رواية وحوش بشريه الفصل الثالث وثلاثون 33 - بقلم Rozaya1122

#البارت الرابع والثلاثون
#وحوش بشريه
#روزايه

لاتعاتبني
اجيت ومالگيتك
لملمت ظلّك وراك
گتلي وينك ... گتلك امضيّع اعيوني
وما شفت ريل الخذاك
بس شفت منك ايدين
وباقي چم شتلة عتب فرهدهه وجهك من لگيته
اه ياغربة ادروبي المامشت وياك يوم
اشلون ارجعنك وراك
اشلون ارد
والوحشة وحشة ليل
 لابابك ندهني
وگال يمضيّعني هودر
لاتعوف
....

شمه: بعد سفر قيصر اضلمت الدنيا بعيني حته مالي واهس اروح للدوام بس علمود امتحاناتي وما اريد اخسر مستقبلي وازيد الطين بله...

البيت هدوء اني واسماء دوام وبس وقار وعمه فضه بالبيت والولد كلهم بالدوام...

يعني روتين قاتل وممل صار يومين على سفر قيصر وماكو اي خبر ولا اتصال كال من اوصل اخابركم وبعده ما اتصل....

يوم الاربعاء من رجعت من الدوام لكيت عمه فضه تخابر وتبجي سألت وقار شبيهه عمه كالت تخابر  ويه قيصر....

حمدت الله بداخلي لان وصل سلامات ضليت طول اليوم عيني على الموبايل شوكت يتصل وهو كال بس اوصل اخابرج...

بليل اجه ضرغام كال شمه انطيني تليفونج...

تفاجأت بطلبه جان على الشحن رحت جبته واجيت انطيته بس مستغربه من طلبه اخذه شويه ورجعه ..

ضرغام: خليتلج فايبر وماسنجر قيصر خابرني كال سويلهه برامج تواصل حته يحجي وياج...

شمه: شلونه قيصر ؟؟

ضرغام: زين هسه هو يخابرج وسولفي ويااا ..

وباجر العصر اريدج ترحين انتي وامي ووقار واسماء تخطبون شهد حسب الاصول لان خلصت العده...

شمه: خاف سلمان مايقبل..

ضرغام: لا هسه تلكاني نوفل وكال ابوي يكول خلي يتوكلون وقيصر هم خابرني وكال دز امي لان سلمان مخابره حسب الاتفاق...

شمه: ماشي ان شاء الله خير...

طلع ضرغام وضليت انتظر قيصر شوكت يراسلني صارت الساعه ب11 رن الموبايل اتصال فايبر ...

ركضت شفته رقم دولي اخذت نفس عميق وجاوبت

شمه: الووو قيصر

قيصر: حبيبتي شمامه

شمه: شلونك الحمدلله على السلامه...

قيصر: الله يسلم عمرج شلونج انتي؟؟

شمه: زينه الحمدلله

قيصر: دوامج شلونه الوضع يمكم ...

شمه: كلنه زينين انت شلون وين كعدت ومنو وياك..

قيصر: والله احنه 20 طالب اهل البعثه من مختلف المحافظات وكعدنه بشقق خاصه بأهل البعثات ...

شمه: شوكت ترجع؟؟

قيصر: ههههه يولي بعدني ما داومت بس قدمت الاوراق لازم اشتاقيتيلي ...

شمه: اااي...

قيصر: غمضي فتحي يخلصن اليوم من قدمت حجيت وياهم على المده شكد..

بلاول ندرس 6 اشهر اختصاص عام وبعدين نقدم حسب المعدل وموكلهه تنقبل

يعني الشغله دوخه ومزعجه اني 6 اشهر وارجع اجازه شهرين وبعدهه اكمل...

شمه: يله راح احسب من اليوم شوكت يخلصن...

قيصر: ممم فديت الماشتاكلي...

شمه: ضلينه نسولف بحدود ربع ساعه الصوت ساعه يله اسمعه ومرات يكطع...

سديته منه واني سعيده لان الي جنت احلم بي تحقق قيصر يحبني واحبه...

