رواية وحوش بشريه الفصل الحادي والعشرون 21 - بقلم Rozaya1122

#البارت الثاني والعشرون
#وحوش بشريه
#روزايه

اي #مشتاقلك
توجعني واحجيهه
وبس توصل لهاتي واختنك بيهه
والزمها واخاف الوادم يسمعون
اسد شفتي وتصير #بعيني وابجيهه....

نزلت ووكفت على اخر درجه واني اشوف انهيار ضرغام ...

مثل الشمعه من تبدي تتلاشى ويختفي ضواها...

جان كاعد بالكاع على ركبته وعمه فضه كاعده كدامه ومخليه راسه على صدرهه وتبجي ويا...

رجال بمعنى الكلمه اسد ضرغام هذا الانسان الي مملي طاقه وامل ابد ماشفته منهار بيوم ...

وحتى لو ينهار ويبين علي الحزن بس يضل جبل صامد ....

شكد جان من يحجي وياي احسده على هاي الطاقه الايجابيه الي عنده ....

بس هسه اشوف انسان محطم يبجي بكل حرقه نابعه من كلبه ونسه نفسه واحنه نباوعله ....

وهو جان اذا كالوله حلو يتخبل ويتعارك يكول اني رجال والرجال مايكولون علي حلو الجمال للمره بس...

فضه: اذكر الله ياوليدي ربك ماينساك ولا راح ينساهه كوم ياحبيب امك ماتلوكلك هاي الكعده

انت ضرغامي اسدي ابو بيتي لا ادنك راسك دوم راسك يضل مرفوع ...

كوم ياحبيب امك دموعك جمر وتنزل على كلبي تقبلهه اتأذى ...

كعدت على الدرجه وابجي بصوت مخنوك اريد اعرف شهد عدله لو ميته بس ماعندي السان يسأل ....

شافتني اسماء اجت كومتني واخذتني للغرفه مثل الرجل الالي المسير...

وين ما تمشي امشي وراهه كالت اكعدي هنا كعدت...

ما احس بنفسي بس السؤال الي بالي شهد شلونهه؟

اسماء: حرام عليكم هيج سويتوا بنفسكم انتي وضرغام ابجي عليج لو على اخويه لو على اليتيمه...

شمه: ماتت موووو؟؟؟

اسماء: الله لايكولهه شهد عايشه بس للاسف راح تعيش بس جسد كل روح مابيهه....

شمه: شتقصدين ؟ واذا عايشه ليش ضرغام هيج حالته؟؟

اسماء: شمه شهد لاكيهه بمكان مهجور ومعتدين عليهه ...

شمه: اول ماحجت هيج اسماء جنت مو بوعي وبلأحرى اذاني رفضت تسمع وتصدك...

ضليت صافنه بوجه اسماء ومصدومه وهي تضرب على خدودي ...

هسه حسيت بكلمه معتدين عليهه صحت بصوت عالي وكعدت بالكاع ...

عبالك عندي عزا ابجي واملخ بنفسي احس نار وبدت تلهب بصدري ...

لا دكولون هيج شهد فقيره ليش هيج يصير بيهه هيج ...

يولي اسماء ضرغام واعدهه يتزوجون هاي السنه لا تحجون هيج ....

اسماء: سوده عليه يا اخويه يولي شمه فدوه اروحلج انتي قويه لا تسوين هيج بنفسج

ومن يشوفج ضرغام ينهار اكثر خلي نوكف بجانبه ولج هذا اخويه كلبي متكطع علي...

شمه: ضرغام عنده اخت وام واخوان يوكفون بجانبه وشهد منو الهه؟ منو يوكفلهه براء لو سعاد؟؟

ولج اسماء هسه يذبحهه سلمان الحقير كتلتهه براء بنته وراح يدفن شهد وهي عايشه بالحياه ....

اسماء: مدام ضرغام يحبهه والله مانعوفهه كلنه نصيرلهه اهل بس كومي شوفي حالتج...

شمه: كمت غسلت ونزلنه اني واسماء وصلنه يم باب غرفه عمه فضه...

وكفنه صوت ضرغام وهو يبجي ويحجي وامه تبجي وياااا...

