رواية وحوش بشريه الفصل السابع والعشرون 27 - بقلم Rozaya1122

#البارت الثامن والعشرون
#وحوش بشريه
#روزايه

ڪـون_اشــم_اهدومڪ
واشبــــــع هـــــــــــــــوه
الوادم تگلي ترة كلها سـوه
لا يعمــــي..لايبوي~~
والله مـــــــو كلهة_ســــــوه
النابت بگلبي ️عرج ويطك~ خضار
إشلون أحسبنه مثل شتل ...النــوة
___________

قيصر: شمه اااني........

شمه: كال اني وسكت ماكمل كلامه ضليت صافنه واني اترقب الكلمه الي راح يكولهه

قيصر: يله خلي نروح تأخرنه...

شمه: ماحجيت شي ولا سألته شردت دكول طلعت كدامه وهو سد الباب وصعدنه بالسياره اني واسماء ورا وعمه فضه بالصدر ..

كلبي يدك سريع حته اسماء سألتني شبيج وليش تأخرتي .....

ماعرفت شحجي وضل بالي بلي راد يحجي قيصر وسكت وليش هيج يتغزل بيه وهيج تصرف...

تلكانه وسام على الشارع العام جاي من الطوبه وصاعد على الدراجه ورا 2 ولد وشلون المخابيل صوتهم شعلوه ...

دكله هورن قيصر نزل من الدراجه واجانه

وسام: وين رايحين؟

قيصر: نتعشه برا ونرجع عينك على البيت حسام وضرغام معزومين والبيت فارغ

وسام: لعد اني ابن البطه السوده لا معزوم ولا اروح وياكم كله منج فضه دومج شاده وياي..

قيصر: امشي ارجع للبيت فارغ من شبعت دياحه يله اتذكرت نفسك

وسام: يمه جيبيلي عشا مو تنسيني فضفوض

فضه: امشي ولك خلي ارجع وشوف شسوي بيك

تحركت السياره وعمه تضحك على سوالف وسام وتشكي لقيصر علي ...

فضه: يمه هذا وسام راح يموتني ماخذ الدنيا هيج لايفكر بمستقبله ولا ينتبه على نفسه

قيصر: بعده طايش خلي يعيش حياته مثل مايحبهه المهم مايغلط

فضه: ما تذكر من راح جاب هاي من غير صوب لو ما الله ستر جان ذبنه بسالفه..

قيصر: لايمه وسام هذا لاتخافين علي بس هاي السنه ويروح جامعه ويعقل...

فضه: ياريت والله اكول وليدي ...

قيصر: كولي

فضه: ليش ماتتزوج وافرح بيك والله موتوني قهر لا انت ولا ضرغام معاندين..

شمه: من كالت هيج عمه فضه بسرعه دحك عليه بالمرايه التقت عيونه ...

واني اترقب شراح يجاوب امه عن سبب تأخره بالزواج...

قيصر: يايمه وراي سفر ما اكدر ارتبط وتالي اعوفهه واسافر وتصير عليه اصعب ويضل بالي هنا...

فضه: عاد بس اخطب وروح سافر اشو الدكتورات اشكال وياك وانت ادري بيك ماحبيت بلسم مجرد اعجاب ماشفتلك وحده تعجبك لحد هسه...

قيصر: شفت شفت ولكيت وحده عجبتني....

بس وراي سفر وما اعرف الي امر بي هناك واحتمال اموت بالطريق شنو ذنبهه اعلقهه بيه...

ارجع واخطبهه واخليج تفرحين فرحتين مو بس وحده...

اسماء: قيصر يعني دكتوره وياك الي عجبتك ومخليهه ابالك

قيصر: لا مودكتوره ولا ووياي ...

شمه: طول ماهو يحجي وهو عينه بالمرايه اني سويت نفسي العب بالجنطه ...

بس اسماء زرفت خاصرتي من كدما ضربتني عود اسمعي..

