رواية وحوش بشريه الفصل الثاني وثلاثون 32 - بقلم Rozaya1122

#البارت الثالث والثلاثون
#وحوش بشريه
#روزايه

( حبايب قلبي اعتذر البارحه شويه مريضه وماكدرت اكتب شكرا لتعليقاتكم الحلوه مثلكم احبكم❤)

ما بچیت ...
ما بچت بفرگتک...
لا مستحیل
بیمن ابچي وعندك انت عيوني ..
كلهم يلوموني بحبك تعال
ردلي روحي وسكت اللاموني
روحي ورقه بغيبتك شابگها ماي....
والشماتة معاند يجروني
لحگ اعله الضال وانة شبية ظال...
من كثر عتهم ولك خلصوني
وما كفاهم من صرت كلشي بمكان
ردو بچف الشمس جمعوني
يبست بچفوفهم بعد الخظار ....
وحتى مااحبك بعد حركوني
اي صرت دخان بس تدري شنطيت
عطرك بدخاني من شموني
....

شمه: نزلت علاهن وهي تجر بالبنيه وتصيح بعلو صوتهه يفضه هاي بت بغداد الجبتيهه ملعوب بيهه كومي شوفي صخام وجهج فضه...

همزين جان اكو نسوان قليله بلصاله واكثرهن كرايب عمه فضه والبقيه كلهن بلاستقبال....

فضه: عيب عمه شنو هالحجي عوفي البنت اشو زودتيهه هوايه عدهه رجل ومسؤؤل عنهه مو انتي تحكمين عليهه

علاهن: تخافين من الفضيحه ولج ومن جبتي الغربه لبيتج وماخذتي من بناتنه ....

سوه براسج خير ابني وكمتي تعلين صوتج عليه وينه نيشانهه ام الدروب ام الكليات...

وقار: عوفيني ( ودفعت علاهن من ايدهه) صدك الي استحوا ماتوا ....

ماكدرت ارد عليج واتجاوز لان مره جبيره وعبالي تستحقين الاحترام...

علاهن: ولج اليوم اخزيج وافضحج اني ما استحق الاحترام ياعايقه...

شمه: رادت تجر وقار من شعرهه صرت كدامهه ولزمت ايد علاهن والبنيه صارت ورا ضهر عمه فضه ودموعهه تجري ...

سحبتهه ام عبير تريد تاخذهه للغرفه بس علاهن صوتهه يرج البيت رج ....

الفشله شكبرهه والنسوان التمن على الصوت واخوات فضه يهدن بالوضع ويكعدن بالنسوان ...

وعلاهن بعدهه تعد وماخلت كلمه موزينه ماكالتهه بحق البنيه.....

فززنه صوت حسام رايحه اسماء كايلتله واجه يركض...

حسام: صدك ماتستحين مره شكبرج وصلت بيج السخافه لهنا ..

هاي مرتي اشرف من الشرف انتي جايه تقيمنهه وصوتج واصل لاخر الدنيا ...

ماتستحين والله لو ما مره جبيره جان عرفت شصرف وياج....

علاهن: ولك احترم نفسك لا تخليني اسويكم مزق اذا مرتك شريفه وين نيشانهه وينه ست الحسن ...

يا المهندس خاف انت ماكدرت تاخذهه بيك شي؟؟؟

شمه: هي كالت هيج وجان يكمز حسام عليهه ويسب ويغلط ....

راد يمد عليهه بس صارت بوجهه امه وايد قيصر وكفته ...

من العصبيه عيونه صارت بكصته حته ماعرف شيحجي وصلت بي صاح بعلوا صوته طلعوهه برا لا احط طلقه براسهه....

عمه فضه كوه سحبته من ايده ووطببته للغرفه وهو يهد ويتوعد عليهه بس قيصر منعه...

التفت قيصر على علاهن وهي واكفه جانت واكفه بكل صلابه بس من شافت قيصر ...

سوت نفسهه تريد تطلع تعرف نفسهه راح تنهان ..

