رواية وحوش بشريه الفصل الثامن والعشرون 28 - بقلم Rozaya1122

#البارت التاسع والعشرون
#وحوش بشريه
#روزايه

حيل اتعذبت بس انتَ مــا حسيت
لان بنار گلبي وگلبك البـــارد
جنت بس انتَ أشوفك ما شفت ناس
وصافن بس أفكر والذهن شــارد
وإنتَ تعيش صــافي وهادئ البال
... ... وتشلع باب گلبي بصمتك الجـاحد
آه شكد صعب مـن تعشك انسان
وتحسه ابمحبتك يجهلك قــاصد
آه شكـــد غشيم وهيج حبيت
وادري هواي گلبك للعشك جـارد
آه من الـــدمع شككلي الاخدود
آه مــــن الألم وي همي متواعد
.....

‏⁧
‏⁧
شمه: رحت امشي ورا قيصر وهو دخل للاستقبال قبلي ....

رجليه تربطت من سمعت صوته ومبين عصبي حته ما انطه مجال لامه تسأله...

بس دخلت للاستقبال سد الباب وسحبني من ايدي باتجاهه بس بقوه

جسمي صار ملاصق لجسمه عيونه مخنزره ولزمته وراهه كارثه ..

كولشي بهاي اللحظه يدل على انو اكو مصيبه على راس شمه ...

عيونه مخنزره ونظرته حاده حيل حسيت ايدي  راح تنخلع وهي بأيده....

قيصر: شنو بينج وبين رافد قبل الخطوبه واياج تكذبين بحرف....

شمه: ارتبكت حيل رجليه ماعادت تشيلني فوكاهه طاخه بجسمه ضليت ابلع بريقي وما اعرف شجاوب حته ما دحكت بعيونه...

قيصر: جاوبي لا تسكتين ترى صبري وصل حده..

شمه: ما عندي شي والله ولا جنت احبه قبل الخطوبه

قيصر: لاتراوغين بالحجي بيوم خطوبتج سألتج وكلتي احبه شنو هالحجي هسه تغير 

شمه:قيصر ايدي توجعني عوفني والله ماعندي شي هي خطوبه عاديه حالي حال الناس

قيصر: ولج تعرفين هاي التهمه الي كالهه خالج تكسر الظهر احجي لاتسكتين ترى افرغ ناري بيج

شمه: ما اتحملت بسرعه بجيت ليش هلكد اني ضعيفه كدامه وحته ما اعرف ادافع عن نفسي..

هد ايدي وابتعد مسافه عني كعد على التخم ويفرك بشعره...

قيصر: تعالي احجي وياج لاتبجين

شمه: شتريد تحجي وانت جاي هاد عليه ومصدك سلمان وتهمته ...

قيصر: لاتلغين وين شفتي مصدك سلمان لو مصدكه ما اجيت سألتج جان كسرت راسج

تعالي اكعدي خلي اسمع منج حته اعرف اتصرف ورجاءا لاتجذبين

شمه: والله ما اكذب يايوم كذبت عليكم

قيصر: شو تعالي كافي مسحي ادموعج وخلي افتهم

شمه: كعدت بصفه بس كلبي مفرفح شنو التهمه الذبهه عليه سلمان....

قيصر: انتي قبل تحبين رافد لو مجرد خطبه عاديه؟؟

شمه: والله ماحبيته مجرد ابن خالي بس شفته شخص مناسب ويكدر يوكف بوجه ابو ويحميني لذلك وافقت...

قيصر: قبل الخطوبه شفتكم سوه ومن سألتج موافقه كلتي اي ليش تنكريم هسه

شمه: دحكت بعيونه وماعرفت شحجي شكول ياقيصر وافقت برافد لان انت خطبت وتأذيت

قيصر: شو سكتي يعني كلامي صحيح؟؟

شمه: لا موصحيح من كتلك موافقه واحبه ردت احرك كلبك ..

زل الساني اويلي على حضي اريد اكحلهه عميتهه....