همست بأذنهه يولي خاصرتي اريدهه وكلبي هم اريده على كيفكم وياي انتي واخوج

اسماء: لج اسمعي شيحجي وانتي ساكته وحبابه

شمه: عجل شسوي ارحميني كلبي راح يطفر واحس نفسي راح اتخربط

اسماء: قيصر وكف السياره شويه شمه داخت وتحس نفسهه راح تتخربط

فضه: يا بنيتي شبيج موهسه جنج ورد

شمه: عزا بعينج اسماء فضحتني لاخاله مابيه شي بس نفسي لعبت

وكف السياره قيصر ونزل فتح الباب وانطاني بطل مي...

ما شلت عيني ابد ولاشفته بس غسلت وشربت مي واني كولشي مابيه لامتخربطه ولا عطشانه بس من ورا اسماء..

قيصر: ها تنزلين شويه..

شمه: لا هاهي زينه يله خلي نروح

تحركت السياره وشبعت اسماء كرصات لاتكدر تبجي ولاتصيح بلعتهه وسكتت...

صار الطريق شطوله وضعي مربك بعدت كل الافكار عن بالي وماردت افكر بشي واخرب الطلعه عليه..

وصلنه للمطعم كعدنه بجناج العوائل الجو حيل جان..

قيصر: يمه شتاكلين وانتن يبنات؟؟.

فضه: يمه شتاكل اني وياك بس ماريد هذني السوالف بيتزا وصاج

قيصر: وانتي اسماء شمه شتريدن

اسماء: اني وشمه انريد صاج وفنكر

شمه: من كعدنه قيصر صار كدامي وبصفه امه واسماء يمي

عبالك طالعه بموعد غرامي استحي ارفع راسي شلون راح اكل واني جوعانه...

جابولنه العشا عمه وقيصر كباب واحنه صاج بديت انقش على كيف مدري شجاني اني الي ما اعرف المستحه شنو هسه مستحيه صدك الحب حلو....

عمه فضه كامت بسرعه متاكل هوايه ضلينه بس احنه اشو هاي اسماء كامت ورا امهه وكالت شبعت وهي بعدهه ما مكمله اكلهه...

ضلينه بس احنه نزلت اديه جوه الميز وافرك بيهن حته مايشوفهن ...

اجمل اللحظات اكدر اوصفهه واني كاعده وعيون قيصر محاوطتني...

قيصر: شمه ليش متاكلين تستحين؟

شمه: لا اكلت وشبعت

قيصر: ترى وضعج مخربط حته الاعمى يشوف لاترتبكين وهدي حالج واكلي على راحتج ..

راح اطلع اني ومن تكملون دكوا عليه ولوا ما اريد اكوم واني اشوف شمه الحلوه شلون خجلانه وطالعه حلوه

شمه: ماجاوبته بس بكلبي احجي دخيلك قيصر اذا تدري بيه اذوب ليش هيج تسوي

اجت اسماء وطلع قيصر وكالهه خابروني من تكملون...

اسماء: شبيج طفشتي اخويه شدعبله حجايه السانج

شمه: ليش رحتي موتدرين بيه ما اقاوم...

اسماء: اني وين كاعده خاف بالسينما واشوف مشهد رومانسي

يارباه شمه خجلانه ولكم ياناس علاهن خجلت وطلعت الانوثه الي بداخلهه

شمه: فضحتيني ولج اليوم انتي واخوج ناوين عليه...

اسماء: والله مدا اتشاقه طالعه تخبلين كيكه جنتي ماتهتمين بنفسج وبلبسج بس هسه طالعه فدشي متشوفين حبيب القلب شلون ولع

يله بسرعه خلي ناكل خاف يجي ميته جوع كمت من يمكم حته اخليكم وحدكم

شمه: اكلنه بسرعه واجت عمه فضه خابرته اسماء وطلعنه صعدنه بالسياره ...

قيصر: راح اخذكم للمول ونرجع للبيت

فضه: يمه مابيه حيل افتر اني اكعد بلاستراحه وانت افتر وياهن يرادلهن حيل..

شمه: وصلنه للمول وجان ازدحام حيل لان العيد قريب والناس طالعه تشتري...

خلينه خالتي بالطابق الارضي بلاستراحه واحنه مشينه ويه قيصر صعدنه للطابق الثاني بالدرج الكهربائي..

صعدنه كدامه وهو ورانه حسيت قيصر صعد درجه وصار وراي لزك...

