رواية وحوش بشريه الفصل الثالث والعشرون 23 - بقلم Rozaya1122

#البارت الرابع والعشرون
#وحوش بشريه
#روزايه

رجعولي
 ذيچ الضحكه الچانت #صدگ
 و البشر حاسدني #عليها
 رجعولي ذيچ ايامي #الماترد
و عافيتي الراحت #بيها

شهد....

عشت جسد بلايه روح بيوم سلبوهه مني العايشين بخيرنه سلبوهه مني الماخافوا الله ...

يمر اليوم واني ما اعرف الليل من النهار نايمه بفراشي وانتظر رحمه الله تنزل عليه وترحمني...

يوميه من انام ادعي باجر ما اكعد الصبح ولا اسمع صوت ابوي وهو يهد عليه ورافد يوكف بوجهه....

عشت ايام بس الله يعرف بيهه عيني على الباب بلكي اشوف واحد ينقذني من بطش ابوي...

اضل لنص الليل كاعده ومرات يمر الفجر واني اتذكر الصار انهار ابجي واشلع بقايا شعري ....

من يوم الحادثه واني مادحكت على نفسي بالمرايه ما اريد اشوف كصيبتي الي ربيتهه يوم يوم فرحانه بيهه....

ولا اريد اشوف اثار سلبان شرفي وروحي من عندي....

بيوم الي سمعت طلقات وهوسه اشاهدت بكلبي لان مبين الشر بعيون ابوي وناوي يقضي عليه...

هد عليه ويصيح انتي عار بسببج خسرت الناس واملاكي وخسرت سمعتي بين الناس ....

انتي نزلتي راسي وجبتي العار ...
ليش يحاسبني ومايحاسب الكان السبب ...

ايام وليالي ابجي محتاجه امي محتاجه حضن دافي يحويني ويكول احنه وياج....

حتى شمه الي جانت مصدر امان اليه ماشفتهه بعد الكل تخلى عني باول محطه....

لو مارافد يوكف بوجه جان هسه ميته وياريتني ميته ولا شايفه هذا اليوم...

سمعت من رافد ضرغام كاتل الفلاحين وحارك مزرعه ابوي ...

نزلت دموعي واني اتخيل هذا الانسان شتحمل كسرات وصدمات من عندي...

ردت اجازي عن صبره وانتظاره بس للأسف ماكدرت....

شكد جنت اسد الباب وافتح شعري الطويل وافر بي  واني افكر هيج البس وهيج اسوي لضرغام...

اتخيل نفسي اتلكا واحضنه واكله الله يساعدك وهو يبوسني...

بنيت امال وحياه مالهه مثيل وكلي امل راح يجي يوم واصير من نصيبه....

ابد ماحسبت يجي يوم نتفارك خاصه من سمعت كلامه الاخير وكال اخذج لو اعرف اخليهه كاتل ومكتول....

هسه ياضرغام اني المكتول واني الي خسرت ورحت بالظلام اندثرت للابد وانكتب عليه رجال غيرك...

شمه كطعت بيه وماتجينه وما الومهه حقهه لان اني كاعده ابيت رافد وهي صارت طالبه جامعيه وما تفرغ...

يوميه تجي سعاد وبراء يسمعني اشكال والوان الحجي من يطلع رافد وخطيه عمتي ام فيصل توكف بوجهن....

شكد هدد وصيح رافد وضرب بس مافاد ابوي يرجع يهد علي وعبالك براء ملاك ونازل من السما...

وصلت بي كام يسب امي وهي بكبرهه شلون خلفتني وجبتله العار...

ابجي واتوسل الله ياخذني يمه تعبت من هاي الحياه وماشفت فرحه بيهه...

فرحتي جان ضرغام وعايشه علمود يجي يوم ينقذني من ظلم ابوي واصير حلاله...

بس بعديش بعد ماخسرت شهد شرفهه وضرغام حته ماكلف نفسه يدز عليه ويخطبني...

ابد ما الومه لان يريد وحده ما ملعوب بيهه وترفع راسه مو شهد الي اعتدوا عليهه وابوهه سندهه يصيح عليهه عار...

جنت اراقب دكه الباب لعلى وعسى يجيني خبر منه ولو كلمه وحده حلوه تجبر خاطري المكسور...

شكد اتمنيت اسمع من ضرغام وهو يكول اني وياج لاتخافين وما اعوفج....

صح فرحت من اخذ ثاري بس انتظرت هواي وما اجاني اي خبر يدل على انه بعده يحبني...

