رواية وحوش بشريه الفصل التاسع والعشرون 29 - بقلم Rozaya1122

#البارت الثلاثون
#وحوش بشريه
#روزايه

انه بدونك أظل مثل
الحمامة الهدّموا عشّها....
جفت روحي يمتى
بروحك ترشّها ؟؟؟؟؟
و هاي الروح " هاي الروح
متغشها الليالي السود
بس عيونك تغشها.!!!!!

شمه: اخر ماشفته اثناء ماوكعت هي علاهن ووسام وبعدهه اغمى عليه...

ما حسيت غير راسي بحضن عمه فضه وشاداته بشال ما اكدر افتح عيوني واسماء كاعده يمي تمسح بالدم ...

علاهن كاعده على الكرسي وتهد وتتوعد وبيدهه العصا مالتهه وادك بيهه بالكاع...

فضه: كومي ولج خابري اخوتج شوفيهم وين مصيبه وكعت على راسنه البنيه راح تموت من النزف....

اسماء: يمه لاتتخربطين انتي واحير بيمن؟؟ شمه هاي منتبهه زينه...

فضه: اااخ ياكلبي احمل قهر منو ومنو ولج اخوج وسام شوفي وين وله ..

يمه شمه اتحملي شويه علما يجي قيصر صيري سباعيه ..

بيبتج علاهن اخذت حقج وزياده وهسه يجون ولد عمج ويشيلوهم منا...

شمه: راسي عمه احسه مفتوح راح اموت من الالم...

فضه: سوده عليه كون ايدج ياسعاد معلكه بركبتج ياربي لاتعديهه الهن...

علاهن: خايبه فضه راح اروح لبيتي ودزيلي وسام اذا صار شي .....

فضه: ضلي عمه وين رايحه هذا هم بيتج ...

علاهن: بس يجي قيصر تصير موخوش ويذب الصوج براسي خلي اروح احسن وعينج على شمه...

فضه: الله وياج عمه اعذريني شمه بحضني ما اكدر اطلع كومي اسماء ورا الحجيه

علاهن: اكعدي اندل الباب وعينجن على البت لاتفهن عنهه وجهه اصفر ...

شمه: بعد ما اتحمل الالم احس حيلي انتهى وكلبي نبضه ضعيف ذبذبات صوتهن بدت تتلاشى عني كوه متماسكه واحس بوري ومفتوح براسي..

وسام: يمه اجو الولد ....

فضه: خوما تلكيتهم وحجيتلهم خلي يرتاحون يله...

وسام: كل عقلج يمه بعدهم بالطريق وخابرتهم وحجيتلهم وانطيتهم الاحداث اول بأول....

فضه: اااوف منك لا اكوم شسوي بيك ياغراب ولك ماتوب ابو الهبطات يوميه موكع كلوبنه...

وسام: هاي فوك ما احجيلهم طلعت موزين دومج هيج وياي تفضلين الكبار عليه ...

فضه: عمه عين السانك انت بزر الكعده المخبل شوكت تعقل ..

وسام: ضلي سولفي وتعاركي وياي والبنيه راح تودع ....

شمه: اسمع مناكر وسام وامه بس كوه افتح عيني اريد اكلهم اسكتوا ما اتحمل الصوت ...

لمحت من الباب طبوا قيصر وضرغام وحسام ومفزوعين...

كلهم كعدوا يمي ويطمنون عليه واني اشوف لمعه الخوف بعيونهم...

اول واحد قيصر شفت بعيونه النظره الي صار اسنين اتمناهه ...

رغم جرحي الي ينزف بس حسيت بفرحه بداخلي واني اشوف الاهتمام بعيونهم واكو من يحبني وخايف عليه...

قيصر: تعالي اسماء اخذيهه لغرفه امي وعلى كيفج وياهه ترى نازفه هوايه..

فضه: ناخذهه للمستشفى راح تموت خلص دمهه

قيصر: سدو الطريق ممنوع التجوال انفجار صاير وين نوصل للمستشفى ماتتحمل ...

اني هسه اضمده الهه بين ما اجيب العده..

شمه: اخذتني اسماء للغرفه وكعدتني على الجربايه وملابسي كلهه دم ...

عمه فضه عدهه فوبيا من الدم كلساع تريد تتخربط وطلعوهه برا ...

اجه قيصر وماقبل واحد يضل يمي بس هو واسماء .... 