يمه اريد اركض على الدرج صار شطوله وهاي اسماء بس حواجبهه تتحرك ...

وصلنه للطابق الثاني وكمنه نتمشه وندحك على المحلات من كد الازدحام كلساع نريد نطخ بواحد...

وشلون شباب اغلبهم جاين يتونسون وعيونهم زايغه...

اثناء الازدحام ردت اطخ بشخص حسيت على ايد قيصر سحبني من زندي وخلاني امشي من الجهه الثانيه...

شتريدون مني شحجي شصار بكلبي يجوز صوته يوصل لاخر الدنيا ...

احس لمسته مثل الصعقه الكهربائيه ياربي معقوله اني بحلم ...

هذا قيصر الي كدامي هو نفسه الي جنت انتظر منه نظره خاطفه لو بس اسمع اسمي بلسانه..

بس رجليه تمشي واني بعالم قيصر حته ما انتبهت على المحلات..

وكفت اسماء تريد تشتري ستره على البنطرون...
ضلت واكفه تختار وتاخذ رأي واني بس اهز براسي...

اختارت ستره زيتوني طويله واشترتهه وطلعنه...

وكف قيصر بباب محل ملابسه حيل راقيه دخلنه ورا واشرلي اختار ...

لا اليوم هوايه عليه بهذا اليوم نسيت حته اسمي....    

ما اكدر التفت على اسماء حواجبهه تربكني بس تشوف موقف قوي ادكوم تتحرك بيهن...

قيصر: يله شمه شبيج صفنتي تعالي اختاري حته نطلع

شمه: عندي هوايه ملابس ما اريد

قيصر: اعرف عندج بس بالعيد اريد اشوفج حلوه

اسماء: اختاري نفس ستره وبنطرون احلى من الفستان شوفي شلون طالعه حلوه اليوم..

قيصر: اخذي هاي الستره غيري هاي الالوان الغامقه البسي الوان مرحه اطلعين احلى..

شمه: ماشي  راح اخذهه جانت ستره من اختيار قيصر لونهه سمائي وبي خرز ابيض على اكتافهه وشيفون حيل حلوه...

دفع حسابهه وطلعنه اسماء كالتله الا اصعد للطابق الثالث اريد فستان احتمال حسام يخطب بهاي الفتره...

قيصر اول مره مطول باله حته اسماء متعجبه صعدنه لقسم المناسبات...

الفساتين فد شي اكو مال نوم واكو دلع وقصير من كدما دحكت عيوني غوشت اكو منهن حته عيب ينلبسن يخزن ...

اختارت اسماء فستان طويل لونه وردي وبي فتحه للركبه هم حلو...

اني وكع عيني على واحد ضليت اتمعن بي بس مابنيتي اشتري ولا ابالي ...

بس فززني صوت قيصر وهو قريب عليه

قيصر: عجبج؟؟
شمه: حلو بس ما اريد

قيصر: بطلي كلمه الما اريد وخشمج اليابس هم

شمه: مو اشتريتلي ستره كافي هي كلساع

قيصر: شمه عجبج لولا لاتحجين حجي زايد

شمه: اي حلووو

قيصر: طبي شوفي قياسه زين علما ادفع افلوس...

شمه: فد خجلت حسيت اليوم ثقلت علي هوايه الفستان حلو ومستور طويل لونه بنفسجي غامق واردانه للعكس وشيفون وكصه الصدر تفاحه ونازل على الاكتاف مرتب حيل..

طلعنه من المحل ونزلنه لليجوه لكينه عمه فضه تنتظر ونعست خطيه...

ضلينه ننتظر قيصر بباب المول علما راح يجيب السياره من الكراج...

صعدنه واسماء بدت تحجي لامهه ششترينه الجو هادئ والاضويه الي بشارع تفتح النفس ...

شويه صار هدوء بالسياره وفتح اغنيه وهو كلساع يرفع عينه عليه...

واني هم كلساع اسرق نظره واسرح بكلمات الاغنيه جانت اغنيه هيثم يوسف ....

عيونك حلوه صوبن كلبي
ماخلني اندل دربي
من نظراتك من لفتاتك
اتمنى اسمع كل همساتك

وصلنه للبيت الساعه 11 ضبط ما ردت انطخ بقيصر بوجهي للغرفه بدلت ومددت بفراشي..