بيوم مشؤؤم حاله حال ايام حياتي الخاويه الي بلا معنى...

بعد ما التحق رافد واطمئن عليه وابوي صار زين ويجي يشوفني والامور هدءت ...

اني على نفس وضعي ما اشوف بشر ونايمه ليل نهار ...

اجه ابوي بعصريه كشره هو وسعاد كوموني من مكاني واني اسمع ذاك الغلط الي ماينلبس علي ثوب...

استغرب على شيخ يلفظ هيج الفاظ حاله حال النسوان....

طلع ابوي محدد عرسي ومنطيني لواحد ما اعرفه وعكب باجر زفتي ...

انتفضت وصيحت وبجيت بس لا مجيب...

حرام عليكم شوفوا حالتي مومال زواج اني مكسوره من الداخل كلبي ينزف ومحد ضمده ....

بس الراشديات جانت تنطبع على خدي وكل واحد يوكعني بالكاع وعبالك يضرب بحايط...

عيوني ادور على منقذ يخلصني لاعندي تليفون واخابر على رافد ولا عمتي كدرت تخابر هدده ابوي ...

جان واحد من قوانين ابوي الموبايل مايدخل للبيت وعباله كلهه عديمه شرف مثله...

كلبي ينادي ضرغام بلكي يحس عليه وينقذني دعيت توسلت صليت بس ربي كتبلي الحزن....

يومين سعاد ماخلت شي ماسوته بيه ضرب اهانات والفاظ قذره ...

كل موقف اصير بي احس روحي تطلع وسعاد تحظر بيه وادحك على جسمي والاثار المطبوعه بي ...

وهي وبنتهه صوت ضحكتهن يرن باذاني دموعي تنزل جمر على خدي بس ماكو رحمه بكلبهن...

شنو الي بيدي اسوي فكرت انتحر بس خفت من عذاب القيامه استغفرت ربي واستسلمت ...

مامستعده للزواج واني اكره حته اسمع صوت رجال شلون راح يشمرني هاي الشمره ....

رددت حسبي الله ونعم الوكيل بيك ياسلمان ومرتك وبنتك اريد حوبتي تبين قريبه واني يتيمه....

اجت الزفه واني اسمع صوت الهلاهل ادحك على روحي لابسه بدله بيضه مستوره لان جسمي مخربط من الاثار ....

دموعي تجري على خدي وهاي الناس تركص على موتي وفرحانه واني بديت اتلاشى....

شفته طب العريس وزادت حسرتي واني اشوفه رجال جبير بكد ابوي ومتزوج 2 واني الثالثه واني بكد بنته ....

ااااخ ياضرغام تعال شوف حبيبتك الي مثل ماسميتهه انطيتني وعد ما تعوفني ابد

بس ماشفت شي من وعدك غير النكوث ...
ياترى حسيت بالمي وعصره كلبي ...

شلون انطاك كلبي تنام ليلك واني مظلومه هو هذا الحب الي حبيته؟؟

مو يكولون المحب يحس بمحبوبه شو ماحسيت بيه ياضرغام واني اطلع لبيت الغريب ...

طلعت الزفه وصوت الطبل يرن براسي ذابحيني ويركصون على جنازتي ....

لعبانه نفسي من هذا الشايب واني بعدنه مصدومه وارجف من اشوف رجال...

طول الطريق والساني يردد حسبي الله ونعم الوكيل بيكم...

وصلت للبيت واني كل اعظائي تتراجف شلون راح يمر الليل ويختلي بيه واني هاي حالتي....

شلون راح يقترب مني واني فكري يم ضرغام الي المفروض اني عروسته مو عروسه هذا الشايب...

تلكني نسوانه الثنين نسوان كبار ومبينات حبابات اخذني للغرفه واني دمعي مابطل ابد....

وحده منهن يكلولهه ام محمد تقربت عليه وباستني....

كالت لاتبجين ياخاله احنه هنا اهلج اني مرت الشيخ الجبيره...

وهاي مرته ام فارس الثانيه احنه اهلج نعرف بحالتج وابوج انطاج هديه للشيخ ومو من شيمته يرجع الهديه...

لاتخافين يبنيتي الشيخ كال ادخلوا عليهه وعلموهه هو بحسبه ابوج وانتي بنيته...

اخذج يستر عليج لا اكثر ولا اقل كومي غسلي وارتاحي اطمئني ونامي رغد راح تبقين معززه مكرمه يمنه ...

والشيخ مايطلب منج اي حقوق بس كدام الناس انتي مرته ...