ضرغام: يمه راح اموت حبيبتي الي يوم يوم اتمناهه تصير الي وبالحلال ومايوم فكرت بيهه بالحرام

ردتهه الي وام بيتي واعوضهه كل لحظه عاشتهه بألم.....

تالي اشوفهه غركانه بدمهه وعريانه وماكو شي يسترهه  ولج اااخ يمه...

وشعرهه الي شكد تمنيته وعيني علي من هي طفله وتكمز  كاصين ضفيرتهه ومخليهه بصفهه

اااااخ ياريتني ميت والله لوماخذ عمري ولاشفتهه بهذا الوضع ....

وانتي جاي دكليلي اهدء شهدء وهذا دمهه على ملابسي  ...

شلون اهدء واني ماكدرت انقذهه من سلمان الكلب وكالتلي انتظرك لا طول واني ماطلت بالسالفه هوايه

يمه راح اموت هنا هنا نار بصدري لواحرك سلمان والقريه كلهه ما ابرد ...

شلون راح تعيش وهي حالتهه هيج اني السبب ما خلصتهه من ظلم ابوهه ...

فضه: ياوليدي كولشي مكتوب ومقدر وهاي اليتيمه مسجل على كصتهه هذا اليوم راح تمون نفسك ...

انت ما الك ذنب ابد لوتدري هيج يصير جان اخذتهه فرك على خشم ابوهه

لا تاخذوهه بذنب هذوله الانجاس الجان ابوهه حرامي ومايخاف ربه وماعندهه اهل احنه اهلهه ..

موتت نفسك وانت رجال تعرف شنو رجال ماتنهار بسهوله حسين ماعلمكم تبجون مثل النسوان

علمكم تاخذوم حقكم وحق الغريب وماتسكتون عن الظلم ....

حبيبي لخاطري اذا تحبني كوم غسل واشرب هذا من ايدي واذكر ربك وادعيلهه دكوم من هاي المحنه...

شمه: اسمع بكلام ضرغام وعيوني ما اشوف بيهه من الدموع ...

اتخايل وضع شهد وهي بين ادين هذوله الحيوانات...

ياشهوده شكد بجيتي وصيحتي واستنجدتي وردتي واحد ينقذج ...

وابوج هنا يهدد اذا لكاج يغسل عارج ...

كعدنه على الدرج اني واسماء واثنينه نبجي سمعنه الباب انفتح ....

طلعت عمه فضه من غرفتهه وعيونهه وارمه من البجي على ابنهه....

دخل قيصر مبين التعب علي لان رايح وياهم للمستشفى ...

اول ماشافته امه ركضت حضنتنه وتبجي بحضنه
وهو يمسد على راسهه...

فضه: قيصر اخوك بامانتك راح يموت نفسه على البنيه ...

قيصر: عوفي لاتضغطين علي ترى الي بداخله مايكدر يعبر عنه لابدمعه ولابكلمه..

التفتت عليه... تعالي شمه اريد احجي وياج واسماء روحي حضريلي الحمام....

شمه: تقربت علي واني اشهك من البجي كعدنه اني ويا وعمه فضه واريد اوكف ادموعي ماتوكف...

قيصر: شمه اريدج قويه مثل ماعرفتج شهد مظلومه ومحد يكول مظلومه ...

ابوهه حاد اسنونه عليهه وحته اجه للمستشفى هاد بالسلاح ورافد طرده...

فضه: يمه حرام عليهم البنيه انخطفت واغتصبت ليش يحملوهه ذنب موذنبهه؟؟

قيصر: اسمعي السالفه يجوز لو واحد بمكان سلمان نفس التصرف ...

قبل يومين جايين ناس على شهد وسلمان رايد ينطيهم براء...

بس هذوله مصرين الا شهد لان عاجبتهم وسلمان منطيهم كلمه وكايلهم الكم...

شهد من سامعه كايله لابوهه اكتل نفسي وما اقبل ما اريد اتزوج ...

تعرفين سلمان رجال متخلف كل همه الحرام كايم كاتلهه شلون توكفين بوجهي..

ضاله السالفه يومين وعلى اساس باليوم الي انهزمت بي تصير الخطبه...