قيصر: ضرغام عينك على امي ترى ضغطهه مرتفع وانتي اسماء روحي جيبي مي ومسحي الدم الي بوجهه

اسماء: كلساع امسحه بس هو هوايه ينزل..

قيصر: ميخالف روحي وجيبي وياج يود...

شمه: قيصر: راح اموت من الالم الله عليك انطيني مهدء...

قيصر: شمه جرحج ينزف ومفتوح لازم يتخيط واني راح اخيطه الج اتحملي...

شمه: من سمعت خياط متت من الخوف كمت ابجي فوك الالم الي عندي فوكاهه خياط..

اسماء: هذا قيصر وهذا اليود...

قيصر: الزميهه وياي وثبتيهه لاتتحرك وتتأذى

شمه: جنت كاعده على الجربايه وقيصر واكف كدامي واسماء لازمه اديه ...

بده ينزع بالشال الي متروس دم وشمره تبع مكام الجرح واني بس اصيح ااخ

مسحه وعقمه ولازم يخيطه اريد اكوله اخاف لا بس ما اكدر احجي من الالم والتعب كل طاقه وحيل ماعندي...

اول ماشفت الخيط يحضر بي فرفحت روحي وكمت ابجي...

ولاعبرني ولا اهتم خله رجليه بين رجلي وهو واكف حته ما اتحرك واسماء لازمتني وبده يخيط عود رش مخدر...

بس يامخدر يادنيا يمكن صوتي يوصل لراس الشارع كلما يغرز الخيط اصيح بعلو صوتي واحس اوتاري الصوتيه تتكطع...

بين اديه واحس بتعذيب روحي الالم احسه وصل للدماغي.....

اخر خيط ما اتحملت انغمى عليه من قوه الالم انهارت قواي شي فوق الخيال ماينحمل...

كعدت على ضربات اسماء على خدي وعلى ريحه العطر ...

ايدي ترجف وراسي احسه مضروب طلقه...

قيصر بعده بمكانه ويشتغل بس مكمل خياط بس يعقم بي...

خلا بلاستر علي وهو الجرح صاير ابدايه شعري من الصفحه يعني قريب على كصتي...

لفه اليه بشاش وعقمه بس اني منتهيه حته ما اقاوم بس دموعي تجري ...

قيصر: كومي طلعي الغراض اسماء وذبي هذا الكطن...

شمه: كامت اسماء من يمنه واني بعدني على نفس وضعيي..

حسيت على ايد قيصر حاوطت ركبتي بهدوء وهو واكف وسحب راسي على صدره بكل حنيه ...

جنت محتاجه حضن ومحتاجه امان مو الا قيصر محتاجه ابوي واشكيله على امي شسوت بيه...

محتاجه اعاتبه واكوله اني الضحيه ليش سويتوا هيج...

اريد اسأل امي سؤال واحد ليش ذلتني وكسرتني لهاي الدرجه وعبالك بنت حرام...

لزمت قميص قيصر باثنين اديه وكمت ابجي بوجع كلب نسيت هذا الشخص منو وشكد اخجل منه ...

بس اريد واحد يطبطب على ظهري ويكول لاتخافين...

عافني ابجي براحتي وايده مخليه على راسي وضامني لصدره...

انتبهت على وضعي ابتعد من عنده بس عيوني ما اشوف بيهن من كد الالم...

سحب الغطا وخلاني امدد وضربني ابره بالوريد مال الم حسيت اعظائي ارتخت وعيوني غمضت ..

بسرعه غفيت وما ادري بشي بعد ...

غطيت بنوم عميق شفت بيبي نوريه كاعده تغسل ملابس على الشط...

اجيت امشي ومخليه ايدي على راسي بمكان الجرح...

كعدت يمهه سلمت عليهه ماتحجي بس تبجي كمت احجيلهه عن امي والي صار وشسوو بيه...

اريدهه تجاوبني ماحجت ولاحرف بس تبجي وادحك عليه...

اخر شي كامت وشالت الملابس وجانن ملابس مال اطفال ومشت من يمي...

من ابتعدت مسافه التفتت عليه وكالت شمه ربج بالمرصاد انتظري وشوفي شراح يصير لهاي القريه....

بس هيج حجت واختفت من كدامي فزيت من نومتي لكيت اسماء مخليتني بحضنهه وتلعب بشعري النازل...

شمه: اسماء عطشانه..

اسماء: هاج اشربي هذا المي بس كوليلي زينه انتي؟؟

شمه: اي احسن شويه بس راسي منفوخ

اسماء: طبعا حبيبه مخيط شلون ماتحسي منفوخ..