ابو محمد رجال خايف الله مو مثل ابوج لاتزعلين يابنيه بس الله دزلج الشيخ ينقذج من جبروت ابوج ....

كومي ياحلوه سبحان من خلقج ورسمج باحسن صوره الله يجمل ايامج مثل ماجمل وجهج الحسن....

المفروض هسه انتي عروسه لشاب مو لواحد بكد ابوج بس ربج ماينساج ابد...

احنه اهلج وابوج الشيخ وانسي هذاك البيت مايستاهلون تذكريهم...

من كالت هيج حسيت كلبي هدء وحمدت الله وشكرته جنت خايفه من هذا الرجال خاف مثل ابوي ظالم...

ساعدتني بدلت وغسلت لبست كلابيه طويله وخليت شالي على راسي وكعدت..

شويه واجه الشيخ استأذن ودخل كلامه جان درر وراحه موطبيعيه هو شيخ وابوي الظالم شيخ شتان مابين الاثنين....

يا بويه اخذي راحتج البيت بيتج والله يشهد عليه انتي حالج من حال بناتي وشوكت ماتريدين حريتج بس آمري وانطيج حريتج...

كله هذا السويته في سبيل الله يجوز انتي بعدج طفله وماتعرفيني....

اني الشيخ فاضل شيخ عشيره ال....  رجل عمتج ام فيصل صديقي...

سمعت قصتج من ام فيصل وانقهرت عليج وجانت عدنه كعده وابوج انطاج هديه اليه...

من سوه هيج ابوج عرفته عديم غيره وناموس لان بنت الشيخ ماتنهدي ولا تنطي بمهر قليل عبنهه بنت شيخ والشيخه من راسهه...

بس ابوج بهذا تصرفه اثبت هو انسان فاشل واخذج بظلم وذنب مو ذنبج ..

لوصدك عنده غيره جان اخذ ثارج بيده مو يدور سترج وينطيج هديه وبدون مهر ....

كل الي سويته بس حميتج من ابوج لا اكثر عيشي حياتج هنا سيده بهذا البيت  ..

ام محمد وام فارس هذني نسواني واعتبربهن امهاتجن وشتحتاجين بس كولي..

وهسه اعوفج تاخذين راحتج وكدام اهلج والناس انتي مرتي ...

ما اوصيج يابنتي حفظي سمعتي وصونيهه وانتي مبين عليج مظلومه وماتطلع منج العيبه...

طلع الشيخ واني دموعي مبلله خدي ومستهظمه الغريب حن عليه وابوي الي من دمه ولحمه ما رحمني...

فدواتك ربي ما تخلي عبدك وحده يصارع اريد يوم سلمان وسعاد وبنتهه قريب واكول هاي حوبتي...

اجه ضرغام ابالي وهلت دموعي واني افكر بحالته ياترى شلونهه وهو سمع بيه تزوجت...

ما اعتقد انقهر لان لو يريدني من صدك جان ماخلاني كل هاي المده اصارع الموت تحت رحمه سلمان....

الله يسعده ويجبر بخاطره ومايشوف حزن ويكدر ينساني اذا يحبني بعده
....

شمه: يوم عرس شهد انعاد نفس يوم خطفتهه ضرغام سد الباب علي وماشفنا...

عمه فضه بجت بجي لحدالان اتذكره شلون هلكت نفسهه وعبالك اليوم ميت عمي حسين...

اني واسماء وحده ادحك بوجه الثانيه ودموعنه هي الي تسولف....

مرت هاي الليله من اتعس الليالي الي مرت علينه ....

الكل متأثر على حال ضرغام واكثر وحده هي عمه فضه لان كلب والده وتحس بعذاب ابنهه...

ثاني يوم اجه وسام يركض نسمي الشرقيه لأن اخبار القريه عنده اول بأول....

وسام: يمه اجه رافد تعارك ويه ابو شلون زوج شهد بدون علمه وهو منطي كلمه لقيصر...

وسلمان يكله ليش ماكتلي حته اساوم قيصر على الكاع هسه شلون اطلكهه من الشيخ ...

هاي الفرصه ماتتعوض هم اخلص من عار شهد وهم الزم قيصر من ايده التوجعه...

ورافد تخبل من سمع كلام ابو كاله عمري ماشفت بدنائتك ويوم عن يوم اكتشف معدنك

حرامات اكول عليك انت ابوي والله ماتستاهل هاي الكلمه ...