قيصر: اسمعي علاهن وحق ربج اذا شفتج هنا خلال لمحه بصر اكوم البيت واكعده على راسج....

ماحجت شي علاهن بسرعه طلعت وضلت بس هوسه السوالف وكلمن يكول شكو وليش تعاركو؟؟؟

تالي مرت خالهم ام عبير صاحت بالنسوان وسكتتهن وهدء الوضع بس ضلن كل اثنين ييسولفن وحدهن...

جنت واكفه يم الدرج واني متعجبه بسخافه علاهن شكد حقوده عبالي صار براسهه خير تالي تبقى عوجه طول عمرهه...

اجاني قيصر يسأل بيه على الموضوع واني ما اعرف شحجي.....

قيصر: شكو عليمن الهوسه وشبيهه علاهن ويه العروس؟؟

شمه: من صاحوك ماتدري لعد؟؟

قيصر: محد صاحني جنت برا بالمضيف ومن اجيت شفت الهوسه شكو شمه احجي؟؟؟

شمه: هاااا ما ادري اسأل عمه فضه....

قيصر: شنو ماتدرين شبيج ماتحجين موجنتي واكفه....

شمه: بعدني حايره شحجي وشأكول تالي اجت عمه فضه نقذتني

بدت تسولفله واني صايره يم الدرج وهي كدامي
نست اني واكفه خطيه من كدما منفعله ومقهوره....

فضه: شفت هاي عجوز البين شلون فشلت البنيه وخلت النسوان تتفرج علينه ؟؟

قيصر: غير افتهم شكو ماتحجن ؟؟

فضه: يمه صاعده للبنيه دكولهه وين نيشانج وحسام مامتقربلهه وهاي ماتدري بعلاهن شنو وكايلتلهه ماكو وهاي تخبلت

اجت تجر بالبنيه وتصيح ملعوب بيهه مو بنيه وتتهم البنيه بشرفهه..

شمه: من حجت عمه بسرعه حول نظره عليه من الفشله ردت الكاع تبلعني فوكاهه وين اروح ساد الطريق عليه ...

قيصر: بأي حق تدخل علاهن وانتي يا امي غير تصعدين يم البنيه ماتعرفين هاي السوالف مال النسوان ...

فضه: شمدريني قيصر الناس وين وصلت اني امه ما سألت وشمدريني هي بيهه حيل وتصعد درج مو عجوز طركاعه ...

قيصر: وينه حسام روحي صيحي...

فضه: يمه ترى البنيه غشاهه مطاط ومتاذيه وماتمت الشغله وهذا اخوك متخبل من سالفه علاهن هدي على كيفك...

شمه: راحت عمه فضه تصيح حسام وهو كدامي واكف كلما اريد اطلع يسد الطريق عليه...

قيصر: شمه روحي مسحي الكحل من عينج لا اشلعهن الج...

شمه: ليش عيني عيوني وحره بيهن وهي مناسبه وكلهه مخليه لو بس شمه بيهه خيط احمر

قيصر: بلا هاللسان وروحي مسحي ترى اطلع قهر علاهن بيج بسرعه يله...

شمه: ما امسحه ومالك حق تحاسبني ومن اطلع برا عود حاسبني...

وثاني شي شوف البنات اشكال مخليات وشمه على الكحل تحاسبهه

قيصر: يولي لا تختبرين صبري والسانج اخر مره احذرج منه

شمه: ماحاجيه شي غلط لو كلمه الحق تزعل مالك حق تحاسبني بشي مو غلط...

عفته ومشيت لان كلبي طاك من تصرفاته عباله اكوله سمعا وطاعه....

لا عيني قيصر ماحزرت منو شمه والله هذا الكلب الحبك اريد ادوس علي على هالذله الي ذليتني بيهه...

رحت يم وقار خطيه كاعده تبجي واسماء وخالتهه وفضه تسكت بيهه

وقار: والله هو حسام كال لاتحجين وامي ماتسأل ماكال عدكم هيج عجوز اول مره اشوفهه...

