رواية وحوش بشريه الفصل الثاني والعشرون 22 - بقلم Rozaya1122

#البارت الثالث والعشرون
#وحوش بشريه
#روزايه

(شهد دكول)

كولوله كصيت الشعر
ذاك العشگني لخاطره
كلوله كلشي خلص ماي وتبده بصحره
لٱ لمته جفوف البدو  ولا للفلح سد ثغره

كلولـه مر الوكت ،
وانـه اعله جرحي اتلوه
الجربته بالشده وفشل ..
لا يوصل بوكت الضحك
ويصير صاحب نخوه 

كلوله  كلبي وفي وماخونه
كلوله مشتاگ اشوف عيونه

 كلوله مـا خانت ولك
خان الدﮪـر بـٲحوالـﮫـا

گلولـه لو صار العصر
چم حزن يآكل بالـﮫـا

گلولـه مـا تدري الصدگ ؟
تمسح دمعـﮫـه بـ شالـﮫـه
...

عمه فضه وكعت بالكاع من سمعت حجي سلمان وتهديده ...

مانكدر نصيح قيصر لان برا هوسه سحبناهه اني واسماء خلتهه بحضنهه ذبينه عليهه مي ...

انتبهت شويه واول مافتحت عينهه صاحت يمه وليدي ضرغام ضاع مني ...

تدفع بينه واحنه لازميهه كوه كعدناهه كنالهه قيصر مايقبل اطلعين وهوسه برا...

وكفت ادحك من الشباك واشوف قيصر لازم واحد من ولد عمام سلمان ويدك بي بوكسيات ...

يارب استر الشغله حاميه كاعدين انلوب بمكانه وعمه فضه وجهه اصفر وضغطهه ارتفع ...

اجانه صوت الطلقات عبالك صارت جبهه من كل صوب نسمع صوت ...

حته ابتعدنه عن الشبابيك لاتوكع بينه وحده  شكم طلقه وكعن بالطارمه والي بسياره قيصر...

اجت عيني على سلمان مصوب السلاح على بيت عمي ويرمي خرط وعبالك كدامه موبشر ولاكال خاف اكتل واحد برئ

وصوت ضرب قريب طالع من بيته ومن البستان يارب دخيلك استرهم بسترك واحفظ ولد عمي من كل مكروه ورد كيد سلمان في نحره....

دفع الباب قيصر وهو يركض هو ووسام وامه لزمت وسام تريد تفتهم شكو بس ماحجوا شي بس يدفعون بيه ....

نزل قيصر وبيده السلاح دفعنه جوه للغرفه وكال ممنوع توصلن للمطبخ  ...

وانتي يمه فدوه لكلبج لا تتخربطين مابينه شي كلهه طكطات ناريه وتخلص سلمان جبان ومايخوف ...

هاي اللحظات جانت رعب برعب كل حيل ماعدنه مدري نهدي بعمه فضه مدري نهدي نفسنه ....

كام صوت الطلقات بي ومايزداد واحنه كاعدين بالكاع نرجف....

الظاهر هذا مو بس سلمان مبينين اهل الولد الي ماتوا لان نسمعهم يصيحون نريد دم ولدنه...

ياربي دخيلك وين عايشين ماتاخذ سلمان وتخلص العالم من شره ....

هالانسان الظالم آكل الحرام يوم عن يوم يطلع مكره وحقده جنت طفله اشوفه احسن انسان ويخاف الله ...

بس طلع سلمان يستر بالدين كدام الناس يحلفون براسه وهو ويه اهله رجال عديم الغيره والناموس...

تقربت على الشباك الي مطل على بستان سلمان فتحت البرده شويه اريد اشوف شكو ...

شفت كومه زلم شايله اسلاح وكلهه ناويه الشر على بيت عمي وكل خمسه سته متجمعين سوه ويحجون ....

عمه فضه كاعده ادك وتنوح وتصيح ولدي وحدهم هسه يكتلوهم حسين وينك تعال شوف ولدك بنص الظلام ....

ضلينه ندحك من الشباك وساعه نسمع صوت طلقات وساعه يسكتون ويصير صوت وعركه....