شمه: فلتن بعملتهن وراحن

اسماء: منو الي يكدر يفلت من علاهن خلت كل وحده دمهه بطولهه

شمه: صدددك لوتشاقيه

اسماء لا ما اتشاقه اسمعي...

من وكعتي وانخبصنه بيج اجه وسام وعلاهن وامي ماخلت وسام يدخل جان شايل عمود حديد بيده

دكول رجال وياخذون علي فصل ..

بس علاهن هجمت عليهن اول ماقفلت الباب خاف ينهزمن

لزمتلج شروق ورونق كسرت العصا عليهن على ضهرهن...

وهي منا شلون متحلفه بامج هلست شعراتهه خلتهه جنهه دجاجه...

يولي اسماء من شفت علاهن تضرب بيد من حديد متت خوف...

ما كدرت يتقربن كلما يهد عليهه يصطدمن بحاجز كونكريت ..
كومت امج بالكاع وكسرت ايدهه يمكن ...

والكتله الاكبر جانت من نصيب سعيده ولج كعدت على سعاد وشكت حلكهه وطلعت ودمهه يجري منا ومنا...

عزااا صدك خفت عبالك فاندام وطب عليهن مدري هن جبانات وكدرتهن علينه...

شمه: حيل كون الله ياخذ حوبتي...

اسماء: لاتخافين لو تشوفين قيصر ورا ما نمتي شسوه لوما امي وكفت كدامه جان اخذ اسلاحه وركض عليهم

شمه: الله ينتقم منهم...بعدنه انفتح الباب عمه فضه وقيصر

فضه: صلوات على  محمد جنهه ورده شمامه شلون صرتي بنيتي

شمه: زينه بس دايخه

فضه: ما نخليج دايخه دكتورنه يمنه مو قيصر...

قيصر: هسه تروح هاي الدوخه لان جرحج جديد...

فضه: صيري زينه وشوفي شلون ناخذ حقج

شمه: ما اريد شي بس خلي يعوفوني بحالي وحته الذهب ما اريده دزي بيد وسام

قيصر: هاي المواقف تخلينه نعرف ناسنه زين والصديق من العدو....

واول عدو تسجل بقائمتج هي امج واخواتج المفروض هذا الشي يزيد من اصرارج وماتخليهن يشمتن بيج...

شمه: قيصر اني صار اشهر ماشايفتهن شنو هالحقد الي بكلوبهن

فضه : هاي بعد الله ابتلاج بام عديمه الرحمه..

شمه: الله كريم ... بعدنه كاعدين واجانه صوت اسماء تصيح على امهه كامت عمه فضه ضلينه بس اني وقيصر...

قيصر: تنامين شويه احسنلج...

شمه: هسه شويه وانام حته مااكعد نص الليل

قيصر: اذا احتاجيتي شي اتصلي بيه ..

شمه: شكرا تعبتك ويايه وتعبتكم كلكم وخليتكم بقلق..

قيصر: لا شكم شمه عدنه هي بس وحده ..

شمه: تسلم سولفلك العركه كلهه..

قيصر: لاتشغلين بالج نامي مرتاحه وما اسمى قيصر اذا ماخليت سلمان يبوس راسج ونفسهم الي هدن عليج اخليهم يتوسلن بيج.

مو سهله اشوف حالتج هيج ودموعج مغركه وجناتج ظلم...

بس الظاهر احنه ولد حسين مكتوب علينه نشوفجن غركانات بدمجن...

يله تصبحين على خير عندي امتحان لازم اقره نامي لاتظلين كاعده...

شمه: طلع قيصر واني افسر بكلامه من كال مكتوب علينه ولد حسين..

شيقصد مثل ضرغام يعني شاف حبيبته مظلومه ؟؟

ليش اني حبيبة قيصر؟؟  اووو ياشمه الضربه مأثره على دماغج كمتي اتحلمين احلام خياليه نامي واسكتي...

من اثر المهدء والابر بسرعه غفيت ماكعدت غير الساعه ب9...

فتحت عيوني اسماء ماكو غسلت ونزلت لكيت الكل كاعد الي يتريك والي بعده صبحت عليهم وكعدت بصف عمه فضه

من يتريكون يكعدون بالكاع ميز الطعام على كولت اسماء بس للمواعين والهوسه...