ثاني يوم رحنه لبيت سلمان مثل ماطلب ضرغام بلاول عمه فضه اعترضت بس قيصر خابرهه وكالهه روحي لاتكسرين بخاطره...

رحنه نتمشى واني اشوف هذا البستان شلون خاوي حته الشجرات ميتات من عرفوا خوالي البستان مبيوع محد اعتنى بي بعد ...

دكينه الباب فتحت الباب سعاد تهلهل وتمرحب بينه ولا عبالك هاي سعاد السعلوه...

كعدنه بالصاله وبراء الهاشه ماشفنه شكلهه مرت خالي نعمان وخالتي ام فيصل موجودات...

اجت شهوده قدمتنه عصير حيل متغيره صايره جلد على عظم تختلف عن اخر مره شفتهه ابيت الشيخ...

حته عيونهه ذبلانه والجواهن اسود الظاهر سلمام ماتاب ابد ..

مبينه هاي الاشهر عاشتهن بجحيم سلمان وسعاد الله ينتقم منكم...

سلمت على عمه فضه واشوف الدموع بعينهه حضنتهه وبوستهه همست باذنهه راح تصيرين يمي ابتسمت ابتسامه خفيفه ...

كعدت كدامنه بصف خاله ام فيصل عمه فضه بدت تحجي ..

فضه:اليوم جايين عليكم واحنه طالبين شهوده الورده لابني ضرغام..

ام فيصل: اهلا وسهلا ام قيصر جيتج هاي وطبت بيت سلمان كل هاي السنين تسوى كنوز الدنيا...

الكل يتمنى يناسبج لان انتي اصيله وماشفنه العيبه منج وولد المرحوم حسين الكل تحمد بيهم وباخلاقهم...

فضه: بعد كلبي ام فيصل اهلي انتو والله شاهد ما اريد من الدنيا بس سعاده ولدي...

سعاد: خيه ام قيصر شهوده مدلله وبتنه وتعرفين المر عليهه موسهل نريد نسكت حلوك الي تشمتوا بيهه...

شمه: تحجي وادحك عليه كون عابت هالشكل ماكو شامت غيرج

فضه: كولي شتريدون احنه حاضرين كولشي نسوي لخاطر هالحلوه ام غمازه

سعاد: والله ابوهه الشيخ كال ما اخليهه محتاجه بس احنه نريد نفرحهه ...

خيه نتفق ليكدام الحاظر هلكد.... والغايب هلكد....

شمه: المبلغ جان خيالي لو اكبر واحد مايطلب هيج وينفذوا اله  رغم اعرف عمه فضه راح توافق لو تعرف تبيع الي عدهه والماعدهه...

عمه فضه دحكت علينه وماتعرف شتحجي صدك انصدمنه..

فضه: ترى هي مو بالفلوس المهم هم مرتاحين .....

سعاد: هذا الي عدنه والله انتو ماخذين شمعه البيت اذا قابلين اهلا وسهلا واذا ماعجبكم الله وياكم...

فضه: لا شلون ماقابلين شهد ماتعوضهه الفلوس...

وقار: من رخصتج خاله تسمحيلي احجي

فضه: تفضلي ابنيتي...

وقار: عيوني مانلكه مثل شهد وضرغام شاريهه واحنه موافقين على هذا المبلغ بس ماانسلمكم فلوس بايدكم...

سعاد: ليش هو مهرهه وحقهه هذا شنو ماتسلموهن؟؟

وقار: اي طبعا حقهه وماراح نخلي شي بنفسهه نروح وياهه والي تريده تختاره واحنه ندفع...

سعاد: لا ماكو هيج حجي اتجيبون الفلوس ليكدام واني اجهزلهه...

وقار: ماكو اشكال اذا هذا طلبكم بس دقيقه خلي اخابر قيصر ننطي علم وانشوف شيكول....

سعاد: لاعيني احنه نسوان بيناتنه نحلهه عليمن الزلم مانختلف ان شاء الله ...

وقار: لا مو المبلغ هوايه ولازم انشوفهم موافقين ...