شمه: لاتبجين حسام طردهه وتسوه عمرهه هاي هي الله مشور بيهه

فضه: شو تعالي بنيتي احنه بابه عرب والناس تتقدم واحنه نرجع ليورا...

وحتلوا كايله الغشا مطاطي جان تهمتج باكبر لان متخلفه وحايره بالمشاكل...

لاتبجين ما تمت اول يوم اتم اليوم لو باجر نعرف معدنج شو ويكفي حسام بجانبج...

كومي مسحي دموعج وفرحي بعرسج مدام وراج رجال سبع نامي وراسج بارد....

شمه: شويه هدءت البنيه وبدلت وكعدت بس خطيه هاي راح تبقى تذكرهه طول عمرهه...

التهينه بالغدا واني واسماء نشتغل بالمطبخ ولد خالهم كلساع يطبون لو ياخذون حاجه لوشي...

انتبهت على زيد ابن خالهم مانزل عينه من اسماء وهي بس تشوفه تركض اطب جوه...

زيد مثلهه صيدلاني ومتخرج ومتعين اصغر من قيصر بسنتين...

اجو اخذوا المواعين واني واكفه يم السنك اغسل شكو ماعون واكع...

شفت قيصر واكف بالباب ويسولف ويه ابن خاله رمقني بنظره خلاني ما اعرف دربي...

بس ولاتحركت لان مالابسه شي فاضح مستور وحجاب ولا حته طلع صوتي ...

ورا ماخلص الغدا حسام ومرته صعدوا للغرفه واحنه ضلينه انظف....

جنت انظف بغرفه عمه فضه من الوسخ وكلاصات المي الفارغه اجمع بيهه...

فتح الباب قيصر وطب التفت علي سد الباب واجه باتجاهي يمشي...

ضليت واكفه على وكفتي اشو هذا بسرعه لزمني من وجهي وشلون الي يريد يفرك حلكي حته اريد احجي ما اكدر...

قيصر: مره ثانيه اذا عليتي صوتج وكسرتي الكلمه اكسرلج راسج سمعتي لواعيدهه باذنج...

شمه: ما اكدر اجاوبه بس هزيتله راسي بأي هد ايده بس بعده نفس العصبيه...

قيصر: من كتلج امسحي عيونج ليش مامسحتيهن هاااا تعاندين لو شنو؟؟

شمنتظره حضرت جنابج بلكي واحد يخطبج جديد ...

شمه: شبيك قيصر لاتصيح لحد يسمعك ومنو يشوفني

قيصر: مو تتخطين بطولج وهاي دشداشتج الضيكه شكم مره نبهت ماتوصلين للمطبخ

لو كلشي عندج عناد ولازم تنفذين الي براسج

شمه: اولا اني مو صغيره وتعاملني هيج واعرف العيب ومن اشوف غريب بسرعه افوت بدون ماادكول

وثانيا ماملاحظ نفسك تحاسبني هواي بأي حق تحاسبني على الصح وعلى الغلط

قيصر: بأي حق؟؟ تريدين تعرفين بأي حق....

شمه: نظراته تغيرت وحته صوته صار همس
وبدت خطواته تقترب اكثر...

بعده مركز بعيوني ومبينه من نظراته ناوي على شي...

بهاي اللحظه انفتح الباب اسماء يارب الحمدلله نقذتني...

من شافتنه فزت ورادت تطلع بس اني ركضت وراهه وعفته بالغرفه ...

اسماء: يولي شبيج وجهج اصفر ؟؟؟

شمه: الحمدلله من اجيتي وخلصتيني من اخوج ولج مدري شجا

اسماء: والله احتارينه وياج يقترب كلتي شجا يبتعد تكومين تولولين وتبجين ...

شمه: سدي حلكج وبعدين نسولف خلي نكمل تنظيف

اسماء: اي بسرعه ترى امي راح تسوي حفله العصر لوقار مدام الكل مجتمع...

شمه: هاا صدك شعجب

اسماء: البنيه بس تبجي وصعدتلهه امي دكول حته عيونهه مورمه وحسام مانزل من يمهه

شمه: الله لايرضى عليج علاهن على هاي الدكه

اسماء: اميين شكد فشله البنيه مستحيه وحسام صاير نار من ورا علاهن...

