رواية وحوش بشريه الفصل الحادي وثلاثون 31 - بقلم Rozaya1122

#البارت الثاني والثلاثون
#وحوش بشريه
#روزايه

اسير ع عيونك طيف مغتاض
من شوگي اعله كد رمشك ملامه.
واجيك شما علت ثمرة محاجيك
ي اول واحد استاهد كلامه.
نده انطش اعله جفك لو الاگيك.
حدر خدك اصيّر روحي شامة.
المك لو نثارك يترس الكاع.
بيدي ولو تطش گزيز جامه.
واضمك من دنيتك لو قست بيك.
اشبكك جن غمد شابك حسامه
...

شمه: نزلنه نركض وصلت على حافه الدرج واشوف عمه فضه مكطعه شعرهه بالكاع ....

وعلاهن لازمتهه وهي تصيح ولك يمه وساااااام
ياروحي يالمدلل ...

ولج عمه راح مني وليدي اريد وسام اسماء اخيج راح يروح مني....

اسماء: يمه اسم الله علي لاتكولين هيج لاتسوين هيج فدوه اروحلج...

فضه: اااخ ياكلبي وينك حسين من يوم الرحت وماكو مصيبه ماوكعت على راسي ....

ربي ماعندي بالدنيا بس هذوله لا تفجعني بيهم خلي يومي قبل يومهم...

شمه: التمينه على عمه فضه كوه لازميهه لان تملخ بنفسهه بدون شعور مانعرف شصاير ...

علاهن: ذكري الله يافضه هسه يرد سالم بس تصوب وولدج اسباع مايوكعون بسرعه...

عبنهم زلم معدله لاتكعدين تنوحين عليهم وهو مابي شي موزين يمره.....

فضه: ااخ عمه وسام ابو كلب الطيب اجت الطلقه بي وليدي حبيبي ماعنده اذيه على واحد ...

علاهن: كافي كومي ادعيله مايصير علي شي كتلج يرجع سالم وتزوجي وتفرحين بي ...

فضه: الله يسمع منج عمه ...

شمه : التمت علينه الناس بنص الليل هذا الحجي ب2 كرايبنه كلهه اجت ....

مانعرف شكو وحاله وسام شلونهه كلهم اندك عليهم مابجاوبون...

كامت الناس طابه وناس طالعه عبالك دنيا الصبح بس الضرب كعد الناس من نومهه ....

عمه فضه ماسكتت ابد كاعدين يمهه ولازمين ايدهه ونهدي بيهه بس ما اتحملت انتهت وتخربطت...

من شفت حالتهه هيج واسماء حايره بأمهه ركضت دكيت على قيصر وماجاوب رديت دكيت على ضرغام جاوب بس يمه هوسه....

شمه: هااا ضرغام وينكم ليش ماتجاوبون عمه فضه تخربطت طمنونه على وسام...

ضرغام: زين مابي شي مصوب برجله وسووله عمليه لايضل بالكم وامي روحي كوليلهه زين

شمه: على الاقل واحد منكم يجي يطمنهه راح تموت كلساع تتخربط ...

ضرغام: هسه ارجع لا تخافون والله مابي شي اصابته موخطره ..

شمه: سديته من ضرغام ونزلت ركض طمنت عمه واسماء بس بعدهه روحهه تلوب علي...

جانت ليله سوده الناس متجمعه يمنه حته مالحكت تفرح عمه فضه بالبنيان واثاثهه الجديد...

منين تتلكاهه يوميه مصيبه ابد ما ارتاحت هاي المره هم ولدهه جابلهه اشكال الامراض من ضغط وسكر...

صارت الساعه ب5 الفجر اكو ناس راحت وبيت علاهن فرشن ونامن من التعب ...

واني كاعده مكابله اسماء وامهه وعلى فد بجيه لحظه ماسكتن....

سمعنه صوت سياره بالباب ركضنه نشوف منو من الولد اجه طلع ضرغام بسرعه عمه ذبت نفسهه بحضنه...

فضه: ولك ضرغام اخوك شلونه لاتجذب عليه كلبي راح يوكف علي...

ضرغام: يمه زين تعالي شمسويه بنفسج راح تتخربطين...

فضه: لاتجذب عليه ضرغام بروح ابوك..

ضرغام: والله العظيم زين كلشي مابي جنه حصان ...

اول ما كعد من البنج يصيح فضه جوعان ولسانه شطوله....

فضه: يابعد روح فضه حبيب امه ربي رجعه سالم غانم...