والله ما نكذب عليج بس الي اعرف وتدري عمه فضه كل الي عدهم ذبوا على البيت وعلى سفر قيصر...

بس مو مشكله هم مخلين هاي الشغله بعين الاعتبار كالوا اذا اضطرينه نبيع الكاع للدوله حته تبني مدرسه ويتزوجون ....

سعاد: يا خيه صدك جذب احنه شاريكم قحط الفلوس كبعوا واخذوا هي بتكم...

وقار: يعني هسه تذبون من المبلغ لو استشير الولد...

سعاد: ياا خيه البت بتكم بعد حددو الي يناسبكم بس لا ادخلون الدكتور زحمه...

شمه: اريد الزم نفسي ما اكدر من الضحك وهاي اسماء بس اكتافهه تهتز وعمه فضه فاتحه عينه على وسعهه...

اتفقنه وطلعنه وخلتهم وقار ولاكلمه يحجن صدك داهيه...

نمشي وخربانين ضحك ووقار تمشي واطك بالكعب مالتهه وكلساع يفوت بالطين وتعثر...

طبينه للبيت لكينه الولد كلهم كاعديم لان دنيا المغرب رجعنه...

ضرغام: بشرن شصار؟؟

فضه: ولكم يمه شحجي سعوده طلعت ادور صفقات ...

كامت تحجيلهم بالتفصيل وعلى سالفه وقار وخربانين ضحك ...

وسام: يايمه شبيج متعجبه بوقار جابت راس حسام لو ماجابته..

حسام: كوم يول شنو طلي وجابته...

فضه: انزول عليك وسام بس يمه حسام فاجأتني مرتك فرتهه وخلت سعاد ماتعرف تحجي...

وقار: خاله اني محاميه بس غير ابنج ماخلاني اشتغل...

حسام: عفيه سباعيه شلون اجتج هيج فكره ..

وقار: هاي يسموهه نحتال على المقابل حته يعلن استسلامه بسرعه ...

شمه : عفناهم وطلعنه من المطبخ سمعت حسام يكولهه ...

حسام: اليوم الدور الي اريد اشوف حيلتج تنجح لو حيلتي؟؟

وقار: هوب هوب شمتفقين موكلنه هالاسبوع اووف..

حسام: منو كال انتي وحدج انطيتي اووف لنفسج وبعدين اريد انطيج مكافأه على نجاحج اليوم...

وقار: لاعيوني ما اريد مكافاه شكرا شكرا

حسام: لا ابد اني رجال خايف الله لازم اكافأج على تعبج...

وقار: حسسسام والله ازعل عليك مره وحده طبق الاتفاق...

حسام: ياروح حسام كولشي اطبق الا هاي الاتفاقات التعبانه اليوم يعني اليوم ...

شمه: الظاهر ابن عمي مستوي وشاويته وقار عمي حقه اذا هي جنهه جكوليته يوميه مسويتله سهره وبس الريش يطاير من جوا الباب...

رحت بدلت وصليت نزلت اساعد اسماء بالعشه لكيتهه كاعده تقري بوسام رياضيات شكلهم يخرب ضحك...

وسام نايم على ضهره ورافع رجلي على الحايط وهي كاعده يم راسه وتشرحله ...

اسماء: وسام اكعد حته تشوفني شلون احل...

وسام: مايحتاج سماع صوتج الجهوري كافي

اسماء: لاتقلد ترى والله ابطل ادرسك...
وسام: يولي احجي مو بديت افتهم...

اسماء: وسام انت ماجاي تفرق بين المثلث قائم الزاويه ومتساوي الساقين...

وسام:ليش ما اعرف واحد فاتح رجلي هذا متساوي الساقين ...

والثاني اوكفي خلي امثلج خلي اكوم

اسماء: وسام راح تخبلني صدك تحجي انت تنجح والله لوتموت وانت كلشي ماتعرف

وسام: كومي منا لا اموتج كومي مسويه نفسج ابن سينا وانتي هاشه ابدي...