وشهد انهزمت من الصبح وهم يدورون عليهه مارادو السالفه تكبر بس علاهن سامعه ونشرتهه...

فضه: الله ينتقم منهه فضحت بنيه بنت بيت شدكول لربهه...

قيصر: على اساس من يدورون عليهه براء اختهه كايله لابوهه شهد انهزمت ويه حبيبهه عدهه حبيب من غير صوب ....

وسلمان العار صدك هاي الخبله واجه هاد عليهه يريد يكتلهه ...

فضه: وهسه شلونهه البنيه ؟؟

قيصر: والله يا امي حالتهه تقشعر البدن لوتشوفين اخوهه رافد...

الله يكون بعونه حته مايكدر يحجي بس واكف بجانب اخته...

البنيه مغتصبيهه اكثر من شخص واكثر من مره الدكتوره دكول حته ماكدرت افحصه لان تنزف...

وعدهه اضرار قويه بالرحم وغير اضرار حالتهه النفسيه...

فضه: طلعوهه لو بعدهه ووين راح يطلعوهه سلمان مايعوفهه لازم يكتلهه؟؟

قيصر: اني كلت لرافد طلعهه لبيتك واجيب شمه يمهه وانت عينك على البيت علما تتحسن حالتهه ...

ورافد يخابرون علي لازم يلتحق عدهم انذار وحاير شلون...

اقترحت علي بليل قبل مايلتحق نجيبهه يمنه بدون محد يدري وروح وتعال هي بأمانتنه ...

واذا سألك ابوك كول اخذتهه وياي  بس رافد حسهه صعبه يكول لا اذا طلعت السالفه فوك الحمل تعلاوه الناس تاكل وجوهنه ....

فضه: على بختك قيصر وهذا اخوك الي راح يموت وانوبه يشوفهه كدامه شيصير بي؟؟

قيصر: يمه ما اكدر لازم نوكف بجانبه رافد مثل الطير وحده يهمش وكلهه ضده حته نعمان وخوالهه محد واكف بجانبه...

وهو عنده دوام ومايأمن عليهه بأي مكان واني هم مااريد شمه تختلط بيهم وتروح...

لو مارافد ونوفل وكفوا بوجهم ابوهم ورافد رفع السلاح بوجه ابو جان البنيه انكتلت بلحظتهه

فضه: حسبي الله عليك ياسلمان؟؟
فهمني بأخوك كلبي متكطع علي حته ضغطي ارتفع...

قيصر: عوفي يبجي وحده منا لمن يتعب الي شافه مو هين ...

مطلعهه سبحانه بدمهه وضفيرتهه بيده شتريدين منه يسوي وهو يشوف تعب عمره راح بلحظه...

ماردته يروح بس هو اصر شلون مايروح بعدج يا امي ماشفتي شي...

حاليا هسه بوضع صدمه بس خلي يعدي يومين وراح تنتكس حالته....

شمه: اكيد ورا كل هذا براء لان وحده مريضه وماتحب شهد...

قيصر: اني كلت لقيصر لو بمكانك وطلعت براء ورا هاي السالفه والله اخلي طلقه براسهه وادفنهه بالزبل حته ما اسويلهه كبر

دست ويا بالحجي كلت يريد يزعل خلي يزعل شنو من تربيه هاي..

مره خلت دمهه بطولهه وهسه دكول انهزمت وي حبيبه ...

بالحرام لوعندي هاي  والله اعلكهه 3 ايام بالنخله ومايرفلي جفن عليهه وحده مريضه ...

شمه: بعدنه نسولف دك تليفون قيصر جاوبه واني اسمع...

قيصر: ها رافد خوماكوشي؟؟

سكت شويه وكاله هاا براحتك خليهه باجر وراهه طلعهه هنا واني امر عليك باجر...

فضه: شيريد يمه

قيصر: يكول باجر  ماطلعهه للبيت ابوي ما اضمنه شيسوي راح اضل وياهه بالمستشفى وخابرت اجلت دوامي...

فضه: قيصر  يمه خاف يتهمونه بالتستر وهذا سلمان يريدله حجه ويطلع لسانه علينه...

قيصر: والله اترس حلكه رصاص اذا فتحه بكلمه وحده مثل هو عنده العرض رخيص احنه عدنه غالي ...

