رواية وحوش بشريه الفصل الثلاثون 30 - بقلم Rozaya1122

#البارت الواحد والثلاثون
#وحوش بشريه
#روزايه

إني  رأيتك في المنام
ك آية للحب من وحي الهوى تتنزل
            فأفقت من نومي لأخفي آيتي
                      فإذا اللسان من الغرام يرتل ...

سلمان: يوم المبارك الدكتور يطلب ايد بنتي ...

يا سعادتك ياسلمان وين الكه مثلكم من جاه وحسب ونسب...

بس تعرف يادكتور بيهه مقعده على الكرسي وماتكدر تتحرك...

قيصر: سلمان مو براء اقصد بنتك شهد اريدهه لضرغام ...

سلمان: شنهوووو تخبلت يقيصر البت متزوجه وعلى  ذمه رجال شتحجي يا ابن اشيوخ...

جنك نسيت الاصول يبن حسين وتريدني اطلك البت من زلمتهه وانطيهه الكم..

بيا قانون ويا دين يكول هيج البت حامل شلون اسوي بيهه هيج

قيصر: لاتعلي صوتك ماكاعد بمضيفك اني بلأول افتهم يله دكوم تحجي بالدين والاصول....

من رحت كسرت ركبتهه وانطيتهه هديه لواحد بكد ابوهه ما استحيت على شيبك...

جاي تحجي بلأصول ياسلمان ماتعرف بنت الشيخ ماتنهدي وتعيش معززه مكرمه...

كسرت  البنيه ونزلت سمعتك بهاي عملتك...

لاتغشم نفسك اعرف كولشي وزواجهه ويه الشيخ فاضل  بس على الورق...

وسالفه الحامل منو كالك تسمع حجي النسوان وانت حته ماشفتهه لبنتك من يوم الطلعت من بيتك...

سلمان رد اعتبار بنتك هاي اخر فرصه كدامك مثل ما انطيتهه دبر نفسك وطلكهه...

سلمان: شلون اطلكهه علمني شنهو الراي السالفه موهينه

دخيلك ربي والله ماعاد عندي حيل احسبوني بمثابه ابوكم وشورو عليه ...

الحجي يبويه مو هين انسابتي اكلت وجهي شلون بنتي هيج وزوجتهه لشيخ حته اسد حلوك الوادم...

علموني يولد حسين ونعم ماربى ابوكم شسوي واني هسه كلهه حدت سنونهه عليه...

اخواتي سته يريدن حصصهن وهاي نعمان كدامكم اذا اخذتوا الكاع وين يروح ....

قيصر: احنه مو ضدك ولا نريد  انأذيك ترى لو بنيتي اذيه من زمان بعت الكاع وبدون ماتدري....

بس ظلمك زاد عن حده وتجاوزت هوايه من بنتك اليتيمه لشمه ...

لحدما وصلت بيك المواصيل تجي بنص بيتي وتتهمهه بشرفهه وانت تعرفهه زين...

والاكبر من هذا دازلك عصابه نسوان وحته ماشفتك اجيت اعتذرت ...

لحدما اجتك الشرطه وانت تمشي بحجي النسوان ...

سلمان: هاي راسج يبويه شمه ابوسه وحقكم عليه ...

بس ما اريد تنزل كرامتي بين الناس وتروح هيبتي...

حسام: ابو رافد احنه وياك مو ضدك صح الكاع النه بس مخافه الله فوك كولشي...

احنه جاي نتفاهم وياك لا انزل من قدرك ولا نريد نشوفك مهزوم ...

بالعكس احنه وياك على الغريب بس انت اذيتني هوايه ...

مايوم امي طلع صوتهه ولا واحد بيكم من القريه شاف طولهه...

ونسوانكم جايات هادات على امي والبنات عيب ترى عملتكم والله مال ناس ماتعرف العيبه...

شوف راسهه شمه مخيط شنو ذنبهه زلم ماكو ترد هاي النسوان لو بس من تكعدون بالديوان تحجون بالحق...