يافهميه اني لو اشغل عقلي اكبر واحد مايلحكني بس شسوي واهس ماكو...

بس السنه لازم انجح حتلو اغش كلشي اسوي اخلي سماعه بس اطلع من نكره السلمان ( السادس يسمي نكره السلمان)

اسماء: خلي اروح اقره احسلي وعود سلملي اذا نجحت ...

شمه: سوالف وسام مايبطلهه لايقره ولايكتب جماعته بثالث كليه وهو لحد الان بالسادس ادبي ...

بهاي الايام التهينه بخطبه ضرغام ماقبلت شهد تسوي حفله وهوسه وحته عرس ماقبلت ...

بنفس الاسبوع هو خطبه هو عرس مع العلم عمه فضه رادت تفرح بابنهه بس احترموا رأيهه...

حته ماقبلت تلبس بدله وضرغام فد انقهر حقه عريس ويريد يفرح بس شهد مدري شجاهه حته اني ضجت منهه ومن حاجيتهه كامت تصيح سكتت..

بيوم العرس راح اخذهه ضرغام من بيت اهلهه لابسه فستان طويل وكل معاني الفرح معدومه عدهه عبالك مزوجيهه غصب...

ردت اعرف شبيهه وهي حته ماضحكت ابد اكثر شي قهرني ضرغام جان صافن عليهه ومنتظر يشوف فرحتهه ...

ضرغام كال مدام ماكو عرس ما اتزوج بالبيت اريد اروح لبغداد وحدي اخذهه وراح حته حسام ماراح ويااا ...

بيومهه عمه فضه شكد بجت دكول ابد ما اتمهل ابني وحته مو مثل الشباب فرح بعرسه ...

ذميت شهد بكلبي ليش هيج كسرت فرحتهم وشلون جانوا مخططين يسوولهه عرس ماصاير...

والله عمه فضه حضرت اشكال وكالت اكثر من عرس حسام اسوي واخلي الناس تسولف بي..

بس شهد جان عدهه غير رأي وكالت ما اريد عرس ولابدله يعني ماشايفه عروس تروح بفستان عادي للفندق ...

كلنه سكتنه وبيت عمي صدك مثقفين احترموا رأيهه وراعوا ضروفهه....

شهد...

من اجه ابوي وحجالي السالفه وشرط قيصر بيومهه ما اعرف افرح لو احزن بس بلاخير فرحت حيل ...

سألني موافقه كتله اي واني راح اطلب الطلاك من الشيخ ما اريده ينزل نفسه واني اعرف الشيخ فاضل شلون مستحقر ابوي وماردته ينهان اكثر...

من طلبت الطلاك الشيخ ماعارض بس كال خاف هددج ابوج كتله لاوالله اني برضاتي والرجال ماقصر بسرعه انطاني حريتي....

رجعت لبيت ابوي وسعاد وبتهه توقعتهن متندمات لا بالعكس حادات اسنونهن اكثر...

حته ابوي الي ماردت اقلل من شأنه وصلت بي حشاكم يطب ويطلع ينعتني بالساقطه ....

اتمنيت ارجع يم الشيخ ومرات اكول اتحملت هوايه خلي اتحمل هالشهرين واصير من نصيب ضرغام ...

الي يما عانه وتعب وسهر خلي ارجعله الفرحه ولو بشي بسيط...

ابوي يجوز اكثر واحد اذاني يكول لسعاد ايدج والضربه وياهه...

شلون ماتتمرد سعاد اكثر وتسيطر اتمنيت بنفس اليوم الي اطلك بي اتزوج ضرغام واخلص

بس مكتوب على شهد اتضوك اللوعه والعذاب لازم تشوف المرار..

سعاد خلتني خدامه بهاي الاشهر لبراء وهاي الثانيه السانهه متبري منهه ولاعبالك هي الي دمرتني...

حته وصلت بسعاد تخليني اكعد جوه رجل براء واغسلهه واذا اعترضت الصونده محضره دكوم تلعب على ضهري...

ومن يجي ابوي تحشي براسه ويرجع فوك كتله سعاد تجيني كتلته بحيث ما اكدر احرك لا ايد ولارجل ...