فضه: كومي يمه شمه نامي وارتاحي شويه ...

ضرغام حطيتله حبايه منوم بالعصير لان لو ضال كاعد جان مات وهو يسمعك ...

قيصر: اني اكوم اسبح وانام وباجر تحضري يمه انتي وشمه اخذجن للمستشفى يجوز هسه هي بحاله ام لو اخت بجانبهه....

شمه: خليت راسي على المخده واني اتخيل منظر شهد وساعه اتخيل سلمان كاتلهه ماكدرت انام ابد....

كمت ردت اتوضه حته اصلي نزلت على كيف نعالي يطلع صوت...

توضيت وردت اصعد بس اكو هوه بارد يجي من المطبخ...

التفتت شفت ضرغام كاعد برا ببياب المطبخ ومدنك راسه بين رجلي ...

رحت امشي باتجاهه ماردت افززه بس صحته بهدوء ضرغام ضرغام

ضرغام: روحي منا شمه...

شمه: ما اروح ارفع راسك احجي وياك

ضرغام: رحمه للموتى عوفيني ماتحسون الي بيه عوفوني...

شمه: شلون ما انحس بيك  وهذا صوت كلبك ينسمع من كد الالم ...

شهد مظلومه ويتيمه الله مايضيع حقهه هسه هي مجرد جسد ...

لازم نوكف بجانبهه واولهم انت موجنت دكول كولشي مكتوب لازم نشوفه...

مكتوبلكم تشوفون لوعه هذا اليوم....

رفع راسه وارتجى على الباب جر نفس قوي نفس مليان حسره والم....

ضرغام: اني السبب ماطلت هوايه بالخطوبه ردت اجمع فلوس وما اخلي شي بنفسهه واعيشهه احلى عيشه...

اسمهه شهد واريد اخلي حياتهه مثل اسمهه اني السبب....

اخر كلمه حجتهه وراحت كالت فدوه لا اطول عليه ترى شايفه الضيم ...

شمه: مابيدك شي تغيره الله كاتب هذا الشي...

ضرغام: بيدي هذني لميت شعرهه من الكاع هذا الي ياما وياما تخيلته ...

اخوهه حار بيهه شلون يشيلهه وهي قطعه ملابس وحده ماكو تسترهه ...

نزعنه قمصانه اثنينه وسترناهه... شايفه هاي حالتي رافد اكثر مني بمليون مره وهي يلم شتات حطام اخته ....

والله وروح ابوي راح اقسم بذات الله اذا ما اخذت حقهه بأديه اثنينهن لو اعرف اخلص عمري بالسجن...

شمه: دكول يا الله لاتنهار تلكاهه املهه بيك تنقذهه من ظلم سلمان

ضرغام: الله كريم روحي نامي انتي هم تعبتي....

عفته على نفس كعدته ورحت صليت شويه اطمئنيت من سمعت ضرغام ماتخلى عنهه ....

ثاني يوم كعدتني عمه فضه حته نروح للمستشفى بسرعه تريكت وبدلت...

طلعنه اني وقيصر وعمه ضرغام راد يروح وقيصر ماقبل كاله تفضح نفسك واخوهه موجود....

طول الطريق ساكتين لحدما وصلنه للمستشفى اخذنه قيصر لغرفتهه حاجزيلهه بالجناح الخاص...

دك الباب قيصر ودخلنه اجت عيني على رافد الي عيونه دم سلمنه علي وانداريت على شهوده...

نايمه على جهتهه اليمنى ومسويه وضعيه الجنين مبينه خايفه تقربت عليهه وقيصر ورافد طلعوا.....

كعدت يم راسهه ابجي واحجي وياهه ...
شهوده كومي اني شمه لاتنامين هيج انتي مودكولين اختنك من النوم....

هاي عمه فضه وياي اجت تشوفج كومي حبابه...

اي ردة فعل ما انطت ولا حته شالت راسهه مخليه ايدهه على عيونهه وبس النفس يصعد وينزل....

ضلينه بحدود النص ساعه كاعدين وهي هيج حالتهه ....

شويه واجه رافد وقيصر سألته عمه ليش ماتحجي ولا تحس بالناس...