سلمان: والله عيب عليه اسمع منكم هذا الكلام اني اعترف وكدام اخوي مشيت بدرب اعوج واريد الله يخلصني منه..

قيصر: ما راح اضغط عليك لا بيوم ولا باسبوع كدامك شهر ...

روح حاجي بنتك بلاول وفهمهه السالفه شوفهه مستعده تتطلك وتزوج ضرغام ..

اني الي اعرفه الشيخ فاضل معتبرهه بنته وشوكت متريد ينطيهه حريتهه يعني زواج على ورق...

واعيدهه عليك اسألهه تقبل تزوج ضرغام مو بس اطلكهه وتخليهه يمك هي خلصت من ظلمك...

سلمان: ما عرف شحجي السالفه جبيره خلني اروح واشوف شلون تدبر...

قيصر: هاي السالفه ماتطلع منا احسن ماتصير فضايح انت بغنى عنهه

ضرغام: سلمان دير بالك تأذيهه وتلمس شعره منههه ترى الكلب فاض منك ...

سلمان: لا مثل ماتامرون محد يعرف بسالفه بس اني ونعمان...  اودعناكم

شمه: بس طلع خالي وسدو الباب ورا اجت عمه فضه واسماء يركضن ...

حسام رغم ماحجه بس ماقبل بتصرف قيصر...

حسام: قيصر تخبلت انت شنو هالحجي هذا!!

قيصر: شكو؟؟

حسام: ولكم شنو فلم هندي هذا شلون متزوجه اطلكوهه من رجلهه حته يزوجهه اخوك...

فضه: قيصر مارباكم حسين هيج لاتخلوا مامرتاح بكبره ...

رجال جبير ليش رجعتله السيئه بالسيئه شجاكم الحقد عمه كلوبكم...

والله ما ارضى عنكم اذا اذيتوا سلمان واخوته ...

اكو رب هو ياخذ حقكم مو تذلونه وهو بكبرته ترى يايمه رجال جبير والشيب تارس راسه...

قيصر: يمه هذا حرامات واكد يتسامح ويا انسان ضالم ماكل حرام ...

مارجعتله السيئه ومستحيل اطلعه من بيته واخلي حاير بس مجرد تخويف

صح تشوفيني حازم واحجي بحده بس سلمان اقل شي يجي هاد بالسلاح...

فضه: وهاي البنيه شلون رجلهه يطلكهه ولكم تخبلتوا وين صايره هاي؟؟

ضرغام: لادكولين رجلهه مامتزوجه رجال نقذهه من ابوهه لا اكثر...

فضه: تضحك على نفسك ضرغام وانت قيصر عود الجبير لو حسين عايش يقبل بتصرفكم...

قيصر: يمه شبيج سويتيهه ظلمه خلي يسألهه ابوهه ويتاكد...

هو مجرد على ورق زواجهه شنو ضالتهه يم الشيخ ...

نخاف من ظلم ابوهه اذا اطلكت؟؟ خلاص يتزوجهه ضرغام

ماراح نظلم احد لاسلمان ولا بنته ولا الشيخ اكو تفاهم ويحجي ويه بنته ويفتهم منه ....

فضه: خلوهه ربكم يحلهه ليش هيج تسوون وتساموو اذا الله قاسمهه لضرغام تصير...

قيصر: يمه نعرفهه ونحرفهه سلمان لو يموت ماينطيهه النه بدون مشاكل...

لو خاطبيهه من عنده جان ساوم بالكاع يله ينطيهه....

فضه: الله يهديكم ويريح كلوبكم يمه حسام خطيبتك ادك عليك وموبايلك على الشحن...

حسام: اي هسه راح اجي سوالف ولدج مدري شلونهه ...

مهما يكون غلطه بس هو رجال جبير كاعد يتوسل بس لا اطلعوني من بيتي والله عيب علينه....