فضه: شلون صرتي يحلوه؟؟
شمه: زينه بس عندي الم قوي مال الخياط

فضه: يمه موهينه الضربه والخياطات هسه تريكي واخذي  مسكن

حسام: والله البارحه ماكدرت انام من سولفتولي شنو حيوانات هذني...

فضه: اشايف يايمه غير دوامك ماخلاك تعيش هنا وتشوف العجب

حسام: لا هذا استهتار نسوان محد يكدرلهن خلي يزين شواربه سلمان ...

كون عندي هذني الا اعلكن اسبوع شنو هالانحطاط هذا وين عايشين...

فضه: كولت علاهن دكول هاي القريه مابيهه زلم بس ولد حسين ...

حسام: قيصر مو تسكت عن حقهه اذا سكتت اني ما اسكت والله لو اعرف توصل للشرطه وما اخليهه تروح هيج

قيصر: الله كريم هسه خلي تصير زينه وماتصير عدهه اعراض..

فضه: اي يمه اكلي زين واشربي حليب انتي هم هامله نفسج وبهاي الفتره تأذيتي على الحجيه الله يرحمه

شمه: اي دا اكل والله ....
طول مايحجون واني الفرحه بداخلي من اشوفهم يدافعون عني

حسيت عندي عائله حقيقيه ويحبوني عمه فضه لا موعمه هاي امي واكثر من ام تروحلهه سناء فدوه ...

نبهني صوت قيصر وهو يحاجي اسماء

اسماء: سوي حليب لشمه ترى اخذتهه الصفنه

شمه: اني اكوم اسوي اكعدي اسماء
اسماء: لا اكعدي اطلبيني ذاك اليوم من صخنت كعدت يمي واشتغلتي بمكاني هسه اجه دوري...

شمه: ابتسمت على كيف لان احس وجهي متشنج وما اكدر اضحك...

جان كاعد قيصر وبصفه امه ومن الجهه الثانيه اسماء  من كامت اسماء كمت وياهه ساعدتهه لان وسام بعده ممتريك ...

من ردت اكعد اسماء بسرعه كمزت وكعدت بمكاني واني ضليت واكفه اريدهه تلتفت عليه ماكو سوت نفسهه تصب جاي...

فضه: ليش واكفه يمه اكعدي هذا المكان يم قيصر فارغ

شمه: سكتت شحجي هو اني منا دايخه وانوب اشم عطر ابنج...

كعدت بصفه وبدينه اني ووسام نتريك وهو يشرب جاي...

فضه: قيصر هذا ثالث استكان شجاك على الجاي...

قيصر: لان ادخن اشرب هوايه
فضه: طبيب وتعرف مضار التدخين وجكارتك ماتوكع من ايدك ليش يبعد كلبي ماتريد صحتك

قيصر: تعويد ما اكدر اعوفهه وما ادخن هوايه باليوم باكيت...

فضه : هاي مو هوايه عود هسه تلكه رئاتك سود

قيصر: ما عليهن شي محد مات قبل يومه كلمن وحد يومه بعد الجكاير شعليهه...

فضه: نكدر نحاجيك كولت علاهن منو يكدرله

قيصر: ذكرتيني بعلاهن منو رايح كايلهه على العركه

فضه: شكو غير الشرقيه الي عدنه

وسام: اني رحت كلتلهه خليتهه ماتعرف تلبس نعالهه

قيصر: وانت شمدريك

وسام : اني اجييت من الطوبه وشفتهن راح يوصلن البيت رحت على علاهن بس كلتلهه سناء يمنه اجت تركض

قيصر: اول مره علاهن تريح كلبي

فضه: اي خطيه عمتي كلبهه فرفح على شمه حته من وكعت تخبلت كامت تطبك كل اثنين سوه

صدك مدامكم كاعدين يمه حسام  وين تزوج بالمطبخ حته غرفه ماعندك

حسام: اخذ غرفه ضرغام

ضرغام: الله عليك كوم منا كولت يعقوب هذا بيت احزاني. .

حسام: يول وين اتزوج بالحديقه عجل غير تنطوني غرفه ...

ضرغام: ماتعيش ببغداد شكو جاي لهنا بس القال والقيل..

حسام: صار 5 سنين بعيد حته امي ماشبعت منهه شوف راح انقل دوامي لهنا واستقر ...