رافد: والله خاله هاي حالتهه من البارحه كاعده هي بس ماتحجي بس تباوع بعيونهه وماتريد تشوف احد....

حته اني كعدت نص الليل شافتني تخبلت كامت تصيح اطلع برا تالي اجت الممرضه ضربتهه مهدء يله نامت....

يكولون طبيعي هيج حالتهه نتيجه الصدمه...

فضه: موهينه يمه الله يكون بعونهه ...

قيصر: يله يمه وراي شغل باجر رافد يطلعهه يجيبهه يمنه انطيته سويج سيارتي مضلله...

رافد: ما راح انسالكم هذا الفضل ابد والنعم منكم.........

فضه: لا تشكرنه يمه احنه اهل وشهوده بمعزه البنات بس خلي دكوم بالسلامه....

طلعنه بعد مابوستهه وهي قطعه ثلج ...
نمشي بالممر تلكتنه دكتوره سلمت على قيصر  وضلت تحجي بحاله شهد ويه عمه فضه...

الدكتوره: خاله اهم شي حالتهه النفسيه ترى متأثره البنيه حيل ...

ومتأذيه بشكل عنيف الظاهر الاغتصاب جماعي وعدهه اثار جروح عميقه داخليه كتبتلهه مراهم وتحاميل...

اهم شي تلتزم بالعلاج وحاولو لاتخلوهه تشوف الاثار الي بجسمهه لان هاي ترجع حالتهه للصفر...

فضه: ماشي دكتوره الله يرضى عنج اذا احتاجيت شي اخابرج ...

طلعنه واني احس اذاني اطن من كميه الاجرام الي متعرضه الهه شهد ....

رجعنه للبيت والحزن مخيم علينه حملت نفسي المسؤؤليه وين ما اروح توكع مصيبه شنو ذنبهم هاي العائله الجانت تنعم بالهدوء ....

ضرغام على حاله حته ماياكل قيصر ضل يمنه ماراح للدوام يترقب خاف سلمان يسوي شي...

هذني اليومين عبالك سنتين ايام الفرح سريعه وايام الحزن بطيئه ماتمشي ....

قيصر راح هدد علاهن تسد حلكهه وماتحجي لان فضحت البنيه مافضحت سلمان...

شهد طلعت لبيت رافد واني على اساس اروح يمهه مثل ما كال قيصر بس بعدين غير رأيه وماقبل ...

كال سلمان مايحبج وخاف يسببلج مشكله اخوهه يمهه مايكدر يسوي شي ....

مرن يومين على حادثه شهد والاجواء كئيبه ضرغام معتكف بغرفته حته ما نشوفه...

وبليل نسمع صوت النحيب مالته صدك الحب مذله...

شلون نزل راس ضرغام وخلا يبجي الليل كله وهو شكد متفائل ومليان امل..

بس خسارته لشهد كدرت تحطمه وتنهي لاخر حبه...

مابيدنه شي غير نكول الله يساعده ويساعدهه والله يجبر قلوب المحبين...

الوضع يم بيت سلمان هادئ لان رافد موجود وهو الي قايم بواجب شهد وخالتي جايه يمهه بس اي اخبار مانسمع عنهم...

وقيصر حابسني بالبيت مايقبل اطلع واني الوب بس اريد اروح واشوف شهد شلونهه...

رجعنه انداوم بعد ماغبنه اني واسماء 3 ايام لان عمه فضه ضغطهه يرتفع وخاصه من تشوف حالة ضرغام ...

كملنه امتحانات نصف السنه شلون ماجان حتى ما اتذكر شلون قريت ....

بيوم منهن طك كلبي اريد اروح لشهد وقيصر بالدوام كلت لعمه فضه راح اروح وارجع بسرعه...

فضه: مو كالج قيصر لا اطلعين ترى مايقبل تكسرين كلمته...

شمه: عمه من يوم المستشفى مارحنه اريد اشوفهه اطمئن عليهه ...

فضه: روحي وبوسيلياهه وكوليلهه خلي تتعافى بسرعه اريد افرح بضرغام..

شمه: عمه تقبلين تخطبيهه لضرغام وهي هيج حالتهه..