قيصر: مو انت اول واحد كلت اذا ما اخذتوا حق شمه اني اخذه حتلو توصل للشرطه

حسام: قيصر حاسبه هو مو نعمان واخوته البقيه يكلولك ماعدنه بيت معناتهه نكعد بالشارع...

ضرغام: حسام ما الومك لان تحجي وكلبك ماموجوع ولا شفت الي شافته عيني . .

شتريد دكول عليه كول ظالم حقير ماعندي اخلاق ...

بس الي شفته وعانيته طول هاي السنه يخليني لو اشرب من دمه ما يرتاح كلبي..

حسام: يول شجاك بارود انت منا وقيصر منا ماعدكم تفاهم ابد روحوا شتسوون سوي انطيت رأي فقط ...

شمه: كام حسام من يمهم وضرغام طلع برا بشارع ....

قيصر كاعد بكل اريحيه على التخم طابك رجل ومنزل الثانيه ومرتجي على سنده التخم ويشرب جاي ولاعبالك صاير حجي..

فضه: قيصر كلبي ما مرتاح لهاي السالفه...

قيصر: هذا الحل الوحيد الي يخلي سلمان ينطي بنته بدون مايشرط عليه ...

يمه ما اسوي شي ولا اخطي خطوه وحده بدون ما افكرلهه الف مره واحسبهه من  كل جانب

اني كلهه شهرين ومسافر على الاقل اطمئن عليهم ومايضل بالي يم ضرغام الي جاي يموت على بطئ...

الوضع بلأنباى موشي ويوم عن يوم يتأزم غير احنه بالقرى وماندري شكو...

هذولي المعتصمين سادين الشوارع والجيش داخل انذار

فضه: الله يسهل ويستر شكم مره كتلك خلي نطلع من هاي القريه الكشره ونروح ببغداد...

الف رحمه على ابوك هو الي طبع بيكم هذا الطبع باجر عكبه صار الوضع موزين شلون نظل هنا ..

قيصر: لا ان شاء الله ماكو شي وطلعه ما اطلع من الانبار ...

املاكنه واراضينه هنا من تعوفيهه وتعيشين ببغداد معناتهه انتهت صلتج هنا...

ما اكدر اعيش بغير كاعي ومحافظتي هسه اريد اسافر وشايل هم شلون راح اتحمل الغربه..

فضه: الله يحفظنه ويحفظ الجميع

قيصر: سدو الموضوع لاتسولفون بي كل ساعه الي بي صالح الله يقدمه...

شمه: مدري شلون خلصت هاي الليله واني واسماء بس انفكر شراح يصير لحدما تعبنه ونمنه....

ثاني يوم الوضع هادئ ونشتغل عدنه عمال قرب الدوام واحنه البيت مكلوب من الاسمنت والطابوك...

الولد رجعوا كل واحد لدوامهم وسلمان ماكو اي خبر عنه يعني الوضع هادئ حيل...

هلكنه التنظيف وبس احنه نشتغل حته انام من وقت...

كوه شغلنه وسام ويانه ونتوسله يله قبل ...

خلصهه علينه اغاني وتحشيش واخر شي اسماء تحصلهه ضربه على راسهه وتكب العيطه...

جنه ننقل بالغراض بالغرف الي يكملوهن انظفهه ونبدي نعزل بيهه...

وسام علي يشيل الطابوك بالعربانه يمشي ويغني..

وسام:  خاله شكو شنهو الخبر دحجيلي اووي اووي ...
فدوه رحتلج ليش ماكلتيلي اووي اووي ...

اسماء: لو تسمعك علاهن تغني على خالتك جان كالت وعمتك يولي..

وسام:  ولا يهمهه علو هسه اغنيلهه على العمه..

هذا الحلو كاتلني يعمه ارد احضنه وارد اشمه انتي شلون عمتي بيه مفتهمتي وروحي كلهه يمه يعمه يعمه...

اسماء: عليك الله اسكت خربت الاغنيه من كاعهه  ...

وسام:يولي  لا اجي اكطج من فوك على كولت علاهن ...

اسماء: يمه رحمه لوالديج تعالي خلصيني من وسام ...