قيصر: كلبي!!! ليش اني شنو علاقتي

شمه: لان ماتهتمون بيه وعبالكم محد يريدني وحسيت نفسي ثقيله عليكم وعلى بيت خالي لذلك ردت استقر واكون عائله

قيصر: راح اصدكج واوكف بجانبج بس اذا طلع حرف من الي حجيتي جذب احسابج عسير

شمه: ماجذبت بشي وروح اسأل رافد كوله ليش انفصلتوا راح يكولك ماتحبني ...

سمعت راح يكول ماتحبني لان ما انطيته كلبي ولاحسسته بمشاعري وبارده ويا...

سمعتني قيصر لا تصدك كل تهمه توكع براسي مره وحده حسسوني اني مهمه عدكم

مره وحده خلي انام مرتاحه ومطمئنه وما افكر بخوف من مستقبلي واكول اكو من يحميني ...

صح اني عشت وحيده وماعندي ام واخت تعلمني بس ربيت نفسي بنفسي ...

ماسويت شي غلطت ولا زليت عن الطريق لا هسه ولاقبل...

انفعلت حيل من حجيت ودموعي تجري انقهرت من التهمه الي ما اعرفهه شنو...

وفوكاهه قيصر يستجوب بيه وهو سبب انفصالي وكل هاي السنين اعاني من حبه ومراره...

خليت ايدي على عيوني وبجيت اريد اطلع الي بكلبي كله بس ما اكدر احجي مثل بلاع الموس

قيصر: كافي يابه شحجيت اني من لوعه كلبي صيحت عليج اريد اعرف الحقيقه ...

لان هيج سالفه ماينسكت عنهه ودافعت عنج ووكفت بجانبج ..

لادكولين انتي وحيده ليش احنه وين رايحين من جنتي طفله وكبرتي انتي اختاريتي بيت خالج...

كله هذا السوينا علمود راحتج وما نحملج ذنب ابوح وامج...

اعرف عانيتي وتعبتي بس ماندري انتي هيج عايشه يم خالج وساكته...

حته خطوبتج على رافد ماجنت موافق بيهه لان اعرف سلمان من ياطينه ...

واني اول واحد ردت اخرب الخطبه على الرغم جنت خاطب بس ابوي كال حرام توكف بطريقهه

اجيت سألتج خاف مجبوره او مامقتنعه بس انتي كلتي موافقه وجنتي فرحانه لذلك سكتت...

لا هسه ولا بلايام الجايه اسمح لمخلوق ايذيج انتي غاليه عليه ومايهون عليه اشوف دمعه وحده من عندج...

كافي شمه شو وخري ايدج موقصدي اتهمج او اقلل من شأنج...

شمه: وخرت اديه واني ابجي التفتت علي اجت عيني بعينه ...

ردت اكوله كله منك انت السبب انفصلت بسبب حبك الي ملازمني لاكدرت انساك ولا هسه اكدر استمر وياك...

قيصر: فدوه اروح هالعيون كافي دموع لوتدرين شحجه خالج جان عذرتيني....

خالج كدام الزلم يطالب بيج ويكول اريد استرهه لان جانت عدهه علاقه سابقه برافد وغلطان وياهه...

وتريديني اسكت واحجي بهدوء موزين ماتخبلت عليكم كولشي اتقبله الا التهمه ومسة العرض..

شمه: ليش خليته يحجي عليه وبنص بيتكم...

قيصر: ترى طردته وماسمحتله يحجي حرف واحد يمسج بس حقي من اريد اعرف الحقيقه انتي عرضي والعرض غالي ...

شفتي ضرغام شسوه علمود شهد ايده اتطلخت بالدم وبعده مابرد كلبه ومستعد يسوي اكثر بسبيل ياخذ ثاره ...

شمه اني اريد احميج من خالج ومن علاهن بس لازم اعرف كولشي واوكف بوجهم...

يعني خالج اليوم من اجه وتهمج تهمتين وحده سالفه رافد والثانيه سالفه ذهب الحجيه الله يرحمهه

تدرين لو ما امي مسولفتلي قبل على سالفه الذهب جان اليوم ماعرفت شحجي وادافع عنج...

بس لان امي حاجيتلي وعندي علم بالموضوع كدرت ارده واتعارك ويا وطلعته متفشل ...

شمه انتي وحيده وان شاء الله ماتضلين وحيده كلهم الي حولج اعداء ولا تأمنين بأي شخص  ...