ومدامك سويت هيج اني لا ابنك ولا اعرفك ولافد يوم دكول عندي ابن احسبني ميت ...

لا اريد اشوفك ولا اتشرف بيك انت ابوي...

واخذ غراضه ورجع للدوام وسلمان يركض ورا بس ماالتفتت على ابو...

فضه: هذا رافد هم وكع بين حانه ومانه هذا ابو وهاي اخته الله ينتقم من الي كان السبب ....

سمعنه قيصر نحجي والظاهر شهد على الحديث من اوله...

قيصر: يمه بروح ابوي هذا الموضوع ماينفتح ابد ...

فكري بهذا الي يصارع فوك البنيه اتزوجت الله يسعدهه...

ضرغام جرحه مايشفى لابيوم ولابسنه اذا كل مره ينفتح الموضوع كدامه معناتهه يبقى على حاله...

ماعدنه هسه كولشي ويه بيت سلمان هاي العائله انتهت علاقتنه بيهه ....

وانتي شمه ممنوع الكاج عابره عليهم ارجعن دوامن وانتبهن على دراستج وكافي قال وقيل...

فضه: هاهي يمه الله يهدي النفوس ويجبر خاطر ضرغام...
...

رجعنه انداوم واني كل ما اداوم تجمع عليه البنات يسألني وين تغطين هلكد واظل ساكته شحجي....

ماعندي صديقه وحده امشي ويه 3 بنات دوامي حلو ما اواجه اي مشكله...

لبسي مستور ومكياج ما اخلي بس كحل واني بيضه وبشرتي صافيه...

هوايه اشوف نظرات من طلابنه عليه بس اني مثل مايكولون متوحشه....

كل الي اشوفه يدحك عليه اخزره ما اتفاهم ولا اسمح لواحد ياخذ وينطي وياي بالكلام....

شكد جانن البنات يحجن عليه ليش هيج اسلوبي جاف وحته مااسلم ودائما عندي طبع الهجوم ماكو تفاهم....

بس هذا طبعي عود شكد تغيرت وقللت من هاي الحاله بس الطبع الي بالبدن مايغيره حتى الجفن...

هذا الي اسمه محمود نظراته تلاحقني وين ما اروح مرات يجي جايبلي ملزمه لو يسأل ليش غايبه...

ما انطي مجال لان اخاف تطلع حجايه عليه واني مالي خلك مشاكل ...

بيوم منهن طلعت انتظر الخط حالي حال البنات وابو الخط تأخر هوايه واحنه البنات والولد كلنه واكفين....

واكفه اسولف ويه البنات وكفت سياره كدامي عرفتهه سياره قيصر...

نزل الجامه واشرلي اصعد بدون تردد بسرعه فتحت الباب وصعدت ...

قيصر: هااا شلونج شمه؟؟
شمه: زينه بس شو اليوم جايني شعجب؟؟

قيصر: خابرني ابو الخط يكول السياره عاطله واني راجع للبيت ومريت عليج...

شمه: شكرا تعبتك ...

قيصر: شلونج بالدراسه؟؟
شمه: زينه بس صعبه اني مومال هندسه نجحت بالدفعات...

تدري عاجبني فنون جميله اخلصهه رسم وتمثيل مااريد اقره والتزم ...

لو يصير هسه الا احول فنون الله شكد حلو احب الفنون....

قيصر: لا هسه ماراح تحسين بيهه بس من تتخرجين وتشوفين الشهاده بيدج تذكرين هذا اليوم...

شمه: والله اني ما احب اقره بس مجبوره ولازم انجح كل سنه...

قيصر: اي عفيه وراج هواي اعداء واولهم علاهن لاتشوفيهه ساكته ...

شمه: الله يبعد شرهه عني...

ضلينه ساكتين شويه شفته مد ايده شغل اغنيه من الاغاني القديمه ...

حجيك مطر صيف ...
مابلل الي يمشون حجيك مطر صيف
ردتك تمر ضيف وتسكت الي يحجون
حجيك مطر صيف..

جان يسوق بكل هدوء وايد مطلعهه من الجامه وايده الثانيه يسوق بيهه لابس ساعه فضيه

لابس ستره نيلي وبيهه يم عكسهه جلد جوزي ولابس نظارات ونظرته على الشارع....

لحيته محدده ويه مستوى ركبته وبشرته حنطاويه صدك حلو...

ما انتبهت على نفسي واني ادحك علي الا فززني صوته...

قيصر: مضيعه شي بوجهي يولي...

