#البارت السادس عشر
#وحوش بشريه
#روزايه
(بارت مفاجئ لعيونكم متابعيني الحلوين القصه لازالت في بدايتهه ومحافظه على المركز الاول احبكم احبكم😘❤)
ضرغااام يكول ..
عودتني
تالي من ردتك ،،، مشيت وفارگتني
ليش كل عمري اكابر ؟'
حتى اعيش متاني باچر !؟
وهو باچر ، بلا عيونك ( شنهي لذته )
وهو گلبي ، بلايه حبك ( شتسوه دگته )
اي وحگ حبي التركته ،!
موتتني ،'
عيشتني بواهس الهستوه يمشي '،
چانت اول خطوه اليه ( وياك انته )
وتالي باقي اصرخ وراك ( بصوت سكته )
ليش اتاني ، بأي محطه '؟
وكل قطار البي مجيئك ( ماكو سكته )
كلشي عشته ،'
وبهجرك #كبرتني
موتتني
.....
كمت اصيح بعلو صوتي واهز بيهه اريدهه تكعد وهي ماكو لا ايد ولا رجل بس الدم يجري من حلكهه
يولي شهد اكعدي لاتعوفيني وحدي ششششهد...
حبابه اكعدي لاتشاقين هيج وياي اكعدي احجيلي منو سوه هيج بيج؟؟
انهاريت واني ادك على راسي بهذا اليوم المشؤؤم جان زوج وحده من خالاتي جاي من العمره وكلهه راحت بس اني والحجيه بالبيت
حتى شهد هي على اساس راحت اجتني بوقتهه مبدله وتوسلتلي اروح وماقبلت لان بديت اقره وراحت وحدهه
ما اعرف شسوي ادحك على شهد مدري عدله مدري ميته ملامحهه مختفيه من الدم وايدهه مخلوعه من كتفهه وممدوده بصفهه
على صوتي اجت الحجيه وهي شافتهه وصار العياط ماله والي تقريبا عشر دقايق واني ماخليت شي ماذبيته عليهه وهي فاقده الوعي
ما ادري شلون احذتني رجليه ركض وحافيه لبيت عمي حسين مع العلم اكو حراس بالبستان
اركض بالبستان وكلساع يطب برجلي شي بس منظر شهد خلاني بدون وعي ياربي دخيلك الطف بحالهه
فتحت الباب حيل وطبيت اصيح عمه فضه طلعتلي تركض هي شافتني واكو دم بملابسي
عبالهه بيه شي ضلت تكلب بيه وتشوف منين الدم
كوه طلعت الحجايه وكتلهه اريد واحد من الولد شهد راح تموت مدري شبيهه
خطيه بدون ماتفتهم شكو بسرعع صاحت على ضرغام كالت هسه اجه من بغداد
نزل ضرغام مفزوع من حالتي كتله الحك شهد راح تموت
نركض اني ويا مثل المخابيل اخذ السياره حته مانعرف نحجي هو يكول شكو واني اكله شهد ماتت
هذاك اليوم ما انسى ابد كل تصرف طلع من عندي خارج عن ارادتي احجي واتصرف بدون وعي
وصلنه للبيت لكيناهه على نومتهه وبيبي يم راسهه تمسح بوجهه وهي بعدهه فاقده والدم يجري
التفتت على ضرغام شفته ارتعد من شافهه شلون الي انصدم
اخذت بيبي للغرفتهه لان وجهه اصفر وتخربطت كتلهه اني اروح وياهه لاتخافين وهسه نخابر على خالي يجي
طلعت لكيته كاعد ومخلي راسهه بحضنه ويحجي بعصبيه ويصيح
ضرغام: اركضي جيبي شي نشد راسهه بي تنزف
شمه: هاااا
صرغام: شبيج صفنتي اركضي يولي
شمه: جان يحجي بعصبيه ممزوجه بصدمه على الم على غصه ما اعرف شنو افسر حالته
ركضت للغرفه لبست عبايه اسلاميه فوك ملابسي واخذتلهه شال طلع ضرغام شايلهه بين اديه وراسهه على صدره
تلكانه واحد من الحراس كتله خابر على خالي خلي يجي ورانه...