امج اقرب انسانه الج وهي عدوه الج شلون تريدن تكملين حياتج وانتي بنص هالوحوش ماعندج غير لسانج ادافعين عن نفسج...

شمامتي من احاسبج مو معناتهه اقلل من شأنج بس من خوفي عليج افتهمتي هسه

شمه: هزيتله راسي واني لزمتني الشهكه...

ماحسيت علي غير كام وباسني من راسي وكال روحي ارتاحي والموضوع لاتحجين بي...

طلع من الاستقبال واني مثل الي رشوا على مخدر نسيت العركه والرزاله والدموع ...

معقوله هذا قيصر الي باسني ومن راسي ياربي...

خليت ايدي على راسي واتلمس بي اريد اشوف اكو اثر للبوسه ...

اااخ يا شمه وين راح ياخذج كلبج وين ترسي بيج سفينه حب قيصر...

ياربي تعبت دخيلك كولشي بيه متضارب افكاري ومشاعري ساعدني الهي دليني بالطريق الصح...

مسحت دموعي وطلعت من الاستقبال مالكيت احد كدامي....

صعدت للغرفه استلمتني اسماء شكو وشيريد قيصر مابيه حيل احجي حرف واحد ولا اكدر اتناقش

بسرعه غطيت راسي وغفيت حته بهذا اليوم لا فكرت ولا سهرت مثل كل مره من كدما الحزن والصدمات ماعادت عندي طاقه...

ثاني يوم كعدت ب8 لكيت الكل كاعد يتريك مدري شعجب كاعدين من وقت بس قيصر نايم لان يسهر للفجر يقره...

ما اشتهيت اكل شي بس شربت جاي وكمت لميت المواعين وبديت اغسل بيهم ...

اكو شغله حلوه بهاي العائله الي يصير قبل يوم بعد ماينفتح ثاني يوم ولايضلون يحجون بي ...

حته عمه فضه ماسألتني ولاكالت شراد من عندج قيصر ولو وحده غيرهه جانت دكت الا عرفت شكو؟؟

جنت واكفه اغسل مواعين وذهني شارد اجت اسماء يمي تنظف بالثلاجه وتسولف...

اسماء: شمه شبيج البارحه شحجه وياج قيصر..

شمه: ماحجه شي

اسماء: لاتحجين على  راحتج بس لاتبقين ضايجه ترى من يمي اتكأب واني ماعندي احد غيرج احجي ويااا

شمه: اسماء فدوه اسكتي ماضايجه على شنو اضوج اني حضي من يوم يومه هيج ...

فوك كل هذا خالي الي رباني يتهمني بشرفي وكدام قيصر

كمت ابجي وكعدت بالكاع واسماء كعدت كدامي ...

اسماء: يولي شمه على كيفج لاتجي امي قيصر هو ياخذ حقج والله ما راح يسكتله وهسه تشوفين

شمه: تعبت اسماء مليت والله كلهه ضدي ولج خالي اخو امي الي هو رباني....

يجي يطلع حجايه عليه ويتهمني بعلاقه ويه ابنه قبل الخطبه واني بايكه ذهب بيبي...

وقيصر يسالني انتي تحبي وشنو نوع العلاقه الي بيناتكم؟؟

تعبت اسماء واني اجدي النظره من قيصر وكلما اشوف عيونه اكول راح تفرج ...

اسماء: لاتلومين قيصر بس لازم يتاكد من الحجي خوما يسكت لخالج غير يريد يدافع عنج...

شمه: لا ما الومه الوم روحي وكلبي هذا (واشرا على كلبي) الي حبه وتعلق بي كل هاي السنين..

يسألني ليش انفصلتوا؟؟؟ شريد احجي واكول انفصلت عن رافد بسبب حبك لان درى بيه احبك وبالي مو ويا ...

تعبت اسماء مليت لا اكدر اتقدم خطوه ولا ارجع قيصر مو حب لعنه وملازمتني من صغري ...

يوم عن يوم حبه يكبر بداخلي كلما اكول لازم اتقوى وانسى الكا كدامي ارحموني ما اتحمل بعد...

اسماء: كافي فدوه راح تموتين نفسج من ورا سلمان ...