شمه: هاااا لااااا

قيصر: متأكده؟؟

شمه: التفت عليه بنص نظره واني ما عرفت شحجي بسرعه نزلت راسي وضليت ساكته وافرك بيدي 

ارتبكت حيل وتوترت ما انتبهت على نفسي واني ادحك علي هلكد...

عزااا بعيني بسلا انتبه عليه شكد فشله ياربي....

ضليت ساكته طول الطريق وهو هم سكت اعتقد انتبه على توتري ...

ماتنلام بيه اسماء من كالت كلبج بعده يحبه بس عقلج يرفض ....

وصلنه للبيت هو صعد بسرعه لغرفته همزين نقذني حته ما اشوفه ...

بدلت ونزلت اريد اتغده شفت ضرغام كاعد برا ويدخن . .

ضليت ادحك علي ومبين علي هو بعالم ثاني صفنه تاخذه وصفنه ترجعه ...

شكله حيل متغير بهاي الفتره كبر 20 سنه

يامسكين ياضرغام الحزن يعرف يختار عنده ذوق يدور وين الانسان الراقي وكلبه مليان حب وامل...

من شفت حالته حته ما اشتهيت اكل شي صعدت للغرفه مددت وعيني بالسكف...

افكر شوكت  يعم الهدوء بهاي القريه شوكت الانسان اذا حب ياخذ حبيبته وما يوكف بوجهه عارض...

ليش احنه بني ادم طبعنه الخيانه وماعدنه وفه ليش واحد ياكل بلحم الثاني...

سلمان شراح دكول لربك وانت ضلمت يتيمه وما نصفتهه ...

جريت نفس قوي واخذني فكري لقيصر والفشله مال اليوم ابتسمت على مواقفي البايخه الي ماتصير كدامه....

بسبب التفكير غفيت شويه كعدت على صوت اسماء وهي تقره الا بصوت عالي ...

شمه: يولي خليني انام قللي صوتج..

اسماء كومي خلي افحص كلبج اشوفه شغال اشتريت سماعه جديده...

شمه: قصدج تفحصين السماعه لان كلبي شغال ياحظره الصيدلانيه

اسماء: لا حب اعرفه شغال بس مايشتغل الج يشتغل لقيصر العرب...
شمه: اسماء حبابه اسكتي موفرحانه باخوج عود دكتور وحلو...

اسماء: كومي كافي نوم هذا اخوي الشهم الي سالب راحتج...
شمه: شكد لوكيه لخاطر الله لزكتي يابه ما احبه جنت مراهقه ومخبله هسه كبرت وعقلت...

اسماء: ايباااخ اكعدي راحه لا اذكرج بمواقفج العوجه ...

انخمدي واني راح اروح اقره بالغرفه مال ماما لان عندي امتحان....

شمه: طلعت اسماء وقيصر ياقيصر اشتم عطره بكل مكان ....

كولت ياس خضر هم رجع كلبي يحن....

بكل الطرق اتجنب قيصر لان وضعي يتخربط وما اريد اوكع بنفس المعاناه....

مر اسبوع ضبط الوضع هادئ حيل ضرغام ماانشوفه ولايكعد ويانه احس شمعه بيت عمي انطفت...

قيصر دوامه شاغله وقليل يتواجد ....

يوميه العصر لازم نكعد يم عمه فضه ومانشبع من سوالفهه الحلوه وهي تسولفنه شلون حبت عمي حسين....

ونضحك على مواقفهم بعدنه نسولف وجان نسمع صوت طلقتين من جهه بيت سلمان.....

فزينه كلنه بس ماكمنه ولاتحركنه نارهم تاكل حطبهم...

كملنه سوالفنه جان ينفتح الباب والشرقيه اجت تركض ....

وسام: يمه فضه يمه ذهب الماس ....

فضه: ولك فضحتني الله يطيح حظك شعندك صوتك واصل لعلاهن...

وسام: يمه مدري منو ضرب براء بنت الشيخ سلمان طلقتين ويمكن ماتت الناس انكلبت يمهم....

فضه: يا يمه مايمر اسبوع اذا ماصار دم دخيلك ربي شنو هاي اللعنه بهاي القريه....

وسام : خلي اروح اجيب اخبار واجي

اسماء: يمه منو كتل براء؟؟؟؟

#يتتتتتبع

الفيديو من المبدعه كالعاده عبير AbeerAL_Hussnawy

انتظروني في بارت مفاجئ هذه الليله بارت ينقلنه الى احداث قويه من التشويق والاثاره...

احبكم❤