واني اعيد لقطات اليوم شصار وافسر كل نظره وكل كلمه منه...

ساعه اكول اني بحلم هذا مو قيصر وساعه اكول يجوز هسه يله انتبه عليه...

ثاني يوم كعدت لكيت حسام موجود ...

حسام اصغر من ضرغام بسنتين ابد مايجي يمنع هوايه مخلص هندسه كهرباء ويشتغل ببغداد يم خاله بالصدفه يجينه...

سلمت علي وكعدت كالت اسماء شمه حسام راح يخطب وتصير عدنه جنه نشوي البصل على اذانهه

شمه: بعدهه ما اجتي يولي ومتحلفه بيهه بيهه الخير حسام

حسام: الخير يصيبج يوم الالج

شمه: بس منو ومنين؟؟
اسماء: اخوتي طالعين على ابويه الله يرحمه كلهم غركانيم بالحب

وحده من بغداد شايفهه وحبهه وبعد يومين المشيه...

شمه: الله يتمم ان شاء الله

صدك ورا يومين صارت المشيه وقيصر ضل ببغداد مارجع عنده دوام ...

بدينه نحضر للخطوبه وكالت عمه فضه البنيه حبابه واهلهه دره مال الله مو مثل بلسم...

حددو موعد الخطبه يوم الجمعه علمود هو حسام ماعنده دوام...

قبل يوم الخميس اجه قيصر وكال لامه لاتعزمين عماتي بيتهم زغير وخطيه نحرجهم عود بالعرس اخذيهن...

بس اني وعمه واسماء لبست الفستان الي اشتريته وسويت شعري بيرمن لان طويل...

وخليت مكياج خفيف واخذنه قيصر نفس الحاله طول الطريق عينه تتفحصني جنت لابسه عبايه اسلاميه وماطالع من عندي شي بس من اشوف نضراته اخجل..

وصلنه لبيت البنيه ناس بسيطين الام والاب معلمين وعائله بمعنى الكلمه مثقفه والبنيه حلوه وبعمرنه ...

شلون ملكه تلكونه وشالونه بالصلاوات خلصت الحفله وقيصر اصر الا نرجع جانن الساعه ب6 العصر وشكد حجت عمه فضه كالتله ليل وطريق يخوف بس ماقبل نبات يم بيت خاله ....

هو ضل ببغداد يكول عندي دوام وخفارات ورجعنه ويه ضرغام جان الطريق صدك يخوف ختمت القران بيومهه

مر يومين ضبط والسعاده غامرتني رغم ما اشوف ابواب حزن على الطريق بس اريد اعيش كل يوم بيومه مليت من التفكير وبدون جدوى...

جانت الساعه ب3 العصر ضبط كاعدين نشوف مسلسل وكدامنه قوري الجاي وكعك

واجانه وسام يركض بس اسمع صوته الزم كلبي...

وسام: يمه فضه ولج شمه

فضه: اعوذ بالله من اخبارك يالغراب شجبتلي واجيت...

وسام: يولي شمه بيبتج نوريه ماتت...

شمه: هو كال هيج واني كعدت بالكاع ركضت عليه عمه فضه واسماء جنت مامستوعبه الخبر شويه وسمعت صوت الصياح...

شمرت نفسي بحضن عمه وابجي بكل قوتي ماتت وماشفتهه من ورا قيصر منعني ...

شكد دافعتلي وربتني والكاهه منتظرتني بالباب واني حته ماشبعت منهه شوف ...

صدك بجيت من كل كلبي واني افقد عزيز على كلبي كلشي مايربطني بهاي العائله بعد ....

فضه: كومي يمه روحي اذا تريدين واني اخابر قيصر

شمه: لاعمه المن اروح بيبي وماتت وبس اروح اسمع اشكال الحجي يجوز حته يتجاوزن واني ما اتحمل..

راح اكوم اصلي واقره قران الهه احسن من شوفه امي واخواتي....

كمت صليت وابجي واقرالهه قران حيل تأذيت بوفاتهه ...

