رواية وحوش بشريه الفصل العشرون 20 - بقلم Rozaya1122

#البارت الواحد والعشرون
#وحوش بشريه
#روزايه

بيــن امســح دمعتــي
وبــين ارد مڪــسور
وبــين اضحـــك ﭼــذب مابــين الــ بيــه

مــو بــس لــ الســـتر
 مــنها وعــرفت الـــشال
وگــفته شگــدها لــ الماعــدها ترچيــه

ورديــت بــ خـــلگ والد بابــن جــناز
وتوســل گــمت ع الخطــوه رجــليه

من ظهره عرفته موغريب عليه بس اندار فتحت عيوني على وسعهن من الصدمه...

معقوله وسام ابن عمي حسين هيج يسوي والبنيه من غير صوب جايه لبستانه...

حيل صغيره ومختليه هيج ومستمتعه وسامحتله عزاا بعينك وسام اذا شافته امه الا تشيله منا...

بسرعه دخلت ليجوه وماحجيت شي وبعدني مصدومه وسام تطلع منه هيج هو عمره 17 سنه بالخامس اعدادي

ولد عمي مؤدبين حيل وماتطلع منهم العيبه هذا وسام بسلا يطلع على عمه الي هو ابوي

ضليت كاعده بالمطبخ والبيت هادىء ادحك بأركان البيت عمري ماشفت الهدوء والراحه بس هنا

البيت نظيف والاثاث اخر موديل وبناء حديث لان كل سنه يعدلون بي وعلى ايد عمه فضه الي صدك ام بمعنى الكلمه ...

تمر الايام هادئه حيل ضرغام وقيصر ببغداد واني واسماء يجينه الخط ونروح ونرجع سوه

من نرجع بسرعه انام نكعد نلكه عمه فضه مسويه عشا واني واسماء نغسل مواعين ومرات انظف بالليل

حيل حلوه حياتهم ربي يحفظهم وين جنت عايشه بنص الضيم اكوم واكعد برزاله وليل نهار اكرف شغل ومحد راضي عليه...

فرحانه بنفسي حيل ملابسي راقيه على اخر موديل ومن يطلع الخط اشوف بنات القريه شكد يدحكن علينه

مثل من جنت اتحسر من اشوف اسماء تروح واني كاعده صدك الشهاده والدراسه الهه دور

حتى طبعي تغير صرت احجي بهدوء وما انفعل على اقل شي احس نفسي صرت رزنه وصاحبه مسؤليه واكو هدف بداخلي لازم احققه...

مر اسبوع الوضع هادئ وكل مشكله ماكو سالفه وسام ماحجيت وضميتهه خاف يكولون شمه تسبب مشاكل...

صادف يوم اربعاء وعمه فضه كاعده تحضر باجر يجون ضرغام وقيصر وعمه فضه كل واحد تحضرله الأكله الي يحبهه...

اندك الباب راحت اسماء واجت كالت نوفل يكول الحجيه مريضه خلي تجي اشوفهه

ماردت اروح بس عمه فضه كالت خطيه مره جبيره وعمرهه مو طويل لاتكسرين بخاطرهه روحي شويه وتعالي واذا تأخرتي اني ادز وسام عليج...

رحت بدلت واني مارايده اروح بس بيبي صايره بين عيوني هي الي ربتني وتعبت عليه ...

طلعت امشي ويه نوفل بالبستان شفت براء تنشر ملابس على الحبل شافتني طكت عيونهه عافت الملابس واجت تركض...

اول ماتخوصرت وبدت تعد شعندج جايه واليوم هيج اسوي وهيج اسوي ....

شمه: براء اني ماجايه اتعارك وياج ولا اسمع صوتج الحلو ابعدي عن طريقي احسنلج

براء: ام الوسخ صاير براسج خير وتعرفين تحجين اصبريلي الا اخلي تاليتج خدامه جوه رجليه انتي وشهد الي ادافعيلهه..

شمه: تحجين صدك اني اصير خدامه لبراء  الوسخه عيدي حبيبتي ماسمعتج زين واياج تمدين ايدج على شهد

خاف هذيج المره صوبتج المره الثانيه احطهه بكلبج  لو اعرف ادخل سجن ماعندي شي اخسره

امشي منا لا تعرفين شسوي بيج مو عبالج اخاف منج اذكرج خليت دمج بطولج شلون شكول ...

عفتهه ومشيت وعفتهه ادردم هم مصدكه نفسهه الثور ...