فضه: شبي صخمان ولك ماتعقل رجال شكبرك البكدك اتزوجوا وانت مصركع....

وسام : الصوج موبيجن اني شكو اشتغل وياجن شكول نعمه انتن ضلن كرفن شغل...

اني طالع ومن ارجع انتي الزركه ام اعطوب حضريلي الحمام ...

اسماء: يمه اهئ اسمعي يكول عليه الزركه ماتحجين شبيج سكتي

فضه: ولج اسكتي عنه السانه متبري منه الله يعينهه التاخذه تشرد منه بليله ظلمه

شمه: خلصناهه معارك وضحك كملنه تنظيف وسبحنه قبل لايجي وسام يلزك بالحمام ....

ورا شويه اجه شكله يخرب ضحك....

لابس بجامه نيلي ومن الشغل صايره رصاصي وواكع عليهه صبغ...

ورجل نازله والثانيه لافهه لحد الركبه وقميص مقفل سمائي ومدكمه بالغلط جهه طويله وجهه كصيره ...

شعره مكفوش وهو شعره حيل عالي وحلو  يعني شكله فلم هندي....

فضه: الي يشوفك هسه شيكول بس اريد افتهم ماعدنه مي ولك حبتك وحده شتشوف بيك...

وسام: ششوف كلبي ومحجوز كلي مكفول ...

فضه: اكلك يمه وسيم ماتخلينه نخطبلك براء...

وسام: مابيه حيل اتعارك واحجي واني تعبان هسه اوكفي خلي اجيبلج علاهن واجي...

فضه: هههه تهددني بيهه يبن بطني ...

وسام: القريه تخاف من علاهن وعلاهن منين تخاف؟؟ من قيصر

صدك يمه تدرين من كال قيصر انريد بنتك ...

يمه غير لزمت كلبي كلت رحت بيهه بسلا قيصر يخطب براء ويكربسهه براسي....

بالقران وكف كلبي شو ابنج يحجي ويدحج عليه خلاني ابلعم من الخوف....

حته تخيلت  روحي عريس واادفع بيهه بالكرسي..

فضه:  سوده بوجهك لا تحجي ع البنيه ربك يجازيهه كوم منا وسيم ابو طول الحلو...

وسام: ااخ يافضه ياذهب يا ياقوت يامرجان مرضتني بنت اخوج ...

يمه عليج الله ما تحاجين خالي فوكاهه تبيع ثكل عليه حته كلبي ماع ...

فضه: يبعد امك انجح من السادس واخطبهه الك وعد مني ...

بس انجح مو فرفحت كلبي هاي السنه الثالثه الك مامليت وربعك ثالث جامعه...

وسام : شلون مامليت بزعت روحي بس اشوف الجغرافيه اتقيئ على السودان ....

فضه: هههه نزول عليك وعلى لسانك كوم اقره والله ازوجك بس تنجح واسويلك عرس ماصاير...

وسام: ااااخ كلبي حته انتي لازكه بالشهاده عمي احنه بالعراق العظيم وين اكو تعين...

فضه: مو هذوله اخوتك درسوا  وتعينوا ؟؟

وسام :عجل تقارنيني باخوتي وسفه!!

مهندسين ودكتور ليش مايتعينون تريدين وسام يتعين....

لسه مايعرف السالب والموجب وين والله يالله...

فضه: طبك طوب ضل هيج وهسه عبير تنخطب وانت يموتك القهر...

وسام : ياعبير هوب هوب يمعوده يمه صدك تحجين هاي جنهه خالي اني اريد بان  بنون

فضه: هنيال كلبي فوكاهه يريد الزغيره المدلله ولك خالك روحه من الدنيا هاي...

وسام واني هم روحي من الدنيا قابل تضل يمه اولهه وتاليهه تزوج ...

اسماء: وسام الباب يندك وصوت دراجه يمكن صديقك...

وسام: يمه هاهي اتفقنه سويلي واسطه ويه اخوج عليج الله عزميهم موكلبي فرفح...