فضه: اني ام ومايهون عليه اشوف ابني يحترك كدامي يوم يوم...

البنيه مؤدبه وحبابه ومايوم شفت طولهه الي صار مو ذنبهه مو نصير عليهه احنه والزمن...

شمه: الله يخليج ويطول بعمرج ورحت بوستهه..

هاي الانسانه عظيمه يوم عن يوم اكتشف معدنهه الذهب ...

هاي ام والي عندي ام سبحانك ربي شتان مابين الاثنين...

طلعت امشي سريع وصلت بيت رافد دكيت الباب واتلفت لاتشوفني البقره الحلوبه...

فتحلي الباب رافد وشكله تعبان ضعفان حيل واللحيه عاليه سلمت علي ودخلت...

لكيت خالتي ام فيصل سلمت عليهه وعيوني ادور شهد اكيد نايمه ...

شمه: خاله شهد شلونهه ؟؟
خاله: والله يابنتي على حالهه نفسه كوه تحجي كلمه وليل نهار نايمه ...

رافد: شمه حاولي تحجين وياهه ادكوم تتحرك حته فقراتهه سافن...

شمه: دحكت على رافد شلون مكسور خاطره ومنزل راسه ومايعرف يحاسب منو وشلون يحميهه...

حبه طلع من كلبي وكأنما اشوفه شخص غريب بعدني اشوف اللمعه بعيونه بس مايفيد بعد هو الي خسرني ....

رحتلهه للغرفه اول مافتحت الباب ضليت صافنه على الغرفه مال عروس ومرتبه وراقيه حيل

جريت نفس وزفرته هاي غرفتي المقرره اتزوج بيهه وتالي بلحظه انتهى كولشي ما انقهرت لان القهر الي شفته اكبر ....

جانت شهد نايمه نفس النومه الي بالمستشفى ومسويه وضعيه الجنين....

شمه: شهودتي شلونج اني شمه
ساكته ماجاوبتني ولا عبرتني .....

كعدت على الجربايه يمهه جريت ايدهه واحجي...

شهد محتاجتج كومي احجي وياي كومه سوالف عندي وماعندي غيرج اسولفله ...

ومحرومه من الجيه الج بسبب ابوج واختج العار...

اسمع صوت بجيهه وشهكتهه وهي ضامه عيونهه بيدهه...

كومي شهد ما انتهت الدنيا كومي طلعي الي بكلبج واحجيلي مامليتي من النوم...

شهد: رفعت راسي وعيوني مغوشه ما اريد اشوف بشر كدامي واتذكر الصار بس هاي شمه صوته وحده امان وقوه اليه....

شمه: احجيلي يا حبيبتي وخليني اساعدج لاتستهينين بيه هذيج المره موخليت دم بلاء بطولهه بس احجي لاتسكتين..
....

شهد: تريدني شمه احجي شأحجي واني انسلبت روحي من عندي ...

مثل الانسان العايش ويبدون ينتزعون روحه من جسده ببطىء هذا شعور واكثر ...

واني بين ادين 3  زلم كبار واتناوب بين واحد واحد  وهم يمزقون احشائي بكل بوحشيه...

اتمنيت الموت مو علمود نفسي بس علمود ضرغام ما اشوفه مدنك راسه ومكسور....

شمه: ابجي وطلعلي هذا الي بكلبج واحجيلي كلبي نار عليج...

شهد اذا ضليتي ساكته وضامه بكلبج معناتهه راح تبقين بهاي الحاله والمجرم يمشي على طوله وانتي مقبوره هنا....

شهد: افتقدتج هواي ليش ماجيتي يوميه اطلع برا انتظرج تجين...

اريد اوصل خبر لضرغام اجوني خطابه وابوي شاد العزم على زواجي خلي يجي ينقذني....

من اجو عليه الناس كامت سعاد طلعت براء الهم ومن شافوهه ماعجبتهم وكالوا لسعاد احنه جايين على شهد...

بليل سعاد كالت لابوي الناس ماعجبتهم براء ورادو شهد ....

قرر ابوي يزوجني غصب عني وحته ما اخذ رأي لان الجايين خوش ناس...