صعدهه ورا خليت راسهه بحضني وهو يسوق اول ماصعد خابر على خالي سلمان وكاله رايح كدامكم
كلساع يلتفتت عليهه وهي عباره عن جثه هامده خليتهه بحضني امسح بوجهه اباوع لعيونهه شلون مغمضه وعبالك نايمه
شفايفهه زرك وايدهه واكعه من حضني كمت ابجي واحجي
منو سوه بيج هيج ياشهد انتي الفقيره الي ما الج اذيه على احد دومج مظلومه مو ظالمه
موكلتي راح اروح اتونس لان ضايجه شو مارحتي
بوقتهه فقدت شهد صديقتي واختي ومايوم زعلتني وفقيره ودائما مسالمه وتخاف وتجنب الناس
منو الي سوه هيج بيهه ياظالم ..
ضرغام يسوق على سرعته اخر شي التفت عليهه ولزم ايدهه الواكعه نتيجه الخلع
شنو من بشاعه بحيث وصلت لحد ينخلع كتفهه
خفت على ضرغام حالته ماتسر وخاف يسوي حادث كل لحظه يلتفت عليهه
وصلنه للمسشفى اخذوهه بسرعه من عدنه واحنه ضلينه ننتظر بره
ادحك على ضرغام وصلت حدهه انهار هذا الجبل الكدامي موقف مؤثر
بلحظه وكع على ركبه ولازم راسه باثنين اديه رحت اركض مابيه حيل هبطه ثانيه واني بنيه ووحدي بالمستشفى وهاي اول مره اطب بيهه
شمه: ضرغام شبيك لايصير بيك شي فدوه على كيفك ويه نفسك
ضرغام: روحي منا شمه عوفيني...
شمه: من نبره صوته عرفته يبجي لان مدنك راسه ما رادني اشوف ضعفه وانهياره وهو يسلم حبيبه كلبه للموت
اااخ ياضرغام يوم يوم تنتظرهه ودكول مشتاق اشوفهه حتلو من بعيد تالي شفتهه مدمايه شلتهه بحضنك وهي بين الحياه والموت
ما اكول غير الله المعين يشافيهه ويفرح كلبك...
دقايق من الانتظار واجه الكل يركض خالي يصيح بنتي وسعاد من جهه خالي نعمان وازواج خالاتي
حجيتلهم كولشي وراحوا تشكروا من ضرغام مايدرون مستعد ينطيهه روحه بسبيل تكوم على حيلهه
ملابس ضرغام متروسه دم نزفت هواي ما اعرف منين النزف بس من كل مكان يطلع دم منهه
ضلينه كاعدين ننتظر وكلوبنه نار ماكو احد يطمنه عايشه حالتهه شنو؟؟
سعاد مثلت دور الام الحنونه وكعدت ادووك وتنوح
وخالي سلمان دور الاب الحنون وسوه نفسه حزين
وهو اكثر من مره اسمعه يكول لو ماجايه للدنيا احسن من وراهه اختهه تمرضت لان شهد احلى منهه وتغار..
بعد الانتظار طلع الدكتور كلهه ركضت اتجمعت داير مدايره وتسأل على حالتهه
سلمان: بشر دكتور بنتي شلونهه؟؟
الدكتور: والله ياشيخ ما اعرف شكول بس ربك ارحم الراحمين بنتك ياحجي ضربتهه قاضيه مانكدر نوقف النزف والضربه براسهه وحاليا بغيبوبه
سلمان: لادكولهه يادكتور مستعد اطلعهه لاخر الدنيا بس كون مابيهه شي هاي المدلله العزيزه
من كال هيج اتمنيت يمي طابوكه واضربه على راسه واخلص الناس من جذبه ونفاقه
الدكتور: هسه تعالوا وياي قدموا بلاغ شنو حادث او فعل متعمد لان البنيه عليهه اثار ضرب قديم
وشنو سبب خلع كتفهه لازم هذني كلهن توضحوهن
سلمان: ياستار يابويه اي اقدم بلاغ دكتور واطيح حظه الي هيج سوه ببنتي ياربي عونك كلشي ولا بنيتي
شمه: اجت عيني على ضرغام مصدوم من كلام الطبيب والابشع من هذا من كال عليهه اثار ضرب
رحت قريب يمه ما اعرف شلون اواسي بس كتله ادعيلهه
ضرغام: منو جان يضربهه؟؟
شمه: ما اعرف
ماردت احجي شي بهذا الوقت وتتازم الامور
ضليت صافنه علي دموع متجمعه بعينه وواكف بعيد عن اهلهه حته لايشوفون دمعته وحسرته على حب عمره
شويه واجه نوفل خطيه حالته مو احسن من حاله ضرغام اخوهه ويحبهه
رجعنه اني وسعاد ويه نوفل وعفت ضرغام هناك
حته ماحجيت لان مايكدر حته يجاوبني
بس لازم اعرف منو سوه هيج هي مو على اساس تروح للعزيمه شعدهه ضلت اجت توسلتلي ومارحت
طول الطريق واني افكر شلون ومنو سوه هيج هالمسكينه شنو ذنبهه ليش هيج صار بيهه عفتهه تصارع الموت وبرا كلب محب ولهان ينتظرهه ....