دخلت للبيت  لكيت بيبي مريضه ويمهه علاكه الدوا بوستهه وحضنتهه

ياغاليه ان شاء الله المرض لعدوينج منين اجتج قبل شكم يوم تخبلين جنج ورد...

بعدني احجي وفززني صوت امي غمضت عيوني بقله صبر...

امي: من تشوف خلقتج الزفره يجيهه المرض والهم ..

شمه: التفتت عليهه شحجي وياهه هاي
بسم الله يمج بكاعج حاجيه وياج اني

امي: كومي اطلعي برا لا هسه اخلي دمج بطولج اكرهج وما اريد اشوف وجهج بنت الزاني اكرهج

شمه: تصيح بعلو صوتهه اكرهج حته بناتهه واكفات وبنات خالي يتفرجن وامي تصيح اكرهج

احس كلمتهه تطعن بوسط كلبي وصداهه يرن بمسامعي...

منو كالج اني احبج ومنو كال اني طابه بيت رجلج هذا بيت بيبي موبيت حضرتج من اجي لبيتج اطرديني

اشوف بيبي تهمش بيدهه تريدهه تسكت وامي واخواتي عقارب وهاجن

رونق: كومي اطلعي بكرامتج لا اسحلج هنا سحل واخلي الكل يتفرج عليج

شمه: هييي انوبه انتي ست رونق طالعلج السان ادري انتن شنو من بشر ...

لا موبشر انتن حيوانات وحتى الحيوان بكلبه رأفه ووفه بس مثلجن ومثل حقارتجن ماشايفه ..

كمت وكفت واحجي بكل عصبيه اسمعن زين  وحاضرجن يعلم غايبجن...

والله وحق محمد الي ماتلم السانهه اخليهه علج بحلوك الناس تحترمن نفسجن وتسكتن...

لاجايه ابيت وحده منجن ولابيت الخلفوج من اكعد بضيف رجلج طرديني ...

وهاي الكاع كاعي وبأسمي اني هسه ببلاغ واحد اشمرجن برا انتن وسلمان وعشيرته خلني ساكته واحترمن نفسجن...

لاتخلني اطلع من طوري واشوفج وجه ثاني لشمه..

وانتي سناء حبيتيني وكرهتيني ماتفرق عندي لان وجودج  وعدم وجودج لاشي بالنسبه الي

من كلت هيج عبالك بلعن لسنتهن وحده ضلت تباوع لثانيه وسكتن ماحجن حرف واحد ...

اشرتلي بيبي نوريه كعدت بصفهه وطردتهن برا الغرفه....

نوريه: يابيبي اني عمري مو طويل وانتي وحيده وهاي امج اول وحده تلدغج

شمه: كمت ابجي واحجي بيبي اني شنو ذنبي ليش تكرهني موبنتهه اني...

نوريه: امج مره من المرات رادت تطلك ووصلت للطلاك بس يابيبي شاءت حكمه ربج وطلعت امج حامل بيج...

ترى من زغرح وامج ما تحبج ذاك الحب بس جنتي طفله ما تفتهمين

يابنيتي امج الله عاضب عليهه ولا راح ارضى عنهه ابد لان اذتج هواي وتخلت عنج

ومن تزوجت رجلهه يكلهه ممنوع تحاجين بنتج وجانت تجيب بنت رجلهه وياهه حته توصل حجي لابوهه

تذكرين مره من جابتلج ملابس هاي بنت رجلهه رايحه حاجيهه لابوهه ومن هذت اليوم امج اذا جان اكو ذره محنه بكلبهه انشالت

الله لايخليج بحاجتهه ادري بيج سباعيه ويعتمد عليج وهاي ثورتهه لان اني ما انطيتهن قطعه من ذهبي

كومي شمه فتحي هذيج الخانه واكو صندوك بعلاكه سوده اخذي وبوجهج لبيت فضه

وصلي هاي رسالتي لفضه كليلهه الحجيه نوريه تسلم عليج وتحملج امانه الصندوك والحامله الصندوك

كليلهه الحجيه دكول لاتفرط بالماسه الي امنتهه عليعع وخلي تنصفهه  ولا تصير هي وزمن عليهه

واني اعرفج يافضه مره معدله بنت اصول احملج هاي الامانه واعرفج كدهه وراح تصونيهه...