بعدنه على هذا الوضع اجو عمي حسن ومحسن يركضون ووياهم رجل عمتي وهم مسلحين...

هاهي علكت دزتهم علاهن حته تخلي الناس تتكاتل  هسه علاهن تركص جوبي على هاي المصيبه...

شفت قيصر هد على عمي حسن ودفعه ورجعه ماقبل يدخل لان يعرفهم شنو من مله تعبانه ...

خالي سلمان مثل المخبل يروح منا ويرجع منا ويدك على راسه وعبالك انكتلوا وولده مو فلاحين زنوا ببنته ....

قبح الله وجهك يامجرم ياحيوان ادافع عن الغريب الي هتك عرضك وما اخذت حق بنتك اليتيمه....

لحظات دقايق ما اعرف شسميهه واحنه على هذا الحال والخوف ماخذنه

قيصر مبين علي مسيطر ويحجي بكل ثقه حته سلمان تراجع هو وزلمه وضل يحجي ويصيح بس ابستانه مو بكاع عمي

شويه واشوف خالي سلمان ركض على بيت رافد وهو بيده السلاح ...

يمه اكيد راح يكتل شهد عمه سلمان راح يكتلهه ومحد يكدر يدخل....

فضه: يارب دخيلك يامنجي يونس من بطن الحوت نجي هاي اليتيمه وولدي من كيد هذا الفاجر

يارب بحق لا اله الا الله استر على ولدي وعلى احبابهم دخيلك يارب

سلمان صار بعيد ما اكدر اميز لان اكو كدام بيت رافد شجرات حجبت الرؤيه عندي ...

سمعنه صوت طلقه طلعت وبعدهه صار صوت صياح مال نسوان ووراهه عم الهدوء ....

كعدت بالكاع ملخت نفسي هاهي كتلهه سلمان الحيوان ....

كمت اضرب على وجهي بدون وعي وفضه وياي واسماء مدري تلزم امهه مدري تلزمني...

عمه فضه املخه نفسهه على ضرغام واني على شهد ...

بحدود النص الساعه واحنه على نفس الكعده والبجيه سمعنه الباب انفتح شفنه الولد كلهم دخلو...

ركضنه عليهم وامهم تتفقد واحد واحد بيهم خاف متأذي...

اني جنت واكفه بالزوايه وابجي خاف ماتت شهد...

انتبه عليه ضرغام اجه يمشي باتجاهي وسألني شبيج خلصتي عمرج تنوحين؟؟

شمه: ضرغام خالي سلمان شفته راح لبيت رافد كتل شهد مو؟؟

ضرغام: بومه ابيش طالبتهه مابيهه شي
يخسه سلمان يكتلهه هاي الطلقه اجت بي هو....

شمه: سلمان مات؟؟؟

ضرغام: العار مايموت بس تصوب ..

فضه: ولكم فهموني شسويتوا ولد حسين ؟؟

قيصر: على كيفج يمه شجاج كالبه الدنيا جهال احنه وكاعده تنوحين علينه....

سلمان اخر شخص ينخاف منه واحد يحسبله حساب ....

فضه: اجه هاد علينه ويصيح اسويهه دم وضرغام ماكو وتريد يضل بيه حيل...

قيصر: خلي يولي جبان يهدد بس كدام الناس عود شوفوني ترى اني شيخ والكل تهابني وهو مثل الفاره وراهم يكعد يتوسل ...

فضه: وانت ضرغامي شلون تكتلهم عدهه اخو وياخذ حقهه...

ضرغام: تريدني كاعد يمج وساكت وهي حال الضيم حالهه ...

والله لو مخافه الله الا حركت عوائلهم كدامهم وخليهم يحسون بلوعه كلبي ...

هنا جمر ومشتعل مايهدء الا اخذ ثارهه بيدي مالي علاقه لا باخوهه ولا ابوهه ...

كتلت هذوله بعد براء مدري ابتلاء والله لو اخر يوم بعمري الا اخليهه معوقه ...