فضه: اسم الله على كلبك  دروح لاتتأخر ويكوم يحجي عليك قيصر ترى الوضع مو امان...

وارجع اسبح الي يشوفك يحلم بيك بليل ويفز مرعوب...

شمه: عمه على كيفج ويا وسام كلبه طيب

فضه: يشمه وسام روحي من الدنيا هذا وصلت بي الموت يله جبته...

ومن اجه للدنيا طلع تعين ابو والله غير حالنه لأحسن حال...

احس كصته خير ولسه هو فاله خير بس هو مختار المنطقه ماكو سالفه مايعرف بيهه...

اسماء: فوكاهه يحب بان شفتي بله شكد نازكه هي وتتغنج وهذا طفره ونص

فضه: دخل ينجح وعود يفكر يزوج قيصر مايزوجه لو يموت وهو بهذا العمر...

اكلجن كاعدات ادكن سوالف ماتكومن تسون عشا ....

اسماء: شنسوي اليوم الولد يجون وضرغام معزوم بعرس...

فضه: يمجن بالمجمده كبه وسون بتيته شي شياتين دكومن ....

شمه: كمنه اني واسماء نسوي عشا واندك سوالف ما ادري ليش اجه ابالي اسأل اسماء هم اكو احد ابالهه...

اكول سمسم ماكو احد ابالج اشو سكته

اسماء: اسم الله احب مثلج جني خبله وواحد مثل قيصر....

شمه: امداج ولي زعلت

اسماء: شوفي شمه اني من اول يوم داومت ما اختلكطت بأحد حته عندي صديقه وحده

شايفتني مايوم طلعت من البيت حته صديقاتي قليلات اني مو اجتماعيه ....

صح اكو ولد يحجون ويعترفون بس اني ابد ما اهتم لهذا الموضوع فارغه احسنلي...

ومن يصير عندي اول وحده اجي احجيلج...

شمه: عبالي تضمين عليه حته اموتج...

بعدنه نسوي بالعشا سمعنه صوت سياره حسام طب سلم علينه وراح يم امه...

ورا ربع ساعه اجه قيصر كلبي تغيرت اعلومه واني اشوفه يمشي بالكراج ....

اسماء اول ماشافته ركضت جوا والله لوتيه وخبيثه...

ضليت واكفه يم الطباخ اول مادخل صرت بوجهه ...

سلم سلام عادي حته مابي لهفه والله هذا القيصر عجيبه ...

يوم ياكلني اكل بنظراته ويوم عبالك غريبه كدامه....

تعشينه وهو حته مانزل تعشه كالت عمه فضه الامتحانات هلكته سوده عليه ....

ماشفته ابد حته مانزل تعشه لحدما نمت وعيني على غرفته وماكو....

ثاني يوم كعدنه الصبح نفس الروتين قيصر طالع كالت اسماء يسوي جوازه راح يسافر...

من كالت هيج حسيت كلبي انعصر وضاق النفس بيه ...

يعني راح افاركك ياقيصر وما اشوفك بعد وما اعرف شكم سنه .....

ضليت طول اليوم ضايجه وحته ما اكلت يعني بس هاي الايام قيصر وياي وراح افاركه.....

بليل اجتمعوا الولد وامهم بالغرفه وحته ماعرفنه شيحجون....

من طلعوا كالت عمه فضه شهك اطلكت وراح تلزم عده وورا العده نخطبهه...

جانت فرحتي ماتنوصف بهاي اللحظه واخير شهوده راح تصيرين لضرغام...

كعدت عمه تحجيلنه شلون اطلكت
فضه: سلمان رايحلهه وحاجيلهه كولشي وكايلهه اذا اطلكتي تقبلين بضرغام ....

وهي موافقه وكايلتله اني اطلب الطلاك من الشيخ لاتنزل نفسك انت وياخذ نظره مو حلوه عليك...

وصدك شهد كايله لشيخ اريد اطلك والرجال مواعدهه ينطيهه حريتهه وطلكهه ...