شمه: امشي خلي نكمل تنظيف ونصعد يمهه

بسرعه اشتغلنه ورتبنه البيت وحضرنه ملابسنه مال الحفله وصعدنه يم وقار...

حسام نزل جوا لان اجونه خطار هي حبابه حيل وتستحي وفوك كل هذا مصدومه من الوضع...

اسماء: يله وقار حضري نفسج لان شويه وتجي النسوان

وقار: ليش كلفتوا نفسكم والله ماعندي ذره واهس

اسماء: لاحبيبه شعدنه غير اخوي يله كومي

وقار: والله فشلانه ومستحيه شلون انزل وكلهه عرفت بسالفتي

اسماء: ادري قابل شمسويه حالج حال الالف البنات....

وقار: النظرات مدري شلونهه وخاصه عماتج يريدن ياكلني...

اسماء: مالج علاقه بيهن اهم شي احنه وبعدين ترى هاي الحاله طبيعيه بس هنا متخلفين وعبالهم اذا ماتمت اول يوم يعني البنيه مو شريفه...

وقار: والله موبيدي اني شمدريني هيج حالتي؟؟

اسماء:  شلون عرفتي بهاي الحاله؟؟ شنو رحتي للمشفى...

وقار: لا هو حسام اكثر من مره تقربلي ومن ماصارت واني حيل تأذيت...

كال الغشا من النوع المطاط والي يسألج كولي تمت

اسماء: شوفي حبيبه مولان اخويه وراح امدحلج..

حسام مثقف ودارس ويعرف هذا النوع والحاله وكلنه نعرف قيصر طبيب واني صيدلانيه ...

حته شفتي ما سألناج ولا ادخلنه لان هذا الشي خاص بينكم ...

واخويه من اختارج من بين البنات وعاف الانبار وراح لبغداد لان واثق من اخلاقج...

موهيج موقف يأثر بي بس هاي علاهن تريد تنغص الفرحه علينه

وقار: اني كلت لحسام اخذني للدكتوره حته ماتتعرض للاحراجات بس ماقبل كال يتم مو اليوم باجر ...

شمه: بعد اذا حسام بجانبج شكو مهتمه كومي يله لان غمض فتح تلكين الاستقبال متروس...

بدت العروس تحضر بنفسهه واحنه على الواهس شتخلي بوجهه نخلي وياهه...

بدت الحفله ونفس مال البارحه الخالات لعبن لعب والعروس تخبل كلهه كالت حلوه ونازكه...

بدت الحفله تخلص وصار الانسحاب التكتيكي كلمن جمع غراضه وراح ...

بس اهل بغداد يبقون لان طريق بعيد ...

جنت لابسه الفستان مال قيصر واريد اروح ابدل لميت شعري وصعدت للغرفه....

قبل ما اوصل للغرفه بعدني بالممر مطمئنه ماكو احد لان الولد مايطبون بالهوسه...

صار قيصر بوجهي ارتبكت حيل ضليت لا اخذ ولا انطي واني بهاي الملابس وصدري نصه طالع...

بسرعه تحركت حته بدون ما ادحك بوجهه بوجهي للغرفه بعدني اريد افتح الباب...

حسيت على ايده وهي تسحبني من زندي طخ كتفي بصدره...

شمه: قيصر عوف ايدي حرام عليك تشوفني هيج واني ما مستره...

قيصر: اشششش لاتحجين الحرام عليه ...

شمه: سحبني من ايدي لغرفته يمه عزا هذا مكبسل شارب شي ...

سد الباب وخلاني ورا ايديه ثبتهم على الباب واني بحضنه صرت....

انفاسه عاليه ومبين وضعه موتمام وعيوني تصعد وتنزل على كل شبر بيه...

دكات كلبي كامت تخربط اريد اتماسك وانهي هذا الوضع باسرع وقت ...

شمه: قيصر حباب ابتعد عني انتبه الي تسوي حرام شبيك اليوم...