ضرغام: يمه راح اسبح واصلي واروح بمكان قيصر لان حيل تعب وضغطه مرتفع ...

فضه: يمه اسم الله شبي قيصر ماعنده ضغط..

ضرغام: والله ما ادري اشو هناك وخشمه طك دم وطلع ضغطه مرتفع...

فضه: روح يايمه خلي يجي يرتاح انشلع كلبه سوده عليه...

شمه: من اطمنوا على وسام بدت الناس تروح كلمن لبيته ضلينه بس احنه....

ضرغام رجع للمستشفى حته يجي قيصر ضل بالي علي ...

تعبنه حيل من البجي والسهر مددت على التخم وعمه واسماء بغرفتهن تعاجزت اصعد ليفوك...

غطيت بالنوم و فزيت على صوت قيصر يكعد بيه...   

قيصر: شمه شمه اكعدي ليش نايمه هنا؟؟

شمه: ها قيصر اجيت شلونه وسام؟؟

قيصر: زين الحمدلله باجر يطلع وين امي لعد

شمه: نامت يمكن بغرفتهه هي واسماء....

قيصر: ضرغام كال متخربطه شلون صارت خطيه اكعدهه ..

شمه: لا من اطمنت على وسام زينه صارت واسماء انطتهه منوم....

قيصر: كومي نامي فوك حته اني راح انام ماكو شي عدت على خير

شمه: منو الي سوه هيج وهجموا على البيت؟؟

قيصر: حراميه عابرين على البستان وماخذين حلال من ذاك الصوب وشايفهم عمي حسن وضارب عليهم...

وماكو مكان يطلعون منه وطفروا على بيتنه واحنه منا وهم يضربون تصوب وسام برجله ...

شمه: ماعرفتوهم منو؟؟

قيصر: لا لزموهم من غير قريه هم معروفين حراميه

شمه: الحمدلله كلوبنه وكفت وخطيه عمه كلساع تتخربط

قيصر: راح انام اني ولا تكعدوني اني اكعد وحدي لان حيل تعبان...

شمه: ماشي اني هم اروح انام ....

صعد لغرفته ينام وصل لنص الدرج والتفت عليه اني ادور على تليفوني حته اصعد انام مدري وين خليته...

قيصر: شتسوين يله تعالي نامي...

شمه: بس ادور على تليفوني هذا لكيته

قيصر: يله امشي

شمه: صعدت ويا وهو راح لغرفته واني لغرفتي هذا شبي ...

خبال ااي والله اريد افتهمه ما اكدر كلساع براي ويطلع بسالفه صفح....

ثاني يوم طلع وسام وبدت الهوسه من جديد والخطار رايح جاي ...

ارجع من الدوام ما انام الكه البيت طاكه بي عبوه من المواعين والاستكاين والي يشرب عصير...

اسماء عليهه التنظيف واني عليه المواعين من صدك تعبت بهاي الفتره

بالدوام اتجنبت محمود حته جنت اسلم بعد ماسلمت ...

ما اريد تجيني حجايه من ورا لان احسه صاحب مشاكل ويدور فرصه حته يفتح موضوع وياي...

صحة وسام بدت تتحسن وكام يروح علاج طبيعي وعمه فضه مكابلته وكاعده ....

ساعه يتعاركون هي ويا وساعه نسمع صوت ضحكهم عالي...

وسام: ااخ يمه  راح اموت وماشفت بان !!

فضه: اسم الله عليك يبعد امك يومي قبل يومك...

وسام خليني اسمع صوتهه روحي خابريهه تلكين رقمهه جوه المخده...

فضه: شيسوي جوه المخده هو رقم ...

وسام: ما احافظه موتدرين ما اكدر احفظ دماغي ضعيف...

اسماء: مصوب وكاعد تحشش اطمئن عيني خابر خالي كال جايكم بالطريق..

وسام: لا صدك كومي جيبي العكازات خلي اكوم اسبح واتعطر...

اسمعي يمه من يسألوج شلون تصوب كولي غير طفروا علينه حراميه وطلعلهم وسام طشرهم...

نصيح انزل ولك راح تموت وهو بس بالفانيله صفاهم تصفي

خلاهم مايلحكون يشردون خرطهم خرط وهو بالطرمه....

تالي اجته طلقه غدر وصوبته بس خلا جثثهم تارسه البستان....

فضه: عمة عينك على هالجذب ولك ماتجوز من هاي السوالف ...

وسام: هذا جذب ابيض غير اخوج نافش ريشاته ويحجي بطولاته وعباله بس هو سبع...