وصلت للبيت لكيت دمهه لسه على الكاشي سوده عليه شهوده كمت امسح بي وابجي وادعي تكوم بالسلامه
ياربي لاتفجعني باحبابي ماعندي غيرهه اخت وصديقه وبعدهه ماشافت شي من الدنيا هستوه عمرهه 20
واني امسح ما ادري شلون خطرة بالي فكره اتبع الدم لان هي اجت تركض وراسهه ينزف يعني جانت بوعيهه
مشيت على اثرهه وصلت للسياره شكد اكو دم بين ماصعدناهه
ضليت اتبع بلاثر لحد ما وصلت لبيت اهلهه واني ماضل عندي حيل معقوله براء سوت بيهه هيج
وتقتل اختهه
شجاب الدم يم بيتهم وليش لحد الباب وواكف
بسرعه رجعت للحجيه كومتهه من مكانهه واجر بيهه كوه حجيتلهه على الاثر خطيه كوه تمشي
تعمدت اخذ الحجيه اريد اخليهه شاهد
طبينه للبيت نظيف مابي شي والطرمه بعدهه رطبه مغسوله
بوجهنه للمطبخ لكيت براء كاعده ومرتبكه اول ماشافتنه فزت سوت نفسهه جانت نايمه وماتدري بشي
الحجيه كعدت تسولف وتبجي وراحت اخيتج كومي ادعيلهه واني اتفحص البيت شبر شبر
دم المظلوم مايروح هدر واليتيم يهتز عرش الرحمن لدمعته شهد مظلومه ويتيمه وما عدهه اذيه رب العالمين لازم يطلع حقهه
ياربي بحق حبيبك محمد اذا براء الهه ايد باذيه شهد كون تعثرهه وتطلع حوبتهه وماتعدي الهه
دمرتهه حرمتهه من ضرغام ومن خوفهه شهد استسلمت بسهوله من احجي عليهه....
دكول شمه اني مو مثلج قويه اني اخاف ويكتلوني واني ما اتحمل الكتل ...
طلعت وكفت يم الاثر الي بالباب الظاهر براء منظفه البيت زين افتريت ورا البيت ماكو شي
رجعت اخذ الحجيه واشوف براء وجهه اصفر كركم وحته بيبي نوريه متفاجئه اشرتلي بالعصا حته اكومهه
طول الطريق وبيبي تحجي على براء ودكول وراهه سالفه هاي المخبله وياخوفي تطلع كاتله اختهه
لان ادري بيهه ماتحبهه لان احلى منهه تمنيت رافد موجود حته ياخذ حقهه ...
اجه خالي نعمان وكال بعدهه بغيبوبه ضلينه ندعي ونصلي دكوم بالسلامه بيتنه اانترس خالاتي وهوسه
بالي موبس على شهد ضل بالي على ضرغام الله اعلم حالته شلونهه هسه وشلون يضل يمهه بصفته شنو
الله يساعد كلبك...