كرهت حياتي وكرهت حته ضرغام الي خلاني اطلك من الشيخ وارجع للعذاب...

وصلت بيه بيوم طلعت بالممر ذبيت نفط على روحي ردت احركهه واخلص بس مخافه الله منعتني...

ماكو تليفون واخابر بي واستنجد باحد حته رافد اخوي مااله اي ذكر الي سمعته مسافر خارح العراق وماندري بيا دوله حته وضيفته عايفهه ...

ابوي مرات اشوفه يخابر ويحاول يعرف اخبار رافد بس من اخر يوم طلع بي من الانبار محد شافه بعد

بس صديقه موصل خبر بأن هو سافر للخارج ومايرجع بعد...

كمت اعد الايام والساعات شوكت تخلص ويخلص عذابي تعبت حته جسمي ما يتحمل كتل بعد ...

سعاد وبناتهه مفترسات من كل جانب محاوطاتني ...

خلصت العده مالتي واجوا خطبوني ماردت حفله خطوبه بس اريد اخلص خلال اسبوع كتلهم اريد الزواج...

بس ماردت احرم ضرغام من فرحته وعادي يسوي عرس رغم الالم الي بداخلي بس فرحانه راح انجمع بي...

من مامحصلت سعاد فلوس وشلون وقار سوت بيهه تخبلت حته سلمان جان بنيته يحصل شكم مليون وخابت ضنونه...

بيومهه كلبوهه عزا عليه اريد اهج من البيت ما اتحمل بعد...

مرات اعاتب ضرغام معقوله ما اوجعه كلبه عليه ومرات اكوم اكرهه من انكتل بسببه...

قبل العرس ب4 ايام لزمتني سعاد كتل هي وبتهه الجبيره لحدما وكعت بالكاع وكالن اذا طلبتي عرس وحفله انوديج مشوهه لفضه...

جنت رافضه الذل وكلت شيصير خلي يصير ما اتحمل هالظلم هي حفله وبوجهي اروح ويه ضرغام لان نفس اليوم مال العرس...

بس ما احرم ضرغام فرحته وخاصه ينتظرني كل هاي السنين والشيب غزه راسه من ورا قهري...

اجت اسماء وشمه علينه يوم الثلاثاء وكالت علمود نحجز الصالون والبدله...

جانت واكفه سعاد واتفقت وياهن حسب الاصول وعلى اساس ثاني يوم اروح وياهن للصالون ...

بس طلعن هجمن عليه سعاد وبناتهه 3 حته حلكي شكنه شلون اطلب عرس وبراء تعوقت بسببي ...

شلون اخذتي ضرغام من براء وهي تحبه ...

سعاد تصيح بعلو صوتهه مااخليج تفرحين وبراء انهدم مستقبلهه ...

اشكال الضرب حصلت تالي ماتالي فوك كسرتي وحالتي التعيسه فوك ضيمي وحرماني ...

جوتني سعاد بمكان حساس حيل  وكالت كتلج اوديج مشوهه وهاي خلي يفرح بيج ضرغام من يشوفج...

احس نار واشتعلت بيه كل صوت اصيحه اعتقد سمعتني القريه بس بلافايده ...

معقوله هيج وصلت بيه فوك الالم الي يكطع بيه مال الحادثه فوك هاي العمله ....

المنظر مقزز وعرسي بعد يومين شلون اقابل ضرغام الي ينتظر كل هاي السنين...

بعدهه مصره وكالت اذا مارفضتي الحفله اسوي بيج اكثر بعد...

حته اجه ابوي بيومهه ويسمع صوت ونيني بس صدمني اكثر من يكول حيل بيهه من وراهه هاني قيصر وخلاني عبد مأمور بيده....

شكد تمنيت اموت بهذا اليوم وما اريد لاعرس ولاشي ...

ثاني يوم اجت اسماء وشمه وتلح عليه اروح لصالون بوقتهه انفعلت ورفضت حته حسيتهن زعلن ...