ادحك من شباك الغرفه واشوف الناس متجمعه والفاتحه والهوسه بس ما الي مكان يمهم ....

خلصت الفاتحه واني منطويه على نفسي وكاعده لو اقرالهه قران لو اصلي ....

مر اسبوع كامل الحزن مسيطر عليه ابد مامكتوبلي تكمل فرحتي واعيش براحه...

ورا ما خلص هذا الاسبوع  واني طالعه روحي حته ماعندي واهس بكولشي قيصر ببغداد ما اجه سمعت عدهم عمليات هذا الاسبوع...

اختنكت من البيت كلت خلي اشتم هوه اخذت اسماء وطلعنه تمشينه شويه بالحديقه البرا...

شفت ام مناهي اجت على علاهن وطبت للبيت اكيد عدهن سالفه ...

ما دخلت نفسي ولا اريد اعرف شجاي يصير البيه مكفيني ...

ورا نص ساعه طلعت ام مناهي وبيدهه علاكه وتمشي وتلتفت شلون الي مراقبه...

حته اسماء كالت احس بيت علاهن شلون فلم الرعب بس ادخل كلبي ينعصر..

شمه: والله لو يهدمونه على راسهه ونخلص احس كل المشاكل تجينه من راسهه

اسماء: ااووي كومي ندخل جوه هسه ماما دكوم تحجي ليش طلعنه...

شمه: دخلنه جوه والبيت ملل وهدوء رحت فتحت قراني واقره حته اطلع من جو الكأبه ...

مر اليوم هادئ حاله حال الايام البقيه ماكو شي جديد ...

ثاني يوم اجه قيصر وحسام وعمه فرحانه بيهم بس مستحيل مايتعكر مزاجنه...

بليل متابعين مسلسل وجان يندد الباب حيل ودكت رجال ...

طلع وسام يشوف منو؟؟

رجع يركض كال هذا سلمان واخوته وويا زلم 4 ...

فضه: امشي افتحلهم الاستقبال بين ما اصيح قيصر

شمه: رحت خليت الجاي على النار نزل قيصر وضرغام اثنينهم...

دعيت بكلبي ماكو شي ترى سلمان ما تجي منه غير المصايب....

ضلينه نسمع شيحجون ماكو صوت اجه اخذ وسام الجاي ويكول بعدهم ماحجوا....

شويه وجان نسمع صوت قيصر صاح بقوه...

قيصر: والله ياسلمان لو ماكاعد ابيتي جام عرفت شسوي بيك...

اياك وهاي اكولهه مرتين اياك تلمس شعرهه منه والله ادفنك وانت عدل وكول قيصر ماكال

سلمان: تهددني وكدام اخوتي وعمومتي...

قيصر: اي اهددك واحط طلقه براسك وراس كل من يطلع وراك

مو عبالك قليلين شر احنه وحق الله اشيلك منا بليله ظلمه ...

ديربالك  سلمان اطخ اظفر من اظافرهه مو اسويهه دم لا ادفنكم انتو وعدلين

سمعتوني زين انت واخوتك وكوم اطلع من بيتي هسه ما اتشرف بيك

سلمان: ولك اشو ماتعرف الاصول وتطردني اني الشيخ سلمان ...

قيصر: مو انت تعلمني على الاصول وشيخ على روحك مو عليه ماكو كلمه تنفرض عليه ..

الي جاي تحجي عليهه وبنص بيتي بنت عمي هاي وعرضي قسما بالله احرك الدنيا اذا انلمست شعره منهه

اني مو سلمان واسكت عن عرضي وفوكاهه جاي تشمر بلاك علينه ...

استحي شويه وخلي لنفسك قيمه رجال شكبرك تمشي بحجي النسوان وتسيرك وحده مريضه

خليني لحد الان عندي ذره صبر وياك اذا طلعت من طوري اخليك تتمنى الموت...

شمه: نسمع صوت قيصر والزلم يهدون بي بس الظاهر سلمان مسني بحجايه .....

طلعوا وسمعنه طبكه الباب القويه طبوا الولد وصوتهم شعلوه ...

تلكتهم امهم تسأل شكو شصاير صاح قيصر شمه تعالي وراي....

#يتبببع