شمه: بيبي عمرج طويل كولشي ما اريد لاذهب ولافلوس بس دعوه من كلبج الطيب

دنكت عليهه بوستهه وابجي بيبي جانت الي ام واب وصديقه وشكد دافعت عني رغم حيلهه المهدود

اخذت الصندوك وطلعت محد شافتني لان طلعت من الباب الخلفي حته شهد ماشفتهه ...

وصلت للبيت انطيته لعمه فضه وكلتلهه رساله بيبي بس مافهمت شتقصد بالماسه الي عند عمه

فتحنه الصدوك جان عباره عن قطع ذهب 4 محابس وكلاده على شكل سبحه جانو قبل يلبسوهه وحجل واحد و4 سوارات و3 ازواج تراجي

الي عرفته هذا ذهب بيبي كله حرمت بناتهه منه وانطته الي اكول سناء وبناتهه شبيهن متخبلات

من شافته عمه فضه وسمعت برساله بيبي بجت وحضنتني وكالت اذا رحتيلهه كوليلهه

عمرج طويل حجيه والأمانه بالحفظ والصون لا تخافين ....

كولشي مافهمت من رساله بيبي والذهب ضمته عمه فضه ...

ثاني يوم رجعنه من الدوام لكينه الولد كلهم جايين والبيت مهوس من ضرغام ووسام لان وسام ياخذ بغراض ضرغام بدون مايستأذن...

ورا العشه تشجعت وكلت لازم احجي ويه قيصر بالموضوت الي بالي وبلكي مايفشلني...

صعدت لغرفته دكيت الباب اجانب صوته تفضلي...

دخلت للغرفه لكيته كاعد ورا الميز وبيده تقارير يقره بيهه

قيصر: هلا شمه تفضلي
شمه: ممكن احجي وياك شويه

قيصر: تعالي اكعدي

شمه: قيصر اريد طلب منك

قيصر: من عيوني كولي شنو

شمه: انت موكلت احول الكاع مال ابوج بأسمج ؟؟
قيصر: اي صحيح

شمه: اني ماريدهه خليهه باسمك بس اريد تحول الكاع الي كاعد بيهه خالي سلمان باسمي يعني يصير سد بسد

قيصر: يولي شمه شلج بهاي السالفه لادخلين نفسج بمشاكل انتي في غنى عنهه

شمه: حباب قيصر اصلا كاع ابوي اكبر من كاع سلمان بس اريدهه كسره خشم لا اكثر

قيصر: اني موكوتلج انتبهي على دراستج وعوفي هاي السوالف

شمه : والله اوعدك اطلع الاولى بس حولهه انت ماتعرف سلمان شلون ذلني وشكد اذاني
رد اعتباري قيصر فدوه...

قيصر: هاهي ماشي بس خلي افرغ واسوي المعامله والموضوع ما اريد احد يعرف بي ....

شمه: شكرا شكرا ماراح انسالك هذا المعروف ابد

طلعت من يمه واني فرحانه اريد اشوفك ياسلمان وياسعوده شتكولون من تسمعون كاعدين بكاعي

وانتي ياسناء وبناتهه متأمله تحصلين حصه وتنطيهه لرجلج اريد اشوف شمه شسوي بيكم

بديت ادرس مثل ماوعدت قيصر حته اطلع الاولى
عيني بالكتاب واحضر محاضرات دائما...

جان اكو طالب ويانه هو الولد اجتماعي يختلط هوايه ومن يفوت لازم يسلم ...

اني جنت اتجنبه موبس هو اي ولد لان كليتي مهدده بس تطلع عليه سالفه معناتهه يبطلوني وما انسه كلام قيصر من كال ما اريد تطلع حجايه عليج ....

ضرغام نقل دوامه بلانبار يشتغل بمصرف وحياتنه ماشيه هادئه واني درجاتي حيل زينه ومن اشوف اسماء تقره اكعد اقره لان هاي الانسانه ناجحه بمعنى الكلمه...

بيوم كاعدين بليل نقره ونسمع صوت قيصر رج البيت رج وعمه فضه اسمعهه تصيح سوده بوجهج فضه.....

نزلنه نركض ونشوفلك قيصر اعصاب وضرغام يهدي بي مانعرف شكو

بس من شفت وسام واكف ومدنك عرفت السالفه عليمن ...