بس سعاد واكفه على راسي ما اضمن شتسوي بيه اذا طلعن وماعندي احد اعتمد علي...

اجه يوم العرس لبسني فستان يخزي والله لو حفله عاديه محد يلبسه بس سكتت ...

كلما احجي تجيني ضربه على راسي حته ماخلتني احضر نفسي كعروس مجرد وجهي حفته بتهه وخربت حواجبي...

اجه ضرغام وحسب طلبي لاسياره ولازفه بس اهله...

اول ماطب شفت الفرحه بعيونه بسرعه تلاشت وهو شافني بهذا الفستان القديم وحته يفشل ...

ماراد يخليني اضوج سوه نفسه طبيعي وهمسلي طالعه حلوه بس اي رده فعل ماكدرت انطي لان بوقتهه دمعتي واكفه على شعره..

ماسمعت لاصفكه ولاهلهوله ولا فرحه سلمان منع اي وحده تفرح...

خليت ايدي بأيدي وطلعت من هذا البيت الاكشر وعسا حوبتي ما تخطيهم...

حرك السياره ضرغام واني كاعده مدنكه مستحيه منه صار سنه ماشايفته ...

وحايره اذا شاف الحرك شحجي وشلون يتقبله ومنظره مقرف وحته بي جراحه...

حاول يلطف الجو وشكد تغزل وحجه بس ما اعرف شحجي...

هذا الانسان حبه طاهر ونقي وكلبه ابيض مايستاهل هالعذاب هذا...

طول الطريق ساكته حته هو من شافني هيج سكت وصلنه للفندق طبينه للغرفه...

الاجواء تخبل شكد تمنيت اعيشهه بفرح وسعاده شكد تمنيت هذا اليوم...

ابد ماضغط عليه خلاني على راحتي بدلنه وكعدنه تعشينه وهو يحجيلي سوالف عامه ...

شويه سكن روعي وبديت اندمج ويااااا وبعدهه صلينه ..

رحت سبحت ولبست نفنوف عادي حته مومال هيج يوم بس استحي اطلع جسمي وبي اثار ضرب ....

لكيته مدد على الجربايه فتحلي ايده ترددت بلاول بس بعدين رحت دفنت وجهي بصدره...

ضل يلعب بشعري الرطب ويهمسلي باعذب الكلمات ...

ضرغام: شو حبيبي اكعدي نشفي شعرج يذب مي

شهد: كعدت كدامه وهو ينشف بشعري الي عباره عن شبر جوا اذاني بالضبط...

حسيت على لمساته بدت تغلغل بركبتي وانفاسه الحاره...

قرب شفايفه على كتفي وطبع بوسه خفيفه ....

قشعر جسمي حس عليه سحبني بحضنه وهو يبوس بكل رقه وحنان...

اتذكرت الحادث المشؤؤم صارت عندي ردت فعل ودفعته بقوه...

انتبه على نفسه وعلى وضعي باسني من راسي وهمس باذني لاتخافين اني ضرغام..

شهد: ما اريد اليوم

ضرغام: منو كالج اسوي شي بس حته بوسه هم ممنوعه ترى ماسويت شي...

شهد: ضرغام ما اكدر انسى..

ضرغام: يابعد ضرغام واهله انسي كلشي هاي انتي بين احضاني واعوضج عن كل لحظه الم...

شهد: ياربي هذا الانسان لو اضل طول عمري اخدمه ما ارجع ذره من تعبه ...

ماردت اخرب فرحته وعفته على  راحته صح ماسوه شي بس يبوس ويحضن مراعي حالتي ....

الساعه ب12 وهو مخليني بحضنه ويلعب بشعري وايدي على صدره ...

واثنينه ساكتين بس كلوبنه تحجي...

دك التليفون مالته المتصل حسااام...

ضرغام: ها حسام شعندك بنص الليل ؟؟  

ما سمعت شكاله حسام بس فزت ضرغام وكومته من السرير على حيله بحد ذاتهه تخوف ....

حسام: يول شنووووو شتحجي انت؟؟؟

#يتبببع