اني ماحجيت شي بس كلت مااقبل ما اريد اتزوج ...

بهاي الحجايه ابوي انهال عليه بالضرب ونوفل كوه خلصني من ايده وقرر باجر الخطبه واذا حجيت يذبحني....

اني خفت من ابوي حيل لان جان الشر مبين بعيونه وسكتت بس كلت باجر يجي رافد واحجيله....

ثاني يوم كعدت حاله حال كل يوم نظفت واني عيني على الباب انتظر رافد يجي ويخلصني من شر ابوي...

براء انطتني علاكه مال اكل كالت وديهن لابو حمود ياخذهن غدا لابوي بالمزرعه ...

موجديده هاي الشغله دائما اوديهن اخذتهه ورحت بس ابتعدت عن البيت وبنص بستانه

حسيت بضربه على راسي وكعتني بالكاع بس مافقدت الوعي ....

بسرعه التموا عليه اثنين سدو حلكي وحطوني بسياره مال الزرع وطلعوا ....

شكد حاولت اصيح وانقذ نفسب بس بدون جدوى اديه ورجليه مربطه وحلكي مسدود....

بحيث شكد مرينه من ناس بس ماكدرت اصيح وعادي محد منتبه لان كلهه تعرف هاي مكينه الشيخ سلمان ويوميه تنقل زرع....

اخذوني لخرابه ما ادري وين ضليت يوم كامل بدون اكل وشرب والريحه الي بالمكان تلعب النفس...

وماعرفت هذوله الملثمين منو كام كلساع واحد يحجي لو يضربني لو يدفرني ببطني....

واني لاحول ولاقوه كولشي بيه مربوط كوه يخلوني اشرب مي ....

لحد اليوم الثاني بليل هذا الي انكتب عليه الموت واني بعز شبابي ...

هجموا عليه 3 ماخلو قطعه عليه وماكو شي ماسوو ....

شمه: من وصلت لهنا انفعلت وكامت تبجي بصراخ وصارت زركه ...

اجه رافد وخالتي يركضون على صوتهه حضنهه رافد ويهدي بيهه وهي مثل الطفل تنتفض بحضنه...

لوميته ولا شايفه هاي حالتهه شهد ام الضحكه الحلوه الي غمازتهه وحدهه تخبل ...

هاي حالتهه بسبب وحده مريضه وتسمى اختهه ومرت ام ضالمه بجيت بحرقه والم على حال هاي المسكينه الي مالحكت تشوف شي من حياتهه....

هدءت شويه وانطاهه رافد حبايه نامت بسرعه طلعنه برا واني امسح بدموعي....

رافد: ليش انفعلت حجتلج شي
شمه: اااي

رافد: تعالي احجيلي خلي اعرف منو السبب

شمه: روح اسأل اختك وامك ويامن اتفقن ومنو الي يسوق مكينتكم يوميه ...

مع الاسف والله رجال بمعنى الكلمه والجنود ترجف منك ماكدرت على اختك وحده مجنونه

لمتوني من ضربتهه بس الصوج بيه اني قصرت لو مخليه الطلقه بكلبهه

رافد: شمه السانج كليلي منو ويامكينه وشنو علاقه براء...

شمه: حجيتله الي كالته شهد وهو ويه كل كلمه يفتح عيونه على وسعهن الظاهر مصدوم بعمايل اخته...

عادي اني حجيتلك واعرفك ما راح تسوي شي بس مثل ما وعدتك اخذ حقهه بالمره الاولى راح اخذه مره ثانيه لو عشيره سلمان كلهه توكف كدامي...

الي اريده منك هسه بس خلي شهد تحس بلامان ولاتخلي ابوك يطلع بطولاته عليهه ومره وحده وكف ابوك عند حده يله من رخصتك ...

طلعت من يمهم واني شبعانه قهر على حاله شهد...

رجعت للبيت شفت سياره قيصر بالباب ياعزاا العزاني هسه هذا الثاني يلقيلي محاظره...

اول مادخلت صاح بيه وين جنتي...

شمه: يم شهد
قيصر: امي مو كلتلج ماطلعين شنو هالعناد

شمه: مارحت اتونس اريد اشوفهه ما اتحملت..