وحب قيصر موجديد عليج صار سنين تحبي لامليتي ولا هجعتي...

لازم يجي يوم وربج يكافئ صبرج انتي حبيتي قيصر حب طاهر وعلى نيتج ان شاء الله مايضيع...

شمه : مسحت دموعي واسماء تهدي بيه واني كلبي مشتعل نار...

ما احس غير قيصر فوك راسنه ونظرته حيييل غريبه....

ضليت بمكاني لا اخذ ولا انطي معقوله سمع كلامي لا ياربي دخيلك استرني...

قيصر: شبيج شمه صوتج شعلوه وتبجين مو كلنه كافي وسدي الموضوع...

شمه: مابيه شي بس كوه حجيتهه من الخوف يمه يمكن سمع لان نظرته مال واحد متفاجئ ...

ضل واكف بحدود 5 دقايق وصافن عليه واني على نفس الكعده مربعه بالكاع وكاعده...

قيصر: اسماء سويلي جاي بس علما ابدل واجي وانتي كومي من الكاع بارده موزين عليج...

شمه: طلع وعافنه اني واسماء وحده تصد بوجهه الثانيه ومانعرف سمع الحجي لولا ...

وين نايم حظي بيا طينه اكومه منا يلزك هنا .....

هسه خاف ناقصه هم اجاني هم ثاني افكر بي على كولت المثل فوك الحمل تعلاوه...

كملت مواعين على السريع وطلعت من المطبخ بعد هذا الموقف ما اريد اشوفه...

اجت اسماء وراي والخوف ماخذهه اكثر مني...

شمه: يولي اسماء خاف سمعنه وين انطي وجهي...

اسماء: يمكن سمع لان متفاجئ ولكيته يشرب جاي وصافن وحته من طلع ورا شويه رجع ناسي موبايله ...

شمه: صخام الصخمني شلون راح اشوف بعظ يافشلتج ياغمه

اسماء: شوفي تصرفي طبيعيه لاتنطين لزمه على نفسج حتلو سمع غلسي وكانوا شي ماصاير

شمه: شلون يامعزايه

اسماء: طبج لوري كعدتي تعدين جنج السان دلاله الصمي واسكتي...

ضليت ساكته شحجي وشأكول يارب ماسمع شي لو سامع جان سأل اسماء شي...

بيومهه كلما اسمع صوته اشيلهه ركضه للغرفه ...

ثاني يوم راح لبغداد عنده دواام جان بلاسبوع ينزل يومين هسه سوه درب بغداد يامسهله...

مرن يومين على هاي السالفه شويه بظت تهدء نفسيتي ...

افتريت ورا البيت اريد اكعد وحدي واشتم هوااا حته اسماء ما اخذتهه وياي...

ورا بيت عمي حديقه جبيره حيل اشكال الورود بيهه والاشجار...

وبيهه جذوع نخل مسويهن على شكل مسطبات مرات يكعدون هناك الولد هم وجماعتهم...

طلعت اتمشى واشتم بالهوا العذب امشي واكطع شكو زهره او ورقه كدامي اشتمهه ...

كلما اتقرب اسمع صوت العود يدك عرفته ضرغام...

ماردت اتقرب ويشوفني ويسكت ارتجيت على شجره الزيتون وضليت ادحك وهو يغني...

جان كاعد على واحد من جذوع النخله ويدك بالعود باحساس غريب ويغني بهذا المقطع...

تعال عيوني وبلياك ما عاود واسليهه
تعال شفافي محتمات بهمس شفاك ناغيهه

تعال وعندي سوالف اسولفهه الك واحجيهه
تعال العين الك تبرى... ظلام وطلعتك كمره

واضل مثل الي يحفر بير بيده يدور الكطره
واضل انخاااااك واسمع صدى يناديني
بأسف خان العزيز وياك ...

جانت الاغنيه وحدهه بجهه وصوت ضرغام واحساسه بجهه ثانيه ...

على كلمات الاغنيه وصوته نزلت دمعتي كل انسان يحمل هم شكل...

ماردت اقطع صفنته عفته بعالمه الخاص وكملت طريقي ...

صرت مقابيل بيت علاهن وكفت واني اتمعن بالبيت وبالبستان شكد يحوي خيرات واشجار...