قيصر هد على وسام ولزمه من ياخته ويرزل بي وهذاك ساكت ولاحجه

اخر شي قيصر ضرب وسام راشدي من القوه مالته حسيت اذاني انشلعت من يمي

كل هذا واحنه ندحك من فوك مايشوفونه وسام يعتذر لاخوا ويبوس بعمه فضه

وهي زعلانه علي وادفع بي الي عرفنا قيصر عرف بسالفه وسام الظاهر هالقيصر عنده عيون بالقريه

ولزم وسام وضربه شلون يسوي هيج ببنت الغالم وحذره اذا شافه مره ثانيه يفتر بالبستان الله كتبهه علي...

وصدك من هذاك اليوم وسام مايطلع ابد الا عمه ادزه بشغله شكد حلوه شخصيه قيصر

الجبير والصغير يخاف منه ويحترمه خاف جنتي مامعجبه بي ياشمه هسه انعجبي اكثر .....
....

مرت ايام بالليل من انام افز مرعوبه واحس اكو شي جاي يصير او راح يصير ...

حته مرات اخاف واضل لافه نفسي بالبطانيه ..
هاي القريه تخوف حيل بين كل فتره ينفقد واحد ويطلع مقتول ...

ما ادري ليش يراودني احساس مو حلو اتجاه بستان علاهن وحته من امشي بي تتخيلي هوايه اشياء ....

اتعوذ من الشيطان واستغفر واكوم اصلي بس هاي الافكار ماترضى تعوفني ....

بيوم منهن جان عرس بنت عمي الشيخ حسن  ورحنه بيومهه بس جنت ابد مامرتاحه...

هذا الموقف ما انسى ابد لحدما اموت لسه يتخيلي ...

جنت واكفه يم المرايه واعدل بشعري حسيت على ايد تخلت على كتفي التفتت ماكو كولشي اصلا جنت بس اني بالغرفه...

جنت متاكده وحسيت بالمسه كأنوا ايد انسان ولزمتني بس ماشفت احد...

اني من النوع الجبانه بهيج شغلات كمت اردد سلام قول من رب الرحيم...

طول ما اردد الايه وامشي بكل سرعتي اريد اطلع من الغرفه احس رجليه متشابكه ماتمشي...

اردد بسم الله الرحمن الرحيم واني عبالك خيوط والتفت على رجليه دخيلك ربي ساعدني...

انفتح الباب اسماء صاحت يولي هاي وينج ادور عليح راح نروح ...

من حجت اسماء حسيت رجليه رجعت طبيعيه بس لوتذبحوني  ماتلكون قطره دم بيه ...

حته اسماء انتبهت عليه وضلت تسأل شبيح واني حته الي اسولفله يكول عليه مخبله...

بسرعه رجعت للبيت حته ما التفتت على بيت علاهن ياربي شنو هذا الكابوس متأكده اني اكو من خله ايده على كتفي...

ضليت بيومهه للصبح واني ماغمضت عيني يمكن ختمت القران بساعتهه وحاشكه نفسي بصف اسماء اذا سمعت صوت اموت بمكاني....

عشت ايام برعب حته اخاف اسولف لان منو يصدكني وهو عرس والكل فرحان بس شمه صار بيهه هيج.....

هذا الموقف مانسيته ابد ابد ولهاي اللحظه من اتذكره يقشعر بدني ويرجع الخوف بيه وعبالك هسه صار....

داومنه بالكليه وجانت عدنه امتحانات وهذا الولد اسمه محمود دائما اشوف نظراته تلاحقني...

وين ما اوكف لازم يوكف كدامي صدك بطران هذا مايدري بشمه شنو وشمرت بضروف ...

ايامنه حلوه وعاديه حالهه حال كل بيت عراقي ...
الا ان اجه اليوم الي لازم يعكر صفو حياتنه ويخلينه نرجع من جديد...

سنه 2012 شهر الواحد والجو بارد واحنه منطقه مفتوحه حته بليل محد يكدر يطلع ....

مثل كل يوم عمه فضه تبدي تسوي عشا من وقت وقيصر خفارات مايجي بس بلاسبوع يومين وحته اذا اجه مانشوفه هوايه لان عنده امتحان مال اختصاص....

كاعدين نسوي كبه ويه عمه وهي تسولفلنه عن بغداد وناسهه الطيبين وشلون الجار يدز صينيه لجاره

وشلون جانو يفرشون بالباب ويكعدون الشياب يسولفون ....

ملتهين نسولف ومانحس على دكه الباب القويه عبالك انشلعت من مكانهه ....

ضرغام فوك نزل يركض على الصوت وهو يسد بدكم قميصه...