رحت لخالي نعمان اخذت تليفونه حته اخابر رافد بلاول ماقبل بس من حجتله الحجيه على اثر الدم كال خابري ويافضيحتنه اذا طلعت بنت الشيخ كاتله اختهه
اخذت التليفون للغرفه ودكيت شويه وجاوب
رافد: هلا عمي
شمه: اني شمه
رافد: شمامتي الحلوه شلونج شعجب اليوم خوما كو شي؟؟
شمه: رافد تكدر تنزل
رافد: اي جاي اسوي بنزولي ليش خوماكو شي بيج شي اهلي بيهم شي؟؟
شمه: شهد بالمستشفى وحالتهه موزينه رافد الله عليك تعال للبيت محتاجتك اني وشهد محد ياخذ حقهه بس انت ما اتحملت بسرعه بجيت
رافد: يولي شمه شكو لا تخوفيني شبيهه شهوده وليش موزينه وياحق هذا؟؟ فهميني وحده وحده ولاتبجين
شمه: الحجي هوايه على كيفك سوق لخاطري راح انتظرك بس تجي افهمك يله مع السلامه
سديت التليفون واني اغلي على براء متاكده ميه بالميه هي لان منو يسوي بشهد هيج غير هاي المريضه الحقوده
اريد اروح اشوف ضرغام حالته شلونهه ياعيني يا ابن عمي نظرته وحالتهه بين عيوني من كعد على رجلي حسيته جبل ونهد
شكد تمنيت ياضرغام تباوع بعيونهه وتلمسهه تالي شلتهه بيدك غركانه بدمهه
شكد سهر ليالي يفكر بيهه ويدعي تصير من نصيبه حته ماعاد يفوت بنفس الطريق يخاف عليهه
للمغرب اجه رافد بوجهه رايح للمستشفى واجه للبيت يصيح شمه وصوته عالي
تلكيته خطيه بملابسه العسكريه والتعب ماخذ حيله
ووجهه مكلوب كلاب
رافد: تعالي احجيلي شهد راح تموت هسه اجيت منهه عل الاجهزه عايشه منو سوه هيج بيهه وين لكيتيهه؟
شمه: كمت ابجي واحجي لا رافد لادكول هيج هسه تصير زينه وترجع مثل قبل
رافد: منو سوه بيهه هيج والله اطلع ناقص اذ ما اخذت حقهه احجي شمه شتعرفين؟؟
شمه: بديت احجيله بالتفصيل من اجتني لحدما اخذناهه اني وضرغام وشلون تبعت الاثر والحجيه شاهده
رافد: اششششش لاتكملين ما اكدر افقد وحده من اخواتي اذا براء سوت هيج معناتهه اكتلهه خلاص مستحيل توصل بيهه هيج تسوي بيهه وعلى شنو شهد تخاف من براء وتجنبهه
شمه: رافد مجرد شك وتاكد انت بطريقتك
رافد: اتاكد من جريمه اختي اسكتي هسه بس خلي تكوم بلسلامه واشوف
شمه: رافد شهد راح تعيش مو والله ماعندي اخت غيرهه ادعي كون تعيش
رافد: تعالي لاتبجين شهد سباعيه تعيش وتحجيلي منو سوه بيهه هيج وهذيج الساعه اخليج تاخذين حقهه بيدج
شمه: حضني وكمت ابجي بحضنه الي صار اليوم هواي عليه ما اتحملت
صار الليل وكل خبر ماكو روحي تلوب اريد اعرف شلونهه محد اكو ولاعدنه تليفونات ونخابرهم
صارت الساعه ب10 اجه خالي نعمان تلكينا وميتين من الخوف لا يكول بيهه شي
الحجيه: يمه بشرني شهيده شلونهه
نعمان: يمه ادعيلهه الصونده بحلكهه والاجهزه ادك يك راسهه
الحجيه: يارب لطفك ورحمتك بهاي اليتيمه وماتعدي على السوه بيهه هيج
نعمان: خابرنه على قيصر وخطيه الله ينطي اجه المغرب وحجه وي الدكتور وباجر من الصبح ينقلوهه لبغداد هاي مستشفانا مابيهه انعاش زين
الحجيه: يمه خاغ ماتتحمل الطريق وهي ماصاحيه
نعمان: غير هو دكتور ويعرف كال على مسؤليتي بس طمنه كال بيهه امل تنتبه