بلحظه وكأنها حلم او لقطه من فلم سينمائي...

شفت هذا البستان عباره عن رماد لاشجره ولانخله بس النار مشتعله بي من كل صوب...

اندارت عيني على بيت علاهن شفت اشياء مامكن العقل يستوعبهه...

بلحظه كل اعظائي يبست وعبالك بداخل كابوس مختنكه...

بيت علاهن مهدوم جزء منه بس مضيف جدي الله يرحمه ما مهدم ...

اشوف ارواح ودخان مدري شنو تحوم داير مداير البيت...

الساني يردد" لا اله الا الله الحي القيوم '"

اريد اكمل الايع ما اكدر مثل الي انشلت اعظائي ضليت اردد بلايه واستغفر هوايه ...

انتبهت على نفسي وعلى وكفتي على حافه النهر العصافير تزقزق بالشجر ...

المي يجري سريع وريحه التراب المبلل تارسه الجووو...

باوعت لأيدي ترجف افتح واسد بيهه يله كدرت اسيطر على نفسي...

رجعت للبيت بدون ما التفت وراي واني اقره ايات قرانيه...

ليش اني دا اشوف هيج شغلات شنو صاير يربي ليش اني من دون القريه يتخيلي هيج اشياء؟؟؟

وصلت للبيت لكيت عمه فضه تخبز جريت طابوكه وكعدت عليهه ....

ردت احجيلهه بس كلت منو يصدكني لو اسولفهه للمخبل يضحك عليه...

فضه: شمه شو مو ع بعضج صار شكم يوم خير يمه...

شمه: لاعمه مابيه شي بس سالفه خالي سلمان هدت حيلي...

فضه: خلي يولي يمه لا اديرين بال هذا انسان مريض عندك ولد عم ياخذون حقج من عين السبع...

شمه: الله يحفظهم ويخليج النه

فضه: شوفي شمه اتذكر من جابتج امج صارت مصيبه ببيت علاهن وهذا اليوم ماانسى طول عمري...

شمه: ليش عمه شصار...

فضه: من جابتج امج يم القابله اجت لغرفتهه وحالهه حال النسوان الجايبه كاعدين يمهه ....

وانتي بس تبجين وكلما تشيلج علاهن تصيرين زركه من البجي...

ماغمضت عينج ابد ولانمتي ليش ما ورا شكم ساعه وامج بعدهه نفسه...

وجان كبت العيطه والصياح البستان الي يم الشط احترك كله والقريه كلهه تركض ..

واحنه انشوف النار تلهب لهب واكلت الاخضر واليابس كوه طفوا بس جانت خساره جبيره...

وراهه علاهن كامت تصيح هاي البنيه وجه شؤؤم علينه وجابت المصايب...

بس عمج حسين الله يرحمه كال هاي شمه وراهه سر جبير لان من بجيهه كشفت اسرار مخفيه وحركه البستان ويه ولادتهه اكو علاقه ....

ومات عمج حسين وماعرفت شيقصد كل مره جنت اسأله يكول يجي يوم وتعرفين هاي الشمه شراح تسوي....

مره منهن شافج تلعبين حبل ولكيته يدحك عليج ومبتسم...

بوقتهه كال هاي الطفله عندي احساس تشوف ايام سوده بحياتهه بس راح تكون نهايه هاي القريه على ايدهه....

شمه: خوفتيني عمه شطلعت اني طرزان...

فضه: عمج حسين الله يرحمه ما اعرف شنو جان يشوف قبل مايصير الحدث ويتخيل هواي اشياء لذلك كل كلمه يكولهه اصدكهه ...

شمه: ان شاء الله ماكو غير الخير وبعد اكثر من هاي الايام السوده اشوف عجل الله الساتر...

بيومهه صدك دب الخوف بداخلي كلام عمه فضه وعمي حسين الله يرحمه وشوفتي للبستان محروك لازم اكو شي....

انيسي الوحيد القران بس افكر بهيج شغلات اركض اقره قران واطول ساعات ...

انفصل عن العالم كل كلمه اقراهه احسهه توصل لاعماقي...

...

هذا اليوم جان موعد جيه حسام وقيصر صادف خميس الساعه ب4 العصر ....