طلع برا واحنه ندحك من الشباك شويه واجه يركض سوه الدرج طفرتين واحنه نصيح ورا شكو ضرغام شصاير؟؟

طب وسام وهو يلهث كال يمه بيت سلمان مكلوبه الدنيا يمهم بنتهم شهد يدورون عليهه...

هوكال وسام هيج وواني افترت بيه الكاع كعدت على ركبي ودموعي نزلت وحدهه واني بعدني ما اعرف الصار بس حسيت اكو مصيبه...

نزل ضرغام والعيون مكلوبه حته اشوف ايده ترجف طلع هو وحسام واحنه ضلينه انلوب كولشي مانعرف...

طلعت بالباب ادحك واشوف الحراس متجمعه بباب سلمان وغير الناس الي تريدلهه سالفه تحجي بيهه.....

رجع وسام جلبت بي واني اسأل كل سؤالين سوه...

شبيج شمه على كيفج وجهج اصفر محد يدري وين ناس دكول انهزمت وناس دكول ضاعت

بس هي طالعه من الصبح لسه ماكو وخالج ما رادهه تنشر السالفه بس مدري منو موصلهه لببيبي علاهن وانتشرت...

فضه: يايمه شهد مو زغيره وتنهزم الا انخطفت

شمه: شهد من دون البنات ما عندج حظ يتيمه وماعندج اب بي خير الله انطاج اخت مريضه واب يمشي ورا الحرام...

وينج يا شهوده مافكرتي بالي يفكر بيج شراح يصير بحاله جاب عمره هبطات

كعدن بالكاع ابجي مدري على شهد مدر على ضرغام وهو يركض وايده الي ترجف....

صار الليل وماكو اي خبر كلساع نسمع صوت هوسه وماكو وبس وسام يجيبلنه اخبار...

صارت الساعه ب11 اجه وسام اتلكيته اركض

ها وسام بشر ما لكوهه ؟؟

وسام: لا شمه فص ملح وذاب ماخلو مكان بالقريه مادورو بي وخالج مدنك راسه لان علاهن الله يسامحهه طاشه الخبر بالقريه

شمه: ضرغام وين؟؟

وسام: قبل شويه شفته ويه رافد
شمه: رافد هنا وشيكول؟

وسام: والله ما اعرف شيكول بس كلهه دكول مهزومه وسمعت ابوهه يكول اريدهه من جوه الكاع واغسل عارهه بيدي....

شمه: مستحيل تنهزم هاي سوالف براء اكيد لفتهه بتهمه ايا مريضه يابلاء...

ضليت انتظر ضرغام لحد 2 ومارجع كمت صليت وادعي ترجع سالمه شهد فقيره وجبانه وين راحت...

لحد الفجر وضرغام ماكو ياربي هذا العبد يكسر الخاطر حب حب حلال وبصفاء نيه لاتحرمه منهه واجبر خاطره

ثاني يوم زاد الوضع سوء والناس بدت اطلع اشاعه اشكال الوان والي سمعته رافد متخبل وكل الي يسمعه يحجي يروح يتعارك ويا

صار العصر اجه ضرغام صاير تراب والله بوفاه عمي ماشفته هيج حالته تبجي العدو...

حته امه فتحت عينهه على وسعهه من شافته والتفتت على اسماء وكالت ولج بسلا اخوج بحبهه؟؟

بس بدل وطلع حته ماحجه حرف ولا صد علينه
انتهى اليوم وكل اثر لشهد ماكو ....

باليوم الثالث اجه قيصر لان ضرغام مخابره وطلع وياهم وهم ماكو نتيجه...

باليوم الرابع العصر اجه وسام يركض كال يمكن لكوهه بس محد يدري عدله لوميته ورافد ماقبل واحد يروح بس هو وضرغام....

حته ابو رجعه بس محد يدري وين وشبيهه...

اني بسرعه رحت فرشت سجادتي وادعي يلكوهه سالمه ومابيهه شي ....

واني كاعده على سجاده ورافعه اديه للسما وعيوني تجري...

سمعت صوت زلزل البيت من قوته...

اي هذا صوت ضرغام دخيلك ربي بسلا بيهه شي
امشي واتعثر بجادر الصلاه ....

واسمع ضرغام يبجي ويصيح بصوت عالي....

لاااااا ياربي طلبتهه منك ليش فشلتني.....

كلمات ضرغام جانت كفيله بهطول دمعي بغزاره واطلاق صرخات محبوسه داخل صدري....

#يتبع

الفيديو يوصف حال ضرغام من سارونه حبيبتي Hamzayhoocom1996