فضه: تخبلت انت ولك ماتفكر بمستقبلك يروح من عندك؟؟ احجيلك كلمه قيصر شبيك ساكت

قيصر: شحجي يمه لو اني بمكانه اسوي اكثر يجوز حته البستان احركه...

فضه: عفيه خوش نصيحه حته تخبله بالزايد

ضرغام: شنو السالفه مخبل اني يمه الايده بالمي مو مثل الي بنار...

النار الي بصدري ما اعتقد تهدء بيوم واني اشوف هالظلم وهيج شرفهم رخيص

فضه: الله يبرد كلبك ياوليدي تعال سولفلي شلون ووين لكيتهم؟؟

خابرني رافد الصبح كال شهد حاجيه لشمه منو مسوي هيج وعرفتهم طلعوا من الفلاحيين وانطاني اسمائهم....

كال العصر امر عليك ونروح اني وياك نلزمهم لان هم العصر يرحون للمزرعه يباتون هناك

هسه راح اخذ شهد عدهه مراجعه ومن ارجع اخابرك...

سديته من عنده واني اريد انفجر اتمنى الكاع تنطوي كدامي واوصل يمهم وامثل بيهم واحد واحد..

طلعت قبل رافد ادور عليهم لكيتهم بالمزرعه 3 هم وواحد منهم سايق المكينه...

كاعدين يسولفون ويضحكون وكأنو ماصاير شي معقوله اكو هيج انسان بكلب حيوان بس حته الحيوان ارأف منهم...

وصلت يمهم كلتلهم رافد دزني يكول اكو زرع بالكاع الي يم الشط ويكول خلي يجيبوهن اليوم ما موجود هو...

بلاول استغربوا وماصدكوا ومبينين مجرمين محترفين دكيت على رافد وفهمته السالفه وحاجاهم من حاجاهم كالوا يله تعال ويانه....

رافد يم الدكتوره يكول لا اكدر اعوفه واجي وظل بالي خاف يكشفون اللعبه...

صعدت وياهم واني كوه لازم اعصابي واشوف هاي المكينه نفسهه الي شهدت على جريمتهم

صح هم شكوا ومثل الي خافوا لان وحدي وعيوني فضحتني بس عادي جمعنه الزرع ورجعنه ....

2 كلتلهم ظلوا يعدلون الزرع الي هنا واني ابو المكينه نرجع نجيب الباقي ...

من شافوني هيج جدي طمئنوا وسكتوا ضلوا يوزعون بالزرع واني ابو المكينه رجعنه

بس وصلنه خليت المسدس براسه بس الظاهر عنده سوابق قبل دفعني وانهزم

صوبته برجله وكع بالكاع بعد ما ضربته هواي يله اعترف بكولشي..

كال براء وامهه سعاد انطونه فلوس وكالن سوو بيهه هيج وكتلوهه لا تبقوهه عدله....

بس ماكدرنه نكتلهه وعفناهه بالخرابه ماخليته يكمل من النار الي بكلبي 5 طلقات ضربته خليت جسمه منخل....

وسجلت صوته وسويتله تصوير خاف يداعي سلمان بدمهم ويسويهم براسي زلم معدله...

وركضت وراهم مالحكت غير بس على واحد الي يسوق المكينه ...

لزمته صوبته برجله يله اعترف بكولشي وكال براء وامهه سعاد انطونه فلوس وكالن سوو بيهه هيج وكتلوهه ....

بس ماكدرنه نكتلهه وعفناهه بالخرابه ماخليته يكمل من النار الي بكلبي 5 طلقات ضربته خليت جسمه منخل....

وسجل صوته وسويتله تصوير خاف يداعي سلمان بدمهم...

فضه: لعد سلمان اجه هاد يكول كاتل 3 وحارك المكينه والمزرعه...

ضرغام: اي من رديت تلكوني ال2 وهم يمشون ولاعبالك مسوين جريمه وعود مخلصين شغلهم وهم بدون سلاح وكتلتهم ...

وراهه حركت المزرعه والمكينه وشافني واحد من الفلاحين اكيد هو وصل خبر لسلمان وهد عليكم ..