يايمه الاخ مايوكف مثلهم لوتشوفيهم 4 ولد حسين بالباب واكفين وكلساع يركضون على شغله والله حسين حرامات ابن علاهن
الحجيه: عوف علاهن وكومم ارتاح ولاتعوف اخيك وحده
نعمان: رافد يمه مابي شي انقهر على المسكينه سلمان ماعلي شي
مرت هاي الليله كابوس بالنسبه الي كلساع افز ومنظر شهد كدامي والدم مغطي وجهه
تمنيت اعرف منو السوه هيج بيهه والله الا اروح افتح راسه بنص ااووووف ياشهد بس كومي بالسلامه وشوفي منو ماياخذ حقج
والله لوعشر زلم توكف بوجهي مايمنعوني اذا طلعت براء مسويه هيج
ثاني يوم نقلوا شهد لبغداد على مسؤؤليه قيصر ومدخليهه بمستشفى اهلي وبعدهه على حالتهه
مرن 4 ايام اعتبرتهن 4 سنين كابوس يوميه افز لازمه كلبي خاف يكولون ماتت
كلما يجي خالي نركض علي وادحك شلون راح يكول راحت شهد رافد ماشفته ابد لان وياهه ببغداد
كل هذا وكلبي يغلي شلون لسه ماعرفنه منو سوه هيج رحت لبيت عمي حسين كالت اسماء ضرغام من يوم الي راح وياج مارجع
باليوم الخامس العصر دك تليفون خالي نعمان
لو حيلي راح كعدت على الدرج ومخليه ايدي على حلكي خايفه يكولون شي
سمعته يكول الحمدلله الحمدلله
مثل الغركان وطلعوا من المي كمت على حيلي واريد افتهم وهذا يخابر خلصهه اي وشلون ....
من سد التليفون كال زينه منتبهه والنزف متوقف بس راح تضل هناك علما تصير زينه
الفرحه انتشرت بالبيت والكل مستبشر ركضت لسجادتي صليت وشكرت رب العالمين من طلعت سلامات
ورا شكم يوم طلعوهه من المستشفى سوده عليه ذبلانه وراسهه ملفوف بشاش وايدهه مجبره حضنتهه وابجي وهي عبالك دميه ما انطت اي ايعاز
حسيت على رافد بعدني عنهه كال لاتخافين مابيهه شي بس من شافت حالتهه انهارت اريدج وياهه حته ترجع طبيعيه
شمه: ماعرفتوا من سوه هيج بيهه
رافد: لا بعد ماحجت اي شي بس كالت اريد اروح يم بيبي وشمه
شمه: ياحبيبتي الحمدلله من رجعت سالمه
رافد: تعبان حيل راح اروح انام وانتي عينج عليهه
شهد حالتهه حاله شكد احاول اضحكهه حته احس نفسي صرت سخيفه بس ماتحجي قليل وما كالت منو سوه بيهه هيج دائما ساكته وهاي براء حته ما اجت وشافتهه بس سعوده الحنونه
بس مره صاحتني شمه شمه
شمه: ها شهوده
شهد: روحي شوفي ضرغام شلونه
شمه: ليش شبي ضرغام لايضل بالج
شهد: طول ما اني هناك هو يمي حالته تعبانه وحته ماينام ومره جنت نايمه وحسيت بي يبجي يمي حته كالي بس كومي على حيلج ما اخلي بس الموت يبعدني عنج
شمه:: لاتخافين علي ابن عمي سبع وانتي حبيتي رجال مو ذكر
بيومهه رحت لبيت عمي حسين اطمئن على ضرغام كالوا طالع شكد انتظرته ومااجه حته تاخر الوقت ورجعت
كاعده يم شهد وفاتحه كتابي وجان اسمع صوت فززنه من مكانه صوت صياح وعياط ويبوووو طلعنه نركض
واشوف الناس تركض بصوب بيت عمي حسين سترك يارب دخيلك يوميه مصيبه
اركض حالي حال الناس وكلبي بكل دكه احس سجين وينبت بي جان العياط قوي حيل
وصلت لكيت الناس متجمعه ومن صوت الصياح ما اسمع شي وهاي الناس شتسولف
طبيت اركض جان تتلكاني اسماء املخه نفسهه وتصيح ولج اسماء راح مات الغالي.........
#يتببببع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!