قيصر: شمه اسكتي لاتخليني هسه ارتكب بيج

شمه: شمسويتلك اني اذا علمود الكحل والله ما اخلي بعد بس خلي اروح

ماجاوبني بس نظراته مركزه على ملامحي لهيب انفاسه الحاره يعصف بركبتي ....

ما اريد اغمض عيني وانطي اشاره بالموافقخ بس الوضع ما اكدر اتحمله

عطره ملئ صدري وعينه المشبعه باللهفه والحب معقوله هذا قيصر الكدامي...

نسيت نفسي واني بين ايديه وضليت مركزه بعيونه واني اريد اتاكد من هاي النظره نفسهه الي جنت ابحث عنهه طول هاي السنين...

شفته يقترب اكثر وايده حاوطت خصري خفت منه ردا افلت من ايده...

وبديت ادفع بي همس بصوت ناعم يم اذانه وايده تبعد شعري عن ركبتي

قيصر: ما اسوي شي لاتخافين بس خلي اشم عطرج

شمه: اتصنمت من كلامه دخيلك ربي ما اتحمل بعد لازم اطلع منا قبل لا اسوي مصيبه...

قيصر: شمه
شمه: هااا قيصر بس عوفني الله عليك
قيصر: ليش خايفه قابل شراح اسويلج

شمه: ما تسويلي اعرفك ماتسوي الغلط بس حرام والله عوفني فدوه

قيصر: سهله اذا ع الحرام هسه اعقد عليج ونسوي الحلال

شمه: من كال هيج بلحظه ما ادري شحسيت حته ايدي الي لازمه دشداشته واريد ادفعه ارتخت ونزلت ...

رفعت  عيني علي واني اشوف كل معاني الحب بهاي العيون الي ياما وياما حرمتني النوم...

بعدني بوسط تأملي وصفناتي سمعنه صوت حركه قريبه على الباب وصوت عمه فضه وهي تصيح قيصر وينك...

ارتبكت حيل ما ادري شسوي اريد افتح الباب واطلع نسيت اذا شافتني اطلع من غرفه ابنهه شدكول ...

خلا ايده قيصر على الباب وكالهه هسه اجي ...

سمعنه الخطوات ابتعدت معناتهه راحت اني حته مادحكت علي ولا التفتت بسرعه فتحت الباب وركضت للغرفه....

قفلت الباب وعبالك ملاحكني ما اعرف شحجي وبشنو افكر معقوله قيصر يتجرأ ويحجي هيج ....

صدك لحظات الحب حلوه احساسي غير ما اكدر اوصفه لحد الليل واني احس نفسي مغموره في بير السعاده...

قيصر ماشفته بعد لحد ثاني يوم من ودعنه اهل بغداد شفته برا بالباب ...

سمعت عمه فضه تحجي ويا ودكوله خلصت شغله حسام على خير ....

وهو يكولهه بيهه الخير ....

التهينه بالخطار وجبه اطب ووجبه تطلع ....

وقار حبابه وتنزل ويانه بالمطبخ وروحهه مرحه تسولف وتشاقه ....

ورا العرس رجعنه انداوم واني احس نفسي طير حر من الفرحه والولد رجعوا لدوامهم....

بيوم السبت جان شهر 11 بسنه2013 ما اعرف شوصف هذا اليوم ...

يوم تحقيق احلامي لو تحطيم حياتي لو اخر فرحي وبدايه احزاني... ...

شنو الي اكدر اوصفه ولو اجمع كل الحروف ماراح اوصف قطره عن هذا التاريخ والايام الي بعده...

جان الجو بي بروده وعندي امتحان احصاء وكاعده ادك اقرايه الساعه ب11 بليل واسماء تقره جوا لان تقره بصوت عالي....

اندك الباب مال الغرفه كلت اتفضل...

انفتح الباب واشوف قيصر بهيبته ولابس تراك نيلي ومخلي ايديه بجيوبه...

اجه تقرب عليه  اني كاعده بالكةع كعد بمستواي....

شمه: قيصر ؟؟

قيصر: اريد احجي وياج ..