اسماء: ماما لعد ليش ضرغام ما فرحان المفروض هسه الدنيا مالامته...

فضه: والله ما ادري يايمه حته اني تفاجأت ماحجه ولاحرف وجكاره ورا جكاره ...

الله يجبر كلبه ويكتبله الفرح...

شمه: عمه شوكت يسافر قيصر؟؟

فضه: والله حاير بعده يمكن ينتظر زواج اخوته يله ....

شمه: من سمعت هيج وحسبت عده شهد فرحت على الاقل املي عيني بي ....

بدء  الدوام ونفس صديقاتي لكيتهن واول ماشافني كالن شكد متغيره وصايره حلوه...

يوميه اروح للدوام وارجع ماكو شي نفس الهدوء مال المرحله الاولى....

جنت كاعده بالقاعه واجه محمود سلم عليه واكلني بعيونه رديت السلام علي وطلعت...

هذا الولد نيته ابد موصافيه ونظراته غريبه حته البنات منتبهات علي....

ورا 3 ايام جنت كاعده ابرد بأضافيري واسماء راسهه بالكتاب انفتح الباب رفعت راسي شفته قيصر...

كبل بدون سابق انذار  كال شمه تعالي ...

رحت ورا لغرفته لكيته واكف بنص الغرفه وهذا القلقان الي اكو شي بداخله...

شمه: هاقيصر خو ماكو شي...

قيصر: شمه اليوم اجو خطابه عليج واريد اسألج موافقه لولا؟؟

شمه: من كال هيج حزت بنفسي الحجايه اني انتظرك كل هاي السنين وانت دكول موافقه ...

قيصر: شبيج سكتي اكو طالب وياج اسمه محمود اليوم رايح لضرغام للدوام ويريد يتقدملج

شمه: ما موافقه

قيصر: ليش؟؟

شمه: كتلك ماموافقه شنو ليش تريد تخلص مني بس حجيتهه بصوت عالي...

قيصر: صوتج ولج اشو ماتعرفين تحجين الصوج مو بيج بيه اني الجاي اخذ رأيج

شمه: كولش ضجت من كلامه وانفعلت حيل ما ادري شجاني

قيصر: شبيج انفعلتي مو من حقي اسألج لو تريدين ارفض من يمي

شمه: ما اتحملت كلامه بسرعه بجيت نزلت دموعي على خدي ...

ماردت اضعف اكثر مسحتهن وردت اطلع جان يسحبني من زندي وقربني علي...

قيصر: ليش بجيتي هاي كله لان سألتج لازم اخذ رأيج ...

شمه: عوف ايدي قيصر مالك حق تلزمني هيج

قيصر: ولج السانج لزم الي حق وغصبا عنج
امشي اطلعي الصوج موبيج....

شمه: طلعت من يمه ودمعتي على خدي ضميت  راسب بالفراش حته محد يشوفني جانت اسماء نازلخ جوا....

ضليت ابجي بفراشي لحدما تعبت ونمت حته مادحكت على الساعه شوكت....

نص الليل فزيت على صوت طلقات شالتنه شيل والرمي على بيتنه....

ركضنه اني واسماء تلكانه ضرغام وحسام اثنينهم بيدهم سلاح وصاحوا بينه طبن وسدن الباب....

دخيلك ربي شكو شصاير قيصر وين؟؟ وعمه فضه وحدهه جوه...

صار الرمي كثيف وصوت تكسير الجام ومبين مال مواجهه يعني الولد هم يرمون....

كل جسمي يرجف واسماء راح تتخربط واقره ايات ربي يستر....

جان اسمع عياط عمه فضه وهي تصيح يا يمه وليدي....

نزلنه نركض وصلت على حافه الدرج واشوف عمه فضه مكطعه شعرهه بالكاع ....

وعلاهن لازمتهه وهي تصيح ولك يمه وساااااام

#يتبببع

انتظروني غدآ في بارت مملي بلاحداث القويه
متابعه ممتعه