ماتوقعتهه منه لان تعودت علي بس يحضني بس هالمره غير...

حسيت بلمسته صارت اقوى واخذ شفايفي بين شفايفه بكل حب ولهفه ...

جان لازم راسي بين ايد وحده والثانيه لافهه على ركبتي ...

انتهيت واني بين اديه كلما ابتعد واسحي نفسي من عنده يقوي بوسته ويسحبني علي...

ما ادري شلون ماحسيت على نفسي الا وهو متمدد واني فوكا وعلى نفس الوضع وهو يبوس بكل لهفه...

كل شويه يبتعد لحظات حته التقط انفاسي ويرجع يعيد من جديد..

لمسه ايده صارت اكثر جراه وهي ترفع بثوبي الي لابسته حسيت بحراره ايده وهي تتجول على رجلي وتصعد ...

بين لحظات الحب وذايبه بحضنه انفتح الباب بسرعه هنا ماعرفت شسوي يافشلتي حته ما اكدر ارف عيني...

اول مارفعت راسي والصدمه جانت...

#يتبببع

ادري البارت قصير اعذروني واهس ماكو بيني وبينكم انقهر من المشاهد الرومانسيه