شمه: كمت كعدت على الجربايه وهو بصفي لزمني من اكتافي ودارني علي...

قيصر: شمه راخ احجي واسمعي بدون متقاطعيني...

اني يوم الاثنين راح اسافر  ....

شمه: شنووووو؟؟ حجيتهه بتفاجئ

قيصر: موكلنه اسمعي ...

راح اسافر ومامعلوم شكد وارجع سنه اثنين بس ان شاء الله ما اطول...

يجوز بهاي الايام الفاتت او السنه الفاتت لاحظتي هوايه تغير من ناحيتي ...

نظراتي تلاحقج بكل مكان مرات حته وانتي مامنتبهه تلكيني صافن عليج ...

اكيد استغربتي وكلتي معقوله هذا قيصر وشغيره وشنو اباله؟؟؟؟

اني مثلج هم مستغرب من حالتي وليش ادحك عليج بهيج نظره ومن اشوفج احس كلشي بيه يريدج...

مرات احجي ويه نفسي وين جنت عن شمه وليش هسه يله شفتهه  ...

ما منتبه ابد عليج ولامنتبه على لهفه الحب الي بعيونج بس من لاحظتج لكيت نفسي اني احمل نفس المشاعر اتجاهج

شمه تذكرين من جابتج شهد مريضه وفحصتج جانت دكات كلبج غريبه اني بنفسي دكتور وشكد فحصت مرضى ما واجهت هيج حاله ...

دكات كلبج ولمعه عيونج جانت كفيله بفضح مشاعرج ...

جنت اكول مراهقه حته ما انطيتج مجال حته ماتوكعين بالغلط...

بس الاعجاب يزول والحب يدوم من تاكدت كل هاي السنين وانتي تحبيني عرفت حبج حقيقي...

اعرف انفصلتي بسببي وصرت سبب حزنج بيوم من الايام....

يجوز تصرفت وياج بغرور او برود ماعرف شسميهه بس صدكي يوم عن يوم اكتشف شي جديد اتجاهج....

بلحظه لكيت نفسي احبج ومتعلق بيج واتمناج تصيرين اليه...

شمه عيوني تراقبج بكل حركه وكل يوم حبج يزيد بداخلي...

اتمنى هاي المشاعر والحب حسيت بيهن قبل ما اقدم دراسات جان خطبتج بلحظتهه..

بس من قدمت على البعثه ماردت اي شي اسوي بالعراق واعوفه واروح...

يجوز دكولين ليش ماتخطبني وحتلوا تسافر انتظرك...

هاي دنيا ومامعلوم شيصير يجوز هنا بالطريق اثناء سفري اموت ما اريد اعوف انسان مرتبط باسمي واتخلى عنه...

وصدكي لو خاطبج والله ارفض البعثه بس كولشي اجه متأخر ...

هسه انتي عرفتي قيصر يحبج وعند وعدي اذا تحبيني وتنتظريني اول اسبوع ارجع هو نفسه اسبوع زواجنه

بس اذا تشوفين نفسج مو كد مسؤؤليه الانتظار ما اريدج تحطمين مستقبلج بسبيل تنتظرين اسنين وماكو حب بداخلج...

شمامتي حبيبة كلبي اني احبج واحبج هووواي  ...

شمه: 28 حرف باللغه العربيه لو اجتمعوا مايوصفون ذره من احساسي ومشاعري بهاي اللحظه...

حاولت وحاولت قدر المستطاع بس اريد اتمالك نفسي وابين قويه ...

لحظه اعتراف قيصر بحبه حته بالاحلام ماجنت اشوفهه نهائيا ...

حته مايوم سمحت لنفسي افكر واتخيل هاي اللحظه لان مأيسه من قيصر ومن حبه....

ضليت فاتحه عيوني وصافنه علي اريد واحد ينبهني ويكعدني من الحلم...

ماحسيت غير ايديه حاوطتني من اكتافي وسحبتني على صدره ....

مثل المنوم مغناطيسيا من حضني وسمعت دكان كلبه السريعه دكات محب غمرت راسي اكثر واكثر ...