لو حارك سلمان هو بنفسه مايبرد كلبي بهذيج الساعه ما اشوف شي لو ما ملحك عليه رافد جان حته بيت سلمان حركته...

فضه: وهسه سلمان يجركم للكعده وهذوله اهلهم مايسكتون وراح تضيع مني...

قيصر: على كيفج يمه شجاج موتي نفسج من العصر لسه....

رافد هو شال السالفه وكال اني كتلتهم لان محد شاف ضرغام غير بس واحد من الفلاحيين

ورافد مسكته وهو تحمل السالفه كلهه وحته هو  رافد صوب ابو برجله

فضه: يايمه عزاااا ليش ؟؟

قيصر: سلمان يستاهل الموت يدافع عن كاعه وعن رجاله ومادافع عن عرضه  طلع عن طوره هواي وعبالك الي بالبيت مو من دمه ولحمه

ولان ضرغام شوفه الاعتراف مال الفلاح راح هد على المسكينه ويريد يكتلهه ابدال مايرجع على مرته وبنته  ...

ورافد من شاف ابو هيج دنيء وظالم عاف حق بنته وركض ورا الكاع والزرع ويريد ياخذ حق الزنوا بعرضه ما اتحمل ابو وصوبه برجله ...

باجر تلكي هنا جنه خنزير يفتر بالبستان وعكاله وعباته ولاكأنما صاير شي ويضل كدام الناس رجال محترم وهنا يطلع وجهه الثاني...

فضه: يمه خاف يعاديكم هذا شراني وعنده الدم سهل....

قيصر: والله رجال وابن رجال الي يوصل عتبه الباب مالتي دخل الله يورطه ويهد بعد ...

لو ماخفت على ضرغام وتصير المصيبه اثنين الا كومت سلمان بمكانه هالعار هذا...

ضرغام: يمه اني اريد اخطب شهد كافي عايشه برعب من ورا حيوان

ليلي ما انامه والله واني اخاف يسويلهه شي ابوهه لو مرته

فضه: كل عقلك ينطيهه غمان بعد هاي السوايه والله يرادلهه بخت ...

قيصر: ينطيهه وغصبا عنه واذا ما انطاهه ناخذهه كوه عن شاربه

بس البنيه حاليا بوضع ما يساعدهه على الزواج حتى الدكتوره منعت هذا الشي ...

واني قبل شكم يوم كلت لرافد احنه رايديهه لضرغام من قبل الحادثه وكال هاهي بس تصير زينه تعالوا.... 

هسه هي حته ماتحجي وتخاف من خيالهه وخاصه بهاي الحاله ادكوم تكره جنس بني ادم...

انطيهه مجال تشفى ونخطبهه حسب الاصول ومدام اخذت كلمه من رافد اطمئن

فضه: ااوف منكم راح تموتوني وينك حسين تعال شوف ولدك مايتعاركون الا بالسلاح...

كومي اسماء جيبي لاخوتج شي ياكلوا وانتي شمه بنيتي الله يرضى عنج جيبيلي حبايه مال راس الصداع موتني...

شمه: رحت جبت حبايه وكلاص مي جانت عمه كاعده بالكاع انطيتهه الحبايه وكعت من ايدي...

دنكت ادور عليهه ماحسيت على صوت قيصر قريب عليه هو دنك يدور وكال..

كومي اني ادورهه ولا ادنكين بعد ...

يمه هو كال هيج وواني مدري شصار بيه بسرعه رحت للمطبخ ...

صوته يرن باذاني وشلون حجه بهمس ...
غمه شمه ثوله اياج اياج تفكرين بقيصر مره ثانيه ...

انتبهت عليه اسماء احجي ويه نفسي لكفت اسم اخوهه...

اسماء: ردت حليمه لعادتهه القديمه شبيج خربانه من كاعج...

شمه: مابيه شي بس تعبانه

اسماء: تعبانه من حب قيصر العرب موووو؟؟

شمه: سدي حلكج ولج شجاب اخوج بالنص

اسماء: يا حبيبه ائلبي مو اله تحجين اني شاطره بقراءه العيون وهاي عيونج من يوم يومهن ينادن قيصر...