قيصر: اني من كلت مااطلعيم يعني تلتزمين بكلامي مو بكيفج تسرحين وتمرحين...

شمه: شدعوه سويت جريمه كلت رحت لشهد واعتقد مالك حق تمنعني منهه

اني كلت هيج عبالك شعلت بي نار هي كومه وهي جره من اذني ولواهه حيل حسيتهه ؤاح تنشلع من مكانهه...

قيصر: اسمعي ولح هذا السانج اكصه واحطه بأيدج اذا رفعتي صوتج مره ثانيه

واذا كسرتي الحجايه وسويتي الي براسج اكسر رجلج واخليج معلكتهه هنا....

حياتج هذيج والسانج يم سلمان مو يمي هنا تسمعين الحجايه حالج حال اسماء لا تخليني امد ايدي عليج واصير موخوش ادامي...

شمه: هاهي اني اسفه ما اطلع بس عوف اذني الله عليك...

هد اذني بسرعه ركضت للغرفه والدموع بعيني كسر بأيدك على هاي الدكه

يمه احس اذني انشلت ادري ايد لو شنو لازمتهه وافتر بالغرفه من الفشله والصدمه حته دموعي ماوكعت...

اجت اسماء وشافتني لازمه اذني وافتر الظاهر شايفتنه كاعده تضحك عليه ومشمته بيه...

خاف اكوم اتعارك وياهه وهذا اخوهه سبع البرمبه يشلع اذني الثانيه...

بهذا اليوم ماطلعت ابد من الفشله شلون حاسبني وعبالك طفله كدامه....

ثاني يوم جانت جمعه واسماء توسلت بقيصر نطلع نتمشى بالبستان....

ووافق حضره الدكتور طلعنه نتمشه اني وياهه عبرنه بيت علاهن ...

الهوه نقي واكو بروده بالجو نمشي ونسولف على وضع شهد...

تهيألي واحد يمشي بصفي التفتت ماكو شي ما اهتميت كملنه طريقنه....

اجت عيني على واحد يباوعلي من ورا النخله ركزت بملامحه زين ماكدرت اميزهه ...

شمه: اسماء مدري منو يباوعلي من ورا النخله الكدامج

اسماء: وينه البستان فارغ شبيج تخبلتي؟؟

شمه:تعوذت من الشيطان وكلتلهه خلي نرجع دب الخوف بكلبي...

بس انداريت واحس واحد لزمني من اكتافي ويضغط عليهن...

بدون وعي نزعت نعالي واركض واصيح عوفني الجني عوفني.....

اشوف اسماء تركض وراي واني ماكو شي مادست علي ...

اركض بكل سرعتي واسماء ماتعرف شكو تركض وتصيح جني ....

وصلنه للبيت مكطوع كلبنه من الركض جان قيصر يغسل بالسياره ...

شافنه شلون نركض ضل صافن علينه ويسأل شبيجن بدت اسماء تحجيله....

دحكت على رجلي فايته صفح بالنعال والثاني شايلته بيدي ...

من الفشله ردت اطم نفسي بالكاع رجليه كلهه طين والتراب بملابسي...

شمر عليه مي بالصونده قيصر وهو يضحك على حالتي ...

انتبهت على الوضع كعدت بالكاع اني واسماء وخربانين ضحك واحنه نتذكر شلون ركضنه

اسماء دكول احس نفسي صرت عداء حته تنور طين عبرته وما ادرب بنفسي...

بعدنه نسولف ونضحك وقيصر منكعنه بالمي ...
نسمع صوت برا هوسه زلم قريبه على الباب...

دخلنه جوا واندحك من المطبخ ....

سلمان جاي هاد واسلاحه بيده ويصيح اليوم اشيلكم بيت حسين ...

دوسة كاعي اليوم اسويهه دم وياكم....

ماافتهمنه شكو بس سمعنا يكول لقيصؤ....

ضرغام اخوك كتل 3 ازلام من حراسي وحرك المزرعه مالتي والمكينه.....

عمه فضه هي سمعت هيج وكعت بالكاع....
#يتتببببببع

الفيديو يوصف حال ضرغام من تصميم عبير المبدعه شكرا قلبيAbeerAL_Hussnawy