سوت عمه فضه دولمه ودجاج شوي وفرحانه الدنيا ما واسعتهه بجيه الولد...

اني واسماء سوينه كاستر وكومه شغلات عبالك عدنه عزيمه...

كلبي متلهف على شوفه قيصر من يوم الصار ماشفته بعد....

واكفين بالمطبخ وجان يندك الباب حيييل ...

صاحت اسماء منوووو؟؟؟

نشوف رجلين نسوان هوايه بالباب بس الدكه قويه عبالك عركه....

طلعت عمه فضه فتحت الباب واحنه واكفين بالمطبخ اندحك ...

اخر ما اريد اشوفهه هي امي جامعتلهه عصابه وجايه هاده علينه مانعرف عليمن....

امي وحرامات اكول امي وبناتهه الي هن اخواتي شروق ورونق ...

وسعاد وبنتهه الجبيره واثنين من خالاتي الي بس بلأسم ...

تلكتهن عمه فضه بوجهه الحلو والسانهه وهي ترحب بيهن...

بس هذني عديمات الذوق الهمجيات الرعنات كل كلمه اكولهه بحقهن ماتكفي ...

دفعنهه وطبن للبيت حته رادت توكع خطيه ولزمت الباب ...

امي وسعاد صوتهن شعلوه والغلط والفشار وعبالك جايات من ملهى مو بنات شيوخ...

امي: ولج شيماء اطلعين  وتجيبين ذهب امي لا احرك البيت على راسج...

فضه: سناء مو هيج الحجي جايه لبيتي وصوتج شعلوه على الاقل اتذكري انتي بنت شيخ وعيب هالاسلوب ....

سناء: انتي اسكتي فضه ولاتدخلين...

شمه: طلعت حجيت بصوت عالي ...

عمه فضه لاتحجين ويه هيج نماذج انتي اسمج فضه واسمج عليج اخلاقج ماتسمحلج تردين على هيج معادن...

سعاد: ام الزلم بعده السانج يلعلع البواكه الحراميه بنت الزاني...

شمه: اطلعي برا سعاد العار هم الج عين تحجين ام البساتين ....

تتفقين ويه الفلاحين وادفعين فلوس علمود غايتج امشي اطلعي برا لا اخلي جهنم الحمره تكب عليجن...

امي: عديمه التربيه عليمن اطلعين على ابوج السكط ....

شروق: يمه دوسي ابطنهه وخلصيني وانتي فضه روحي جيبي الذهب مو مكيفه بي...

شمه: من كالت فضه واستهانت بيهه حسيت نفسي اشتعلت نار هي ركضه وهي كومت شروق بالكاع ....

جريتهه من شعرهه ووكع شالهه كطعته تكطع بيدي...

احس اكو ضرب على راسب وعلى جسمي وصوت صياح بس فقدت ....

شلون اختي بنت امي وابوي هيج تسوي بيه شلون امي جايبه عمود بيدهه وهاده عليه...

احس براكين بداخلي كمت اضرب بدون شعور مدري رونق مدري خالتي مدري امي المهم اكتل ....

صوت الفشار يرن باذاني ومنين؟؟؟ من امي واختي منهن اسمعهه ....

احس شعري تملخ وجلدي تزلغ من الكتل والاظافر بس ما احس على الالم من كدما منفعله....

اسمع صوت عمه فضه واسماء وهن يدافعن ويمكن هم دخلن بالعركه....

ماحسيت غير ضربه قويه اجت على راسي خلتني ااوكع بالكاع بس مافقدت الوعي...

اشوف الدم بده ينزل من راسي وخشمي واسماء وامهه يصيحن وييضربن على خدي عبالهن فاقده ...

صح جسمي فقد بس عيوني تشوف الي كدامي....

اخر ماشفته وعيوني انترست دم وملابسي....

شفت وسام طفر من السياج وبيده عمود حديد....

وصوت علاهن وهي تصيح اليوم ادفنجن هنا وبنت امهه الي تطلع صاحيه.....

#يتبببببع

( تفاعلكم على القصه مو حيل قوي مثل ما اتعب واكتب وملتزمه وياكم رفعوا القصه لان من صدك كوه اكتب البارت )
.....