فضه: لاتحجي على اخوي ترى اخلي ماينطي بنته

وسام: لا صدك جذب اروحلج فدوه انتي وبنت اخوج...

شمه: لوما وسام جان الكأبه فول بس نتحرش بي هو يكب علينه بعد مايسكت...

للعصر اجو بيت خالهم ابو عبير وبان ماجايه لان عدهه مدرسه ....

خطيه وسام ضاج حيل وشلون جان متحضر لشوفتهه بس كال ابوهه بالعرس اجيبهه ...

ضلوا يمنه يوم وثاني يوم من الصبح راحوا بس عبير ضلت لان متخرجه وماعدهه دوام

بهاي الايام بعد ما تحسن وسام وكام يطلع بدينه نحضر على عرس حسام ويصادف ويه يوم العيد ...

قيصر وحسام ابد ماشفناهم صار تقريبا اسبوعين او اكثر داوم عدهم ومايكدرون يجون كل اسبوع يكولون الوضع بالطريق يخوف.....

يصادف اول ايام العيد هو الاربعاء قررو يسوون الحنه بهذا اليوم ...

طول الاسبوع دك شغل وتنظيف وماخلينه شي ماسوينا ....

وعمه فضه تفتر ورانه وتصيح اريد البيت مرتب راح يجون اهلي من بغداد وصار سنين ماجايين...

يوم الثلاثاء يله اجو الولد وجان حسام محمل اشكال العلاليك ...

خطيه جايب ملابس النه اني وعمه واسماء للعرس لان التهينه بالبيت ونسينه نفسنه...

صدك هوسه ومخبوصين ويحضرون ولان هذا اول عرس الكل فرحان....

بيوم الحنه الصبح يوم الاربعاء الي هو يوم العيد كعدنه من الصبح على صوت الطلقات وتكبيرات الجوامع...

جانت هاي اللحظات غايه بالروعه ماتنوصف شكد حلوه واحنه نسمع التكبير بكل جوامع الانبار....

الولد يرحون للصلاه من الصبح يجون يله نتريك...........

بدلت ولبست كلابيه حلوه لونهه بنفسجي غامق وشويه مكياج ولفيت الشال ونزلت...

لكيت عمه فضه كاعده هي وحسام سلمت عليهه وعايدتهم....

ورا شويه اجوي البقيه  بس قيصر ماكو واللمه تخبل وضرغام راح جابلنه كيمر وكاهي....

فضه: خلي نروح لجدتكم نعايدهه وعايدوا عمكم وقيصر من يرجع هو يجي ورانه...

شمه: طلعنه كلنه لبيت علاهن لكينا مكلوب عبالك روضه من الجهال حته احلوكنه تعبت من المباوس...

الكل يدري اليوم حنه حسام يعني هاي الجموع الغفيره  العصر تتحول يمنه....

عماتي ماشاء الله عشيره هن وبناتهن وجناينهن وعمامي كذلك واخوات علاهن واخوتهه كلهه معزومه على العرس....

عمه فضه كل الي تشوفه تعزمه دكول شعندي غيرهم وهذا اول فرح....

ما تأخرنه هناك شويه ورجعنه حته نكمل شغلنه وهاي عبير كلساع وكالت يله دكول اخاف من علاهن....

رجعنه للبيت مرتب ومخلصين شغلنه ننتظر توافد الجموع اهل بغداد خابروا كالوا جايين بالطريق...

جنت كاعده بالمطبخ اني واسماء وعبير نسولف شراح نسوي بالليل وشنلبس...

لمحت قيصر اجه اول مافات ركضت اسماء حضنته وتبوس بي ....

علاقتهم حلوه ولا عبالك هو الجبير دكول حته اذا اريد احجي شغله اروح احجيهه اله من دون اخوتي...

بوسهه من  راسهه وعايدهه كامت عبير سلمت علي ....

وصل الدور الي سلمت علي وعايدته حالي حال البقيه وسلامي جان بارد تعمدت اسوي هيج لان مليت من تصرفاته يوميه شكل....

هو عادي عنده سلم وطب جوه ورا شويه طلع هو وحسام يحضرون للحنه وخاف اكو نقص...

صارت الساعه ب11 نسمع هورنات السيارات وعبالك زفه معناتهه اجو اهل بغداد...

وكفنه نستقبلهم بالطرمه اول مانزلو كلهه تهلهل والصوت عالي ...

سلموا على عمه فضه اخواتهه 2 هن وبناتهن واخوتهه 3 هم وعوائلهم وحته عدهم جنانين....