صح بغداد حلوه بس ماكو احلى من بيتك وكاعك حته اصدقائي هنا عفتهك من ورا الدوام

قيصر: هو البيت مايكفينه وبناءه قديم راح ابني من جديد وكل واحد غرفته بس حاير وين ننتقل علما يكمل البناء

فضه: اخذنه يم بيت خالك وخلال شهر شهرين يكمل اذا يوميه

قيصر: صعبه ماارتاح بغير بيت هنا نبني شوي شوي  ..
وسام: ياريت تاخذونه يم خالي ابو عبير

قيصر: كوم منا ولك شعندك ويه خالك ابو عبير

وسام: اموت علي لان خالي اخو امي
فضه: ياملعون اعرف سوالفك كوم ابو البنات ولك ادري شنو من ولد انته

وسام: من حبوا ولدج وكفتي وكمتي تهلهين وتصيحين يوم المبارك ومن حب وسام صار هتلي وطايح حظه

فضه: ولك ماتستحي واكف كدامي وتصيح احب مايوم اخوتك حجوا هيج كدامي...

هذا حسام من راد يخطب كال يمه وحده عجبتني حته ماكال حبيتهه....

وسام: ترى لامسوي علاقه ولاشي حته البنيه ماتدري  ....

قيصر: ادرس واخذ شهاده واخطبهه خالك ما ينطي بنته لواحد حافي مثلك..

وسام: خلي اكوم احسنلي راح اطلعوني من الكلجيه الي يدورن سوالف مكسره...

قيصر: كومي شمه خلي اشوف جرحج وانت سد حلكك من صباحيات الله....

شمه: كمت ورا للغرفه كعدت على الجربايه وهو واكف نفس البارحه...

فتح الشاش وعقمه كام يحركني رجع ضمده وشده جانت خصله من شعري كلساع توكع لان شعري ناعم...

واني بين اديه بس مسيطره على نفسي لان الالم الي عندي قوي مشتت فكري...

حسيت على لمسه ايده وهو يخلي خصله الشعر ورا اذني...

بسرعه قشعر جسمي وبين عليه من كزبرت واهتزيت......

بس سوه هيج وطلع دحكت على نفسي واني افرك بأيدي ...

هذا قيصر راح يخبلني بتصرفاته كولشي يدل على حبه وهو معجب بيه...

بس من ارجع للحقيقه شمنتظر ليش مايحجي...

مر يومين ضبط والولد ماداوموا كلهم اخذوا اجازه لان بدينه نعزل بالبيت لان عدنه عمال وبنيان ....

انحبسنه كلنه بلاستقبال والمطبخ وبقيه الغرف كلهم يبنون بيهن واكو منهم هدموهن للكاع ....

صحتي تحسنت ويوميه اسماء تفحص الجرح قيصر ما اشوفه دائما من يصير موقف يكوم يتهرب....

جانت الساعه ب11 الصبح واحنخ نعزل بالغرف الفوك وانشيل الغراض وانزل بيهه برا ...

سمعنه صوت سيارات الشرطه وهوسه ما اهتمينه كملنه تعزيل...

جان ضرغام واكف بالباب ويدخن صاحته امه

فضه: ضرغام شكو عليمن هاي الشرطه

ضرغام: على سلمان يمه

فضه: عزات شمسوي هالمره

ضرغام: ابنج قيصر رفع علي دعوه حته يشيلوا من الكاع ...

وهذاك سلمان جنه جلب يهمش كدام الناس شلون راح تشوف ايام الذل على ايدنه

فضه: ضرغام شتحجي وين اخوك ولكم يمه اروحلكم فدوه عوفي غمان مو شلعتوا كلبي

ضرغام: خلي يضوك الذل وفشلته كدام الناس وشلون راح يكبون علي اخوته وهم يشوفون سلمان باع حصصهم كلهه...

شمه: من سمعت كلام ضرغام ركضت على تليفوني دكيت على قيصر...

قيصر: هاشمه
شمه: وين انت
قيصر: بالسوك هسه اجي ليش شكو

شمه: الشرطه اجت على خالي صدك انت اشتكيت علي

قيصر: هسه ارجع وافهمج واي واحد يجي لا تفتحوله الباب

شمه: ماشي

سديته من عنده واني الوب بمكاني وين راح يشيل سلمان وخاف تصير مشاكل الهه اول مالهه تالي...