باسني من  راسي وهمس يم اذني احبج...

مارفعت عيني ابد بس كوه كدرت احجي وكتله اني هم احبك...

ضل مركز بعيوني وصدك نظرات توديع بيناتنه...

باسني من كصتي وطلع بدون ميحجي شي ...

جانت هاي احلى ليله بعمري عشت بيهه كل الاحاسيس  ...

جنت بهاي الليله سعيده الى درجه اريد اعيط بعلو صوتي واكول احبك..

تمنييت الساعه توكف لحد هنا وبعد ماكو وقت يمشي واضل بس اتامل واعيش ايام حلوه ويه قيصر...
....

ثاني يوم رحت للدوام على كد الامتحان ورجعت بالخط الثاني لان باجر قيصر يسافر وحته مالحكت افرح بحبه...

رجعت للبيت لكيته كاعد يشوف اخبار ما ادري ليش استحيت بس سلمت وصعدت للغرفه بدلت ونزلت ...

عيونه تفتر وراي وتلاحقني بكل مكان واني هم كلساع ادحك علي بنظرات التوديع..

ماحسيت باليوم شلون خلص لحد ما شفت عمه فضه تبجي بالليل وتودع بقيصر...

هسه لازم اكعد من حلمي الي صار يومين عايشه بي  ...

اعتقد الايام الجميله راح تروح ويه قيصر وكلبي يضل ينبض بس اله...

ما اتجرأت حته اطلع من الغرفه بهذا اليوم دموعي ماتنزل بس الخنكه الي بكلبي مالهه مثيل ...

ليش اعترفت ياقيصر قبل سفرك بيومين هم انانيه منك هاي راح تخليني معلقه بيك طول العمر ....

بهاي الليله مانمت ابد للصبح واني دموعي شلال واني اتخيل شلون راح افاركه وما اعرف شكم سنه ...

مكتوب عليه شلعان الكلب وما اشوف راحه وفراكك ياقيصر زودهه عليه...

لحد ماصار الفجر واني كاعده كمت صليت سمعت صوت عمه فضه معناتهه كعدت ...

نزلت لكيتهه تسوي ريوك وحسام كاعد وضرغام لان يردون يودعون قيصر...

ياربي صعبه عليه والله شلون راح افاركه واني من صغري روحي متعلقه بهذا الشخص...

ماكدرت اضل كاعده يمهم صعدت للغرفه كابلتني اسماء واني كل عبره تطلع من عندي مال سنين ....

سمعت صوت السياره اشتغلت معناتهه راح يروح نزلت اسماء واسمع الهوسه الجوه بس ماكدرت انزل ....

احتمال انهار كدامهم وافضح الاول والتالي ضليت كاعده بمكاني ومخليه راسي بين رجليه ...

اجاني صوت قيصر نبهني من صفنتي  ..

قيصر: شمامتي ماتريدين تسلمين عليه يولي..

شمه: كمت وكفت على حيلي ودموعي عشره عشره بس ادحك بعيونه واني اشوفه اخر مره...

قيصر: ادري عليمن هالدموع قابل بعد ما اجي احسبيني بالدوام ...

واكو تليفونات ونتخابر امسحي دموعج يله واريدج كل سنه تنجحين وتفرحيني بيج

وما اريد مشاكل ابد ازعل عليج اذا سمعت مسويه مشكله ...

شمه: ماشي بس ديربالك على نفسك ...

قيصر: انتي هم ديربالج على نفسج من اوصل اخابرج ...

شمه: ماشي انتظرك بعدنه واكفين صاحه ضرغام ونزل ...

درب السلامه ياحبيبي تروح وترجع سالم ...

ما ادري ليش احس لهنا وانتهت ايامي الجميله  انتهت الضحكه والفرحه بالنسبه الي...

ما ادري احساسي ليش هيج مدري ابالغ هواي ...

ياترى شنو معناه هذا الاحساس الي مراودني وشراح اشوف بعد سفر قيصر  وشنو الضروف الي راح اواجهه بدون سند...

#يتبببع