اول مادخلن بالصاله ذبن هوسات ويركصن  واسماء بنصهن تكمز....

حيل حلوات وبسيطات شلون عمه فضه فدوه لله السانهن يخبل ....

تعرفت على بناتهم اكثر شي اختلطت بساره وبان وعبير.....

صار العصر رتبنه شغلات الحنه وحضرنه ملابسنه ووسام جابلنه ديجي كال اريدج للصبح اليوم....

سوينه حفله بيوم الحنه بليل جانت الحفله تخبل اسماء مو هاي اسماء الخجوله ذبت لحم هي وبنات خالهه وخالاتهه ....

اني لبست نفنوف قصير ربع ردن وبدلت وراهه لبست النفوف الي اشتراليا قيصر ورفعت شعري وخليت مكياج طلعت شكل ثاني....

اسماء كلساع تجرني نركص واني على حس الطبل خفن يرجليه ماضلت عندي ركبه من الهز...

الكرايب والجيران كلهه مجتمعه والفرحه شكبرهه وكل الهلاهل البغداديه من خالات العريس واصله لشارع...

صدك جان عرس حسام ما اله مثيل اول فرح واول عرس لهاي العائله بحيث كلوبنه تركص قبلنه

بنات خاله عبير وساره ركصن ركص خلن النسوان صافنات...

اجسامهن حلوه وكلهه تاشر عليهن ويكولن شوفن البغداديات ...

اسماء تهوس احنه خوات العريس واليوم نلعب جوله....

الحفله صايره احزاب جماعه علاهن يركصن وحدهن جنهن غنم هايجه كله تخربط والالوان احمر واصفر...

وجماعه عمه فضه قمه الاناقه والترتيب والركص يجنن حته الجيران تعجبوا بيهن....

عماتي يركصن بالصاله ومو ركص دبج بحيث نسمع صوت الكاشي...

جانت هوستهن على عناد خالاته لعبن لعب عماته....

وخالاته خربانات ضحك يكولن نخاف من علاهن ما نكدر نحجي....

خالتهم ياقوت صاحت حسام وكالت من يطب اريدجن تلعبن لعب  بعناد علاهن....

صدك اول ماطب كامن يهلهلن ويهوسن اسماء واكفه على الدرج وفاتحه اغنيه حسام هم عريس هم نمشي....

اخذ صور وياهن وعلاهن كاعده تنفخ جنهه تنين لان البغداديات استحوذن على الساحه....

صدفه دخل قيصر مدري شيريد ياخذ فجأه كامت علاهن تهوس واليوم الك يدكتور .....

من سمعهه دحك عليهه وضحك عبير كالتله خلي ناخذلك صوره انت وعمه....

وكف بالوسط ومنا عمه ومنا اسماء وعبير تريد تاخذلهم صوره اجت عيني بعينه....

صاح تعالي شمه ....

فضه: تعالي يحلوه اليوم كومه خطبوج من عندي

شمه: استحيت من كالت هيج وكفت بصف اسماء واخذنه الصوره....

من كملنه التفت عليه قيصر كال منو خطبج؟؟

شمه: ما ادري والله هسه سمعت من عمه...

قيصر: شدعوه هلكد طالعه حلوه وعيونج تخبل

شمه: شكرا من رخصتك...

عفته ومشيت ابد ما انطيته مجال اعرف هنت كرامتي هواي ع الاقل احافظ على ماتبقى منهه....

ورا ماخلصت حفلتنه سمعنه صوت الجوبي برا معناتهه بدت حفله الولد....

الجام معاكس طفينه الضوه مال الغرف الفوك وندحك عليهم شلون يركصون...

جان لازم طرف الجوبي ضرغام وبيده سبحه وحسام من الجهه الثانيه وبالنص اصدقائهم ...

فتحوا الدبكه وهم يركصون اول مره اعرف ولد عمي هيج يعرفون يركصون ...

الحركات تخبل وطالعين صاكين بالدشاديش خوب ضرغام الله يستر علي كلهه دكول كمر وضاوي....

حته حسام رزن والاكتاف عريضه ادري عمي حسين وفضه جان عدهم مصنع مال كيك...

ضرغام لابس دشداشه بيجي تجنن علي واللحيه محدده وعيونه صفر ...

جانن البنات يسألن على قيصر ليش مو وياهم يركص...

اسماء: يابه كل عقلجن قيصر يركص الا اتخبل...

عبير : شكو بيهه هي دبكه مال رياجيل وحلوه دشوفي الولد يخبلون...