شويه واجه قيصر ركضت تلكيته اخذت من العلاليك واني اسأل بي

شمه: قيصر فهمني شكو
قيصر: شكو كاعي اريدهه اريد ابيعهه على الدوله يبنون بيهه مدرسه
واكثر من مره انطيته انذار ومافاد بي

شمه: واني قيصر خاف بالعناد وياخذني منا

قيصر: وين ياخذج انتي هنا ما اطلعين من هذا البيت ترى احنه عمامج موهو لاتفكرين وتشغلين بالج

شمه: ماشي بس ديربالك من سلمان ترى غدار

قيصر: تخافين عليه؟؟

شمه: لاااا بس

قيصر: راح تتخربطين ومابيه حيل احير بيج يله طبي جوه...

شمه: فشلني عزاا بس ياربي شنو من شخصيه حته من يحجي برزانه وهدوء شلون ما احبه...

التهينه بالعمال لحدالليل يرحون ونرجع نظف من جديد ومن انام ما ندري بنفسنه انام كلنه سوه بلاستقبال بس مرات اني واسماء وعمه انام بالمطبخ

دكول هم ولد خلي ياخذون راحتهم

بليل كاعدين كلنه بلمطبخ وحته التلفزيون خلينا على ميز الطعام وعمه قوريهه بصفهه كل شويه تصب جاي لضرغام وقيصر لان يدخنون...

جان طالع عالم الحيوان كاعدين نتابعه كلساع اسرق نظره على قيصر مرات تجي عيني بعينه ومرات منتبه على التلفزيون...

اندك الباب دكه قويه وصوت زلم قيصر عبالك ينتظر احد كال لوسام طببهم للاستقبال ...

كلهم طلعوا الولد واحنه كاعدين نراقب شكو الي عرفنا هذا سلمان وخوالي وجايب زلم وشيوخ على قيصر...

مانسمع شيحجون بس شويه واجه وسام اخذ الجاي وكال قيصر يكول خلي تلبس وتجي ...

شمه: شتريدون مني

وسام: راح نرجعج لخالج شنسوي موبيدنه

شمه: شتحجي انت شمسويه اني

وسام: شمدريني ما دكولين لنفسج يله على كولت علاهن تهيري يبنت...

شمه: دحكت على عمه واسماء وعيوني تتوسل هذا الجنت خايفه منه يرجعوني للضيم وشلون راح ينتقم مني سلمان...

لبست وتحضرت واني دموعي تجري  كل الي احط ايدي علي يخذلني...

اجه قيصر شافني واكفه ودموعي على خدي وامه واخته يهدن بيه

قيصر: ليش تبجين وين ما اخذج للاعدام

شمه: اني شمسويه وترجعني

قيصر: وين ارجعج يولي

شمه:  وسام كال راح ترجعين ويه خالج قيصر يكول....

قيصر: شلون ارجعج شو تعالي ويايه...
شمه: طلعت من الباب مال المطبخ يم الباب وكف ولزم ايدي...

قيصر: لاتبجين كدام احد سلمان جاي يعتذر منج ابد لاتنطي مجال واذا كالج شنو طلبج كليله اريد كاعي شيل منهه ..

شمه: تعال وياي خاف ارتبك

قيصر: ماكو احد بس خوالج ولد عمه الغربه طلعوا ينتظرون برا..

شمه: طبيت سلمت وكعدت بصف ضرغام وحسام...

سلمان: شلونج خالي ان شاء الله مرتاحه

شمه: الحمدلله بنص الخير

سلمان : يابنتي حقج عليه ما اعرف بالصار كسرت رجليهن تكسر شلون يمسجن يالغاليه...

شمه: شتريد هسه

سلمان: بويه اني ربيتج وتعبت يهون عليج تسحلني الشرطه وادولب بالمراكز وهسه انطوني مهله اسبوع اذا ما اشيل ياخذوني اني واخوتي...

شمه: الكاع ما اتنازل عنهه واني بدلت حصتي ويه قيصر تريد شيل احسن ما تاخذك الشرطه....

سلمان: يابويه صدك تحجين ضاع الربى يابويه قيصر احجيلك كلمه ليش ساكت...

قيصر: انت ما اكلت من الماعون الي كدامك شمه ماترضى تتنازل عن حصتهه واني ما اكدر اجبرهه...

سلمان: وهاي اخوتي وين تروح واخواتي يريدون حصتهم دخيلكم ساعدوني كلهه حاده اسنونهه عليه

قيصر: بحاله وحده اساعدك بس عندي شرط تنفذه يله اتنازل عن الدعوه واخلي شمه هم تتنازل.

سلمان: كول واني اي طلب انفذه وكدام اهلي وعمومتي انطيك كلمه....

قيصر: اخليك كاعد ابيتك بس تنطينه بنتك.....

#يتبببببع