ترى مو عبالج انتي حبيتي رافد لا انتي ردتي تنسين قيصر برافد وتعيشين حياتج وبمرور الايام بلكي تحبي ...

بس للأسف قيصر مستحوذ عليج من صغرج...

عقلج يرفض قيصر رفض تام وكلبج ينادي باسمه ...

لذلك دا تصنعين القوه ومخليه عقلج المسيطر ولو شويه زله او نظره من قيصر راح يوكع كلبج وعقلج اسره مره ثانيه

شمه اني ربيت وياج من الطفوله واعرف كولشي عنج ...

استمري بهذا التمثيل لحدما توكعين لاتمثلين على كلبج بان نسيتي قيصر وصرتي سباعيه

اتحداج اذا ماكلما تشوفي كلبج يزداد نبضه وعقلج يرفض قيصر ومايريد توكعين بنفس الغلط...

شمه: هسه صبي عشا واسكتي لا تلغين موصرتي صيدلانيه وكمتي تقرين عيون واحلوك...

اسماء: كلام الحق يزعل ويغث وانتي انفعلتي لان ماتريدين تعترفين بالحقيقه...

ترى اخويه مو غشيم يعرف يقراج ويجوز انتبه عليج اكثر من مره

شمه: شبيج اسماء ترى حته ما اباوع بوجهه ولا حاجيه ويا وقريبه علي ...

اسماء: هو تجنبج هذا وتصرفج المو طبيعي ويا يخلي ينتبه ويراقبج...

فضه: ولج اسماء راح اجي اخلي راسج بالطباخ وين رحتي اخوتج كتلهم الجوع...

اسماء: يمه اني شعليه هاي شمه بس تسولف وماتخليني اصب

شمه: لا عمه والله هي تسولف

فضه: الله بلاني بيجن شوكت تزوجن واخلص من مناكرجن...

شمه: صبينه العشا وكعدنه كلنه سوه ضرغام ماياكل بعده نفس حالته عافنه وكام

رغم الي سوا واخذ حقهه بس بعده كلبه مابرد..

طول ماكاعدين نتعشه واني افكر بكلام اسماء صحيح الي كالتله بس مستحيل اسمح لكلبي يسيطر...

قيصر ماياكل هواي شويه وكام احسن احس نفسي متوتره....

ما اريد ارجع لنفس المأساه هيج مرتاحه اكو حب بداخلي بس حاكمه علي بعقلي وما اريد اضعف وانطي سيطره لكلبي وارجع من جده وجديد...

خلصت العطله ورجعنه للدوام ضرغام ما انشوفه ابد ليل نهار بغرفته ووضعه للاسوء حته ضعفان حيل واللحيه عاليه...

هدء الوضع وسلمان سد حلكه وسكت لان رافد تحمل السالفه كلهه واهل الي كتلهم ضرغام  اخذوا فصل من خالي يعني سلمان طلع خساره  ...

رجعوا الولد لدوامهم وقيصر كالعاده كل خميس ينزل ومرات كل 3 ايام حسب دوامه..

بس هو مسوي فضل عليه اشوفه بالصدفه حته من يجي مايكعد ويانه لان بس يقره ليل نهار شعنده طاقه....

شهد ما اعرف شي عنهه لان قيصر حابسني بالبيت وممنوعه الطلعه ولويه الاذن جابت نتيجه..

بيوم منهن صادف خميس وكاعدين العصر نسوي طرشي احمر ويه عمه نساعدهه بتكشير الشلغم...

سمعنه صوت هلاهل وطلقات وسيارات مال زفه من بستان سلمان ....

محد جان بالبيت كلهم برا بس احنه النسوان وصوت الهلاهل بي ومايزداد....

دحكت من الباب اشوف سياره زفه ونسوان وجهال متجمعين بباب سلمان ...

اجتي اسماء ويايه وتقربنه اكثر بس عبرنه عليهم طلعت العروس والعريس ماكدرنه نشوفه زين....