اسماء: ذاك قيصر كاعد شعره متروس شيب وينه وين الركص...

تلكي يحل فصول وحاير بمشكله هذا وذاك...

عبير: اي والله عبالك اكبر من عمره خطيه ...

شمه: جان قيصر لابس دشداشه نيلي وكاعد بصف واحد شيخ يمكن ومندمج بالسوالف...

اسماء: يابه بعرس قيصر العب لعب الا اطلع من الجامه...

عبير: حته يربطوج بالسياره ويشحطوج وراهم

ساره: يبنات خلي ننزل هسه يجي واحد منهم ويسويهه علينه هوسه..

اسماء: اي والله خوب اذا قيصر يشمرنه من الطابق الثاني...

عبير : قبل لا ننزل خلي نشوف غرفه العروس
ماشفناهه اجينه متأخرين..

اسماء: يله تعالن بسرعه

شمه: دخلن للغرفه وبدن يتفحصن بيهه جانت  حيل حلوه وراقيه هستوه نازل موديل التركي مو حيل الناس علي وخاصه بمناطقنه

لونهه بيجي فد حلوه والفرشه تخبل ...

ساره: هسه مال واحد يفرش بيهه وينام

عبير: لا عيوني ماتفيد النومه وحدج

ساره: اي يراد واحد من هذوله الصاكين الجوه

عبير: اذا حصلتي واحد جيبيلي وياج

اسماء: يامعزايات لا يجي واحد يسمعجن خلي نزل لانترزل ...

شمه : نزلنه جوه وبدينه انلم بالهوسه ونعزل والولد شويه وكامو يطبون للبيت...

وسام عيني تفتر ورا بان وهي الله يستر عليهه بايعه ثكل علي وكلساع اشوفهه تسرق نظره ....

بيومهه ضلينه كاعدين بغرفه عمه فضه كلنه عي واخواتهه وبناتهن لحد 3 بليل يله نمنه

سوالفهن تخبل وشقى وضحك من التعب كمت كوه افتح عيوني ....

ثاني يوم من الصبح نفس الكراب والشغل ماقبلوا تروح زفه كالوا الطريق يخوف طلعوا من 11 حته بدون غدا ....

بس الزلم راحت زفوهم للفندق ورجعوا المغرب على نفس الهوسه نفسهم الي بالحنه باتوا لان منتظرين يشوفون العروس ....

قيصر كال من يجون ثاني يوم نسوي غده وسون انتن حفله.....

ثاني يوم جان اصعب يوم لان اكو غدا وواكفين على رجلينه حته الولد تركض هوايه ناس عازمين...

ساعه 10 ونص صارت الهلاهل والصلوات اجو العرسان ....

طبت العروس خطيه غريبه وادحك بالوجه سلمنه عليهه تعرفنه اني واسماء ...

من سلمت همست باذني عفيه لاتعوفني وحدي استحي....

رحت كلت لعمه فضه كالت صعديهه بغرفتهه النسوان يدحكن عليهه وهي تستحي....

صعدناهه اني واسماء جانت لابسه قاط او وايت فتحت شالهه وشعرهه وحضرت ملابسهه تريد تبدل....

بعدنه نسولف وياهه ونريدهه تاخذ على الوضع جان ينفتح الباب حته بدون دك.....

علاهن: بالمبارك عليج يابنتي
وقار: الله يبارك بيج بيبي ...

علاهن: يله يبنت شوفيني نيشانج

وقار: يانيشان؟؟

علاهن: شرفج عيني خلي نشوف شلون جبتي الرجال وعاف بنات ديرته

اسماء: بيبي شنو هالحجي والله اذا سمع حسام مايقبل هي امي وماطلبت هالشي...

علاهن: سدي حلكج انتي ولاتتدخلين

شمه: البنيه صار وجهه اصفر حته الدموع اتجمعت بعينهه...

وقار: ماسوينه شي البارحه...

علاهن: هااا ماعندج نيشان كره عينك يحسام منين جبتهه هن هذني بنات بغداد مثل امك من جابهه ابوك...

ليش ما اخذج ابني سبع الصوج بيج واخذج يستر عليج...

وقار: لا حجيه والله مووالي بالج

علاهن: امشي كدامي اليوم اخزيج يجنه فضه...

جان تجرهه من ملابسهه وشعرهه مفتوح ونزلتهه على الدرج واحنه نصيح وراهه ....

وهي تصيح فضه جنتج مو بنت يفضه يام بغداد جنتج ملعوب بيهه.....

#يتبببع