بس هو جبير مبين لان لابس عباه وعكال ضلينه وحده ادحك لثانيه معقوله هاي براء؟؟؟

شو ماسمعنه شنو معقوله فجأه حته مشيه ماشفنه وكولشي سكته....

طلعت السيارات واحنه مصدومين الزفه هوسه وكلهه جهال ونسوان كاعدات يصفكن بالسياره وحلوكهن حمر ...

والجهال من العصير والشربت حلوكهم مصبوغه مبينين عرب حيل احتمال هاي من الارياف الي جوه ...

اشكال النسوان الي يصفكن يضحكن عبالك مهرجات وبس لسنتهن طالعه عود يهلهلن ....

رجعنه انريد نسولف لعمه واحنه بعدنه ماعرفنه العروس منو؟؟

بالي على شهد معقوله زوجهه سلمان لا مايقبل رافد مايخلي وهو انطه كلمه لقيصر مستحيل ....

تلكتنه بنيه من غير صوب جايه للعرس لزمتهه سألتهه منو العروس؟؟؟

الطفله: شهد بنت الشيخ سلمان طالعه تخبل بس هي بس تبجي...

من سمعنه هيج اني واسماء حسيت نفسي بدوامه وافتر بيهه

ياحظج ياشهد زوجج غصب سلمان نزلت دموعي واني اتخيل منظرهه وهي راحت لغير حبيبهه....

اسماء: العريس منو وشكبره؟

الطفله: جبير من غير قريه متزوج 2 وشهد الثالثه

رجعنه اني واسماء ودموعنه تنزل على حال اليتيمه المظلومه لوعدهه ام ما صار بيهه هيج

لو ابجي على ضرغام وهو راح يشوف زفتهه طلعت وراح تضل حلم عمره الضاع ..

بعدنه نسولف بالطرمه وجان ينفتح الباب ضرغام يركض ولزمه قيصر حته وكع بالكاع ....

ركضت عمه فضه علي ويريدون يسكتوا وهو يصيح عوفوني راحت مني للابد ولكم ارحموني...

من سمعته كال هيج كعدت بالكاع وادحك على هذا الانسان الي كدامي الي يوميه صدمه كبرته 20 سنه

اخوته التموا علي ماخلوا يكوم يريد يروح على سلمان ...

قيصر وامه كوه سكتوا بس بعديش بعد ما راحت شمعه حياتي....

الله يساعد كلبك ياضرغام موحب طلع عليك نقمه يوميه صدمه جديده

شيتحمل كلبك بعد وانت الي شلتهه وركضت بيهه للمستشفى راسهه مفتوح

وانت الي سترتهه بقميصك ولكيتهه غركانه بدمهه....   

وهسه شفت زفتهه بعينك  والهلاهل تذبح بيك وترن بمسامعك...

شيحمل كلبك بعد وانت عينك عليهه من هي طفله اتذكر شلون يكرص بخدودهه وهي زغيره ...

ويبوسهه من غمازتهه وهي دكوم تبجي تضوج من خدودهه ...

شهد الضحكه ماتفارق شفايفهه دكول اعيش مسالمه احسلي هي شبيهه الدنيا ....

كام ضرغام من يمهم وكالهم ما اسوي شي بس عوفوني وحدي...

فات من يمي بخطوات يائسه شفت دمعته على خده وشعره المهوس ....

تناثر حطام رجل نتيجه عادات وتقاليد باليه واب ظالم واخت مريضه ومرت اب حقوده...

انذبح حلم ضرغام وحلم شهد بحبل جان عكال ابوهه وظلمه وجبروته....

انتبهت على قيصر لازم التليفون ويرزل برافد ويتوعدله....

ما فهمت شي بس سمعت قيصر يكوله اذا انت رجال تعال وشوف شلون ادفنك هنا....

#يتبببببع

هوايه يكولون القصه حزينه حبايب هذا واقع حالنه والقصه حقيقه ما اكدر اغير احداثهه احنه مجرد نقره ومانتحمل شحال ابطال القصه ....
دعواتكم الهم...

الفيديو يمثل حالهم....